Si Jehova—Ang Dios sang Katuyuan

“Suno sa akon ginpainoino, amo ini ang mahanabo; kag suno sa akon gintuyo, amo ini ang mahimo.”​—⁠ISAIAS 14:⁠24.

1, 2. Ano ang ginasiling sang madamo nahanungod sa katuyuan sang kabuhi?

ANG mga tawo bisan diin nagapamangkot: “Ano ang katuyuan sang kabuhi?” Ang isa ka lider sa politika sa Nakatundan nagsiling: “Mas madamo karon ang nagapamangkot, ‘Sin-o kita? Ano ang aton katuyuan?’ ” Sang ginpamangkot sang isa ka pamantalaan ang mga pamatan-on kon ano ang katuyuan sang kabuhi, ang kinaandan nga mga sabat amo: “Ang himuon ang bisan ano nga ginahandom sang imo tagipusuon.” “Ang ikabuhi sing bug-os ang tagsa ka higayon.” “Ang magkabuhi sing malipayon kag sing maluho.” “Ang manganak, magmalipayon kag nian mapatay.” Ang kalabanan nagbatyag nga amo lamang sini ang kabuhi. Wala sing isa ang nagpamulong nahanungod sa nagadugay nga katuyuan sang kabuhi sa duta.

² Ang isa ka Confucianhon nga iskolar nagsiling: “Ang katapusan nga kahulugan sang kabuhi masapwan sa aton ordinaryo, tawhanon nga pagluntad.” Suno sa sini, ang mga tawo padayon nga ipanganak, magahimakas sa 70 ukon 80 ka tuig, nian mapatay kag indi na magaluntad sing dayon. Ang isa ka ebolusyunaryo nga sientipiko nagsiling: “Mahimo nga nagapangita kita sing ‘mas mataas’ nga sabat​—⁠apang wala ini.” Para sa sina nga mga ebolusyonista, ang kabuhi isa ka pagpakig-away para sa kaluwasan, ang kamatayon nagatapos sini tanan.

3, 4. Paano ang mga kahimtangan sang kalibutan nagaapektar sa kon paano ginatamod sang madamo ang kabuhi?

³ Madamo ang nagaduhaduha nga may katuyuan ang kabuhi sang nakita nila nga ang tawhanon nga pagluntad napuno sang tuman kadamo nga mga kabudlayan. Sa aton panahon, sang ginahaumhaum nga nalab-ot na sang tawo ang putukputukan sang industriyal kag sientipiko nga hinimuan, mga isa ka bilyon ka tawo ang nagabalatian sing malala ukon kulang sing sustansia. Minilyon ka kabataan kada tuig ang nagakapatay bangod sina. Dugang pa, ang mga napatay sa inaway sa sining ika-20 nga siglo apat ka pilo ang kalabawon bisan tingubon ang apat ka siglo nga nagligad. Krimen, kasingki, pag-abuso sa droga, pagkalusod sang pamilya, AIDS, kag iban pa nga mga balatian nga ginapaliton sang seksuwal nga buhat​—⁠ang listahan sang negatibo nga mga kabangdanan nagadugang. Ang mga lider sang kalibutan wala sing solusyon sa sining mga problema.

⁴ Bangod sina nga mga kahimtangan, ginpabutyag sang isa ka babayi kon ano ang ginapatihan sang madamo: “Wala sing katuyuan ang kabuhi. Kon ining tanan nga mga kalainan nagakatabo, nian wala gid sing kahulugan ang kabuhi.” Ang isa ka tigulang nga tawo nagsiling: “Sa akon pagkabuhi pirme ako nagapamangkot kon ngaa yari ako diri. Kon may katuyuan man, indi ako interesado.” Gani bangod madamo ang wala makahibalo kon ngaa ginatugutan sang Dios ang pag-antos, ang mabudlay nga mga kahimtangan sa kalibutan wala nagahatag sa ila sing matuod nga paglaum para sa palaabuton.

5. Ngaa ang mga relihion sining kalibutan nagadugang sing kagumon sa katuyuan sang kabuhi?

⁵ Bisan ang relihiosong mga lider nabahinbahin, kag indi sigurado, sa katuyuan sang kabuhi. Ang anay dekano sang St. Paul’s Cathedral sa London nagsiling: “Sa bug-os nga kabuhi nanikasog ako nga hibaluon ang katuyuan sang pagkabuhi. . . . Napaslawan ako.” Matuod, madamong klerigo ang nagatudlo nga sa kamatayon ang maayo nagakadto sa langit kag ang malain nagakadto sa kalayuhon nga impierno sing dayon. Apang ini nga pagtamod nagabilin sa katawhan sa duta nga padayunon ang iya nagaantos nga dalanon. Apang kon katuyuan sang Dios nga papuy-on ang mga tawo sa langit, ngaa wala na lang niya pagtugaha sila sing subong sina sa ginsuguran, subong sang ginhimo niya sa mga anghel, kag sa amo ginluwas ang mga tawo sa madamo nga pag-antos? Gani ang kagumon tuhoy sa katuyuan sang kabuhi sa duta ukon ang indi pagpati nga ini may katuyuan kinaandan.

Ang Dios sang Katuyuan

6, 7. Ano ang ginasugid sa aton sang Biblia nahanungod sa Soberano sa Bug-os nga Uniberso?

⁶ Apang, ginasugiran kita sang napanagtag sing pinakalapnag nga libro sa maragtas, ang Balaan nga Biblia, nga ang Dios sang katuyuan amo si Jehova, ang Soberano sang uniberso. Ginapakita sini nga may yara sia malawig, sa katunayan, dayon nga katuyuan para sa katawhan sa duta. Kag kon may ginatuyo si Jehova, pat-od gid ini nga matuman. Subong nga ang ulan nagapasalingsing sang binhi, siling sang Dios, “mangin subong sini ang akon pulong nga nagaguwa sa akon baba. Indi magbalik ini sa akon nga wala sing pulos, kundi magatigayon ini sang akon nahamut-an, kag magauswag ini sa butang nga akon ginpadal-an sini.” (Isaias 55:​10, 11) Ano man ang ginasiling ni Jehova nga himuon niya, “ini ang mahimo.”​—⁠Isaias 14:⁠24.

⁷ Kita nga mga tawo makasalig sing bug-os nga tumanon sang Labing Gamhanan ang iya mga saad, kay ang Dios “indi makabutig.” (Tito 1:2; Hebreo 6:18) Sang nagsiling sia sa aton nga himuon niya ang pila ka butang, ang iya pulong isa ka garantiya nga ini mahanabo. Daw subong nga natabo na ini. Sia nagasiling: “Ako ang Dios kag wala na sing iban pa nga Dios, kag wala na gid sing kaangay sa akon; ang Isa nga nagapahayag sang katapusan kutob sa ginsuguran, kag kutob sa dumaan nga mga tion sang mga butang nga wala pa mahimo; ang Isa nga nagasiling, ‘Ang akon tinutuyo magapadayon, kag himuon ko ang tanan ko nga luyag’ . . . Nagpamulong ako; pahanabuon ko ini. Ginbuko ko, himuon ko man ini.”​—⁠Isaias 46:​9-11.

8. Masapwan bala ang Dios sadtong maluyag nga makilala sia?

⁸ Dugang pa, “wala nagahandom [si Jehova] nga mawala ang bisan sin-o kundi nga ang tanan makadangat sang paghinulsol.” (2 Pedro 3:⁠9) Bangod sini, indi niya luyag ang bisan sin-o nga mangin ignorante sa iya. Ang manalagna nga si Azarias nagsiling: “Kon pangitaon ninyo [ang Dios], makita sia ninyo, apang kon bayaan ninyo sia, sia magabiya sa inyo.” (2 Cronica 15:​1, 2) Gani, yadtong hanuot nga maluyag nga makilala ang Dios kag ang iya mga katuyuan makahimo sini sing pat-od kon manikasog sila nga pangitaon sia.

9, 10. (a) Ano ang gin-aman para sa sadtong maluyag nga makilala ang Dios? (b) Ano ang ginbulig sa aton sang pag-usisa sa Pulong sang Dios nga himuon?

⁹ Mangita sa diin? Para sa mga nagapangita gid sa Dios, gin-aman niya ang iya Pulong, ang Biblia. Paagi sa iya balaan nga espiritu, ang aktibo nga kusog nga gingamit man niya sa pagtuga sa uniberso, gintuytuyan sang Dios ang matutom nga mga tawo sa pagsulat kon ano ang kinahanglan nga mahibaluan naton nahanungod sa iya mga katuyuan. Halimbawa, nahanungod sa tagna sang Biblia, si apostol Pedro nagsiling: “Wala gid sing tagna nga nag-abot bangod sa kabubut-on sang tawo, kundi ang mga tawo nga gintandog sang balaan nga espiritu nagpamulong gikan sa Dios.” (2 Pedro 1:21) Sa kaanggid, si apostol Pablo nagsiling: “Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagsaway, kag sa paghanas sa pagkamatarong, agod nga ang tawo sang Dios mangin bug-os nga may ikasarang, bug-os nga masangkapan nga sa tagsa ka maayong buhat.”​—⁠2 Timoteo 3:​16, 17; 1 Tesalonica 2:⁠13.

¹⁰ Talupangda nga ang Pulong sang Dios nagabulig sa aton nga mangin, indi sing bahin lamang ukon sing indi bug-os, “kundi bug-os nga may ikasarang, bug-os nga masangkapan.” Nagabulig ini sa isa nga mapat-od kon sin-o ang Dios, kon ano ang iya mga katuyuan, kag kon ano ang iya ginasugo sa iya mga alagad. Mapaabot ini sa isa ka libro nga ginsulat sang Dios. Kag amo lamang ini ang tuburan nga mausisa sa pagpangita sang sibu nga ihibalo tuhoy sa Dios. (Hulubaton 2:​1-5; Juan 17:⁠3) Paagi sa sini, “indi na kita magmangin bata, nga ginabolabola kag ginapalidpalid sang tagsa ka hangin sang pagtulun-an paagi sa pagkaabtik sang mga tawo, sa ila pagkadaya sa mga limbong sang sayop.” (Efeso 4:​13, 14) Ginpabutyag sang salmista ang nagakaigo nga pagtamod: “Ang imo [Dios] pulong suga sa akon mga tiil, kag kapawa sa akon banas.”​—⁠Salmo 119:105.

Amat-amat nga Ginpahayag

11. Paano ginpahayag ni Jehova ang iya mga katuyuan sa katawhan?

¹¹ Sa ginsuguran gid sang tawhanon nga panimalay, ginpahayag ni Jehova ang iya mga katuyuan sa sining duta kag sa mga tawo sa sini. (Genesis 1:​26-30) Apang sang ginsikway sang aton nahaunang mga ginikanan ang soberanya sang Dios, ang katawhan nahulog sa espirituwal nga kadudulman kag kamatayon. (Roma 5:12) Walay sapayan, nahibaluan ni Jehova nga may yara luyag mag-alagad sa iya. Gani, sa mga siglo, amat-amat niya nga ginpahayag ang iya mga katuyuan sa iya matutom nga mga alagad. Ang pila sadtong ginpakig-angutan niya amo sanday Enoc (Genesis 5:24; Judas 14, 15), Noe (Genesis 6:​9, 13), Abraham (Genesis 12:​1-3), kag Moises (Exodo 31:18; 34:​27, 28). Ang manalagna sang Dios nga si Amos nagsulat: “Ang Soberanong Ginuo nga si Jehova indi maghimo sing bisan ano nga butang kon indi niya anay mapahayag ang iya tinago sa iya mga alagad nga mga manalagna.”​—⁠Amos 3:7; Daniel 2:​27, 28.

12. Paano ginhatagan ni Jesus sing dugang nga kapawa ang mga katuyuan sang Dios?

¹² Sang ang Anak sang Dios, nga si Jesucristo, yari sa duta mga 4,000 ka tuig pagkatapos sang pagrebelde sa Eden, madamo pa nga mga detalye tuhoy sa mga katuyuan ni Jehova ang ginpahayag. Amo gid sini ilabi na nahanungod sa katuyuan sang Dios nga tukuron ang langitnon nga Ginharian sa paggahom sa bug-os nga duta. (Daniel 2:44) Ginhimo ni Jesus yadto nga Ginharian nga tema sang iya panudlo. (Mateo 4:​17; 6:10) Gintudlo niya kag sang iya mga disipulo nga sa idalom sang Ginharian, ang orihinal nga katuyuan sang Dios para sa duta kag para sa katawhan matuman. Ang duta himuon nga isa ka paraiso nga ginapuy-an sang himpit nga mga tawo, nga magakabuhi sing dayon. (Salmo 37:29; Mateo 5:5; Lucas 23:43; 2 Pedro 3:13; Bugna 21:⁠4) Dugang pa, ginpakita ni Jesus kag sang iya mga disipulo kon ano ang mahanabo sa sinang bag-ong kalibutan paagi sa mga milagro nga ginhatag sa ila sang Dios nga himuon.​—⁠Mateo 10:​1, 8; 15:​30, 31; Juan 11:​25-44.

13. Nahanungod sa mga pagpakig-angot sang Dios sa katawhan, anong pagbalhin ang natabo sang Pentecostes 33 C.E.?

¹³ Sang Pentecostes 33 C.E., 50 ka adlaw pagkatapos napatay si Jesus, ang espiritu sang Dios ginpasagahay sa kongregasyon sang mga sumulunod ni Cristo. Ginbuslan sini ang dimatutom nga Israel subong ang ginpakigkatipanan nga katawhan ni Jehova. (Mateo 21:43; 27:51; Binuhatan 2:​1-4) Ang pagpasagahay sang balaan nga espiritu sadto nga okasyon pamatuod nga, kutob sadto nga tion, ipahayag sang Dios ang mga kamatuoran nahanungod sa iya mga katuyuan paagi sining bag-o nga ahensia. (Efeso 3:10) Sang unang siglo C.E., ang organisasyonal nga balayan sang Cristianong kongregasyon gintukod.​—⁠1 Corinto 12:​27-31; Efeso 4:​11, 12.

14. Paano makilala sang mga nagapangita sang kamatuoran ang matuod nga Cristianong kongregasyon?

¹⁴ Sa karon, makilala sang mga nagapangita sang kamatuoran ang matuod nga Cristianong kongregasyon paagi sa iya dalayon nga pagpadayag sang pangunang kinaiya sang Dios, ang gugma. (1 Juan 4:​8, 16) Sa pagkamatuod, ang utudnon nga gugma isa ka nagapakilala nga tanda sang matuod nga Cristianismo. Si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” “Ini amo ang akon sugo, nga maghigugmaanay kamo subong nga ako naghigugma sa inyo.” (Juan 13:35; 15:12) Kag ginpahanumdom ni Jesus ang iya mga tagpalamati: “Kamo akon mga abyan kon nagahimo kamo sang ginsugo ko sa inyo.” (Juan 15:14) Gani ang matuod nga mga alagad sang Dios amo yadtong nagakabuhi sang kasuguan sang gugma. Wala lamang sila nagahambal nahanungod sini, kay “ang pagtuo patay kon walay mga binuhatan.”​—⁠Santiago 2:⁠26.

Kasanagan

15. Sa ano makasalig ang mga alagad sang Dios?

¹⁵ Gintagna ni Jesus nga sa pagligad sang tion, ang matuod nga Cristianong kongregasyon labi kag labi nga masanagan nahanungod sa mga katuyuan sang Dios. Nagsaad sia sa iya mga sumulunod: “Ang mananabang, ang balaan nga espiritu, nga ipadala sang Amay sa akon ngalan, magatudlo sia sa inyo sang tanan nga butang.” (Juan 14:26) Nagsiling man si Jesus: “Yari karon! Ako kaupod ninyo sa tanan nga adlaw tubtob sa konklusion sang sistema sang mga butang.” (Mateo 28:20) Busa, ang kasanagan nahanungod sa kamatuoran tuhoy sa Dios kag sa iya mga katuyuan nagadugang sa tunga sang mga alagad sang Dios. Huo, “ang banas sang matarong subong sang nagapamanagbanag nga kapawa nga nagasilak sing labi kag labi tubtob sa himpit nga adlaw.”​—⁠Hulubaton 4:⁠18.

16. Ano ang ginasugid sa aton sang aton espirituwal nga kasanagan sa kon diin kita may kaangtanan sa mga katuyuan sang Dios?

¹⁶ Karon, inang espirituwal nga kapawa mas masanag pa sangsa nagligad, kay yari na kita sa panahon nga ang madamong tagna sa Biblia nagakatuman ukon malapit na matuman. Ginapakita sini sa aton nga nagakabuhi kita sa “katapusan nga mga adlaw” sining malaut nga sistema sang mga butang. Amo ini ang panag-on sang tion nga gintawag “ang konklusion sang sistema sang mga butang”; pagasundan ini sang bag-ong kalibutan sang Dios. (2 Timoteo 3:​1-5, 13; Mateo 24:​3-13) Subong sang gintagna ni Daniel, sa dili madugay “dugmukon [sang langitnon nga Ginharian sang Dios] kag papason ining tanan nga ginharian [nga nagaluntad karon], kag magapadayon ini tubtob sa tion nga dinapat-od.”​—⁠Daniel 2:⁠44.

17, 18. Anong dakung mga tagna ang nagakatuman karon?

¹⁷ Lakip sa mga tagna nga nagakatuman karon amo ang isa nga narekord sa bersikulo 14 sang Mateo kapitulo 24. Didto si Jesus nagsiling: “Iwali ining maayong balita sang ginharian sa bug-os napuy-an nga duta subong nga saksi sa tanan nga kapungsuran; kag ugaling magaabot ang katapusan.” Sa bug-os nga duta, inang pagbantala sang Ginharian nga hilikuton ginahimo sang minilyon ka Saksi ni Jehova. Kag ginatos ka libo ka tawo ang nagabuylog sa ila kada tuig. Nahisanto ini sa tagna sang Isaias 2:​2, 3, nga nagasiling nga “sa ulihing mga adlaw” sining malauton nga kalibutan, ang katawhan gikan sa madamong kapungsuran magakadto sa matuod nga pagsimba kay Jehova, kag ‘tudluan niya sila sang iya mga dalanon, kag magalakat sila sa iya mga banas.’

¹⁸ Ining mga bag-uhan nagadugok sa pagsimba ni Jehova “subong sang panganod,” subong sang gintagna sa Isaias kapitulo 60, bersikulo 8. Ang bersikulo 22 nagadugang: “Ang diutay mangin isa ka libo, kag ang diutay mangin mabakod nga pungsod. Ako, si Jehova, magapadali sini sa iya tion.” Ginapakita sang pamatuod nga ina nga tion amo na karon. Kag ang mga bag-uhan makasalig nga sa pagpakig-upod sa mga Saksi ni Jehova, nagapakig-angot sila sa matuod nga Cristianong kongregasyon.

19. Ngaa makasiling kita nga ang mga bag-uhan nga nagapakig-upod sa mga Saksi ni Jehova nagakadto sa matuod nga Cristianong kongregasyon?

¹⁹ Ngaa makasiling kita sini sing pat-od? Bangod ining mga bag-uhan, kaupod sang minilyon nga yara na sa organisasyon ni Jehova, nagdedikar sang ila kabuhi sa Dios kag nagahimo sang iya kabubut-on. Nagalakip ini sang pagkabuhi nahisuno sa kasuguan sang diosnon nga gugma. Subong isa ka ebidensia sini, ‘ginsalsal [sining mga Cristiano] ang ila mga espada nga mga punta sang arado kag ang ila mga bangkaw nga mga galab nga inughagbas kag wala na sila magtuon sing inaway.’ (Isaias 2:⁠4) Ginhimo ini sang tanan nga mga Saksi ni Jehova sa bug-os nga kalibutan bangod ginabuhat nila ang gugma. Nagakahulugan ini nga indi sila magauyat sing mga hinganiban sa inaway batok sa isa kag isa ukon kay bisan sin-o. Sa sini pinasahi sila​—⁠indi kaangay sang mga relihion sang kalibutan. (Juan 13:​34, 35; 1 Juan 3:​10-12, 15) Wala sila nadalahig sa nabahinbahin nga nasyonalismo, kay nagahuman sila sang isa ka tugob-globo nga paghiliutod nga ginhugpong sang gugma, “ang himpit nga higot sang paghiusa.”​—⁠Colosas 3:​14; Mateo 23:8; 1 Juan 4:​20, 21.

Ginpakamaayo sang Kalabanan nga Indi Paghibaluon

20, 21. Ngaa ang kalabanan nga katawhan yara sa espirituwal nga kadudulman? (2 Corinto 4:4; 1 Juan 5:⁠19)

²⁰ Samtang nagasanag ang espirituwal nga kapawa sang mga alagad sang Dios, ang populasyon sang duta labi pa gid nga gindulman sa espirituwal. Wala nila makilala si Jehova ukon ang iya mga katuyuan. Ginlaragway sang manalagna sang Dios ini nga tion sang nagsiling sia: “Yari karon! ang kadudulman magatabon sang duta, kag ang pitipit nga kadudulman sang pungsudnon nga mga grupo.” (Isaias 60:⁠2) Amo ini bangod ang mga tawo wala nagapakita sing hanuot nga interes nga hibaluon ang nahanungod sa Dios, ni nagapakita sila sing handom nga panikasugan nga pahamut-an sia. Si Jesus nagsiling: “Amo ini ang sadsaran sang paghukom, nga ang kapawa nagkari sa kalibutan apang ang mga tawo naghigugma sang kadudulman labi sa kapawa, kay ang ila mga buhat malaut. Kay ang tagsatagsa nga nagabuhat sang malaut nagadumot sang kapawa kag wala nagapalapit sa kapawa, basi kon ang iya mga buhat magdayag.”​—⁠Juan 3:​19, 20.

²¹ Ina nga mga indibiduwal indi gid interesado nga mahibaluan ang kabubut-on sang Dios. Sa baylo, ginahugod nila ang ila kabuhi sa paghimo sang ila kaugalingon nga kabubut-on. Paagi sa indi pagsapak sa kabubut-on sang Dios, ginabutang nila ang ila kaugalingon sa isa ka makatalagam nga kahimtangan, kay ang iya Pulong nagasiling: “Ang nagapabungol sa kasuguan​—⁠bisan ang iya pangamuyo kangil-aran.” (Hulubaton 28:⁠9) Manabat sila sa mga resulta sang ila ginpili nga dalanon. Si apostol Pablo nagsulat: “Dili kamo magtalang: ang Dios dili tiliawtiawan. Kay bisan ano ang ginasab-ug sang tawo, ini man ang iya anihon.”​—⁠Galacia 6:⁠7.

22. Ano karon ang ginahimo sang madamo nga maluyag makilala ang Dios?

²² Apang, madamo ang luyag makahibalo sang kabubut-on sang Dios, nga hanuot nga nagapangita sa iya, kag nagapalapit sa iya. “Magpalapit sa Dios kag sia magapalapit sa inyo,” siling sang Santiago 4:⁠8. Tuhoy sa ila si Jesus nagsiling: “Ang nagabuhat sang kamatuoran nagapalapit sa kapawa, agod nga ang iya mga buhat mapahayag nga napanghimo sa Dios.” (Juan 3:21) Kag daw ano katahom nga palaabuton ang gintuyo sang Dios para sa mga nagakadto sa kapawa! Ang amon masunod nga artikulo magahinun-anon sang makalilipay nga mga palaabuton.

Paano Mo Sabton?

◻ Ano ang ginasiling sang madamo nahanungod sa katuyuan sang kabuhi?

◻ Paano ginapahayag ni Jehova ang iya kaugalingon subong isa ka Dios sang katuyuan?

◻ Anong daku nga kasanagan ang natabo sang unang siglo C.E.?

◻ Paano karon makilala ang matuod nga Cristianong kongregasyon?