PAMANGKOT SANG MGA PAMATAN-ON
Ano ang Dapat Ko Himuon Pagkatapos Ako Mabawtismuhan?—Bahin 2: Manikasog nga Indi Madula ang Imo Integridad
Ang Biblia nagasiling nga “wala ginadingot ni Jehova ang bisan ano nga maayo sa mga nagalakat nga may integridad.” (Salmo 84:11) Ano ang buot silingon sang “nagalakat nga may integridad?” Nagakahulugan ini nga ginapakita mo sa imo pagkabuhi nga ginatuman mo ang imo promisa kay Jehova sang nagdedikar ka sa iya. (Manugwali 5:4, 5) Paano ka makalakat nga may integridad pagkatapos mo mabawtismuhan?
Sa sini nga artikulo
Padayon nga batasa ang mga problema
Teksto nga makabulig sa imo: “Dapat kita magsulod sa Ginharian sang Dios paagi sa madamo nga kabudlayan.”—Binuhatan 14:22.
Ang buot silingon: Ang matuod, ang tanan nga Cristiano may mga problema sa ila kabuhi. Maatubang mo ang pila sini nga problema, pareho sang pagpasipala ukon pagpamatok, bangod Cristiano ka. Ang iban, pareho sang problema sa kuarta ukon balatian, maeksperiensiahan sang tanan nga tawo.
Ang mapaabot mo: Nagabag-obag-o ang imo sitwasyon sa kabuhi, kag kon kaisa indi mo gusto ini nga pagbag-o. Ang Biblia nagasiling nga ang malain nga mga butang puede matabo kay bisan sin-o, Cristiano man sia ukon indi.—Manugwali 9:11.
Ang puede mo himuon: Bangod nabal-an mo nga may maatubang ka gid nga mga problema, puede mo mahandaan kon ano ang imo himuon. Kabiga ang imo mga problema nga kahigayunan para mapabakod ang imo pagtuo kag para magsalig ka pa gid kay Jehova. (Santiago 1:2, 3) Sa ulihi, kon madamo ka na sing naagyan nga mga problema, masiling mo na ang ginsiling ni apostol Pablo: “Sa tanan nga butang may kusog ako paagi sa isa nga nagapabakod sa akon.”—Filipos 4:13.
MATUOD NGA ISTORYA. “Pagkatapos ako mabawtismuhan, ginbiyaan sang akon mga magulang nga lalaki ang kamatuoran, nagmasakit ang akon mga ginikanan, kag nagmasakit man ako. Puede gid nga mauntat man ako, kag kalimtan ko na lang nga sang nagdedikar ako sa Dios, nagpromisa ako nga ang pinakaimportante sa akon kabuhi amo ang pagsimba sa iya. Pero ang matuod, ang akon dedikasyon amo mismo ang nakabulig sa akon nga maatubang ini nga mga problema.”—Karen.
Tip: Tun-i ang parte kay Jose. Mabasa mo ang parte sa iya sa Genesis kapitulo 37 kag kapitulo 39 asta 41. Binagbinaga: Ano nga mga problema ang iya naatubang nga wala niya ginapaabot, kag ano ang iya ginhimo? Paano ginbuligan ni Jehova si Jose?
Dugang pa nga impormasyon
Basaha:
I-download:
Padayon nga batui ang pagsulay
Teksto nga makabulig sa imo: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon.”—Santiago 1:14.
Ang buot silingon: Kon kaisa, tanan kita ginaganyat sang aton malain nga mga balatyagon. Kag kon indi naton ini makontrol, makahimo gid kita sang sala.
Ang mapaabot mo: Bisan nabawtismuhan ka na, maeksperiensiahan mo pa gihapon ang “mga kailigbon sang unod.” (2 Pedro 2:18) Mahimo ka pa gani masulay nga makig-sex bisan wala ka pa makasal.
Ang puede mo himuon: Magdesisyon na subong sang imo himuon antes mag-abot ang pagsulay, para indi ka makahimo sing sala nga desisyon kay nadaug ka sang imo malain nga mga balatyagon. Dumduma, si Jesus nagsiling: “Wala sing tawo nga makapaulipon sa duha ka agalon.” (Mateo 6:24) Makapili ka kon sin-o ang imo agalon ukon sundon. Dapat si Jehova gid. Bisan pa daw nagalalain ka gid sa imo ginabatyag, makadesisyon ka nga indi ini paghimuon.—Galacia 5:16.
Tip: Hibalua ang imo maayo nga mga kinaiya kag ang imo mga kaluyahon. Pilia ang mga abyan nga makabulig sa imo nga mapakita mo ang maayo nga mga kinaiya. Likawi ang mga tawo, lugar, kag ang mga sitwasyon nga makaimpluwensia sa imo sa paghimo sang malain.—Salmo 26:4, 5.
Dugang pa nga impormasyon
Basaha:
“Paano Mabatuan ang Pagsulay?”
“Ano ang Himuon Ko Para Indi Ako Magsige Pamensar Parte sa Sex?”
Padayon nga mangin mapisan sa pag-alagad sa Dios
Teksto nga makabulig sa imo: “Magpakita sang amo man nga kapisan . . . tubtob sa katapusan, agod indi kamo mangin uyaya.”—Hebreo 6:11, 12.
Ang buot silingon: Ang isa nga wala nagapokus sa iya ginahimo dali lang matak-an kag mangin uyaya.
Ang mapaabot mo: Mahimo nga eksayted ka gid kag mapisan sang bag-o ka pa lang nabawtismuhan. Palangga mo gid si Jehova. Pero pagligad sang pila ka tion, mahimo mabudlayan ka na nga tumanon pirme si Jehova sa tanan nga butang. Mahimo ini makapaluya sang imo buot kag mangin uyaya ka.—Galacia 5:7.
Ang puede mo himuon: Padayon nga himua ang husto, bisan pa nga kon kaisa indi mo gusto nga himuon ini. (1 Corinto 9:27) Mangin mas malapit man sa imo Amay sa langit paagi sa pagtinguha nga mas makilala pa gid sia kag paagi sa pag-istorya sa iya pirme sa pangamuyo. Padayon man nga mangin suod sa mga nanamian mag-alagad kay Jehova.
Tip: Dumduma nga palangga ka gid ni Jehova kag handa sia nga magbulig sa imo. Indi pagpensara nga naakig sia sa imo kon may mga tion nga ang imo kapisan sa pag-alagad indi na pareho sadto. Ang Biblia nagasiling: “Ginahatagan niya sing kusog ang ginakapoy kag sing kabaskog ang mga kulang sing kusog.” (Isaias 40:29) Sa ulihi, pakamaayuhon niya ang imo panikasog nga mangin mapisan liwat sa imo pag-alagad.
Dugang pa nga impormasyon
Ang punto: Kon mangin matutom ka kay Jehova, mapasadya mo ang iya tagipusuon! (Hulubaton 27:11) Malipay sia nga nagdampig ka sa iya, kag buligan ka gid niya nga mabatuan ang mga pag-atake ni Satanas.