Magkalipay sa Inyo Paglaum sa Ginharian!

“Magkalipay sa inyo paglaum. Magbatas sa inyo kapipit-an.”​—⁠ROMA 12:⁠12.

1. Ngaa makasapo kita sing kalipay sa pagpakig-upod kay Jehova, kag ano ang ginapalig-on ni apostol Pablo sa mga Cristiano nga himuon?

“ANG malipayon nga Dios.” (1 Timoteo 1:11) Nagalaragway gid ini sing maayo kay Jehova! Ngaa? Bangod ang tanan niya nga mga binuhatan nagdala sing dakung kalipay sa iya. Sanglit si Jehova amo ang Tuburan sang tanan nga maayo kag makalilipay nga mga butang, ang tanan sang iya intelihente nga mga tinuga makasapo sing kalipay sa pagpakig-upod nila sa iya. Sing nagakaigo, ginlaygayan ni apostol Pablo ang mga Cristiano nga apresyahon ang ila makalilipay nga pribilehiyo nga makilala si Jehova nga Dios, nga magpasalamat tungod sang tanan Niya nga matahom nga mga dulot sang pagpanuga, kag magkalipay sa mahigugmaon nga kalulo nga ginpakita Niya sa ila. Si Pablo nagsulat: “Magkalipay pirme sa Ginuo. Sa liwat magasiling ako, Magkalipay!”​—⁠Filipos 4:​4; Salmo 104:⁠31.

2. Anong paglaum ang nagadala sing daku nga kalipay, kag ano ang ginalaygay sa mga Cristiano nga himuon may kaangtanan sini nga paglaum?

² Ginasunod bala sang mga Cristiano ining laygay nga ginhatag ni Pablo? Huo! Ang espirituwal nga mga kauturan ni Jesucristo nagakalipay sa mahimayaon nga paglaum nga ginbuksan sang Dios para sa ila. (Roma 8:​19-21; Filipos 3:​20, 21) Huo, nakahibalo sila nga magapakigbahin sila sa pagtuman sang dakung paglaum para sa palaabuton sang katawhan, lunsay sa buhi kag sa patay, paagi sa pag-alagad kaupod ni Cristo sa iya langitnon nga panguluhan sang Ginharian. Handurawa kon daw ano ka daku ang ila kalipay sa ila mga pribilehiyo subong mga masigkamanunubli, nga nagaalagad subong mga hari kag mga saserdote! (Bugna 20:6) Daw ano ang ila kalipay samtang ginabuligan nila ang matutom nga katawhan nga matigayon ang kahimpitan kag nagabulig sa pag-ubay sang pagpasag-uli sang Paraiso sa aton duta! Sa pagkamatuod, ang tanan nga mga alagad sang Dios may “paglaum sa kabuhi nga walay katapusan nga ginsaad sang Dios, nga indi makabutig, sa wala pa ang mga katuigan nga nagligad.” (Tito 1:2) Bangod sining matahom nga paglaum, ginapalig-on ni Pablo ang tanan nga mga Cristiano: “Magkalipay sa inyo paglaum.”​—⁠Roma 12:⁠12.a

Matuod nga Kalipay—Isa ka Kinaiya sang Tagipusuon

3, 4. (a) Ano ang kahulugan sang termino nga “pagkalipay,” kag daw ano kasunson dapat magkalipay ang mga Cristiano? (b) Ano ang matuod nga kalipay, kag sa ano ini nasandig?

³ Ang “pagkalipay” nagakahulugan sang pagbatyag kag pagpabutyag sing kalipay; wala ini nagakahulugan nga mangin sa dalayon nga kahimtangan sang kasadya, ukon dimapunggan nga kalipay. Ang mga berbo nga katumbas sa Hebreo kag Griego nga mga tinaga nga gingamit sa Biblia para sa “kasadya,” “paghugyaw,” kag “kalipay” nagapabutyag sang nasulod nga balatyagon kag naguwa nga pagpakita sing kalipay. Ang mga Cristiano ginapalig-on nga “magpadayon sa pagkalipay,” “magkalipay pirme.”​—⁠2 Corinto 13:​11; 1 Tesalonica 5:⁠16.

⁴ Apang paano ang isa pirme nga magkalipay? Posible ini bangod ang matuod nga kalipay isa ka kinaiya sang tagipusuon, isa ka tudok kag nasulod nga kinaiya, isa ka espirituwal. (Deuteronomio 28:​47; Hulubaton 15:​13; 17:22) Isa ini ka bunga sang espiritu sang Dios, nga ginlista ni Pablo sunod lamang sa gugma. (Galacia 5:22) Subong nasulod nga kinaiya, wala ini nasandig sa naguwa nga mga butang, ni bisan sa aton mga kauturan. Apang nasandig ini sa balaan nga espiritu sang Dios. Kag naghalin ini sa tudok kag nasulod nga kaayawan sa paghibalo nga yara sa imo ang kamatuoran, ang paglaum sang Ginharian, kag nga nagahimo ikaw sang kon ano ang nagapahamuot kay Jehova. Gani, ang kalipay indi lamang isa ka batasan sang personalidad nga duna sa aton; bahin ini sang “bag-ong personalidad,” ang koleksion sang mga kinaiya nga nagapakilala kay Jesucristo.​—⁠Efeso 4:​24; Colosas 3:⁠10.

5. San-o kag paano mahimo nga may naguwa nga pagpadayag sang kalipay?

⁵ Bisan pa ang kalipay isa ka nasulod nga balatyagon nga ginabuylog sa malaragwayon nga tagipusuon, walay sapayan mahimo ini ipakita sa guwa kon kaisa. Ano ining talagsa, naguwa nga pagpakita sing kalipay? Mahimo ini mangin bisan ano halin sa pagkatawhay sang pangguyahon tubtob sa aktuwal nga paglukso sa kalipay. (1 Hari 1:​40; Lucas 1:​44; Binuhatan 3:​8; 6:15) Nagakahulugan bala ini, nian, nga ang mga tawo nga indi palahambal ukon wala pirme nagayuhum wala sing kalipay? Indi! Ang matuod nga kalipay indi pirme mapakita sa pirme nga paghambal, pagkadlaw, pagyuhum, ukon pagngirit. Ang mga sirkunstansia nagahimo sang kalipay nga mapadayag sa lainlain nga paagi. Indi lamang ang kalipay ang nagahimo sa aton nga mainabyanon sa Kingdom Hall kundi, sa baylo, ang aton utudnon nga pagpalangga kag gugma.

6. Ngaa ang mga Cristiano pirme magakalipay bisan pa nagaatubang sila sing dimaayo nga mga kahimtangan?

⁶ Ang dalayon nga bahin sang kalipay amo ang nasulod nga pagkapermanente sini subong tinagipusuon nga bahin sang bag-ong personalidad sang Cristiano. Amo ini ang nagapaposible nga magkalipay pirme. Sa pagkamatuod, kon kaisa mahimo kita tublagon sang pila ka butang, ukon mahimo kita magaatubang sing dimaayo nga mga kahimtangan. Apang sarang gihapon kita magakalipay sa aton tagipusuon. Ang iban nga mga Cristiano anay mga ulipon, nga may mga agalon nga mabudlay pahamut-an. Mahimo bala ining mga Cristiano magkalipay pirme? Huo, bangod ang ila paglaum sa Ginharian kag kalipay yara sa ila tagipusuon.​—⁠Juan 15:​11; 16:​24; 17:⁠13.

7. (a) Ano ang ginsiling ni Jesus nahanungod sa kalipay sa idalom sang kapipit-an? (b) Ano ang nagabulig sa aton nga mabatas ang kapipit-an, kag sin-o ang naghatag sing pinakamaayo nga huwaran nahanungod sini?

⁷ Pagkatapos si apostol Pablo nagsiling: “Magkalipay sa inyo paglaum,” nagdugang sia: “Magbatas sa inyo kapipit-an.” (Roma 12:12) Naghambal man si Jesus sang kalipay sa kapipit-an sang nagsiling sia sa Mateo 5:​11, 12: “Malipayon kamo kon ang mga tawo magpasipala sa inyo kag maghingabot sa inyo . . . Magkalipay kamo kag magkasadya, kay ang inyo balus daku sa langit.” Ang kalipay kag kasadya diri indi kinahanglan nga mangin isa ka literal nga naguwa nga pagpadayag; amo gid ini ang tudok kag nasulod nga kaayawan sang isa sa pagpahamuot kay Jehova kag kay Jesucristo kon nagatindog nga malig-on sa idalom sang pagtilaw. (Binuhatan 5:41) Sa aktuwal, ang kalipay amo ang nagabulig sa aton nga mabatas ang kapipit-an. (1 Tesalonica 1:6) Sa sini, si Jesus nagahatag sing pinakamaayong huwaran. Ang Kasulatan nagasiling sa aton: “Tungod sa kalipay nga ginbutang sa iya atubang nagbatas sia sang usok sang pag-antos.”​—⁠Hebreo 12:⁠2.

Pagkalipay sa Paglaum Walay Sapayan sang mga Problema

8. Anong mga problema ang mahimo ginaatubang sang mga Cristiano, apang ngaa ang mga problema wala nagakuha sang kalipay sang isa ka Cristiano?

⁸ Ang mangin alagad ni Jehova wala nagahilway sa isa sa mga problema. Mahimo nga may problema sa pamilya, mapiot nga pangabuhi, mapigaw nga panglawason, ukon pagkapatay sang mga hinigugma. Bisan pa makapasubo ini, wala sini ginakuha ang aton sadsaran para magkalipay sa paglaum sang Ginharian, ang aton nasulod nga kalipay sa aton tagipusuon.​—⁠1 Tesalonica 4:⁠13.

9. Ano anay ang mga problema ni Abraham, kag paano naton nahibaluan nga may kalipay sia sa iya tagipusuon?

⁹ Binagbinaga si Abraham, halimbawa. Ang kabuhi indi pirme makalilipay para sa iya. May mga problema sia sa pamilya. Ang iya babayi, si Agar, kag ang iya asawa, si Sara, indi ayuhay. Pirme sila nagabangig. (Genesis 16:​4, 5) Gintiawtiawan ni Ismael si Isaac, ginhingabot sia. (Genesis 21:​8, 9; Galacia 4:29) Sang ulihi, ang hinigugma nga asawa ni Abraham, nga si Sara, napatay. (Genesis 23:2) Walay sapayan sining mga problema, nagkalipay sia bangod sang paglaum sang Binhi sang Ginharian, ang Binhi ni Abraham nga paagi sa iya ang tanan nga panimalay sa duta magapakamaayo sang ila kaugalingon. (Genesis 22:​15-18) Upod ang kalipay sa iya tagipusuon, nagbatas sia nga nagaalagad kay Jehova sa isa ka gatos ka tuig pagkatapos bayaan ang iya tumandok nga siudad sang Ur. Busa ginsulat ini tuhoy sa iya: “Ginahulat niya ang siudad nga may matuod nga mga sadsaran, nga ang manunukod kag manugbuhat sini amo ang Dios.” Bangod sang pagtuo ni Abraham sa nagapakari nga Mesianikong Ginharian, si Ginuong Jesus, nga gintangdo na sang Dios nga mangin Hari, nakasiling: “Si Abraham . . . nagkalipay sing daku sa pagtan-aw sang akon adlaw, kag nakita niya ini kag sia nagkasadya.”​—⁠Hebreo 11:​10; Juan 8:⁠56.

10, 11. (a) Ano ang dapat naton awayon nga mga Cristiano, kag paano kita ginaluwas? (b) Ano ang nagatumbas sang aton diikasarang sa pagpakig-away sing himpit batok sa aton makasasala nga unod?

¹⁰ Subong dihimpit nga mga tawo, may yara man kita makasasala nga unod nga dapat batuan, kag ining pagpakig-away nga himuon kon ano ang husto mahimo nga tuman kabudlay. Apang, ang pagpakig-away naton batok sa aton mga kaluyahon wala nagakahulugan nga wala kita sing paglaum. Si Pablo nagkasubo bangod sining pagpakig-away, kag nagsiling sia: “Sin-o bala ang magaluwas sa akon sa sining lawas sang kamatayon? Nagapasalamat ako sa Dios paagi kay Jesucristo nga aton Ginuo!” (Roma 7:​24, 25) Paagi kay Jesucristo kag sa gawad nga gin-aman niya, ginluwas kita.​—⁠Roma 5:​19-21.

¹¹ Ang halad-gawad ni Cristo nagatumbas sang aton diikasarang sa pagpakig-away sing himpit. Sarang kita magakalipay sa sining gawad bangod nagapaposible ini sang natinluan nga konsiensia kag sang kapatawaran sang aton mga sala. Sa Hebreo 9:​14, si Pablo nagapamulong nahanungod sa “dugo ni Cristo” nga may ikasarang sa ‘pagtinlo sang aton mga konsiensia gikan sa patay nga mga buhat.’ Busa, ang konsiensia sang mga Cristiano indi kinahanglan nga pabug-atan sang mga pagtagudili kag mga balatyagon nga nakasala. Ini, kag ang aton paglaum, nagahatag sing makusog nga puwersa para sa makalilipay nga kasadya. (Salmo 103:​8-14; Roma 8:​1, 2, 32) Nagahunahuna sang aton paglaum, kita tanan mapalig-on sa pagpakig-away sing madinalag-on.

Paghupot Pirme sa Hunahuna sang Aton Paglaum

12. Anong paglaum ang sarang mahunahuna sang hinaplas nga mga Cristiano?

¹² Importante para sa ginhaplas sang espiritu nga nagkalabilin kag sa iban nga mga karnero nga huptan pirme sa hunahuna ang ila “paglaum sang kaluwasan,” nagasuksok sini subong isa ka nagaamlig nga pandung. (1 Tesalonica 5:8) Sarang mahunahuna sang hinaplas nga mga Cristiano ang matahom nga pribilehiyo nga matigayon ang pagkadimamalatyon sa langit, nga makakadto kay Jehova nga Dios, kag makaagom sing personal nga pagpakig-upod sa ginhimaya nga si Jesucristo kag sa mga apostoles kag sa tanan nga iban pa sang 144,000, nga naghupot sang ila integridad sa mga siglo. Daw ano ka dimalaragway nga manggad sang pagpakig-upod!

13. Ano ang balatyagon sang hinaplas nga yari pa sa duta nahanungod sa ila paglaum?

¹³ Kamusta ang balatyagon sang pila ka hinaplas nga yari pa sa duta nahanungod sa ila paglaum sang Ginharian? Sarang ini matingob sa pinamulong ni F. W. Franz, presidente sang Watch Tower Society, nga nabawtismuhan sadtong 1913: “Ang amon paglaum isa ka sigurado nga butang, kag matuman ini sing bug-os tubtob sa kada katapusan sang 144,000 ka katapo sang diutay nga panong sa kasangkaron nga labaw sa nahanduraw na namon. Kami nga nagkabilin nga yari na sadtong tuig 1914, sang ginpaabot namon tanan nga magkadto sa langit, wala nagdula sang amon pagpabili sa sinang paglaum. Kag mas mabaskog kami para sa sini sang sa una, kag ginaapresyar namon sing labi nga nagahulat kami para sini. Isa ini ka butang nga takus hulaton, bisan pa nagakinahanglan ini sing isa ka milyon ka tuig. Mas mataas sang sa nagligad ang akon pagtamod sa amon paglaum, kag indi ko gid luyag nga mawasi ang akon apresasyon sa sini. Ang paglaum sang diutay nga panong nagahatag man sing pasalig nga ang ginapaabot sang dakung kadam-an sang iban nga mga karnero, nga indi gid mapaslawan, matuman nga labaw sa amon pinakamaathag nga imahinasyon. Amo sina kon ngaa nagapanguyapot kami sing hugot tubtob sini nga takna, kag magapanguyapot kami sing hugot tubtob aktuwal nga pamatud-an sang Dios nga pagatumanon niya ang iya ‘hamili kag matahom katama nga mga saad.’ ”​—⁠2 Pedro 1:​4; Numeros 23:​19; Roma 5:⁠5.

Pagkalipay Karon sa Paglaum nga Paraiso

14. Anong paglaum ang dapat pirme dumdumon sang dakung kadam-an?

¹⁴ Inang ekspresyon sang tuman ka makalilipay nga pagtuo nagapukaw sa dakung kadam-an sang iban nga mga karnero sing dakung rason sa pagkasadya. (Bugna 7:​15, 16) Dapat nila huptan sa hunahuna ang paglaum nga makalampuwas sa Armagedon. Huo, hulata nga makita ang Ginharian sang Dios nga magabindikar sang bug-os uniberso nga pagkasoberano ni Jehova nga Dios kag magapakabalaan sang iya mahimayaon nga ngalan paagi sa pagpahanabo sang dakung kapipit-an, nga magatinlo sang duta sang mga malaut nga sa ila nangin dios ang Yawa. Daw ano nga kalipay ang makalampuwas sa sinang dakung kapipit-an!​—⁠Daniel 2:​44; Bugna 7:⁠14.

15. (a) Anong hilikuton sang pagpang-ayo ang ginhimo ni Jesus sang yari sia sa duta, kag ngaa? (b) Ano ang mga kinahanglanon sa kapagros sang mga makalampuwas sa Armagedon, kag ngaa tuhay sila sa mga banhawon?

¹⁵ Nahanungod sa dakung kadam-an, ang Bugna 7:​17 nagasiling: “Ang Kordero . . . magabantay sa ila kag magatuytoy sa ila sa mga tuburan sang tubig nga nagahatag sing kabuhi. Kag ang Dios magapahid sang tagsa ka luha sa ila mga mata.” Bisan pa ining tagna may espirituwal nga katumanan karon, makita sang mga makalampuwas sa Armagedon nga matuman ini sing literal. Paano? Ti, ano ang ginhimo ni Jesus sang yari sia sa duta? Gin-ayo niya ang may sablag, ginpalakat ang piang, ginbuksan ang dulunggan sang bungol kag mata sang bulag, kag gin-ayo niya ang aruon, paralitiko, kag “tanan nga sahi sang balatian kag tanan nga sahi sang masakit.” (Mateo 9:​35; 15:​30, 31) Indi bala nga amo sina ang ginakinahanglan sang mga Cristiano karon? Dalhon sang dakung kadam-an ang balatian kag masakit sang daan nga kalibutan pasulod sa bag-ong kalibutan. Ano ang paabuton naton nga himuon sang Kordero nahanungod sina? Ang mga kinahanglanon sang mga makalampuwas sa Armagedon tuhay gid katama sa mga kinahanglanon sang mga pagabanhawon. Ang mga banhawon mahimo tugahon liwat nga may bug-os, maayo, mapagros nga lawas, bisan wala pa sing tawhanon nga pagkahimpit. Bangod sang milagro sang pagbanhaw, indi na nila kinahanglan ang pagbulong sang ila mga sablag anay paagi sa milagro sang pag-ayo. Sa pihak nga bahin, bangod sang ila pinasahi nga eksperiensia sang paglampuwas sa Armagedon, ang milagruso nga pag-ayo amo ang ginakinahanglan kag pagabatunon sang madamo sa dakung kadam-an. Mahimo nga ang daku nga katuyuan sang pagpang-ayo ni Jesus amo ang paglaragway para sa kalig-unan sang dakung kadam-an sang makalilipay nga paglaum nga indi lamang sila makalampuwas kundi bulngon man pagkatapos.

16. (a) San-o mahimo nga mahanabo ang milagruso nga pag-ayo sa mga makalampuwas sa Armagedon, kag upod ang anong resulta? (b) Sa anong paglaum padayon kita nga magakalipay sa Milenio?

¹⁶ Ang milagruso nga pagpang-ayo makatarunganon nga mahanabo sa tunga sang mga makalampuwas sa Armagedon dili madugay pagkatapos sang Armagedon kag antes magasugod ang pagbanhaw. (Isaias 33:​24; 35:​5, 6; Bugna 21:​4; ipaanggid ang Marcos 5:​25-29.) Nian ang katawhan magahaboy sang mga antipara, mga baston, mga saklay, wheel­chair, pustiso, hear­ing aids, kag iban pa. Isa gid ka rason sa pagkalipay! Inang ginhimo anay nga pagpang-ayo ni Jesus nagakaigo gid sa papel sang mga makalampuwas sa Armagedon subong sadsaran sang bag-ong duta! Ang nagasablag nga mga balatian pagadulaon agod ining mga makalampuwas makahulag upod ang bug-os nga kalipay, nagahulat sing malangkagon sang makatilingala nga pagpanghikot sang Milenio nga yara lamang sa unahan nila, nga wala ginapahinay sang mga kasisit-an nga ginadala sa ila sang daan nga kalibutan. Kag sa bug-os nga Milenio, magakalipay sila sa paglaum nga malab-ot ang kabug-osan sang himpit tawhanon nga kabuhi sa katapusan sang isa ka libo ka tuig.

17. Ano ang mga kalipay samtang ang hilikuton sang pagpasag-uli sa Paraiso nagapadayon?

¹⁷ Kon amo sina ang imo paglaum, hunahunaa man ang kasadya nga makapakigbahin sa pagpasag-uli sang Paraiso sa duta. (Lucas 23:​42, 43) Walay duhaduha nga ang mga makalampuwas sa Armagedon magabulig sa pagtinlo sang duta kag busa makaaman sing matahom nga mga duog diin pagabanhawon ang mga patay. Ang lubong pagabuslan sang sesyon sa pag-abiabi sa mga banhawon, lakip sa aton mismo mga hinigugma nga napatay. Kag hunahunaa ang makalilipay nga pagpakig-upod sa matutom nga mga lalaki kag mga babayi sang nagligad nga mga siglo. Sin-o labi na ang luyag mo masugilanon? Si Abel bala, si Enoc, si Noe, si Job, si Abraham, si Sara, si Isaac, si Jacob, si Jose, si Moises, si Josue, si Rahab, si Debora, si Samson, si David, si Elias, si Eliseo, si Jeremias, si Ezequiel, si Daniel, ukon si Juan Bautista? Ti, kon amo, ining makalilipay nga palaabuton bahin man sang imo paglaum. Mahimo ka makasugilanon sa ila, makatuon sa ila, kag makapangabudlay kaupod nila sa paghimo sang bug-os nga duta nga isa ka paraiso.

18. Anong dugang nga kalipay ang mahunahuna naton?

¹⁸ Handurawa, man, ang manamit nga pagkaon, putli nga tubig, kag matinlo nga hangin, upod sa aton duta nga napasag-uli sa himpit nga pagkatimbang sa ekolohiya sa kon paano ini anay gintuga ni Jehova. Ang kabuhi nian mangin, indi lamang walay kapagsik nga pagkalipay sang kahimpitan, kundi isa ka aktibo kag makahulugan nga pagpakigbahin sa makalilipay nga mga hilikuton. Hunahunaa ang bug-os kalibutan nga katilingban sang mga tawo nga wala sing krimen, egotismo, kahisa, inaway​—⁠pag-ulutod diin ang bunga sang espiritu ginapalambo kag ginapatubas sang tanan. Makakulunyag gid!​—⁠Galacia 5:​22, 23.

Paglaum nga Nagahimo sang Kabuhi nga Takus Ikabuhi

19. (a) San-o maagom ang kalipay nga ginasambit sa Roma 12:​12? (b) Ngaa dapat kita mangin determinado nga indi pagtugutan ang mga problema sa kabuhi nga magapahigad sang aton paglaum?

¹⁹ Ang ginapaabot nga natuman indi na paglaum, gani ang kalipay nga ginapalig-on ni Pablo sa Roma 12:​12 maagom na karon. (Roma 8:24) Ang paghunahuna lamang sa palaabuton nga mga pagpakamaayo nga dalhon sang Ginharian sang Dios isa ka kabangdanan para magkalipay kita sa sinang paglaum karon. Gani mangin determinado nga indi pagtugutan ang mga lulan sang kabuhi sa malaut nga kalibutan nga magapahigad sang imo mahimayaon nga paglaum. Indi makapoy kag mag-untat, nga malimot sa paglaum sa unahan. (Hebreo 12:3) Ang pagbiya sang Cristianong dalanon indi makalubad sang imo mga problema. Dumduma, kon may isa nga nagauntat sa pag-alagad sa Dios bangod sang tanan nga mga problema sa kabuhi karon, ginabug-atan gihapon sia sang mga problema, apang nawasi niya ang paglaum kag gani nawasi niya ang posibilidad nga magkalipay sa matahom nga paglaum sa unahan.

20. Ano ang epekto sang paglaum sang Ginharian sa mga nagapati sa sini, kag ngaa?

²⁰ Ang katawhan ni Jehova may rason gid agod magkabuhi sing malipayon. Ang ila masanag kag nagapukaw nga paglaum nagahimo sang kabuhi nga takus ikabuhi. Kag wala nila ginatago sa ila lamang kaugalingon ining masadya nga paglaum. Indi, nalangkag sila nga ipaambit ini sa iban. (2 Corinto 3:12) Gani ang nagatuo sa paglaum sang Ginharian katawhan nga masinaligon, kag ginatinguhaan nila nga palig-unon ang iban paagi sa pagsugid sa ila sang maayong balita halin sa Dios. Nagapuno ini sang kabuhi sang mga nagabaton sang mensahe sang pinakamakalilipay nga paglaum nga ginhatag na sa katawhan sa kabilugan​—⁠ang paglaum sang Ginharian nga magapasag-uli sang Paraiso sa duta. Kon indi ini pagbatunon sang katawhan, padayon gihapon kita nga magkalipay bangod may paglaum kita. Ang mga wala nagapamati amo ang pierde; indi kita.​—⁠2 Corinto 4:​3, 4.

21. Ano ang malapit na, kag paano naton dapat tamdon ang aton paglaum?

²¹ Ang saad sang Dios amo: “Tuluka! Ginahimo ko nga bag-o ang tanan nga butang.” (Bugna 21:5) Ang bag-ong kalibutan upod ang makalilipay kag walay katapusan nga mga pagpakamaayo sini malapit na. Ang aton paglaum​—⁠para sa kabuhi sa langit ukon sa paraiso nga duta​—⁠hamili; manguyapot sa sini. Sa sining ital-ital nga katapusan nga mga adlaw, sing labi pa sang sa nagligad, tamda ini “subong nga sinipit sang kalag nga malig-on kag dimationg.” Bangod sang aton paglaum nga nasipit kay Jehova, “igang nga dayon​—⁠ang Igang sang mga panag-on,” pat-od gid nga may yara kita mabakod kag makalilipay nga rason karon mismo nga ‘magkalipay sa paglaum’ nga ginabutang sa atubangan naton.​—⁠Hebreo 6:​19; Isaias 26:​4, The Amplified Bible.

[Footnote]

Mga Pamangkot sa Repaso

◻ Ano ang dakung paglaum sang katawhan?

◻ Ano ang matuod nga kalipay?

◻ San-o mahimo nga mahanabo ang milagruso nga pagpang-ayo sa mga makalampuwas sa Armagedon?

◻ Ngaa indi naton dapat pagtugutan ang mga problema sa kabuhi nga magpahigad sang aton paglaum?

◻ Anong kalipay ang ginapaabot mo sa bag-ong kalibutan?

[Laragway sa pahina 9]

Indi bala sini punuan ang imo tagipusuon sing kalipay nga masaksihan ang sahi sang mga pagpang-ayo nga ginhimo ni Jesus?

[Laragway sa pahina 10]

Ang mga nagakalipay sa Ginharian nagapalig-on sa tanan paagi sa pagpaambit sang ila paglaum