Sa bilog nga kalibutan, lainlain ang opinyon sang mga tawo parte sa ilimnon. Ang iban nagainom-inom kon kaisa upod sa ila mga abyan. Ang iban wala gid nagainom. Ang iban naman sobra gid mag inom asta mahubog sila. Ano ang ginasiling sang Biblia parte sa ilimnon?

1. Sala bala ang pag-inom sang makahulubog nga ilimnon?

Ang Biblia wala nagsiling nga sala ang pag-inom. Kundi, isa ini sa madamo nga regalo nga ginhatag sang Dios sa aton. Ang Biblia nagasiling nga ang ‘alak makapasadya sa tagipusuon sang tawo.’ (Salmo 104:14, 15) Mabasa sa Biblia nga may pila ka matutom nga lalaki kag babayi nga nag-inom sang alak.—1 Timoteo 5:23.

2. Ano ang laygay sang Biblia sa mga nagainom?

Indi gusto ni Jehova ang sobra nga pag-inom kag pagpahubog. (Galacia 5:21) Ang iya Pulong nagsiling: “Indi ka mangin palainom sing alak.” (Hulubaton 23:20) Kon gusto naton mag-inom—bisan isa lang kita—indi kita dapat mag-inom sing sobra nga indi na kita makapamensar sing maayo, indi na naton makontrol ang aton ginahambal kag ginahimo, ukon mahalitan na ang aton lawas. Kon indi na naton makontrol ang aton pag-inom, dapat determinado kita nga untatan ini.

3. Paano naton mapakita nga ginarespeto naton ang desisyon sang iban parte sa pag-inom?

Ang kada isa makadesisyon kon mainom sia ukon indi. Indi naton paghukman ang iban kon haganhagan lang ang ila pag-inom, kag indi man naton pagpiliton ang iban kon indi sila mag-inom. (Roma 14:10) Wala kita nagainom kon magaresulta ini sing problema sa iban. (Basaha ang Roma 14:21.) Ginahunahuna naton ‘indi ang aton kaayuhan, kundi ang kaayuhan sang iban.’—Basaha ang 1 Corinto 10:23, 24.

USISAA PA GID

4. Ikaw ang makadesisyon kon mainom ka ukon indi

Ano ang pagtamod ni Jesus parte sa pag-inom? Binagbinaga ang una niya nga milagro. Basaha ang Juan 2:1-11, dayon binagbinaga ini nga mga pamangkot:

• Sa sini nga milagro, ano ang matun-an naton sa pagtamod ni Jesus sa ilimnon kag sa mga nagainom sini?

• Wala nagsiling si Jesus nga malain ang pag-inom, gani ano dapat ang pagtamod sang Cristiano sa isa nga nagainom?

Pero indi buot-silingon nga puede na makainom ang isa ka Cristiano, pagusto na lang sia. Basaha ang Hulubaton 22:3, dayon binagbinaga ang masunod nga mga sitwasyon kon mainom ka ukon indi:

• Madrayb ka ukon maopereyt sang makina.

• Nagabusong ka.

• Ginsilingan ka sang doktor nga indi mag-inom.

• Nabudlayan ka kontrolon ang imo pag-inom.

• Ginadilian sang kasuguan sa inyo lugar ang pag-inom.

• Ang upod mo indi mag-inom kay nabudlayan sia sa pagkontrol sini sang una.

Maserbe ka bala sang ilimnon sa kasal ukon sa iban nga pagtilipon? Para mabuligan ka sa pagdesisyon, tan-awa ang VIDEO.

VIDEO: Maserbe Bala Ako sang Ilimnon? (2:41)

Basaha ang Roma 13:13 kag 1 Corinto 10:31, 32. Sa tapos mabasa ang kada bersikulo, binagbinaga ini nga pamangkot:

• Paano ini nga prinsipio makabulig sa imo sa pagdesisyon nga makapalipay kay Jehova?

5. Ikaw ang makadesisyon kon daw ano kadamo ang imo imnon

Kon mainom ka, tandai ini: Wala nagsiling si Jehova nga malain ang pag-inom, pero indi niya gusto ang sobra nga pag-inom. Ngaa? Basaha ang Oseas 4:11, 18, dayon binagbinaga ini nga pamangkot:

• Ano ang matabo kon sobra ang pag-inom sang isa?

Paano naton malikawan ang sobra nga pag-inom? Dapat kabalo kita sang aton masarangan, ukon limitasyon. Basaha ang Hulubaton 11:2, dayon binagbinaga ini nga pamangkot:

• Ngaa mas maayo nga limitahan mo ang kadamuon sang imo pag-inom?

6. Mauntatan mo ang sobra nga pag-inom

VIDEO: “Ginakapoy Na Ako sa Akon Kabuhi” (6:32)

• Sa video, ano ang epekto kay Dmitry kon makainom sia?

• Nauntatan niya bala dayon ang pag-inom?

• Ano ang nakabulig sa iya nga mauntatan ang sobra nga pag-inom?

Basaha ang 1 Corinto 6:10, 11, dayon binagbinaga ini nga mga pamangkot:

• Ano ang malain nga resulta kon palahubog ang isa?

• Ano ang nagapakita nga puede magbag-o ang isa nga palainom?

Basaha ang Mateo 5:30, dayon binagbinaga ini nga pamangkot:

• Ang buot silingon sang pag-utod sang kamot amo nga dapat may isakripisyo kita para mapalipay si Jehova. Ano ang himuon mo kon nabudlayan ka untatan ang sobra nga pag-inom?a

Basaha ang 1 Corinto 15:33, dayon binagbinaga ini nga pamangkot:

• Ano ang epekto sang imo mga abyan sa imo pag-inom?

SUMARYO

Naghatag si Jehova sing ilimnon para malipay kita, pero indi niya gusto ang sobra nga pag-inom kag pagpahubog.

Rebyu

• Ano ang pagtamod sang Biblia sa ilimnon?

• Ano ang malain nga resulta sang sobra nga pag-inom?

• Paano naton mapakita nga ginarespeto naton ang desisyon sang iban parte sa pag-inom?

DUGANG NGA IMPORMASYON

Paano makahimo sang husto nga desisyon ang mga pamatan-on parte sa pag-inom?

Pamensara ang Resulta Kon Mag-inom Ka (2:31)

Hibalua ang mga puede mo himuon para mauntatan ang sobra nga pag-inom.

“Ang Husto nga Pagtamod sa Ilimnon” (Ang Lalantawan, Enero 1, 2010)

Dapat bala mag-toast ang mga Cristiano?

“Mga Pamangkot Gikan sa mga Bumalasa” (Ang Lalantawan, Pebrero 15, 2007)

Sa eksperiensia nga “Daw Busluton Ako nga Dram,” basaha kon ano ang nagpabag-o sa isa ka palahubog.

“Ang Biblia Nagapabag-o sang Kabuhi” (Ang Lalantawan, Mayo 1, 2012)

Ang kada isa sa aton lainlain ang nanamian nga bayo. Kon sundon naton ang mga prinsipio sa Biblia, masuksok naton ang gusto naton nga bayo kag mapalipay si Jehova. Binagbinagon naton ang pila sa sini nga mga prinsipio.

1. Ano nga mga prinsipio ang dapat maggiya sa aton kon parte sa pamayo kag pamustura?

Dapat kita “magpamayo sing nagakaigo, nga may kaugdang kag maligdong nga hunahuna,” kag dapat pirme kita matinlo para makita sang iban ang aton ‘pagsimba sa Dios.’ (1 Timoteo 2:9, 10) Binagbinaga ining apat ka prinsipio: (1) Ang aton pamayo dapat “nagakaigo.” Pareho sa makita mo sa mga miting sang kongregasyon, lainlain ang ginasuksok sang katawhan ni Jehova, pero ang aton pamayo kag estilo sang buhok nagapakita sing respeto sa aton Dios nga ginasimba. (2) Magpamayo nga may “kaugdang.” Buot silingon, indi kita magpamayo nga makapukaw sa sekso, ukon makakuha sang sobra nga atension. (3) Ipakita ang “maligdong nga hunahuna.” Buot silingon, wala naton ginasunod ang uso nga pamayo kag pamustura. (4) Ang aton pamustura dapat pirme nagapakita nga ‘nagasimba kita sa Dios.’ Buot silingon, makita gid sang iban nga matuod nga Dios ang aton ginasimba.—1 Corinto 10:31.

2. Paano ang aton pamustura may epekto sa pareho naton nga mga Cristiano?

Matuod, may kahilwayan kita sa pagpili kon ano ang aton suksukon, pero dapat naton pamensaron kon ano ang epekto sini sa iban. Indi naton gusto nga magluya ang pagtuo sang iban, kundi, ‘himuon ang maayo sa aton isigkatawo, agod pabakuron sila.’—Basaha ang Roma 15:1, 2.

3. Paano ang aton pamayo makaganyat sa iban sa matuod nga pagsimba?

Ginatinguhaan naton nga magpamayo sing nagakaigo sa tanan nga tion, ilabi na kon nagatambong kita sa mga miting sang kongregasyon kag nagabantala. Indi naton gusto nga indi pagpamatian sang mga tawo ang aton mensahe bangod sang aton pamayo. Kundi, maganyat sini ang iban sa kamatuoran kag ‘mapatahom ang panudlo sang aton Manluluwas.’—Tito 2:10.

USISAA PA GID

4. Ang maayo nga pamustura nagapakita sang pagrespeto kay Jehova

Ngaa importante gid kon ano ang aton pamustura? Basaha ang Salmo 47:2, dayon binagbinaga ini nga mga pamangkot:

• Bangod ginasimba naton si Jehova, paano kita dapat mamayo?

• Sa banta mo, importante bala kon ano ang aton pamustura kon nagatambong kita sa mga miting kag nagabantala? Ngaa?

5. Kon ano ang makabulig sa aton sa pagpili sang suksukon

Tan-awa ang VIDEO.

VIDEO: “Himua ang Tanan Para sa Himaya sang Dios” (10:18)

Mahal man ukon barato ang aton mga bayo, dapat matinlo ini kag nagakaigo sa kada sitwasyon. Basaha ang 1 Corinto 10:24 kag 1 Timoteo 2:9, 10. Dayon, binagbinaga kon ngaa indi kita dapat magsuksok sang mga bayo nga . . .

• baraghal ukon sobra ka kaswal.

• sobra ka pikit, wawa, lip-ot, ukon silangon nga makapukaw sa sekso.

Bisan wala na ginapatuman sa mga Cristiano ang Mosaikong Kasuguan, may matun-an sila sa sini parte sa panghunahuna ni Jehova. Basaha ang Deuteronomio 22:5, dayon binagbinaga ini nga pamangkot:

• Ngaa dapat naton likawan ang pamayo kag pamustura nga ang lalaki daw babayi tan-awon ukon ang babayi daw lalaki?

Basaha ang 1 Corinto 10:32, 33 kag 1 Juan 2:15, 16, dayon binagbinaga ini nga mga pamangkot:

• Ngaa indi kita dapat magsuksok sang mga bayo nga makahatag sing malain nga impresyon sa aton kaingod ukon makapaluya sa pagtuo sang aton kauturan?

• Ano nga klase sang pamayo kag pamustura ang uso sa inyo lugar?

• Sa banta mo, ang pila bala sa sini nga klase sang pamayo indi nagakaigo sa isa ka Cristiano? Ngaa?

SUMARYO

Kon nagakaigo ang aton pamayo kag pamustura, mapakita naton ang aton respeto kay Jehova kag sa iban.

Rebyu

• Ngaa ang aton pamayo kag pamustura importante kay Jehova?

• Ano ang pila ka prinsipio nga dapat maggiya sa aton parte sa aton pamayo kag pamustura?

• Paano ang aton pamayo makaganyat sa iban sa matuod nga pagsimba?

DUGANG NGA IMPORMASYON

Basaha kon ano ang mahimo nga epekto sang imo pamayo sa iban.

“Nagakaigo Bala ang Akon Pamayo?” (Artikulo sa website)

Hibalua kon ngaa dapat mo anay pamensaron sing maayo antes ka magpa-tattoo.

“Ano ang Ginasiling sang Biblia Parte sa Tattoo?” (Artikulo sa website)

Hibalua ang iban pa nga prinsipio nga makabulig sa aton sa pagdesisyon parte sa pamayo.

“Ang Imo Bala Pamayo Nagahimaya sa Dios?” (Ang Lalantawan, Septiembre 2016)

Paano ginbaton sang isa ka babayi ang pagtamod sang iban parte sa pamayo para mapalipay niya ang Dios?

“Dress and Grooming Was My Stumbling Block” (Awake!, Disiembre 22, 2003)