Magpadayon nga Nagamata sa “Tion sang Katapusan”
“Magpadayon nga nagabantay, magpadayon nga nagamata, kay wala ninyo mahibalui kon san-o ang gintangdo nga tion.”—MARCOS 13:33.
1. Ano ang dapat mangin reaksion naton samtang nagapadayag ang makakulunyag nga mga hitabo sa sining “tion sang katapusan”?
SAMTANG nagapadayag ang makakulunyag nga mga hitabo sa sining “tion sang katapusan,” ano dapat ang mangin reaksion sang mga Cristiano? (Daniel 12:4) Wala sila ginapabay-an nga nagaduhaduha. Ginpamulong ni Jesucristo ang tagna nga nagaunod sing mga tanda nga nagakatuman sa sining ika-20 nga siglo. Gintagna niya ang madamo nga butang nga nagtanda sining panahon sugod sang 1914 subong tumalagsahon. Bangod nahibaluan niya ang tagna ni Daniel tuhoy sa “tion sang katapusan,” gindugang ni Jesus ang iya daku nga tagna paagi sa pagpanugyan sa iya mga disipulo nga “magpadayon nga nagamata.”—Lucas 21:36.
2. Ngaa daku ang kinahanglanon nga magpadayon nga nagamata sa espirituwal?
2 Ngaa magpadayon nga nagamata? Bangod amo ini ang labing makatalagam nga tion sa maragtas sang tawo. Malaglagon para sa mga Cristiano nga magpadaug sa espirituwal nga pagkatuyo sa sining tion. Kon magpabayabaya kita ukon pabug-atan ang aton tagipusuon sing mga kabalaka sa kabuhi, mangin sa katalagman kita. Sa Lucas 21:34, 35, si Jesucristo nagpaandam sa aton: “Bantayi ang inyo kaugalingon nga ang inyo tagipusuon indi gid mabug-atan sang sobra nga pagkaon kag lakas nga pag-inum kag sang mga kabalaka sa kabuhi, kag yadtong adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta.”
3, 4. (a) Ano ang buot silingon ni Jesus sa pagsiling nga ang adlaw sang kasingkal sang Dios hinali nga magaabot sa katawhan “subong sang siod”? (b) Sanglit ang Dios wala nagabutang sing siod, ngaa ina nga adlaw wala ginapaabot nga magadakop sa katawhan sa kabilugan?
3 May maayo nga rason ang pagsiling ni Jesus nga ang adlaw ni Jehova ‘magaabot sa aton sing hinali subong sang siod.’ Ang isa ka siod masami nga ginasangkapan sing pisi nga pangsiod, kag ginagamit ini sa pagdakop sa mga pispis kag mga mamalya. Ang siod may tiglapak, kag kon matapakan ini, ang tiglapak magapisik. Nian magahugot ang siod, kag ang biktima madakpan. Ini tanan tuman ka hinali nga nagakatabo. Sa kaanggid nga paagi, siling ni Jesus, ang mga indi aktibo sa espirituwal makibot kag madakpan sa “adlaw sang kasingkal” sang Dios.—Hulubaton 11:4.
4 Si Jehova nga Dios bala ang nagabutang sing siod para sa katawhan? Indi, wala sia nagahulat sa pagdakop sa katawhan nga wala nagabantay agod laglagon sila. Apang yadto nga adlaw magadakop sa katawhan sa kabilugan bangod wala nila ginauna ang Ginharian sang Dios. Ginasunod nila ang ila kaugalingon nga dalanon sa mga paghimud-os sa kabuhi, nga wala ginasapak ang kahulugan sang mga nagakatabo sa palibot nila. Apang, wala sini ginabag-o ang iskedyul sang Dios. May gintalana sia nga tion para sa pagpakighusay. Kag, sing maluluy-on, wala niya ginapabay-an ang katawhan nga wala sing hinalung-ong sa iya nagapakari nga paghukom.—Marcos 13:10.
5, 6. (a) Bangod sang nagapakari nga paghukom, anong mahigugmaon nga aman ang nahimo sang Manunuga para sa mga tawo, apang ano ang kabilugan nga resulta? (b) Ano ang pagabinagbinagon agod buligan kita nga magpadayon sa pagmata?
5 Ining paandam isa ka mahigugmaon nga aman sa bahin sang dungganon nga Manunuga, nga interesado sa kaayuhan sang mga tawo diri sa iya simbuliko nga palatungan sang tiil. (Isaias 66:1) Ginahigugma niya ang mga pumuluyo sang duog nga sa diin ang iya mga tiil ginalaragway nga nagapahuway. Gani paagi sa iya dutan-on nga mga embahador kag mga mensahero, ginapaandaman niya sila tuhoy sa mga hitabo sa palaabuton nila. (2 Corinto 5:20) Apang, walay sapayan sang tanan nga paandam nga nahatag, yadto nga mga hitabo magaabot sa pamilya sang tawo nga wala ginapaabot nga subong bala daw nakatapak sila sa isa ka siod. Ngaa? Bangod ang kalabanan nga katawhan nagakatulog sa espirituwal. (1 Tesalonica 5:6) Diutay lamang ang nagapamati sa paandam kag maluwas pasulod sa bag-ong kalibutan sang Dios.—Mateo 7:13, 14.
6 Paano, nian, kita makapadayon nga nagamata sa sining tion sang katapusan agod maisipan kita sa tunga sang mga maluwas? Ginaaman ni Jehova ang kinahanglanon nga bulig. Talupangdon naton ang pito ka butang nga sarang naton mahimo.
Awaya ang mga Butang nga Magaagaw sang Igtalupangod
7. Anong paandam tuhoy sa mga butang nga nagaagaw sang igtalupangod ang ginhatag ni Jesus?
7 Una, dapat naton awayon ang mga butang nga magaagaw sang igtalupangod. Sa Mateo 24:42, 44, si Jesus nagsiling: “Busa, padayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo. Bangod sini maghanda man kamo, kay sa takna nga wala ninyo paghunahunaa, magakari ang Anak sang tawo.” Ang pamulong nga gingamit diri ni Jesus nagapakita nga sa sining makahalanguyos nga tion, magalutaw ang madamo nga butang nga magaagaw sang igtalupangod, kag makadul-ong ini sa kalaglagan. Sang adlaw ni Noe, nawili ang katawhan sa madamo nga butang. Subong resulta, ang nawili nga katawhan “wala magtalupangod” sang nagakatabo sadto, kag ang Anaw naglambas sa ila tanan. Sing nagakahisuno, si Jesus nagpaandam: “Amo man sa presensia sang Anak sang tawo.”—Mateo 24:37-39.
8, 9. (a) Paano ang kinaandan nga mga kabalaka sa kabuhi makatalagam nga makaagaw sang aton igtalupangod? (b) Anong mga paandam ang ginhatag sa aton nanday Pablo kag Jesus?
8 Dumduma, man, nga sa iya paandam sa Lucas 21:34, 35, ginabinagbinag ni Jesus ang ordinaryo nga mga butang sang kabuhi, subong sang pagkaon, pag-inum, kag mga kabalaka sa pagpangabuhi. Mga butang ini nga kinaandan sa tanan nga tawo, lakip ang mga disipulo ni Ginuong Jesus. (Ipaanggid ang Marcos 6:31.) Ining mga butang mahimo nga wala sing halit sa ila kaugalingon, apang kon tugutan, sarang ini makaagaw sang aton igtalupangod, makapawili sa aton, kag sa amo bangdan sang aton makatalagam nga pagkatuyo sa espirituwal.
9 Busa, indi naton pagpatumbayaan ang butang nga may pinakadaku nga importansia—ang pagtigayon sang balaan nga kahamuot. Sa baylo nga mawili sa ordinaryo nga mga butang sang kabuhi, gamiton naton ini sa limitado lamang nga kadakuon nga kinahanglanon sa pagsakdag sa aton. (Filipos 3:8) Indi sini dapat pagwahigon ang mga interes sang Ginharian. Subong ginasiling sang Roma 14:17, “ang ginharian sang Dios wala nagakahulugan sing pagkaon kag pag-inum, kundi nagakahulugan sing pagkamatarong kag paghidait kag kalipay sa balaan nga espiritu.” Dumduma ang mga pulong ni Jesus sang sia nagsiling: “Padayon, nian, nga pangitaa anay ninyo ang ginharian kag ang iya pagkamatarong, kag tanan ini nga butang idugang sa inyo.” (Mateo 6:33) Dugang pa, sa Lucas 9:62, si Jesus nagsiling: “Wala sing tawo nga nagakapot sa arado kag nagabalikid nga takus sa ginharian sang Dios.”
10. Ano ang katalagman kon indi naton itulok ang aton mga mata sing diretso sa tulumuron?
10 Sa tion nga magsugod kita sa pag-arado, sa malaragwayon nga paghambal, dapat diretsuhon naton ang linya. Ang manug-arado nga nagabalikid indi makaarado sing diretso. Ang iya igtalupangod ginaagaw kag madali sia malinga ukon mapadulog sang pila ka sablag. Indi naton pagsundon ang asawa ni Lot, nga nagbalikid kag wala maluwas. Dapat naton itulok ang aton mga mata sing diretso sa aton tulumuron. Agod mahimo ina, dapat naton awayon ang mga butang nga nagaagaw sang igtalupangod.—Genesis 19:17, 26; Lucas 17:32.
Magpangamuyo sing Hanuot
11. Ano ang ginpadaku ni Jesus sa tapos kita paandaman tuhoy sa katalagman nga maagaw ang aton igtalupangod sang iban nga butang?
11 Apang, may dugang pa kita nga mahimo agod magpabilin nga nagamata. Ang importante nga ikaduha nga butang amo: Magpangamuyo sing hanuot. Sa tapos kita mapaandaman batok sa kinaandan nga mga kabalaka sa kabuhi nga makaagaw sang aton igtalupangod, ginhatag ni Jesus ining laygay: “Apang magpadayon kamo nga nagamata, nga nagaampo sa tanan nga tion nga makasarang kamo sa pagpalagyo sa sini tanan nga butang nga mahanabo, kag sa pagtindog sa atubangan sang Anak sang tawo.”—Lucas 21:36.
12. Ano nga sahi sang pangamuyo ang kinahanglanon, kag ano ang resulta?
12 Sa amo, dapat kita mag-ampo sing dalayon nahanungod sa katalagman sang aton kahimtangan kag sang kinahanglanon nga mangin alisto kita. Gani mangamuyo kita sa Dios nga may hanuot nga mga pangabay. Si Pablo nagasiling sa Roma 12:12: “Magpadayon sing malig-on sa pangamuyo.” Kag sa Efeso 6:18, aton mabasa: “Paagi sa tagsa ka porma sang pangamuyo kag pag-ampo . . . , magpadayon kamo sa pagpangamuyo sa tagsa ka okasyon sa espiritu. Kag sa sina nga katuyuan magpadayon kamo nga nagamata sa tanan nga tion.” Wala ini nagakahulugan nga ang pangamuyo isa ka butang nga indi importante. Ang aton gid pagkabuhi yara sa katalagman. Busa dapat kita makitluoy sing hanuot nga buligan kita sang Dios. (Ipaanggid ang Hebreo 5:7.) Sa sinang paagi mahuptan naton ang aton kaugalingon sa kiliran ni Jehova. Wala na sing makabulig sa aton sa pagtigayon sini sang sa ‘mag-ampo [kita] sa tanan nga tion.’ Nian huptan kita ni Jehova sa isa ka kahimtangan nga nagabantay. Daw ano ka importante, nian, nga magpadayon kita sa pagpangamuyo!
Mag-unong sa Organisasyon sang Dios kag sa Hilikuton Sini
13. Ano nga sahi sang pagpakig-upod ang kinahanglanon agod magpabilin nga nagamata?
13 Luyag naton nga likawan ining tanan nga butang nga mahanabo sa kalibutan. Luyag naton nga magtindog sa atubangan sang Anak sang tawo, kag matigayon ang iya kahamuot. Sa sining katuyuan may ikatlo nga butang nga sarang naton mahimo: Mag-unong sa teokratikong organisasyon ni Jehova. Dapat kita makig-angot sa sina nga organisasyon nga wala sing kondisyon kag makigbahin sa mga hilikuton sini. Sa sining paagi maathag nga mapakilala naton ang aton kaugalingon subong mga Cristiano nga nagabantay.
14, 15. (a) Ang pagpakigbahin sa ano nga hilikuton ang magabulig sa aton nga magpadayon nga nagamata? (b) Sin-o ang magadesisyon kon san-o matapos ang pagbantala nga hilikuton, kag ano dapat ang batyagon naton nahanungod sini? (c) Sa tapos sang dakung kapipit-an, ano ang mahantop naton kon balikdon naton ang pagbantala sa Ginharian nga nahimo?
14 Ang suod nga may kaangtanan sa sini amo ang ikap-at nga butang nga makabulig sa aton sa pagpadayon nga nagamata. Dapat nga nalakip kita sa mga nagapaandam sa katawhan tuhoy sa nagapakari nga katapusan sining sistema sang mga butang. Ang bug-os nga katapusan sining daan nga sistema sang mga butang indi mahanabo tubtob “ining maayong balita sang ginharian” nabantala sa kasangkaron nga gintuyo sang Dios nga Labing Gamhanan. (Mateo 24:14) Indi ang mga Saksi ni Jehova ang magadesisyon kon san-o matapos ang pagbantala nga hilikuton. Si Jehova ang may kinamatarong sa sina. (Marcos 13:32, 33) Apang, determinado kita nga magpangabudlay sing lakas tubtob sa masarangan naton kag tubtob kinahanglanon ang pagbantala nahanungod sa labing maayo nga panguluhan nga matigayon sang katawhan, ang Ginharian sang Dios. Ang “dakung kapipit-an” magaabot samtang nagapakigbahin kita sa sining hilikuton. (Mateo 24:21) Sa palaabuton nga tion, ang mga maluwas makabalikid kag makapamatuod sing malig-on nga si Jesucristo indi isa ka butig nga manalagna. (Bugna 19:11) Ang pagbantala nga hilikuton matigayon tubtob sa isa ka kasangkaron nga labaw pa sa ginapaabot sang mga nagapakigbahin sa sini.
15 Sing nagakahisuno, sa isa ka importante nga tion nga ining hilikuton matigayon sa kaayawan sang Dios, kapin pa nga mga tawo ang mahimo nga magapakigbahin sa sini kay sang una. Daw ano ang pagpasalamat naton nga kita may bahin sa sining dungganon nga hilikuton! Si apostol Pedro nagapasalig sa aton nga si Jehova “wala nagahandum nga mawala ang bisan sin-o kundi nga ang tanan makadangat sa paghinulsol.” (2 Pedro 3:9) Busa, ang aktibo nga kusog sang Dios nga Labing Gamhanan nagapanghikot karon sing mabaskog pa sang sa bisan anong tion, kag ang mga Saksi ni Jehova nagahandum sa pagpadayon sa sining ginapahulag sang espiritu nga hilikuton. Gani mag-unong kamo sa organisasyon ni Jehova, kag mangin masako sa pagministeryo sa publiko. Mangin bulig ini sa inyo pagpadayon nga nagamata.
Usisa ang Imo Kaugalingon
16. Ngaa dapat naton usisaon ang aton kaugalingon kon ano ang aton kahimtangan sa espirituwal karon?
16 May ikalima nga butang nga sarang naton mahimo agod magpabilin nga nagamata. Subong indibiduwal, dapat naton usisaon ang aton kahimtangan karon. Nagakaigo ini karon sang sa bisan ano nga tion. Dapat naton pamatud-an kon kay sin-o kita dampig sing malig-on. Sa Galacia 6:4, si Pablo nagsiling: “Ang tagsatagsa magpamatuod kon ano ang iya ginabuhat.” Usisaa ang imo kaugalingon nahisanto sa mga pulong ni Pablo sa 1 Tesalonica 5:6-8: “Dili kita magtulog subong sang iban, kundi magpulaw kita kag magbut-anan. Kay ang mga nagatulog nagatulog sa kagab-ihon, kag ang mga nagakahubog nagakahubog sa kagab-ihon. Apang para sa aton nga iya sang kaadlawon, magbut-anan kita kag magsul-ob sang limbutong sang pagtuo kag paghigugma kag sang pandong sang paglaum sang kaluwasan.”
17. Kon ginausisa ang kaugalingon, anong mga pamangkot ang dapat naton ipamangkot sa aton kaugalingon?
17 Kamusta kita? Kon usisaon naton ang aton kaugalingon sa kapawa sang Kasulatan, makita bala naton nga kita nagapabilin nga nagamata, kag may pandong sang paglaum sang kaluwasan? Kita bala mga tawo nga nagpain na sang aton kaugalingon gikan sa daan nga sistema sang mga butang kag wala na nagaabiabi sang mga ideya sini? May espiritu gid bala kita sang bag-ong kalibutan sang Dios? Alisto bala kita sing bug-os kon sa diin nagapakadto ining sistema? Kon amo, ang adlaw ni Jehova indi magadakop sa aton nga subong bala daw mga makawat kita.—1 Tesalonica 5:4.
18. Anong dugang pa nga mga pamangkot ang mahimo dapat naton ipamangkot sa aton kaugalingon, kag ano ang resulta?
18 Apang, ano, kon ang aton pag-usisa sa kaugalingon magapakita nga kita nagatinguha sa pagtukod sing isa ka matahom, masulhay, komportable, matawhay nga dalanon sang pagkabuhi? Ano kon matukiban naton nga ang aton espirituwal nga mga mata nagabug-at bangod sang katuyuhon kag katulugon? Kita bala yara sa isa ka daw nagadalamguhanon nga kahimtangan, nga nagalagas sa pila ka pantasya sang kalibutan? Kon amo, magmata na kita!—1 Corinto 15:34.
Pamalandunga ang Natuman nga mga Tagna
19. Anong pila sang mga tagna ang nakita na naton nga natuman?
19 Yari na kita karon sa ikan-um nga butang nga magabulig sa aton sa pagpadayon nga nagamata: Pamalandunga ang madamo nga tagna nga natuman sa sining tion sang katapusan. Nalampasan na naton ang ika-77 ka tuig sugod sang matapos ang gintangdo nga mga tion sang mga pungsod sang 1914. Kon balikdon naton ang nagligad nga kapituan kag lima ka tuig sang isa ka siglo, makita naton kon paano natuman ang nanuhaytuhay nga mga tagna-ang pagpasag-uli sang matuod nga pagsimba; ang kaluwasan sang hinaplas nga nagkalabilin, upod sa ila mga kaupod, pasulod sa isa ka espirituwal nga paraiso; ang pagbantala sing maayong balita sang Ginharian sa bug-os globo nga kasangkaron; ang paglutaw sang dakung kadam-an. (Isaias 2:2, 3; kapitulo 35; Zacarias 8:23; Mateo 24:14; Bugna 7:9) Ang daku nga ngalan ni Jehova kag ang iya bug-os uniberso nga pagkasoberano ginhimaya, kag ang diutay nangin isa ka libo kag ang diutay nangin mabakod nga pungsod, bangod ginapadali ini ni Jehova sa iya tion. (Isaias 60:22; Ezequiel 38:23) Kag ang mga palanan-awon ni apostol Juan sa kasaysayan sang Bugna nagahilapit na karon sa ila talipuspusan.
20. Sa ano kombinsido ang mga Saksi ni Jehova, kag ano gid ang ila ginpamatud-an?
20 Busa, kapin sa bisan anong tion sa nagligad, kombinsido sing malig-on ang mga Saksi ni Jehova nga husto ang ila paghangop sa kahulugan sang mga nagakatabo sa kalibutan sugod sang 1914. Bangod kombinsido sila, nangin mga instrumento sila sa mga kamot sang Labing Mataas nga Dios. Sila ang gintugyanan sa pagdala sang balaan nga mensahe sa sining importante nga tion. (Roma 10:15, 18) Huo, ang mga pulong ni Jehova para sa tion sang katapusan nagmatuod. (Isaias 55:11) Ini, sa baylo, dapat magpahulag sa aton nga magpadayon tubtob makita naton ang katapusan nga katumanan sang tanan nga saad sang Dios paagi kay Jesucristo.
Ang Kaluwasan Mas Malapit Na sang sa Tion nga Kita Nangin mga Tumuluo
21. Ano ang aton ikapito nga bulig sa pagpabilin nga nagamata sa espirituwal?
21 Bilang katapusan, ang ikapito nga bulig sa aton pagpabilin nga nagamata amo: Dumduma pirme nga ang aton kaluwasan mas malapit na sang sa tion nga kita nangin mga tumuluo. Kapin ka importante, ang pagbindikar sa bug-os uniberso nga pagkasoberano ni Jehova kag ang pagpakabalaan sa iya ngalan mas malapit na. Gani ang kinahanglanon nga magpadayon nga nagamata mas hilingagawon karon sang sa bisan anong tion. Si apostol Pablo nagasulat: “Kamo nga mga tawo nakahibalo sang panahon, nga karon na ang takna nga magmata kamo gikan sa katulugon, kay karon ang kaluwasan mas malapit na sang sa tion nga kita nangin mga tumuluo. Ang kagab-ihon manugtaliwan na; ang adlaw malapit na.”—Roma 13:11, 12.
22. Paano kita dapat maapektuhan sang pagkalapit sang aton kaluwasan?
22 Bangod tuman na kalapit ang aton kaluwasan, dapat kita magpadayon nga nagamata! Indi naton dapat pagtugutan ang bisan anong personal ukon kalibutanon nga mga interes nga maglabaw pa sa aton apresasyon sa ginahimo ni Jehova para sa iya katawhan sa sining tion sang katapusan. (Daniel 12:3) Dapat kita magpakita sing dugang pa nga pagkadeterminado agod nga indi kita magsipak gikan sa dalanon nga maathag nga ginapakita para sa aton sa Pulong sang Dios. (Mateo 13:22) Ang ebidensia maathag nga nagapakita nga ining kalibutan yara na sa iya katapusan nga mga adlaw. Sa indi madugay laglagon ini sing dayon agod maghatag sing lugar para sa isa ka bag-ong kalibutan sang pagkamatarong.—2 Pedro 3:13.
23. Sa anong paagi buligan kita ni Jehova, kag ano ang ginpakamaayo nga resulta?
23 Busa, magpadayon kita nga nagamata sa tanan nga paagi. Labaw sa bisan anong tion, mangin alisto sa kon diin na kita sa lakat sang tion. Dumduma, si Jehova indi gid magtulog sa sini nga butang. Sa baylo, buligan niya kita sa pagpabilin nga nagamata sa sining tion sang katapusan. Ang kagab-ihon manugtaliwan na. Ang adlaw malapit na. Gani magpadayon nga nagamata! Sa indi madugay maeksperiensiahan na naton ang pinakamatahom sa tanan nga mga adlaw, samtang ginatuman sang Mesianikong Ginharian ang katuyuan ni Jehova sa duta!—Bugna 21:4, 5.
Ano ang Imo mga Sabat?
◻ Ano ang buot silingon ni Jesus sang magsiling sia nga ang adlaw sang kasingkal sang Dios magaabot sa katawhan “subong sang siod”?
◻ Ngaa dapat naton awayon ang mga butang nga nagaagaw sang igtalupangod, kag paano naton ini mahimo?
◻ Ano nga sahi sang pangamuyo ang kinahanglanon agod magpabilin nga nagamata?
◻ Ano nga sahi sang pagpakig-upod ang importante?
◻ Ngaa usisaon ang kaugalingon kon ano ang aton espirituwal nga kahimtangan?
◻ Ano ang bahin sang tagna sa aton pagpadayon nga nagamata?