Magpabilin sa Gugma sang Dios

1, 2. Ano ang himuon naton para makapabilin sa gugma sang Dios?

LUYAG naton tanan nga magbakod kag magpagros. Amo nga nagakaon kita sang masustansia nga pagkaon, nagaehersisyo sing regular, kag ginaatipan ang aton lawas. Ginapadayon naton ini bisan pa mabudlay kay may maayo ini nga resulta. Pero dapat magbakod kag magpagros man kita sa isa pa ka paagi.

² Maayo nga nakilala naton si Jehova, pero dapat padayon naton nga pabakuron ang aton kaangtanan sa iya. Sang ginsiling ni Judas sa mga Cristiano nga “Makapabilin kamo sa gugma sang Dios,” ginpaathag niya kon paano ini himuon. Ginsilingan niya sila: “Palig-una ang inyo kaugalingon sa inyo labing balaan nga pagtuo.” (Judas 20, 21) Gani paano naton mapabakod ang aton pagtuo?

PADAYON NGA PABAKURA ANG IMO PAGTUO

3-5. (a) Ano ang luyag ni Satanas nga batyagon mo parte sa mga talaksan ni Jehova? (b) Ano ang ginabatyag mo sa mga kasuguan kag prinsipio ni Jehova?

³ Importante gid nga kumbinsido ka nga ang mga paagi ni Jehova amo ang pinakamaayo. Luyag ni Satanas nga pamensaron mo nga ang mga talaksan sang Dios tuman kabudlay sundon kag mas mangin malipayon ka kon ikaw ang magdesisyon sang maayo kag malain. Didto pa sa hardin sang Eden, gintinguhaan na ni Satanas nga patihan ini sang mga tawo. (Genesis 3:1-6) Kag amo gihapon ang iya ginahimo asta subong.

⁴ Husto bala si Satanas? Tuman bala kabudlay sundon ang mga talaksan ni Jehova? Indi. Sa pag-ilustrar, imadyina nga nagalakat ka sa isa ka matahom nga parke. Natalupangdan mo ang mataas nga pader sa isa ka bahin sini. Posible pamensaron mo, ‘Ngaa may pader diri?’ Dayon may nabatian ka nga ngurob sang leon sa pihak sang pader. Ano karon ang masiling mo parte sa pader? Mapasalamat ka gid kay kon wala ini gingus-ab ka na kuntani sang leon! Ang mga prinsipio ni Jehova pareho gid sa sina nga pader, kag ang Yawa amo ang leon. Ang Pulong sang Dios nagapaandam sa aton: “Hupti ang inyo ikasarang sa paghunahuna sing maayo, mangin mabinantayon! Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.”—1 Pedro 5:8.

⁵ Luyag ni Jehova nga matigayon naton ang pinakamaayo nga kabuhi. Indi niya luyag nga malimbungan kita ni Satanas. Amo nga ginhatagan niya kita sing mga kasuguan kag prinsipio nga makaamlig kag makapahalipay sa aton. (Efeso 6:11) Si Santiago nagsulat: “Apang ang isa nga nagatulok sing maayo sa himpit nga kasuguan nga nagadala sang kahilwayan kag nagapadayon sa sini . . . mangin malipayon sia sa iya ginahimo.”—Santiago 1:25.

6. Paano kita makumbinsi nga ang mga pamaagi sang Dios amo ang pinakamaayo?

⁶ Kon ginasunod naton ang panuytoy ni Jehova, mas mangin maayo ang aton kabuhi kag magabakod ang aton pagpakig-abyan sa iya. Halimbawa, nagabenepisyo kita sang ginbaton naton ang iya pangagda nga mangamuyo pirme sa iya. (Mateo 6:5-8; 1 Tesalonica 5:17) Malipayon kita kon ginasunod naton ang iya direksion sa pagtipon para simbahon sia kag palig-unon ang isa kag isa, kag kon nagapakigbahin kita sing bug-os sa pagbantala kag pagtudlo. (Mateo 28:19, 20; Galacia 6:2; Hebreo 10:24, 25) Samtang ginapamensar naton kon paano ini nakabulig nga magpabilin nga mabakod ang aton pagtuo, mangin mas kumbinsido pa gid kita nga ang mga pamaagi ni Jehova amo ang pinakamaayo.

7, 8. Ano ang makabulig sa aton nga indi mabalaka sa mga pagtilaw nga magaabot sa ulihi?

⁷ Posible nabalaka kita nga sa ulihi tilawan ang aton pagtuo kag mabudlayan gid kita. Kon amo sina ang imo ginabatyag, dumduma ang ginasiling ni Jehova: “Ako si Jehova nga imo Dios, ang nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan. Luyag ko nga magpamati ka sa akon mga sugo! Kon himuon mo ini, ang imo paghidait mangin kaangay sang suba kag ang imo pagkamatarong mangin kaangay sang mga balod sang dagat.”—Isaias 48:17, 18.

⁸ Kon sundon naton si Jehova, ang aton paghidait mangin kaangay sang suba nga wala nagakahubsan, kag ang aton pagkamatarong mangin kaangay sang mga balod sang dagat nga wala nagauntat sa paghampas sa baybayon. Bisan ano pa ang matabo sa aton, makapabilin kita nga matutom. Ang Biblia nagapromisa: “Itugyan ang imo lulan kay Jehova, kag sia magaalay-ay sa imo. Indi gid sia magtugot nga mapukan ang isa nga matarong.”—Salmo 55:22.

‘MAGPANIKASOG PADULONG SA PAGKAHAMTONG’

9, 10. Ano ang buot silingon nga mangin hamtong?

⁹ Samtang ginapabakod mo ang imo kaangtanan kay Jehova, nagapanikasog ka padulong sa pagkahamtong. (Hebreo 6:1) Ano ang buot silingon nga mangin hamtong?

¹⁰ Wala nadepende sa kadugayon sa kamatuoran sang isa ka Cristiano ang iya pagkahamtong. Para mangin hamtong, dapat mangin pinakasuod naton nga Abyan si Jehova kag ginatinguhaan nga mangin pareho ang aton pagtamod sa iya. (Juan 4:23) Si Pablo nagsulat: “Kay ang mga tawo nga nagakabuhi suno sa unod nagahunahuna sang mga butang sang unod, apang ang mga tawo nga nagakabuhi suno sa espiritu, nagahunahuna sang mga butang sang espiritu.” (Roma 8:5) Ang hamtong nga tawo wala nagasentro sang iya kabuhi sa kalingawan ukon sa materyal. Sa baylo, nasentro ini sa pag-alagad kay Jehova kag sa paghimo sing maalamon nga desisyon. (Hulubaton 27:11; basaha ang Santiago 1:2, 3.) Wala sia nagapaimpluwensia sa paghimo sang malain. Ang hamtong nga tawo nakahibalo sang husto kag determinado sa paghimo sini.

11, 12. (a) Ano ang ginsiling ni Pablo parte sa “ikasarang sa paghangop” sang isa ka Cristiano? (b) Sa ano magkaanggid ang hamtong nga Cristiano kag atleta?

¹¹ Nagakinahanglan sing panikasog para mangin hamtong. Si apostol Pablo nagsulat: “Ang matig-a nga pagkaon para sa hamtong nga mga tawo, nga paagi sa paggamit sang ila mga ikasarang sa paghangop nahanas ini nga makilala ang maayo kag malain.” (Hebreo 5:14) Ang tinaga nga “nahanas” nagapahunahuna sa aton sang paghanas sang atleta.

¹² Kon makita naton ang pagkasampaton sang isa ka atleta, nakahibalo kita nga ini resulta sang iya malawig nga paghanas. Wala sia mabun-ag nga isa ka atleta. Kon mabun-ag ang isa ka lapsag, indi sia kabalo maggamit sang iya mga kamot kag tiil. Pero sa ulihi, matun-an niya kon paano mag-uyat kag maglakat. Paagi sa paghanas, mangin isa sia ka atleta. Sing kaanggid, kinahanglan man sang tion kag paghanas para mangin hamtong kita nga mga Cristiano.

13. Ano ang makabulig sa aton nga matun-an nga maghunahuna pareho kay Jehova?

¹³ Sa sini nga publikasyon, natun-an naton nga hunahunaon kag tamdon ang mga butang pareho kay Jehova. Natun-an man naton nga apresyahon kag higugmaon ang mga talaksan ni Jehova. Kon magdesisyon kita, ginapamangkot naton ang aton kaugalingon: ‘Ano nga mga kasuguan ukon prinsipio sang Biblia ang naaplikar sa sini nga sitwasyon? Paano ko maaplikar ini? Ano ang luyag ni Jehova nga himuon ko?’—Basaha ang Hulubaton 3:5, 6; Santiago 1:5.

14. Ano ang dapat naton himuon para mapabakod ang aton pagtuo?

¹⁴ Wala gid kita nagauntat nga pabakuron ang aton pagtuo kay Jehova. Subong nga ang masustansia nga pagkaon nagapabakod sang aton lawas, ang pagtuon parte kay Jehova nagapabakod man sang aton pagtuo. Sang nagtuon kita sa Biblia, natun-an naton ang sadsaran nga mga kamatuoran parte kay Jehova kag sa iya mga pamaagi. Pero pagligad sang tion, dapat mahangpan naton ang madalom nga mga butang. Amo ina ang buot silingon ni Pablo sang nagsiling sia: “Ang matig-a nga pagkaon para sa hamtong nga mga tawo.” Paagi sa pag-aplikar sang aton natun-an matigayon naton ang kaalam. Ang Biblia nagsiling: “Ang kaalam amo ang pinakaimportante sa tanan.”—Hulubaton 4:5-7; 1 Pedro 2:2.

15. Daw ano ka importante nga ginahigugma gid naton si Jehova kag ang aton kauturan?

¹⁵ Posible nga ang isa ka tawo mabakod kag mapagros, pero para makapabilin nga amo sina, nakahibalo sia nga dapat padayon nga atipanon niya ang iya kaugalingon. Sing kaanggid, nakahibalo ang hamtong nga Cristiano nga dapat padayon sia mangabudlay para magpabilin ang iya mabakod nga kaangtanan kay Jehova. Si Pablo nagpahanumdom sa aton: “Padayon nga usisaa kon malig-on ang inyo pagtuo; padayon nga pamatud-i kon ano kamo.” (2 Corinto 13:5) Pero, sobra pa sa mabakod nga pagtuo ang kinahanglan naton. Dapat padayon nga magbaskog ang aton gugma kay Jehova kag sa aton kauturan. Si Pablo nagsiling: “Bisan may . . . kaalam, kag bisan masaylo ko ang mga bukid bangod sang akon mabakod nga pagtuo, apang kon wala ako sing gugma, wala ako sing pulos.”—1 Corinto 13:1-3.

MAGPOKUS SA IMO PAGLAUM

16. Ano ang luyag ni Satanas nga batyagon naton?

¹⁶ Luyag ni Satanas nga magbatyag kita nga indi gid naton mapahamut-an si Jehova. Luyag niya nga magluya ang aton buot kag hunahunaon naton nga wala sing solusyon ang aton mga problema. Indi niya luyag nga saligan naton ang aton masigka-Cristiano, kag indi niya luyag nga magmalipayon kita. (Efeso 2:2) Nahibaluan ni Satanas nga ang negatibo nga hunahuna makahalit sa aton kag sa aton kaangtanan sa Dios. Pero may ginhatag si Jehova sa aton para mabatuan ang negatibo nga hunahuna. Ginhatagan niya kita sing paglaum.

17. Daw ano ka importante ang paglaum?

¹⁷ Sa 1 Tesalonica 5:8, ginpaanggid sang Biblia ang aton paglaum sa helmet nga nagaamlig sa ulo sang soldado sa inaway, gintawag sini ang helmet nga “ang paglaum nga kaluwasan.” Ang paglaum sa mga promisa ni Jehova makaamlig sa aton hunahuna kag makabulig nga mabatuan ang negatibo nga hunahuna.

18, 19. Paano ang paglaum nakapabakod kay Jesus?

¹⁸ Ginpabakod si Jesus sang iya paglaum. Sang katapusan nga gab-i sang iya kabuhi sa duta, nag-atubang sia sang lainlain nga kabudlayan. Gintraidoran sia sang suod niya nga abyan. Ginpanghiwala sia sang isa pa. Ang iban nagbiya sa iya kag nagpalagyo. Ang iya mga kasimanwa nagpamatok sa iya, kag luyag nila nga paantuson sia tubtob mapatay. Ano ang nakabulig sa iya para mabatas ang kasakit? “Tungod sa kalipay nga ginbutang sa iya atubangan ginbatas niya ang usok sang pag-antos.”—Hebreo 12:2.

¹⁹ Nahibaluan ni Jesus nga kon magpabilin sia nga matutom, mahimaya niya ang iya Amay kag mapamatud-an nga butigon si Satanas. Ini nga paglaum naghatag sa iya sing daku nga kalipay. Nahibaluan man niya nga sa indi madugay makaupod niya liwat ang iya Amay sa langit. Ini nga paglaum nakabulig sa iya nga makabatas. Pareho kay Jesus, dapat magpokus man kita sa aton paglaum. Makabulig ini sa aton nga makabatas bisan ano man ang matabo.

20. Ano ang makabulig sa imo nga mangin positibo?

²⁰ Nakita ni Jehova ang imo pagtuo kag pagbatas. (Isaias 30:18; basaha ang Malaquias 3:10.) Nagpromisa sia nga “ihatag niya ang mga handum sang imo tagipusuon.” (Salmo 37:4) Gani magpokus sa imo paglaum. Luyag ni Satanas nga madulaan ka sing paglaum kag magbatyag nga ang mga promisa ni Jehova indi gid matuman. Pero, indi magpadaug sa negatibo nga hunahuna! Kon mabatyagan mo nga nagakadula ang imo paglaum, mangayo sing bulig kay Jehova. Dumduma ang ginsiling sa Filipos 4:6, 7: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.”

21, 22. (a) Ano ang katuyuan ni Jehova para sa duta? (b) Ano ang determinado mo nga himuon?

²¹ Pamalandungi pirme ang makalilipay nga paglaum. Sa indi na lang madugay, ang tanan magasimba kay Jehova. (Bugna 7:9, 14) Hunahunaa ang kabuhi sa bag-o nga kalibutan. Sobra pa ini sa imo maimadyin! Wala na si Satanas, ang iya mga demonyo, kag ang tanan nga kalautan. Indi ka na magbalatian, kag indi ka mapatay. Sa baylo, kada adlaw magabugtaw ka nga puno sing kapagsik kag nalipay nga buhi ka. Ang tanan magabuligay para himuon ang duta nga isa ka paraiso. Ang tanan may maayo nga kalan-on kag ilistaran. Ang mga tawo indi na mapintas ukon masingki kundi magapakita sing matuodtuod nga kaayo sa isa kag isa. Sa ulihi, mabaton sang tanan nga tawo “ang mahimayaon nga kahilwayan sang mga anak sang Dios.”—Roma 8:21.

²² Luyag ni Jehova nga mangin pinakasuod mo sia nga Abyan. Gani himua ang tanan para tumanon si Jehova kag mangin suod sa iya kada adlaw. Huo, tanan kita makapabilin sa gugma sang Dios sa wala sing katubtuban!—Judas 21.