Ginahigugma ni Jehova ang mga Manughatag nga Malipayon

“Maghimo ang tagsa ka tawo suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa mga manughatag nga malipayon.”—2 CORINTO 9:7.

1. Paano ang Dios kag si Cristo nangin mga manughatag nga malipayon?

SI Jehova amo ang nahaunang manughatag nga malipayon. Malipayon niya nga ginhatagan sing kabuhi ang iya bugtong nga Anak kag gingamit sia sa pagpaluntad sa mga anghel kag sa katawhan. (Hulubaton 8:30, 31; Colosas 1:13-17) Ang Dios naghatag sa aton sing kabuhi kag ginhawa kag sing tanan nga butang, lakip ang ulan halin sa langit kag ang mabungahon nga mga panag-on, nagapuno sang aton mga tagipusuon sing kalipay. (Binuhatan 14:17; 17:25) Sa pagkamatuod, ang Dios kag ang iya Anak, si Jesucristo, mga manughatag nga malipayon. Malipayon sila nga naghatag upod ang dimakagod nga espiritu. Ginhigugma gid ni Jehova ang kalibutan sang katawhan sa bagay nga “ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” Kag si Jesus malipayon nga ‘naghatag sang iya kalag nga gawad sang madamo.’—Juan 3:16; Mateo 20:⁠28.

2. Suno kay Pablo, anong sahi sang manughatag ang ginahigugma sang Dios?

² Busa, ang mga alagad sang Dios kag ni Cristo dapat mangin mga manughatag nga malipayon. Inang paghatag ginpalig-on sa ikaduhang sulat ni apostol Pablo sa mga Cristiano sa Corinto, nga ginsulat sang mga 55 C.E. Mahimo nga nagapatuhoy sa boluntaryo kag pribado nga pag-amot sing kuwarta labi na sa pagbulig sa imol nga mga Cristiano sa Jerusalem kag Judea, si Pablo nagsiling: “Maghimo ang tagsa ka tawo suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa mga manughatag nga malipayon.” (2 Corinto 9:7; Roma 15:​26; 1 Corinto 16:1, 2; Galacia 2:10) Ano ang reaksion sang katawhan sang Dios sa mga kahigayunan sa paghatag? Kag ano ang matun-an naton gikan sa laygay ni Pablo nahanungod sa paghatag?

Ginpahulag sang Kinabubut-on nga mga Tagipusuon

3. Tubtob sa anong kasangkaron ginsupurtahan sang mga Israelinhon ang pagpatindog sing tabernakulo para sa pagsimba kay Jehova?

³ Ang kinabubut-on nga mga tagipusuon nagapahulag sa katawhan sang Dios sa paghatag sang ila kaugalingon kag sang ila manggad sa pagsupurta sa balaan nga katuyuan. Halim­bawa, ang mga Israelinhon ­sadtong adlaw ni Moises malipayon nga nagsupurta sa pagpatindog sing tabernakulo para sa pagsimba kay Jehova. Ang tagipusuon sang iban nga mga babayi nagpahulag sa ila sa pagbolong (spin) sang balahibo sang kanding, samtang ang iban nga mga lalaki nagtigib. Ang mga tawo malipayon nga naghatag sing bulawan, pilak, kahoy, lino, kag iban pa nga mga butang subong boluntaryo nga “amot kay Jehova.” (Exodo 35:4-35) Tuman sa ila kaalwan sa bagay nga ang gin-amot nga mga butang “tuman na sa paghimo sang tanan nga buluhaton, kag madamo pa.”—Exodo 36:4-7.

4. Upod ang anong panimuot si David kag ang iban nag-amot sa templo?

⁴ Mga siglo sang ulihi, si Hari David nag-amot sing daku sa templo ni Jehova nga ipatindog sang iya anak nga si Solomon. Bangod kay ‘natuhoy ang gugma [ni David] sa balay sang balay,’ ginhatag niya ang iya “kaugalingon nga bahandi” sang pilak kag bulawan. Ang mga prinsipe, mga pangulo, kag ang iban ‘nagdulot sing kinabubut-on kay Jehova.’ Upod ang anong resulta? Ti, “ang katawhan nagkasadya bangod nga nakadulot sila sing kinabubut-on, kay sa himpit nga tagipusuon nagdulot sila sing kinabubut-on kay Jehova”! (1 Cronica 29:3-9) Mga manughatag sila nga malipayon.

5. Paano ginsupurtahan sang mga Israelinhon ang matuod nga pagsimba sa mga siglo?

⁵ Sa bug-os nga mga siglo, ang mga Israelinhon may pribilehiyo sa pagsupurta sa tabernakulo, sa ulihi nga mga templo, kag sa saserdotenhon kag Levinhon nga mga pag-alagad didto. Halimbawa, sang adlaw ni Nehemias ang mga Judiyo nagpamat-od sa pag-amot sa pagmentinar sang putli nga pagsimba, nakahibalo nga indi nila dapat pagpatumbayaan ang balay sang Dios. (Nehemias 10:​32-39) Sa kaanggid karon, ang mga Saksi ni Jehova malipayon nga nagaamot sing kinabubut-on sa pagpatindog kag sa pagmentinar sang mga duog tilipunan kag sa pagsupurta sa putli nga pagsimba.

6. Maghatag sing mga halimbawa sang paghatag sing malipayon sang mga Cristiano.

⁶ Ang mga Cristiano anay mga manughatag nga malipayon. Halimbawa, si Gayo naghimo sing “matutom nga buhat” sa pag-abiabi sa mga nagalakbay sa mga interes sang Ginharian, subong nga ang mga Saksi ni Jehova nagapakita sing pagkamaabiabihon sa nagalakbay nga mga manugtatap nga ginapadala karon sang Watch Tower Bible and Tract Society. (3 Juan 5-8) Gingastuhan ang paglakbay sining mga kauturan sa mga kongregasyon kag ang pakitaan sila sing pagkamaabiabihon, apang daw ano ka mapuslanon ini sa espirituwal!—Roma 1:11,12.

7. Paano gingamit sang mga taga-Filipos ang ila materyal nga manggad?

⁷ Ang mga kongregasyon subong kabilugan naggamit sang ila materyal nga manggad sa pagpauswag sang mga interes sang Ginharian. Halimbawa, si Pablo nagsiling sa mga tumuluo sa Filipos: “Bisan sa Tesalonica, ginpadalhan ninyo ako sing bulig sing labi pa sa makaisa. Indi nga nagapangita ako sing dulot, kundi nagapangita ako sang bunga nga nagadugang sa inyo kaayuhan.” (Filipos 4:15-17) Ang mga taga-Filipos naghatag sing malipayon, apang anong mga butang ang nagapahulag sang paghatag sing malipayon?

Ano ang Nagapahulag sang Paghatag sing Malipayon?

8. Paano mo pamatud-an nga ang espiritu sang Dios nagapahulag sa iya katawhan nga mangin mga manughatag nga malipayon?

⁸ Ang balaan nga espiritu, ukon aktibo nga puwersa ni Jehova, nagapahulag sa iya katawhan nga mangin mga manughatag nga malipayon. Sang ang mga Cristiano sa Judea nagkinahanglan sing bulig, ang espiritu sang Dios nagpahulag sa iban nga mga tulumuo nga buligan sila sa materyal. Agod palig-unon ang mga Cristiano sa Corinto sa paghimo sang bug-os nila nga masarangan sa pag-amot, ginhatag ni Pablo ang halimbawa sang mga kongregasyon sa Macedonia. Bisan pa ang mga tumuluo sa Macedonia nagaeksperiensia sing paghingabot kag kapigaduhon, nagpakita sila sing utudnon nga gugma paagi sa paghatag sing labaw sa ila aktuwal nga masarangan. Nagpakiluoy pa gani sila para sa pribilehiyo sa paghatag! (2 Corinto 8:​1-5) Ang kausa sang Dios wala lamang nasandig sa mga donasyon sang mga manggaranon. (Santiago 2:5) Ang iya pigado sa materyal nga dedikadong mga alagad amo ang pangunang nagasupurta sa gasto sang pagbantala sang Ginharian nga hilikuton. (Mateo 24:14) Apang, wala sila nag-antos bangod sang ila kaalwan, kay ang Dios walay kapaslawan nga nagaaman sang mga kinahanglanon sang iya katawhan sa sining hilikuton, kag ang puwersa sa likod sang pagpadayon kag pag-uswag sini amo ang iya espiritu.

9. Paano ang pagtuo, ihibalo, kag gugma ginaangot sa paghatag sing malipayon?

⁹ Ang paghatag sing malipayon ginapahulag sang pagtuo, ihibalo, kag gugma. Si Pablo nagsiling: “Subong nga nagabugana kamo [mga taga-Corinto] sa tagsa ka butang, sa pagtuo kag sa pagpamulong kag ihibalo kag sa bug-os nga pagkahanuot kag sa inyo gugma sa amon, tatapa nga magbugana kamo sa sining bugay man. Nagapamulong ako indi subong nga sugo, kundi subong nga nagatilaw sang kabunayag man sang inyo gugma paagi sa pagkahanuot sang iban.” (2 Corinto 8:​7, 8) Ang pag-amot sa kausa ni Jehova, labi na kon ang manughatag limitado sing ikasarang, nagakinahanglan sing pagtuo sa palaabuton nga mga aman sang Dios. Ang mga Cristiano nga bugana sa ihibalo maluyag sa pag-alagad sa katuyuan sang Dios, kag ang mga bugana sing gugma sa iya kag sa iya katawhan malipayon nga nagagamit sang ila manggad sa pagpauswag sang iya kausa.

10. Ngaa masiling nga ang huwaran ni Jesus nagapahulag sa mga Cristiano sa paghatag sing malipayon?

¹⁰ Ang huwaran ni Jesus nagapahulag sa mga Cristiano sa paghatag sing malipayon. Pagkatapos ginlaygayan ang mga taga-Corinto sa paghatag bangod sa gugma, si Pablo nagsiling: “Nahibaluan ninyo ang dibagay nga kaluoy ni Ginuong Jesucristo, nga bisan manggaranon sia nangin imol sia tungod sa inyo, agod nga paagi sa iya pagkaimol mangin manggaranon kamo.” (2 Corinto 8:9) Mas manggaranon sa langit sa bisan sin-o nga anak sang Dios, gin-ula ni Jesus ining tanan sa iya kaugalingon kag natawo sa kaanggid sang tawo. (Filipos 2:5-8) Apang, bangod nangin imol sa sining dimakagod nga paagi, si Jesus nakaamot sa pagpakabalaan sa ngalan ni Jehova kag naghatag sang iya kabuhi subong halad gawad para sa kaayuhan sang mga tawo nga nagabaton sini. Nahisuno sa huwaran ni Jesus, indi bala kita dapat maghatag sing malipayon sa pagbulig sa iban kag sa pag-amot sa pagpakabalaan sa ngalan ni Jehova?

11, 12. Paano ang maayo nga pagplano nagahimo sa aton nga mga manughatag nga malipayon?

¹¹ Ang maayo nga pagplano nagapaposible sang paghatag sing malipayon. Si Pablo nagsugo sa mga taga-Corinto: “Sa nahaunang adlaw sang tanan nga semana ang tagsatagsa sa inyo magpain nga supton niya, suno sa iya pagkabugana, agod nga sa pag-abot ko handa na ang mga amot.” (1 Corinto 16:1, 2) Sa pribado man kag sa boluntaryo nga paagi, ang maluyag sa pag-amot sa pagpauswag sang hilikuton sa Ginharian karon nagakaigo nga magpain sang iban nga sinuptan niya para sa sinang katuyuan. Subong resulta sang maayo nga pagplano, ang indibiduwal nga mga Saksi, mga pamilya, kag mga kongregasyon nagaamot sa pagpauswag sang matuod nga pagsimba.

¹² Ang paghimo sing mga plano sa pag-amot nagapahalipay sa aton. Subong sang ginsiling ni Jesus, “malipayon pa ang paghatag sang sa pagbaton.” (Binuhatan 20:35) Gani madugangan sang mga taga-Corinto ang ila kalipay paagi sa pagsunod sa laygay ni Pablo nga maghimo sang ila isa ka tuig nga plano sa pagpadala sing pundo sa Jerusalem. “Ginakahamut-an ini suno sa yara sa tawo, indi suno sa wala sa iya,” siling niya. Kon ang isa magaamot suno sa yara sa iya, dapat ini pabilihan sing daku. Kon nagasalig kita sa Dios, maalangay niya ang mga butang agod ang may madamo mangin maalwan, wala nagauyang, kag ang may diutay wala ginakulang nga nagabuhin sang ila kusog kag ikasarang sa pag-alagad sa iya.—2 Corinto 8:10-15.

Maayo nga Pagdumala sang Paghatag

13. Ngaa makasalig ang mga taga-Corinto sa pagdumala ni Pablo sa mga donasyon?

¹³ Gindumalahan ni Pablo ang kahimusan sa pag-amot agod ang imol nga mga tumuluo makaagom sing materyal nga bulig kag makapakigbahin sing mas mapagsik sa pagbantala nga hilikuton, wala niya ukon sang iban ginkuha ang iban nga pundo para sa ila pag-alagad. (2 Corinto 8:16-24; 12:17, 18) Si Pablo nagpangabudlay agod may magamit sia sa iya kaugalingon nga materyal nga mga kinahanglanon sa baylo nga magpabug-at sa kongregasyon. (1 Corinto 4:12; 2 Tesalonica 3:8) Busa, sa pagtulin sang donasyon sa iya, ang mga taga-Corinto nagatugyan sini sa isa ka masaligan kag mapisan nga alagad sang Dios.

14. Tuhoy sa paggamit sing mga donasyon, ano ang rekord sang Watch Tower Society?

¹⁴ Sugod sang nangin korporasyon ang Watch Tower Bible and Tract Society sang 1884, ang mga nagaamot may pamatuod nga isa ini ka masaligan nga manugdumala sang tanan nga donasyon nga gintugyan sa sini tungod sa hilikuton sang Ginharian ni Jehova. Suno sa karta sini, ang Sosiedad nagapanikasog sa pagpuno sang pinakadakung kinahanglanon sang tanan nga katawhan, ang kinahanglanon para sa espirituwal nga mga butang. Ginahimo ini sa dagway sang literatura kag instruksion sa Biblia sa kon paano matigayon ang kaluwasan. Karon, ginapadasig ni Jehova ang pagtipon sa mga katulad-karnero pasulod sa iya nagasangkad nga organisasyon, kag ang pagpakamaayo niya sa maalamon nga paggamit sang mga donasyon sa pagbantala sang Ginharian nga hilikuton maathag nga pamatuod sang balaan nga kahamuot. (Isaias 60:8,22) Nagasalig kita nga padayon niya nga pahulagon ang mga manughatag sing malipayon.

15. Ngaa ginasambit kon kaisa sining magasin ang mga donasyon?

¹⁵ Ang Sosiedad nagagamit kon kaisa sang mga kolumna sining balasahon sa pagpahibalo sa mga bumalasa sang pribilehiyo nila sa pag-amot sing boluntaryo sa bug-os kalibutan nga pagbantala sang Ginharian nga hilikuton. Indi ini pagpangayo, kundi pahanumdom sa tanan nga maluyag sa pagsupurta sa “balaan nga hilikuton sang maayong balita” samtang ang Dios nagapabugana sa ila. (Roma 15:16; 3 Juan 2) Ginagamit sang Sosiedad ang tanan nga kuwarta nga gin-amot sa pinakamakinot nga paagi agod mapahibalo ang ngalan kag Ginharian ni Jehova. Ang tanan nga mga amot mapasalamaton nga ginabaton, ginakilala, kag ginagamit sa pagpalapnag sang maayong balita sang Ginharian sang Dios. Halimbawa, paagi sa sini ang misyonero nga mga hilikuton ginagastuhan sa madamong pungsod, kag ang mga pasilidad sa pag-imprinta nga kinahanglanon sa pagpalapnag sang ihibalo sa Biblia ginamentinar kag ginapasangkad. Dugang pa, ang mga amot sa bug-os kalibutan nga hilikuton ginagamit sa pagbayad sa nagasaka nga bili sa paghimo sing mga Biblia kag pasad sa Biblia nga mga publikasyon subong man sang audiocassette kag videocassette. Sa sinang paagi ang mga interes sang Ginharian ginapauswag sang mga manughatag sing malipayon.

Indi Bangod sa Pilit

16. Bisan pa diutay lamang sa mga Saksi ni Jehova ang manggaranon sa materyal, ngaa ginaapresyar ang ila mga amot?

¹⁶ Pila lamang ka Saksi ni Jehova ang manggaranon sa materyal. Bisan pa nagahatag sila sing maarang-arang nga kantidad sa pagpauswag sang mga interes sang Ginharian, ang ila donasyon importante gid. Sang nakita ni Jesus ang isa ka imol nga balo nga naghulog sang duha ka lepta sa bahandian sang templo, nagsiling sia: “Ining imol nga babaying balo nagbutang sing labi pa sa ila tanan. Kay sila tanan [ang iban nga nag-amot] nag-amot gikan sa ila kabuganaan, apang sia sa iya kinawad-on nagbutang sang tanan nga inugpangabuhi niya.” (Lucas 21:​1-4) Bisan pa diutay ang iya dulot, isa sia ka manughatag nga malipayon​—⁠kag ang iya amot gin-apresyar.

17, 18. Ano ang kahulugan sang pinamulong ni Pablo sa 2 Corinto 9:​7, kag ano ang ginapakita sang Griegong tinaga nga ginbadbad “malipayon”?

¹⁷ Nahanungod sa hilikuton sa pagbulig tungod sa mga Cristiano sa Judea, si Pablo nagsiling: “Maghimo ang tagsa ka tawo suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.” (2 Corinto 9:7) Mahimo nga ginapatuhuyan sang apostol ang isa ka bahin sang Hulubaton 22:8 sa Septuagint nga badbad, nga nagasiling: “Ginapakamaayo sang Dios ang manughatag nga malipayon; kag magahatag sang mga kulang sang iya mga binuhatan.” (The Septuagint Bible, ginbadbad ni ­Charles Thomson) Gin-islan ni Pablo ang “ginapakamaayo” sing “ginahigugma,” apang may koneksion ini, kay ang pag-ani sing mga pagpakamaayo resulta sang gugma sang Dios.

¹⁸ Ang manughatag nga malipayon tunay gid nga nalipay sa paghatag. Ti, gikan sa Griegong tinaga nga ginbadbad nga “malipayon” sa 2 Corinto 9:7 naghalin ang tinaga nga “makahalam-ot”! Pagkatapos ini mabinagbinag, ang eskolar nga si R.C.H.Lenski nagsiling: “Ginahigugma sang Dios ang malipayon, masadyahon, maalwan nga manughatag . . . [nga ang] pagtuo ginapunihan sang mga yuhum kon ang isa pa ka kahigayunan sa paghatag nagatamyaw sa iya.” Ang tawo nga may masadya nga espiritu wala nagahatag sing may pangduhaduha ukon sa pagpilit kundi ang iya tagipusuon yara sa paghatag niya. Amo ka bala sina ka malipayon nahanungod sa paghatag sing supurta sa mga interes sang Ginharian?

19. Paano nag-amot ang mga Cristiano anay?

¹⁹ Ang mga Cristiano anay wala nagapasa sang mga plato sa koleksion ukon naghimo sing diesmos paagi sa pag-amot sang ikapulo sang ila kita para sa relihiosong mga katuyuan. Sa baylo, ang ila mga amot bug-os nga boluntaryo. Si Tertullian, nga nakumbertir sa Cristianismo sang mga 190 C.E., nagsulat: “Bisan pa may bahandian kami, wala ini ginahuman sang kuwarta sa pagbakal sang kaluwasan, subong sang isa ka relihion nga may bili. Sa binulan nga pagbayad [ayhan makaisa sa isa ka bulan], kon luyag niya, ang kada isa nagahulog sing diutay nga amot; apang lamang kon luyag niya, kag lamang kon masarangan niya; kay wala sing pagpilit; ang tanan boluntaryo.”—Apology, Kapitulo XXXIX.

20, 21. (a) Ano ang ginasiling sang isyu anay sining magasin nahanungod sa pribilehiyo sang pagsupurta sa kausa sang Dios sa pangwarta, kag paano ini naaplikar bisan karon? (b) Ano ang nagakatabo kon ginapadunggan naton si Jehova sang aton bilidhon nga mga butang?

²⁰ Ang boluntaryo nga paghatag pirme nangin kinabatasan sa tunga sang modernong-adlaw nga mga alagad ni Jehova. Apang, kon kaisa, ang iban wala naghimulos sing bug-os sang pribilehiyo nila sa pagsupurta sa kausa sang Dios paagi sa pag-amot. Sang Pebrero 1883, halimbawa, ining magasin nagsiling: “Ang iban ginabug-atan sing daku sing lulan sa pangwarta tungod sa iban, sa bagay nga ang ila ikasarang sa paghatag sing pinansial nga bulig nagadiutay bangod sang sobra nga pagpangabudlay kag pagkakapoy, kag busa ang ila pagkamapuslanon naapektuhan; kag indi lamang amo sina, kundi ang mga . . . wala nakahangop sa kahimtangan, nangin mga pierde bangod sang indi paghulag sa sinang direksion.”

²¹ Samtang ang dakung kadam-an nagadugok pasulod sa organisasyon ni Jehova karon, kag samtang ang hilikuton sang Dios nagasangkad sa Nasidlangan nga Europa kag sa mga lugar nga may pagdumili anay, may yara nagadugang nga kinahanglanon nga pasangkaron ang mga imprintahan kag iban pa nga mga pasilidad. Dugang nga mga Biblia kag iban nga mga publikasyon ang dapat imprintahon. Madamong teokratikong proyekto ang hilimuon; apang, ang iban mas madasig nga mahimo kon may bastante nga pundo. Sa pagkamatuod, nagatuo kita nga ang Dios magaaman kon ano ang kinahanglan, kag nakahibalo kita nga ang mga ‘nagapadungog kay Jehova paagi sa ila bilidhon nga mga butang’ pagapakamaayuhon. (Hulubaton 3:​9, 10) Sa pagkamatuod, “ang nagasab-ug sing bugana magaani man sing bugana.” Si Jehova ‘magapabugana sa aton sang tanan nga sahi sang kaalwan,’ kag ang aton paghatag sing malipayon magatiklod sa madamo sa pagpasalamat kag sa pagdayaw sa iya.—2 Corinto 9:6-14.

Ipakita ang Imo Pasalamat sa mga Dulot sang Dios

22, 23. (a) Ano ang dimamitlang nga walay bayad nga dulot sang Dios? (b) Bangod ginaapresyar naton ang mga dulot ni Jehova, ano ang dapat naton nga himuon?

²² Ginapahulag sang daku nga pagpasalamat, si Pablo mismo nagsiling: “Salamat sa Dios tungod sang iya dimamitlang nga walay bayad nga dulot.” (2 Corinto 9:15) Subong “katumbasan nga halad” tungod sa mga sala sang hinaplas nga mga Cristiano kag tungod sa iya sang kalibutan, si Jesus amo ang sadsaran kag alagyan para sa dimamitlang nga walay bayad nga dulot. (1 Juan 2:​1, 2) Ina nga dulot amo “ang lakas nga dibagay nga kaluoy sang Dios” nga ginpakita niya sa iya katawhan sa duta paagi kay Jesucristo, kag nagabugana ini sa kaluwasan nila kag sa himaya kag bindikasyon ni Jehova.—2 Corinto 9:14.

²³ Nagapasalamat kita sing daku kay Jehova tungod sang iya dimamitlang nga walay bayad nga dulot kag madamong iban pa nga espirituwal kag materyal nga mga dulot sa iya katawhan. Ti, ang kaayo sang aton langitnon nga Amay sa aton tuman gid kadaku sa bagay nga nagalabaw ini sa ikasarang sang tawo sa pagpabutyag! Kag pat-od gid ini nga nagapahulag sa aton nga mangin mga manughatag nga malipayon. Nian, upod ang tinagipusuon nga apresasyon, himuon naton ang tanan nga masarangan naton sa pagpauswag sang kausa sang aton maalwan nga Dios, si Jehova, ang una kag pangunang Manughatag nga malipayon!

Nadumduman Mo Bala?

◻ Ang kinabubut-on nga mga tagipusuon nagapahulag sa katawhan ni Jehova sa paghimo sang ano?

◻ Ano ang nagapahulag sang paghatag sing malipayon?

◻ Paano ginagamit sang Watch Tower Society ang tanan nga donasyon nga ginabaton sini?

◻ Anong sahi sang manughatag ang ginahigugma sang Dios, kag paano naton dapat ipakita ang aton pagpasalamat tungod sa Iya madamong dulot?

[Laragway sa pahina 15]

Sang ginpatindog ang tabernakulo, ang mga Israelinhon nagpangabudlay sing mapisan kag nag-amot sing maalwan kay Jehova

[Laragway sa pahina 18]

Ang mga donasyon kaangay sang ginhimo sang imol nga balo ginaapresyar kag importante