Ginkabig nga Takus Tuytuyan sa mga Tuburan sang Tubig sang Kabuhi
“Ang Kordero . . . magabantay sa ila, kag magatuytoy sa ila sa mga tuburan sang tubig sang kabuhi.”—BUG. 7:17, NW.
1. Paano ginpakilala sang Pulong sang Dios ang hinaplas nga mga Cristiano, kag ano ang responsibilidad nga gintugyan ni Jesus sa ila?
GINPAKILALA sang Pulong sang Dios ang hinaplas nga mga Cristiano nga amo ang magatatap sang mga intereses ni Cristo sa duta subong “matutom kag mainandamon nga ulipon.” Sang gin-usisa ni Cristo ini nga “ulipon” sang 1918, nasapwan niya ang mga hinaplas sa duta nga matutom sa pag-aman sang espirituwal nga “pagkaon sa nagakaigo nga tion.” Busa, si Jesus, ang Agalon, nalipay sa pagtangdo sa ila “sa tanan niya nga pagkabutang.” (Basaha ang Mateo 24:45-47, NW.) Sa sini nga paagi, antes matigayon sang mga hinaplas ang ila langitnon nga palanublion, magaalagad anay sila sa iban nga mga sumilimba ni Jehova diri sa duta.
2. Ano ang nalakip sa mga pagkabutang ni Jesus?
2 May awtoridad ang isa ka agalon sa iya mga pagkabutang, ukon mga ginapanag-iyahan, kag mahimo niya ini gamiton suno sa iya luyag. Ang pagkabutang ni Jesucristo, ang Hari nga ginpalingkod ni Jehova, nagalakip sang tanan nga intereses sang Ginharian diri sa duta. Lakip sa sini amo ang “dakung kadam-an” nga nakita ni apostol Juan sa palanan-awon. Subong sini ang paglaragway ni Juan sa dakung kadam-an: “Yari karon! isa ka dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal, nga nagatindog sa atubangan sang trono kag sa atubangan sang Kordero, nga nagasuksok sang puti nga malaba nga panapton; kag may mga paklang sang palma sa ila mga kamot.”—Bug. 7:9, NW.
3, 4. Ngaa pinasahi ang pribilehiyo sang dakung kadam-an?
3 Ang mga katapo sang dakung kadam-an nalakip sa ginpatuhuyan ni Jesus subong iya “iban nga mga karnero.” (Juan 10:16, NW) Ang ila paglaum amo ang kabuhi nga dayon sa paraiso sa duta. Nagasalig sila nga si Jesus “magatuytoy sa ila sa mga tuburan sang tubig sang kabuhi” kag nga “pahiran sang Dios ang tagsa ka luha sa ila mga mata.” Bangod sini nga paglaum, “ginlabhan nila ang ila malaba nga mga panapton kag ginpaputi ini sa dugo sang Kordero.” (Bug. 7:14, 17, NW) Nagtuo sila sa halad ni Jesus, amo nga sa panulok sang Dios ‘maputi ang ila mga panapton.’ Ginpahayag sila nga matarong subong mga abyan sang Dios, kaangay ni Abraham.
4 Dugang pa, sanglit ginakabig sang Dios nga matarong ang dakung kadam-an sang iban nga mga karnero, makalaum sila nga maluwas sa kalaglagan sining sistema sang mga butang sa dakung kapipit-an. (Sant. 2:23-26) Makapalapit sila kay Jehova, kag subong isa ka grupo, may dalayawon sila nga paglaum nga maluwas sa Armagedon. (Sant. 4:8; Bug. 7:15) Indi sila tuhay nga grupo kag handa sila sa pag-alagad sa idalom sang pagtuytoy sang langitnon nga Hari kag sang iya hinaplas nga mga kauturan sa duta.
5. Paano ginabuligan sang dakung kadam-an ang hinaplas nga mga utod ni Cristo?
5 Naeksperiensiahan kag padayon nga maeksperiensiahan sang hinaplas nga mga Cristiano ang mabaskog nga pagpamatok sang kalibutan ni Satanas. Walay sapayan sini, makasalig sila sa pagsakdag sang ila kaupod nga dakung kadam-an. Samtang diutay na lang karon ang kadamuon sang hinaplas nga mga Cristiano, kada tuig nagadamo naman sing linibo ka gatos ang dakung kadam-an. Indi masarangan sang mga hinaplas nga tatapon ang mga 100,000 ka Cristianong kongregasyon sa bug-os nga duta. Busa, ang isa ka bulig nga natigayon sang hinaplas gikan sa iban nga mga karnero amo ang pag-alagad sang kalipikado nga mga lalaki sang dakung kadam-an subong mga gulang sa kongregasyon. Nagabulig sila sa pagtatap sa minilyon ka Cristiano nga ginasalig karon sa “matutom kag mainandamon nga ulipon.”
6. Paano gintagna ang pagsakdag sang iban nga mga karnero sa hinaplas nga mga Cristiano?
6 Ang kinabubut-on nga pagbulig sang iban nga mga karnero sa hinaplas nga mga Cristiano gintagna ni manalagna Isaias. Nagsulat sia: “Amo ini ang ginsiling ni Jehova: ‘Ang wala ginabayaran nga mga mamumugon sang Egipto kag ang mga manugpatikang sang Etiopia kag ang mga Sabeanhon, mga tawo nga mataas, magakari gid sa imo, kag sila mangin imo. Magalakat sila sa likuran mo.’” (Isa. 45:14, NW) Sing malaragwayon, ang mga Cristiano nga may dutan-on nga paglaum karon nagalakat sa likuran sang mga hinaplas kag sang Nagadumala nga Hubon sini. Subong “wala ginabayaran nga mga mamumugon,” ang iban nga mga karnero kinabubut-on kag bug-os tagipusuon nga nagagamit sang ila kusog kag sang ila mga pagkabutang sa pagsakdag sang pagbantala sa bug-os nga duta nga ginsugo ni Cristo sa iya hinaplas nga mga sumulunod.—Binu. 1:8; Bug. 12:17.
7. Ngaa ginahanas ang dakung kadam-an?
7 Samtang ginabuligan nila ang ila hinaplas nga mga kauturan, ang dakung kadam-an ginahanas agod mangin pundasyon sang bag-ong katilingban sang mga tawo nga magaluntad pagkatapos sang Armagedon. Ini nga pundasyon dapat nga malig-on kag mapag-on, kag ang katapo sini dapat nga handa kag makasarang sa pagtuman sa panuytoy sang Agalon. Ang tagsa ka Cristiano ginhatagan sing kahigayunan sa pagpakita nga mahimo sia magamit sang Hari, nga si Cristo Jesus. Paagi sa pagtuo kag pagkamainunungon karon, ginapakita sang isa ka Cristiano nga mangin matinumanon sia kon hatagan sia sing panuytoy sang Hari sa bag-o nga kalibutan.
Mangin Matutom ang Dakung Kadam-an
8, 9. Paano ginapamatud-an sang dakung kadam-an ang ila katutom?
8 Ang iban nga mga karnero nga kaupod sang hinaplas nga mga Cristiano magapamatuod sang ila katutom sa nanuhaytuhay nga paagi. Una, ginabuligan nila ang mga hinaplas sa pagbantala sang maayong balita sang Ginharian sang Dios. (Mat. 24:14; 28:19, 20) Ikaduha, handa sila magpasakop sa panuytoy sang Nagadumala nga Hubon.—Heb. 13:17; basaha ang Zacarias 8:23.
9 Ikatlo, ginasakdag sang dakung kadam-an ang ila hinaplas nga mga kauturan paagi sa pagsunod sa matarong nga mga talaksan ni Jehova. Ginatinguhaan nila nga mapalambo ang “gugma, kalipay, paghidait, pagkamapinasensiahon, kaayo, pagkamaayo, pagtuo, kalulo, pagpugong sa kaugalingon.” (Gal. 5:22, 23, NW) Sa karon, ang pagpakita sini nga mga kinaiya sa baylo sang “mga buhat sang unod,” mahimo nga indi kinaandan. Apang, ang dakung kadam-an determinado nga likawan ang “pagpakighilawas, kahigkuan, lugak nga paggawi, idolatriya, espiritismo, pag-ilinaway, pinuyas, kaimon, pagsilabo sang kaakig, pagbaisay, pagbinahinbahin, mga sekta, kahisa, pagpahubog, magansal nga kinalipay, kag mga butang nga kaangay sini.”—Gal. 5:19-21, NW.
10. Ano ang determinado nga himuon sang dakung kadam-an?
10 Bangod di-himpit kita, mahimo nga mabudlay ang pagpatubas sang mga bunga sang espiritu, paglikaw sa mga buhat sang unod, kag pagpamatok sa pag-ipit sang kalibutan ni Satanas. Apang, determinado kita nga indi pagtugutan ang pagluya sing buot bangod sang aton kaluyahon, umalagi nga kapaslawan, ukon balatian nga mag-apektar sa aton pagtuo ukon magpatahaw sang aton gugma kay Jehova. Nahibaluan naton nga tumanon gid ni Jehova ang iya ginsaad nga luwason ang dakung kadam-an sa dakung kapipit-an.
11. Ano ang mga taktika ni Satanas agod pahuyangon ang pagtuo sang mga Cristiano?
11 Walay sapayan sini, dapat nga pirme kita magbantay bangod nahibaluan naton nga ang aton matuod nga kaaway amo ang Yawa, kag indi sia madali mangampo. (Basaha ang 1 Pedro 5:8.) Gingamit na niya ang mga apostata kag ang iban pa nga paagi agod kumbinsihon kita nga sayop ang aton mga panudlo. Apang ina nga taktika masami nga nagakapaslawan. Sing kaanggid, bisan pa nga nagahinay kon kaisa ang pagbantala bangod sang paghingabot, sa masami nangin rason pa gani ini agod nga magbakod ang pagtuo sang mga ginahingabot. Bangod sini, ginagamit ni Satanas ang isa ka pamaagi nga sa banta niya may daku nga tsansa agod pahuyangon ang aton pagtuo. Ginahingalitan niya ang pagluya sang aton buot. Ginpaandaman ang mga Cristiano sang unang siglo tuhoy sa sini, sang ginsilingan sila: “Binagbinaga ninyo sing maayo ang isa nga nagbatas sang supak nga hambal sang mga makasasala batok sa ila mismo kaayuhan.” Ngaa? “Agod indi kamo pagkapuyon kag mapunaw ang inyo kalag.”—Heb. 12:3, NW.
12. Paano ang laygay sang Biblia nagapabakod sa mga naluyahan sing buot?
12 Nagbatyag ka bala nga daw mangampo ka na? Nagbatyag ka bala kon kaisa nga napaslawan ka? Kon amo, indi pagtuguti si Satanas nga gamiton ini nga mga balatyagon sa pag-upang sa imo pag-alagad kay Jehova. Ang maid-id nga pagtuon sa Biblia, hanuot nga pangamuyo, kag regular nga pagtambong sa mga miting kag pagpakig-upod sa mga masigkatumuluo magapabakod sa imo kag magabulig sa imo nga indi ‘mapunaw ang imo kalag.’ Nagsaad si Jehova nga buligan niya ang mga nagaalagad sa iya nga maulian ang kusog, kag tumanon gid niya ini nga saad. (Basaha ang Isaias 40:30, 31.) Ituon ang inyo igtalupangod sa pag-alagad sa Ginharian. Likawi ang nagaubos sing tion nga mga tublag, kag maghugod sa pagbulig sa iban. Nian mapabakod ka nga magbatas walay sapayan sang pagluya sang buot.—Gal. 6:1, 2.
Naluwas sa Kapipit-an Pasulod sa Bag-ong Kalibutan
13. Ano ang hilikuton sang mga makalampuwas sa Armagedon?
13 Pagkatapos sang Armagedon, linaksa ka di-matarong nga banhawon ang kinahanglan nga tudluan sang mga dalanon ni Jehova. (Binu. 24:15) Kinahanglan nila matun-an ang tuhoy sa halad-gawad ni Jesus; dugang pa, dapat sila tudluan nga magtuo sa sina nga halad agod nga matigayon nila ang mga pagpakamaayo pasad sa sini. Dapat nila isikway ang ila butig nga relihiosong mga pagpati sang una kag biyaan ang ila anay pagkabuhi. Dapat nila matun-an ang pagsuklob sang bag-o nga personalidad nga amo ang tanda sang matuod nga mga Cristiano. (Efe. 4:22-24; Col. 3:9, 10) Madamo sing hilikuton ang katapo sang iban nga mga karnero nga makalampuwas sa Armagedon. Daw ano gid nga kalipay nga maalagad si Jehova sa sina nga tion, nga wala sing pag-ipit kag mga tublag sining malauton nga kalibutan!
14, 15. Ilaragway ang pagpaalintunay sa ulot sang nakalampuwas sa dakung kapipit-an kag sa mga matarong nga banhawon.
14 Madamo man sing matun-an sa sina nga tion ang matutom nga mga alagad ni Jehova nga napatay antes sang dutan-on nga ministeryo ni Jesus. Matun-an nila kon sin-o ang ginsaad nga Mesias, nga ila ginalauman apang wala nila makita. Sa ila pagkabuhi sadto, napakita na nila nga handa sila magpatudlo kay Jehova. Handurawa kon daw ano nga kalipay kag kadungganan nga buligan sila—halimbawa, sa pagpahangop kay Daniel tuhoy sa katumanan sang iya mga tagna nga ginsulat niya apang wala niya nahangpan!—Dan. 12:8, 9.
15 Siempre pa, bisan pa nga madamo sing matun-an sa aton ang mga banhawon, madamo man kita sing inugpamangkot sa ila. Masugiran man nila kita sang mga hitabo sa Biblia nga wala ginsaysay sing detalyado. Handurawa kon daw ano nga kalipay nga matun-an sing detalyado ang kabuhi ni Jesus gikan sa iya pakaisa nga si Juan Bautista! Walay duhaduha nga ang mga butang nga aton matun-an gikan sa sinang matutom nga mga saksi magapabaskog pa gid sang aton apresasyon sa Pulong sang Dios. Ang matutom nga mga alagad ni Jehova nga napatay, lakip ang pila sa dakung kadam-an nga mapatay sa tion sang katapusan, makatigayon sing isa ka “mas maayo nga pagkabanhaw.” Nakaalagad sila anay kay Jehova sa isa ka kalibutan nga gingamhan ni Satanas. Isa gid ka daku nga kalipay para sa ila nga makapadayon sa pag-alagad sa isa ka malinong nga kahimtangan sa bag-ong kalibutan!—Heb. 11:35; 1 Juan 5:19, NW.
16. Suno sa mga tagna, ano ang matabo sa Adlaw sang Paghukom?
16 Sa Adlaw sang Paghukom, buksan ang mga linukot. Ini nga linukot, lakip ang Biblia, mangin basihan sa paghukom sa tanan nga buhi kon bala takus sila sa pagtigayon sang kabuhi nga walay katapusan. (Basaha ang Bugna 20:12, 13.) Sa katapusan sang Adlaw sang Paghukom, ang tagsa ka indibiduwal may bastante na nga kahigayunan sa pagpakita kon sa diin sia dampig sa hulusayon tuhoy sa pagkasoberano sa uniberso. Sakdagon bala niya ang kahimusan sa Ginharian kag tugutan ang Kordero nga magatuytoy sa iya “sa mga tuburan sang tubig sang kabuhi”? Ukon pamatukan niya ini kag indi magpasakop sa Ginharian sang Dios? (Bug. 7:17, NW; Isa. 65:20) Sa sina nga tion ang tanan sa duta may kahigayunan sa paghimo sing personal nga desisyon, nga wala ginaupangan sang ila napanubli nga sala ukon sang malaut nga kahimtangan. Wala na sing magduhaduha pa sa kinamatarong sang katapusan nga paghukom ni Jehova. Ang lamang nga laglagon sing dayon amo ang mga malauton.—Bug. 20:14, 15.
17, 18. Ano ang malipayon nga ginapaabot sang hinaplas nga mga Cristiano kag sang iban nga mga karnero sa Adlaw sang Paghukom?
17 Ang hinaplas nga mga Cristiano subong, nga ginkabig nga takus sa pagbaton sang isa ka Ginharian, malangkagon nga nagapaabot sang ila paggahom sa Adlaw sang Paghukom. Daku gid ini nga pribilehiyo para ila! Napahulag sila sini nga paglaum nga sundon ang ginlaygay ni Pedro sa ila mga kauturan sang unang siglo: “Himua ninyo sing labi pa ang inyo bug-os nga masarangan agod mapat-od ninyo ang pagtawag kag pagpili sa inyo; kay kon padayon ninyo nga ginahimo ini nga mga butang indi gid kamo mapaslawan. Sa pagkamatuod, iaman sa inyo ang mahimayaon nga pagsulod sa wala katapusan nga ginharian sang aton Ginuo kag Manluluwas nga si Jesucristo.”—2 Ped. 1:10, 11, NW.
18 Nalipay ang iban nga mga karnero sa paglaum sang ila hinaplas nga mga kauturan. Determinado ang iban nga mga karnero nga buligan sila. Subong mga abyan sang Dios karon, napahulag sila nga himuon ang ila bug-os nga masarangan sa pag-alagad sa Dios. Sa Adlaw sang Paghukom, mangin malipayon sila sa pagsakdag sing bug-os tagipusuon sa kahimusan sang Dios samtang ginatuytuyan sila ni Jesus sa tuburan sang tubig sang kabuhi. Nian, sa katapusan, kabigon sila nga takus nga mangin alagad ni Jehova diri sa duta tubtob sa walay katubtuban!—Roma 8:20, 21; Bug. 21:1-7.
Madumduman Mo Bala?
• Ano ang nalakip sa mga pagkabutang ni Jesus?
• Paano ginasakdag sang dakung kadam-an ang ila hinaplas nga mga kauturan?
• Ano nga mga pribilehiyo kag paglaum ang matigayon sang dakung kadam-an?
• Paano mo ginatamod ang Adlaw sang Paghukom?
[Piktyur sa pahina 25]
Ang dakung kadam-an naglaba sang ila mga panapton kag nagpaputi sini paagi sa dugo sang Kordero
[Piktyur sa pahina 27]
Ano ang ginalauman mo nga matun-an gikan sa mga matutom nga banhawon?