Ang Dalanon sang Gugma Wala Nagakapaslawan

“Padayon nga pangitaa sing makugihon ang mas dalagku nga mga dulot. Apang ipakita ko sa inyo ang nagapangibabaw nga dalanon.”—1 CORINTO 12:31.

1-3. (a) Paano ang pagtuon nga magpakita sing gugma kaangay sang pagtuon sing bag-ong ­lenguahe? (b) Ano ang mga rason nga nagahimo sang pagtuon sa pagpakita sing gugma nga isa ka hangkat?

NATILAWAN mo na bala nga magtuon sing bag-ong lenguahe? Mabudlay gid ini! Matuod, ang isa ka bata mahimo makatuon sing lenguahe paagi lamang sa pirme nga pagpamati sa sini. Matanom sa iya utok ang mga tunog kag mga kahulugan sang mga tinaga, amo nga sa indi lang madugay mapabutyag na sang bata ang iya kaugalingon sing sampaton, ayhan sing tadlong. Indi amo sini sa mga adulto. Pirme kita nagatan-aw sa dumuluong-sing-lenguahe nga diksionaryo, agod lamang mahangpan ang pila ka sadsaran nga mga dinalan sa dumuluong nga hambal. Apang, sa ulihi kag sa nagakaigo nga pagpamati kag pagtuon sini, magahunahuna na kita sa bag-o nga ­lenguahe kag ang paghambal sini nangin mas mahapos.

² Ang pagtuon agod mapakita ang gugma kaangay sang pagtuon sing bag-ong lenguahe. Matuod, ang pila ka bahin sining diosnon nga kinaiya duna sa mga tawo. (Genesis 1:27; ipaanggid ang 1 Juan 4:8.) Apang, ang pagtuon agod mapakita ang gugma nagakinahanglan sing dugang nga panikasog—ilabi na karon, nga diutay lamang ang kinaugali nga pagpalangga. (2 Timoteo 3:1-5) Amo sini kon kaisa ang kahimtangan sa pamilya mismo. Huo, madamo ang nagadaku sa dimaayo nga palibot diin talagsa lang ginabungat ang mahigugmaon nga mga pulong—kon ginabungat gid man. (Efeso 4:29-31; 6:4) Paano, nian, kita makatuon sa pagpakita sing gugma—bisan pa nga talagsa lang naton ini naeksperiensiahan?

³ Makabulig ang Biblia. Sa 1 Corinto 13:4-8, si Pablo nagahatag, indi sing walay balatyagon nga pagsaysay sang kon ano ang gugma, kundi sing maathag nga paglaragway sa kon paano nagapanghikot ining pinakamataas nga porma sang gugma. Ang pagbinagbinag sa sining mga bersikulo magabulig sa aton nga mahangpan ang kahulugan sining diosnon nga kinaiya kag magasangkap sa aton sing labi pa agod mapakita ini. Binagbinagon naton ang pila ka bahin sang gugma suno sa ginlaragway ni Pablo. Bahinon naton ini suno sa tatlo ka kategoriya: ang aton paggawi sa kabilugan; nian, sing mas espesipiko, ang aton kaangtanan sa iban; kag, sa ulihi, ang aton pagbatas.

Ang Gugma Nagabulig sa Aton nga Malandas ang Bugal

4. Ano nga paghangop tuhoy sa kahisa ang ginahatag sang Biblia?

⁴ Pagkatapos sang iya una nga mga komento tuhoy sa gugma, si Pablo nagsulat sa mga taga-Corinto: “Ang gugma wala nagakahisa.” (1 Corinto 13:4) Ang kahisa mapadayag sa mahikawon nga paghandum sa kabuganaan ukon mga hinimuan sang iban. Ini nga kahisa makahalalit—sa pisikal, sa emosyon, kag sa espirituwal.—Hulubaton 14:30; Roma 13:13; Santiago 3:14-16.

5. Paano ang gugma makabulig sa aton nga malandas ang kahisa kon daw naligaran kita para sa pila ka teokratiko nga pribilehiyo?

⁵ Bangod sini, pamangkuta ang imo kaugalingon, ‘Nahisa bala ako kon daw ginaligaran ako para sa pila ka teokratikong pribilehiyo?’ Kon ang sabat huo, indi magkasubo. Ang manunulat sang Biblia nga si Santiago nagapahanumdom sa aton nga ang ‘huyog sa pagkahisa’ yara sa tanan nga dihimpit nga mga tawo. (Santiago 4:5) Ang gugma sa imo utod makabulig sa imo agod mapasag-uli ang imo timbang nga panimuot. Makabulig ini sa imo nga magkasadya upod sa mga nagakasadya kag wala ginatamod subong isa ka insulto kon ang iban makabaton sing pagpakamaayo ukon sing komplimento.​—Ipaanggid ang 1 Samuel 18:7-9.

6. Anong mabudlay nga kahimtangan ang natabo sa unang-siglo nga kongregasyon sa Corinto?

⁶ Si Pablo nagadugang nga ang gugma ‘wala nagapabugal, wala nagapahambog.’ (1 Corinto 13:4) Kon kita may kinaadman ukon abilidad, indi kinahanglan nga ipabugal ini. Sing maathag, problema ini anay sa pila ka ambisyuso nga mga tawo nga nakasulod sa kongregasyon sang dumaan nga Corinto. Ayhan may labaw nga mga ikasarang sila sa pagpaathag sang mga ideya ukon mas maayo sa paghimo sing mga butang. Ang pagpatalupangod nila sa ila kaugalingon mahimo nga nakaamot sa pagbinahinbahin sang kongregasyon. (1 Corinto 3:3,4; 2 Corinto 12:20) Nangin malubha ang kahimtangan sa bagay nga ginsabdong sang ulihi ni Pablo ang mga taga-Corinto bangod sang ‘pagbatas sa dimakatarunganon nga mga tawo,’ nga mamulayon nga ginlaragway ni Pablo, subong “lutaw nga mga apostoles.”​—2 Corinto 11:5,19, 20.

7, 8. Ipakita gikan sa Biblia kon paano naton magamit ang bisan anong duna nga mga kinaadman naton sa pagpasanyog sing paghiusa.

⁷ Ang kaanggid nga kahimtangan mahimo man mahanabo karon. Halimbawa, ang iban mahimo nga may huyog sa pagpabugal sang ila mga hinimuan sa ministeryo ukon sang ila mga pribilehiyo sa organisasyon sang Dios. Bisan pa may partikular kita nga ikasarang ukon abilidad nga wala sa iban sa kongregasyon, nagahatag bala ina sa aton sing rason nga magpabugal? Ti, dapat naton gamiton ang bisan anong duna nga mga kinaadman naton sa pagpasanyog sa paghiusa—indi sa aton kaugalingon.—Mateo 23:12; 1 Pedro 5:6.

⁸ Si Pablo nagsulat nga bisan ang kongregasyon may madamo nga katapo, “gintingob sang Dios ang lawas.” (1 Corinto 12:19-26) Ang Griegong tinaga nga ginbadbad sing “gintingob” nagakahulugan sing nagahisantuanay nga pagsamo, subong sang pagmiksla sa mga duag. Gani wala sing indibiduwal sa isa ka kongregasyon ang magpabugal sang iya mga ikasarang kag magtinguha nga dominahan ang iban. Ang bugal kag ambisyon wala sing duog sa organisasyon sang Dios.—Hulubaton 16:19; 1 Corinto 14:12; 1 Pedro 5:2, 3.

9. Anong nagapaandam nga mga halimbawa ang ginahatag sang Biblia tuhoy sa mga indibiduwal nga nagpangita sang ila lamang kaugalingon nga kaayuhan?

⁹ Ang gugma “wala nagapangita sang iya kaugalingon nga mga kaayuhan.” (1 Corinto 13:5) Ang mahigugmaon nga tawo wala nagaimpluwensia sa iban agod matigayon ang iya luyag. Ang Biblia nagahatag sing nagapaandam nga halimbawa tuhoy sini. Sa pag-ilustrar: Aton mabasa ang tuhoy kanday Delila, Jesebel, kag Atalia—mga babayi nga nag-impluwensia sa iban para sa ila makagod nga mga handum. (Hukom 16:16; 1 Hari 21:25; 2 Cronica 22:10-12) Yara man si Absalom nga anak ni Hari David. Ginsugilanon niya ang mga nagakari sa Jerusalem para hukman kag malimbungon nga nagpalahidlahid nga ang korte sang hari indi gid interesado sa ila mga problema. Nian nagsiling sia nga ang kinahanglan gid sang korte amo ang isa ka mahinuklugon nga tawo kaangay niya! (2 Samuel 15:2-4) Sa pagkamatuod, si Absalom interesado, indi sa mga ginapigos, kundi sa iya kaugalingon lamang. Nagharihari, ginpatalang niya ang tagipusuon sang madamo. Apang sang ulihi, si Absalom nakaagom sing bug-os nga kapierdihan. Sang napatay sia, indi gani sia takus sa isa ka desente nga paglubong.—2 Samuel 18:6-17.

10. Paano naton mapasundayag nga pirme naton ginabinagbinag ang kaayuhan sang iban?

¹⁰ Isa ini ka paandam sa mga Cristiano karon. Lalaki man ukon babayi, ayhan sa kinaugali may yara kita mga ikasarang sa pagbuyok. Ayhan mahapos naton makuha ang luyag naton, kon hambalon pa, paagi sa pagkontrol sa isa ka paghambalanay ukon sa paglupig sa mga may tuhay sing opinyon. Apang, kon kita tunay nga mahigugmaon, pirme naton binagbinagon ang mga kaayuhan sang iban. (Filipos 2:2-4) Indi naton paghingalitan ang iban ukon pagpasanyugon ang ayhan sayop nga mga ideya bangod sang aton eksperiensia ukon sang aton posisyon sa organisasyon sang Dios, subong nga ang aton mga opinyon daw amo lamang ang takus nga binagbinagon. Sa baylo, dumdumon naton ang hulubaton sang Biblia: “Ang bugal nagauna sa kalaglagan, kag ang palabilabihon nga espiritu nagauna sa pagkasandad.”—Hulubaton 16:18.

Ang Gugma Nagapaluntad Sing Mahidaiton nga mga Kaangtanan

11. (a) Sa anong mga paagi mapakita naton ang gugma nga malulo kag nagakaigo? (b) Paano naton mapakita nga wala kita nagakasadya sa pagkadimatarong?

¹¹ Si Pablo nagsulat man nga ang gugma “malulo” kag ini “wala nagagawi sing dinagakaigo.” (1 Corinto 13:4, 5) Huo, ang gugma wala nagatugot sa aton sa pagpanghikot sa masingki, malaw-ay, ukon dimatinahuron nga paagi. Sa baylo, may patugsiling kita sa mga balatyagon sang iban. Halimbawa, ang isa ka mahigugmaon nga tawo magalikaw sa paghimo sing mga butang nga makatublag sa konsiensia sang iban. (Ipaanggid ang 1 Corinto 8:13.) Ang gugma “wala nagakalipay sa dimatarong, kundi nagakalipay sa kamatuoran.” (1 Corinto 13:6) Kon ginahigugma naton ang kasuguan ni Jehova, indi naton pagpakadiutayon ang imoralidad ukon malingaw sa mga butang nga ginadumtan sang Dios. (Salmo 119:97) Ang gugma magabulig sa aton nga magkalipay sa mga butang nga nagapabakod sa baylo nga nagapaluya.—Roma 15:2; 1 Corinto 10:23, 24; 14:26.

12, 13. (a) Ano ang dapat nga reaksion naton kon may nagasaklaw sa aton? (b) Ihatag ang mga halimbawa sa Biblia sa pagpakita nga bisan ang makatarunganon nga kaakig makatiklod sa aton sa pagpanghikot sing dimaalamon.

¹² Si Pablo nagasulat nga ang gugma “wala nagakaakig” (“indi masinaklawon,” Phillips). (1 Corinto 13:5) Ibutang ta, normal lamang para sa aton nga dihimpit nga mga tawo nga maakig ukon magsingkal kon ginapaakig kita sang iban. Apang, ang paghupot sing malawig nga kaakig ukon ang pagpadayon nga akig malain. (Salmo 4:4; Efeso 4:26) Kon indi pagpunggan, bisan ang makatarunganon nga kaakig mahimo magatiklod sa aton sa pagpanghikot sing dimaalamon, kag si Jehova magapapanabat sa aton tungod sini.—Genesis 34:1-31; 49:5-7; Numeros 12:3; 20:10-12; Salmo 106:32,33.

¹³ Gintugutan sang iban nga maapektuhan sang pagkadihimpit sang iban ang ila desisyon nga magtambong sa Cristianong mga miting ukon magpakigbahin sa ministeryo sa latagon. Sang nagligad, madamo sa ila ang nakig-away sing lakas para sa pagtuo, ayhan nagbatas sing pagpamatok sang pamilya, sing pagyaguta sang mga kaupdanan sa trabaho, kag iban pa. Ginbatas nila ini nga mga balagbag bangod gintamod nila ini subong mga pagtilaw sang integridad, kag ini makatarunganon. Apang ano ang nagakatabo kon ang isa ka masigka-Cristiano nakahambal ukon nakahimo sing butang nga dimahigugmaon? Indi bala isa man ini ka pagtilaw sang integridad? Matuod gid, kay kon magpabilin kita nga akig, ‘ginahatagan [naton] sing duog ang Yawa.’—Efeso 4:27.

14, 15. (a) Ano ang buot silingon sang “pag-isip sing halit”? (b) Paano naton mailog si Jehova sa pagpatawad?

¹⁴ May maayo gid nga rason nga ginadugang ni Pablo nga ang gugma “wala nagaisip sing halit.” (1 Corinto 13:5) Ginagamit niya diri ang isa ka termino sa accounting, ayhan sa pagpahangop sang buhat nga paglista sang sala sa ledger agod indi ini malipatan. Mahigugmaon bala nga itanom sa hunahuna ang masakit nga hambal ukon buhat, subong nga daw kinahanglan naton ini ungkaton sa ulihi? Malipayon gid kita nga si Jehova wala nagausisa sa aton sa subong sining wala kaluoy nga paagi! (Salmo 130:3) Huo, kon kita mahinulsulon, ginapanas niya ang aton mga sala.—Binuhatan 3:19.

¹⁵ Mailog naton si Jehova may kaangtanan sini. Indi kita dapat magsobra ka sensitibo kon daw nasaklaw kita sang iban. Kon nagalain dayon ang aton buot, ayhan labi pa nga ginasaklaw naton ang aton kaugalingon sangsa masarangan nga himuon sang isa nga nakasaklaw sa aton. (Manugwali 7:9, 22) Sa baylo, dapat naton dumdumon nga ang gugma “nagapati sa tanan nga butang.” (1 Corinto 13:7) Sa pagkamatuod, wala sing isa sa aton ang luyag nga madali maintuan, apang indi man naton dapat duhaduhaan sing dinagakaigo ang mga motibo sang aton mga kauturan. Kon posible, haumhaumon naton nga wala sing malain nga tinutuyo ang isa ka tawo.—Colosas 3:13.

Ang Gugma Nagabulig sa Aton sa Pagbatas

16. Sa anong mga sirkunstansia kita mabuligan sang gugma nga magmabinatason?

¹⁶ Si Pablo nian nagasugid sa aton nga “ang gugma mabinatason.” (1 Corinto 13:4) Nagabulig ini sa aton nga mabatas ang mabudlay nga mga kahimtangan, ayhan sa malawiglawig nga tion. Halimbawa, madamo nga Cristiano ang tinuig na nga nagkabuhi sa nabahinbahin sa relihion nga panimalay. Ang iban wala magminyo, indi bangod gusto nila, kundi bangod wala sila makakita sing isa ka nagakaigo nga tiayon “sa Ginuo.” (1 Corinto 7:39; 2 Corinto 6:14) Nian yara ang mga nagapakig-away sa makapaluya nga mga problema sa kapagros. (Galacia 4:​13, 14; Filipos 2:25-30) Sa pagkamatuod, sa sining dihimpit nga sistema, wala sing isa ang may kahimtangan sa kabuhi nga wala nagakinahanglan sing pila ka sahi sang pagbatas.—Mateo 10:22; Santiago 1:12.

17. Ano ang magabulig sa aton nga mabatas ang tanan nga butang?

¹⁷ Si Pablo nagapasalig sa aton nga ang gugma “nagaantos sang tanan nga butang, . . . nagalaum sang tanan nga butang, nagabatas sang tanan nga butang.” (1 Corinto 13:7) Ang gugma kay Jehova nagabulig sa aton nga antuson ang bisan ano man nga kahimtangan tungod sa pagkamatarong. (Mateo 16:24; 1 Corinto 10:13) Indi naton luyag mangin martir. Sa kabaliskaran, ang aton tulumuron amo ang magkabuhi sing mahidaiton, sing malinong. (Roma 12:18; 1 Tesalonica 4:11, 12) Walay sapayan sina, kon ang mga pagtilaw sang pagtuo mag-utwas, malipayon naton nga ginabatas ini subong bahin sang bili sang Cristianong pagkadisipulo. (Lucas 14:​28-33) Samtang nagabatas kita, ginatinguhaan naton nga huptan ang positibo nga panimuot, nagalaum sing labing maayo nga resulta walay sapayan sang mabudlay nga mga kahimtangan.

18. Paano ang pagbatas ginakinahanglan bisan sa maayo nga tion?

¹⁸ Ang kapipit-an indi lamang sirkunstansia nga nagakinahanglan sing pagbatas. Kon kaisa, ang pagbatas nagakahulugan lamang sing pagpabilin, sing pagpadayon sa natalana nga banas may mabudlay man nga mga kahimtangan ukon wala. Ang pagbatas nagalakip sang paghupot sing maayo nga espirituwal nga rutina. Halimbawa, ikaw bala may makahulugan nga bahin sa ministeryo, nahisanto sa imo sirkunstansia? Ikaw bala nagabasa kag nagapamalandong sa Pulong sang Dios kag nagapakigsugilanon sa imo langitnon nga Amay paagi sa pangamuyo? Ikaw bala tayuyon nga nagatambong sa mga miting sang kongregasyon, kag nabuligan ka bala bangod sang pagbayluhanay sing pagpalig-on upod sa imo mga masigkatumuluo? Kon amo, maayo man karon ukon malain ang panahon, nagabatas ikaw. Indi mag-untat, “kay sa nagakaigo nga dag-on magaani kita kon indi kita pagpunawon.”​—Galacia 6:9.

Gugma—“Nagapangibabaw nga Dalanon”

19. Paano ang gugma “nagapangibabaw nga dalanon”?

¹⁹ Ginpadaku ni Pablo ang importansia sang pagpakita sing gugma paagi sa pagtawag sa sining diosnon nga kinaiya nga “nagapangibabaw nga dalanon.” (1 Corinto 12:31) “Nagapangibabaw” sa anong kahulugan? Ti, bag-o lang gin-isaisa ni Pablo ang mga dulot sang espiritu, nga kinaandan sa tunga sang unang-siglo nga mga Cristiano. Ang iban nakapanagna, ang iban may ikasarang sa pag-ayo sing mga balatian, ang madamo ginhatagan sing abilidad sa pagpamulong sing mga hambal. Makatilingala gid nga mga dulot! Apang, si Pablo nagsiling sa mga taga-Corinto: “Kon magapamulong ako sang mga hambal sang mga tawo kag sang mga anghel, apang wala sing gugma, subong ako sang saway nga nagatunog ukon sang apiping nga nagatagsing. Kag kon may dulot ako sa pagpanagna kag makahibalo sang tanan nga sagrado nga mga tinago kag sang tanan nga ihibalo, kag kon may bug-os ako nga pagtuo nga makapahalin sang mga bukid, apang wala sing gugma, wala ako sing kapuslanan.” (1 Corinto 13:1,2) Huo, bisan ang mga buhat nga kuntani may kabilihanan nangin “patay nga mga buhat” kon ang motibo para sa sini indi ang gugma sa Dios kag sa isigkatawo.—Hebreo 6:1.

20. Ngaa ang dalayon nga panikasog ginakinahanglan agod mapalambo naton ang gugma?

²⁰ Si Jesus nagahatag sing isa pa ka rason kon ngaa dapat naton palambuon ang diosnon nga kinaiya nga gugma. “Sa sini ang tanan makahibalo nga kamo mga disipulo ko,” siling niya, “kon maghigugmaanay kamo.” (Juan 13:35) Sa tinaga nga “kon,” nagadepende na sa kada Cristiano kon bala magatuon sia sa pagpakita sing gugma. Ti, ang pag-istar sa isa ka pungsod sa luwas wala mismo nagapilit sa aton nga tun-an ang lenguahe sini. Ni ang pagtambong lamang sa mga miting sa Kingdom Hall ukon ang pagpakig-upod sa mga masigka-Cristiano awtomatiko nga nagatudlo sa aton nga ipakita ang gugma. Ang pagtuon sa sining “lenguahe” nagakinahanglan sing dalayon nga panikasog.

21, 22. (a) Ano dapat ang reaksion naton kon indi naton masunod ang pila ka bahin sang gugma nga ginhinun-anunan ni Pablo? (b) Sa anong paagi masiling nga ang “gugma wala nagakapaslawan”?

²¹ Kon kaisa, indi mo masunod ang pila ka bahin sang gugma nga ginhinun-anunan ni Pablo. Apang indi maluyahan sing buot. Ukuri ini sing mapailubon. Padayon nga tan-awa ang Biblia kag iaplikar ang mga prinsipio sini sa inyo mga pagpakig-angot sa iban. Indi gid pagkalimti ang halimbawa nga ginpahamtang mismo ni Jehova para sa aton. Si Pablo naglaygay sa mga taga-Efeso: “Mangin malulo sa isa kag isa, mainawaon sing malum-ok, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.”—Efeso 4:32.

²² Bisan nga ang pagtuon nga ipabutyag ang imo kaugalingon sa bag-ong lenguahe magahapos sa ulihi, sa ulihi ayhan mahapusan na ikaw nga ipakita ang gugma. Si Pablo nagapasalig sa aton nga “ang gugma wala nagakapaslawan.” (1 Corinto 13:8) Indi kaangay sang milagruso nga mga dulot sang espiritu, ang gugma indi gid magauntat sa pagluntad. Gani padayon nga tun-i ang pagpakita sa sining diosnon nga kinaiya. Ini, subong sang ginsiling ni Pablo, “ang nagapangibabaw nga dalanon.”

Mapaathag Mo Bala?

◻ Paano kita mabuligan sang gugma sa paglandas sa bugal?

◻ Sa anong mga paagi ang gugma makabulig sa aton nga mapasanyog ang paghidait sa kongregasyon?

◻ Paano ang gugma makabulig sa aton nga magbatas?

◻ Paano ang gugma “nagapangibabaw nga dalanon”?

[Laragway sa pahina 19]

Ang gugma magabulig sa aton nga indi pagsapakon ang mga kasaypanan sang aton mga masigkatumuluo

[Mga laragway sa pahina 23]

Ang pagbatas nagakahulugan sing paghupot sang aton teokratikong rutina