Kapitulo 22
Ang Dios sang “Prinsipe sang Paghidait” Mangin “Tanan sa Tanan”
WALA MADUGAY sa tapos sang iya pagkabanhaw, ang “Prinsipe sang Paghidait” nagsiling sa isa sang iya mga disipulo: “Makayab ako sa akon Amay kag inyo Amay kag sa akon Dios kag inyo Dios.” (Juan 20:17) Paagi sa sina nga mga pulong ginkilala niya nga ang iya langitnon nga Amay amo man ang Dios niya, ang Isa lamang nga iya ginsimba. Sa sina nga pagsimba nagpahamtang sia sing huwaran para sa tanan nga iban pa nga tinuga sa bug-os nga langit kag sa duta.
2 Daw mangin ano ka daku nga huwaran ang “Prinsipe sang Paghidait” sa tanan nga nahimpit nga katawhan kon sia matutom nga magapasakop sang iya kaugalingon sa isa ka pinasahi nga paagi sa Isa nga amo ang ekselente nga Soberano sa bug-os nga uniberso! Ipahayag ini sing walay tupong sa katapusan sang iya Isa ka Libo ka Tuig nga Paggahom sa ibabaw sang katawhan, kon napasag-uli na niya sa bug-os nga duta ang paghidait, kalig-onan, kag harmoniya. Sa isa ka wala nagasayop nga tagna, ginapasalig kita sini:
3 “Nian, ang katapusan, kon matugyan niya ang ginharian sa iya Dios kag Amay, kon malaglag na niya ang tanan nga pangulohan kag ang tanan nga awtoridad kag gahom. Kay kinahanglan sia maghari tubtob nga mabutang sang Dios ang iya tanan nga kaaway sa idalom sang iya mga tiil. Ang katapusan nga kaaway nga laglagon amo ang kamatayon. Apang kon ang tanan nga butang mapasakop na sa iya, nian ang Anak man magapasakop sa iya nga nagpasakop sang tanan nga butang sa iya, agod nga ang Dios mangin tanan sa tanan.” (1 Corinto 15:24-26, 28) Ukon suno sa pagbadbad sang The Amplified Bible sa ulihi nga bahin sang bersikulo 28: “Agod nga ang Dios mangin tanan sa tanan—kon sayoron, tanan nga butang sa tanan, ang supremo, ang nagapuyo kag nagakontrol nga butang sang kabuhi.”
4 Kon itugyan na sang “Prinsipe sang Paghidait” ang Ginharian sa iya Dios sa katapusan sang Isa ka Libo ka Tuig nga Paggahom, ang mga pumuluyo sang duta pahibaluon sini nga buhat sang ila nag-adoptar nga Amay. Kaupod sia subong ila Harianon nga Huwaran, sila man magapasakop sa isa ka bag-o nga bahin sa Labing Mataas nga Dios. Karon sa nahauna nga tion sila mahigugmaon nga magapasakop sing direkta kay Jehova, huo, magasimba, upod ang bug-os nga pagkasinsero kag kamatuoran, nga wala na nagakinahanglan sang mga serbisyo ni Jesus subong saserdote, bisan kon nagapangamuyo.
5 Sa sining paagi ang Labing Mataas nga Dios mangin Hari sa liwat sa bug-os nga uniberso nga wala sing harianon nga tiglawas sa langit ukon sa duta. Nagakahulugan ini nga ang 144,000 ka kaupod nga mga hari nga gingawad ni Jesucristo gikan sa duta magaluhod man sa atubangan sang supremo nga Harianon nga Manuggahom kag sa sining dugang pa nga kahulugan magakilala sa iya subong ang Unibersal nga Soberano.
Katapusan nga Pagtilaw sa Tanan nga Katawhan
6 Ginakilala si Jehova subong ang Supremo nga Hukom, handum ni Jesucristo nga ang kinahanglanon nga kahamuot sang Dios ipabutyag sa hilikuton nga nahimo ni Jesus sa sulod sang iya Milenyo nga Paggahom. Sa tion sinang paggahom, ang mga tawo nga magdumili sa pagsunod sa mga kinahanglanon sang pagkamatarong kag magpakita sing paglalis sa Hari laglagon. Sa amo, ang mga tawo nga itugyan ni Jesucristo kay Jehova nga Dios, ang katapusan nga Hukom, mangin amo ang mga matinumanon nga nakatigayon sing tawhanon nga pagkahimpit.
7 Sa sina nga punto tion na nga tilawan ang nagapadayon nga debosyon sang tawo sa Unibersal nga Soberano, si Jehova nga Dios. Subong sa bahin ni Job, ang pamangkot amo: Ginahigugma bala nila kag ginasimba ang Dios bangod lamang sa tanan nga maayong mga butang nga iya nahimo para sa ila, ukon ginahigugma bala nila sia bangod sang kon ano sia sa iya kaugalingon—ang Matarong nga Soberano sang uniberso? (Job 1:8-11) Apang paano tilawan ang tinagipusuon nga katutom sang nahimpit nga katawhan? Ang Biblia nagasabat: Si Satanas nga Yawa kag ang iya mga demonyo pagahubaran “sa malip-ot nga tion” gikan sa kadadalman nga ginbilangguan sa ila sa isa ka libo ka tuig. (Bugna 20:3) Paagi sa pagtugot sa Yawa nga tilawan ang napasag-uli nga katawhan, ang mga katapo sang nahimpit nga katawhan mapamatud-an tuhoy sa ila indibiduwal nga integridad sa Dios sa himpit nga kahulugan.—Ipaanggid ang Job 1:12.
8 Pito ka libo ka tuig sang una, nahaylo ni Satanas nga Yawa ang himpit nga si Adan kag si Eva sa pagpakasala paagi sa paghimo sing maiyaiyahon nga dalanon. Wala ginasiling sang Kasulatan kon ano nga mga metodo sang pagsulay ang itugot ni Jehova nga gamiton ni Satanas kag sang mga demonyo sa tapos sila mapaguwa gikan sa kadadalman. Apang wala sing duhaduha nga ganyaton ang kakagod kag ang handum nga mangin independiente sa Dios. Subong isa gihapon ka rebelde batok sa pagkasoberano ni Jehova, desidido ang Yawa sa paghimo man sing mga rebelde sa katawhan. Wala man ginasiling kon daw ano gid kasangkad ang mangin kadalag-an sining ginpaguwa nga mga demonyo, apang may bastante nga kadamuon sang mga tawo ang magarebelde sa paghimo sing impresyon nga isa ini ka daku nga kadam-an. Ang sala sa bahin sang bisan sin-o nga tawo, nga karon nahimpit na, pagahimuon sing intelihente kag, busa, mangin hungod, kinabubut-on. Magakahulugan ini sing pagpalayo gikan sa pagsimba sa lamang matuod kag buhi nga Dios kag pagkadto sa bahin ni Satanas nga Yawa. (Bugna 20:7, 8) Sa amo, sa bahin sining mga rebelyuso, si Jehova indi mangin “tanan sa tanan.”
9 Apang, ang mga matutom magadumili sa pagpadaug sa mga argumento kag mga pag-ipit sang napatalang nga mga nasyonalistiko. Sa walay pagpangalag-ag, pilion sang mga matutom nga si Jehova mangin “tanan sa tanan” sa ila bahin. Para sa katarungan, ang pagkasoberano ni Jehova dapat ipatuman sing estrikto. Busa, ang tanan nga rebelde nga naimpluwensiahan ni Satanas pagalaglagon sing dayon. Makalilipay nga madula na sila! Dapat man dulaon ang tanan nga rebelde sa dimakita nga duog sang mga tinuga. Gani, agod matapos ang pagtinlo sa bug-os nga uniberso, si Satanas nga Yawa kag ang tanan niya nga demonyo pagalaglagon, kag indi na magaluntad. Sa amo ang mga langit kag ang duta matinluan gikan sa tanan nga sala. (Bugna 20:9, 10) Ang pagkabalaan ni Jehova magaluntad bisan diin. (Ipaanggid ang Zacarias 14:20.) Ang balaan nga ngalan sang Labing Mataas nga Dios pakabalaanon sa langit kag sa duta. Ang tanan nga nagapuyo sa langit kag sa duta malipayon nga magahimo sang iya supremo nga kabubut-on.
10 Tubtob sa walay katubtuban ang aton duta magadala sing kadungganan nga indi matigayon sang iban nga planeta sa bug-os nga kahawaan nga walay latid, bisan pa ang duta mahimo nga indi lamang ang planeta nga puy-an. Sing tumalagsahon, diri sini nga si Jehova indi masuay nga magabindikar sang iya unibersal nga pagkasoberano, nga nagatukod sing dayon kag unibersal nga legal nga sulundan. Mangin amo lamang ini ang planeta nga si Jehova sang mga kasoldadosan nagpakig-away sa “inaway sang dakung adlaw sang Dios nga Labing Gamhanan.” Mangin amo lamang ini ang planeta nga ginpadalhan sang Dios sang iya ginahigugma gid nga Anak agod mangin tawo kag mapatay agod gawaron ang mga pumuluyo sang planeta gikan sa sala kag kamatayon. Mangin amo lamang ini ang planeta nga ginkuhaan ni Jehova sing 144,000 sa mga pumuluyo sini agod mangin “mga manunubli sang Dios, apang kaupod nga mga manunubli ni Cristo.”—Roma 8:17.
Mga Serafin, mga Querubin, mga Anghel
11 Ang Dios, ang mahimayaon nga Tuburan sang tanan nga tinuga, langitnon kag dutan-on, mangin “tanan” indi lamang sa 144,000 ka manunubli upod kay Cristo kundi sa iban man sa langitnon nga duog. Sa kapitulo 6 sang tolon-an ni Isaias, ginahatagan kita sing laragway sang langitnon nga palasyo. Didto aton mabasa: “Nakita ko si Jehova nga nagalingkod sa isa ka trono nga mataas kag nabayaw, kag ang iya mga sidsid naghil-ob sang templo. Sa ibabaw niya nagtindog ang mga serafin. Ang tagsatagsa may anum ka pakpak. Sa duha gintabunan niya ang iya nawong, kag sa duha gintabunan niya ang iya mga tiil, kag sa duha naglupad sia. Kag ang isa nagsinggit sa isa kag nagsiling: ‘Balaan, balaan, balaan si Jehova sang mga kasoldadosan. Ang bug-os nga duta napuno sang iya himaya.’”—Isaias 6:1-3.
12 Nahamut-an gid si Isaias nga makita ang labing balaan nga Isa sa bug-os nga uniberso nga nagalingkod sa iya langitnon nga trono nga ginaalagaran sang mahimayaon nga mga serafin! Daw ano yadto ka makapulunaw nga palanan-awon, nga nagapakita sang nahamut-an gid nga palangakuan sang mga serafin, kay sia ang Labing Balaan nga Isa nga ang iya pagkabalaan ginadayaw nila samtang nagapamatuod sila sa iya pagkabalaan paagi sa pagpadaku sini sa tatlo ka paagi! Interesado ang mga serafin sa pagbulig sa mga sumilimba ni Jehova nga mangin balaan subong nga ang Dios balaan.—Isaias 6:5-7.
13 Subong nga nanuhaytuhay ang mga tinuga diri sa duta, nga nagapakita sang gahom ni Jehova nga Dios, may yara man iban nga sahi sang mga tinuga sa duog sang mga espiritu. Ginapakita sang Biblia nga amo ini ang mahimayaon nga mga querubin, nga madasig maglupad. (Salmo 18:10; ipaanggid ang Hebreo 9:4, 5.) Ang Genesis 3:24 nagapakita nga sa tapos si Adan kag si Eva nagpakasala batok sa balaan nga Dios sang langit paagi sa pagkaon sang gindumilian nga bunga, ang Manunuga nagbutang sa sidlangan sang dalan pabalik sa Paraiso sang kalipay sing mga querubin nga may “nagaidlab nga espada nga nagabalabad.” Si Jehova ginahambal nga ‘nagalingkod sa ibabaw sang mga querubin.’ (Salmo 99:1; Isaias 37:16) Sa amo ginapakita sia nga nagalingkod sa trono sa ibabaw sang mga querubin.
14 Ang indi dapat kalimtan sa tunga sang kadam-an sang mga espiritu amo ang mga anghel. Minilyonmilyon sila. (Daniel 7:9, 10) Sa tunga nila amo ang mga anghel nga gintangdo sa pag-alagad sa mga sumilimba ni Jehova sa duta. Si Jesus nagpaandam nga indi dapat pagsandaron ang bisan sin-o sa mga sumilimba ni Jehova kay ang “ila mga anghel sa langit nagatulok pirme sa nawong sang akon Amay nga yara sa langit.” (Mateo 18:10; Hebreo 1:14) Sa tapos sang 40 ka adlaw nga pagpuasa ni Jesus sa kahanayakan kag sa tapos sang iya madinalag-on nga pagpamatok sa tatlo ka importante nga pagsulay sa iya sang Yawa, daw ano nga pribilehiyo para sa mga anghel nga mag-alagad sa pisikal nga mga kinahanglanon sang maniwang kag gutom nga si Jesus!—Mateo 4:11.
15 Sa langitnon nga duog, ang mahimayaon nga mga espiritu mangin mag-ulutod sa isa kag isa, samtang diri sa duta ang nahimpit nga tawhanon nga pamilya mangin mag-ulutod nga mga lalaki kag mga babayi sa isa kag isa. Mangin sa dagway kag kaangay sila sang Dios sa dakung kasangkaron nga si Adan kag si Eva, sang bag-o lang gintuga sang mga kamot ni Jehova nga Dios, yara sa ‘dagway kag kaangay’ sang ila Manunuga. (Genesis 1:26, 27) Sa tapos makapasa sa katapusan nga pagtilaw, ang nahimpit nga mga tawo hatagan sing kinamatarong sa pagpuyo sing dayon kag mahigugmaon nga adoptaron subong “mga anak sang Dios,” nga nagakasadya sa mahimayaon nga kahilwayan, kag mangin bahin sang nahiusa nga pamilya ni Jehova sa langit kag sa duta.—Roma 8:21.
16 Upod ang daku nga kalipay kag kasadya sang iya bug-os nga persona tulukon ni Jehova nga Dios ang katumanan sang iya orihinal nga katuyuan—ang indi matupungan nga buhat sa pagpahisuno sang tanan nga butang sa iya determinasyon sa ginsuguran—ang tanan nga tinuga indi mabungkag nga may pagpakighiusa kag gugma sa iya!
17 Sa kapawa sining tanan, sin-o ang makalikaw sa pagpakamaayo sa sining dalayawon nga balaan nga Manugtuyo? Wala nagabayaw sang iya mga pulong sing dinagakaigo sa labaw sa tawo nga mga tinuga, ang salmista nagsiling: “Pakamaayuha si Jehova, O kamo nga mga anghel niya, nga mga gamhanan sa kusog, nga nagatuman sang iya pulong, paagi sa pagpamati sa tingog sang iya pulong. Pakamaayuha si Jehova, tanan kamo nga iya binuhatan, kamo nga mga manug-alagad niya, nga nagahimo sang iya kabubut-on.”—Salmo 103:20, 21.
18 Ang malipayon, inspirado nga salmista nagahinakop sang tolon-an sang Mga Salmo paagi sa sining mga pulong sang laygay: “Dayawa ninyo, si Jah! Dayawa ang Dios sa iya balaan nga duog. Dayawa sia sa kahawaan sang iya gahom. Dayawa sia tungod sang iya gamhanan nga mga buhat. Dayawa sia suno sa pagkabugana sang iya pagkadaku. Dayawa sia sa tunog sang budyong. Dayawa sia sa salterio kag arpa. Dayawa sia nga may pandereta kag sinaot. Dayawa sia sa mga tulunggon nga may kuerdas kag sa lantoy. Dayawa sia nga may mga apiping nga matagsing. Dayawa sia nga may mga apiping nga mataas sing tunog. Ang tagsa ka butang nga may ginhawa—magdayaw kay Jah. Dayawa ninyo si Jah!”—Salmo 150:1-6.
19 Ang bug-os nga uniberso mahiusa sa katapusan sa himpit nga wagkos nga magapadayon sing dayon, ang wagkos sang isa ka pagsimba sa langitnon nga Amay bangod ang iya mga anak nagahigugma kag nagadayaw sa iya labaw sa tanan. Huo, nian mahanabo nga ang tanan nga intelihente nga mga tinuga magasiling, sa epekto, subong sang ginsiling sang mga serafin: “Balaan, balaan, balaan si Jehova sang mga kasoldadosan. Ang bug-os nga duta napuno sang iya himaya.” Nian, sa pagkamatuod, ang Dios sang “Prinsipe sang Paghidait” mangin “tanan sa tanan”—sing dayon.
[Mga Pamangkot sa Pagtinuon]
1. Sa ano si Jesucristo nagapahamtang sing huwaran para sa tanan nga iban pa nga mga tinuga sa langit kag sa duta?
2, 3. (a) Paano ginalaragway sang 1 Corinto 15:24-26, 28 ang pinasahi nga buhat sang pagpasakop ni Jesus sa iya Amay? (b) Ano ang mangin daku nga resulta?
4. (a) Ano ang himuon sang mga pumuluyo sang duta sa huwaran sang ila nag-adoptar nga Amay? (b) Nian anong bag-o nga bahin sang pagpasakop ang magaluntad?
5. Ano ang mangin panimuot sang 144,000 ka kaupod nga mga hari ni Jesucristo?
6. (a) Ano ang matabo sa malalison nga mga tawo sa tion sang Milenyo nga Paggahom ni Jesus? (b) Ano ang mangin kahimtangan sang mga itugyan ni Jesus sa iya langitnon nga Amay?
7. (a) Ano ang tilawan sa tapos ibalik ni Jesus ang Ginharian? (b) Paano ang nahimpit nga katawhan ibutang sa sina nga pagtilaw?
8. (a) Sa tapos mapaguwa gikan sa kadadalman, ano ang tinguhaan nga himuon ni Satanas kag sang iya mga demonyo? (b) Ang mga magatugot sa ila kaugalingon nga mapatalang sang Yawa kag sang iya mga demonyo magahimo sing anong kurso sang dalanon?
9. (a) Ano ang matabo sa mga wala nagahupot sing integridad kay Jehova nga Dios? (b) Paano dulaon sa dimakita nga duog ang tanan nga rebelde? (c) Anong dungganon nga kahimtangan ang magaluntad nian sa bug-os nga langit kag duta?
10. Sa anong mga paagi ang duta magadala sing dayon nga kadungganan nga indi matigayon sang iban nga planeta?
11, 12. (a) Ano nga sahi sang espiritu nga mga tinuga ang nakita ni Isaias sa palanan-awon? (b) Ano ang interes nila sa aton nga mga tawo?
13. (a) Ano pa nga sahi sang espiritu nga tinuga ang ginapahayag sa aton sang Biblia? (b) Paano ginalaragway si Jehova may kaangtanan sa ila?
14. (a) Ano pa nga sahi sang espiritu nga mga tinuga ang indi dapat kalimtan? (b) Daw ano kadamo sila?
15, 16. (a) Ilaragway ang tulad-pamilya nga paghiusa nga magaluntad sa langit kag sa duta. (b) Ano nga padya gikan kay Jehova ang ihatag sa nahimpit nga mga tawo nga makapasa sa pagtilaw sing madinalag-on? (c) Paano tulukon ni Jehova ang katumanan sang iya orihinal nga katuyuan?
17. Bangod sining tanan, sin-o ang makalikaw sa paghimo sing ano, nahisanto sa mga pulong sang salmista?
18. Paano ginahinakpan sang salmista ang tolon-an sang Mga Salmo?
19. (a) Sa ano nga wagkos mahiusa ang uniberso? (b) Ano, sa epekto, ang isiling sang tanan intelihente nga mga tinuga?