Si Jehova “Nagapahayag sang Katapusan Kutob sa Ginsuguran”
“Ang Isa nga nagapahayag sang katapusan kutob sa ginsuguran, kag sang mga butang nga wala pa mahimo kutob sang madugay na nga tion.”—ISAIAS 46:10.
1, 2. Ano ang talalupangdon tuhoy sa mga hitabo may kaangtanan sa pagkapukan sang Babilonia, kag ano ang ginapakita sining katunayan tuhoy kay Jehova?
SA MALINONG nga kagab-ihon, hinayhinay nga ginatabok sang kaaway nga mga soldado ang Suba Eufrates padulong sa ila puntariya, ang gamhanan nga siudad sang Babilonia. Samtang nagapalapit sila sa gawang sang siudad, nakibot gid sila sa ila nakit-an. Ang daku katama nga duha-sing-takop nga ganhaan sang pader sang Babilonia napabay-an nga abierto! Nagtakas sila sa suba, nagsaka, kag nagsulod sa siudad. Nian, madasig nila nga ginsakop ang siudad. Ginkontrol gilayon sang ila lider nga si Ciro ang pungsod kag sang ulihi nagpagua sing sugo nga hilwayon ang bihag nga mga Israelinhon. Nagbalik ang linibo ka tinapok sa ila dutang natawhan agod ipasag-uli ang pagsimba kay Jehova sa Jerusalem.—2 Cronica 36:22, 23; Esdras 1:1-4.
2 Yadtong mga hitabo sang 539-537 B.C.E. napamatud-an na karon sang mga istoryador nga matuod. Ang dalayawon gid amo nga ginpahibalo ini 200 ka tuig antes ini matabo. Gin-inspirar ni Jehova ang iya manalagna nga si Isaias nga ilaragway sing abanse ang pagkapukan sang Babilonia. (Isaias 44:24–45:7) Ginpahayag sang Dios indi lamang kon paano mapukan ang Babilonia kundi pati man ang ngalan sang lider nga magasakop sini.a Nagapamulong sa mga Israelinhon, nga iya anay mga saksi, si Jehova nagsiling: “Dumduma ang nahauna nga mga butang sang madugay na nga tion, nga ako ang Dios kag wala na sing iban pa nga Dios, ni may sin-o man nga kaangay sa akon; ang Isa nga nagapahayag sang katapusan kutob sa ginsuguran, kag sang mga butang nga wala pa mahimo kutob sang madugay na nga tion.” (Isaias 46:9, 10a) Si Jehova isa gid ka Dios nga sarang makahibalo sing abanse kon ano ang mahanabo sa palaabuton.
3. Binagbinagon naton karon ang mga sabat sa ano nga mga pamangkot?
3 Ano kadamo ang nahibaluan sang Dios tuhoy sa palaabuton? Nahibaluan bala ni Jehova sing abanse kon ano ang pagahimuon sang kada isa sa aton? Matuod bala nga ang aton palaabuton natalana na? Binagbinagon naton sa sini nga artikulo kag sa masunod ang mga sabat sang Biblia sa sini nga pamangkot kag sa iban pa nga pamangkot may kaangtanan sini.
Si Jehova—Isa ka Dios sang Tagna
4. Sin-o ang Ginahalinan sang mga tagna nga narekord sa Biblia?
4 Bangod sarang niya mahibaluan ang palaabuton, gin-inspirar ni Jehova ang iya mga alagad sang panahon sang Biblia nga magrekord sing madamo nga tagna, sa amo mahibaluan naton kon ano ang katuyuan ni Jehova. “Ang una nga mga butang—yari nag-abot na ini, apang ginapahayag ko ang bag-o nga mga butang,” siling ni Jehova. “Sa wala pa ini maggua, ipabati ko ini sa inyo.” (Isaias 42:9) Sa pagkamatuod pinasahi gid ini nga kadungganan para sa katawhan sang Dios!
5. Ano ang salabton sang isa kon nahibaluan niya sing abanse ang pagahimuon ni Jehova?
5 Ginpalig-on kita ni manalagna Amos: “Ang Soberanong Ginuo nga si Jehova indi maghimo sing isa ka butang kon indi niya anay mapahayag ang iya kompidensial nga butang sa iya mga alagad nga mga manalagna.” Ang pagkahibalo sing abanse may dala nga salabton. Talupangda ang makapahulag nga ilustrasyon nga masunod nga gingamit ni Amos: “May leon nga nagangurob! Sin-o ang indi mahadlok?” Subong nga ang tawo kag sapat sa palibot nagahulag gilayon kon makabati sang ngurob sang leon, amo man ang mga manalagna nga kaangay ni Amos nagabantala gilayon sang mga pahayag ni Jehova. “Ang Soberano nga Ginuong Jehova mismo ang nagapamulong! Sin-o ang indi makapanagna?”—Amos 3:7, 8.
Ang “Pulong” ni Jehova “Pat-od nga Magamadinalag-on”
6. Sa anong paagi nagmadinalag-on ang “tinutuyo” ni Jehova may kaangtanan sa pagkapukan sang Babilonia?
6 Paagi sa iya manalagna nga si Isaias, si Jehova nagsiling: “Ang akon tinutuyo magapadayon, kag ang tanan nga ginakahamut-an ko himuon ko.” (Isaias 46:10b) Ang “tinutuyo” sang Dios, buot silingon, ang iya kabubut-on ukon katuyuan may kaangtanan sa Babilonia, nagalakip sa iya pagtawag kay Ciro gikan sa Persia agod sakupon ang Babilonia kag laglagon ini. Ginpahibalo na ini ni Jehova madamo nga tinuig antes pa ini matabo. Subong sang nasambit na, sibu gid ini nga natuman sang tuig 539 B.C.E.
7. Ngaa makasalig kita nga ang “pulong” ni Jehova matuman gid?
7 Halos apat ka siglo antes ginsakop ni Ciro ang Babilonia, si Hari Jehosapat sang Juda nag-atubang sa pagsalakay sang nagtingob nga hangaway sang Amon kag Moab. Nangamuyo sia nga may pagsalig: “O Jehova nga Dios sang amon mga katigulangan, indi bala nga ikaw ang Dios sa langit, kag indi bala nga nagagahom ka sa tanan nga ginharian sang mga pungsod, kag indi bala nga yara sa imo kamot ang gahom kag kusog, amo nga wala sing makatindog batok sa imo?” (2 Cronica 20:6) Kaanggid man sa sini ang pagsalig nga ginpahayag ni Isaias: “Si Jehova sang mga kasuldadusan nagpanugyan, kag sin-o ang makabungkag sini? Kag ang iya kamot nagauntay, kag sin-o ang makapakulo sini?” (Isaias 14:27) Sang ulihi, sang ginpasag-uli si Hari Nabocodonosor sang Babilonia sa husto nga pamensaron pagligad sang pagbuang sa sulod sang isa ka hut-ong sang tion, mapainubuson niya nga ginkilala: “Wala sing bisan sin-o nga nagaluntad ang makapugong sa iya [sang Dios] kamot ukon makasiling sa iya, ‘Ano ang ginahimo mo?’” (Daniel 4:35) Huo, ginpalig-on ni Jehova ang iya katawhan: “Ang akon pulong . . . indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.” (Isaias 55:11) Makasalig kita sing bug-os nga ang “pulong” ni Jehova pirme nagakatuman. Ang katuyuan sang Dios indi gid mapaslawan.
Ang “Dayon nga Katuyuan” sang Dios
8. Ano ang “dayon nga katuyuan” sang Dios?
8 Sa iya sulat sa mga Cristiano sa Efeso, ginsambit ni apostol Pablo nga ang Dios may “dayon nga katuyuan.” (Efeso 3:11) Indi lamang ini isa ka plano sang pagahimuon, nga daw subong bala ginaplano pa sang Dios kon paano niya himuon ang iya mga hilikuton. Sa baylo, naangot ini sa determinasyon ni Jehova nga tumanon kon ano ang iya orihinal nga gintuyo para sa katawhan kag sa duta. (Genesis 1:28) Agod buligan kita nga mahangpan ang pagkawalay kapaslawan sang iya katuyuan, binagbinaga ang una nga tagna nga narekord sa Biblia.
9. Ano ang kaangtanan sang Genesis 3:15 sa katuyuan sang Dios?
9 Ang saad sa Genesis 3:15 nagapakita nga sa gilayon pagkatapos makasala sanday Adan kag Eva, namat-od si Jehova nga ang iya simbuliko nga babayi magpanganak sing isa ka binhi, ukon anak nga lalaki. Nakita na ni Jehova sing abanse ang mangin resulta sang kaawayon sa ulot sang iya babayi kag ni Satanas kag sa ulot sang ila nagasumpunganay nga mga binhi. Bisan pa pahanugutan ni Jehova nga madugmok ang tikod sang Binhi sang babayi sang Dios, sa nagakaigo nga tion sang Dios, ining Binhi magadugmok naman sa ulo sang man-ug, ukon kay Satanas nga Yawa. Samtang wala pa ini, ang katuyuan ni Jehova amat-amat nga nagakatuman paagi sa pinili nga linya sang mga kaliwatan tubtob nga nag-abot si Jesus subong ang ginsaad nga Mesias.—Lucas 3:15, 23-38; Galacia 4:4.
Kon Ano ang Gintalana ni Jehova
10. Gintalana na bala nga daan ni Jehova halin pa sa ginsuguran nga magapakasala sanday Adan kag Eva? Ipaathag.
10 Sang nagpamulong sia tuhoy sa papel nga gintungdan ni Jesus sa katuyuan sang Dios, si apostol Pedro nagsulat: “Sia [si Jesus] nakilala na nga daan sa wala pa ang pagpasad sang kalibutan, apang ginpahayag sia sa katapusan sang mga tion tungod sa inyo.” (1 Pedro 1:20; Reference Bible, footnote) Gintalana na bala nga daan ni Jehova halin pa sa ginsuguran nga sanday Adan kag Eva magapakasala kag sa amo kinahanglan ang halad gawad ni Jesucristo? Indi. Ang Griegong termino nga ginbadbad “pagpasad” literal nga nagakahulugan sing “pagsab-ug sing binhi.” May “pagsab-ug [bala] sing binhi,” ukon pagpanamkon sang tawhanon nga kaliwat, antes magpakasala sanday Adan kag Eva? Wala. Nakasala na sanday Adan kag Eva sang magpanganak sila. (Genesis 4:1) Gani, gintalana ni Jehova ang pagluntad sang “binhi” pagkatapos na sang pagrebelde ni Adan kag ni Eva apang antes pa sila nagpamata. Ang kamatayon kag pagkabanhaw ni Jesus nag-aman sing mahigugmaon nga kahimusan sang gawad, sa amo pagadulaon sini ang napanubli nga sala kag ang tanan nga binuhatan ni Satanas.—Mateo 20:28; Hebreo 2:14; 1 Juan 3:8.
11. Ano nga hitabo ang gintalana nga daan ni Jehova sa katumanan sang iya katuyuan?
11 May isa pa ka hitabo nga gintalana sang Dios agod tumanon ang iya katuyuan. Makita ini sa ginsulat ni Pablo sa mga taga-Efeso, nga “tipunon liwat [sang Dios] ang tanan nga butang kay Cristo, ang mga butang sa langit kag ang mga butang sa duta.” Nian, tuhoy sa “mga butang sa langit,” nga amo ang pinili nga mga masigkamanunubli upod ni Cristo, si Pablo nagpaathag: “Gintangdo na nga daan kita suno sa katuyuan niya nga nagapahikot sang tanan nga mga butang suno sa paagi nga ginapanugyan sang iya kabubut-on.” (Efeso 1:10, 11) Huo, gintalana ni Jehova sing abanse nga may limitado nga kadamuon sang mga tawo nga mangin segundaryo nga bahin sang binhi sang babayi sang Dios kag mangin kaupod ni Cristo sa paghatag sing mga benepisyo sang gawad. (Roma 8:28-30) Ginpatuhuyan sila ni Pablo subong isa ka “balaan nga pungsod.” (1 Pedro 2:9) Si apostol Juan nakatigayon sing pinasahi nga pribilehiyo nga makita sa isa ka palanan-awon kon pila ang mangin mga masigkamanunubli ni Cristo—144,000. (Bugna 7:4-8; 14:1, 3) Nagasakdag kay Cristo subong Hari, magaalagad sila ‘sa kadayawan sang himaya’ sang Dios.—Efeso 1:12-14.
12. Paano naton nahibaluan nga ang indibiduwal nga mga katapo sang 144,000 wala gintalana?
12 Ang pagtalana sa 144,000 wala nagakahulugan sing pagtalana sa mga indibiduwal nga magaalagad sa Dios sing matutom sa sining paagi. Sa pagkamatuod, ang laygay sa Cristianong Griegong Kasulatan ginsulat ilabi na agod tuytuyan kag palig-unon ang mga hinaplas nga huptan ang ila integridad kag magpabilin nga takus sa ila langitnon nga pagtawag. (Filipos 2:12; 2 Tesalonica 1:5, 11; 2 Pedro 1:10, 11) Nahibaluan ni Jehova sing abanse nga 144,000 ka indibiduwal ang makalipikar sa pag-alagad sa sining katuyuan. Ang kalipikasyon sining mga gin-agda nagadepende sa kon paano sila magakabuhi, isa ka desisyon nga personal nga himuon sang kada isa sa ila.—Mateo 24:13.
Kon Ano ang Nahibaluan ni Jehova sing Abanse
13, 14. Sa ano nagahisanto ang paggamit ni Jehova sang iya abanse nga ihibalo, kag ngaa?
13 Sanglit si Jehova isa ka Dios sang tagna kag katuyuan, paano niya ginagamit ang iya abanse nga ihibalo? Una, makasalig kita nga ang tanan nga dalanon sang Dios tampad, matarong, kag mahigugmaon. Sang nagsulat si apostol Pablo sa Hebreo nga mga Cristiano sang unang siglo C.E., napamatud-an niya nga ang “duha ka butang nga indi mabag-o nga sa sini indi mahimo nga magbutig ang Dios” amo ang panumpa kag saad sang Dios. (Hebreo 6:17, 18) Sa iya sulat kay disipulo Tito, ginpahayag man ni Pablo ining ideya sang nagsiling sia nga ang Dios “indi makabutig.”—Tito 1:2.
14 Dugang pa, bisan pa walay latid ang gahom ni Jehova, wala sia nagapanghikot sing di-makatarunganon. Ginlaragway ni Moises si Jehova subong “isa ka Dios sang katutom, nga sa iya wala sing inhustisya; matarong kag matadlong sia.” (Deuteronomio 32:4) Ang bisan ano nga ginahimo ni Jehova nagahisanto sa iya dalayawon nga personalidad. Ginapakita sang iya mga buhat ang himpit nga paghilisanto sang iya panguna nga mga kinaiya subong sang gugma, kaalam, katarungan, kag gahom.
15, 16. Ano nga mga pagpili ang ginhatag ni Jehova kay Adan sa hardin sang Eden?
15 Binagbinaga kon paano ini tanan naangot sa mga hitabo sa hardin sang Eden. Subong isa ka mahigugmaon nga Amay, gin-aman ni Jehova ang tanan nga kinahanglanon sang iya tawhanon nga mga tinuga. Ginhatagan niya si Adan sing ikasarang sa paghunahuna, sa pangatarungan, kag sa paghimo sing desisyon. Indi kaangay sang iya tinuga nga mga sapat, nga ginatuytuyan lamang sang ila duna nga mga kinaiya, si Adan may ikasarang sa pagpili. Pagkatapos matuga si Adan, nagtamod si Jehova gikan sa iya langitnon nga trono kag nakita “ang tanan nga butang nga ginhimo niya kag, yari karon! tama gid ini kaayo.”—Genesis 1:26-31; 2 Pedro 2:12.
16 Sang ginhatagan ni Jehova sing isa ka sugo si Adan nga indi magkaon “sa kahoy sa pagkilala sang maayo kag malain,” naghatag Sia sing nagakaigo nga instruksion agod makadesisyon si Adan kon ano ang dapat himuon. Ginpahanugutan niya si Adan sa pagkaon sa “tagsa ka kahoy sa hardin” luwas lamang sa isa kag ginpaandaman sia tuhoy sa makamamatay nga resulta sang pagkaon sang bunga sang gindumili nga kahoy. (Genesis 2:16, 17) Ginpaathag niya kay Adan kon ano ang mangin resulta sang iya pagabuhaton. Ano ang pagahimuon ni Adan?
17. Ngaa makasiling kita nga ginapili lamang ni Jehova kon ano ang iya luyag hibaluon sing abanse?
17 Maathag nga wala gintan-aw ni Jehova sing abanse kon ano ang pagahimuon ni Adan kag ni Eva, bisan pa may ikasarang Sia nga makita sing abanse ang tanan nga butang. Busa, indi ini isa ka hulusayon kon bala sarang ni Jehova makita ang palaabuton, kundi kon mamat-od bala sia nga hibaluon ini. Dugang pa, bangod si Jehova isa ka Dios sang gugma, makasiling kita nga wala niya ginhibalo sing abanse kag mapintas nga gintalana yadtong pagrebelde—upod ang tanan nga masubo nga mga resulta sini. (Mateo 7:11; 1 Juan 4:8) Busa, ginapili lamang ni Jehova kon ano ang iya luyag hibaluon sing abanse.
18. Ngaa ang indi bug-os nga paggamit ni Jehova sang iya ikasarang sa paghibalo sing abanse wala nagapakita sing pagkadihimpit sa iya bahin?
18 Bangod ginapili lamang ni Jehova ang iya luyag hibaluon sing abanse makasiling bala kita nga may kakulangan sia kag di-himpit? Indi. Ginlaragway ni Moises si Jehova subong “ang Igang,” kag nagsiling pa: “Himpit ang iya binuhatan.” Indi sia ang balasulon sa mga resulta sang sala sang tawo. Ang malaglagon nga resulta nga naeksperiensiahan naton tanan sa karon naghalin sa di-matarong nga paglalis ni Adan. Maathag nga nangatarungan si apostol Pablo nga “paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.”—Deuteronomio 32:4, 5; Roma 5:12; Jeremias 10:23.
19. Ano nga mga pamangkot ang pagabinagbinagon sa masunod nga artikulo?
19 Suno sa nabinagbinag na naton, nakita naton nga wala sing pagkadimatarong kay Jehova. (Salmo 33:5) Sa baylo, ang mga ikasarang, moral nga mga kinaiya, kag mga talaksan ni Jehova ginagamit niya nahisanto sa iya katuyuan. (Roma 8:28) Subong Dios sang tagna, si Jehova nagasugid “sang katapusan kutob sa ginsuguran, kag sang mga butang nga wala pa mahimo kutob sang madugay na nga tion.” (Isaias 46:9, 10) Nakita man naton nga ginapili lamang niya ang iya luyag hibaluon sing abanse. Busa, paano ini nagaapektar sa aton? Paano naton mapat-od nga ang aton mga desisyon nagahisanto sa mahigugmaon nga katuyuan sang Dios? Kag ano nga mga padya ang maagom naton sa paghimo sini? Binagbinagon sang masunod nga artikulo ining mga pamangkot.
[Nota]
a Tan-awa ang brosyur nga Isa ka Libro Para sa Tanan nga Tawo, pahina 28, nga ginabalhag sang mga Saksi ni Jehova.
Mapaathag Mo Bala?
• Anong mga halimbawa sang una ang nagapamatuod nga ang “pulong” sang Dios “pat-od nga magamadinalag-on” pirme?
• Ano ang gintalana ni Jehova may kaangtanan sa iya “dayon nga katuyuan”?
• Sa anong paagi ginagamit ni Jehova ang iya ikasarang sa paghibalo sing abanse?
[Retrato sa pahina 22]
Si Jehosapat nagsalig kay Jehova
[Retrato sa pahina 23]
Gintagna sang Dios ang kamatayon kag pagkabanhaw ni Jesus
[Retrato sa pahina 24]
Gintalana bala ni Jehova kon ano ang pagahimuon ni Adan kag ni Eva?