Ginsigurado sang iloy ni Timoteo kag ayhan sang iya lola, nga si Loida, nga indi ang ila personal nga mga ideya ang ipadulot sa iya kutob sa pagkalapsag; sa baylo, nahibaluan nila nga ang mga panudlo ni Jehova ang magapaalam sa iya para sa kaluwasan. Ang sulat nga ginpadala kay Timoteo sang Cristianong apostol nga si Pablo nagasiling: “Apang, magpadayon ka sa mga butang nga naton-an mo kag nahaylo ka nga tuohan, bangod nahibaluan mo kon sa kay sin-o nga mga tawo naton-an mo ini kag nga kutob sa pagkalapsag nahibaluan mo ang balaan nga mga sinulatan, nga makapaalam sa imo para sa kaluwasan paagi sa pagtuo may kaangtanan kay Cristo Jesus.”​—⁠2 Timoteo 3:​14, 15.

Wala sing duhaduha, ginbinagbinag man ni Timoteo kon ano nga sahi sang mga tawo ang iya iloy kag lola​—⁠espirituwal gid nga mga indibiduwal. Indi nila pagdayaon sia ukon patikuon ang kamatuoran para sa makagod nga mga katuyuan; indi man sila salimpapaw. Busa, wala ginduhaduhaan ni Timoteo ang mga butang nga iya naton-an. Kag indi maduhaduhaan nga ang iya adulto nga pagkabuhi subong isa ka aktibo nga Cristiano nagpahalipay sa tagipusuon sang iya matutom nga iloy.