Sosyal nga Kalingawan—Aguma ang mga Kaayuhan, Likawi ang mga Siod
“Wala na sing maayo pa sa tawo sang sa magkaon sia kag mag-inom kag magkalipay ang iya kalag sing kaayuhan sa iya kinabudlayan.”—MANUGWALI 2:24.
1. Sa anong mga paagi ang panuytoy sang Dios nagabulig sa iya katawhan nahanungod sa kalingawan?
ANG panuytoy ni Jehova nagadala sing madamong kaayuhan sa iya mga alagad. Makita naton ini sa patag sang kalingawan. Ang iya panuytoy nagabulig sa mga Cristiano nga likawan ang pagpasobra sa mga pagtamod. Ang iban nga mga relihionista, nga nagapilit sang pagkaestrikto sa pamayo kag paggawi, nagatamod sang halos tanan nga kalipayan subong makasasala. Sa pihak nga bahin, ang kalabanan nga mga tawo nagapangita sang kalipayan bisan pa nagasumpakil ini sa mga kasuguan kag mga prinsipio ni Jehova.—Roma 1:24-27; 13:13, 14; Efeso 4:17-19.
2. Ano ang naghatag sing una nga patalandaan tuhoy sa pagtamod sang Dios sa kalingawan?
2 Apang, kamusta ang katawhan sang Dios? Madamo sang nagasugod sa pagtuon sang Biblia ang nakibot sa paghibalo nga gintuga gali sang Dios ang mga tawo upod ang ikasarang sa pagkalipay sa kabuhi. Ginhatagan niya ang aton nahauna nga mga ginikanan sing hilikuton nga himuon—apang indi ang mabug-at nga trabaho nga nagtanda sang kabuhi sang kalabanan nga dihimpit nga mga tawo. (Genesis 1:28-30) Hunahunaa ang madamong maayong paagi diin ang tanan nga nagakabuhi sa isa ka dutan-on nga paraiso mahimo makasapo sing kalipay. Handurawa ang ila kalipay sa pagtan-aw sa maila nga mga sapat nga indi na magahalit kag sa lainlain nga mahagop nga mga sapat nga mahimo mangin bahin sang adlaw-adlaw nga pagkabuhi! Kag daw ano nga pagkaon ang matigayon nila gikan sa “tagsa ka kahoy nga maanyag sa itololok kag maayo nga kalan-on”!—Genesis 2:9; Manugwali 2:24.
3-5. (a) Ano ang katuyuan sang kalingawan? (b) Ngaa makapat-od kita nga ginpalig-on sang Dios ang mga Israelinhon gikan sa pagpangita sing kalipayan?
3 Ina nga mga buhat, sa katunayan, sarang matamod subong kalingawan, ang katuyuan sini sa Paraiso mangin pareho sa karon: sa pagpasag-uli kag sa pagpalab-as sang kapagsik sang isa para sa dugang nga mapatubason nga mga buhat (hilikuton). Kon ginahimo ini sang kalingawan, mapuslanon ini. Nagakahulugan bala ina nga ang matuod nga mga sumilimba makahatag sa kalingawan sing lugar sa ila kabuhi bisan nga wala pa nagakabuhi sa Paraiso? Huo. Ang Insight on the Scriptures nagasiling nahanungod sa kalingawan sa tunga sang katawhan anay ni Jehova:
4 “Ang mga pagliwaliwa kag dibersion sang mga Israelinhon wala ginlaragway sing talalupangdon sa rekord sang Biblia. Apang, ginapakita sini nga ginatamod ini nga nagakaigo kag maayo kon nahisuno sa relihioso nga mga prinsipio sang pungsod. Ang pangunang mga dagway sang kalingawan amo ang pagtokar sing musikal nga mga instrumento, pag-amba, pagsaut, pag-estoryahanay, subong man ang pila ka hampang. Ang paghatag sing mga paktakon kag mabudlay nga mga pamangkot ginahatagan sing importansia.—Huk 14:12.”—Tomo 1, pahina 102.
5 Sang nagbalik si David nga nakapangdaug, ang Hebreong mga babayi naggamit sing mga panderita kag mga tolonggon samtang nagasaulog (Hebreo, sa·chaqʹ). (1 Samuel 18:6, 7) Ang Hebreong tinaga sadsaran nga nagakahulugan sing “kadlaw,” kag ang iban nga mga bersion nagapamulong tuhoy sa “nagasinadya nga mga babayi.” (Byington, Rotherham, The New English Bible) Samtang ginasaylo ang Kaban, “si David kag ang bug-os nga panimalay sang Israel naglanton sa atubangan ni Jehova sang tanan nga bagay sang mga palatunggon.” Si Micol, ang asawa ni David, may ditimbang nga pagtamod, kay nagpamatok sia sa pagpakigbahin ni David sa makalilipay nga mga buhat. (2 Samuel 6:5, 14-20) Ang Dios nagtagna nga ang nagpauli nga mga tinapok gikan sa Babilonia magapakigbahin sa kaanggid kasadya nga mga buhat.—Jeremias 30:18, 19; 31:4; ipaanggid ang Salmo 126:2.
6. Paano ang Cristianong Griegong Kasulatan nagabulig sa aton sa aton pagtamod sa kalingawan?
6 Dapat man kita magtinguha nga mangin timbang sa kalingawan. Ginaapresyar bala naton, halimbawa, nga si Jesus indi isa ka asetiko? Naghinguyang sia sing tion para sa makapapagsik nga mga pagkaon, subong sang “daku nga sinalusalo” nga ginhanda ni Levi. Kag sang ginmulay sia sang mga tawo nga nagapakamatarong sa kaugalingon tungod sang pagkaon kag pag-inom, ginsikway ni Jesus ang ila mga pagtamod kag mga paagi. (Lucas 5:29-31; 7:33-36) Dumduma, man, nga nagtambong sia sa kasal kag nag-amot sa mga punsyon. (Juan 2:1-10) Ang utod ni Jesus sa iloy nga si Judas nagasambit nga ang mga Cristiano may “mga sinalusalo sang paghigugma,” ayhan mga sinalusalo diin ang mga imol sarang makakaon kag makapakig-upod sing makalilipay kag sing masulhay.—Judas 12.
Sosyal nga Kalingawan sa Iya Tion kag Lugar
7. Paano ginapalig-on sang Pulong sang Dios ang pagkatimbang may kaangtanan sa kalingawan?
7 Ang Manugwali 10:19 nagapamulong sing kalahamut-an tuhoy sa ‘tinapay para sa kinadlaw sang mga manugpangabudlay kag alak nga nagapasadya sang kabuhi.’ Wala ini nagasiling nga ang kalingawan duna nga sayop ukon malain, indi bala? Apang, ini man nga tulun-an nagasiling: “Sa tagsa ka butang may panag-on, . . . tion sa paghibi kag tion sa pagkadlaw; tion sa paglalaw kag tion sa pagsaut.” (Manugwali 3:1, 4) Huo, samtang wala nagatagudili sang nagakaigo nga kalingawan, ang Biblia nagahatag sa aton sing mga paandam. Nagalakip ini sang laygay nga huptan ang sosyal nga kalingawan sa iya lugar kon tuhoy sa tion kag kadamuon. Nagapaandam man ini sa aton nahanungod sa mga siod nga pirme nagakatabo sa dalagku nga sosyal nga mga pagtinipon.—2 Timoteo 3:4.
8, 9. Ngaa dapat nga ang tion nga ginakabuhian naton kag ang aton hatag-Dios nga asaynment may kaangtanan sa kalingawan?
8 Nabasa naton nga ang mga Judiyo nga nagpauli halin sa Babilonia—nga may madamong mabudlay nga hilimuon—magapakigbahin sa masadya nga pagliwaliwa. Apang, nagsiling si Jeremias sang nagligad nga wala sia “maglingkod sa katilingban sang mga nagakinasadya ukon nagkalipay.” (Jeremias 15:17) Gintangdo sia sang Dios sa paghatag sing mensahe tuhoy sa nagahilapit nga pagsilot, gani indi amo yadto ang gintangdo nga tion para sa iya nga magkasadya.
9 Ang mga Cristiano karon gintangdo sa pagwali sang mensahe sang Dios sang paglaum kag sa pagbantala man sang iya mga paghukom batok sa malaut nga sistema ni Satanas. (Isaias 61:1-3; Binuhatan 17:30, 31) Busa maathag gid nga indi naton dapat pagtugutan ang kalingawan nga mangin importante sa aton kabuhi. Sarang naton mailustrar ang punto paagi sa isa ka pudyot nga asin ukon espesyal nga rikado nga nagadugang sa sabor sang pagkaon. Ibubo mo bala ang madamo nga rikado sa bagay nga matabunan sini ang sabor sang pagkaon? Aba indi. Nahisuno sa pinamulong ni Jesus sa Juan 4:34 kag Mateo 6:33, ang aton panguna nga ginakabalak-an—ang aton gid pagkaon—amo ang paghimo sang kabubut-on sang Dios. Gani ang kalingawan mangin kaangay sang rikado. Dapat ini magpapagsik kag magpahalipay, indi magpalapyo ukon magpaluya.
10. Ngaa dapat naton tanan usisaon liwat ang kadamuon sang tion nga ginahinguyang naton sa kalingawan?
10 Apang, magdulog anay kag magbinagbinag: Indi bala nga ang kalabanan nga mga tawo nagasiling nga ang tion kag igtalupangod nga ginahatag nila sa kalingawan haganhagan? Kon tuhay ang ginabatyag nila, ayhan naghimo sila sing pagbag-o. Wala bala ini nagapakita nga ang tagsatagsa sa aton dapat anay magdulog kag magausisa sing hanuot, sing prangka, kon ano sa aktuwal ang lugar sang kalingawan sa aton kabuhi? Lipud bala ini nga nangin daku nga bahin sang aton kabuhi? Halimbawa, awtomatiko bala nga ginapaandar naton ang TV kada magpauli kita? Naanad bala kita sa pagtigana sing daku nga tion para sa kalingawan kada semana, subong sang kada Biernes sang gab-i ukon Sabado sang gab-i? Nasubuan bala kita kon mag-abot ina nga tion kag yara lang kita sa balay nga wala sing ginplano nga kalingawan? Duha pa ka pamangkot: Isa ka adlaw pagkatapos sang isa ka pagtilipon, natukiban bala naton nga nagpulaw kita ukon naglakbay sing tuman kalayo amo kon ngaa ginlapyo kita, ayhan ginkapoy sing tuman nga indi na makapakigbahin sa Cristianong ministeryo ukon makatrabaho sing maayo? Kon ang aton kalingawan sa pulupanag-on, ukon sa masami, may amo sina nga epekto, nagakaigo kag timbang gid bala ini nga pagpangalipay?—Ipaanggid ang Hulubaton 26:17-19.
11. Ngaa nagakaigo ang pagrepaso sa sahi sang aton kalingawan?
11 Maayo man para sa aton nga repasuhon man ang sahi sang aton kalingawan. Bangod mga alagad kita sang Dios, indi ini garantiya nga ang aton kalingawan nagakaigo. Binagbinaga kon ano ang ginsulat ni apostol Pedro sa hinaplas nga mga Cristiano: “Ang nagtaliwan nga tion tuman na sa paghimo sang luyag himuon sang mga pungsod sa paggawi sa mga kaulag, mga kailigbon, pagkapalainom sing alak, mga magansal nga kinalipay, mga paghinubog, kag mangil-ad nga mga diwata.” (1 Pedro 4:3) Wala niya ginaturisok sang iya tudlo, kon sa aton pa, ginasumbong ang iya mga kauturan nga nag-ilog sang ginahimo sang mga tawo sa kalibutan. Apang, ang pagkaalisto importante para sa mga Cristiano (sadto kag karon) bangod ang isa madali mahulog sa makahalalit nga kalingawan.—1 Pedro 1:2; 2:1; 4:7; 2 Pedro 2:13.
Mangin Alisto sa mga Siod
12. Anong sahi sang siod ang ginapadaku sang 1 Pedro 4:3?
12 Sa anong sahi sang siod kita dapat mangin alisto? Ti, ginsambit ni Pedro ang “pagkapalainom sing alak, mga magansal nga kinalipay, mga paghinubog.” Ang isa ka Aleman nga komentarista nagpaathag nga ang Griegong mga tinaga nga gingamit “panguna nga naaplikar sa sosyal nga pag-inom sa mga sinalusalo.” Ang isa ka Swiso nga propesor nagsulat nga ina nga mga buhat kinaandan sadto anay: “Ang paglaragway nagapatuhoy sa organisado nga mga pagtinipon ukon bisan sa regular nga mga klab diin ang makahuluya nga mga buhat nga ginlaragway ginahimo.”
13. Paano nangin isa ka siod ang paggamit sing alkohol sa mga pagtinipon? (Isaias 5:11, 12)
13 Madamo ang nasiod sa dalagku nga sosyal nga mga pagtinipon nga may alkoholiko nga mga ilimnon. Ang Biblia wala nagadumili sang haganhagan nga pag-inom sinang mga ilimnon. Subong pamatuod sini, si Jesus naghimo sing alak sa isa ka sinalusalo sa kasal sa Cana. Mahimo nga wala sing sobra nga pag-inom, kay si Jesus nagatuman sang laygay sang Dios nga likawan ang mangin kaupod sang mga lakas mag-inom. (Hulubaton 23:20, 21) Apang binagbinaga ini nga detalye: Ang manugtatap sadto nga sinalusalo nagsiling nga sa iban nga mga sinalusalo ang maayo nga alak ginabutang sing una “kag sang nakainom sing tama ang mga tawo, ugaling [ginserbe] ang kubos nga alak.” (Juan 2:10) Gani kinaandan anay para sa mga Judiyo ang mahubog sa mga kasal diin ang tanan sarang makainom sang bugana nga alak.
14. Sa anong mga paagi mahimo malandas sang Cristianong mga tagbalay ang siod nga ginahatag sang alkoholiko nga mga ilimnon?
14 Sing nahisuno, ang iban nga Cristianong mga tagbalay namat-od sa pagserbe lamang sing alak, serbesa, kag iban pa alkoholiko nga mga ilimnon kon personal nila nga matatap kon ano ang ginaserbe ukon makonsumo sang ila mga bisista. Kon ang grupo mas daku sang sa direkta nga matatap sang tagbalay, subong sang Judiyong mga kasal nga ginsambit, ang madamo nga alkohol mahimo nga isa ka makatalagam nga siod. Mahimo nga yara ang tawo nga nagapakig-away kag nagalandas sang problema sa pag-inom. Mabulubanta mo nga ang kabilugan, wala sing pagpugong nga pagtigayon sing alkohol sarang makasulay sa iya sa pagpatuyang kag sa pagtublag sang okasyon para sa tanan. Ang isa ka manugtatap kag amay sa Alemanya nagkomento nga ang iya pamilya nagabenepisyo gikan sa makalilipay nga pagpakig-upod sa sosyal nga mga pagtinipon kaupod sang mga masigkatumuluo. Apang, nagsiling sia nga pat-od gid nga may daku nga problema kon ginaserbe ang serbesa.
15. Paano matigayon ang nagakaigo nga panuytoy sa sosyal nga mga pagtinipon?
15 Ang kasal sa Cana may “manugtatap sang sinalusalo.” (Juan 2:8) Wala ini nagakahulugan nga ang isa ka pamilya nga nagpakaon ukon nagpakig-upod sa isa ka grupo sa ila balay magatangdo sing isa ka manugtatap. Ang bana amo ang responsable sa pagtatap sa okasyon. Apang bisan kon ang grupo duha lamang ka pamilya ukon dakudaku diutay, dapat gid nga maathag nga may isa nga responsable sa nagakatabo. Madamong ginikanan ang nagausisa sini kon ang ila anak nga lalaki ukon anak nga babayi ginaagda sa isa ka sosyal nga pagtinipon. Ginasugilanon nila ang tagbalay agod hibaluon kon sin-o ang magatatap sa bug-os nga okasyon, lakip kon yara sia tubtob ini matapos. Ginliwat pa gani sang Cristianong mga ginikanan ang ila kaugalingon nga iskedyul sa pagtambong agod ang mga may edad kag mga pamatan-on magainupdanay sing makalilipay.
16. Ano ang nagakaigo nga binagbinagon kon tuhoy sa kadakuon sang mga pagtinipon?
16 Ang sanga sang Watch Tower Society sa Canada nagsulat: “Ang laygay may kaangtanan sa paglatid sa kadakuon sang sosyal nga mga pagtinipon ginhangop sang iban nga mga gulang sa kahulugan nga ang dalagku nga mga pagtinipon sa mga punsyon sa kasal nagasupak sa laygay. Naghinakop sila nga kon ginlaygayan kita nga huptan ang aton sosyal nga mga pagtinipon sa isa ka diutay kag sarang matatap nga kadakuon, sayop ang pag-agda sing 200 ukon 300 ka tawo sa punsyon sa kasal.”a Sa baylo nga ipadaku sing sobra ang gintalana na nga daan nga kadakuon pasad sa personal nga pagtamod, dapat ihatag ang pangunang igtalupangod sa nagakaigo nga pagtatap, bisan pa kon daw ano kadamo ang magatambong. Ang kadamuon sang alak nga gin-aman ni Jesus nagapakita nga dakudaku nga grupo ang nagtambong sa kasal sa Cana, apang maathag nga gintatap ini sing maayo. Ang iban nga mga sinalusalo sadto anay wala gintatap sing maayo; ang ila kadakuon mahimo nga amo ang rason nga nagdul-ong sa dimaayo nga pagtatap. Kon daku ang pagtinipon, daku man ang hangkat, bangod mas mahapos para sa mga mas maluya, nga nahuyog sa pagpasobra, nga ipilit ang ila kaugalingon. Sa wala ginatatap sing maayo nga mga pagtinipon mahimo nila himuon ang mapangduhaduhaan nga mga buhat.—1 Corinto 10:6-8.
17. Paano ayhan mapakita ang Cristianong pagkatimbang kon ang isa ka pagtinipon ginaplano?
17 Ang maayo nga pagtatap sa isa ka sosyal nga pagtinipon nagalakip sang pagplano kag paghanda. Wala ini nagakinahanglan sang paghimo sing makagalanyat nga tema agod himuon ini nga tumalagsahon ukon halandumon apang mahimo nga nagailog sa kalibutanon nga mga pagtinipon, subong sang mga binayle diin ang nagatambong nagasuksok sing costume ukon de-maskara nga mga party. Mahanduraw mo bala ang matutom nga mga Israelinhon sa Ginsaad nga Duta nga nagaplano sing isa ka party diin ang tanan magapanapot kaangay sang mga pagano sa Egipto ukon sang lain nga pungsod? Magaplano bala sila ayhan sing makapulukaw sa sekso nga saut ukon magahod nga lanton nga mahimo popular sa mga pagano? Sadto anay sa Bukid sang Sinai, nasulay sila sa lanton kag saut nga ayhan lapnag sadto anay kag popular sa Egipto. Nakahibalo kita kon paano gintamod sang Dios kag sang iya hamtong nga alagad nga si Moises yadto nga kalingawan. (Exodo 32:5, 6, 17-19) Gani, ang tagbalay ukon manugtatap sang isa ka sosyal nga okasyon dapat magbinagbinag kon bala may yara kinanta ukon sinaut; kag kon may yara, dapat niya pat-uron nga nahisanto ini sa Cristianong mga prinsipio.—2 Corinto 6:3.
18, 19. Anong paghangop ang matigayon naton gikan sa pag-agda kay Jesus sa isa ka kasal, kag paano naton ini mahimo iaplikar?
18 Sa katapusan, madumduman naton nga ‘si Jesus kag ang iya mga disipulo gin-agda sa sinalusalo sa kasal.’ (Juan 2:2) Huo, ang isa ka Cristiano ukon isa ka pamilya mahimo lamang nga magaduaw sa iban para sa isa ka makalilipay kag makapalig-on nga tion. Apang, para sa ginplano nga sosyal nga mga okasyon, ginapakita sang eksperiensia nga ang paghibalo antes kon sin-o ang magatambong magatapna sang mga problema. Ang importansia sini ginpadaku sang isa ka gulang sa Tennessee, E.U.A., nga nagpadaku sa mga anak nga lalaki kag mga anak nga babayi nga yara sa bug-os tion nga ministeryo. Antes nila batunon sang iya asawa ang isa ka imbitasyon, ukon hatagan sing permiso ang ila mga kabataan sa pagtambong, ginasugilanon niya anay ang tagbalay agod pat-uron nga nahibaluan na nila nga daan kon sin-o ang mga magatambong. Ang iya pamilya gin-amligan gikan sa mga siod nga natabo sa iban sa mga pagtinipon nga ang bisan sin-o mahimo makatambong, ayhan sa isa ka kinaon, piknik, ukon ehersisyo, subong sang paghampang sing bola.
19 Wala ginapalig-on ni Jesus ang pag-agda sa isa ka pagtinipon sang mga himata lamang, daan na nga mga abyan, ukon mga tawo nga pareho sing edad kag pangabuhi. (Lucas 14:12-14; ipaanggid ang Job 31:16-19; Binuhatan 20:7-9.) Kon ginpili mo sing maayo kon sin-o ang agdahon, mas mahapos ilakip ang mga Cristiano nga lainlain sing mga edad kag mga sirkunstansia. (Roma 12:13; Hebreo 13:2) Ang iban sa ila mahimo nga maluya sa espirituwal ukon mga bag-uhan nga sarang makabenepisyo gikan sa pagpakig-upod sa hamtong nga mga Cristiano.—Hulubaton 27:17.
Kalingawan sa Iya Lugar
20, 21. Ngaa ang kalingawan nagakaigo nga may lugar sa aton kabuhi?
20 Nagakaigo para sa aton subong mahadlukon sa Dios nga katawhan nga mangin interesado sa aton kalingawan kag mangin mabinalak-on nga ina nagakaigo kag nga timbang kita sa kadamuon sang tion nga ginagamit naton para sa sini. (Efeso 2:1-4; 5:15-20) Ang ginbugna nga manunulat sang Manugwali nagbatyag sing amo sina: “Ginpakamaayo ko ang kinasadya, bangod nga ang tawo wala na sing maayo pa nga butang sa idalom sang adlaw sang sa magkaon kag mag-inom kag magmalipayon, kay ina magapabilin sa iya pagpangabudlay sa tanan nga adlaw sang iya kabuhi, nga ginhatag sa iya sang Dios sa idalom sang adlaw.” (Manugwali 8:15) Inang timbang nga mga pagpangalipay nagapapagsik sang lawas kag nagabulig sa pagpamag-an sang mga problema kag mga kabang-awan nga kinaandan sa karon nga sistema.
21 Sa pag-ilustrar, isa ka Austriano nga payunir ang nagsulat sa isa ka madugay na nga abyan: “Kasadya gid sang amon iskursiyon sang isa ka adlaw. Mga 50 kami nga nagkadto sa diutay nga linaw malapit sa Ferlach. Si Utod B—,— nga sakay sang iya van ang nag-una, dala ang tatlo ka parilyahan, pilupilo nga mga bangko, mga lamesa, kag bisan ang lamesa sa tennis. Kasadya gid sa amon. Gindala sang isa ka utod nga babayi ang iya accordion, gani nag-ambahan kami sing pang-Ginharian nga ambahanon. Ang mga kauturan, bata kag tigulang, nalipay sa pag-inupdanay.” May makalilipay sia nga handumanan sa gintatap sing maayo nga paglingawlingaw nga ginhuptan nga hilway sa mga siod subong sang sobra nga pag-inom ukon lugak nga paggawi.—Santiago 3:17, 18.
22. Samtang nagakalipay sa sosyal nga kalingawan, anong paandam ang dapat dumdumon sang tagsatagsa sa aton?
22 Ginlaygayan kita ni Pablo nga maghalong nga indi magpadala sa mga kailigbon sang dihimpit nga unod, wala gani nagahimo sing mga plano nga nagapadayag sa aton sa mga pagsulay. (Roma 13:11-14) Nagalakip ina sang mga plano para sa soyal nga kalingawan. Kon ginaaplikar naton ang iya laygay sa sina, malikawan naton ang mga sirkunstansia nga nagdul-ong sa iban sa espirituwal nga pagkalunod. (Lucas 21:34-36; 1 Timoteo 1:19) Sa baylo, maalamon naton nga pilion ang maayo nga kalingawan nga magabulig sa aton sa paghupot sang aton kaangtanan sa Dios. Busa makabenepisyo kita gikan sa sosyal nga kalingawan nga sarang makabig nga isa sang maayong mga dulot sang Dios.—Manugwali 5:18.
[Footnote]
a Ang Lalantawan nga Oktubre 15, 1984, nagaunod sang timbang nga laygay tuhoy sa mga kasal kag mga punsyon sa kasal. Sarang marepaso sing mapuslanon sang malapit na magpakasal nga nobyo kag nobya, subong man sang iban nga magabulig sa ila, ining materyal antes maghimo sang ila mga plano sa kasal.
Ano ang Aton Natun-an?
◻ Anong timbang nga pagtamod ang makita naton sa Biblia nahanungod sa pagkalipay sa sosyal nga kalingawan?
◻ Ngaa dapat hatagan sing pagbinagbinag ang bahin sang tion kag sahi sang kalingawan?
◻ Ano ang pila ka butang nga sarang mahimo sang isa ka Cristianong tagbalay sa pagbantay batok sa mga siod?
◻ Kon nagakaigo kag timbang, ano ang sarang mahimo sang kalingawan para sa mga Cristiano?
[Laragway sa pahina 18]
Ang tagbalay ukon manugdumala sa isa ka pagtinipon amo ang responsable sa pagtatap nga ang mga bisita wala ginasiod