Ang Dios Walay Ginapasulabi

“Ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”​—⁠BINUHATAN 10:​34, 35.

1. Sa dumaan nga Atenas, anong importante nga pinamulong ang ginpamulong ni Pablo nahanungod sa rasa?

“ANG Dios nga naghimo sang kalibutan kag sang tanan nga butang nga yara sa sini, sanglit sia Ginuo sang Langit kag duta, wala nagapuyo sa mga templo nga ginhimo sang tawo . . . Gikan sa isa ka katigulangan ginhimo niya ang tagsa ka rasa sang mga tawo sa pagpuyo sa bug-os nga nawong sang duta.” (Binuhatan 17:​24-26, Phillips) Sin-o ang nagpamulong sinang mga pulong? Ang Cristianong si apostol Pablo, sa iya bantog nga pamulongpulong sa Mars’ Hill, ukon sa Areopago, sa Atenas, Gresya.

2. Ano ang nagabulig sa paghimo sang kabuhi nga maduagon kag makawiwili, kag sa ano nahamuot ang isa ka Hapones nga bisita sa South Africa?

² Ang pinamulong ni Pablo magapahunahuna sa aton nahanungod sa kalatingalahan nga pagkananuhaytuhay nga makita sa pagpanuga. Gintuga ni Jehova nga Dios ang mga tawo, mga sapat, mga pispis, mga insekto, kag mga tanum nga may tuman kadamo nga sari. Daw ano ka makatalaka kuntani ang kabuhi kon sila tanan palareho! Ang ila pagkananuhaytuhay nagabulig sa paghimo sa kabuhi nga maduagon kag makawiwili. Halimbawa, ang isa ka bisita gikan sa Japan nga nagtambong sa kombension sang mga Saksi ni Jehova sa South Africa nahamuot sa pagkananuhaytuhay sa rasa kag duag nga nakita niya didto. Nagkomento sia nga tuhay gid ini katama sa Japan, diin ang kalabanan may palareho nga karakteristiko sa rasa.

3. Paano ginatamod sang iban ang lain nga duag sa panit, nga nagadugang sa ano?

³ Apang ang pagkananuhaytuhay sa duag sa tunga sang mga rasa masunson nga nagatuga sing dalagku nga mga problema. Ginakabig sang madamo yadtong tuhay sing duag ang panit nga manubo. Ginadugangan sini ang kaawayon, bisan ang pagdumot kag pag-antos sa pagkamaynadampigan sa rasa. Gintuyo bala ini sang aton Manunuga? Ang iban bala nga rasa superyor sa iya itololok? May ginapasulabi bala si Jehova?

Ang Aton Manunuga​—⁠May Ginapasulabi Bala?

4-6. (a) Ano ang ginsiling ni Hari Josafat nahanungod sa pagkamay ginapasulabi? (b) Paano ginlig-on ni Moises kag ni Pablo ang pinamulong ni Josafat? (c) Anong mga pamangkot ang mahimo nga ipautwas sang iban?

⁴ Matigayon naton ang pila ka ideya tuhoy sa pagtamod sang aton Manunuga sa tanan nga katawhan paagi sa pag-asoy pabalik sa maragtas. Si Hari Josafat, nga naggahom sa Juda kutob sang 936 tubtob 911 B.C.E., naghimo sing madamong pag-uswag kag nag-areglo sing nagakaigo nga pagpanghikot sang hudisyal nga sistema pasad sa balaan nga kasuguan. Ginhatag niya ining maayong laygay sa mga hukom: “Talupangda ang inyo ginahimo, kay wala kamo nagahukom tungod sa tawo kundi tungod kay Jehova . . . Mag-andam kag maghimo sini, kay wala sing kalautan si Jehova nga aton Dios ukon pagpasulabi.”​—⁠2 Cronica 19:​6, 7.

⁵ Mga ginatos ka tuig sang una, si manalagna Moises nagsiling sa mga tribo sang Israel: “Si Jehova nga inyo Dios . . . walay pinilian.” (Deuteronomio 10:17) Kag sa iya sulat sa mga taga-Roma, si Pablo naglaygay: “May kangitngitan kag kasakit sa tagsa ka kalag nga nagabuhat sing malaut, sa Judiyo sing una kag sa Griego man . . . Kay ang Dios wala sing paborito.”​—⁠Roma 2:​9-11, The New English Bible.

⁶ Apang ang iban mahimo magapamangkot: ‘Kamusta ang mga Israelinhon? Indi bala nga sila ang pinili nga katawhan sang Dios? Indi bala nga ginpasulabi niya sila? Wala bala magsiling si Moises sa bug-os nga Israel: “Si Jehova nga imo Dios nagpili sa imo nga mangin iya katawhan nga kaugalingon, labaw sa tanan nga katawhan nga yara sa kadaygan sang duta”?’​—⁠Deuteronomio 7:⁠6.

7. (a) Ano ang nagresulta sang ginsikway sang mga Judiyo ang Mesias? (b) Karon, sin-o ang nagaagom sing makatilingala nga mga pagpakamaayo gikan sa Dios, kag paano?

⁷ Indi, ang Dios wala sing ginapasulabi sang gingamit ang mga Israelinhon para sa pinasahi nga katuyuan. Sang ginpili ang katawhan nga paagi sa ila magahalin ang Mesias, ginpili ni Jehova ang kaliwatan sang matutom nga Hebreong mga patriarka. Apang sang ginsikway sang mga Judiyo ang Mesias, si Jesucristo, kag ginpapatay sia, nawasi nila ang kahamuot sang Dios. Apang, sa karon, yadtong naghalin sa bisan anong rasa ukon pungsod nga nagatuo kay Jesus sarang makaagom sing makatilingala nga mga pagpakamaayo kag makatigayon sing paglaum nga kabuhi nga walay katapusan. (Juan 3:16; 17:⁠3) Sa pagkamatuod, nagapamatuod ini nga ang Dios walay ginapasulabi. Dugang pa, si Jehova nagsugo sa mga Israelinhon nga ‘higugmaon ang manlulugayaw’ kag “dili maghimo sing pagkadimatarong sa iya,” bisan ano man ang iya rasa ukon nasyonalidad. (Deuteronomio 10:19; Levitico 19:​33, 34) Sa pagkamatuod, nian, ang aton hinigugma nga Amay nga yara sa langit wala sing ginapasulabi.

8. (a) Ano ang pamatuod nga si Jehova wala magpakita sing paboritismo sa Israel? (b) Paano gingamit ni Jehova ang Israel?

⁸ Matuod nga ang mga Israelinhon nag-agom sing pinasahi nga mga pribilehiyo. Apang may mabug-at man sila nga responsabilidad. Obligado sila sa pagtuman sa mga kasuguan ni Jehova, kag yadtong wala nagatuman sini ginapakamalaut. (Deuteronomio 27:26) Sa katunayan, ang mga Israelinhon sulitsulit nga ginsilutan bangod sang paglapas sa Kasuguan sang Dios. Busa, wala sila gintratar ni Jehova nga may paboritismo. Sa baylo, gingamit niya sila sa paghimo sing matagnaon nga mga sulundan kag sa paghatag sing nagapaandam nga mga halimbawa. Sing malipayon, paagi sa Israel nga ang Dios nagpatubas sing Manunubos, si Jesucristo, para pakamaayuhon ang tanan nga katawhan.​—⁠Galacia 3:14; ipaanggid ang Genesis 22:​15-18.

May Ginpasulabi Bala si Jesus?

9. (a) Paano magkapareho si Jehova kag si Jesus? (b) Anong mga pamangkot ang nagautwas nahanungod kay Jesus?

⁹ Bangod wala sing ginpasulabi si Jehova, mahimo bala nga may ginpasulabi si Jesus? Bueno, binagbinaga ini: Si Jesus nagsiling anay: “Wala ako nagatinguha sang akon kaugalingon nga kabubut-on, kundi sang kabubut-on sang nagpadala sa akon.” (Juan 5:30) Ang himpit nga paghiusa nagaluntad sa ulot ni Jehova kag sang iya hinigugma nga Anak, kag ginhimo ni Jesus ang kabubut-on sang iya Amay sa tanan nga bahin. Sa katunayan, pareho sila sing pagtamod kag katuyuan sa bagay nga si Jesus nakasiling: “Ang nakakita sa akon nakakita sa Amay.” (Juan 14:⁠9) Sa sulod sang kapin sa 33 ka tuig, aktuwal nga naeksperiensiahan ni Jesus ang magkabuhi subong tawo sa duta, kag ginapakita sang Biblia kon paano niya gintratar ang iya isigkatawo. Ano ang panimuot niya sa iban nga rasa? May gindampigan bala sia ukon ginpasulabi? May ginpasulabi bala nga rasa si Jesus?

10. (a) Paano ginsabat ni Jesus ang pagpangabay sing bulig sang taga-Fenicia nga babayi? (b) Paagi sa pagtawag sa mga Gentil nga “diutay nga mga ido,” nagpakita bala si Jesus sing pagkamaynadampigan? (c) Paano gindaug sang babayi ang pagdumili, kag upod ang anong resulta?

¹⁰ Ginhinguyang ni Jesus ang kalabanan sang iya dutan-on nga kabuhi kaupod sa mga Judiyo. Apang isa ka adlaw ginpalapitan sia sang isa ka taga-Fenicia nga babayi, isa ka Gentil, nga nagpakitluoy sa iya nga ayuhon niya ang iya anak nga babayi. Bilang sabat si Jesus nagsiling: “Ako ginpadala lamang sa mga karnero nga nadula sang panimalay sang Israel.” Apang, ang babayi nagpangabay: “Ginuo, tabangi ako!” Bangod sina, nagsabat sia: “Indi nagakaigo nga pagkuhaon ang tinapay sang mga anak kag ipilak sa diutay nga mga ido.” Para sa mga Judiyo, ang mga ido dimatinlo nga mga sapat. Gani paagi sa pagtawag sa mga Gentil subong “diutay nga mga ido,” ginpakita bala ni Jesus ang pagkamaynadampigan? Wala, kay bag-o lang niya ginsiling ang iya pinasahi nga komisyon gikan sa Dios sa pagtatap sa ‘karnero nga nadula sang Israel.’ Dugang pa, paagi sa pagpaanggid sa mga indi Judiyo sa “diutay nga mga ido,” indi sa mga ido nga talunon, ginpahumok ni Jesus ang pagpaanggid. Sa pagkamatuod, ang ginsiling nagtilaw sa babayi. Sing mapainubuson, apang determinado sa pagdaug sini nga pagpamatok, ang babayi mataktikanhon nga nagsabat: “Matuod, Ginuo; walay sapayan ang mga ido nagakaon sang mga usik nga nagakahulog sa latok sang ila mga agalon.” Nahamuot sa pagtuo sang babayi, gin-ayo ni Jesus ang iya anak nga babayi sa gilayon.​—⁠Mateo 15:​22-28.

11. Subong sang ginlaragway sa hitabo nga nagahilabot kay Jesus, ano ang panimuot sang mga Judiyo kag mga Samariahanon sa isa kag isa?

¹¹ Binagbinaga man ang mga pagpakig-atubang ni Jesus sa pila ka mga Samariahanon. May daku nga kaawayon sa tunga sang mga Judiyo kag mga Samariahanon. Sang isa ka okasyon, si Jesus nagpadala sing mga mensahero sa paghimo sing mga paghanda para sa iya sa isa ka Samariahanon nga minuro. Apang mga Samariahanon “wala magbaton sa iya, bangod ang iya nawong nagapadulong pa Jerusalem.” Naakig sa sini si Santiago kag si Juan tubtob sa punto nga luyag nila magsugo nga manaug ang kalayo gikan sa langit kag sunugon sila. Apang ginsabdong ni Jesus ang duha ka disipulo, kag tanan sila nagkadto sa isa pa ka minuro.​—⁠Lucas 9:​51-56.

12. Ngaa nakibot ang isa ka babaying Samariahanon sa pangabay ni Jesus?

¹² Nagbatyag man bala si Jesus sing kaawayon nga nagaluntad sa tunga sang mga Judiyo kag mga Samariahanon? Ti, talupangda kon ano ang natabo sa isa pa ka okasyon. Si Jesus kag ang iya mga disipulo manugpakadto sa Galilea halin sa Juda kag dapat sila mag-agi sa Samaria. Bangod sang kakapoy sa paglakbay, si Jesus naglingkod sa tupad sang bubon ni Jacob agod magpahuway samtang ang iya mga disipulo nagkadto sa siudad sang Sicar sa pagbakal sing pagkaon. Samtang, ang isa ka babaying Samariahanon nagkari sa pagsag-ub sing tubig. Kag, sa isa pa ka okasyon ginklase mismo ni Jesus ang mga Samariahanon subong “gikan sa iban nga rasa.” (Lucas 17:​16-18, The Kingdom Interlinear Translation of the Greek Scriptures) Apang nagsiling sia sa iya: “Paimna ako.” Bangod ang mga Judiyo wala nagapakig-angot sa mga Samariahanon, ang nakibot nga babayi nagsabat: “Paano bala nga ikaw, nga Judiyo, nagapangayo sa akon nga mainom, nga ako isa ka babaying Samariahanon?”​—⁠Juan 4:​1-9.

13. (a) Paano ginsabat ni Jesus ang pagdumili sang babaying Samariahanon, kag ano ang reaksion niya? (b) Ano ang ulihi nga resulta?

¹³ Apang wala pagsapaka ni Jesus ang pagpamatok sang babayi. Sa baylo, ginhimuslan niya ang kahigayunan sa pagpanaksi sa iya, nagpakilala pa gani nga sia amo ang Mesias! (Juan 4:​10-26) Ginbilin sang natingala nga babayi ang iya tibud sa bubon, nagdalagan pabalik sa siudad, kag nagsugid sa iban kon ano ang natabo. Bisan pa imoral ang iya kabuhi, ginpakita niya ang iya interes sa espirituwal nga mga butang paagi sa pagpamangkot: “Amo ayhan ini ang Cristo?” Ano ang ulihi nga resulta? Madamo sang lokal nga katawhan ang nagtuo kay Jesus bangod sang maayong pagpanaksi sang babayi. (Juan 4:​27-42) Sing makawiwili, sa iya libro nga A Biblical Perspective on the Race Problem, ang Kongregasyonal nga teologo nga si Thomas O. Figart nagkomento sini: “Kon ang aton Ginuo naghunahuna nga importante katama ang pag-ilis sang liw-as nga tradisyon sa rasa sing maayo nga buhat, nian dapat kita magsunod agod nga indi kita paglamunon sang suba sang rasismo karon.”

14. Ano ang pamatuod sang pagpadayag sang pagkawalay ginapasulabi ni Jehova sa ministeryo ni Felipe nga ebanghelisador?

¹⁴ Ang pagkawalay ginapasulabi ni Jehova nga Dios nagpahanugot sa katawhan sang lainlain nga rasa nga mangin Judiyong mga proselita. Binagbinaga man kon ano ang natabo sang nagligad nga 19 ka siglo sa desyerto nga dalan sa ulot sang Jerusalem kag Gaza. Isa ka itom nga tawo nga nagaalagad sa reyna sang Etiopia ang nagasakay sa iya kangga samtang nagabasa sang tagna ni Isaias. Ini nga opisyal isa ka sirkunsidado nga proselita, kay “nagkadto sia sa Jerusalem sa pagsimba.” Ang anghel ni Jehova nagpakita sa Judiyong ebanghelisador nga si Felipe kag ginsilingan sia: “Palapit ka kag magbuylog sa sining kangga.” Nagsiling bala si Felipe: “Abaw, indi! Isa sia ka tawo nga tuhay sing rasa”? Wala! Ti, si Felipe nalipay sa pagbaton sa pangagda sang taga-Etiopia nga tawo nga magsakay sa kangga, maglingkod upod sa iya, kag magpaathag sang tagna ni Isaias nahanungod kay Jesucristo! Sang nag-abot sila sa tubig, ang taga-Etiopia nga tawo nagsiling: “Ano bala ang nagasablag sa akon sa pagpabawtismo?” Bangod wala sing nagasablag sa sini, malipayon nga ginbawtismuhan ni Felipe ang taga-Etiopia nga tawo, kag ginbaton ni Jehova inang malipayon nga tawo subong hinaplas nga sumulunod sang Iya wala sing ginapasulabi nga Anak, si Jesucristo. (Binuhatan 8:​26-39) Apang ang dugang nga pamatuod sang pagkawala sing ginapasulabi sang Dios ipadayag sa dili madugay.

Isa ka Daku nga Pagbalhin

15. Ano nga pagbalhin ang natabo sa tapos mapatay si Jesus, kag paano ini ginpaathag ni Pablo?

¹⁵ Ang kamatayon ni Jesus wala magdula sa pagkamay nadampigan sa rasa sang kalibutan. Apang paagi sinang mahalaron nga kamatayon, ginbalhin sang Dios ang kaangtanan sang Judiyong mga disipulo ni Jesus sa iya Gentil nga mga sumulunod. Ginpakita ini ni apostol Pablo sang magsulat sia sa Gentil nga mga Cristiano sa Efeso kag nagsiling: “Dumduma ninyo nga kamo anay nga mga Gentil sa kinaugali; . . . nga sa sadtong tion nahamulag kamo kay Cristo, ginpahilayo gikan sa karabatanan sang Israel kag mga dumuluong sa mga katipan sang saad, kag nga walay paglaum kag walay Dios sa kalibutan. Apang karon kay Cristo Jesus kamo nga anay malayo ginpapalapit sa dugo ni Cristo. Kay sia amo ang aton paghidait, nga nag-isa sang duta, kag nagguba sang dingding sang kaawayon nga nagaulot.” Ina nga “dingding,” ukon simbulo sang pagkanahamulag, amo ang kahimusan sang katipan sang Kasuguan nga nagpanghikot subong dingding sa ulot sang mga Judiyo kag mga Gentil. Gindula ini sa sadsaran sang kamatayon ni Cristo agod nga paagi sa iya ang mga Judiyo kag mga Gentil “makapalapit sa Amay sa isa ka espiritu.”​—⁠Efeso 2:​11-18.

16. (a) Ngaa ginhatagan si Pedro sing mga yabi sang Ginharian? (b) Pila ka bilog ang yabi, kag ano ang nagresulta sang gingamit ini?

¹⁶ Dugang pa, si apostol Pedro ginhatagan sing “mga yabi sang ginharian sa mga langit” agod ang katawhan sang bisan ano nga rasa makahibalo nahanungod sa mga katuyuan sang Dios, mangin “matawo liwat” gikan sa balaan nga espiritu, kag mangin espirituwal nga mga manunubli kaupod ni Cristo. (Mateo 16:19; Juan 3:​1-8) Gingamit ni Pedro ang tatlo ka simbuliko nga yabi. Ang una amo ang para sa mga Judiyo, ang ikaduha para sa mga Samariahanon, kag ang ikatlo para sa mga Gentil. (Binuhatan 2:​14-42; 8:​14-17; 10:​24-28, 42-48) Busa ang walay ginapasulabi nga Dios, si Jehova, nagbukas sa mga pinili sang tanan nga rasa sang pribilehiyo nga mangin espirituwal nga mga kauturan ni Jesus kag mga masigka manunubli sang Ginharian.​—⁠Roma 8:​16, 17; 1 Pedro 2:​9, 10.

17. (a) Anong dikinaandan nga palanan-awon ang ginhatag kay Pedro, kag ngaa? (b) Kay sin-o puluy-an gindala sang mga tawo si Pedro, kag sin-o ang nagahulat sa iya didto? (c) Ano ang ginpahanumdom ni Pedro sa sadtong mga Gentil, apang ano ang maathag nga gintudlo sang Dios sa iya?

¹⁷ Agod ihanda si Pedro sa paggamit sa ikatlo nga yabi​—⁠para sa mga Gentil​—⁠ginhatagan sia sing dikinaandan nga palanan-awon nahanungod sa dimatinlo nga mga sapat kag ginsilingan: “Tindog ka, Pedro, mag-ihaw kag magkaon!” Ang leksion amo: “Ang natinloan sang Dios dili mo pagkabigon nga nadagtaan.” (Binuhatan 10:​9-16) Naligban sing daku si Pedro nahanungod sa kahulugan sang palanan-awon. Apang sang ulihi nag-abot ang tatlo ka lalaki sa pagdala sa iya sa puluy-an ni Cornelio, ang Romanong opisyal sa hangaway nga natangdo sa Caesaria. Bangod kay ina nga siudad amo ang daku nga ulong-talatapan sang Romanong mga hangaway sa Judea, amo ini ang kinaugali nga lugar para puy-an ni Cornelio. Nagahulat kay Pedro sa sinang Gentil nga lugar amo si Cornelio, kaupod sang iya mga paryente kag suod nga mga abyan. Ginpahanumdom sila sang apostol: “Kamo gid nakahibalo nga indi tugut sa isa ka Judiyo ang pagpakig-impon ukon pagpalapit sa isa nga dumuluong; apang ang Dios nagpakita sa akon nga walay tawo nga pagtawgon ko nga nadagtaan ukon dimatinlo. Gani nagkari ako, sa walay paglalis, sang ginpakadtuan ako.”​—⁠Binuhatan 10:​17-29.

18. (a) Anong importante nga pahibalo ang ginhimo ni Pedro kay Cornelio kag sa iya mga bisita? (b) Sa tapos makapanaksi si Pedro nahanungod kay Jesus, anong dramatiko nga hitabo ang natabo? (c) Nian ano nga tikang ang ginhimo may kahilabtanan sa mga nagtuluo nga mga Gentil?

¹⁸ Sa tapos mapaathag ni Cornelio ang pagtuytoy sang Dios sa mga bagay, si Pedro nagsiling: “Matuod gid ginahantop ko nga ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.” (Binuhatan 10:​30-35) Nian, samtang ang apostol nagpadayon sa paghatag sing panaksi nahanungod kay Jesucristo, may butang nga dramatiko ang natabo! “Sang nagahambal pa si Pedro sa sini ang balaan nga espiritu nahulog sa ila tanan nga nagpamati sang pulong.” Ang Judiyong kaupdanan ni Pedro “naorongan, bangod nga sa katawhan sang mga pungsod man ginpasagahay ang hiyas sang balaan nga espiritu. Kay ginpamatian nila nga nagapamulong sila sing mga hambal kag nagapakadaku sang Dios.” Si Pedro nagsabat: “May tawo bala nga makadumili sang tubig agod nga indi pagbawtismuhan ini sila nga nakabaton sang balaan nga espiritu subong sa aton?” Sin-o ang makapamatok, kay ang balaan nga espiritu sang walay ginapasulabi nga Dios sang langit ginpasagahay sa mga nagtuluo nga mga Gentil? Busa, si Pedro nagmando nga “bawtismuhan sila sa ngalan ni Jesucristo.”​—⁠Binuhatan 10:​36-48.

“Gikan sa Tagsa ka Pungsod”

19. Ngaa nagadugang ang kaawayon sa rasa, kag tubtob diin?

¹⁹ Yari kita karon sa “katapusan nga mga adlaw,” kag ang “ital-ital nga mga tion nga mabudlay atubangon” amo ang kamatuoran sang kabuhi. Sa tunga sang iban nga butang, ang katawhan mga mahigugmaon sa kaugalingon, matinaastaason, bugalon, wala sing kinaugali nga pagpalangga, walay pasunaid, dimapinugungon, mabangis, dasodaso, nagahabok sa pagpadayaw. (2 Timoteo 3:​1-5) Sa sinang sosyal nga palibot, indi makatilingala nga ang kaawayon kag binangig sa rasa nagadugang sa bug-os nga kalibutan. Sa madamong pungsod, ang mga tawo sang lainlain nga rasa ukon duag nagatamay ukon nagadinumtanay sa isa kag isa. Nagdul-ong ini sa aktuwal nga pag-inaway kag sa makahaladlok nga kapintas sa iban nga mga pungsod. Bisan sa ginatawag nga nasanagan nga mga katilingban, madamo nga tawo ang nabudlayan sa paglandas sa pagkamaynadampigan sa rasa. Kag ini nga “balatian” daw nagalapnag sa mga duog diin wala gid ini ginapaabot sang isa, subong sang mga pulo sa dagat nga halos huwaran anay sa ila kalinong.

20. (a) Anong inspirado nga palanan-awon ang nakita ni Juan? (b) Tubtob diin natuman ining matagnaon nga palanan-awon? (c) Ano pa nga kabudlayan ang dapat landason sing bug-os sang iban, kag diin dapat sila mangita sing solusyon?

²⁰ Apang, walay sapayan sang kakulang sing paghiusa sa rasa sa lainlain nga bahin sang kalibutan, ang walay ginapasulabi nga Dios, si Jehova, nagtagna sang pagdala sa bunayag sing tagipusuon nga katawhan sang tanan nga rasa kag pungsod sa tumalagsahon nga internasyonal nga paghiusa. Paagi sa balaan nga inspirasyon, nakita ni apostol Juan ang “daku nga kadamuon, nga imposible maisip, sang mga tawo gikan sa tagsa ka pungsod, rasa, tribo kag hambal; nagatindog sila sa atubangan sang trono kag sa atubangan sang Kordero,” nga nagadayaw kay Jehova. (Bugna 7:​9, The Jerusalem Bible) Ini nga tagna may katumanan na. Karon, sa 210 ka kadutaan kapin sa 3,300,000 ka saksi ni Jehova, sang tanan nga pungsod kag rasa, ang nagaagom sing paghiusa kag harmoniya sa rasa. Apang dihimpit gihapon sila. Ang iban sa ila nabudlayan sa paglandas sing bug-os sang pagkamaynadampigan sa rasa, bisan pa nga mahimo wala nila ini mamutiki. Paano malandas ini nga problema? Hambalan naton ini sa masunod nga artikulo, pasad sa mabuligon nga laygay gikan sa inspirado nga Pulong sang wala sing ginapasulabi nga Dios, si Jehova.

Paano Mo Sabton?

◻ Ngaa makasiling ka nga si Jehova wala sing ginapasulabi sang gingamit ang mga Israelinhon?

◻ Ano ang pamatuod nga si Jesucristo wala sing ginadampigan ukon ginapasulabi nga rasa?

◻ Paano ginbuligan si Pedro sa paghangop nga “ang Dios walay ginapasulabi”?

◻ Walay sapayan sang kakulang sing paghiusa sa rasa sa sining kalibutan, anong tagna nga nagapakita sing paghiusa ang mga katumanan karon?

[Laragway sa pahina 10]

Ginsilingan ni apostol Pablo ang mga taga-Atenas nga ang Dios “naghimo sa tagsa ka rasa sang mga tawo sa pagpuyo sa bug-os nga nawong sang duta”

[Laragway sa pahina 12]

Bangod walay ginapasulabi si Jesus, nagpanaksi sia sa babaying Samariahanon sa bubon ni Jacob malapit sa Sicar