Sa Diin nga Lamesa Kamo Nagakaon?

“Indi kamo makaambit sa ‘lamesa ni Jehova’ kag sa lamesa sang mga demonyo.” —1 CORINTO 10:21.

1. Ano nga mga lamesa ang ginahanda sa atubangan naton, kag ano nga paandam ang ginahatag ni apostol Pablo sa sini?

GINAPAKITA sining inspirado nga mga pulong ni apostol Pablo nga duha ka malaragwayon nga lamesa ang ginahanda sa atubangan sang katawhan. Ang tagsa ka lamesa makilala paagi sa sahi sang simbuliko nga kalan-on nga ginabutang sa sini, kag kita tanan nagakaon sa isa sining duha ka lamesa. Apang, kon luyag naton pahamut-an ang Dios, indi kita makakaon sa iya lamesa kag sa amo man nga tion magtimutimo sa lamesa sang mga demonyo. Si apostol Pablo nagpaandam: “Ang mga butang nga ginahalad sang mga pungsod ginahalad nila sa mga demonyo, kag indi sa Dios; kag indi ko luyag nga mangin umalambit kamo sa mga demonyo. Indi kamo makainom sa kupa ni Jehova kag sa kupa sang mga demonyo; indi kamo makakaon sa ‘lamesa ni Jehova’ kag sa lamesa sang mga demonyo.”​—⁠1 Corinto 10:​20, 21.

2. (a) Ano nga lamesa ni Jehova ang nagluntad sang mga adlaw sang dumaan nga Israel, kag sin-o ang nag-ambit sa mga halad sa paghidait? (b) Ano ang kahulugan karon sang pag-ambit sa lamesa ni Jehova?

² Ang mga pulong ni Pablo nagapahanumdom sa aton sang mga halad sa paghidait nga ginhalad anay sang dumaan nga mga Israelinhon sa idalom sang Kasuguan ni Jehova. Ang halaran sang Dios gintawag nga isa ka lamesa, kag ang isa nga nagadala sing sapat nga inughalad ginasiling nga nagapakighidait kay Jehova kag sa mga saserdote. Paano? Una, si Jehova nagapakig-ambit sa halad bangod ang dugo ginawisik sa ibabaw sang iya halaran kag ang sapay ginakaon sang kalayo sa ubos. Ikaduha, ang saserdote nagaambit sa sini kay sia (kag ang iya pamilya) nagakaon sa sinugba nga dughan kag natuo nga paa sang sapat nga ginahalad. Kag ikatlo, ang manughalad nagaambit paagi sa pagkaon sang nabilin sini. (Levitico 7:​11-36) Sa karon, ang pag-ambit sa lamesa ni Jehova nagakahulugan nga ihatag naton sa iya ang sahi sang pagsimba nga ginapatuman niya, subong sang ginpakita ni Jesus kag sang iya mga apostoles. Agod mahimo ini, dapat kita magkaon sa espirituwal sang ginaaman ni Jehova paagi sa iya Pulong kag organisasyon. Ang mga Israelinhon nga nakaagom sing pinasahi nga pagpakighidait kay Jehova sa iya lamesa, gindumilian sa paghalad sing mga halad sa mga demonyo sa ila lamesa. Ang espirituwal nga mga Israelinhon kag ang ila mga kaupod nga “iban pa nga mga karnero” ginadumilian man sang Dios.​—⁠Juan 10:16.

3. Paano ang isa makasala sing pag-ambit sa lamesa sang mga demonyo sa aton adlaw?

³ Paano ang isa makasala sing pag-ambit sa lamesa sang mga demonyo sa aton adlaw? Paagi sa pagsakdag sang bisan ano nga batok kay Jehova. Ang lamesa sang mga demonyo nagalakip sing tanan nga propaganda sang mga demonyo, nga ginatuyo sa pagpatalang kag sa pagpatalikod sa aton gikan kay Jehova. Sin-o ang luyag magpakaon sa iya tagipusuon kag hunahuna sina nga hilo? Ang matuod nga mga Cristiano nagadumili sa pagpakig-ambit sa mga halad nga ginahalad sang kalabanan nga mga tawo karon sa mga dios sang inaway kag kamanggaran.​—⁠Mateo 6:⁠24.

Paglikaw sa “Lamesa sang mga Demonyo”

4. Ano nga pamangkot ang ginaatubang naton tanan, kag ngaa indi naton luyag mag-ambit sing hungod sa lamesa sang mga demonyo?

⁴ Ang pamangkot nga ginaatubang naton tanan amo, Sa diin nga lamesa ako nagakaon? Indi naton malikawan ang kamatuoran nga kita obligado nga magkaon sa isa sang duha ka lamesa. (Ipaanggid ang Mateo 12:30.) Indi naton luyag nga kita sing hungod mangin umalambit sa lamesa sang mga demonyo. Madula naton ang kahamuot sang lamang matuod kag buhi nga Dios, si Jehova, kon himuon naton ina. Sa pihak nga bahin, ang pag-ambit sa kalan-on lamang sa lamesa ni Jehova magadul-ong sa kabuhi nga walay katapusan nga may kalipay! (Juan 17:⁠3) May hulubaton nga ang isa ka tawo makilala paagi sa iya ginakaon. Busa, ang bisan sin-o nga luyag magpabilin nga mapagros sa lawas kag sa hunahuna dapat magbantay sang iya ginakaon. Subong nga ang dagaya-sa-tambok nga junk food (witiwiti nga kalan-on), bisan pa ginpanamit sang kemikal nga mga panugang (ad­di­tives), wala nagaamot sa aton padayon nga kapagros sa lawas, gani man ang propaganda sining kalibutan nga nasamuan sing demonyohanon nga mga ideya isa ka malain malaragwayon nga junk food nga magapalain sa aton hunahuna.

5. Paano naton malikawan ang mga panudlo sang mga demonyo karon?

⁵ Gintagna ni apostol Pablo nga sa tion sang katapusan nga mga adlaw, ang mga tawo patalangon sang “mga panudlo sang mga demonyo.” (1 Timoteo 4:⁠1) Indi lamang sa mga pagtuluuhan sang butig nga relihion masapwan inang mga panudlo sang mga demonyo kundi ginasakdag man ini sing lapnag sa iban pa nga mga paagi. Halimbawa, dapat naton analisahon kag timbangtimbangon kon ano nga mga libro kag mga magasin ang ginabasa naton kag sang aton mga anak, kon ano nga mga programa sa telebisyon ang ginatan-aw naton, kag kon ano nga mga drama kag mga pelikula ang ginatan-aw naton. (Hulubaton 14:15) Kon sa paglingawlingaw nagabasa kita sing fic­tion (indi matuod nga sugilanon), nagapakita bala ini sing kasingki, malaw-ay nga sekso, ukon espiritismo? Kon nagabasa kita sing indi fiction agod makatuon, nagapasangkad bala ini sing isa ka pilosopiya ukon dalanon sang pagkabuhi nga “indi nahisuno kay Cristo”? (Colosas 2:⁠8) Ginapresentar bala ang walay pulos nga mga pagbulubanta, ukon ginasakdag bala ang pagpakigbahin sa sosyal nga mga kahublagan sang kalibutan? Nagapabaskog bala ini sing determinasyon nga magmanggaranon gid? (1 Timoteo 6:⁠9) Isa bala ini ka publikasyon nga malalangon nga nagapresentar sing mabahinbahinon nga mga panudlo nga indi tulad-Cristo? Kon huo ang sabat kag sa gihapon nagapadayon kita sa pagbasa ukon sa pagtan-aw sina nga materyal, may katalagman nga nagakaon kita sa lamesa sang mga demonyo. Sa karon, ginatos ka libo ang mga publikasyon nga nagasakdag sang kalibutanon nga mga pilosopiya nga daw nasanagan gid kag pinakabag-o. (Manugwali 12:12) Apang wala gid sing bisan isa sining propaganda ang bag-o gid; ukon para ini sa kaayuhan kag kauswagan sang isa, subong nga ang malalangon nga ginsiling ni Satanas kay Eva wala magpauswag sa iya.​—⁠2 Corinto 11:⁠3.

6. Kon ginaagda kita ni Satanas nga tilawan ang iya demonyohanon nga junk food, ano ang dapat naton himuon?

⁶ Busa, kon agdahon kita ni Satanas sa pagtilaw sang iya demonyohanon nga junk food, ano ang dapat naton himuon? Subong sang ginhimo ni Jesus sang ginsulay sia ni Satanas nga himuon nga mga tinapay ang mga bato. Si Jesus nagsabat: “Nasulat na, ‘Indi lamang sa tinapay mabuhi ang tawo kundi sa tagsa ka pulong nga nagaguwa sa baba ni Jehova.’ ” Kag sang gintanyag sang Yawa kay Jesus ang “tanan nga ginharian sang kalibutan kag ang ila himaya” kon magyaub sia kag maghimo sing isa ka buhat sang pagsimba kay Satanas, si Jesus nagsabat: “Palayo ka, Satanas! Kay nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghalad sing balaan nga pag-alagad.’ ”​—⁠Mateo 4:​3, 4, 8-10.

7. Ngaa ginalimbungan naton ang aton kaugalingon kon maghunahuna kita nga mahimo kita makakaon sa lamesa ni Jehova kag sa lamesa sang mga demonyo?

⁷ Ang lamesa ni Jehova kag ang lamesa nga ginahanda sang iya demonyo nga mga kaaway indi gid mapahiusa! A, huo, gintilawan na ini anay. Dumduma ang dumaan nga mga Israelinhon sang mga adlaw ni manalagna Elias. Nagsiling ang katawhan nga nagasimba sila kay Jehova, apang nagpati sila nga ang iban nga mga dios, kaangay ni Baal, nagapanaad sing kahamungayaan. Ginpalapitan ni Elias ang katawhan kag ginsilingan: “Tubtob san-o kamo magakimpangkimpang sa duha ka opinyon? Kon si Jehova ang matuod nga Dios, sunda sia; apang kon si Baal, sunda sia.” Sing dimapanghiwala, ang mga Israelinhon nagkimpangkimpang ‘una sa isa ka tiil dayon sa pihak naman.’ (1 Hari 18:​21, The Jerusalem Bible) Ginhangkat ni Elias ang mga saserdote ni Baal nga pamatud-an ang pagkadios sang ila diosdios. Ang Dios nga makapadala sing kalayo gikan sa langit sa ibabaw sang halad mangin amo ang matuod nga Dios. Walay sapayan sang daku nga panikasog, napaslawan ang mga saserdote ni Baal. Nian si Elias nangamuyo sing simple lamang: “O Jehova, sabta ako, agod nga makilala sining katawhan nga ikaw, Jehova, ang matuod nga Dios.” Sa gilayon ang kalayo gikan kay Jehova naghagunos gikan sa langit kag gin-upos ang ginbasa sing tubig nga halad nga sapat. Napahulag sang makakombinsi nga pagpasundayag sang pagkadios ni Jehova, gintuman sang katawhan si Elias kag ginpamatay ang 450 tanan ka manalagna ni Baal. (1 Hari 18:​24-40) Gani sa karon, dapat naton kilalahon si Jehova subong ang matuod nga Dios kag mangin desidido sa pagkaon lamang sa iya lamesa kon wala pa naton mahimo ini.

‘Ang Matutom nga Ulipon’ Nagaserbe sa Lamesa ni Jehova

8. Ano nga ulipon ang gintagna ni Jesus nga gamiton niya sa pagpakaon sa iya mga disipulo sa espirituwal sa tion sang iya presensia, kag ano ang identidad sang ulipon?

⁸ Gintagna ni Ginuong Jesucristo nga sa tion sang iya presensia isa ka “matutom kag mainandamon nga ulipon” ang magaaman sing espirituwal nga kalan-on para sa iya mga disipulo: “Malipayon ina nga ulipon kon sa pag-abot sang iya agalon masapwan sia nga nagahimo sing subong. Sa pagkamatuod nagasiling ako sa inyo, tangduan Niya sia sa ibabaw sang tanan niya nga pagkabutang.” (Mateo 24:​45-47) Ining ulipon napamatud-an nga, indi isa ka indibiduwal, kundi isa ka klase sang dedikado, hinaplas nga mga Cristiano. Ginbutang sini nga klase sa ibabaw sang lamesa ni Jehova ang pinakamaayo nga espirituwal nga kalan-on para sa hinaplas nga nagkalabilin kag sa “dakung kadam-an.” Karon kapin sa apat ka milyon, ang dakung kadam-an nagdesisyon upod sa hinaplas nga nagkalabilin dampig sa bug-os uniberso nga pagkasoberano ni Jehova nga Dios kag para sa iya Ginharian nga paagi sa sini pakabalaanon niya ang iya balaan nga ngalan.​—⁠Bugna 7:​9-17.

9. Ano nga instrumento ang ginagamit sang ulipon nga klase sa pag-aman sing espirituwal nga kalan-on para sa mga Saksi ni Jehova, kag paano ang ila espirituwal nga pagpiesta matagnaon nga ginlaragway?

⁹ Ginagamit sining matutom nga ulipon nga klase ang Watch Tower Bible and Tract Society sa pag-aman sing espirituwal nga kalan-on para sa tanan nga Saksi ni Jehova. Samtang ang Cristiandad kag ang nabilin sining sistema sang mga butang nagakagutman bangod sang kakulang sing makahatag-kabuhi nga espirituwal nga kalan-on, ang katawhan ni Jehova nagapiesta. (Amos 8:11) Katumanan ini sang tagna sa Isaias 25:6: “Si Jehova sang kasuldadusan pat-od nga magahimo para sa tanan nga katawhan, sa sini nga bukid, sing isa ka piesta sa matambok nga mga butang, piesta sa alak nga labud, sa matambok nga mga butang nga puno sing utok sa tul-an, sa mga alak sa labud nga pinatin-aw sing maayo.” Subong ginapakita sang bersikulo 7 kag 8, ini nga piesta magapadayon tubtob sa walay katapusan. Daw ano ini nga pagpakamaayo para sa tanan sa sulod sang kitaon nga organisasyon ni Jehova karon, kag daw ano nga pagpakamaayo nga ini magapadayon sing subong sa palaabuton!

Mag-andam sa Makahililo nga Kalan-on sa Lamesa sang mga Demonyo

10. (a) Ano nga sahi sang kalan-on ang ginapanagtag sang malaut nga ulipon nga klase, kag ano ang nagapahulag sa ila? (b) Paano ginatratar sang malaut nga ulipon nga klase ang ila mga masigkaulipon anay?

¹⁰ Ang kalan-on sa lamesa sang mga demonyo makahililo. Binagbinaga, halimbawa, ang kalan-on nga ginapanagtag sang malaut nga ulipon nga klase kag mga apostata. Wala ini nagapapagros ukon nagapabaskog; indi ini maayo. Indi mahimo ini, kay ang mga apostata nag-untat sa pagkaon sa lamesa ni Jehova. Subong resulta, nadula na ang bisan ano sa bag-ong personalidad nga ila napalambo. Indi ang balaan nga espiritu ang nagapahulag sa ila, kundi ang kapait. Nagapangibabaw sa ila ang isa ka tulumuron​—⁠bakulon ang ila mga masigkaulipon anay, subong gintagna ni Jesus.​—⁠Mateo 24:​48, 49.

11. Ano ang ginsulat ni C. T. Russell tuhoy sa espirituwal nga mga kalan-on nga mapilian sang isa, kag paano niya ginlaragway ang mga nagbiya sa lamesa ni Jehova?

¹¹ Halimbawa, sang 1909, ang presidente sadto sang Watch Tower Society, si C. T. Russell, nagsulat tuhoy sa mga nagtalikod gikan sa lamesa ni Jehova kag nagsugod sa pagpintas sa ila mga masigkaulipon anay. Ang The Watch Tower sang Oktubre 1, 1909, nagsiling: “Ang tanan nga nagbulag sang ila kaugalingon gikan sa Sosiedad kag sa hilikuton sini, sa baylo nga pauswagon ang ila kaugalingon ukon palig-unon ang iban sa pagtuo kag sa pagpalambo sing mga bunga sang espiritu, daw nagahimo sang kabaliskaran​—⁠nagatinguha sa paghalit sa Kausa nga ila anay gin-alagdan, kag, upod ang diutay nga iskandalo, amat-amat nga nadula, nga nagahalit lamang sang ila kaugalingon kag sang iban pa nga may subong man sini nga masuayon nga espiritu. . . . Kon ang iban nagahunahuna nga makatigayon sila sing pareho lang ukon maayo pa nga mga kalan-on sa iban nga mga lamesa, ukon nga sila mismo makapatubas sing pareho lang ukon maayo pa​—⁠pabay-i sila. . . . Apang samtang ginatugutan naton ang iban nga magkadto bisan diin agod mangita sing kalan-on kag kasanagan nga magapakontento sa ila, sing makapakibot, ang mga nagasumpong sa aton nagpili sing tuhay gid nga dalanon. Sa baylo nga magpakalalaki subong sang kalibutan sa pagsiling, ‘Nakakita ako sing butang nga mas naluyagan ko; paalam na!’ nagapakita ini sila sing kaakig, mahaliton nga katuyuan, dumot, pagpuyas, ‘mga buhat sang unod kag sang yawa’ subong sang wala gid naton mahibal-i nga ginapakita sang kalibutanon nga mga tawo. Daw naindyeksionan sila sing pagkabuang, sing rabis ni Satanas. Ang iban sa ila nagapanakit sa aton kag dayon magasiling nga kita kuno ang nagapanakit. Handa sila sa pagsiling kag sa pagsulat sing matinamayon nga mga kabutigan kag sa pagpakanubo sang ila kaugalingon agod maghimo sing kapintasan.”

12. (a) Paano ginasakit sang mga apostata ang ila mga masigkaulipon? (b) Ngaa makatalagam nga bangod sang pagkamausisaon magbasabasa sang mga sinulatan sang mga apostata?

¹² Huo, ang mga apostata nagabalhag sing mga literatura nga nagapabutyag sing tiko nga mga butang, indi bug-os nga mga kamatuoran, kag dayag nga kabutigan. Nagaprotesta pa gani sila sa mga kombension sang mga Saksi, nagatinguha sa pagsiod sa mga wala nagahalong. Busa, makatalagam gid nga tugutan ang aton pagkamausisaon nga magpahulag sa aton sa pagkaon sa sina nga mga sinulatan ukon mamati sa ila matinamayon nga mga hambal! Samtang mahimo nga indi naton kabigon ini nga isa ka katalagman para sa aton kaugalingon, ang katalagman yara gihapon. Ngaa? Una, ang iban nga mga literatura sang mga apostata nagapresentar sing mga kabutigan paagi sa “madanlog nga mga hambal” kag “palsipikado nga mga tinaga.” (Roma 16:​17, 18; 2 Pedro 2:⁠3) Indi bala nga amo gid sini ang paabuton mo gikan sa lamesa sang mga demonyo? Kag samtang ang mga apostata mahimo nga magapresentar man sing pila ka katunayan, sa masami ginasambit lamang ini sa tuyo nga buyukon ang iban pahilayo sa lamesa ni Jehova. Ang tanan nila nga sinulatan pulos lamang pagmulay kag pagpakalain! Wala gid sing makapalig-on.

13, 14. Ano ang mga bunga sang mga apostata kag sang ila propaganda?

¹³ Si Jesus nagsiling: “Paagi sa ila mga bunga makilala ninyo sila.” (Mateo 7:16) Ano, karon, ang mga bunga sang mga apostata kag sang ila mga publikasyon? Apat ka butang ang kinaiya sang ila propaganda. (1) Tuso. Ang Efeso 4:14 nagasiling nga sila ‘malalangon sa pagpadihot sing sayop.’ (2) Matinaastaason nga kinaalam. (3) Wala sing gugma. (4) Pagkadibunayag sa nanuhaytuhay nga mga porma. Amo gid ini ang mga ingrediente sang kalan-on nga yara sa lamesa sang mga demonyo, tanan ini ginatuyo sa pagpaluya sa pagtuo sang katawhan ni Jehova.

¹⁴ Kag may isa pa ka butang. Sa diin nagbalik ang mga apostata? Sa madamo nga kaso, nagsulod sila liwat sa kadudulman sang Cristiandad kag sang mga doktrina sini, subong sang pagpati nga ang tanan nga Cristiano mapalangit. Dugang pa, ang kalabanan sa ila wala na nagasakdag sang malig-on nga Makasulatanhon nga tindog tuhoy sa dugo, neutralidad, kag sang kinahanglanon nga magpanaksi nahanungod sa Ginharian sang Dios. Apang, aton na ginpalagyuhan ang kadudulman sang Babilonia nga Daku, kag indi gid naton luyag magbalik sa sini. (Bugna 18:​2, 4) Subong matutom nga mga alagad ni Jehova, ngaa abi maningadtingad pa kita sa mga propaganda sining mga nagsikway sa lamesa ni Jehova nga karon paagi sa pulong nagasakit sa mga nagabulig sa aton sa pagkaon sing “makapapagros nga mga pulong”?​—⁠2 Timoteo 1:⁠13.

15. Ano nga prinsipio sang Biblia ang magabulig sa aton sa pagpili sing maalamon nga dalanon kon makabati kita sing mga akusasyon sang mga apostata?

¹⁵ Ang iban mahimo nga mangusisa nahanungod sa mga akusasyon sang mga apostata. Apang dapat naton sundon ang prinsipio sa Deuteronomio 12:​30, 31. Paagi kay Moises ginpaandaman diri ni Jehova ang mga Israelinhon kon ano ang dapat likawan sa tion nga matabog na nila ang pagano nga mga pumuluyo sang Ginsaad nga Duta. “Andami ang imo kaugalingon kay basi masiod ka sa pagsunod sa ila, sa tapos nga malaglag sila gikan sa imo atubangan, kag basi mamangkot ka nahanungod sa ila mga dios, nga nagasiling, ‘Paano bala ang pag-alagad sini nga mga pungsod sa ila mga dios? Kag ako, huo, ako gid, magahimo sing subong man.’ Dili ka maghimo sing subong kay Jehova nga imo Dios.” Huo, nahibaluan ni Jehova nga Dios kon paano nagapanghikot ang pagkamausisaon sang tawo. Dumduma si Eva, kag ang asawa man ni Lot! (Lucas 17:32; 1 Timoteo 2:14) Indi gid naton pagsapakon ang ginasiling ukon ginahimo sang mga apostata. Sa baylo, magmasako kita sa pagpalig-on sa katawhan kag sa matutom nga pagkaon sa lamesa ni Jehova!

Ang Lamesa Lamang ni Jehova ang Magapabilin

16. (a) Ano sa indi madugay ang mahanabo kay Satanas, sa iya mga demonyo, kag sa malaragwayon nga lamesa nga ginakan-an sang mga pungsod sang kalibutan? (b) Ano ang mahanabo sa tanan nga tawo nga padayon nga nagakaon sa lamesa sang mga demonyo?

¹⁶ Sa indi madugay, ang dakung kapipit-an hinali nga magaabot, kag madasig nga magadangat sa isa ka talipuspusan sa “inaway sang dakung adlaw sang Dios nga Labing Gamhanan.” (Bugna 16:​14, 16) Magadangat ini sa putukputukan samtang ginalaglag ni Jehova ining sistema sang mga butang kag ang malaragwayon nga lamesa nga ginakan-an sang mga pungsod sang kalibutan. Pukanon man ni Jehova ang bug-os nga kitaon nga organisasyon ni Satanas nga Yawa kag sang iya mga demonyo. Ang mga nagpadayon sa pagkaon sa espirituwal nga lamesa ni Satanas, ang lamesa sang mga demonyo, mapilitan sa pagkadto sa isa ka literal nga pagkaon, indi, indi subong mga umalambit, kundi subong amo ang panguna nga putahe​—⁠sa ila kalaglagan!​—⁠Tan-awa ang Ezequiel 39:4; Bugna 19:​17, 18.

17. Ano nga mga pagpakamaayo ang magaabot sa mga nagakaon lamang sa lamesa ni Jehova?

¹⁷ Ang lamesa lamang ni Jehova ang magapabilin. Ang mga mainapresyahon nga nagakaon sa sini pagaamligan kag makatigayon sing pribilehiyo sa pagkaon didto sing dayon. Wala na sing peligro nga kulangon sila sing kalan-on. (Salmo 67:6; 72:16) Magaalagad sila kay Jehova nga Dios sa Paraiso nga may himpit nga panglawas! Sa katapusan ang makapulukaw nga mga pulong sang Bugna 21:4 makadalayaw nga matuman: “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Bangod wala na sing magapamatok, ang bug-os uniberso nga pagkasoberano ni Jehova nga Dios magaluntad bisan diin tubtob sa walay katubtuban samtang ang walay katapusan nga kahamuot sang Dios ginabubo sa gingawad nga katawhan nga nagapuyo sa Paraiso nga duta. Agod matigayon ini nga padya, mangin determinado kita tanan nga mag-ambit lamang sa lamesa ni Jehova, nga puno sing labing maayo nga espirituwal nga mga kalan-on!

Paano Mo Sabton?

◻ Paano naton malikawan nga mapatalang sang mga panudlo sang mga demonyo?

◻ Ngaa indi mahimo nga makakaon kita sa lamesa ni Jehova kag sa lamesa sang mga demonyo?

◻ Ano nga sahi sang kalan-on ang ginapanagtag sang mga apostata?

◻ Ngaa makatalagam nga mangusisa nahanungod sa mga panumbungon sang mga apostata?

◻ Ano ang mga bunga sang mga apostata?

[Piktyur sa pahina 10]

Ang lamesa ni Jehova puno sing labing maayo nga espirituwal nga mga kalan-on