Mga Reperensia Para sa Pagkabuhi kag Pagministeryo nga Workbook Para sa Miting
MARSO 1-7
MGA BAHANDI SA PULONG SANG DIOS | NUMEROS 7-8
“Ang Aton Matun-an sa Kampo sang Israel”
it-1-E 497 ¶3
Kongregasyon
Sa Israel, masami nga may masaligan nga mga indibiduwal nga nagarepresentar sa bug-os nga katawhan. (Esd 10:14) Gani, ang mga “pangulo sang mga tribo” ang nagahalad pagkatapos mapatindog ang tabernakulo. (Nu 7:1-11) Sa amo man nga paagi, ang mga saserdote, mga Levinhon, kag “mga pangulo sang katawhan” ang nagapamatuod sang “masaligan nga kasugtanan” paagi sa pagtimbre sang selyo sang panahon ni Nehemias. (Ne 9:38–10:27) Sang nagalakbay ang mga Israelinhon sa kahanayakan, may ara “bantog nga mga lalaki, kag mga pangulo kag pinili halin sa katilingban,” kag 250 sa ila ang nag-upod sa ila ni Kora, Datan, Abiram, kag On para magtipon batok kay Moises kag Aaron. (Nu 16:1-3) Bilang pagsunod sang panuytoy halin sa Dios, nagpili si Moises sang 70 ka lalaki nga mga manugdumala halin sa mga gulang sang Israel para buligan sia nga pas-anon ang responsibilidad “sa pagdumala sa katawhan” nga indi niya masarangan kon sia lang. (Nu 11:16, 17, 24, 25) Ginsambit sa Levitico 4:15 ang “mga gulang sang katilingban,” kag ginapakita sini nga ang mga gulang sang pungsod, ang mga pangulo, ang mga hukom, kag ang mga manugdumala sini ang nangin representante sang katawhan.—Nu 1:4, 16; Jos 23:2; 24:1.
it-2-E 796 ¶1
Ruben
Sa kampo sang Israel, ang mga Rubenhon, nga ginapatung-an sang kaliwat nila Simeon kag Gad, ang nagakampo sa B nga bahin sang tabernakulo. Kon nagamartsa, nagasunod ining tatlo ka tribo nga tropa nga ginapangunahan ni Ruben sa tatlo ka tribo nga tropa sang Juda, Isacar, kag Zebulon. (Nu 2:10-16; 10:14-20) Amo man sini ang pagpasunod sang naghalad ang mga tribo sang adlaw nga gin-inagurahan ang tabernakulo.—Nu 7:1, 2, 10-47.
Talalupangdon nga mga Punto Gikan sa Tulun-an sang Numeros
8:25, 26. Agod pat-uron nga sangkol nga mga lalaki ang gintangdo sa Levinhon nga pag-alagad, kag bilang pagpatugsiling sa ila edad, ang mga tigulang ginsugo nga magretiro gikan sa obligado nga pag-alagad. Apang, makaboluntaryo sila agod buligan ang iban nga mga Levinhon. Walay sapayan nga ang isa ka manugbantala sang Ginharian sa karon indi makaretiro, ang prinsipio sini nga kasuguan nagatudlo sing hamili nga leksion. Kon bangod sang katigulangon indi mahimo sang isa ka Cristiano ang pila ka obligasyon, ayhan makapakigbahin sia sa isa ka sahi sang pag-alagad suno sa masarangan niya nga himuon.
Espirituwal nga mga Hiyas
it-1-E 835
Panganay
Ang mga panganay nga anak nga lalaki sang mga Israelinhon ang nakalinya nga manguna sa kada panimalay, gani sila ang nagarepresentar sa bug-os nga pungsod. Sa pagkamatuod, gintawag ni Jehova ang bug-os nga pungsod bilang iya “panganay,” amo ini ang iya panganay nga pungsod bangod sang katipan sang Dios kay Abraham. (Ex 4:22) Bangod gin-amligan niya ang ila kabuhi, nagsugo si Jehova nga “ang tagsa ka panganay nga lalaki sang mga Israelinhon . . . nga mabun-ag, sa mga tawo kag sa mga sapat,” pakabalaanon sa iya. (Ex 13:2) Gani, ang mga panganay nga anak nga lalaki gindedikar sa Dios.
MARSO 8-14
MGA BAHANDI SA PULONG SANG DIOS | NUMEROS 9-10
“Kon Paano Ginapangunahan ni Jehova ang Iya Katawhan”
it-1-E 398 ¶3
Kampo
Ang pagsaylosaylo sining tuman kadaku nga kampo sa lainlain nga lugar (mga 40 ka kampo ang gindumdom ni Moises sa Numeros 33) nagapakita man kon ano gid ka dalayawon ang pagkaorganisado sini. Tubtob nagapabilin ang panganod sa ibabaw sang tabernakulo, nagapabilin man ang kampo sa puesto sini. Kon magsaylo ang panganod, nagasaylo man ang kampo. “Suno sa sugo ni Jehova nagakampo sila, kag suno sa sugo ni Jehova nagahalin sila.” (Nu 9:15-23) Duha ka trumpeta nga sinalsal nga pilak ang gingamit para ipahibalo ang mga sugo ni Jehova sa bug-os nga kampo. (Nu 10:2, 5, 6) Ang nagabulubag-o nga tunog nagapatimaan nga kinahanglan na nila magsaylo sang kampo. Una ini nga natabo sang “ikaduha nga tuig [1512 B.C.E.], sa ika-20 nga adlaw sang ikaduha nga bulan.” Samtang ara sa unahan ang kaban sang katipan, nagahalin ang una nga tatlo ka tribo nga tropa nga ginapangunahan sang Juda kag ginasundan sang Isacar dayon sang Zebulon. Nagasunod sa ila ang mga Gersonhon kag mga Merarinhon nga nagadala sang mga parte sang tabernakulo nga ginsalig sa ila. Ang nagasunod naman amo ang tatlo ka tribo nga tropa nga ginapangunahan sang kampo ni Ruben kag ginasundan sang Simeon kag Gad. Nagasunod sa ila ang mga Kohatnon nga nagadala sang santuaryo, dayon ang ikatlo nga tatlo ka tribo nga tropa sang Efraim nga ginasundan naman sang Manases kag Benjamin. Sa katapusan, ang tropa nga ginapangunahan sang Dan upod ang Aser kag Neptali ang nagabantay sa likuran. Gani, ang duha sang may pinakamadamo kag pinakamabakod nga tropa ang nakapuesto bilang bantay sa unahan kag sa likuran.—Nu 10:11-28.
Ginakilala Mo Bala ang Pamatuod sang Panuytoy sang Dios?
Paano naton mapakita nga ginaapresyar naton ang panuytoy sang Dios? Si apostol Pablo nagsiling: “Mangin matinumanon sa mga nagapanguna sa inyo kag mangin mapinasakupon.” (Heb. 13:17) Indi pirme mahapos ang paghimo sini. Sa pag-ilustrar: Handurawa nga isa ikaw ka Israelinhon sang panahon ni Moises. Samtang nagalakat kamo, nagdulog ang haligi. Daw ano kadugay ini nga mapundo? Isa ka adlaw? Isa ka semana? Binulan? Mahimo magsiling ka, ‘Dapat ko bala haw-ason ang tanan ko nga dala?’ Mahimo nga ipagua mo lang anay ang mga kinahanglanon gid. Apang pagkatapos sang pila ka adlaw, bangod nabudlayan ka mangita sang imo pagkabutang, ginhaw-as mo na lang tanan. Pero sang dali mo na lang mahaw-as tanan, nakita mo nga naglakat naman ang haligi—kag kinahanglan nga mag-impake ka liwat! Indi ini mahapos. Apang dapat ‘maglakat’ gilayon ang mga Israelinhon.—Num. 9:17-22.
Ano ang aton reaksion kon makabaton kita sing panuytoy halin sa Dios? Ginatinguhaan bala naton nga iaplikar ini gilayon? Ukon nagapadayon kita gihapon sa aton naandan nga mga hilikuton? Pamilyar bala kita sa pinakabag-o nga mga panuytoy, subong sang pagdumala sing mga pagtuon sa Biblia sa puluy-an, pagbantala sa mga tawo nga tuhay sing lenguahe, regular nga pagpakigbahin sa pangpamilya nga pagsimba, pagkooperar sa mga Hospital Liaison Committee, kag paggawi sing nagakaigo sa mga kombension? Mapakita man naton nga ginaapresyar naton ang panuytoy sang Dios kon nagabaton kita sing laygay. Kon nagaatubang sing mabudlay nga mga desisyon, wala kita nagasalig sa aton kaugalingon nga kaalam kundi nagasandig kita kay Jehova kag sa iya organisasyon. Kaangay sang bata nga nagapanago sa iya ginikanan kon may bagyo, nagadangop man kita sa organisasyon ni Jehova kon makaatubang kita sing kaangay bagyo nga mga kabudlayan.
Espirituwal nga mga Hiyas
it-1-E 199 ¶3
Pagtilipon
Importansia sang Pagtilipon. Ginapadaku sang tuigan nga pagsaulog sang Paskua kon ano ka importante nga panginpuslan ang mga aman ni Jehova nga mga pagtilipon para makatigayon sing espirituwal nga mga benepisyo. Ang bisan sin-o nga lalaki nga matinlo kag wala maglakbay pero wala maghanda para sa Paskua dapat patyon. (Nu 9:9-14) Sang ginpatawag ni Hari Ezequias sa Jerusalem ang pumuluyo sang Juda kag Israel para saulugon ang Paskua, nagsiling sia: “Katawhan sang Israel, magbalik kamo kay Jehova . . . Indi kamo mangin batinggilan pareho sang inyo mga katigulangan. Magpasakop kamo kay Jehova kag magkadto kamo sa iya santuaryo nga ginpakabalaan niya sing dayon kag mag-alagad kamo kay Jehova nga inyo Dios, agod madula ang iya nagahingalayo nga kaakig sa inyo. . . . Si Jehova nga inyo Dios mainawaon kag maluluy-on. Indi sia magtalikod sa inyo kon magbalik kamo sa iya.” (2Cr 30:6-9) Ang hungod nga indi pagtambong nagapakita sang pagsikway sa Dios. Bangod wala na ginasaulog sang mga Cristiano ang mga kapiestahan pareho sang Paskua, nagakaigo gid nga palig-unon sila ni Pablo nga indi pagpabay-an ang mga pagtilipon nga masami ginahiwat sang katawhan sang Dios, nagsiling sia: “Kag hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.”—Heb 10:24, 25; tan-awa ang KONGREGASYON.
MARSO 15-21
MGA BAHANDI SA PULONG SANG DIOS | NUMEROS 11-12
“Ngaa Indi Kita Dapat Mangin Palareklamo?”
Indi Mangin Malipaton nga Manugpalamati
20 Ang kalabanan nga mga Cristiano wala gid magpasulay sa seksuwal nga imoralidad. Apang, dapat kita maghalong nga wala naton ginatugutan ang aton kaugalingon nga maglakat sa dalan nga nagadul-ong sa pirme nga pagkumod nga mahimo magresulta sa indi pagkahamuot sang Dios. Si Pablo nagalaygay sa aton: “Ni indi naton pag-ibutang sa pagtilaw si Jehova, subong sang iban [sang mga Israelinhon] nga nagbutang sa iya sa pagtilaw, agod malaglag lang paagi sa mga man-ug. Ni indi kamo mangin mga palakumod, subong sang pagkumod sang iban sa ila, agod laglagon lamang sang manuglaglag.” (1 Corinto 10:9, 10) Ang mga Israelinhon nagkumod batok kanday Moises kag Aaron—huo, bisan batok sa Dios mismo—nagreklamo tuhoy sa manna nga gin-aman sing milagruso.(Numeros 16:41; 21:5) Wala bala tanto naakig si Jehova bangod sang ila pagkumod sangsa ila pagpakighilawas? Ginapakita sang rekord sang Biblia nga madamong palakumod ang ginpatay sang mga man-ug. (Numeros 21:6) Sa nauna nga hitabo, kapin sa 14,700 ka rebelyuso nga palakumod ang ginlaglag. (Numeros 16:49) Gani indi naton pag-ibutang sa pagtilaw ang pagpailob ni Jehova paagi sa pagtamod sing di-matinahuron sa iya mga aman.
‘Padayon Kamo nga Walay Pagkumod’
7 Nagbag-o gid ang panimuot sang Israel! Sa umpisa, napahulag sila sa pag-amba sing pagdayaw bilang pagpasalamat kay Jehova sang ginpagua sila sa Egipto kag ginluwas sa Dagat nga Mapula. (Exodo 15:1-21) Apang sang nabudlayan na sila sa kahanayakan kag nahadlukan sa mga Canaanhon, ang pagkamapinasalamaton sang katawhan sang Dios ginbuslan sang pagkadikontento. Sa baylo nga pasalamatan ang Dios bangod sang ila kahilwayan, ginbasol nila sia bangod abi nila ginadingutan sila. Busa, ang pagkumod isa ka pagpakita sang pagkawalay apresasyon sa mga aman ni Jehova. Indi katingalahan nga nagsiling sia: “Tubtob san-o magakumod sing subong sini batok sa akon ining malaut nga katilingban.”—Numeros 14:27; 21:5.
it-2-E 719 ¶4
Pag-inaway
Pagkumod. Ang pagkumod makapaluya sing buot kag makahalalit. Wala pa magdugay paghalin nila sa Egipto, nagkumod na ang mga Israelinhon batok kay Jehova sang ginapangitaan nila sing sayop ang iya mga alagad nga sanday Moises kag Aaron nga gin-aman niya nga magpanguna sa ila. (Ex 16:2, 7) Sang ulihi, naluyahan gid sing buot si Moises bangod sang ila mga pagkumod amo nga gusto na lang niya mapatay. (Nu 11:13-15) Ang pagkumod mahimo nga makamamatay sa nagakumod. Ginakabig ni Jehova ang mga ginasiling sang nagakumod parte kay Moises nga isa gid ka pagrebelde batok sa Iya pagpanguna bilang Dios. (Nu 14:26-30) Madamo ang napatay bangod sa pagpangita sing sayop sa iban.
Espirituwal nga mga Hiyas
it-2-E 309
Manna
Paglaragway. ‘Puti ang manna pareho sang liso sang kulantro’ kag “daw pareho” sa bedelio, nga daw kaangay sang wax kag silangon nga daw pareho sang isa ka perlas. Ang sabor sini mahimo mapaanggid “sa manipis nga tinapay nga may dugos” ukon sa “matam-is nga tinapay nga may lana.” Pagkatapos ini magaling sa de-mano nga mga galingan ukon mabayo sa lusong, ginalaga ang manna ukon ginahimo ini nga tinapay kag ginaluto.—Ex 16:23, 31; Nu 11:7, 8.
MARSO 22-28
MGA BAHANDI SA PULONG SANG DIOS | NUMEROS 13-14
“Kon Paano ang Pagtuo Nagapaisog sa Aton”
Maisugon Bangod sa Pagtuo kag Diosnon nga Kahadlok
5 Apang, ang duha sa sini nga mga lampitaw, sanday Josue kag Caleb, luyag gid magsulod sa Ginsaad nga Duta. Ang mga Canaanhon “tinapay sa aton,” siling nila. “Ang ila sililungan nagpalayo na sa ila, kag kaupod naton si Jehova. Indi kamo mahadlok sa ila.” (Numeros 14:9) May basihan bala ang positibo nga panimuot nanday Josue kag Caleb? May basihan gid! Nakita nila kag sang bug-os nga pungsod kon paano ginpakahuy-an ni Jehova ang gamhanan nga Egipto kag ang mga diosdios sini paagi sa Napulo ka Kalalat-an. Kag nakita nila kon paano ginlumos ni Jehova si Paraon kag ang iya puersa militar sa Dagat nga Mapula. (Salmo 136:15) Maathag nga indi gid mapakamatarong sang napulo ka lampitaw kag sang mga naimpluwensiahan nila ang ila ginpakita nga kahadlok. “Tubtob san-o nga indi sila magtuo sa akon, walay sapayan sang tanan nga tanda nga nahimo ko sa tunga nila?” siling ni Jehova, bilang pagpabutyag sang iya nasaklaw nga balatyagon.—Numeros 14:11.
6 Ginpatalupangod ni Jehova ang kabangdanan sang problema—ang mga tawo talawan bangod kulang sila sing pagtuo. Huo, naangot gid sing suod ang pagtuo kag kaisog, amo nga sang nagsulat si apostol Juan tuhoy sa Cristianong kongregasyon kag sa espirituwal nga pagpakig-away sini, nagsiling sia: “Amo ini ang pagdaug nga nagdaug sang kalibutan, ang aton pagtuo.” (1 Juan 5:4) Sa karon, ang pagtuo nga kaangay sang ginpakita nanday Josue kag Caleb, nagresulta sa pagbantala sing maayong balita sang Ginharian sa bug-os nga kalibutan sang kapin sa anom ka milyon nga mga Saksi ni Jehova, bata kag tigulang, makusog kag maluya. Wala sing kaaway ang nakapahipos sa sining gamhanan kag maisog nga grupo.—Roma 8:31.
Espirituwal nga mga Hiyas
it-1-E 740
Ang Duta Nga Ginhatag sang Dios sa Israel
ANG duta nga ginhatag sang Dios sa Israel isa gid ka maayo nga duta. Sang nagpadala si Moises sing mga espiya para mag-una sa pagtan-aw sang Ginsaad nga Duta kag magkuha sing pila ka patubas sini, nagbalik sila nga may mga dala nga igos, granada, kag sing isa ka pungpong sang ubas nga sobra ka bug-at amo nga ginbutang nila ini sa tukon kag gintuwangan sang duha ka lalaki! Bisan pa nga hinadlukan sila bangod sa kakulang sang pagtuo, ginsugid nila nga: “Matuod gid nga nagailig ang gatas kag dugos” sa duta.—Nu 13:23, 27.
MARSO 29–ABRIL 4
MGA BAHANDI SA PULONG SANG DIOS | NUMEROS 15-16
“Mag-andam sa Bugal kag Sobra nga Pagsalig sa Kaugalingon”
Kilala Ka Bala ni Jehova?
12 Apang, samtang ang pungsod sang Israel nagapakadto sa Ginsaad nga Duta, nagbatyag si Core nga may diperensia sa mga kahimusan sang Dios. Dayon nagdampig sa iya ang 250 pa ka pangulo sang pungsod sa luyag niya nga mga pagbag-o. Mahimo nagsalig gid sila nga maayo ang ila kaangtanan kay Jehova. Ginsilingan nila si Moises: “Nagapalakas kamo sa inyo! Sa ginatan-aw nga ang bug-os nga katilingban balaan, ang tagsatagsa sa ila, kag ang GINOO yara sa tunga nila.” (Num. 16:1-3) Sobra gid nga bugal kag pagsalig sa kaugalingon! Si Moises nagsiling sa ila: “Magapahayag ang GINOO kon sin-o ang iya.” (Basaha ang Numeros 16:5.) Sang masunod nga adlaw, napatay si Core kag ang mga nagrebelde upod sa iya.—Num. 16:31-35.
Kilala Ka Bala ni Jehova?
11 Magkatuhay gid si Moises kag si Core kon tuhoy sa pagtahod sa mga kahimusan kag mga desisyon ni Jehova. Ang pagtamod sa ila ni Jehova nabase sa ila mga paggawi. Si Core isa ka Kohatnon nga Levinhon, kag madamo sia sing pribilehiyo. Nakita niya ang pagluwas ni Jehova sa iya pungsod sa Dagat nga Pula, ginsuportahan niya ang paghukom ni Jehova sa di-matinumanon nga mga Israelinhon sa Bukid Sinai, kag may bahin sia sa pagdala sang kaban sang katipan. (Ex. 32:26-29; Num. 3:30, 31) Matutom sia kay Jehova sa sulod sang mga tinuig kag ginatahod sang madamo sa kampo sang Israel.
Espirituwal nga mga Hiyas
Pat-ura nga Unahon ang mga Ulunahon!
Gintamod ni Jehova sing mas serioso ang amo nga kaso. “Sang ulihi,” siling sang Biblia, “si Jehova nagsiling kay Moises: ‘Patyon ang amo nga tawo.’” (Numeros 15:35) Ngaa naakig gid si Jehova sa ginhimo sang tawo?
Ang katawhan may anom ka adlaw sa pagpangahoy subong man sa pag-atipan sang ila mga kinahanglanon tuhoy sa pagkaon, panapton, kag puluy-an. Ang ikapito nga adlaw dapat ihinguyang sa ila espirituwal nga mga kinahanglanon. Samtang indi sayop ang magpangahoy, sayop nga gamiton ang tion nga dapat ginpain sa pagsimba kay Jehova. Bisan pa ang mga Cristiano wala napaidalom sa Mosaikong Kasuguan, wala bala ini nagatudlo sa aton sing isa ka leksion kon paano areglahon sing nagakaigo ang aton ulunahon nga mga butang karon?—Filipos 1:10.
ABRIL 5-11
MGA BAHANDI SA PULONG SANG DIOS | NUMEROS 17-19
“Ako ang Imo . . . Palanublion”
Si Jehova Bala Amo ang Imo Bahin?
9 Binagbinaga ang mga Levinhon nga wala sing palanublion nga duta. Bangod ang putli nga pagsimba amo ang ila panguna nga ginakabalak-an, dapat sila magsandig kay Jehova para sa ila mga kinahanglanon, kay sia nagsiling: “Ako amo ang imo bahin.” (Num. 18:20) Bisan pa nga wala kita nagaalagad sa templo pareho sa mga saserdote kag mga Levinhon, mailog naton sila paagi sa pagsalig nga amanan kita ni Jehova. Ang aton pagsalig sa gahom sang Dios sa pag-aman sang aton mga kinahanglanon labi pa gid nga importante samtang nagahilapit ang katapusan.—Bug. 13:17.
Si Jehova Amo ang Akon Bahin
4 Ano ang buot silingon sini nga asaynment para sa mga Levinhon? Si Jehova nagsiling nga sia amo ang ila bahin sa kahulugan nga sa baylo sang duta nga palanublion, gintugyanan sila sang wala tupong nga pribilehiyo sang pag-alagad. Ang “pag-alagad kay Jehova bilang mga saserdote amo ang ila palanublion.” (Jos. 18:7, NW) Ginapakita sang konteksto sang Numeros 18:20 nga indi sila mag-imol bangod sini. (Basaha ang Numeros 18:19, 21, 24.) Ang mga Levinhon hatagan sing “tanan nga ikapulo sa Israel subong nga panublion, nga balus sa ila pag-alagad.” Makabaton sila sang 10 porsiento sang patubas sang Israel kag sang mga kahayupan. Pero ang mga Levinhon dapat man mag-amot sang ikapulo sa ila mabaton, ang ‘pinakaali,’ agod sakdagon ang pagkasaserdote. (Num. 18:25-29) Ginahatag man sa mga saserdote “ang tanan nga halad-nga-binayaw sang mga butang nga balaan” nga ginadulot sang mga Israelinhon sa Dios sa iya duog sang pagsimba. Gani makasalig gid ang mga saserdote nga amanan sila ni Jehova.
Espirituwal nga mga Hiyas
Asin—Isa ka Hamili nga Produkto
Ang asin nangin simbulo man sang pagkalig-on kag pagkapermanente. Busa, sa Biblia ang isa ka nagadugay nga katipan gintawag nga “isa ka katipan sang asin,” ang mga tawo nga nagahimo sining katipan masami nagakaon sing dungan, nga may asin, agod palig-unon ang katipan. (Numeros 18:19) Sa idalom sang Mosaikong Kasuguan, dapat butangan sang asin ang mga halad nga ginadulot sa altar, walay duhaduha nga nagapahangop sing kahilwayan gikan sa kagarukan ukon pagkadunot.
ABRIL 12-18
MGA BAHANDI SA PULONG SANG DIOS | NUMEROS 20-21
“Magpabilin nga Mahagop Bisan sa Mabudlay nga Kahimtangan”
Mangin Mahagop kag Pahamut-i si Jehova
19 Malikawan naton nga makasala. Binagbinaga liwat ang natabo kay Moises. Nangin mahagop sia kag ginpahamut-an niya si Jehova sa madamo nga tinuig. Pero sa katapusan sang halos 40 ka tuig nga paglakbay sang mga Israelinhon sa kamingawan, wala niya mapakita ang pagkahagop. Bag-o lang napatay sadto kag nalubong sa Kades ang iya magulang nga babayi nga posible amo ang nagbulig sa iya sang una sa Egipto para indi sia mapatay. Nagreklamo liwat ang mga Israelinhon nga wala sila ginaatipan sing maayo. ‘Nagpakigbais sila kay Moises’ bangod wala sing tubig. Bisan pa ginhatagan ni Jehova si Moises sing gahom sa paghimo sang madamo nga milagro, kag bisan pa ginpangunahan ni Moises ang katawhan sa malawig nga panahon nga wala nagapensar sang iya lang kaugalingon, nagreklamo gihapon ang katawhan. Ginreklamo nila nga wala sing tubig kag daw ginbasol pa nila si Moises nga nauhaw sila.—Num. 20:1-5, 9-11.
Mangin Mahagop kag Pahamut-i si Jehova
20 Naakig gid si Moises kag nangin indi malulo. Ginsugo sia ni Jehova nga maghambal sa daku nga bato, pero akig sia nga naghambal sa katawhan kag nagsiling nga magahimo sia sing milagro. Dayon, duha ka beses nga ginhampak niya sang iya sungkod ang daku nga bato kag naggua ang madamo nga tubig. Nakahimo sia sang sala bangod sang iya bugal kag kaakig. (Sal. 106:32, 33) Bangod nangin indi mahagop si Moises sa sini nga tion, wala sia gintugutan nga magsulod sa Ginsaad nga Duta.—Num. 20:12.
21 May matun-an kita sa sini nga halimbawa. Una, dapat padayon kita nga mangin mahagop. Kon indi naton ini padayon nga panikasugan, madali kita mangin bugalon kag makahambal kita kag makahimo sang indi maayo. Ikaduha, mahimo kita magluya kon na-stress kita, gani dapat naton tinguhaan nga mangin mahagop bisan sa mabudlay nga kahimtangan.
Ang Dios Nagahukom Suno sa Kon Ano ang Matarong
Una, wala ginsugo sang Dios si Moises nga makighambal sa katawhan, ukon hukman sila subong mga rebelde. Ikaduha, wala gindayaw nanday Moises kag Aaron ang Dios. ‘Wala kamo magpakabalaan sa akon,’ siling sang Dios. (Bersikulo 12)Sa pagsiling nga “pagowaan bala namon kamo sing tubig,” naghambal si Moises nga daw subong bala nga sila ni Aaron kag indi ang Dios ang nagpagua sang milagruso nga tubig. Ikatlo, ini nga pamatbat pareho gid sa nagligad nga mga paghukom sang Dios. Wala ginpasulod sang Dios sa Canaan ang nauna nga henerasyon sang mga rebelde, gani amo man sini ang iya ginhimo kanday Moises kag Aaron. (Numeros 14:22, 23) Ikap-at, sanday Moises kag Aaron ang mga lider sang mga Israelinhon. Ang ginsaligan sang mabug-at nga responsibilidad, may daku man nga salabton sa Dios.—Lucas 12:48.
Espirituwal nga mga Hiyas
Ginailog Mo Bala ang Pagtamod ni Jehova sa Kaluyahon sang Tawo?
12 Sa sini tanan nga sitwasyon, mahimo kuntani silutan gilayon ni Jehova si Aaron. Pero nahantop Niya nga indi malaut si Aaron ukon sia ang daku nga balasulon. Daw gintugutan ni Aaron ang mga kahimtangan ukon ang impluwensia sang iban nga magpalayo sa iya sa matarong nga dalanon. Pero sang ginpatalupangod sa iya ang iya mga sala, gilayon nga gin-aku niya ini kag ginsakdag ang mga paghukom ni Jehova. (Ex. 32:26; Num. 12:11; 20:23-27) Nagkonsentrar si Jehova sa pagtuo kag paghinulsol ni Aaron. Ginatos ka tuig sang ulihi, si Aaron kag ang iya mga kaliwat gindumdom gihapon nga mga mahinadlukon kay Jehova.—Sal. 115:10-12; 135:19, 20.
ABRIL 19-25
MGA BAHANDI SA PULONG SANG DIOS | NUMEROS 22-24
“Ginahimo ni Jehova ang Pagpakamalaut nga Pagpakamaayo”
Pagpahayag sing “Maayong Balita Tuhoy kay Jesus”
5 Sa karon, kaangay sang unang siglo, wala mapauntat sang paghingabot ang pagbantala sang katawhan sang Dios. Nagakatabo pirme nga kon piliton ang mga Cristiano nga magsaylo, sa bilangguan man ukon sa iban nga duog, napanaksihan tuhoy sa Ginharian ang mga tawo sa ila ginasayluhan. Halimbawa, nakabantala ang mga Saksi ni Jehova sa mga kampo konsentrasyon sang mga Nazi sang Bug-os Kalibutan nga Inaway II. Ang isa ka Judiyo nga nakasalapo sang mga Saksi didto nagsiling: “Ang kabakod sang mga bilanggo nga mga Saksi ni Jehova nagkumbinse sa akon nga ang ila pagtuo napasad sa Kasulatan—kag ako mismo nangin isa ka Saksi.”
it-2-E 291
Kabuangan
Ang Kabuangan sang Pagpamatok kay Jehova. Kabuangan nga gintinguhaan sang propeta nga si Balaam nga magtagna batok sa Israel para makabaton sing kuarta kay Hari Balak sang mga Moabnon, pero nadaug sia ni Jehova kag napunggan ang iya mga panikasog. Nagsulat si apostol Pedro parte kay Balaam nga “ang kabuangan sini nga manalagna ginpunggan sang asno nga naghambal kaangay sang tawo.” Para ilaragway ang kabuangan ni Balaam, gingamit niya ang Griego nga tinaga nga pa·ra·phro·niʹa nga ang buot silingon “wala sa husto nga panghunahuna.”—2Pe 2:15, 16; Nu 22:26-31.
Espirituwal nga mga Hiyas
Talalupangdon nga mga Punto Gikan sa Tulun-an sang Numeros
22:20-22—Ngaa naakig si Jehova kay Balaam? Nagsiling si Jehova kay manalagna Balaam nga indi niya dapat pagpakamalauton ang mga Israelinhon. (Numeros 22:12) Apang, naglakat ang manalagna upod sa mga tinawo ni Balak sa tuyo nga pakamalauton ang Israel. Luyag ni Balaam nga pahamut-an ang hari sang Moab kag sa amo makabaton sia sing padya gikan sa iya. (2 Pedro 2:15, 16; Judas 11) Bisan sang napilitan si Balaam nga pakamaayuhon sa baylo nga pakamalauton ang Israel, gintinguhaan niya ang pabor sang hari paagi sa pagpanugda nga gamiton ang mga babayi nga nagasimba kay Baal agod sulayon ang Israelinhon nga mga lalaki. (Numeros 31:15, 16) Busa, naakig ang Dios kay Balaam bangod sang malimbungon nga pagkamahamkunon sang manalagna.
ABRIL 26–MAYO 2
MGA BAHANDI SA PULONG SANG DIOS | NUMEROS 25-26
“Mahimo Ka Bala Mangin Tuhay sa Iban?”
“Palagyo Kamo sa Seksuwal nga Imoralidad!”
ANG manugpamunit nagkadto sa isa ka lugar para mabunit ang isda nga luyag niya. Nagpili sia sing paon, ginbutang niya ini sa taga, kag gintawtaw sa tubig. Naghulat sia, kag sang gintukob sang isda ang paon, ginbunit niya ang isda.
2 Sing kaanggid, ang mga tawo posible man mabunit. Halimbawa, ang mga Israelinhon malapit na lang kuntani sa Ginsaad nga Duta sang nagkampo sila sa Kapatagan sang Moab. Ang hari sang Moab nagpromisa kay Balaam nga hatagan niya sia sang madamo nga kuarta kon pakamalauton niya ang Israel. Sang ulihi, nakakita sang paagi si Balaam para pakamalauton sang mga Israelinhon ang ila kaugalingon. Ginpili niya sing maayo ang paon. Ginpakadto niya ang bataon nga mga babayi sang Moab sa kampo sang mga Israelinhon para ganyaton ang mga lalaki.—Numeros 22:1-7; 31:15, 16; Bugna 2:14.
“Palagyo Kamo sa Seksuwal nga Imoralidad!”
4 Ngaa madamo nga Israelinhon ang nagtukob sa paon ni Balaam? Ginhunahuna lang nila ang ila kaugalingon nga handum, kag ginkalimtan nila ang tanan nga ginhimo ni Jehova para sa ila. Madamo sang rason ang mga Israelinhon nga mangin mainunungon sa Dios. Ginhilway niya sila sa pagkaulipon sa Egipto, ginpakaon sa kahanayakan, kag gin-amligan asta makalab-ot sa dulunan sang Ginsaad nga Duta. (Hebreo 3:12) Pero, naganyat sila gihapon sang seksuwal nga imoralidad. Si apostol Pablo nagsulat: “Indi man kita maghimo sang seksuwal nga imoralidad, subong sang ginhimo sang iban sa ila.”—1 Corinto 10:8.
Espirituwal nga mga Hiyas
it-1-E 359 ¶1-2
Dulunan
Maathag nga ginapakita nga ang pagpartida sang duta sa mga tribo nabase sa duha ka rason: ang resulta sang pagabutgabot, kag ang kadakuon sang ila nga tribo. Mahimo nga ang ginpatuhuyan lang sang pagabutgabot amo ang ginabulubanta nga lokasyon sang palanublion nga duta sang kada tribo. Gani nagahatag ini sing palanublion sa isa ka seksion ukon iban pa nga seksion sang kadutaan, halimbawa kon ara ini sa bahin sang A ukon B, sa S ukon K, sa kapatagan malapit sa baybayon, ukon sa mga kabukiran. Ang desisyon sang pagabutgabot naghalin kay Jehova para malikawan ang kahisa ukon pag-ilinaway sang mga tribo. (Hul 16:33) Paagi sini, matuytuyan man sang Dios ang tagsa ka mga butang para ang kahimtangan sang kada tribo mapahisuno sa inspirado nga tagna sang patriarka nga si Jacob antes sia mapatay nga narekord sa Genesis 49:1-33.
Pagkatapos mahibaluan ang geograpiko nga lokasyon sang isa ka tribo paagi sa pagabutgabot, dapat man mahibaluan ang kasangkaron sang teritoryo sini base sa ikaduha nga rason: ang kadakuon sang tribo. “Partidahon ninyo ang duta nga panag-iyahan sang inyo pamilya paagi sa pagabutgabot. Dugangan ninyo ang palanublion sang daku nga pamilya, kag buhinan ninyo ang palanublion sang magamay nga pamilya. Kon ano ang magabutan sang kada isa, amo ini ang iya palanublion.” (Nu 33:54) Ang desisyon base sa pagabutgabot parte sa panguna nga geograpiko nga lokasyon magapabilin pero mahimo nga maghimo sing mga pagbag-o base sa kadakuon sang palanublion. Gani, sang nahibaluan nga ang teritoryo sang Juda tuman kadaku, ginbuhinan ang kalaparon sang duta sini paagi sa paghatag sang pila ka bahin sini sa tribo ni Simeon.—Jos 19:9.