Padayon sa Paglakat sa Dalanon ni Jehova
“Maglaum kay Jehova kag bantayi ang iya dalanon, kag sia magapataas sa imo sa pagpanubli sang duta.”—SALMO 37:34.
1, 2. Ano ang nalakip sa paglakat sa dalanon ni Jehova para kay Hari David, kag ano ang ginapatuman sini sa aton karon?
“SUGIRI ako sang dalan nga dapat ko laktan, kay sa imo ginbayaw ko ang akon kalag.” (Salmo 143:8) Ang mga Cristiano karon bug-os tagipusuon nga nagasulit sadtong mga pinamulong ni Hari David. Luyag gid nila pahamut-an si Jehova kag maglakat sa iya dalanon. Ano ang nalakip sa sini? Para kay David, nagkahulugan ini sing pagtuman sa sugo sang Dios. Naglakip ini sing pagsalig kay Jehova sa baylo sing pag-alyansa sa mga pungsod. Huo, kag nagkahulugan ini sang mainunungon nga pag-alagad kay Jehova, indi sa mga dios sang kaingod nga katawhan. Para sa mga Cristiano, ang paglakat sa dalanon ni Jehova nagalakip sing kapin pa.
2 Una, ang paglakat sa dalanon ni Jehova karon nagakahulugan sing pagpakita sing pagtuo sa halad nga gawad ni Jesucristo, nagakilala sa iya subong “ang dalan kag ang kamatuoran kag ang kabuhi.” (Juan 3:16; 14:6; Hebreo 5:9) Nagakahulugan man ini sing pagtuman sa “kasuguan ni Cristo,” nga nagalakip sing pagpakita sing gugma sa isa kag isa, ilabi na sa hinaplas nga mga kauturan ni Jesus. (Galacia 6:2; Mateo 25:34-40) Ang mga nagalakat sa dalanon ni Jehova nagahigugma sang iya mga prinsipio kag mga sugo. (Salmo 119:97; Hulubaton 4:5,6) Ginapakabahandi nila ang ila hamili nga pribilehiyo sang pagpakigbahin sa Cristianong ministeryo. (Colosas 4:17; 2 Timoteo 4:5) Ang pangamuyo isa ka regular nga bahin sang ila kabuhi. (Roma 12:12) Kag sila ‘padayon nga nagabantay nga ang ila paglakat indi subong sang dimaalam kundi subong sang mga maalam.’ (Efeso 5:15) Wala gid nila ginasakripisyo ang espirituwal nga mga manggad para sa umalagi nga materyal nga mga bentaha ukon sa undanon nga mga kalipayan. (Mateo 6:19, 20; 1 Juan 2:15-17) Dugang pa, ang pagkamainunungon kay Jehova kag ang pagsalig sa iya kinahanglanon. (2 Corinto 1:9; 10:5; Efeso 4:24) Ngaa? Bangod ang aton kahimtangan halos pareho sa iya sang dumaan nga Israel.
Ang Pagkinahanglan sing Pagsalig kag Pagkamainunungon
3. Ngaa ang pagkamainunungon, pagtuo, kag pagsalig magabulig agod magpabilin kita nga nagalakat sa dalanon ni Jehova?
3 Ang Israel isa ka magamay nga pungsod nga ginalibutan sang dimainabyanon nga mga kaingod nga nagapakigbahin sa maulag nga mga seremonya sa pagsimba sa mga diosdios. (1 Cronica 16:26) Ang Israel lamang ang nag-alagad sa isa ka matuod kag dikitaon nga Dios, si Jehova, kag ginpatuman niya nga huptan nila ang mataas nga mga talaksan sa moral. (Deuteronomio 6:4) Sing kaanggid man sa karon, pila lamang ka milyon ka tawo ang nagasimba kay Jehova, kag nagakabuhi sila sa kalibutan nga may halos anom ka bilyon ka tawo nga ang mga talaksan kag relihioso nga pagtamod tuhay sa ila. Kon nalakip kita sa sadtong pila ka milyon, dapat kita mag-andam nga indi maimpluwensiahan sa sayop nga paagi. Paano? Ang pagkamainunungon kay Jehova nga Dios, ang pagtuo sa iya, kag ang mabakod nga pagsalig nga tumanon niya ang iya mga saad magabulig. (Hebreo 11:6) Magapugong ini sa aton sa pagsalig sa mga butang nga ginalauman sang kalibutan.—Hulubaton 20:22; 1 Timoteo 6:17.
4. Ngaa ang mga pungsod ‘ginadulman sing painuino’?
4 Ginpakita ni apostol Pablo kon daw ano ang kinatuhayan sang mga Cristiano gikan sa kalibutan sang nagsulat sia: “Busa, ginasiling ko ini kag ginapamatud-an sa Ginuo, nga indi na kamo magpadayon sa paglakat subong sang paglakat man sang mga pungsod sa pagkawalay pulos sang ila hunahuna, samtang ginadulman sila sa ila painuino, kag nahamulag sa kabuhi nga iya sang Dios, bangod sang ila pagkawalay ihibalo, bangod sang katig-a sang ila tagipusuon.” (Efeso 4:17, 18) Si Jesus amo ang “matuod nga kapawa.” (Juan 1:9) Ang bisan sin-o nga nagasikway sa iya ukon nagapangangkon nga nagatuo sa iya apang wala nagatuman sang “kasuguan ni Cristo” ‘ginadulman sing painuino.’ Wala nagalakat sa dalanon ni Jehova, “nahamulag [sila] sa kabuhi nga iya sang Dios.” Bisan daw ano man kaalam ang mahimo nila hunahunaon sa ila kaugalingon sa kalibutanon nga paagi, ‘walay ihibalo’ sila kon tuhoy sa lamang nga ihibalo nga nagadul-ong sa kabuhi, ang iya ni Jehova nga Dios kag ni Jesucristo.—Juan 17:3; 1 Corinto 3:19.
5. Bisan nga ang kapawa sang kamatuoran nagaiwag sa kalibutan, ngaa madamo nga tagipusuon ang wala nagapamati?
5 Apang, ang kapawa sang kamatuoran nagaiwag sa kalibutan! (Salmo 43:3; Filipos 2:15) “Ang matuod nga kaalam nagasinggit sing mabaskog sa dalan.” (Hulubaton 1:20) Sang nagligad nga tuig ang mga Saksi ni Jehova naghinguyang sing kapin sa isa ka bilyon ka oras sa pagbantala sa ila isigkatawo nahanungod kay Jehova nga Dios kag kay Jesucristo. Linaksa ang namati. Apang, dapat bala kita makibot nga madamo pa ang wala nagapamati? Indi. Si Pablo nagpamulong tuhoy sa “katig-a sang ila tagipusuon.” Ang iban matig-a sing tagipusuon bangod sang kakagod ukon sang gugma sa kuwarta. Ang iban naimpluwensiahan sang butig nga relihion ukon sang sekular nga pagtamod nga tuman ka lapnag karon. Ang mabudlay nga mga eksperiensia sa kabuhi nagdul-ong sa madamo nga talikdan ang Dios. Ang iban nagdumili sa pagsunod sa mataas nga mga talaksan ni Jehova sa moral. (Juan 3:20) Ang tagipusuon sang isa nga nagalakat sa dalanon ni Jehova mahimo bala magtig-a sa sini nga mga bahin?
6, 7. Bisan nga sila mga sumilimba ni Jehova nga Dios, sa anong mga okasyon nagpahilayo ang mga Israelinhon, kag ngaa?
6 Natabo ini sa dumaan nga Israel, subong sang ginpakita ni Pablo. Sia nagsulat: “Ining mga butang nangin mga halimbawa naton, agod indi kita mangin mga tawo nga nagakaibog sa makahalalit nga mga butang, subong nga ginhandum nila ini. Ni mangin mga sumilimba sang idolo, subong sang ginhimo sang iban sa ila; subong sang nasulat: ‘Ang katawhan naglingkod sa pagkaon kag sa pag-inom, kag nagtindog sila agod magpangalipay.’ Ni maanad kita sa pagpakighilawas, subong sang iban sa ila nga nakighilawas, agod mapukan lamang, duha ka pulo kag tatlo ka libo sa ila sa isa ka adlaw.”—1 Corinto 10:6-8.
7 Una nga ginapatuhuyan ni Pablo ang okasyon sang ang Israel nagsimba sa bulawan nga tinday nga baka sa tiilan sang Bukid sang Sinai. (Exodo 32:5, 6) Isa ini ka direkta nga paglapas sa sugo sang Dios nga ginkasugtan nila nga tumanon pila lamang ka semana antes. (Exodo 20:4-6; 24:3) Nian, ginapatuhuyan ni Pablo ang tion nga ang Israel nagyaub kay Baal upod sa mga anak nga babayi sang Moab. (Numeros 25:1-9) Ang pagsimba sa tinday nga baka nakilal-an paagi sa sobra nga pagpatuyang sa kaugalingon, ‘sa paglipaylipay.’a Ang pagsimba kay Baal gin-updan sing malaw-ay katama nga seksuwal nga imoralidad. (Bugna 2:14) Ngaa ang mga Israelinhon naghimo sining mga sala? Bangod gintugutan nila ang ila tagipusuon nga ‘maghandum sing makahalalit nga butang’—gin-updan man ini sing idolatriya ukon sing malain nga mga buhat.
8. Ano ang matun-an naton gikan sa mga eksperiensia sang Israel?
8 Ginpakita ni Pablo nga dapat kita magtuon gikan sa sining mga hitabo. Magtuon sing ano? Wala gid ginhunahuna nga ang Cristiano magayaub sa bulawan nga tinday nga baka ukon sa dumaan nga dios sang Moab. Apang ano naman ang tuhoy sa imoralidad ukon sa wala pagpugong nga pagpatuyang sa kaugalingon? Kinaandan na ini karon, kag kon tugutan naton ang handum nga magtubo ini sa aton tagipusuon, magahamulag ini sa aton gikan kay Jehova. Ang resulta pareho man kon nakahimo kita sing idolatriya—pagkanahamulag sa Dios. (Ipaanggid ang Colosas 3:5; Filipos 3:19.) Sa pagkamatuod, ginahinakpan ni Pablo ang iya paghinun-anon sa sining mga hitabo paagi sa paglaygay sa mga masigkatumuluo: “Likawi ang idolatriya.”—1 Corinto 10:14.
Bulig sa Paglakat sa Dalanon sang Dios
9. (a) Ano nga bulig ang ginabaton naton agod makapadayon kita nga nagalakat sa dalanon ni Jehova? (b) Ano ang isa ka paagi nga makabati kita sing ‘pulong sa likod naton’?
9 Kon determinado kita nga padayon nga maglakat sa dalanon ni Jehova, wala kita ginpabay-an nga wala sing bulig. Si Isaias nagtagna: “Ang imo mga dulunggan makabati sing pulong sa likod nimo, nga nagasiling: ‘Amo ini ang dalan. Lakat sa sini, kamo nga katawhan,’ pananglit kamo nga katawhan magliso sa tuo ukon magliso kamo sa wala.” (Isaias 30:21) Paano ang ‘aton dulunggan’ makabati sing ‘pulong sa likod naton’? Ti, wala sing isa sa karon ang makabati sing literal nga tingog ukon makabaton sing personal nga mensahe gikan sa Dios. Ang “pulong” nga mabatian nagaabot sa aton tanan sa palareho nga paagi. Una sa tanan, nagaabot ini paagi sa inspirado nga Kasulatan, ang Biblia, nga nagaunod sing panghunahuna sang Dios kag sing isa ka rekord sang iya mga pagpakig-angot sa katawhan. Sanglit adlaw-adlaw kita nga nadayag sa propaganda gikan sa mga ginhalinan nga ‘nahamulag sa kabuhi nga iya sang Dios,’ para sa maayong espirituwal nga kapagros, dapat naton basahon ang Biblia kag pamalandungan ini sing tayuyon. Magabulig ini sa aton nga malikawan ang “walay pulos nga mga butang” kag “may lubos nga ikasarang, nga nasangkapan sing bug-os para sa tagsa ka maayong buhat.” (Binuhatan 14:14,15; 2 Timoteo 3:16,17) Magapabakod ini sa aton, magapalig-on sa aton, kag magabulig sa aton nga ‘magmadinalag-on ang aton dalanon.’ (Josue 1:7,8) Gani, ang Pulong ni Jehova nagalaygay: “Karon, O mga anak ko, pamati sa akon; huo, malipayon ang mga nagabantay sang akon mga dalanon. Pamatii ang disiplina kag magmaalam, kag dili magpakita sing bisan ano nga pagpatumbaya.”—Hulubaton 8:32,33.
10. Ano ang ikaduha nga paagi nga makabati kita sang ‘pulong sa likod naton’?
10 Ang ‘pulong sa likod naton’ nagaabot man paagi sa “matutom kag mainandamon nga ulipon,” nga nagaaman sing “pagkaon sa nagakaigo nga tion.” (Mateo 24:45-47) Ang isa ka paagi nga ginaaman ini nga pagkaon amo ang sa naimprinta nga mga publikasyon pasad sa Biblia, kag bugana gid ini nga suplay sing pagkaon sining ulihi nga tinuig. Halimbawa, paagi sa magasin nga Lalantawan, ang aton paghangop sa tagna ginputli. Sa sining magasin, ginpalig-on kita nga padayunon ang hilikuton sa pagbantala kag paghimo-disipulo walay sapayan sang dugang nga dipagsapak, ginbuligan kita nga likawan ang mga tugalbong, kag ginlaygayan kita nga palambuon ang maayong Cristianong mga kinaiya. Ginapakabahandi gid naton ini nga pagkaon sa nagakaigo nga tion!
11. Ipaathag ang ikatlo nga paagi nga makabati kita sing ‘pulong sa likod naton.’
11 Ang matutom kag mainandamon nga ulipon nagaaman man sing pagkaon paagi sa aton regular nga mga miting. Nagalakip ini sang lokal nga mga miting sang kongregasyon, makaduha sa isa ka tuig nga pagtilipon sa sirkito nga mga asambleya, kag mas daku tuigan nga mga kombension. Sin-o nga matutom nga Cristiano ang wala nagapabalor sa sining mga pagtilipon? Kinahanglanon ini nga bulig nga magasakdag sa aton sa paglakat sa dalanon ni Jehova. Sanglit madamo ang kinahanglan nga maghinguyang sing madamo nga tion sa trabaho ukon sa eskwelahan kaupod sang mga indi pareho sang ila pagtuo, ang tayuyon nga Cristianong paghiliupod literal nga nagaluwas-kabuhi. Ang mga miting nagahatag sa aton sing maayo nga higayon ‘agod mapukaw sa gugma kag sa maayong mga buhat ang isa kag isa.’ (Hebreo 10:24) Ginahigugma naton ang aton mga kauturan, kag luyag naton makig-upod sa ila.—Salmo 133:1.
12. Ano ang determinasyon sang mga Saksi ni Jehova, kag paano nila ini ginpabutyag sining karon lang?
12 Ginapabakod paagi sining espirituwal nga pagkaon, ang halos anom ka milyon ka katawhan karon nagalakat sa dalanon ni Jehova, kag minilyon pa ang nagatuon sing Biblia agod matun-an kon paano ini himuon. Sila bala naluyahan sing buot ukon naghuyang bangod sang katunayan nga diutay lamang ang ila kadamuon kon ipaanggid sa binilyon sang populasyon sang duta? Indi gid! Determinado sila nga padayon nga pamatian ang ‘pulong sa likod nila,’ mainunungon nga ginahimo ang kabubut-on ni Jehova. Subong isa ka dayag nga pagpakita sini nga determinasyon, sadtong “Dalanon Sang Dios sa Kabuhi” nga Distrito kag Internasyonal nga mga Kombension sang 1998/99, pormal nga gin-aprobahan sang mga delegado ang resolusyon nga nagapabutyag sang ila tinagipusuon nga tindog. Ang masunod amo ang kaundan sadto nga resolusyon.
Resolusyon
13, 14. Ano ang realistiko nga pagtamod sang mga Saksi ni Jehova sa kahimtangan sang kalibutan?
13 “Kita, subong mga Saksi ni Jehova nga natipon sa ‘Dalanon Sang Dios sa Kabuhi’ nga Kombension, bug-os tagipusuon nga nagaugyon nga ang dalanon sang Dios amo ang labing maayo nga dalanon sang kabuhi. Apang, ginakilala naton nga tuhay ang ginabatyag sang kalabanan nga katawhan karon. Ang katilingban sang tawo nag-eksperimento sing madamong ideya, pilosopiya, kag relihioso nga mga ideya sa kon ano ang nagahuman sang labing maayo nga dalanon sang kabuhi. Ang bunayag nga pag-usisa sa maragtas sang tawo kag sa mga kahimtangan sang kalibutan karon nagapakita sang pagkamaminatud-on sang pahibalo sang Dios nga narekord sa Jeremias 10:23: ‘Wala sa tawo nga nagalakat bisan ang pagtuytoy sa iya tikang.’
14 “Kada adlaw nakita naton ang dugang pa nga ebidensia nga nagapamatuod sang pagkamaminatud-on sina nga mga pulong. Sa daku nga bahin, wala ginasapak sang katilingban sang tawo ang dalanon sang Dios sa kabuhi. Ginahimud-usan sang tawo ang kon ano ang matarong sa ila mga mata. Ang resulta makahalanusbo—pagkabungkag sang pagkabuhi sang pamilya, nga ginapabayaan ang mga kabataan nga wala sing panuytoy; sobra nga paghingamo sing materyalismo, nga nagadangat sa kasubo kag kapaslawan; walay pulos nga krimen kag kasingki, nga nagpatay sang dimaisip nga mga biktima; etniko nga pinuyas kag mga inaway, nga nagkutol sang madamo nga kabuhi sang tawo; lapnag nga imoralidad, nga nagdugang sa epidemia sang mga balatian nga naliton paagi sa paghulid. Pila lamang ini sang madamong mabudlay nga mga problema nga nagapugong sa pagpangita sing kalipay, paghidait, kag kalig-unan.
15, 16. Nahanungod sa dalanon sang Dios sa kabuhi, ano nga determinasyon ang ginpabutyag sa resolusyon?
15 “Bangod sang masubo nga kahimtangan sang katawhan kag sang malapit na nga ‘inaway sang dakung adlaw sang Dios nga Labing Gamhanan,’ nga ginatawag Armagedon (Bugna 16:14, 16), kita subong mga Saksi ni Jehova nagapamat-od nga:
16 “Una: Ginakabig naton ang aton kaugalingon nga iya ni Jehova nga Dios, kay indibiduwal naton nga gindedikar ang aton kaugalingon sa iya sing bug-os, kag huptan naton ang dimationg nga pagtuo sa aman ni Jehova nga gawad paagi sa iya Anak, si Jesucristo. Determinado kita sa paglakat sa dalanon sang Dios sa kabuhi, nagaalagad subong mga Saksi niya kag nagapasakop sa iya pagkasoberano subong sang ginapakita paagi sa pagginahom ni Jesucristo.
17, 18. Ano nga posisyon ang padayon nga ginahuptan sang mga Saksi ni Jehova may kaangtanan sa mga talaksan sa moral kag sa Cristianong paghiliutod?
17 “Ikaduha: Padayon kita nga magasunod sa mataas nga mga talaksan sang Biblia sa moral kag espirituwal. Determinado kita nga mag-untat sa paglakat subong sang paglakat sang mga pungsod sa pagkawalay pulos sang ila hunahuna. (Efeso 4:17-19) Determinado kita nga magpabilin nga matinlo sa atubangan ni Jehova kag walay dagta gikan sini nga kalibutan.—Santiago 1:27.
18 “Ikatlo: Magapanguyapot kita sing malig-on sa aton Makasulatanhon nga posisyon subong isa ka bug-os kalibutan nga Cristianong paghiliutod. Huptan naton ang Cristianong neutralidad sa tunga sang mga pungsod, nga wala nagatugot nga masiod kita sang pagdinumtanay ukon pagbinahinbahin sang rasa, pungsod, ukon etniko.
19, 20. (a) Ano ang himuon sang Cristianong mga ginikanan? (b) Paano padayon nga mapakilala sang tanan nga matuod nga mga Cristiano ang ila kaugalingon subong mga disipulo ni Cristo?
19 “Ikap-at: Ipatudok naton nga mga ginikanan ang dalanon sang Dios sa aton mga kabataan. Magapahamtang kita sing halimbawa sa Cristianong pagkabuhi, nga nagalakip sang regular nga pagbasa sang Biblia, pagtuon sang pamilya, kag bug-os kalag nga pagpakigbahin sa Cristianong kongregasyon kag sa ministeryo sa latagon.
20 “Ikalima: Kita tanan magapanikasog nga palambuon ang diosnon nga mga kinaiya nga ginpakita sang aton Manunuga, kag magapanikasog kita nga ilugon ang iya personalidad kag ang iya mga dalanon, subong sang ginhimo ni Jesus. (Efeso 5:1) Determinado kita nga himuon ang tanan naton nga hilikuton nga may gugma, busa nagapakilala sang aton kaugalingon subong mga disipulo ni Cristo.—Juan 13:35.
21-23. Ano ang padayon nga himuon sang mga Saksi ni Jehova, kag sa ano sila kumbinsido?
21 “Ikan-om: Sing walay langan padayon kita nga magabantala sing maayong balita sang Ginharian sang Dios, magahimo sing mga disipulo, kag tudluan naton sila sa dalanon sang Dios sa kabuhi kag palig-unon sila sa pagbaton sing dugang pa nga paghanas sa mga miting sang kongregasyon.—Mateo 24:14; 28:19, 20; Hebreo 10:24,25.
22 “Ikapito: Subong mga indibiduwal kag subong isa ka relihioso nga organisasyon, padayon naton nga unahon ang kabubut-on sang Dios sa aton kabuhi. Nagagamit sang iya Pulong, ang Biblia, subong ang aton tuytoy, indi kita magaliso sa tuo ukon sa wala, busa nagapalig-on nga ang dalanon sang Dios labaw katama sa mga dalanon sang kalibutan. Determinado kita nga maglakat sa dalanon sang Dios sa kabuhi—sing malig-on kag sing mainunungon, sa karon kag sa walay katubtuban!
23 “Ginahimo naton ini nga resolusyon bangod sang aton bug-os nga pagsalig sa mahigugmaon nga saad ni Jehova nga sia nga nagahimo sang kabubut-on sang Dios magapabilin sing dayon. Ginahimo naton ini nga resolusyon bangod kumbinsido kita nga ang pagkabuhi suno sa Makasulatanhon nga mga prinsipio, laygay, kag paandam amo ang labing maayo nga dalanon sang kabuhi karon kag nagapasad sing maayo nga sadsaran para sa palaabuton, agod mahimo kita nga makapanguyapot sing malig-on sa matuod nga kabuhi. (1 Timoteo 6:19; 2 Timoteo 4:7b, 8) Labaw sa tanan, ginahimo naton ini nga resolusyon bangod ginahigugma naton si Jehova nga Dios upod ang aton bug-os nga tagipusuon, kalag, hunahuna, kag kusog!
24, 25. Ano ang sabat sa ginpanugda nga resolusyon, kag ano ang determinasyon sang mga nagalakat sa dalanon ni Jehova?
24 “Ang tanan nga nagatambong sa sini nga kombension nga pabor sa pag-aprobar sini nga resolusyon, magsiling palihug sing “HUO!”
25 Ang ginatos ka arena kag istadyum sa bug-os nga kalibutan naglanog sa kabaskog samtang ang tanan nga tumalambong nagsabat sing nagadaguob nga “HUO!” Ang mga Saksi ni Jehova wala gid nagaduhaduha nga padayon sila nga magalakat sa dalanon ni Jehova. Nagasalig sila sing bug-os kay Jehova kag nagatuo nga tumanon niya ang iya mga saad. Nagapabilin sila nga mainunungon sa iya, ano man ang matabo. Kag determinado sila sa paghimo sang iya kabubut-on.
“Ang Dios Apin sa Aton”
26. Ano ang makalilipay nga kahimtangan sang mga nagalakat sa dalanon ni Jehova?
26 Ang mga Saksi ni Jehova nagadumdom sang laygay sang salmista: “Maglaum kay Jehova kag bantayi ang iya dalanon, kag pataason niya kamo sa pagpanag-iya sang duta.” (Salmo 37:34) Wala nila ginakalimtan ang makapalig-on nga pulong ni Pablo: “Kon ang Dios apin sa aton, sin-o bala ang batok sa aton? Sia nga wala magpaiway sang iya kaugalingon nga Anak kundi nagtugyan sa iya tungod sa aton tanan, paano bala nga indi sia maghatag sing bunayag sa aton man sang tanan nga butang kaupod niya?” (Roma 8:31,32) Huo, kon padayon kita nga maglakat sa dalanon ni Jehova, hatagan niya kita “sang tanan nga butang nga aton pagkalipayan.” (1 Timoteo 6:17) Ano ang maayo pa nga lugar sangsa kon diin na kita—nagalakat sa dalanon ni Jehova, kaupod sang aton pinalangga nga mga kauturan nga lalaki kag babayi. Bangod si Jehova dampig sa aton, determinado kita nga magpabilin didto kag magbatas tubtob sa katapusan, nagasalig sing bug-os nga sa iya gintalana nga tion, makita naton sia nga magatuman sang iya tanan nga saad.—Tito 1:2.
[Footnote]
a Nagapatuhoy sa Griegong tinaga nga ginbadbad nga ‘maglipaylipay,’ ang isa ka ekspositor nagasiling nga nagapatuhoy ini sa mga saot sa tion sang paganong mga kapiestahan kag nagadugang: “Madamo sini nga mga saot, subong sang nakilal-an na, ang direkta nga gindesinyo sa pagpukaw sing labing malain nga mga kaulag.”
Madumduman Mo Bala?
◻ Ano ang ginakinahanglan agod ang isa ka Cristiano makalakat sa dalanon ni Jehova?
◻ Ngaa dapat naton palambuon ang pagsalig kay Jehova kag ang pagkamainunungon sa iya?
◻ Ano nga bulig ang matigayon samtang nagalakat kita sa dalanon ni Jehova?
◻ Maghatag sing pila ka talalupangdon nga punto sang resolusyon nga gin-aprobahan sing pormal sa “Dalanon Sang Dios sa Kabuhi” nga mga Kombension.
[Mga laragway sa pahina 18]
Isa ka importante nga resolusyon ang gin-aprobahan sing pormal sa “Dalanon Sang Dios sa Kabuhi” nga Distrito kag Internasyonal nga mga KombensionI