“Ang Dios Nagahigugma sa Manughatag nga Malipayon”

SI Jehova amo ang personipikasyon sang kaalwan. Sa pagkamatuod, ang Biblia nagasiling nga sia ang Manughatag sing “tagsa ka maayong dulot kag tagsa ka himpit nga regalo.” (Santiago 1:17) Binagbinaga, halimbawa, ang mga butang nga gintuga sang Dios. Ginhimo niya ang mga kalan-on nga manamit, indi nga wala sing sabor; ang mga bulak nga maduagon, indi nga dimakagalanyat; ang mga pagtunod sang adlaw nga matahom, indi nga makatalaka. Huo, ang tagsa ka bahin sang tinuga ni Jehova nagapamatuod sang iya gugma kag kaalwan. (Salmo 19:​1, 2; 139:14) Dugang pa, si Jehova isa ka Manughatag nga malipayon. Nagakalipay sia sa paghimo sing maayo para sa iya mga alagad.​—⁠Salmo 84:11; 149:⁠4.

Ang mga Israelinhon anay ginsugo nga ipabanaag ang kaalwan sang Dios sa ila mga pagpakig-angot sa isa kag isa. “Indi mo pagpatig-ahon ang imo tagipusuon ukon kuumon ang imo kamot sa imo utod nga imol,” siling ni Moises sa ila. “Dapat mo gid sia hatagan, kag ang imo tagipusuon indi dapat magdinalok.” (Deuteronomio 15:​7, 10) Sanglit ang paghatag tinagipusuon, dapat malipay ang mga Israelinhon sa pagpakita sing kaalwan.

Ang mga Cristiano ginhatagan sing amo man nga laygay. Sa pagkamatuod, nagsiling si Jesus nga may “kalipay sa paghatag.” (Binuhatan 20:35) Ang mga disipulo ni Jesus mga huwaran sa paghatag sing malipayon. Halimbawa, ang Biblia nagasugid nga sa Jerusalem “ginbaligya [sang nangin mga tumuluo] ang ila mga pagkabutang kag mga propriedad kag ginpanagtag ini sa tanan, suno sa kinahanglan sang tagsatagsa.”​—⁠Binuhatan 2:​44, 45.

Apang ining maalwan nga mga taga-Judea nag-imol sang ulihi. Wala ginatul-id sang Biblia kon ano gid ang kabangdanan sang ila kahimtangan. Ang iban nga iskolar nagasiling nga ang ginapatuhuyan nga gutom sa Binuhatan 11:​28, 29 mahimo nga amo ang gintunaan. Ano man ang natabo, ang taga-Judea nga mga Cristiano yara sa makaluluoy nga kahimtangan, kag luyag pat-uron ni Pablo nga ang ila mga kinahanglanon maatipan. Paano niya ini ginhimo?

Pagpangolekta Para sa mga Nagakinahanglan

Nagpangayo sing bulig si Pablo sa mga kongregasyon tubtob sa malayo nga Macedonia, kag naghimo sia sing kahimusan sa pagpangolekta para sa namigado nga mga Cristiano sa Judea. Nagsulat si Pablo sa mga taga-Corinto: “Subong sang ginsugo ko sa mga kongregasyon sa Galacia, amo man ang himuon ninyo. Sa kada una nga adlaw sang semana ang tagsatagsa sa inyo sa iya kaugalingon nga balay magpain nga supton niya suno sa iya pagkabugana.”a​—⁠1 Corinto 16:​1, 2.

Gintuyo ni Pablo nga ining mga pundo ipadala gilayon sa mga kauturan sa Jerusalem, apang mahinay ang mga taga-Corinto sa pagsunod sa mga instruksion ni Pablo. Ngaa? Wala bala sila magsapak tuhoy sa kahimtangan sang ila mga kauturan sa Judea? Wala, kay nahibaluan ni Pablo nga ang mga taga-Corinto “nagabugana sa tagsa ka butang, sa pagtuo kag sa pulong kag sa ihibalo kag sa bug-os nga kakugi.” (2 Corinto 8:⁠7) Mahimo nga masako sila sa pag-atipan sa iban pa importante nga mga butang nga ginhinambitan ni Pablo sa iya una nga sulat sa ila. Apang hilingagawon karon ang kahimtangan sa Jerusalem. Gani ginsambit ni Pablo ang problema sa iya ikaduha nga sulat sa mga taga-Corinto.

Pag-apelar sa Kaalwan

Una, ginsugiran ni Pablo ang mga taga-Corinto tuhoy sa mga taga-Macedonia, nga huwaran sa paghatag sing maabtik nga bulig. “Sa tion sang daku nga pagtilaw sa idalom sang kapipit-an,” sulat ni Pablo, “ang ila bugana nga kalipay kag ang ila daku nga kaimulon nagpabugana sa kamanggaran sang ila kaalwan.” Indi na kinahanglan nga itulod ang mga taga-Macedonia. Sa kabaliskaran, nagsiling si Pablo nga “sila suno sa ila luyag padayon nga nagapangabay sa amon nga may daku nga pakiluoy para sa pribilehiyo sang mainayuhon nga paghatag.” Ang makalilipay nga kaalwan sang mga taga-Macedonia labi pa nga talalupangdon kon binagbinagon naton nga sila mismo yara sa “daku nga kaimulon.”​—⁠2 Corinto 8:​2-4.

Sa pagdayaw ni Pablo sa mga taga-Macedonia, ginapukaw bala niya ang espiritu sang pagkompetensiahanay sa tunga sang mga taga-Corinto? Wala gid, kay nahibal-an niya nga indi ini nagakaigo nga paagi sa pagpahulag sa ila. (Galacia 6:⁠4) Dugang pa, nakahibalo sia nga indi kinahanglan nga pakahuy-an ang mga taga-Corinto agod himuon ang husto nga butang. Sa baylo, may kompiansa sia nga ginahigugma gid sang mga taga-Corinto ang ila mga kauturan sa Judea kag luyag nga mag-amot sa pagbulig nga hilikuton. “Isa ka tuig na ang nagligad,” siling niya sa ila, “ginsugdan ninyo indi lamang ang paghimo kundi ang paghandum man nga himuon” ini. (2 Corinto 8:​10) Sa pagkamatuod, sa pila ka bahin sang pagbulig nga hilikuton, ang mga taga-Corinto mismo dalayawon. “Nahibaluan ko ang inyo kahanda sa hunahuna nga ginapabugal ko sa mga taga-Macedonia tuhoy sa inyo,” siling ni Pablo sa ila, kag nagdugang pa: “Ang inyo kakugi nagpukaw sa kalabanan sa ila.” (2 Corinto 9:⁠2) Apang karon, kinahanglan ipakita sa buhat sang mga taga-Corinto ang ila kakugi kag kahanda sa hunahuna.

Busa, ginsilingan sila ni Pablo: “Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon.” (2 Corinto 9:⁠7) Busa, indi tuyo ni Pablo nga ipiton ang mga taga-Corinto, kay ang isa ka tawo indi makahatag sing malipayon kon ginapilit sia. Maathag nga ginahunahuna ni Pablo nga may yara na nagakaigo nga motibo, nga ang tagsatagsa nakapamat-od na sa paghatag. Dugang pa, ginsilingan sila ni Pablo: “Kon ang pagkahanda yara na nga daan, labi ini nga kalahamut-an suno sa yara sa isa ka tawo, indi suno sa wala sa iya.” (2 Corinto 8:12) Huo, kon may kahanda​—⁠kon ang isa ka tawo ginapahulag sang gugma​—⁠ang iya ginadulot mangin kalahamut-an sa Dios, walay sapayan kon daw ano man ini ka diutay.​—⁠Ipaanggid ang Lucas 21:​1-4.

Malipayon nga mga Manughatag Karon

Ang pagbulig nga hilikuton para sa mga Cristiano sa Judea isa gid ka maayo nga halimbawa para sa karon. Ang mga Saksi ni Jehova nagahimo sing pagbantala nga hilikuton sa bug-os nga kalibutan, nga nagadala sing pagkaon sa minilyon nga gutom sa espirituwal. (Isaias 65:​13, 14) Ginahimo nila ini bilang pagtuman sa sugo ni Jesus: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila . . . nagatudlo sa ila nga tumanon ang tanan nga butang nga ginsugo ko sa inyo.”​—⁠Mateo 28:​19, 20.

Ang pagtuman sini nga komisyon indi mahapos. Nagadalahig ini sing pagmentinar sa mga puluy-an sang misyonero kag sang kapin sa isa ka gatos nga pasilidad sang sanga sa bug-os nga kalibutan. Nagalakip man ini sa pagtukod sing mga Kingdom Hall kag mga Assembly Hall agod nga ang mga sumilimba ni Jehova may nagakaigo nga mga duog sa pagtipon kag sa pagpalig-on sa isa kag isa. (Hebreo 10:​24, 25) Kon kaisa, ang mga Saksi ni Jehova nagahatag man sing bulig sa mga duog nga nahalitan sang kinaugali nga kalamidad.

Hunahunaa man, ang daku kaayo nga gasto sa pag-imprinta. Kada semana, sa promedyo, kapin sa 22,000,000 ka kopya sang Ang Lalantawan ukon mga 20,000,000 ka kopya sang Magmata! ang ginaimprinta. Dugang pa sa sining regular nga suplay sang espirituwal nga pagkaon amo ang minilyon ka libro, brosyur, audiocassette, kag videocassette nga ginapatubas kada tuig.

Paano ginasakdag ining tanan nga hilikuton? Paagi sa boluntaryo nga mga amot. Wala ini ginahimo bangod sa publisidad ukon sa makagod nga motibo, kundi agod pasangkaron ang matuod nga pagsimba. Busa, ini nga sahi sang paghatag nagapahalipay sa manughatag, kag ginapakamaayo sang Dios. (Malaquias 3:​10; Mateo 6:​1-4) Bisan ang mga kabataan sa tunga sang mga Saksi ni Jehova nangin maalwan, malipayon nga mga manughatag. Halimbawa, sang mabatian ang tuhoy sa kahapayan nga gintuga sang isa ka unos sa isa ka bahin sang Estados Unidos, ang kuatro-anyos nga si Allison nag-amot sing $2. “Amo lang ini ang kuwarta sa akon alkansiya,” sulat niya. “Nahibaluan ko nga nadulaan ang mga kabataan sang tanan nila nga hampanganan kag libro kag monyika. Ayhan magamit ninyo ini nga kuwarta sa pagbakal sing isa ka libro para sa bata nga babayi nga kaedad ko.” Ang otso anyos nga si Maclean nagsulat nga nalipay sia nga wala sing kauturan nga napatay sa bagyo. Sia nagdugang: “Nakaganar ako sing $17 sa pagbaligya sing mga hubcap upod sa akon amay. May balaklon ako kuntani, apang nadumduman ko ang mga kauturan.”​—⁠Tan-awa man ang kahon.

Sa pagkamatuod, nagakasadya ang tagipusuon ni Jehova nga makita ang mga lamharon kag mga tigulang nga nagauna sang intereses sang iya Ginharian sa ‘pagpadungog sa iya paagi sa ila malahalon nga mga butang.’ (Hulubaton 3:​9, 10) Matuod, wala sing isa nga makapamanggad kay Jehova, kay sia ang tag-iya sang tanan nga butang. (1 Cronica 29:​14-​17) Apang ang pagsuportar sa hilikuton isa ka pribilehiyo nga nagahatag sa isa ka sumilimba sing kahigayunan nga mapadayag ang iya gugma kay Jehova. Nagapasalamat kami sa tanan nga ginapahulag sang ila tagipusuon sa sini nga paagi.

[Footnote]

[Kahon sa pahina 26, 27]

Mga Paagi nga Ginpili sang Iban sa Paghatag sing mga Amot sa Bug-os Kalibutan nga Hilikuton

Madamo ang nagapain ukon nagabadyet sing kantidad nga ginahulog nila sa mga kahon-alamutan nga may ngalan: “Mga Amot Para sa Bug-os Kalibutan nga Hilikuton Sang Sosiedad​—⁠Mateo 24:14.” Kada bulan ginapadala sang kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa lokal nga sanga talatapan.

Ang boluntaryo nga mga amot nga kuwarta mahimo man mapadala sing direkta sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, ukon sa talatapan sang Sosiedad nga nagapangalagad sa inyo pungsod. Ang mga alahas ukon iban pa nga mga bahandi mahimo man maamot. Ang isa ka malip-ot nga sulat nga nagasiling nga ini isa ka kinabubut-on nga regalo dapat ilakip sa sining mga amot.

Kahimusan sa Pagdonar nga may Kondisyon

Mahimo ihatag ang kuwarta sa Watch Tower Society upod ang pinasahi nga kondisyon nga kon kinahanglan ini sang nagdonar, ang gindonar ibalik sa iya. Para sa dugang nga impormasyon, makig-angot palihug sa Treasurer’s Office sa direksion nga yara sa ibabaw.

Ginplano nga Paghatag

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sang paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension.

Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko.

Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga donasyon ukon sa idalom sang kahimusan diin ang kinitaan padayon nga ihatag sa nagdonar.

Real Estate: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propriedad sa nagdonar nga padayon nga makaistar sa sini tubtob buhi sia. Dapat ang isa makig-angot sa Sosiedad antes himuan sing kasulatan ang bisan ano nga real estate sa Sosiedad.

Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch Tower Society paagi sa legal nga testamento, ukon ang Sosiedad mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sing isa ka butang sa isa ka relihioso nga organisasyon subong amo ang benepisyaryo mahimo may mga bentaha sa buhis.

Subong ginapahangop sang termino nga “ginplano nga paghatag” ini nga mga sahi sang pagdonar kinaandan nga nagakinahanglan sing pagplano sa bahin sang nagadonar. Agod buligan ang mga indibiduwal nga luyag magbulig sa Sosiedad paagi sa pila ka porma sang ginplano nga paghatag, ang Sosiedad naghanda sing Ingles nga brosyur nga natig-uluhan Planned Giving to Benefit Kingdom Service Worldwide. Ginsulat ang brosyur bilang sabat sa madamo nga pamangkot nga nabaton sang Sosiedad tuhoy sa mga regalo, testamento, kag mga butang nga ginpiyar. Nagaunod man ini sing dugang kag mapuslanon nga impormasyon tuhoy sa estate, pinansial, kag pagplano sa buhis. Kag gindesinyo ini sa pagbulig sa mga indibiduwal sa Estados Unidos nga nagaplano sa paghatag sing espesyal nga regalo sa Sosiedad karon ukon magbilin sing palanublion sa tion sang kamatayon sa pagpili kon ano ang labing maayo kag mapuslanon nga paagi nga ginabinagbinag ang ila pamilya kag personal nga mga kahimtangan.

Sa tapos mabasa ang brosyur kag makapakig-angot sa Planned Giving Desk, madamo ang nakabulig sa Sosiedad kag sa amo man nga tion, sa paghimo sini napanginpuslan sing daku ang mga benepisyo nga ginatugot sang kahimusan sa buhis. Ang Planned Giving Desk dapat pahibaluon ukon hatagan sing kopya sang bisan anong importante nga dokumento tuhoy sa sining mga kahimusan. Ang mga interesado sa brosyur ukon sa bisan diin sini nga kahimusan sang ginplano nga paghatag dapat magpakig-angot sa Planned Giving Desk, paagi sa pagsulat ukon paagi sa telepono, sa direksion nga ginlista sa ubos ukon sa talatapan sang Sosiedad sa inyo pungsod.

PLANNED GIVING DESK

Watch Tower Bible and Tract Society of Pennsylvania

100 Watchtower Drive, Patterson, New York 12563-​9204

Telepono: (914) 878-​7000

[Kahon sa pahina 25]

Malipayon man nga mga Manughatag ang mga Kabataan!

Luyag ko ihatag ini sa inyo agod makahimo pa kamo sing dugang nga mga libro para sa amon. Nasupot ko ini nga kuwarta paagi sa pagbulig sa akon tatay. Madamo gid nga salamat sa inyo kapisan.​—⁠Pamela, siete anyos.

Ginapadala ko sa inyo ang $6.85 agod makabulig sa pagpatindog sing dugang nga mga Kingdom Hall. Nasupot ko ini sang nagligad nga tingadlaw sang nagbaligya ako sing lemonada sa kalye.​—⁠Selena, seis anyos.

Nagsagod ako sing isa ka munga nga nagboto sing isa ka sulog kag isa pa ka munga. Gindedikar ko ang naulihi kay Jehova. Nagboto ini sang ulihi sing tatlo ka munga, nga akon ginbaligya. Ginalakip ko ang bili sini para sa hilikuton ni Jehova.​—⁠Thier­ry, otso anyos.

Amo lang ini ang akon kuwarta! Palihug gamita ini sing maalamon. Ginpangabudlayan ko ang pagsupot sini. Yari ang $21.​—⁠Sarah, dies anyos.

Nagdaug ako sing una nga padya sa isa ka asaynment sa eskwelahan, gani nag-entra ako sa paindis-indis sa rehiyon. Nakuha ko man ang una nga lugar kag ang ikaduha nga padya sa katapusan nga paindis-indis sa distrito. Bangod sini, nakadaug ako sing kuwarta. Luyag ko ipaambit ang pila sina nga kuwarta sa Sosiedad. Nagapati ako nga indi ako makabaton sini nga mga padya kon indi bangod sang paghanas nga akon nabaton sa Teokratikong Eskwelahan sa Pagministro. Wala ako ginkulbaan sa paghatag sang akon report sa atubangan sang mga hukom.​—⁠Amber, ikan-um nga grado.

Luyag ko ihatag ini sa inyo para kay Jehova. Pamangkuta ninyo sia kon ano ang himuon sa sini. Nahibaluan niya ang tanan.​—⁠Karen, seis anyos.

[Mga retrato sa pahina 25]

Ang mga hilikuton sang mga Saksi ni Jehova ginasakdag paagi sa boluntaryo nga mga donasyon