Ang Kalidad sang Inyo Pagtuo—⁠Ginatilawan Karon

“Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw, kay nakahibalo kamo nga ining natilawan nga kinaiya sang inyo pagtuo nagahikot sing pagbatas.”​—⁠SANTIAGO 1:​2, 3.

1. Ngaa ang mga Cristiano dapat magpaabot sing mga pagtilaw sang ila pagtuo?

INDI luyag sang matuod nga mga Cristiano nga mag-antos, kag wala sila malipay nga masakitan ukon mahuy-an. Apang, ginadumdom nila ang mga pinamulong sa ibabaw nga ginsulat ni Santiago, nga utod sa iloy ni Jesus. Gin-athag ni Cristo sa iya mga disipulo nga makapaabot sila sing paghingabot kag sing iban pa nga mga kabudlayan bangod sang ila pagsunod sa mga talaksan sang Dios. (Mateo 10:​34; 24:​9-13; Juan 16:33) Walay sapayan sina, ina nga mga pagtilaw nagaresulta sa kalipay. Paano?

2. (a) Paano ang mga pagtilaw sang aton pagtuo nagaresulta sa kalipay? (b) Paano nagahikot sing bug-os ang pagbatas sa bahin naton?

² Ang isa ka panguna nga rason nga makasapo kita sing kalipay kon napaidalom sa mga kabudlayan ukon mga pagtilaw sang pagtuo amo nga makapatubas ini sing maayo nga bunga. Suno sa ginasiling ni Santiago, ang pagpabilin nga malig-on walay sapayan sang mga pagtilaw ukon mga kabudlayan “nagahikot sing pagbatas.” Makabenepisyo kita gikan sa pagpalambo sinang hamili nga Cristianong kinaiya. Si Santiago nagsulat: “Pahikuta sing bug-os ang pagbatas, agod mangin bug-os kamo kag mapag-on sa tanan nga bahin, nga wala sing bisan ano man nga kakulangan.” (Santiago 1:4) Ang pagbatas may buluhaton, may “hilikuton.” Ang hilikuton sini amo ang paghimo sa aton nga bug-os sa tanan nga bahin, nagabulig sa aton nga mangin timbang kag hamtong nga mga Cristiano. Gani, paagi sa pagtugot sa mga pagtilaw nga mahanabo nga wala sing bisan anong mga panikasog nga maggamit sing dimakasulatanhon nga mga pamaagi agod matapos ini sa gilayon, ang aton pagtuo ginatilawan kag ginaputli. Kon kulang kita anay sing pailob, kaawa, kaayo, ukon gugma sa pag-atubang sa mga kahimtangan ukon sa mga isigkatawo, ang pagbatas magapauswag sang aton Cristianong mga kinaiya. Huo, ang pagsundanay amo: Ang pagtilaw nagapatubas sing pagbatas; ang pagbatas nagapauswag sing Cristianong mga kinaiya; mga rason ini sa pagkalipay.​—⁠1 Pedro 4:​14; 2 Pedro 1:​5-8.

3. Ngaa indi kita dapat mag-isol nga nagakahadlok sa mga kabudlayan ukon mga pagtilaw sang pagtuo?

³ Ginpatalupangod man ni apostol Pedro kon ngaa indi kita dapat mahadlok ukon mag-isol sa mga pagtilaw sa aton pagtuo. Sia nagsulat: “Sa sining katunayan nagakalipay kamo sing daku, bisan nga sa malip-ot nga tion sa karon, kon kinahanglan, ginpalisdan kamo sang nanuhaytuhay nga mga pagtilaw, agod ang natilawan nga kinaiya sang inyo pagtuo, nga daku pa ang balor sangsa bulawan nga nagakawala walay sapayan nga gintilawan ini sa kalayo, masapwan nga sa kadayawan kag himaya kag kadungganan sa pagpahayag ni Jesucristo.” (1 Pedro 1:​6, 7) Ining mga pinamulong ilabi na nga makapalig-on karon bangod ang “dakung kapipit-an”​—⁠ang tion sang kadayawan, himaya, kadungganan, kag kaluwasan​—⁠mas malapit sangsa mahimo ginahunahuna sang iban kag mas malapit sangsa nangin mga tumuluo kita.​—⁠Mateo 24:​21; Roma 13:​11, 12.

4. Ano ang balatyagon sang isa ka utod tuhoy sa mga pagtilaw nga naeksperiensiahan nila sang iban pa nga hinaplas nga mga Cristiano?

⁴ Sa naunang artikulo, ginbinagbinag naton ang mga pagtilaw nga gin-atubang sang hinaplas nga nagkalabilin kutob sang 1914 padayon. Mga rason bala ini sa pagkalipay? Si A. H. Macmillan naghatag sining nagapahinumdom nga pagtamod: “Nakita ko ang madamong daku nga mga kabudlayan sang organisasyon kag ang mga pagtilaw sa pagtuo sang mga katapo sini. Paagi sa bulig sang espiritu sang Dios nakalampuwas ini kag nagpadayon sa pag-uswag. Nakita ko ang kaalam sang mapailubon nga paghulat kay Jehova sa pagtin-aw sang amon paghangop tuhoy sa Makasulatanhon nga mga butang sa baylo nga palibugan ang bag-ong panghunahuna. . . . Walay sapayan sang mga pagbag-o nga dapat namon himuon sa pulupanag-on sa amon mga pagtamod, wala yadto nagbag-o sang maluluy-on nga aman sang gawad kag sang saad sang Dios nga kabuhi nga dayon. Gani indi kinahanglan nga magluya ang amon pagtuo bangod sang wala matuman nga mga pagpaabot ukon sang mga pagbag-o sa mga punto-de-vista.”​—⁠The Watchtower, Agosto 15, 1966, pahina 504.

5. (a) Ano ang mga benepisyo sang pag-agom sing mga pagtilaw sang nagkalabilin? (b) Ngaa interesado kita karon sa pagtilaw?

⁵ Ang hinaplas nga mga Cristiano nga nakalampuwas sa panag-on sang pagtilaw sang 1914-19 ginhilway gikan sa nagakontrol nga impluwensia sang kalibutan kag gikan sa madamong Babilonianhon nga relihiosong mga buhat. Ang nagkalabilin nagpabilin subong gin-ulay kag ginputli nga katawhan, nga kinabubut-on nga nagadulot sing mga halad sang pagdayaw sa Dios kag nagasalig nga sila subong katawhan kahalamut-an sa iya. (Isaias 52:​11; 2 Corinto 6:​14-18) Ang paghukom nagsugod sa balay sang Dios, apang indi ini matapos sa isa ka napat-od nga panag-on. Ang pagtilaw kag pag-ayag sa katawhan sang Dios nagapadayon. Ang mga nagalaum nga makalampuwas sa nagahilapit nga “dakung kapipit-an” subong bahin sang “dakung kadam-an” ginatilawan man ang ila pagtuo. (Bugna 7:​9, 14) Ginahimo ini sa mga paagi nga kaanggid sa gin-atubang sang hinaplas nga nagkalabilin subong man sa iban pa nga mga paagi.

Paano Kamo Mahimo Tilawan?

6. Ano ang isa ka sahi sang daku nga pagtilaw ang naeksperiensiahan sang madamo?

⁶ Ginbinagbinag sang madamong Cristiano ang tuhoy sa hangkat sang maisugon nga pag-atubang sa mga pagtilaw sa porma sang direkta nga mga pagsalakay. Ginadumdom nila ini nga report: “Gintawag [sang Judiyong mga lider] ang mga apostoles, ginbunal sila, kag ginsugo sila nga mag-untat na sa paghambal pasad sa ngalan ni Jesus, kag ginbuhian sila. Busa, naghalin sila sa atubangan sang Sanhedrin, nga nagakalipay bangod naisipan sila nga takus nga pakahuy-an tungod sa iya ngalan.” (Binuhatan 5:​40, 41) Kag ang modernong maragtas sang katawhan sang Dios, labi na sa tion sang mga inaway kalibutanon, nagapaathag nga madamo sa mga Saksi ni Jehova ang aktuwal nga nakaeksperiensia sing mga pagbunal, kag sing malain pa, sa kamot sang mga manughingabot.

7. Tubtob diin nagpakita sing pagtuo ang pila ka modernong-adlaw nga mga Cristiano?

⁷ Nahanungod sa paghingabot sa mga Cristiano, ang kalibutan wala nagapili sa ulot sang hinaplas nga nagkalabilin kag sa dakung kadam-an sang “iban nga mga karnero.” (Juan 10:16) Sa mga tinuig, ang mga katapo sang duha ka grupo gintilawan sing daku paagi sa pagbilanggo kag bisan sa pagpatay sa ila bangod sang ila gugma sa Dios kag sang ila pagtuo sa iya. Ang duha ka grupo nagakinahanglan sing espiritu sang Dios, ano man ang ila paglaum. (Ipaanggid Ang Lalantawan, Hunyo 15, 1996, pahina 31.) Sang katuigan 1930 kag 1940 sa Nazi Alemanya, madamo sa mga alagad ni Jehova, lakip ang mga kabataan, ang nagpakita sing tumalagsahon nga pagtuo, kag madamo ang gintilawan sing daku. Sining ulihi nga tinuig, ang katawhan ni Jehova nag-atubang sing pagtilaw paagi sa paghingabot sa ila sa mga kadutaan subong sang Burundi, Eritrea, Etiopia, Malawi, Mozambique, Rwanda, Singapore, kag Zaire. Kag ini nga sahi sang mga pagtilaw nagapadayon.

8. Paano ginapakita sang komento sang isa ka Aprikano nga utod nga indi lamang ang pagbatas sa paghingabot sa porma sang mga pagbunal ang nalakip sa pagtilaw sa aton pagtuo?

⁸ Apang, subong sang nasambit na, ang aton pagtuo ginatilawan man sa mas malalangon nga mga paagi. Ang pila sa mga pagtilaw indi direkta kag indi gilayon mamutikan. Binagbinaga kon ano ang imo mangin reaksion sa pila sang masunod. Isa ka utod nga lalaki sa Angola nga may napulo ka kabataan ang katapo sang isa ka kongregasyon nga sa isa ka tion nahamulag kag wala sing komunikasyon sa masaligan nga mga kauturan. Sang ulihi nangin posible para sa iban nga maduaw ang kongregasyon. Ginpamangkot sia kon paano niya napakaon ang iya pamilya. Indi ini mahapos nga sabton para sa iya, kag ang nasiling lang niya amo nga ang kahimtangan mabudlay. Napakaon bala niya ang iya kabataan bisan sing makaisa man lang sa isa ka adlaw? Sia nagsabat: “Ti, sing haluson. Dapat namon tun-an nga makatibawas kon ano ang yara sa amon.” Nian sa isa ka tingog nga may bug-os nga pagtuo, sia nagsiling: “Apang indi bala nga amo sini ang ginapaabot naton sa katapusan nga mga adlaw?” Ina nga pagtuo tumalagsahon gid sa kalibutan, apang indi ini tumalagsahon sa tunga sang mainunungon nga mga Cristiano, nga nagasalig sing bug-os nga ang mga saad sang Ginharian matuman.

9. Paano kita ginatilawan may kaangtanan sa 1 Corinto 11:​3?

⁹ Ang dakung kadam-an ginatilawan man may kaangtanan sa teokratikong mga sulundan. Ang bug-os kalibutan nga Cristianong kongregasyon ginatuytuyan suno sa diosnon nga mga prinsipio kag teokratikong mga talaksan. Nagakahulugan ini una sa tanan sang pagkilala kay Jesus subong ang Lider, ang isa nga gintangdo subong Ulo sang kongregasyon. (1 Corinto 11:3) Ang kinabubut-on nga pagpasakop sa iya kag sa iya Amay ginapadayag paagi sa aton pagtuo sa teokratikong mga pagtangdo kag mga desisyon may kaangtanan sa aton nahiusa nga paghimo sang kabubut-on ni Jehova. Dugang pa, sa kada lokal nga kongregasyon, may mga lalaki nga ginatangduan sa pagpanguna. Mga dihimpit sila nga ang ila mga kasaypanan mahimo nga makita naton sa gilayon; apang ginalaygayan kita nga tahuron ini nga mga manugtatap kag magpasakop. (Hebreo 13:​7, 17) Nabudlayan ka bala kon kaisa sa sina? Isa gid bala ini ka pagtilaw para sa imo? Kon amo, ginapanginpuslan mo bala ining pagtilaw sa imo pagtuo?

10. Anong pagtilaw ang ginaatubang naton karon kon nahanungod sa ministeryo sa latagon?

¹⁰ Ginatilawan man kita may kaangtanan sa pribilehiyo kag sa kinahanglanon nga makigbahin sing tayuyon sa ministeryo sa latagon. Agod makapasar kita sa sining pagtilaw, dapat naton mahangpan nga ang bug-os nga pagpakigbahin sa ministeryo wala lamang nagakinahanglan sing diutay, ukon pakulahaw, nga pagbantala. Dumduma ang kahalamut-an nga komento ni Jesus tuhoy sa paghatag sang imol nga babayi sang tanan niya nga masarangan. (Marcos 12:​41-44) Mahimo naton pamangkuton ang aton kaugalingon, ‘Ginahimo ko man bala ang tanan may kaangtanan sa akon ministeryo sa latagon?’ Kita tanan dapat mangin mga Saksi ni Jehova sa tanan nga tion, nga nakahanda sa tanan nga higayon nga paiwagon ang aton kapawa.​—⁠Mateo 5:⁠16.

11. Paano ang mga pagbag-o sa paghangop ukon laygay tuhoy sa pagginawi mangin isa ka pagtilaw?

¹¹ Ang isa pa ka pagtilaw nga mahimo naton atubangon amo ang may kaangtanan sa kadakuon sang aton pag-apresyar sa nagauswag nga kapawa nga ginapaiwag sa kamatuoran sang Biblia kag sa laygay nga ginahatag sang matutom nga ulipon nga klase. (Mateo 24:45) Kon kaisa nagakinahanglan ini sing mga pagbag-o sa personal nga paggawi, subong sang nangin maathag nga ang mga nagagamit sing tabako dapat mag-untat sa sini kon luyag nila magpabilin sa kongregasyon.⁠a (2 Corinto 7:1) Ukon mahimo kita tilawan nga batunon ang kinahanglanon nga bayluhan ang aton naluyagan nga musika ukon iban pa nga mga porma sang kalingawan.⁠b Pangduhaduhaan bala naton ang kaalam sang ginhatag nga laygay? Ukon ipadihon bala naton ang aton panghunahuna sa espiritu sang Dios kag magpabulig nga isuklob ang Cristianong personalidad?​—⁠Efeso 4:​20-24; 5:​3-5.

12. Ano ang kinahanglan agod mapabakod ang pagtuo pagkatapos ang isa mabawtismuhan?

¹² Sa sulod sang mga dekada, ang kadamuon sang dakung kadam-an nagadugang, kag pagkatapos sila nabawtismuhan nagpadayon sila nga nagapabakod sang ila kaangtanan kay Jehova. Indi lamang ang pagtambong sa Cristianong asambleya, pagtambong sa pila ka mga miting sa Kingdom Hall, ukon panalagsa nga pagpakigbahin sa pag-alagad sa latagon ang nalakip sa sini. Sa pag-ilustrar: Ang isa mahimo nga sa pisikal yara sa guwa sang Babilonia nga Daku, ang bug-os kalibutan nga emperyo sang butig nga relihion, apang tunay bala nga gintalikdan niya ini? Nagapanguyapot bala gihapon sia sa mga butang nga nagapakita sang espiritu sang Babilonia nga Daku​—⁠ang espiritu nga nagatamay sa matarong nga mga talaksan sang Dios? Ginapasapayanan lamang bala niya ang moralidad kag katutom sa pag-asawahay? Ginapadaku bala niya ang personal kag materyal nga mga interes labi pa sa espirituwal nga mga interes? Huo, nagpabilin bala sia nga walay mantsa sa kalibutan?​—⁠Santiago 1:⁠27.

Manginpulos Gikan sa Natilawan nga Pagtuo

13, 14. Ano ang ginhimo sang iban pagkatapos makasugod sa paglakat sa matuod nga pagsimba?

¹³ Kon tunay kita nga nagpalagyo gikan sa Babilonia nga Daku kag nagguwa man sa kalibutan, indi kita magbalikid. Nahisuno sa prinsipio nga masapwan sa Lucas 9:​62, ang pagbalikid sang bisan sin-o sa aton mahimo magakahulugan nga indi kita mangin sakop sang Ginharian sang Dios. Si Jesus nagsiling: “Walay tawo nga nagakapot sa arado kag nagabalikid ang takus sa ginharian sang Dios.”

¹⁴ Apang ang iban nga nangin mga Cristiano sang nagligad nagtugot kutob sadto nga dihunon ang ila kaugalingon sining sistema sang mga butang. Wala nila ginsikway ang espiritu sang kalibutan. (2 Pedro 2:​20-22) Nawili sila sa kalibutanon nga mga kalingawan kag nag-ubos ini sang ila tion, busa nagapugong sang ila pag-uswag. Sa baylo nga ituon sing malig-on ang ila hunahuna kag tagipusuon sa Ginharian sang Dios kag sa iya pagkamatarong, nga ginauna ini sa kabuhi, nagtalikod sila agod himud-usan ang materyalistiko nga mga tulumuron. Kon indi nila batunon ang ila maluya nga pagtuo kag maalabaab nga kahimtangan kag bag-uhon ang ila dalanon paagi sa pagpangayo sing diosnon nga laygay, mahimo nila mawasi ang ila hamili nga kaangtanan kay Jehova kag sa iya organisasyon.​—⁠Bugna 3:​15-19.

15. Ano ang kinahanglan agod makapabilin nga kahalamut-an sa Dios?

¹⁵ Agod masapwan nga kahalamut-an kag nalinya nga makalampuwas sa madasig-nagahilapit nga dakung kapipit-an, dapat kita magpabilin nga matinlo, nga ‘nabunakan sang dugo sang Kordero’ ang aton mga panapton. (Bugna 7:​9-14; 1 Corinto 6:11) Kon indi naton huptan ang matinlo, matarong nga tindog sa atubangan sang Dios, ang aton balaan nga pag-alagad indi mangin kahalamut-an. Sa pagkamatuod, dapat mahangpan sang kada isa sa aton nga ang natilawan nga kalidad sang pagtuo magabulig sa aton nga mabatas kag malikawan nga indi mapahamut-an ang Dios.

16. Sa anong mga paagi ang mga kabutigan mahimo mangin pagtilaw sa aton pagtuo?

¹⁶ Kon kaisa, ang mga pamantalaan kag sekular nga mga awtoridad nagakomento sing butig tuhoy sa katawhan sang Dios, nagahatag sing makapatalang nga mga komento tuhoy sa aton Cristianong mga pagtuluuhan kag pagkabuhi. Indi kita dapat makibot sa sini, kay si Jesus maathag nga nagapakita nga ‘ang kalibutan magadumot sa aton bangod indi kita bahin sini.’ (Juan 17:14) Tugutan bala naton nga pahugon kag paluyahon kita sang mga nabulagan ni Satanas kag ikahuya ang maayong balita? Tugutan bala naton ang mga kabutigan tuhoy sa kamatuoran nga makaapektar sang aton tayuyon nga pagtambong sa mga miting kag sang aton pagbantala nga hilikuton? Ukon magatindog bala kita nga malig-on kag mangin maisog kag mas determinado pa gid nga magpadayon sa pagbantala sing kamatuoran nahanungod kay Jehova kag sa iya Ginharian?

17. Anong pasalig ang makapahulag sa aton nga magpadayon sa pagpakita sing pagtuo?

¹⁷ Suno sa natuman na nga mga tagna sa Biblia, madugay na kita karon nga nagakabuhi sa tion sang katapusan. Ang aton pasad-sa-Biblia nga mga pagpaabot para sa bag-ong kalibutan sang pagkamatarong pat-od gid nga mangin isa ka makalilipay nga katunayan. Tubtob sa pag-abot sina nga adlaw, kabay nga kita tanan magpakita sing dimationg nga pagtuo sa Pulong sang Dios kag magpamatuod sang aton pagtuo paagi sa indi pag-untat sa pagbantala sing maayong balita sang Ginharian sa bug-os nga kalibutan. Hunahunaa ang linibo ka bag-ong mga disipulo nga ginabawtismuhan kada semana. Indi bala ina nagakaigo nga rason para apresyahon naton nga ang pagpailob ni Jehova nahanungod sa pagpatuman sa iya paghukom magaresulta sa kaluwasan sang madamo pa nga tawo? Wala bala kita malipay nga gintugutan sang Dios nga magpadayon ang nagaluwas-kabuhi nga pagbantala sing Ginharian nga hilikuton? Kag wala bala kita masadyahan nga minilyon ang nagbaton sang kamatuoran kag nagapakita sang ila pagtuo?

18. Ano ang inyo determinasyon may kaangtanan sa pag-alagad kay Jehova?

¹⁸ Wala kita makahibalo kon tubtob san-o magapadayon ang karon nga pagtilaw sa aton pagtuo. Apang isa ka butang ang pat-od: Si Jehova may gintalana nga adlaw sa pagpakighusay sa karon malauton nga mga langit kag duta. Samtang, mangin determinado kita nga ilugon ang mataas sing kalidad nga natilawan nga pagtuo nga ginpakita sang Manughimpit sang aton pagtuo, si Jesus. Kag sundon naton ang halimbawa sang nagatigulang nga hinaplas nga nagkalabilin kag sang iban pa nga maisugon nga nagaalagad sa tunga naton.

19. Ano ang napat-od ninyo nga makadaug sa sining kalibutan?

¹⁹ Dapat kita mangin determinado sa pagpahayag sing walay langan sang walay katapusan nga maayong balita sa tanan nga pungsod, tribo, dila, kag katawhan may kaangtanan sa anghel nga nagalupad sa tunga sang langit. Pabation naton sila sang pahayag sang anghel: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom.” (Bugna 14:​6, 7) Kon inang diosnon nga paghukom ipatuman, ano ang mangin resulta may kaangtanan sa natilawan nga kinaiya sang aton pagtuo? Indi bala ini mangin isa ka mahimayaon nga kadalag-an​—⁠kaluwasan gikan sa karon nga sistema sang mga butang pasulod sa matarong nga bag-ong kalibutan sang Dios? Paagi sa pagbatas sa mga pagtilaw sang aton pagtuo, makasiling kita, kaangay ni apostol Juan: “Amo ini ang pagdaug nga nagdaug sang kalibutan, ang aton pagtuo.”​—⁠1 Juan 5:⁠4.

[Mga footnote]

Madumduman Mo Bala?

◻ Paano ang mga pagtilaw sa aton pagtuo mangin rason sa pagkalipay?

◻ Ano ang pila ka pagtilaw sa aton pagtuo nga indi gilayon mahibaluan?

◻ Paano kita makabenepisyo paagi sa pagbatas sing madinalag-on sa mga pagtilaw sa aton pagtuo?

[Retrato sa pahina 17]

Si A. H. Macmillan (nawala sa atubangan) sang sia kag ang mga opisyales sang Watch Tower Society dimakatarunganon nga ginbilanggo

Delegado sia sa kombension sa Detroit, Michigan, 1928

Sa katapusan niya nga tinuig, si Brother Macmillan nagpakita gihapon sing pagtuo

[Retrato sa pahina 18]

Kaangay sini nga pamilya, madamong Cristiano sa Aprika ang nagpakita sing natilawan nga kinaiya sang pagtuo