“Ang Pulong sang Dios . . . Gamhanan”

“Ang pulong sang Dios buhi kag gamhanan.”—HEB. 4:12.

1. Ngaa kumbinsido ka nga ang Pulong sang Dios gamhanan? (Tan-awa ang piktyur sa umpisa sini nga artikulo.)

BILANG katawhan ni Jehova, kumbinsido kita nga ang iya pulong, ang iya mensahe sa katawhan, “buhi kag gamhanan.” (Heb. 4:12) Madamo sa aton ang makapamatuod sang gahom sang Biblia sa pagbag-o sang kabuhi. Ang pila sa aton mga kauturan mga kawatan sang una, adik, ukon imoral. Ang iban nangin bantog ukon manggaranon sa sini nga sistema pero nakabatyag sila nga may kulang sa ila kabuhi. (Man. 2:3-11) Madamo nga tawo nga daw wala sing direksion ang kabuhi sang una ang nagalakat na subong sa dalan padulong sa kabuhi bangod sang gahom sang Biblia. Ang pila ka eksperiensia nga nagapamatuod sini mabasa sa Ang Lalantawan sa serye nga “Ang Biblia Nagapabag-o sang Kabuhi.” Mahimo nga nabasa mo na ang pila sa sini kag napalig-on ka gid. Kag bisan Cristiano na ang isa, padayon gihapon ang iya pag-uswag sa espirituwal sa bulig sang Kasulatan.

2. Ano ang nagapakita nga gamhanan ang Pulong sang Dios sang unang siglo?

² Wala na kita natingala nga madamo subong ang naghimo sing daku nga pagbag-o sa ila kabuhi sang magtuon sila sang Pulong sang Dios. Ini nga mga eksperiensia nagapahanumdom sa aton sang aton mga kauturan sang unang siglo nga may langitnon nga paglaum. (Basaha ang 1 Corinto 6:9-11.) Pagkatapos masambit ni apostol Pablo ang mga sahi sang tawo nga indi makapanubli sang Ginharian sang Dios, nagsiling sia: “Amo sina anay ang iban sa inyo.” Pero nagbag-o sila sa bulig sang Kasulatan kag sang balaan nga espiritu sang Dios. Pero bisan Cristiano na sila, nakahimo gihapon ang iban sang serioso nga sala. Halimbawa, ginasambit sang Biblia ang parte sa isa ka hinaplas nga Cristiano sang unang siglo nga gin-disfellowship; sang ulihi, nakapanumbalik sia. (1 Cor. 5:1-5; 2 Cor. 2:5-8) Makapalig-on gid nga nasarangan sang aton mga kauturan nga maghimo sing daku nga pagbag-o paagi sa bulig sang Pulong sang Dios.

3. Ano ang binagbinagon naton sa sini nga artikulo?

³ Bangod ginhatagan kita sang Dios sang iya Pulong kag gamhanan ini, gusto naton nga gamiton ini sing maayo. (2 Tim. 2:15) Gani sa sini nga artikulo, binagbinagon naton kon paano naton magamit ang gahom sang Pulong sang Dios (1) sa aton kabuhi, (2) sa aton ministeryo, kag (3) kon nagatudlo kita sa kongregasyon. Magabulig ini sa aton nga ipakita ang aton gugma kag pagpasalamat sa aton mahigugmaon nga Amay sa langit, nga nagatudlo sa aton para sa aton kaayuhan.—Isa. 48:17.

SA ATON KABUHI

4. (a) Ano ang dapat himuon para may epekto sa aton ang Pulong sang Dios? (b) Ano ang ginahimo mo para mahatagan sing tion ang pagbasa sang Biblia?

⁴ Para may epekto sa aton ang Pulong sang Dios, dapat naton ini basahon sing regular, adlaw-adlaw kon posible. (Jos. 1:8) Kalabanan sa aton masako ang kabuhi. Pero indi naton dapat pagtugutan ang bisan ano, bisan ang aton mga responsibilidad, nga mag-upang sa aton iskedyul sa pagbasa sang Biblia. (Basaha ang Efeso 5:15, 16.) Madamo nga katawhan ni Jehova ang nakakita sing mga paagi para mahatagan nila sing tion ang pagbasa sang Biblia adlaw-adlaw, ayhan sing aga pa, sa adlaw, ukon sa gab-i. Pareho sa salmista, nagasiling man sila: “Ginahigugma ko gid ang imo kasuguan! Ginapamalandungan ko ini sa bug-os nga adlaw.”—Sal. 119:97.

5, 6. (a) Ngaa importante ang pagpamalandong? (b) Paano kita makapamalandong sing epektibo? (c) Paano ka nakabenepisyo sa pagbasa sang Pulong sang Dios kag pagpamalandong sa sini?

⁵ Magluwas sa pagbasa sang Biblia, importante man nga pamalandungan naton ang aton ginabasa. (Sal. 1:1-3) Kon indi naton ini paghimuon, indi naton maaplikar sa aton kabuhi ang kaalam halin sa Biblia. Gani kon nagabasa kita, sa Biblia man ukon sa gadyet, dapat tugutan naton nga tandugon sini ang aton tagipusuon.

Isa ka Saksi ni Jehova nga nagabasa sang Biblia

⁶ Paano kita makapamalandong sing epektibo? Madamo ang nakatalupangod nga makabulig ang pagdulog sing makadali pagkatapos mabasa ang isa ka bahin sang Kasulatan kag binagbinagon ang mga pamangkot pareho sini: ‘Ano ang ginasugid sini sa akon parte kay Jehova? Ginaaplikar ko na bala ang prinsipio sini? Ano pa ang puede ko pauswagon?’ Kon nagapangamuyo kita kag ginapamalandungan naton ang Pulong sang Dios, mapahulag pa gid kita nga iaplikar ang tanan nga laygay sini. Paagi sini, makabulig gid ang gahom sang Biblia sa aton kabuhi.—2 Cor. 10:4, 5.

SA MINISTERYO

7. Paano naton magamit sing maayo ang Pulong sang Dios sa aton ministeryo?

⁷ Ano ang makabulig sa aton para magamit naton sing maayo ang Pulong sang Dios sa aton ministeryo? Ang una amo ang pirme nga paggamit sini sa aton pagbantala kag pagtudlo nga hilikuton. Ang isa ka utod nagsiling, “Kon kaupod mo si Jehova sa pagpamalaybalay, ikaw lang bala ang pirme mahambal ukon sia ang pahambalon mo?” Ang iya punto amo ini: Kon ginabasa naton ang Pulong sang Dios sa ministeryo, ginatugutan naton nga si Jehova ang maghambal sa tagbalay. Ang isa ka nagakaigo nga teksto mas daku ang epekto sangsa bisan ano nga ihambal naton. (1 Tes. 2:13) Pamangkuta ang imo kaugalingon, ‘Ginatinguhaan ko gid bala nga basahon ang Pulong sang Dios sa akon ginasugiran sang maayong balita?’

8. Ngaa indi bastante ang pagbasa lang sang mga teksto kon nagabantala kita?

⁸ Siempre, indi bastante ang pagbasa lang sang mga teksto sa Biblia sa aton ginaistorya. Ngaa? Bangod madamo nga tawo ang diutay lang ukon wala sing nahibaluan sa Biblia. Matuod ini sang unang siglo, kag amo man subong. (Roma 10:2) Gani indi kita dapat maghaumhaum nga nahangpan dayon sang aton kaistorya ang teksto nga ginbasa naton. Dapat naton ipatalupangod ang panguna nga mga tinaga sa teksto, ayhan paagi sa pagbasa sini liwat, kag dayon ipaathag ang kahulugan sini. Makabulig ini para makalab-ot ang mensahe sang Pulong sang Dios sa hunahuna kag tagipusuon sang mga nagapamati sa aton.—Basaha ang Lucas 24:32.

9. Paano naton mabuligan ang aton kaistorya nga pabaloran ang Biblia? Maghatag sing halimbawa.

⁹ Ang aton ihambal antes naton basahon ang teksto dapat makabulig sa aton kaistorya nga pabaloran ang Biblia. Halimbawa, mahimo kita magsiling, “Tan-awon naton kon ano ang ginasiling sang aton Manunuga parte sa sini.” Kon indi Cristiano ang aton kaistorya, mahimo kita magsiling, “Talupangda kon ano ang ginasiling sa aton sang Balaan nga mga Sinulatan.” Kon indi relihioso ang aton ginabantalaan, mahimo kita magsiling, “Nabatian mo na bala ining dumaan nga hulubaton?” Kon binagbinagon naton ang ginhalinan kag ginapatihan sang aton kaistorya, mapasibu naton ang aton ihambal.—1 Cor. 9:22, 23.

Ginagamit sang mga Saksi ni Jehova ang Biblia sa ila ministeryo

10. (a) Isaysay ang eksperiensia sang isa ka utod. (b) Ngaa masiling mo nga gamhanan ang Pulong sang Dios sa imo ministeryo?

¹⁰ Madamo ang nakatalupangod nga ang paggamit sang Pulong sang Dios sa ministeryo may daku nga epekto sa ila ginabantalaan. Binagbinaga ini nga halimbawa. Ginduaw liwat sang isa ka utod ang isa ka tigulang nga pila ka tuig na nga nagabasa sang aton mga magasin. Sa baylo nga ihatag lang ang pinakabag-o nga isyu sang Ang Lalantawan, nagdesisyon ang utod nga magbasa sing isa ka teksto nga makita sa magasin. Ginbasa niya ang 2 Corinto 1:3, 4, nga nagasiling: “Ang Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay . . . nagalugpay sa aton sa tanan naton nga mga pagtilaw.” Natandog gid sa sini ang tagbalay amo nga ginpangabay niya ang utod nga basahon liwat ang teksto. Ginsugid sang tagbalay nga kinahanglan gid nila sang iya asawa ang lugpay. Nangin interesado sia nga tun-an ang Biblia. Indi bala nga gamhanan gid ang Pulong sang Dios sa aton ministeryo?—Binu. 19:20.

KON NAGATUDLO SA KONGREGASYON

11. Ano ang responsibilidad sang mga utod nga nagatudlo sa kongregasyon?

¹¹ Nanamian gid kita magtambong sa aton Cristianong mga miting, mga asembleya, kag mga kombension. Ang panguna nga rason sa aton pagtambong amo ang pagsimba kay Jehova. Nagabenepisyo man kita sing daku sa mga instruksion nga mabatian naton. Para sa mga utod nga nagatudlo sa kongregasyon, isa ini ka daku nga pribilehiyo. Pero, dapat marealisar nila nga isa man ini ka serioso nga responsibilidad. (Sant. 3:1) Dapat siguraduhon nila pirme nga ang ila ginatudlo nabase gid sa Pulong sang Dios. Kon may bahin ka sa pagtudlo sa kongregasyon, paano mo magamit ang gahom sang Biblia?

Ginagamit sang isa ka utod ang Biblia samtang nagapamulongpulong sa kongregasyon

12. Paano masigurado sang humalambal nga ang Kasulatan amo ang pinakaimportante nga bahin sang iya pamulongpulong?

¹² Siguraduha nga ang Kasulatan amo ang pinakaimportante nga bahin sang imo pamulongpulong. (Juan 7:16) Paano? Dapat ka maghalong nga indi matabunan sang mga eksperiensia, ilustrasyon, ukon sang imo paagi sa pagpamulongpulong ang mga teksto nga imo gamiton. Tandai man nga kon nagabasa ka sang teksto wala ini nagakahulugan nga nagatudlo ka na sang Biblia. Ang matuod, kon tuman kadamo nga teksto ang imo basahon, mahimo nga wala na sing matandaan sa sini ang mga nagapamati. Gani pilia sing maayo ang panguna nga mga teksto. Dayon basaha ini, ipaathag, iilustrar, kag iaplikar. Indi magpadali sa paghimo sini. (Neh. 8:8) Kon ang pamulongpulong may balayan halin sa organisasyon, tun-i ini lakip ang mga teksto nga gingamit sa sini. Hangpa kon ano ang kaangtanan sang mga dinalan kag sang mga teksto. Dayon magpili sing mga teksto nga makabulig sa imo nga matudlo ang mga punto sang balayan. (May mga panugda kon paano ini himuon sa tulun-an 21 asta 23 sang Magbenepisyo sa Pagpanudlo sang Teokratikong Eskwelahan Para sa Ministeryo.) Ang pinakaimportante, magpangamuyo kay Jehova nga buligan ka nga matudlo ang hamili nga kaalam sang iya Pulong.—Basaha ang Esdras 7:10; Hulubaton 3:13, 14.

13. (a) Paano nabuligan ang isa ka utod sang teksto nga gingamit sa Cristianong miting? (b) Paano ka nakabenepisyo sa mga panudlo nga nabase sa Kasulatan sa aton mga miting?

¹³ Daku gid ang nabulig sang paggamit sang teksto sa Cristianong mga miting sa isa ka utod nga babayi sa Australia. Sang bata pa sia, madamo sia sang indi maayo nga eksperiensia. Ginbaton niya ang mensahe sang Biblia, kag sang ulihi gindedikar niya ang iya kabuhi kay Jehova. Pero, nabudlayan sia gihapon magpati nga palangga sia ni Jehova. Sang ulihi, nakumbinsi sia nga palangga gid sia sang Dios. Ano ang nakabulig sa iya? Ang nakabulig gid sa iya amo ang isa ka teksto nga gingamit sa isa naton ka miting. Ginpamalandungan niya ini, dayon nag-research sia, kag gintun-an niya kon paano ini naangot sa iban pa nga teksto sa Biblia.a May teksto bala nga gingamit sa miting, asembleya, ukon kombension nga nakabulig man sa imo?—Neh. 8:12.

14. Paano naton mapakita ang aton pagpasalamat sa Pulong ni Jehova?

¹⁴ Nagapasalamat gid kita kay Jehova bangod sang iya nasulat nga Pulong, ang Biblia. Ginhatag niya ini sa katawhan bangod sang iya gugma, kag gintuman niya ang iya promisa nga magapadayon ini. (1 Ped. 1:24, 25) Gani, dapat naton basahon ang Pulong sang Dios sing regular, iaplikar ini sa aton kabuhi, kag gamiton ini sa pagbulig sa iban. Kon himuon naton ini, mapakita naton ang aton gugma kag pagpasalamat sa sini nga bahandi, kag labaw sa tanan, sa Awtor sini, si Jehova nga Dios.

a Tan-awa ang kahon nga “Nakabulig Gid.”

“Nakabulig Gid”

Bisan pa madugay na nga natun-an ni Victoria ang kamatuoran, nabudlayan gihapon sia magpati nga palangga sia sang Dios. Ano ang nakabulig sa iya nga makumbinsi nga palangga gid sia sang Dios? Amo ini ang ginsiling ni Victoria:

“Mga 15 ka tuig pagkatapos ako mabawtismuhan, may isa ka hitabo nga nakabulig gid sa akon. Sa isa ka pamulongpulong sa Kingdom Hall . . . , ginpaathag sang humalambal ang Santiago 1:23, 24. Ginpaanggid sini nga teksto ang Pulong sang Dios sa espiho. Paagi sini, makita naton kon paano kita ginatamod ni Jehova. Nagpensar ako nga basi ang pagtamod ko sa akon kaugalingon lain sangsa pagtamod ni Jehova. Pero nagaduhaduha gihapon ako, kay para sa akon, imposible gid nga palanggaon ako ni Jehova.

“Pagligad sang pila ka adlaw, nabasa ko ang teksto nga nagpabag-o sang akon kabuhi. Ang teksto amo ang Isaias 1:18, diin nagsiling si Jehova: ‘Kari kamo, maghambalanay kita kag buligan ko kamo nga tadlungon ang inyo kaangtanan sa akon. . . . Bisan pa ang inyo mga sala mapula, papution ini kaangay sang niebe.’ Daw ginasilingan ako ni Jehova: ‘Vicky, maghambalanay kita kag tadlungon ko ang imo kaangtanan sa akon. Kilala ko ikaw, nahibaluan ko ang imo mga sala, nabasa ko ang imo tagipusuon, kag palangga ko ikaw.’

“Indi ako makatulog sadto nga gab-i. Indi gihapon ako magpati nga palangga ako ni Jehova, pero ginpamalandungan ko ang parte sa halad-gawad ni Jesus. Narealisar ko nga palangga gid ako ni Jehova kag madugay na niya ako nga ginapasensiahan. Pero daw ginasilingan ko sia: ‘Indi ako nagakabagay sa imo pagpalangga. Indi matabunan sang halad sang imo Anak ang akon mga sala.’ Daw pareho lang nga ginbalik ko kay Jehova ang gawad. Pero paagi sa pagpamalandong sa sini nga regalo sang Dios, nakumbinsi ako nga palangga ako ni Jehova.”