Ang Lamang nga Dalan Padulong sa Kabuhi nga Walay Katapusan
“Ako amo ang dalan kag ang kamatuoran kag ang kabuhi.”—JUAN 14:6.
1, 2. Sa ano ginpaanggid ni Jesus ang dalan padulong sa kabuhi nga walay katapusan, kag ano ang kahulugan sini nga ilustrasyon?
SA IYA bantog nga Sermon sa Bukid, ginpaanggid ni Jesus ang dalan padulong sa kabuhi nga walay katapusan sa isa ka dalan nga may gawang nga ginasudlan sang isa ka tawo. Talupangda nga ginpadaku ni Jesus nga ining dalan padulong sa kabuhi indi mahapos, nga nagasiling: “Magsulod kamo sa makitid nga gawang; bangod masangkad kag malapad ang dalan nga nagapadulong sa kalaglagan, kag madamo ang nagasulod sa sini; samtang makitid ang gawang kag masipot ang dalan nga nagapadulong sa kabuhi [nga walay katapusan], kag pila lamang ang mga nakatultol sini.”—Mateo 7:13, 14.
2 Nahangpan bala ninyo ining ilustrasyon? Wala bala sini ginapakita nga isa lamang ang dalan, ukon alagyan, padulong sa kabuhi kag nga dapat kita manikasog agod indi mapahilayo sa sining dalan padulong sa kabuhi? Ano, nian, ining lamang nga dalan padulong sa kabuhi nga walay katapusan?
Ang Papel ni Jesucristo
3, 4. (a) Paano ginapakita sang Biblia ang importante nga papel ni Jesus sa aton kaluwasan? (b) San-o una nga ginpahayag sang Dios nga ang katawhan makatigayon sing kabuhi nga walay katapusan?
3 Sing maathag, si Jesus may importante nga papel sa sini nga dalan, kay ang iya apostol nga si Pedro nagsiling: “Wala sing kaluwasan sa bisan kay sin-o nga iban, kay wala sing iban nga ngalan [luwas kay Jesus] sa idalom sang langit nga ginhatag sa mga tawo nga paagi sa iya kinahanglan kita maluwas.” (Binuhatan 4:12) Si apostol Pablo nagsiling man: “Ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Ginpakita mismo ni Jesus nga ang lamang nga dalan padulong sa kabuhi nga walay katapusan amo ang paagi sa iya, kay sia nagsiling: “Ako amo ang dalan kag ang kamatuoran kag ang kabuhi.”—Juan 14:6.
4 Gani importante gid nga kilalahon naton ang papel ni Jesus sa paghimo sang kabuhi nga walay katapusan nga posible. Busa, usisaon naton sing maayo pa ang iya papel. Nahibaluan bala ninyo kon san-o, sang makasala na si Adan, ginpahibalo ni Jehova nga Dios nga ang katawhan makatigayon sing kabuhi nga walay katapusan? Pagkatapos gid nga nakasala si Adan. Usisaon naton karon kon paano una nga gintagna ang pag-aman kay Jesucristo subong Manluluwas sang katawhan.
Ang Ginsaad nga Binhi
5. Paano naton makilal-an ang man-ug nga nagsulay kay Eva?
5 Ginpakilala ni Jehova nga Dios sa simbuliko nga pinamulong ang ginsaad nga Manluluwas. Ginhimo niya ini sang ginhatag niya ang pamatbat sa “man-ug” nga nakighambal kay Eva kag nagsulay sa iya nga lalison ang Dios paagi sa pagkaon sa ginadumilian nga bunga. (Genesis 3:1-5) Sa pagkamatuod, yadto nga man-ug indi literal. Isa ini ka gamhanan nga espiritu nga tinuga nga ginpakilala sa Biblia subong ang “una nga man-ug, ang isa nga ginatawag Yawa kag Satanas.” (Bugna 12:9) Gingamit ni Satanas ining kubos nga sapat subong iya humalambal sa paghaylo kay Eva. Busa, sa pagpamatbat kay Satanas, ang Dios nagsiling sa iya: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya [binhi sang babayi] sa ulo kag dugmukon mo sia sa tikod.”—Genesis 3:15.
6, 7. (a) Sin-o ang babayi nga nagpanganak sang “binhi”? (b) Sin-o ang ginsaad nga Binhi, kag ano ang ginhimo niya?
6 Sin-o ining “babayi” nga ginakontra, ukon ginadumtan, ni Satanas? Subong nga ang “una nga man-ug” ginapakilala sa Bugna kapitulo 12, amo man ining babayi nga ginadumtan ni Satanas. Talupangda sa bersikulo 1 nga sia ginasiling nga “napanaptan sing adlaw, nagatindog sa bulan, kag may napulog-duha ka bituon sa iya ulo.” Ining babayi nagalaragway sa iya sang Dios langitnon nga organisasyon sang matutom nga mga anghel, kag ang “bata nga lalaki” nga ibun-ag niya nagalaragway sa Ginharian sang Dios, kag si Jesucristo ang nagagahom nga Hari.—Bugna 12:1-5, The Jerusalem Bible.
7 Busa, sin-o ang “binhi,” ukon kaliwat, sang babayi, nga ginsambit sa Genesis 3:15, nga magadugmok kay Satanas “sa ulo,” nga ikamatay niya? Amo ang isa nga ginpadala sang Dios gikan sa langit agod matawo sing milagruso sa isa ka ulay, huo, amo ang tawo nga si Jesus. (Mateo 1:18-23; Juan 6:38) Ginapahayag sang Bugna kapitulo 12 nga subong binanhaw nga langitnon nga Manuggahom, ining Binhi, nga si Jesucristo, manguna sa paglutos kay Satanas kag magatukod, subong sa ginasiling sang Bugna 12:10, ‘sang ginharian sang aton Dios kag sang awtoridad sang iya Cristo.’
8. (a) Anong bag-o nga butang ang gin-aman sang Dios may kaangtanan sa iya orihinal nga katuyuan? (b) Sin-o ang katapo sang bag-ong panguluhan sang Dios?
8 Busa, ining Ginharian sa mga kamot ni Jesucristo amo ang isa ka bag-o nga butang nga gin-aman sang Dios may kaangtanan sa iya orihinal nga katuyuan nga ang katawhan makaagom sing kabuhi nga walay katapusan sa duta. Sang magrebelde si Satanas, gilayon nga naghulag si Jehova agod dulaon ang tanan nga malain nga resulta sang kalautan paagi sa sining bag-o nga panguluhan sang Ginharian. Sang yari sa duta ginpahayag ni Jesus nga indi sia isahanon nga magagahom sa sining panguluhan. (Lucas 22:28-30) May pila nga pilion sa katawhan, kag magahari sila upod sa iya sa langit, kag sa amo mangin ikaduha sila nga bahin sang binhi sang babayi. (Galacia 3:16, 29) Sa Biblia ang kadamuon sining magahari upod kay Jesus—tanan kuhaon gikan sa makasasala nga katawhan sa duta—ginasambit nga 144,000.—Bugna 14:1-3.
9. (a) Ngaa nagkabuhi si Jesus sa duta subong isa ka tawo? (b) Paano gindula ni Jesus ang mga binuhatan sang Yawa?
9 Apang, antes maggahom ina nga Ginharian, importante nga ang panguna nga bahin sang binhi, si Jesucristo, magkari sa duta. Ngaa? Bangod gintangdo sia ni Jehova nga Dios subong ang Isa nga ‘magalaglag [ukon, magadula] sa mga binuhatan sang Yawa.’ (1 Juan 3:8) Lakip sa mga binuhatan ni Satanas amo ang paghaylo niya kay Adan nga magpakasala, nga nagdala sing silot nga sala kag kamatayon sa tanan nga kaliwat ni Adan. (Roma 5:12) Gindula ni Jesus ini nga binuhatan sang Yawa paagi sa paghatag sang Iya kabuhi subong isa ka gawad. Sa amo naghatag sia sing sadsaran agod ang katawhan mahilway gikan sa silot nga sala kag kamatayon kag nabuksan ang dalan padulong sa kabuhi nga walay katapusan.—Mateo 20:28; Roma 3:24; Efeso 1:7.
Kon Ano ang Mahimo sang Gawad
10. Paano magkaanggid sanday Jesus kag Adan?
10 Sanglit ang kabuhi ni Jesus ginsaylo gikan sa langit padulong sa taguangkan sang isa ka babayi, nabun-ag sia nga himpit nga tawo, nga wala madagtaan sang sala ni Adan. May ikasarang sia nga mabuhi sing dayon sa duta. Sing kaanggid, gintuga si Adan subong isa ka himpit nga tawo nga may paglaum nga mabuhi sing dayon sa duta. Ginahunahuna ni apostol Pablo ang pagkaanggid sa ulot sining duha ka tawo sang nagsulat sia: “‘Ang una nga tawo nga si Adan nangin isa ka buhi nga kalag.’ Ang katapusan nga Adan [si Jesucristo] nangin isa ka espiritu nga nagahatag sing kabuhi. Ang una nga tawo gikan sa duta kag human sa yab-ok; ang ikaduha nga tawo gikan sa langit.”—1 Corinto 15:45,47.
11. (a) Ano ang epekto ni Adan kag ni Jesus sa katawhan? (b) Paano naton dapat tamdon ang halad ni Jesus?
11 Ang pagkaanggid sa ulot sining duha—ang lamang duha ka himpit nga tawo nga nabuhi sa duta—ginapatalupangod man sang ginasiling sang Biblia nga ‘ginhatag [ni Jesus] ang iya kaugalingon subong katumbas nga gawad para sa tanan.’ (1 Timoteo 2:6) Sin-o ang gintumbasan ni Jesus? Ti, si Adan sang himpit pa sia! Ang sala sang una nga Adan nagresulta sa silot nga kamatayon sa bug-os nga pamilya sang tawo. Ang halad sang “katapusan nga Adan” naghatag sing sadsaran para sa kahilwayan gikan sa sala kag kamatayon, agod nga mahimo kita mabuhi sing dayon. Daw ano ka hamili ang halad ni Jesus! Si apostol Pedro nagsiling: “Indi paagi sa madinulunton nga mga butang, paagi sa pilak ukon bulawan, nga ginluwas kamo.” Sa baylo, si Pedro nagpaathag: “Paagi sa hamili nga dugo, subong sang kordero nga wala sing kasawayan kag wala sing dagta, kay Cristo mismo.”—1 Pedro 1:18, 19.
12. Paano ginalaragway sang Biblia ang pagdula sa silot sa aton nga kamatayon?
12 Ginalaragway sing matahom sang Biblia kon paano dulaon ang silot nga kamatayon sa pamilya sang tawo, sa pagsiling: “Paagi sa isa ka paglapas [ni Adan] ang resulta sa tanan nga sahi sang tawo amo ang katagudilian, subong man paagi sa isa ka buhat sang pagkamatarong [ang bug-os nga dalanon ni Jesus sang integridad, nga nagdangat sa iya kamatayon] ang resulta sa tanan nga sahi sang tawo amo ang pagpahayag sa ila nga matarong para sa kabuhi. Kay subong nga paagi sa pagkadimatinumanon sang isa ka tawo [Adan] ang madamo ginkabig nga mga makasasala, subong man paagi sa pagkamatinumanon sang isa ka tawo [Jesus] ang madamo pakamatarungon.”—Roma 5:18,19.
Isa ka Makalilipay Gid nga Palaabuton
13. Ngaa madamo ang nagabatyag kaangay sang balatyagon nila tuhoy sa pagkabuhi sing dayon?
13 Dapat gid kita malipay sa sini nga aman sang Dios! Nahamuot gid bala kamo nga may Manluluwas nga gin-aman? Sang ginpamangkot, “Luyag bala ninyo ang paglaum nga mabuhi sing dayon?” sa isa ka surbe nga ginhimo anay sang isa ka pamantalaan sa isa ka daku nga siudad sang Amerika, ang makapakibot nga 67.4 porsiento sang mga ginpamangkot nagsabat sing, “Indi.” Ngaa nagsiling sila nga indi nila luyag mabuhi sing dayon? Mahimo gid nga bangod ang kabuhi karon sa duta madamo sing problema. Ang isa ka tawo nagsiling: “Indi ko luyag makita ang akon kaugalingon nga 200 anyos ang edad.”
14. Ngaa ang pagkabuhi sing dayon makalilipay gid?
14 Apang, ang ginahambal sang Biblia indi ang pagkabuhi sing dayon sa isa ka kalibutan diin ang mga tawo nagabalatian, nagatigulang, kag nagaantos sing iban pa nga mga trahedya. Indi, bangod subong Manuggahom sa Ginharian sang Dios, dulaon ni Jesus ina tanan nga problema nga gintuga ni Satanas. Suno sa Biblia, ‘dugmukon [sang Ginharian sang Dios] kag papason ang tanan’ mapiguson nga panguluhan sining kalibutan. (Daniel 2:44) Sa amo nga tion, subong sabat sa pangamuyo nga gintudlo ni Jesus sa iya mga sumulunod, ang “kabubut-on” sang Dios ‘himuon sa duta subong sang sa langit.’ (Mateo 6:9,10, Today’s English Version) Sa bag-ong kalibutan sang Dios, sa tapos madula ang tanan nga kalautan sa duta, makabenepisyo kita sa gawad ni Jesus. Huo, ipasag-uli sa himpit nga panglawas ang tanan nga kalipikado!
15, 16. Anong mga kahimtangan ang magaluntad sa bag-ong kalibutan sang Dios?
15 Para sa katawhan nga magapuyo sa bag-ong kalibutan sang Dios, ini nga teksto sang Biblia matuman: “Ang iya unod mangin linghod pa sangsa pagkapamatan-on; magabalik sia sa mga adlaw sang iya batan-on nga kapagsik.” (Job 33:25) Ang isa pa ka saad sa Biblia matuman man: “Ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magalumpat subong sang usa, kag ang dila sang apa magaamba sa kalipay.”—Isaias 35:5,6.
16 Hunahunaa lamang: Bisan ano man ang edad naton, 80 man, 800, ukon mas tigulang pa, ang aton lawas magapabilin nga mapagros. Matuman gid ang saad sang Biblia: “Wala sing pumuluyo nga magasiling: ‘Nagamasakit ako.’” Sa amo nga tion matuman man ini nga saad: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Isaias 33:24; Bugna 21:3, 4.
17. Anong mga hinimuan ang mahimo naton mapaabot sa katawhan sa bag-ong kalibutan sang Dios?
17 Sa sinang bag-ong kalibutan, gamiton naton ang aton makatilingala nga utok suno sa katuyuan sang Manunuga sang gindesinyo niya ini nga may ikasarang sa pagtuon sang tanan nga butang. Hunahunaa lamang ninyo ang makatilingala nga mga butang nga mahimo naton! Bisan gani ang dihimpit nga mga tawo nakapatubas gikan sa mga elemento sang duta sing tanan nga butang nga makita naton sa aton palibot—mga cellular phone, mga mikropono, mga relo, mga pager, mga kompyuter, mga eroplano, huo, mahingadlan mo ang iban pa. Ang mga materyales nga gingamit sa sining mga butang wala maghalin sa malayo nga duog sa uniberso. Bangod magakabuhi kita sing dayon sa dutan-on nga Paraiso nga magaabot, wala gid sing katapusan ang mga butang nga mahimo naton!—Isaias 65:21-25.
18. Ngaa ang kabuhi indi gid mangin makatalaka sa bag-ong kalibutan sang Dios?
18 Kag ang kabuhi indi mangin makatalaka. Bisan karon ginakalangkagan naton ang aton masunod nga pagkaon, bisan pa mahimo nga linibo ka beses na kita nga nakakaon. Subong himpit nga tawo, labi pa nga malipay kita sa manamit nga mga patubas sang Paraiso nga duta. (Isaias 25:6) Kag wala sing katubtuban ang aton kalipay sa pag-atipan sa madamo nga sapat sang duta kag sa pagkalipay sa matahom nga mga pagtunod sang adlaw, mga bukid, mga suba, kag mga nalupyakan. Sa pagkamatuod, indi gid mangin makatalaka ang kabuhi sa bag-ong kalibutan sang Dios!—Salmo 145:16.
Pagsunod sa mga Ginapatuman sang Dios
19. Ngaa makatarunganon nga patihan nga may mga dapat himuon agod mabaton ang dulot sang Dios nga kabuhi?
19 Paabuton bala ninyo nga mabaton ang matahom nga dulot sang Dios nga kabuhi nga walay katapusan sa Paraiso nga wala kamo sing bisan ano nga himuon? Makatarunganon bala nga dapat may ipatuman sa aton ang Dios? Huo, sa pagkamatuod. Indi ini subong nga daw ginaitsa lang sang Dios ang regalo sa aton. Ginadaho niya ini sa aton, apang dapat naton ini kab-uton kag kuhaon. Huo, kinahanglan ang panikasog. Mahimo ipamangkot ninyo ang ginpamangkot mismo sang manggaranon lamharon nga manuggahom kay Jesus: “Anong maayo ang dapat ko himuon agod matigayon ang kabuhi nga walay katapusan?” Ukon mahimo nga mamangkot kamo kaangay sang ginpamangkot sang isa ka taga-Filipos nga manugbantay sang bilangguan kay apostol Pablo: “Ano ang dapat ko himuon agod maluwas?”—Mateo 19:16; Binuhatan 16:30.
20. Ano ang kinahanglan nga himuon agod matigayon ang kabuhi nga walay katapusan?
20 Sang gab-i antes sia mapatay, ginpakita ni Jesus ang isa ka sadsaran nga butang nga dapat himuon sang mangamuyo sia sa iya langitnon nga Amay: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Indi bala ini isa ka makatarunganon nga butang nga ginapahimo sa aton nga dapat kita magkuha sing ihibalo tuhoy kay Jehova, nga magahatag sa aton sing kabuhi nga walay katapusan, kag sing ihibalo tuhoy sa isa nga napatay tungod sa aton, si Jesucristo? Apang, labi pa sa pagkuha lamang sini nga ihibalo ang ginakinahanglan.
21. Paano naton mapakita nga ginasunod naton ang ginapatuman sa aton nga magpakita sing pagtuo?
21 Ang Biblia nagasiling man: “Sia nga nagapakita sing pagtuo sa Anak may kabuhi nga walay katapusan.” Nian ini nagadugang: “Sia nga wala nagatuman sa Anak indi makakita sing kabuhi, kundi ang kasingkal sang Dios magapabilin sa iya.” (Juan 3:36) Mapakita ninyo nga may pagtuo kamo sa Anak paagi sa paghimo sing mga pagbag-o sa inyo kabuhi kag sa pagpahisanto sini sa kabubut-on sang Dios. Dapat ninyo sikwayon ang malain nga dalanon nga ayhan ginalaktan ninyo kag maghikot agod himuon ang kalahamut-an sa Dios. Dapat ninyo himuon ang ginsugo ni apostol Pedro: “Busa, hinulsol kamo, kag magliso agod mapanas ang inyo mga sala, agod ang panag-on sang pagpaumpaw mag-abot gikan sa persona ni Jehova.”—Binuhatan 3:19.
22. Anong mga buhat ang nalakip sa pagsunod sa mga tikang ni Jesus?
22 Kabay nga indi gid naton pagkalimtan nga paagi lamang sa pagtuo kay Jesus nga maagom naton ang kabuhi nga walay katapusan. (Juan 6:40; 14:6) Ginapakita naton nga nagatuo kita kay Jesus paagi sa ‘pagsunod sing maayo sa iya mga tikang.’ (1 Pedro 2:21) Ano ang nalakip sa paghimo sina? Ti, sang mangamuyo si Jesus sa Dios, sia nagtuaw: “Yari karon! nagaabot ako sa paghimo sang imo kabubut-on, O Dios.” (Hebreo 10:7) Importante nga ilugon si Jesus sa pag-ugyon nga himuon ang kabubut-on sang Dios kag idedikar ang inyo kabuhi kay Jehova. Pagkatapos sini dapat ninyo simbuluhan ina nga dedikasyon paagi sa pagpabawtismo sa tubig; si Jesus mismo nagpresentar man sang iya kaugalingon para sa bawtismo. (Lucas 3:21, 22) Ang paghimo sina nga mga tikang makatarunganon gid. Si apostol Pablo nagsiling nga “ang gugma ni Cristo nagatiklod sa aton.” (2 Corinto 5:14, 15) Sa anong paagi? Ti, gugma ang nagpahulag kay Jesus nga ihatag ang iya kabuhi tungod sa aton. Indi bala ina dapat magtiklod sa aton nga magtuo kita sa iya? Huo, dapat ini magtiklod sa aton nga sundon ang iya mahigugmaon nga halimbawa sang paghatag sang iya kaugalingon sa pagbulig sa iban. Si Cristo nagkabuhi agod himuon ang kabubut-on sang Dios; dapat man naton ini himuon, nga wala na nagakabuhi para sa aton kaugalingon.
23. (a) Sa ano dapat idugang ang mga makabaton sang kabuhi? (b) Ano ang ginapatuman sa mga yara sa Cristianong kongregasyon?
23 Indi ini ang katapusan sang tanan. Ang Biblia nagasiling nga sang ang 3,000 ginbawtismuhan sang Pentecostes 33 C.E., sila “gindugang.” Gindugang sa ano? “Nagpadayon sila sa paghugod sang ila kaugalingon sa mga panudlo sang mga apostol kag sa pagpaambitay sa isa kag isa,” paathag ni Lucas. (Binuhatan 2:41,42) Huo, nagtipon sila agod tun-an ang Biblia kag makig-upod sa isa kag isa kag sa amo gindugang sila, ukon nangin bahin sila, sang Cristianong kongregasyon. Ang mga Cristiano sang una tayuyon nga nagtambong sa mga miting para sa espirituwal nga instruksion. (Hebreo 10:25) Ginahimo man ini sang mga Saksi ni Jehova karon, kag ginapalig-on nila kamo nga magtambong sa mga miting kaupod nila.
24. Ano ang “matuod nga kabuhi,” kag paano kag san-o ini matuman?
24 Minilyon karon ang nagalakat sa sining masipot nga dalan padulong sa kabuhi. Kinahanglan ang daku nga panikasog agod magpabilin sa sining masipot nga dalan! (Mateo 7:13,14) Ginpakita ini ni apostol Pablo sa iya hanuot nga pangabay: “Makig-away ka sang maayong pagpakig-away sang pagtuo, manguyapot sing malig-on sa kabuhi nga walay katapusan nga para sa sini gintawag ka.” Ang pagpakig-away sini nga inaway kinahanglanon agod ‘makapanguyapot sing hugot sa matuod nga kabuhi.’ (1 Timoteo 6:12,19) Ina nga kabuhi indi ang kabuhi naton karon nga puno sing kasakit kag pag-antos bangod sang pagpakasala ni Adan. Sa baylo, ini amo ang kabuhi sa bag-ong kalibutan sang Dios, nga matuman sa indi madugay kon ang halad nga gawad ni Cristo iaplikar na para sa tanan nga nagahigugma kay Jehova nga Dios kag sa iya Anak kon dulaon na ining sistema sang mga butang. Kabay nga pilion naton tanan ang kabuhi—ang “matuod nga kabuhi”—ang kabuhi nga walay katapusan sa mahimayaon nga bag-ong kalibutan sang Dios.
Paano Mo Sabton?
◻ Sin-o ang man-ug, ang babayi, kag ang binhi sa Genesis 3:15?
◻ Paano si Jesus katumbas ni Adan, kag ano ang ginapaposible sang gawad?
◻ Ano ang imo ginalauman sa bag-ong kalibutan sang Dios nga nagapahalipay gid sa imo?
◻ Anong mga tulumanon ang dapat naton himuon agod magkabuhi sa bag-ong kalibutan sang Dios?
[Laragway sa pahina 10]
Para sa mga bata kag mga tigulang, si Jesus amo ang lamang nga dalan padulong sa kabuhi nga walay katapusan
[Laragway sa pahina 11]
Sa gintalana nga tion sang Dios, ang mga tigulang magabatan-on liwat