LEKSION 18
Kon Paano Makilala ang Matuod nga mga Cristiano
Binilyon ka tawo ang nagasiling nga Cristiano sila. Pero lainlain ang ila pagpati kag ginasunod nga mga prinsipio sa kabuhi. Gani paano naton makilala ang matuod nga mga Cristiano?
1. Ano ang isa ka Cristiano?
Ang mga Cristiano, mga disipulo ukon sumulunod ni Jesucristo. (Basaha ang Binuhatan 11:26.) Paano nila ginapakita nga mga disipulo gid sila ni Jesus? Si Jesus nagsiling: “Kon ginatuman ninyo pirme ang akon ginatudlo, mga disipulo ko gid kamo.” (Juan 8:31) Buot silingon, dapat sundon sang matuod nga mga Cristiano ang mga panudlo ni Jesus. Ginbase gid ni Jesus ang iya mga panudlo sa Kasulatan, gani dapat ibase man sang matuod nga mga Cristiano ang ila mga pagpati sa Biblia.—Basaha ang Lucas 24:27.
2. Paano ginapakita sang matuod nga mga Cristiano ang gugma?
Ginsilingan ni Jesus ang iya mga sumulunod: “Maghigugmaanay kamo kaangay sang paghigugma ko sa inyo.” (Juan 15:12) Paano ginpakita ni Jesus nga ginahigugma niya ang iya mga disipulo? Nagpakig-upod sia sa ila. Ginpalig-on kag ginbuligan man niya sila. Ginhatag pa gani niya ang iya kabuhi para sa ila. (1 Juan 3:16) Pareho kay Jesus, ginapakita sang matuod nga mga Cristiano nga palangga nila ang isa kag isa indi lang sa ila ginahambal, kundi sa ila man ginahimo.
3. Ano ang masako nga ginahimo sang matuod nga mga Cristiano?
May ginpahimo si Jesus sa iya mga disipulo. “Ginpadala niya sila sa pagbantala sing Ginharian sang Dios.” (Lucas 9:2) Ang mga Cristiano sang una nagbantala, indi lang sa mga lugar diin sila nagasimba kundi sa mga lugar man nga madamo sing tawo kag sa mga balay. (Basaha ang Binuhatan 5:42; 17:17.) Ang matuod nga mga Cristiano subong nagabantala man sang kamatuoran sa Biblia sa bisan diin nga lugar nga may tawo. Palangga nila ang ila mga isigkatawo, gani nalipay sila nga gamiton ang ila tion kag kusog para sugiran sila sang paglaum kag paumpaw nga mabasa sa Biblia.—Marcos 12:31.
USISAA PA GID
Usisaon naton kon paano mo makilala ang matuod nga mga Cristiano kon ikumparar sa mga tawo nga wala nagasunod sa mga gintudlo kag ginhimo ni Jesus.
4. Ginausisa nila ang kamatuoran sa Biblia
Ang mga Cristiano sang una naggamit sang Pulong sang Dios
Indi tanan nga nagasiling nga Cristiano sila nagasunod sa ginasiling sang Biblia. Tan-awa ang VIDEO, dayon binagbinaga ang masunod nga pamangkot.
Ano ang ginhimo sang mga relihion nga nagapangangkon nga mga Cristiano para punggan ang mga tawo nga matun-an ang ginatudlo ni Jesus?
Gintudlo ni Jesus ang kamatuoran halin sa Pulong sang Dios. Basaha ang Juan 18:37, dayon binagbinaga ini nga pamangkot:
Suno kay Jesus, paano naton makilala ang mga Cristiano nga “dampig sa kamatuoran”?
5. Ginabantala nila ang kamatuoran sa Biblia
Ang mga Cristiano sang una nagbantala sa iban
Antes si Jesus nagbalik sa langit, may ginpahimo sia sa iya mga sumulunod nga dapat himuon asta subong. Basaha ang Mateo 28:19, 20 kag Binuhatan 1:8, dayon binagbinaga ini nga pamangkot:
Asta diin dapat magbantala?
6. Ginahimo gid nila ang ila ginabantala
Ano ang nagkumbinsi sa isa ka lalaki nga si Tom nga nakita na niya ang matuod nga mga Cristiano? Tan-awa ang VIDEO, dayon binagbinaga ang masunod nga mga pamangkot.
Sa video, ngaa nadulaan sing pagsalig sa relihion si Tom?
Ngaa kumbinsido sia nga nakita niya ang kamatuoran?
Mas epektibo ang aton ginahimo sangsa aton ginahambal. Basaha ang Mateo 7:21, dayon binagbinaga ini nga pamangkot:
Suno kay Jesus, ngaa indi bastante nga magsiling lang kita nga nagasunod kita sa iya?
7. Palangga nila ang isa kag isa
Ang mga Cristiano sang una nagpalanggaanay
Handa gid bala ang mga Cristiano nga itaya ang ila kabuhi para sa pareho nila nga mga Cristiano? Tan-awa ang VIDEO, dayon binagbinaga ang masunod nga mga pamangkot.
Sa video, ngaa handa si Lloyd nga itaya ang iya kabuhi para kay Brother Johansson?
Sa banta mo, ang iya bala ginhimo nagapakita nga matuod sia nga Cristiano?
Basaha ang Juan 13:34, 35, dayon binagbinaga ini nga mga pamangkot:
Ano dapat ang pagtratar sang mga disipulo ni Jesus ukon sang matuod nga mga Cristiano sa mga tawo nga lain ang rasa ukon halin sa iban nga pungsod?
Paano nila ipakita ini sa tion sang inaway?
KON MAGSILING ANG IBAN: “Ang tanan nga Cristiano palareho lang, lainlain lang nga sekta.”
Ano nga bersikulo ang puede mo ipabasa para mabal-an nila nga may matuod gid nga mga Cristiano?
SUMARYO
Ang matuod nga mga Cristiano nagasunod sa mga panudlo sang Biblia, nagapalanggaanay, kag nagabantala sang kamatuoran sa Biblia.
Rebyu
Sa diin ginabase sang matuod nga mga Cristiano ang ila mga pagpati?
Ano nga kinaiya ang makita gid sa matuod nga mga Cristiano?
Ano ang ginahimo sang matuod nga mga Cristiano?
DUGANG NGA IMPORMASYON
Kilalaha pa gid ang isa ka grupo nga nagatinguha gid nga sundon ang ginhimo kag gintudlo ni Jesucristo.
Basaha kon paano nakita sang madre sadto ang matuod nga “espirituwal nga pamilya.”
“Gingamit Nila ang Biblia Para Sabton ang Tanan Ko nga Pamangkot!” (Ang Lalantawan, Abril 1, 2014)
Tan-awa kon paano ginpakita sang matuod nga mga Cristiano ang ila gugma sa pareho nila nga mga Cristiano nga nagakinahanglan sing bulig.
Pagbulig sa Aton mga Kauturan sa Tion sang Kalamidad—Porsyon lang sang video (3:57)
Basaha kon paano ang mga Cristiano sadto kag ang matuod nga mga Cristiano subong pareho nga nagahimo sang mga tanda nga ginsiling ni Jesus nga nagapakilala nga mga sumulunod niya sila.
“Ano ang mga Tanda sang Matuod nga mga Cristiano?” (Ang Lalantawan, Marso 1, 2012)