Ang Pagtamod sang Biblia

Si Satanas Bala ang Aton Basulon sa Aton mga Sala?

ANG unang tawhanon nga sala ginbasol kay Satanas. “Ang man-ug—nagdaya ini sa akon gani nagkaon ako,” siling ni Eva. (Genesis 3:13) Kutob sadto, “ang orihinal nga man-ug, ang gintawag nga Yawa kag Satanas” padayon nga nagasalakay sa katawhan, ‘nagabulag sang hunahuna’ sang mga tawo kag “nagapatalang sang bug-os napuy-an nga duta.” (Bugna 12:9; 2 Corinto 4:4) Wala sing tawo ang makalikaw sa iya pag-ipit, apang nagakahulugan bala ini nga indi naton mapamatukan ang iya impluwensia? Kag kon makasala kita, sia bala pirme ang dapat basulon?

Ginapaathag sang Biblia nga matuod nga gindayaan ni Satanas si Eva. (1 Timoteo 2:14) Nadayaan sia sa paghunahuna nga paagi sa paglapas sa sugo sang Dios, matigayon niya ang tulad-dios nga kaalam kag kahilwayan. (Genesis 3:4, 5) Bangod sadtong paghaumhaom, nakasala sia. Apang, ginpapanabat sia sang Dios kag ginsentensiahan sing kamatayon. Ngaa? Bangod bisan nga nagbutig si Satanas, nahibaluan gid niya ang sugo sang Dios. Wala gid sia ginpilit nga maglapas; sa baylo, sia gihapon ang nagakontrol sang iya mga buhat, may bug-os nga ikasarang nga pamatukan ang impluwensia ni Satanas.

Pamatuki ang Yawa

Posible para sa aton nga mga tawo nga pamatukan ang Yawa. Sa Efeso 6:12, ginsugiran kita nga “may kaawayon kita” batok sa “malauton nga puwersa sang espiritu sa langitnon nga mga duog.” Sing maathag, nian, ginapaabot sang Dios nga batuan naton ang impluwensia ni Satanas. Apang ano ang padaug sang tawo batok sa labaw sa tawo nga gahom ni Satanas kag sang iya mga demonyo? Ginasugo bala kita nga makig-away sa indi patas nga inaway, isa nga pat-od nga malutos kita? Wala, bangod wala kita ginasugo sang Dios nga makig-away sa Yawa sa aton kaugalingon nga kusog. Ginahatagan kita ni Jehova sing madamo nga paagi nga mapamatukan naton ang mga pagsulay sang Yawa kag magmadinalag-on. Ginasugiran kita sang Biblia kon sin-o ang Yawa, kon paano sia nagapanghikot, kag kon paano naton maamligan ang aton kaugalingon.—Juan 8:44; 2 Corinto 2:11; 11:14.

Kon Paano ‘Pamatukan ang Yawa’

Ang Kasulatan nagarekomendar sing duha ka paagi kon paano pamatukan ang Yawa. Ginalaygayan kita: “Busa, magpasakop kamo sa Dios; apang pamatuki ang Yawa, kag magapalagyo sia sa inyo.” (Santiago 4:7) Ang una nga tikang sa pagpasakop sang aton kaugalingon sa Dios nagalakip sing pagsunod sa iya mga kasuguan. Ang aton padayon nga pagkilala sa pagluntad sang Dios, sa iya kaayo, sa iya makahalawhaw nga gahom kag awtoridad, kag sa iya mataas nga mga prinsipio magapabaskog sa aton nga pamatukan si Satanas. Importante man ang padayon nga pagpangamuyo sa Dios.—Efeso 6:18.

Binagbinaga ang okasyon sang ginsulay sang Yawa si Jesus. Ang pagdumdom kag pagkutlo sa lainlain nga kasuguan gikan sa Dios nakabulig gid kay Jesus sa pagpamatok. Napaslawan sa pagsulay kay Jesus nga magpakasala, ginbiyaan sia ni Satanas. Pagkatapos sadtong kabudlayan, si Jehova, paagi sa iya mga anghel, dugang nga nagpalig-on kay Jesus. (Mateo 4:1-11) Sa amo, may pagsalig nga mapalig-on ni Jesus ang iya mga disipulo nga magpangabay sa Dios nga ‘luwason sila gikan sa isa nga malaut.’—Mateo 6:13.

Ang pagluwas sang Dios sa aton wala nagakahulugan nga ginapalibutan niya kita sing pangamlig. Sa baylo, ginasugo niya kita nga magtigayon sing diosnon nga mga kinaiya, subong sang kamatuoran, pagkamatarong, paghidait, kag pagtuo. Ining mga kinaiya magamit subong isa ka “hinganib,” nagabulig sa aton nga “makatindog sing malig-on batok sa mga daya sang Yawa.” (Efeso 6:11, 13-18) Gani sa bulig sang Dios posible nga mabatuan ang mga pagsulay sang Yawa.

Ang ikaduha nga tikang nga ginarekomendar sa Santiago 4:7 amo ang ‘pamatukan ang Yawa.’ Nagalakip ini sang malig-on nga paghulag, pagpalayo sa iya makahalalit nga impluwensia. Dapat likawan sang isa nga mapadayag sa iya malalangon nga gahom kag sikwayon ang materyalistiko kag imoral nga mga pilosopiya nga lapnag gid sa kalibutan karon. Ina nga pagpamatok sa Yawa lakip ang kabuhi nga nadedikar sa pagpahamuot sa Dios kinahanglanon gid sa aton pagpakig-away batok kay Satanas. Apang ang tanan bala nga sala direkta nga resulta sang impluwensia sang Yawa?

Ang Aton Nasulod nga Pagpakig-away

Ang manunulat sang Biblia nga si Santiago nagapaathag: “Ang kada isa ginatilawan kon ginabuyok kag ginahaylo sia sang iya kaugalingon nga kailigbon. Nian ang kailigbon, kon nakapanamkon na, nagapanganak sa sala.” (Santiago 1:14, 15) Sing makapasubo, indi naton madaug sing bug-os ang napanubli nga kaluyahon kag pagkadihimpit. (Roma 5:12) “Wala sing tawo nga matarong sa duta nga padayon nga nagahimo sing maayo kag wala nagapakasala,” siling sang Biblia.—Manugwali 7:20.

Wala ini nagakahulugan nga indi naton makontrol ang tanan nga sala. Sa pila ka kaso, paagi sa aton sayop nga mga pagpili, ginabutang naton sa pagsulay ang aton kaugalingon. Gani walay sapayan nga ang sayop nga handum mahimo nga resulta sang aton kaugalingon nga pagkadihimpit ukon sang impluwensia ni Satanas, yara sa aton kon bala palambuon naton ukon sikwayon ini. Sing nagakaigo, si apostol Pablo nagsulat: “Bisan ano ang ginasab-ug sang tawo, ini man ang iya anihon.”—Galacia 6:7.

Batuna ang Salabton

Sa masami mabudlay para sa mga tawo nga batunon ang ila kaugalingon nga mga kaluyahon, kapaslawan, kalapasan—huo, mga sala. (Salmo 36:2) Ang isa ka butang nga makabulig sa aton nga batunon ang salabton bangod sang aton mga sala amo ang ihibalo nga wala karon ginapatuman sang Dios nga mangin himpit kita. “Wala sia maghisayo sa aton suno sa aton mga sala; ukon nagabalos sa aton suno sa aton mga kalautan,”’ siling ni salmista David. (Salmo 103:10) Walay sapayan nga mapinatawaron ang Dios, ginpaabot niya nga makig-away kita sing lakas, nagadisiplina sang aton kaugalingon, batok sa mga pagsulay sang Yawa kag sang aton kaugalingon nga huyog sa pagpakasala.—1 Corinto 9:27.

Dapat naton mahangpan nga walay sapayan nga nahibaluan sang Dios nga sarang maimpluwensiahan sang Yawa ang aton mga buhat kag sia ang may daku nga salabton sa makasasala nga kahimtangan sang katawhan, wala ini nagadula sang aton personal nga salabton. Sa amo, ang Roma 14:12 nagasiling: “Ang tagsatagsa sa aton magahatag sing husay para sa iya kaugalingon sa Dios.”

Apang, kon ‘ginadumtan naton ang malaut’ kag ‘nagapanguyapot sa maayo,’ magamadinalag-on kita batok sa yawa. (Roma 12:9, 21) Wala ini ginhimo sang una nga babayi, si Eva, kag ginsilutan sia bangod sang iya pagkamalinapason; namatok sia kuntani kag ginsunod ang Dios. (Genesis 3:16) Apang, wala ginpabay-an sang Dios ang pagdaya sang Yawa kay Eva. Ginpakamalaut ang Yawa kag gintagudilian sa pat-od nga kalaglagan. (Genesis 3:14, 15; Roma 16:20; Hebreo 2:14) Sa indi madugay maluwas na kita sa iya malauton nga impluwensia.—Bugna 20:1-3, 10.

[Credit line sa pahina 27]

Erich Lessing/Art Resource, NY