• Paano ang Biblia Makabulig sa Imo?
    Magkabuhi sing Wala Katapusan!—Interactive nga Pagtuon sa Biblia
    • Leksion 1. Bukas nga Biblia.

      LEKSION 01

      Paano ang Biblia Makabulig sa Imo?

      Ang kalabanan sa aton may mga pamangkot parte sa kabuhi, pag-antos, kamatayon, kag palaabuton. Kada adlaw nabalaka man kita sa aton mga kinahanglanon kag kon paano mangin malipayon ang aton pamilya. Nakita sang madamo nga ang Biblia wala lang nagasabat sang importante nga mga pamangkot, kundi nagahatag man ini sang mga laygay sa aton pagkabuhi. Sa banta mo, makabulig gid bala ang Biblia sa aton?

      1. Ano ang pila ka pamangkot nga ginasabat sang Biblia?

      Ginasabat sang Biblia ining importante nga mga pamangkot: Paano nagsugod ang kabuhi? Ngaa nagakabuhi kita? Ngaa nagaantos ang mga tawo? Ano ang nagakatabo kon mapatay ang isa? Kon ang tanan gusto sang kalinong, ngaa may mga inaway? Ano ang matabo sa duta sa palaabuton? Ang sabat sa sini nga mga pamangkot makita sa Biblia, kag madamo nga tawo ang nakumbinsi gid sa sini.

      2. Paano ang Biblia makabulig sa aton nga mangin malipayon ang aton kabuhi?

      Ang Biblia nagahatag sa aton sing maayo nga laygay. Halimbawa, nagatudlo ini kon paano mangin malipayon ang mga pamilya. Nagalaygay man ini kon ano ang himuon naton kon na-stress kita kag kon paano kita malipay sa aton obra. Mahibaluan mo ang ginatudlo sang Biblia parte sa sini nga mga topiko kag iban pa, samtang ginatun-an naton ini nga libro. Mahimo makasiling ka gid nga ang “bug-os nga Kasulatan [ang tanan nga nasulat sa Biblia] . . . mapuslanon,” ukon makabenepisyo gid kita.—2 Timoteo 3:16.

      Wala ginabuslan sini nga libro ang Biblia. Kundi ginabuligan ka sini nga usisaon mo ang Biblia. Gani mas maayo nga basahon mo ang mga bersikulo nga makita sa sini nga mga leksion, dayon tan-awa kon naangot ini sa imo mga ginatun-an.

      USISAA PA GID

      Hibaluon naton kon paano ang Biblia nakabulig sa mga tawo, kon paano ka manamian sa pagbasa sini, kag kon ngaa maayo gid nga magpabulig ka sa iban para maintiendihan mo ini.

      3. Ang Biblia makagiya sa aton

      Ang Biblia daw pareho sa masanag nga suga. Makabulig ini sa aton nga makahimo sing maayo nga desisyon kag mahibaluan ang matabo sa palaabuton.

      Basaha ang Salmo 119:105, dayon binagbinaga ini nga mga pamangkot:

      • Suno sa nagsulat sini nga salmo, ano ang Biblia para sa iya?

      • Ano ang Biblia para sa imo?

      Lalaki nga nagalakat sa batuhon nga kilid sang linaw, kag ginasugaan niya sing flashlight ang iya madulom nga alagyan.

      4. Masabat sang Biblia ang aton mga pamangkot

      Nakita sang isa ka babayi nga ginasabat sang Biblia ang mga pamangkot nga tinuig na niya nga ginapaligban. Tan-awa ang VIDEO, dayon binagbinaga ang masunod nga mga pamangkot.

      VIDEO: Indi Madulaan sing Paglaum! (1:48)

      • Sa video, ano nga mga pamangkot ang ginapaligban sang babayi?

      • Paano nakabulig sa iya ang pagtuon sa Biblia?

      Nagsiling ang Biblia nga maayo gid kon mamangkot kita. Basaha ang Mateo 7:7, dayon binagbinaga ang masunod:

      • Ano ang imo mga pamangkot nga mahimo ginasabat sang Biblia?

      5. Manamian ka gid sa pagbasa sang Biblia

      Madamo ang nanamian magbasa sang Biblia kag nakabenepisyo gid sila. Tan-awa ang VIDEO, dayon binagbinaga ang masunod nga mga pamangkot.

      VIDEO: Pagbasa sa Biblia (2:05)

      • Sa video, ano ang siling sang mga pamatan-on parte sa pagbasa?

      • Ngaa nanamian na sila magbasa sang Biblia?

      Ang Biblia nagatudlo sa aton, nagapabakod, kag nagahatag sing paglaum. Basaha ang Roma 15:4, dayon binagbinaga ini nga pamangkot:

      • Nanamian ka bala kay ang Biblia nagapaumpaw kag nagahatag sing paglaum?

      6. Mabuligan kita sang iban nga maintiendihan ang Biblia

      Narealisar sang madamo nga nakabulig sa ila indi lang ang personal nga pagbasa sang Biblia, kundi ang pagtuon man sini upod sa iban. Basaha ang Binuhatan 8:26-31, dayon binagbinaga ini nga pamangkot:

      Mga piktyur: 1. Si Felipe nga nagapaathag sang Kasulatan sa lalaki nga taga-Etiopia. 2. Saksi nga nagabinagbinag sang Biblia sa isa ka iloy kag sa iya duha ka bata.

      Ang lalaki nga taga-Etiopia nagpabulig sa iban para maintiendihan niya ang Kasulatan. Madamo man subong ang nakabenepisyo kay nagpabulig sila sa iban sa pagtuon sa Biblia

      KON MAGSILING ANG IBAN: “Usik lang sa tiempo ang pagtuon sa Biblia.”

      • Ano ang isabat mo? Ngaa?

      SUMARYO

      Ang Biblia nagahatag sing laygay sa pagkabuhi, nagasabat sang importante nga mga pamangkot, nagapaumpaw, kag nagahatag sing paglaum sa mga tawo.

      Rebyu

      • Ano nga klase sang laygay ang mabasa naton sa Biblia?

      • Ano ang pila ka pamangkot nga ginasabat sang Biblia?

      • Ano ang gusto mo nga matun-an sa Biblia?

      Ang Puede Mo Himuon

      DUGANG NGA IMPORMASYON

      Hibalua kon ngaa makabulig gid ang laygay sang Biblia subong.

      “Mga Panudlo sang Biblia—Wala Nagalubad nga Kaalam” (Ang Lalantawan Num. 1 2018)

      Tan-awa kon paano ang Biblia nakabulig sa isa ka lalaki nga manubo ang pagtan-aw sa iya kaugalingon halin sang bata sia.

      Kon Paano Nangin Malipayon ang Akon Kabuhi (2:53)

      Hibalua ang mga laygay sang Biblia nga makabulig sa pamilya.

      “12 ka Sekreto Para Magmadinalag-on ang Pamilya” (Magmata! Num. 2 2018)

      Tan-awa kon paano gintadlong sang Biblia ang sala nga pagpati kon sin-o gid ang nagagahom sa kalibutan.

      Ngaa Dapat Tun-an ang Biblia?—Malawig nga Bersion (3:14)

  • Ang Biblia Mensahe sang Dios Para sa Aton
    Magkabuhi sing Wala Katapusan!—Interactive nga Pagtuon sa Biblia

    • 1. Kon mga tawo ang nagsulat sang Biblia, ngaa makasiling kita nga naghalin ini sa Dios?

      Mga 40 ka tawo ang nagsulat sang Biblia sa sulod sang mga 1,600 ka tuig, halin sang 1513 B.C.E. asta sang mga 98 C.E. Lainlain ang nagsulat sini, may manugbantay sang karnero, mangingisda, kag hari. Pero ang ila mga ginsulat nagasanto gid. Ngaa? Kay ang Dios ang nagpasulat sang Biblia. (Basaha ang 1 Tesalonica 2:13.) Wala ginsulat sang mga tawo ang ila ideya, “kundi ang ginhambal [nila] naghalin sa Dios samtang ginapahulag sila sang balaan nga espiritu.”a (2 Pedro 1:21) Gingamit sang Dios ang iya balaan nga espiritu para giyahan ang mga tawo nga isulat ang iya panghunahuna.—2 Timoteo 3:16.