Pagkabuhi Suno sa Cristianong Dedikasyon sa Kahilwayan
“Kon diin ang espiritu ni Jehova, didto may kahilwayan.”—2 CORINTO 3:17.
1. Kay sin-o nagdedikar ang mga Saksi ni Jehova, kag ngaa nagagamit sila sing legal nga mga ahensia?
ANG mga Saksi ni Jehova nagapati nga ang ila relihion magapabilin sing dayon. Busa nagalaum sila nga maalagad ang Dios “sa espiritu kag kamatuoran” sa walay katubtuban. (Juan 4:23, 24) Subong mga tawo nga hilway sa pagbuot, ining mga Cristiano nagdedikar sing bug-os kay Jehova nga Dios kag determinado sa pagkabuhi suno sa sini. Bangod sina, nagasalig sila sa Pulong sang Dios kag sa iya balaan nga espiritu. Samtang bug-os tagipusuon nila nga ginahimo ang ila Cristianong dedikasyon nga may hatag-Dios nga kahilwayan, ang mga Saksi nagapakita sing nagakaigo nga pagtahod sa gobierno nga “superyor nga mga awtoridad” kag nagakaigo nga nagagamit sang legal nga mga paagi kag mga aman. (Roma 13:1; Santiago 1:25) Halimbawa, ginagamit sang mga Saksi ang Watch Tower Society subong legal nga instrumento—isa sa madamo sa lainlain nga kadutaan—agod mahimo nila ang ila hilikuton nga pagbulig sa mga isigkatawo, ilabi na sa espirituwal nga mga paagi. Apang ang mga Saksi nadedikar sa Dios, indi sa bisan anong legal nga ahensia, kag ang ila dedikasyon kay Jehova magapabilin sing dayon.
2. Ngaa ang Watch Tower Society kag ang kaanggid nga legal nga mga ahensia ginapabaloran sing daku sang mga Saksi ni Jehova?
2 Subong mga alagad nga nadedikar sa Dios, ang mga Saksi ni Jehova obligado sa pagsunod sa mga sugo ni Jesus nga “maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila.” (Mateo 28:19, 20) Ini nga hilikuton magapadayon tubtob sa katapusan sang sistema sang mga butang, kay si Jesus nagsiling man: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:3, 14) Kada tuig, ang mga imprintahan sang Watch Tower Society kag sang kaanggid legal nga mga hubon nagaaman sa mga Saksi ni Jehova sing minilyon ka Biblia, libro, brosyur, kag magasin agod magamit sa ila bug-os kalibutan nga hilikuton sa pagbantala. Busa ining legal nga mga ahensia daku gid nga bulig sa dedikado nga mga alagad sang Dios agod magkabuhi sila suno sa ila dedikasyon sa iya.
3. Sa anong kahulugan gingamit anay sang mga Saksi ni Jehova ang tinaga nga “Sosiedad”?
3 Ang isa mahimo mangatarungan nga ang paagi nga ginapatuhuyan sang mga Saksi ang Watch Tower Society—ukon sa mas masami “ang Sosiedad” lamang—nagapakita nga indi lamang isa ka legal nga instrumento ang ila pagtamod sa sini. Wala bala nila ini ginakabig subong ang katapusan nga may awtoridad tuhoy sa pagsimba? Ang libro nga Jehovah’s Witnesses—Proclaimers of God’s Kingdom nagapaathag sini nga punto paagi sa pagpaathag: “Kon ginapatuhuyan sang The Watchtower [Hunyo 1, 1938] ‘Ang Sosiedad,’ ini nagakahulugan, indi sa legal lamang nga pagkainstrumento sini, kundi sa hubon sang hinaplas nga mga Cristiano nga nagahuman sa legal nga ahensia kag nagagamit sini.”a Busa ang ekspresyon nagapatuhoy sa “matutom kag mainandamon nga ulipon.” (Mateo 24:45) Sa amo sini nga kahulugan nga ang tinaga nga “ang Sosiedad” kinaandan na nga ginagamit sang mga Saksi. Sa pagkamatuod, ang legal nga korporasyon kag ang “matutom kag mainandamon nga ulipon” indi mabulubaylo nga mga tinaga. Ang mga direktor sang Watch Tower Society ginapili, samtang ang mga Saksi nga nagahuman sa ‘matutom nga ulipon’ ginatangdo sang balaan nga espiritu ni Jehova.
4. (a) Paano ginapabutyag sang madamo nga Saksi ang ila kaugalingon agod malikawan ang sayop nga paghangop? (b) Ngaa dapat kita mangin balanse kon nahanungod sa terminolohiya?
4 Agod malikawan ang sayop nga mga paghangop, ang mga Saksi ni Jehova nagahalong gid sa ila ginahambal. Sa baylo nga magsiling, “ang Sosiedad nagatudlo,” madamo nga Saksi ang nagapakamaayo sa paggamit sing mga ekspresyon subong sang, “ang Biblia nagasiling” ukon, “nahangpan ko nga ang Biblia nagatudlo.” Sa sining paagi ginapadaku nila ang personal nga desisyon nga ginhimo sang tagsa ka Saksi sang ginbaton nila ang mga panudlo sang Biblia kag ginalikawan man ang paghatag sing sayop nga impresyon nga ang mga Saksi ginadiktahan sa bisan paano sang pila ka relihioso nga sekta. Sa pagkamatuod, ang mga panugda may kaangtanan sa mga tinaga indi gid dapat mangin isa ka butang nga baisan. Total, ang mga tinaga importante lamang agod malikawan ang sayop nga mga paghangop. Ang Cristianong pagkatimbang kinahanglanon. Ang Biblia nagalaygay sa aton nga ‘indi mag-away sa mga tinaga.’ (2 Timoteo 2:14, 15) Ang Kasulatan nagahatag man sini nga prinsipio: “Kon magmitlang kamo sa dila sing pulong nga indi madali mahangpan, paano bala mahibaluan kon ano ang ginapamulong?”—1 Corinto 14:9.
Ginabuhinan sang Espiritu sang Dios ang Pagkinahanglan sing mga Pagsulundan
5. Paano dapat hangpon ang 1 Corinto 10:23?
5 “Ang tanan nga butang makatarunganon; apang indi tanan nga butang mapuslanon,” siling ni apostol Pablo. Sia nagdugang: “Ang tanan nga butang makatarunganon; apang indi tanan nga butang makapalig-on.” (1 Corinto 10:23) Maathag nga indi buot silingon ni Pablo nga makatarunganon nga himuon ang mga butang nga ginapakamalaut sang Pulong sang Dios. Kon ipaanggid sa mga 600 ka kasuguan nga ginhatag sa dumaan nga Israel, diutay lamang ang maathag nga mga sugo nga magatuytoy sa Cristianong pagkabuhi. Gani, madamo nga butang ang ginapabay-an na lamang sa indibiduwal nga konsiensia. Ang isa ka tawo nga nagdedikar kay Jehova nagaagom sing kahilwayan nga resulta sang pagtuytoy sang espiritu sang Dios. Bangod ginbaton niya ang kamatuoran, ginasunod sang isa ka Cristiano ang iya nahanas-sa-Biblia nga konsiensia kag nagasalig sa panuytoy sang Dios paagi sa balaan nga espiritu. Nagabulig ini sa dedikado nga Cristiano nga pat-uron kon ano ang ‘magapalig-on’ kag mangin “mapuslanon” sa iya kaugalingon kag sa iban. Nakahibalo sia nga ang iya mga desisyon makaapektar sa iya personal nga kaangtanan sa Dios, nga sa iya nagdedikar sia.
6. Sa Cristianong mga miting, paano naton mapakita nga ginabaton naton ang kamatuoran?
6 Ginapakita sang isa ka Saksi nga ginabaton niya ang kamatuoran paagi sa pagkomento sa Cristianong mga miting. Sa primero, mahimo niya basahon ang ginasiling sa publikasyon nga ginatun-an. Apang, sa ulihi, magauswag sia tubtob sa punto nga mapabutyag niya ang mga panudlo sang Biblia sa iya kaugalingon nga mga tinaga. Busa nagahatag sia sing pamatuod nga ginapauswag niya ang iya ikasarang sa paghunahuna, wala lamang nagasulit sang ginsiling sang iban. Ang pagbalay sang mga ideya sa iya kaugalingon nga mga tinaga kag ang tinagipusuon nga pagpabutyag sang husto nga mga tinaga sang kamatuoran magapahalipay sa iya kag magapakita nga sia mismo kumbinsido sa iya ginasiling.—Manugwali 12:10; ipaanggid ang Roma 14:5b.
7. Anong mga desisyon ang kinabubut-on nga ginhimo sang mga alagad ni Jehova?
7 Ang mga Saksi ni Jehova ginapahulag sang ila gugma sa Dios kag sa ila mga isigkatawo. (Mateo 22:36-40) Matuod, ginahugpong sila sang higot sang katulad-Cristo nga gugma subong bug-os kalibutan nga pag-inupdanay sang mga kauturan. (Colosas 3:14; 1 Pedro 5:9) Apang subong may hilway sa pagbuot, ang kada isa namat-od sing personal sa pagbantala sing maayong balita sang Ginharian sang Dios, sa pagpabilin nga neutral sa politika, sa paglihi sa dugo, sa paglikaw sa pila ka sahi sang kalingawan, kag sa pagkabuhi suno sa mga talaksan sang Biblia. Mga desisyon ini nga wala ginpilit sa ila. Mga desisyon ini nga bahin sang pagkabuhi nga ginpili sing hilway sang potensiyal nga mga Saksi antes sila naghimo sing tikang sang Cristianong dedikasyon.
Salabton sa Nagadumala nga Hubon?
8. Anong pamangkot ang dapat athagon?
8 Maathag nga ginapakita sang Biblia nga ang matuod nga mga Cristiano wala ginapilit sa pag-alagad sa Dios. Ini nagasiling: “Si Jehova Espiritu; kag kon diin ang espiritu ni Jehova, didto may kahilwayan.” (2 Corinto 3:17) Apang paano ini nga katunayan mapahisanto sa ideya sang “matutom kag mainandamon nga ulipon” upod sang Nagadumala nga Hubon sini?—Mateo 24:45-47.
9, 10. (a) Paano maaplikar ang prinsipio sang pagkaulo sa Cristianong kongregasyon? (b) Ano ang ginakinahanglan anay sa pagsunod sa prinsipio sang pagkaulo sang nahaunang-siglo nga Cristianong kongregasyon?
9 Agod masabat ini nga pamangkot, dapat naton dumdumon ang Makasulatanhon nga prinsipio sang pagkaulo. (1 Corinto 11:3) Sa Efeso 5:21-24, si Cristo ginapakilala subong “ulo sang kongregasyon,” ang isa nga sa iya ini “nagapasakop.” Nahangpan sang mga Saksi ni Jehova nga ang matutom kag mainandamon nga ulipon ginahuman sang espirituwal nga mga kauturan ni Jesus. (Hebreo 2:10-13) Ining matutom nga ulipon nga klase gintangdo sa pag-aman sa katawhan sang Dios sing espirituwal nga “pagkaon sa nagakaigo nga tion.” Sa sining tion sang katapusan, gintangdo ni Cristo sa sini nga ulipon ang “tanan niya nga pagkabutang.” Busa ang katungdanan sini nagakabagay sang pagtahod sang bisan sin-o nga nagapangangkon nga isa ka Cristiano.
10 Ang katuyuan sang pagkaulo amo ang pag-amlig sa paghiusa kag pagpat-od nga “ang tanan nga butang himuon sing nagakaigo kag suno sa kahimusan.” (1 Corinto 14:40) Agod maagom ini sang nahaunang siglo, ang pila sa hinaplas nga mga Cristiano gikan sa matutom kag mainandamon nga ulipon nga klase ginpili sa pagtiglawas sa bug-os nga grupo. Subong sang ginpamatud-an sang masunod nga mga hitabo, ang pagdumala nga ginhimo sining nahaunang-siglo nga nagadumala nga hubon ginkahamut-an kag ginpakamaayo ni Jehova. Malipayon nga ginbaton sang nahaunang-siglo nga mga Cristiano ang kahimusan. Huo, gin-abiabi nila sing aktuwal kag ginpasalamatan ang maayong mga resulta sini.—Binuhatan 15:1-32.
11. Paano dapat tamdon ang karon nga Nagadumala nga Hubon?
11 Ang kabilihanan sadto nga kahimusan nagaluntad gihapon. Sa karon, ang Nagadumala nga Hubon sang mga Saksi ni Jehova ginahuman sang napulo ka hinaplas nga Cristiano, tanan sila may dinikada nga Cristianong eksperiensia. Ginatuytuyan nila sa espirituwal ang mga Saksi ni Jehova, kaangay sa ginhimo sang nahaunang-siglo nga nagadumala nga hubon. (Binuhatan 16:4) Kaangay sang unang mga Cristiano, ang mga Saksi malipayon nga nagadangop sa hamtong nga mga kauturan sang Nagadumala nga Hubon para sa pasad-sa-Biblia nga panuytoy kag pag-ubay may kaangtanan sa pagsimba. Walay sapayan nga ang mga katapo sang Nagadumala nga Hubon mga ulipon ni Jehova kag ni Cristo, subong sang ila mga masigka-Cristiano, ang Biblia nagasugo sa aton: “Mangin matinumanon kamo sa nagapanguna sa tunga ninyo kag mangin mapasakupon, kay padayon sila nga nagabantay sa inyo mga kalag subong sang mga magahatag sing husay; agod himuon nila ini nga may kalipay kag indi nga may pagbakho, kay makahalalit ini sa inyo.”—Hebreo 13:17.
12. Kay sin-o magahatag sing husay ang kada indibiduwal nga Cristiano?
12 Ang katungdanan bala sa pagtatap nga ginatangdo sang Kasulatan sa Nagadumala nga Hubon nagakahulugan nga ang tagsatagsa sa mga Saksi ni Jehova magahatag sa sini sing husay sa iya mga binuhatan? Indi suno sa ginsiling ni Pablo sa mga Cristiano sa Roma: “Ngaa bala nagahukom ka sa imo utod? Ukon ngaa bala nagatamay ka man sa imo utod? Kay tanan kita magatindog sa atubangan sang lingkuran nga hukmanan sang Dios . . . Ang tagsatagsa sa aton magahatag sing husay sang iya kaugalingon sa Dios.”—Roma 14:10-12.
13. Ngaa ginareport sang mga Saksi ni Jehova ang ila pagbantala nga hilikuton?
13 Apang, indi bala matuod nga ang indibiduwal nga mga Saksi ginapaabot sa pagreport sang ila hilikuton sa pagbantala? Huo, apang ang katuyuan sini maathag nga ginpaathag sang isa ka libro sang mga Saksi, nga nagasiling: “Ang unang mga sumulunod ni Jesucristo nagpakita sing interes sa mga report sang pag-uswag sa pagbantala nga hilikuton. (Marcos 6:30) Samtang nagauswag ang hilikuton, ang mga estadistika gintipon upod ang mga report tuhoy sa tumalagsahon nga mga eksperiensia sang mga nagapakigbahin sa pagbantala sing maayong balita. . . . (Binuhatan 2:5-11, 41, 47; 6:7; 1:15; 4:4) . . . Daw ano anay ka makapalig-on para sa matutom nga Cristianong mga manugpangabudlay nga makabati sing mga report tuhoy sa kon ano ang nahimo! . . . Sa kaanggid nga paagi, ang modernong-adlaw nga organisasyon ni Jehova nagapanikasog sa paghupot sing husto nga mga rekord sang hilikuton nga ginahimo bilang katumanan sang Mateo 24:14.”
14, 15. (a) Paano maaplikar ang 2 Corinto 1:24 sa Nagadumala nga Hubon? (b) Sa anong sadsaran ang indibiduwal nga mga Cristiano magahimo sing personal nga mga desisyon, bilang pagkilala sa anong katunayan?
14 Ang Nagadumala nga Hubon isa ka mahigugmaon nga aman kag halimbawa sang pagtuo nga takus ilugon. (Filipos 3:17; Hebreo 13:7) Paagi sa ila pagsakdag kag pagsunod kay Cristo subong modelo, mapalanog nila ang pinamulong ni Pablo: “Indi nga mga agalon kami sa inyo pagtuo, kundi mga masigkamanugpangabudlay kami para sa inyo kalipay, kay paagi sa inyo pagtuo nga kamo nagatindog.” (2 Corinto 1:24) Paagi sa pagpanilag sa mga nagakatabo, ang Nagadumala nga Hubon nagapatalupangod sang mga kapuslanan sang pagsunod sa laygay sang Biblia, nagahatag sing mga panugda tuhoy sa pag-aplikar sa mga kasuguan kag mga prinsipio sang Biblia, nagapaandam tuhoy sa natago nga mga katalagman, kag nagahatag sa “mga masigkamanugpangabudlay” sing kinahanglanon nga pagpalig-on. Busa ginahimo sini ang ila Cristianong pagkatulugyanan, nagabulig sa ila nga mahuptan ang ila kalipay, kag nagapalig-on sa ila sa pagtuo agod makatindog sila nga malig-on.—1 Corinto 4:1, 2; Tito 1:7-9.
15 Kon ang isa ka Saksi nagahimo sing mga desisyon pasad sa laygay sang Biblia nga ginhatag sang Nagadumala nga Hubon, ginahimo niya ini suno sa iya kabubut-on bangod sia mismo nakumbinsi sang iya pagtuon sa Biblia nga amo ini ang nagakaigo nga dalanon. Ang tagsa ka Saksi ginapahulag mismo sang Pulong sang Dios nga iaplikar ang maayong Makasulatanhon nga laygay nga ginhatag sang Nagadumala nga Hubon, nakahangop sing bug-os nga ang iya mga desisyon makaapektar sa iya personal nga kaangtanan sa Dios, nga sa iya nagdedikar sia.—1 Tesalonica 2:13.
Mga Estudyante kag mga Soldado
16. Bisan nga ang mga desisyon tuhoy sa paggawi personal nga butang, ngaa ang iban ginadisfellowship?
16 Apang kon ang mga desisyon tuhoy sa paggawi personal nga butang, ngaa ang pila ka Saksi ni Jehova ginadisfellowship? Wala sing isa ang dimapatugsilingon nga makapamat-od nga ang paghimo sing isa ka partikular nga sala nagakinahanglan sing pagdisfellowship. Sa baylo, ini nga buhat ginapatuman lamang sang Kasulatan kon ang isa ka katapo sang kongregasyon dimahinulsulon nga nagabuhat sing mabug-at nga mga sala, subong sang ginhinambitan sa ika-5 nga kapitulo sang Nahaunang Corinto. Busa, samtang ang isa ka Cristiano mahimo nga madisfellowship tungod sang paghimo sing pakighilawas, matabo lamang ini kon ang indibiduwal nagadumili sa pagbaton sing espirituwal nga bulig sang mahigugmaon nga mga manugbantay. Ang mga Saksi ni Jehova wala nagaisahanon sa paghimo sining Cristiano nga buhat. Ang The Encyclopedia of Religion nagasiling: “Ang bisan ano nga komunidad may kinamatarong sa pag-amlig sa sini batok sa dimasinulundon nga mga katapo nga mahimo magabutang sa katalagman sang kaayuhan sang tanan. Sa relihioso nga kahimtangan ini nga kinamatarong masunson nga ginapabakod sang pagtuo nga ang ginatalana nga silot [sang pag-ekskomulgar] nagaapektar sa kinamatarong sang isa sa atubangan sang Dios.”
17, 18. Paano ang pagkanagakabagay sang pagdisfellowship mailustrar?
17 Ang mga Saksi ni Jehova mga estudyante sang Biblia. (Josue 1:8; Salmo 1:2; Binuhatan 17:11) Ang programa sa pagtudlo sa Biblia nga ginaaman sang Nagadumala nga Hubon mahimo mapaanggid sa isa ka kurikulum sa eskwelahan nga ginbalay sang board of education. Bisan pa nga ang hubon indi mismo ang ginhalinan sang mga butang nga ginatudlo, ginahimo sini ang kurikulum, ginapat-od ang pamaagi sa pagtudlo, kag ginahatag ang kinahanglanon nga mga panuytoy. Kon ang bisan sin-o dayag nga nagadumili sa pagsunod sa mga ginapatuman sang eskwelahan, nagatuga sing mga kabudlayan sa kaupod nga mga estudyante, ukon nagadala sing kahuluy-an sa eskwelahan, mahimo sia pahalinon. Ang mga awtoridad sang eskwelahan may kinamatarong sa pagpanghikot para sa kaayuhan sang mga estudyante sa kabilugan.
18 Luwas nga mga estudyante, ang mga Saksi ni Jehova mga soldado ni Jesucristo, nga ginsugo sa “pagpakig-away sang maayong inaway sang pagtuo.” (1 Timoteo 6:12; 2 Timoteo 2:3) Natural, ang dalayon nga pagginawi nga indi nagakabagay sa isa ka Cristianong soldado wala ginakahamut-an sang Dios. Subong isa ka indibiduwal nga ginhatagan sing kahilwayan sa pagpili, ang isa ka Cristianong soldado mahimo makapamat-od suno sa luyag niya, apang dapat niya batunon ang mga resulta sang iya desisyon. Si Pablo nangatarungan: “Wala sing tawo nga nagaalagad subong soldado ang nagadalahig sang iya kaugalingon sa mga palatikangan sa kabuhi, agod matigayon niya ang kahamuot sang isa nga naglista sa iya subong soldado. Dugang pa, kon ang bisan sin-o nagapaindis-indis sa mga hampang, wala sia ginapurungan luwas lamang kon nagpaindis-indis sia suno sa pagsulundan.” (2 Timoteo 2:4, 5) Ang hamtong nga mga Cristiano, lakip na yadtong sa Nagadumala nga Hubon, nagaalagad sing bug-os sa ila Lider, si Jesucristo, nagasunod sa “mga pagsulundan” agod matigayon nila ang padya nga kabuhi nga walay katapusan.—Juan 17:3; Bugna 2:10.
19. Bangod nausisa ang mga katunayan tuhoy sa Cristianong dedikasyon, sa ano kita makapat-od?
19 Wala bala ginapaathag sang mga katunayan nga ang mga Saksi ni Jehova mga ulipon sang Dios, indi mga ulipon sang mga tawo? Subong dedikado nga mga Cristiano nga nagaagom sing kahilwayan nga sa sini ginhilway sila ni Cristo, ginatugutan nila ang espiritu sang Dios kag ang iya Pulong sa pagtuytoy sa ila kabuhi samtang nagaalagad sila sing nahiusa upod sa ila mga kauturan sa kongregasyon sang Dios. (Salmo 133:1) Dapat man panason sang mga pamatuod sini ang bisan anong pangduhaduha tuhoy sa ginhalinan sang ila kusog. Upod sa salmista, sila makaamba: “Si Jehova amo ang akon kusog kag akon taming. Ang akon tagipusuon nagsalig sa iya, kag nabuligan ako, busa nagakasadya sing daku ang akon tagipusuon, kag sa akon ambahanon dayawon ko sia.”—Salmo 28:7.
[Footnote]
a Ginbalhag sang 1993 sang Watchtower Bible and Tract Society of New York, Inc.
Paano Mo Sabton?
◻ Paano ginabuligan sang Watch Tower Society kag sang kaanggid nga legal nga mga ahensia ang mga Saksi ni Jehova?
◻ Paano makabenepisyo ang mga Cristiano gikan sa papel sang Nagadumala nga Hubon sa mga Saksi ni Jehova?
◻ Ngaa ginareport sang katawhan ni Jehova ang ila pagbantala nga hilikuton?
◻ Sa anong mga sirkunstansia nagakaigo ang pagdisfellowship sa isa ka dedikado nga Cristiano?
[Retrato sa pahina 19]
Gin-amligan sang nahaunang-siglo nga nagadumala nga hubon ang paghiusa sang doktrina
[Retrato sa pahina 23]
Sa bug-os nga kalibutan, ang mga Saksi ni Jehova nagaagom sing kahilwayan nga tungod sini ginhilway sila ni Cristo