Ginaapresyar Mo Bala ang Sagrado nga mga Butang?
“Tinguhaa ninyo ang pagpakighidait sa tanan nga tawo, kag ang pagkabalaan nga sa wala ini walay tawo ang makakita sang Ginuo, tatapa . . . nga walay isa nga magmakihilawason ukon bisan sin-o nga wala nagaapresyar sa sagrado nga mga butang, subong kay Esau, nga sa isa ka kaonan nagbaligya sang iya mga kinamatarong sa pagkapanganay.”—HEBREO 12:14-16.
1. Ano nga kakulang sing apresasyon ang ginapakita sang kalabanan nga katawhan, apang paano tuhay ang mga Cristiano?
SI Jehova nga aton Dios amo ang labing maalwan nga Manug-aman. Maalwan niya nga ginahatag ang mga kinahanglanon sang tanan niya nga mga tinuga. Apang, ang kalabanan nga katawhan wala nagahunahuna sini. Wala nila ginapasalamati si Jehova ukon ginakilala ang ila daku nga utang sa iya. Ang mga Cristiano, sa pihak nga bahin, wala nagapasapayan sa kaayo ni Jehova. Ginapadunggan nila sia sa kon ano ang ginhimo niya tungod sa ila. Bangod sang ila debosyon sa iya, gintugyan ni Jehova sa iya katawhan ang madamong sagrado nga mga butang nga wala ginaagom sang katawhan sa kabilugan. Mga butang ini nga hamili, ginakabig nga balaan kag may labot sa pagsimba kay Jehova. Nahibaluan mo bala kon ano ining sagrado nga mga butang? Kag may tudok kag tinagipusuon ka bala nga apresasyon para sa ila?—Salmo 104:10-28; Mateo 5:45; Bugna 4:11.
2. Sin-o ang nagpakita sing talalupangdon nga kakulang sing apresasyon?
2 Indi tanan nga katawhan sang Dios ang nag-apresyar sing nagakaigo sa sagrado nga mga butang. Ang anak ni Isaac nga si Esau, halimbawa, napaslawan sa sini nga bahin. Si Pablo naghambal tuhoy sa iya sang magsulat sia sa hinaplas nga Hebreong mga Cristiano. Sa tapos sila mapaig-on nga ‘tinguhaon ang pagpakighidait sa tanan nga tawo,’ ginpaandaman niya sila nga pat-uron nga sa tunga nila “wala sing makihilawason ukon bisan sin-o nga wala nagaapresyar sa sagrado nga mga butang, subong kay Esau, nga sa isa ka kaonan nagbaligya sang iya mga kinamatarong sa pagkapanganay.”—Hebreo 12:14-16.
3, 4. Anong sagrado nga mga kinamatarong sa pagkapanganay ang ginbaligya ni Esau kay Jacob tungod sa isa ka yahong nga linaga?
3 Ano ining mga kinamatarong sa pagkapanganay? Nagsaad si Jehova sa lolo ni Esau, nga si Abraham, nga paagi sa iya kag sa iya mga kaliwat matawo sa ulihi ang isa nga mangin ginsaad nga Binhi, ang Mesias, ukon ang Cristo. Paagi sining Binhi ang tanan nga pungsod makasarang sa pagpakamaayo sa ila kaugalingon, nga nagadul-ong sa kahilwayan gikan sa sala kag kamatayon.—Genesis 22:15-18; Galacia 3:16.
4 Si Esau, nga panganay ni Isaac, may kahigayunan nga mangin bahin sang linya nga magapatubas sina nga Binhi. Bahin ini sang iya pagkapanganay. Apang sa kahuya niya, ang rekord sang Biblia nagasiling: “Gintamay ni Esau ang iya pagkapanganay.” Padasudaso nga ginbaligya niya ini tungod sa isa ka kaonan sang mapula nga linaga kag pila ka tinapay. Sa pagkamatuod, indi naton luyag nga ilugon ang iya kakulang sing apresasyon. Sa baylo, dapat naton palambuon ang panimuot sang utod ni Esau nga si Jacob. Sia ang madason sa linya sa pagkapanganay, nga ginbakal niya bangod sang kakulang sing apresasyon sang iya utod. Busa ginpat-od ni Jacob nga ang kinamatarong nga mangin katigulangan sang ginsaad nga Binhi ginliton sa isa nga nagahamili sing nagakaigo sining sagrado nga butang.—Genesis 25:27-34.
5. Anong sagrado nga mga butang ang binagbinagon naton, kag paano naton malikawan nga pasapayanan ini?
5 Sa sulod sang Cristianong kongregasyon, ginhimo ni Jehova nga matigayon ang madamong sagrado nga mga butang agod magpabilin kita nga mabaskog sa espirituwal kag nasangkapan sing nagakaigo sa pag-alagad sa iya. Hambalan naton ang madamo sini. Nian, sing indibiduwal, sarang kita makapamalandong sa sini kag mapabakud ang aton apresasyon sa sini agod indi naton ini mapasapayanan.
Ang Ngalan ni Jehova kag ang Gawad—Labing Sagrado
6. Sa anong mga paagi sarang naton mapakita nga wala naton ginapasapayanan ang pagkasagrado sang ngalan ni Jehova?
6 Ang una sa aton listahan sang sagrado nga mga butang amo ang ngalan ni Jehova. Daw ano kataas ini nga ngalan sa imo hunahuna kag tagipusuon? Sang ginhatag ang modelo nga pangamuyo, si Jesus nagsiling primero: “Pakabalaanon ang imo ngalan.” (Mateo 6:9) Sang ginbawtismuhan kita, nangin isa kita sang mga Saksi ni Jehova. (Isaias 43:10, 11) Daw ano kadaku nga kadungganan! Kag kon nagahambal kita nahanungod sa kaayo ni Jehova kag sa iya dalagku nga mga katuyuan, nakilal-an sia sang iban paagi sa iya personal nga ngalan, kag luyag man nila nga alagaron sia. Apang kon ang isa nagapatumbaya sa paghambal nahanungod sa iya ukon, sing malain pa, nagahimo sing malaut, nagadala ini sing pasipala sa maayo nga ngalan kag reputasyon ni Jehova. Pirme ginapanikasugan sang matutom nga Cristianong mga Saksi ni Jehova nga pakabalaanon ang iya balaan nga ngalan sa atubangan sang iban paagi sa ginasiling kag ginahimo nila.—Levitico 22:31, 32; Deuteronomio 5:11.
7. Ngaa dapat naton ipakita ang bug-os nga apresasyon sa halad nga gawad ni Cristo?
7 Nagapangibabaw sa listahan sang sagrado nga mga butang amo ang halad nga gawad. Daw ano ka bilidhon ang halad ni Cristo sa imo? Paagi lamang sa sadsaran sang bug-os nga pagtuo sa sining himpit tawhanon nga halad nga mapatawad ang aton mga sala. (1 Juan 2:1, 2) Si Pablo nagahambal nahanungod sa hinaplas nga kongregasyon subong “ginbakal paagi sa dugo sang kaugalingon nga Anak [sang Dios].” (Binuhatan 20:28; ipaanggid sa 1 Pedro 1:17-19.) Si Jesus, ang bugtong nga Anak sang Dios, nagbiya sang iya posisyon sa langit, nagkabuhi sa duta sa tunga sang makasasala nga mga lalaki kag mga babayi, kag nian ginhalad ang iya himpit tawhanon nga kabuhi sa masakit nga kamatayon sa usok sang pag-antos agod matigayon naton ang kabuhi nga walay katapusan. (Mateo 20:28) Pagkawalay kabalaslan gid kon ang isa indi magpakita sa adlaw-adlaw sing tudok nga apresasyon para sa sining hamili nga dulot sang Dios.—Hebreo 10:28, 29; Judas 4, 5.
Ang Aton Kaangtanan kay Jehova kag sa Iya Organisasyon
8. Daw ano ka hamili ang aton kaangtanan kay Jehova?
8 Nagadul-ong ini sa aton sa isa pa ka sagrado katama nga butang, ang aton kaangtanan kay Jehova. Mahigugmaon gid nga dapat naton pakamahalon ini nga pagkasuod sa aton langitnon nga Amay. Kon kita ‘magpalapit sa Dios, magapalapit sia sa aton.’ (Santiago 4:8) Ginahigugma niya kita sing daku, kag luyag niya nga higugmaon naton sia upod ang aton bug-os nga tagipusuon. (Mateo 22:37, 38; Juan 3:16) Ginhatagan ni David ang iya anak nga si Solomon sing maayo nga laygay nahanungod sa iya kaangtanan kay Jehova. Nalakip sa sini amo ang isa ka paandam: “Kag ikaw, Solomon nga anak ko, kilalahon mo ang Dios sang imo amay kag alagdon sia sa himpit nga tagipusuon kag sa malipayon nga kalag; kay si Jehova nagausisa sang tanan nga tagipusuon, kag nagahangop sang tanan nga painoino sang mga hunahuna. Kon pangitaon mo sia, makita sia nimo; apang kon bayaan mo sia, isikway ka niya sing dayon.” (1 Cronica 28:9) Busa “tipigi ang inyo kaugalingon sa gugma sang Dios, maghulat sang kaluoy sang aton Ginuong Jesucristo nga sa kabuhi nga walay katapusan.”—Judas 21.
9. Sa anong mga paagi ginapakita naton nga wala naton ginapasapayanan ang pribilehiyo nga mangin bahin sang organisasyon ni Jehova?
9 Ginaapresyar mo man bala kon daw ano ka sagrado nga pribilehiyo ang mangin bahin sang organisasyon ni Jehova? Dapat naton tanan dumdumon nga yari kita sa sini bangod sang dibagay nga kaluoy ni Jehova. Kon ang isa napamatud-an nga dimaapresyahon kag nangin dimahinulsulon nga makasasala, madula niya ini nga pribilehiyo. Si Pablo nagpaandam: “Busa ang nagahunahuna nga nagatindog sia mag-andam basi kon mapukan sia.” (1 Corinto 10:6-12) Ginhatag ni Pablo ini nga paandam sa tapos masugid ang tuhoy sa 23,000 ka Israelinhon nga napatay bangod sang idolatriya kag imoralidad. Ginapakita naton ang aton apresasyon sa pagkasagrado sang organisasyon ni Jehova paagi sa paghimo sang tagsa sa aton sang aton bahin nga huptan ini nga hilway sa kahigkuan, imoralidad, pinuyas, komersialismo, kag sa pagbatyag sing pagkasuperyor kag pagkamaynadampigan. (2 Corinto 7:1; 1 Pedro 1:14-16) Mapabakud naton ang higot sang utudnon nga gugma, samtang ginatuman sing maayo ang teokratiko nga kahimusan kag nagakooperar upod sadtong nagapanguna.—1 Tesalonica 4:3-8; 5:12, 13.
Ang Pulong, mga Kasuguan sang Dios, kag Paglaum sa Ginharian
10. Paano naton ginapakita nga ginaapresyar naton sing bug-os ang Balaan nga Kasulatan?
10 Ang inspirado nga Pulong sang Dios, ang Balaan nga Biblia, tuman man ka sagrado. Nagaunod ini sing balaan nga mga pahibalo, mga instruksion, laygay, mga saad, mga kapahayagan, huo, sing tanan nga kinahanglanon naton agod ‘sangkapan kita sa tagsa ka maayo nga buhat.’ (2 Timoteo 3:16, 17) Paano naton mapakita ang apresasyon sa sini? Una, paagi sa pagtuon kag pag-aplikar kon ano ang naton-an naton sa aton kabuhi. Nian, paagi sa pagpamati sing nagakaigo sa napasad sa Biblia nga “pagkaon sa nagakaigo nga tion” nga ginaaman ni Jehova paagi sa “matutom kag mainandamon nga ulipon.” (Mateo 24:45) Kag gikan sa praktikal nga punto-de-vista, dapat naton huptan nga mahipid kag matinlo ang aton personal nga mga kopya sang Biblia, kag ang aton man Cristianong mga publikasyon nga ginagamit naton sa aton pagbantala nga hilikuton. Mahimo ini magadala sing pasipala kay Jehova kon magguwa kita sa pagpanaksi kag sa paggamit sing Biblia nga mahigko ukon malaw-ay.
11. Ngaa indi naton dapat pasapayanan ang sagrado nga mga kasuguan ni Jehova?
11 Yara sa Pulong sang Dios ang sagrado nga mga kasuguan ni Jehova. Pirme mo bala ini ginatamod nga sagrado, ukon ginapasapayanan mo bala ini kon kaisa? Ang mga kasuguan ni Jehova kaangay sang mga karatula, mga tanda, kag walay peligro nga mga lambay sa banas padulong sa kabuhi. Kon tumanon naton ini, makalakbay kita sing maayo kag makalab-ot sa ulihi sa aton kaladtuan sa bag-ong kalibutan ni Jehova; apang kon ginapasapayanan naton ang mga sugo kag mga pahanumdom ni Jehova, nagapadulong kita sa kapahamakan.—Salmo 119:10, 11, 35, 101, 102; Hulubaton 3:1-4.
12. Paano ang aton paglaum sa Ginharian isa ka sagrado nga butang?
12 Paagi sa Biblia, naton-an naton ang nahanungod sa sagrado nga butang nga dapat mangin mahal sa aton tagipusuon: ang aton paglaum sa Ginharian. Tuhoy sa matutom nga si Abraham, si Pablo nagasiling sa Hebreo 11:10: “Kay ginhulat niya ang siudad [Ginharian sang Dios] nga may matuod nga mga sadsaran, nga ang manunukod kag manugbuhat sini nga siudad amo ang Dios.” May amo man bala ikaw ka kusog kag mapinadayunon nga paglaum sa Ginharian sang Dios? Ang imo bala pagtuo tuman ka kusog nga ang imo tagipusuon wala nagapangduhaduha, kag ang imo bala kakugi nagapabilin nga wala nabuhinan samtang ginahulat mo ang mga katuyuan sang Dios nga matuman sa iya pat-od nga tion?—Mateo 24:20-22, 33, 34, 42.
Sagrado nga mga Pagtinipon kag mga Pribilehiyo
13. Ngaa indi naton dapat pasapayanan ang mga benepisyo sang Cristianong mga miting?
13 “Pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban,” paandam ni Pablo. Ginapakita sini nga ang aton Cristianong mga miting isa pa ka sagrado nga aman nga indi dapat pagpasapayanan. Sa mga miting, nagabaton kita sing importante nga instruksion kag mainit nga pagpakig-upod nga kinahanglan naton sing madagmit. Makahimo man kita diri sing “dayag nga pagpahayag sang aton paglaum” paagi sa paghambal gikan sa plataporma kon may kahigayunan kita kag paagi sa pagkomento sing tayuyon. (Hebreo 10:23-25) Kag bangod ang Kingdom Hall amo ang ginahiwatan sang kalabanan naton nga mga miting, tayuyon ka bala nga nagaamot sing mga pundo kag nagapangabudlay sing lakas agod huptan ini nga namentinar sing nagakaigo?—Exodo 35:21.
14. Ano ang magabulig sa aton sa pag-apresyar nga ang aton Cristianong ministeryo isa ka sagrado nga bahandi?
14 Ang pribilehiyo sang mga Cristiano sa pagbantala sang maayong balita ginpaanggid ni Pablo sa “bahandi sa mga suludlan nga duta.” (2 Corinto 4:1, 7) Huo, ang Cristianong ministeryo isa man ka sagrado nga butang nga ginaapresyar naton sing tudok. Bisan pa nga ang kalabanan sa mga ginabantalaan naton wala nagasapak, dapat naton pirme pahanumdumon ang aton kaugalingon sang aton mataas nga pribilehiyo sa pagsugid sa iban nahanungod kay Jehova kag sa iya mga katuyuan. Busa ginatuman naton ang aton komisyon nga ibantala ang maayong balita sang Ginharian sang Dios kag maghimo sing mga disipulo. (Mateo 24:14; 28:19, 20) Ang pagtan-aw sa bag-ong mga disipulo nga nagahimo sing pag-uswag isa pa ka dugang nga kabangdanan sang kalipay. (1 Tesalonica 2:19, 20) Kon ginapakabahandi naton ang ministeryo, indi kita mangin ditayuyon ukon diaktibo sa pagpahayag sang maayong balita.
15. Ngaa indi dapat pagpasapayanan ang pag-atipan sa mga pribilehiyo sa sulod sang organisasyon ni Jehova?
15 Ang mga pribilehiyo sa sulod sang organisasyon ni Jehova sagrado man. Sa pagkamatuod, ina nga mga pribilehiyo isa ka sagrado nga tinugyan. (Ipaanggid ang Binuhatan 20:28.) Nagakinahanglan man ang responsabilidad sing pagtatap, pagbantay, pagtudlo, ukon iban pa nga pag-alagad sa mga masigka Cristiano, hatagi ini sing ekstraordinaryo nga pag-ulikid. Bisan pa nga ang buluhaton daw indi importante, indi ini pagpasapayani, kundi himua ini sing maayo, sa gilayon, subong nga kay Jehova. Dumduma, “ang tawo nga matutom sa diutay matutom man sa daku.”—Lucas 16:10.
Pag-asawahay kag ang Pamilya
16. Sa anong mga paagi mahimo naton ginapakita nga ginakabig naton ang pag-asawahay kag ang pamilya nga sagrado nga mga butang?
16 Kon nagalista sing sagrado nga mga butang, indi pagkalimti nga ilakip ang pag-asawahay kag ang pamilya. Matuod, ang mga di-Cristiano nagaminyo man, apang ginatamod sang mga Cristiano ang pag-asawahay subong sagrado, nga nagadalahig sa ila pagsimba kay Jehova. (Ipaanggid ang 1 Pedro 3:1-7.) Paano nila ginapakita ang pagtahod sa sining sagrado nga butang? Ang Biblia nagasiling sa Hebreo 13:4: “Paghuptan sing dungganon sang tanan ang pag-asawahay, kag ang higdaan sang pagkasal dipagdagtaan, kay hukman sang Dios ang mga makihilawason kag mga makilahion.” Si Jesus nagpaandam nga ang pagtulok sa isa ka babayi sing dalayon sa pagkaibog sa iya katumbas sa pagpanglahi sa tagipusuon. (Mateo 5:27, 28) Kon ginapakamaayo mo ang magminyo, himua ini sing dungganon. Nian, indi pagpasapayani ang inyo pag-asawahay. Lig-una ang matuod nga gugma kag tudok nga pagtahod kada adlaw. Kon may kabataan na kamo, ‘padakua sila sa disiplina kag panghunahuna ni Jehova.’ Sa sining paagi ang imo pamilya mangin “balaan.”—Efeso 6:4; 1 Corinto 7:14.
Ang Balaan nga Espiritu ni Jehova kag ang Pangamuyo
17. Ngaa wala naton ginapasapayanan ang balaan nga espiritu sang Dios?
17 Kinahanglan naton tanan ang mga aman ni Jehova, kag ang isa ka importante nga bulig gikan kay Jehova amo ang iya balaan nga espiritu. (Juan 14:26) Indi naton pirme mahibaluan ang mga paagi nga ginagamit ni Jehova ang iya balaan nga espiritu tungod sa aton, apang isa ka butang ang pat-od: Indi kita mahimo nga magpadayon kon wala ini. Dapat naton ipangabay sa pangamuyo ang balaan nga espiritu agod buligan kita sa paghangop sa matuod nga mga panudlo kag sa pagbatas sa mga pagtilaw. Kinahanglan naton ini agod buligan kita sa pagpalambo sa mga bunga sang espiritu. (Galacia 5:22, 23) Kag ginapaandaman kita sa Efeso 4:30 nga indi naton dapat ‘pagpasubuon’ ang balaan nga espiritu, nagahimo sang mga butang nga magapugong sang pag-ilig sini sa aton. Kabay nga pirme naton apresyahon ang balaan nga espiritu ni Jehova.
18. Ngaa ang pangamuyo isa ka sagrado nga pribilehiyo?
18 Ang katapusan nga sagrado nga butang nga hambalan naton, ang pangamuyo, pat-od nga indi gid kubos sing importansia. Daw ano ka daku ang aton pribilehiyo sa pagkomunikar sa Soberano sang uniberso, si Jehova! Sing maathag, dapat naton sia palapitan sing matinahuron, sing dungganon, sing mahalungon. Makasalig kita nga pamatian niya kag sabton ang aton mga pangamuyo nga ginahimo nahisuno sa iya kabubut-on. “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.” (Filipos 4:6) Ang pangamuyo dapat nga magahimo sa aton nga mainapresyahon sa sagrado nga mga butang.
19. Anong mga pagpakamaayo ang nagaabot sa sadtong nagakaigo nga nagaapresyar sa sagrado nga mga butang?
19 Bag-o lang naton ginhambalan ang 13 ka sagrado nga mga butang nga indi gid naton dapat pagpasapayanan. Madamo pa ang sarang masambit. Kon ginaapresyar naton ina nga mga butang, mahuptan naton ang maayo nga kaangtanan upod sa aton Dios, nga si Jehova, kag matigayon ang iya matag-adlaw nga pagpakamaayo. Nagahatag ini sing kalinong sa hunahuna, upod ang maayo nga konsiensia! Indi gid pagpasapayani inang maayo nga kaangtanan! Higugmaa si Jehova upod ang imo bug-os nga tagipusuon, hunahuna, kalag, kag kusog, kag pirme niya ikaw higugmaon. (1 Juan 4:16) Wala sing butang nga makabugto sina nga wagkus sang gugma luwas sang imo kaugalingon nga pagkadimatutom.—Roma 8:38, 39.
20. Paano kita madinalag-on nga makalakat sa dalan padulong sa kabuhi sa bag-ong kalibutan ni Jehova?
20 Pirme man kita magmasako sa pag-alagad sa Ginharian, nga nagaatipan sang tanan naton nga mga pribilehiyo kag nagaapresyar sang tanan nga espirituwal nga mga aman. Upod ang tagipusuon nga puno pirme sing apresasyon, kabay nga mangin alisto kita sa pagtuman sa tanan nga sagradong mga sugo kag mga pahanumdom ni Jehova, nagaapresyar nga ginhatag ini agod tuytuyan kita tubtob sa dalan padulong sa kabuhi. Kag, samtang padayon kita nga nagalakat sa sinang makitid nga dalan padulong sa kabuhi, mahimo nga indi lamang kita tipigan ni Jehova nga buhi sa daku nga kapipit-an kundi hatagan man kita sing dayon nga kabuhi upod ang walay katapusan nga mga pagpakamaayo sa iya bag-ong kalibutan, nga tuman na kalapit karon. Ini tanan bangod ginaapresyar naton ang sagrado nga mga butang.
Ano nga Sabat ang Mahatag Mo?
◻ Paano naton malikawan nga pasapayanan ang ngalan ni Jehova kag ang halad nga gawad?
◻ Ano ang nagapakita nga wala naton ginaapresyar ang aton kaangtanan upod kay Jehova kag sa iya organisasyon?
◻ Ano ang pila ka butang nga nagapakita sang aton apresasyon sa Pulong kag mga kasuguan sang Dios, kag sa paglaum sa Ginharian?
◻ Paano naton ginapakita nga ginapasapayanan naton ang Cristianong mga miting kag teokratikong mga pribilehiyo?
◻ Ano ang pila ka dugang nga sagrado nga mga butang nga sa sini dapat naton palambuon ang tudok nga apresasyon?