Magmaligdong sa Paghunahuna Samtang Nagahilapit ang Katapusan
1 Sulitsulit nga ginalaragway sang Pulong sang Dios ang adlaw ni Jehova nga magakari “subong sang makawat”—buot silingon, sing hinali, sa gilayon, sing patago. (1 Tes. 5:2; Mat. 24:43; 2 Ped. 3:10; Bug. 3:3; 16:15) “Bangod sini,” siling ni Jesus, ‘pamatud-i ninyo ang inyo kaugalingon nga handa, bangod sa oras nga wala ninyo ginapaabot, magaabot ang Anak sang tawo.’ (Mat. 24:44) Paano kita makapabilin nga handa sa espirituwal samtang nagahilapit ang katapusan? Ang yabi masapwan sa inspirado nga laygay: ‘Magmaligdong sa paghunahuna.’—1 Ped. 4:7.
2 Ang kaligdong sa paghunahuna nagalakip sang pagtan-aw sa mga butang gikan sa pagtamod ni Jehova. (Efe. 5:17) Nagabulig ini sa aton nga tamdon ang aton kaugalingon subong “mga dumuluong kag temporaryo nga mga pumuluyo” sa tunga sining sistema sang mga butang karon. (1 Ped. 2:11) Nagabulig ini sa aton nga mahantop kon ano gid ang importante, nga makapahamtang sing mga prioridad, kag makahimo sing maayo nga mga desisyon.—Fil. 1:10.
3 Magpahamtang Sing Espirituwal nga mga Tulumuron: Ang pagpahamtang kag paglab-ot sang espirituwal nga mga tulumuron makabulig sa aton nga mangin maligdong sing panghunahuna. May espirituwal ka bala nga mga tulumuron nga ginalab-ot karon? Ginatinguhaan mo bala nga basahon ang Biblia kada adlaw, tambungan ang tanan nga Cristianong mga miting, basahon ang kada guwa sang Ang Lalantawan kag Magmata!, ukon ayhan dugangan ang imo pagpakigbahin sa ministeryo? Kon magpahamtang ka sing mga tulumuron nga sarang mo malambot, tinguhai nga lab-uton ini, kag magpangabay kay Jehova nga pakamaayuhon ang imo mga panikasog, mahimo makibot ka sa mga resulta.
4 Ginpamangkot sang isa ka gulang ang lamharon nga mag-asawa tuhoy sa ila mga tulumuron sa espirituwal. Ang pamangkot nakabulig sa ila nga marealisar nga kon pasimplehon lamang nila ang ila pagkabuhi kag dulaon ang makapabug-at nga utang, makapayunir sila. Namat-od sila nga himuon ini nga tulumuron. Maukod nga ginbayaran nila ang ila utang kag ginbuhinan ang di-kinahanglanon nga mga hilikuton nga nagaubos sang ila tion kag kusog. Pagligad sang eksakto isa ka tuig, nalab-ot nila ang ila tulumuron. Kag ano ang resulta? Ang bana nagsiling: “Wala namon matigayon ang amon kahimtangan karon kon wala kami sing mga tulumuron. Mas malipayon kami. Mas matawhay kag mas maayo ang amon kabuhi. May matuod gid ini nga kahulugan kag katuyuan.”
5 Samtang nagahulat kita sang adlaw ni Jehova, kabay nga huptan naton ang aton kahanda sa espirituwal paagi sa pagkabuhi nga may kaligdong sa hunahuna, nagakonsentrar sa paghimo sing kabubut-on sang Dios.—Tito 2:11-13.