Gikan sa Dalanon sang Kamatayon Padulong sa Dalanon sang Kabuhi

SA SULOD sang madamo nga tinuig ang akon kabuhi namantsahan sang akon pagkagiyan sa droga. Nagsugod ako sa ­mahugmay nga mga droga kag nagdangat sa maisog nga mga droga, subong sang LSD. Ang droga nagsimbulo sang kahilwayan gikan sa tanan nga sahi sang personal kag sosyal nga mga problema. Sing makapasubo, ginpalig-on ko ang iban nga mga pamatan-on sa pag-upod sa akon sa dalanon sang kamatayon.

Sanglit nakilal-an ako nga nagabaligya sing droga, ginabantayan ako sang mga polis. Ginabaton ko nga nahadlok ako, kay nahibaluan ko nga kon maaresto ako magakahulugan ini sing mga tinuig sa bilangguan. Bisan pa nagakabuhi ako nga may kalisang, kulang pa yadto sa pagpabag-o sa akon.

Gintinguhaan sang akon mga ginikanan nga buligan ako paagi sa pagpabulong sa akon sa mental home. Ginlauman sadto nga ang pagpabulong didto magalubad sang akon problema, apang sa gilayon nga nakaguwa ako, narealisar sang akon mga ginikanan nga bisan ang medikal nga pagbulong indi makapabag-o sa akon. Ginbuligan pa nila ako sing dugang paagi sa pagpahambal sa akon sa isa ka pari. Ini man wala magmadinalag-on. Nagpanigarilyo ako sing marijuana kag nag-inom sa atubangan niya, nga subong bala daw wala sing tawo. Indi ko gid luyag magbag-o!

Ang akon nobya nga si Oriana, batok gid sa akon pagkabuhi, kag indi ko luyag nga biyaan niya ako. Sa atubangan sini, daw isa ini ka maayo nga butang sa pagpabag-o sa akon. Apang, sa baylo, ginpadayon ko ang akon bisyo sa droga sing sekreto. Ginpapati ko si Oriana nga may balatian ako. Wala madugay napierdi ang akon pagkatawo. Pirme ako nagapanaad sa akon kaugalingon nga untatan ko na ini, nga malandas ko ini, apang wala ini sing pulos. Nagaabante lamang ako sing dugang pa sa dalanon sang kamatayon.

Bangod luyag ko pakaslan si Oriana sa gilayon nga mahimo, nangita kami sing in­te­ri­or dec­o­ra­tor nga mag-obra sa amon apart­ment. Ang iya asawa isa sang mga Saksi ni Jehova, kag ginhambal niya kami nahanungod sa iya pagtuo. Sang primero kapin nga napukaw si Oriana sang paghambalanay sang sa akon, apang samtang nagapadayon ini, narealisar ko nga ang mga Saksi ni Jehova nagapati sing malig-on nga sa dili madugay himuon sang Dios ining duta nga isa ka paraiso kag nga ang mga tawo magakabuhi diri sing dayon nga may paghidait.

Luyag ko mapamatud-an kon bala matuod gid nga “bisan karon ang mga Saksi ni Jehova nagapakita sing gugma kag pagtahod sa isa kag isa,” subong amo ang ginsiling sang babayi. Gani nagkadto kami ni Oriana sa Kingdom Hall. Nagbatyag ako sing kahuya bangod sang akon malaba nga buhok kag baraghal nga pamayo, apang ang pag-abiabi sang mga Saksi sa amon nagdula sang akon kahuya. Ginbatyag ko nga masaligan ko sila. Maathag gid nga ang sinsero nga gugma kag pagtahod sa isa kag isa nagaluntad na sa ila.

Kutob sadto, regular ako nga nagtambong sa Cristianong mga miting, kag nagsugod ako sa pagtuon sa Biblia upod sa mga Saksi ni Jehova. Ginpaguntingan ko ang akon buhok kag ginbag-o ang akon pamayo, kag paagi sa daku nga panikasog, nauntat ko ang akon pagpanigarilyo kag pagtomar sing droga. (2 Corinto 7:1) Apang, may isa pa ka daku nga problema sa akon kabuhi. Sa wala ko matalupangdi, nangin alkoholiko ako. Kon mahubog gani ako, nagapanggamo ako. Nagapakigbais ako sa mga tawo kag nagapangimon gid ako kay Oriana. Nadulaan ako sing kalipay. (Hulubaton 23:​29-35) Nagpanikasog ako nga utdon ining bisyo, kag sa bulig ni Jehova, sang gahom sang pangamuyo, kag sang bulig sang Cristianong mga kauturan, nagabot ko ining malain nga bisyo gikan sa akon kabuhi.

Ginbawtismuhan kami sang akon asawa sang Agosto 23, 1974. Bangod sa kamatuoran, ang akon kabuhi karon may katuyuan. Sanglit natigayon ko liwat ang akon pagsalig sa kaugalingon, natigayon ko ang pagtahod sa akon sa trabaho. Daku ang ginakita namon nga mag-asawa, apang narealisar namon nga diutay lamang ang tion namon para sa amon balaan nga pag-alagad. Kon luyag namon makatigayon sing kapin ka suod nga kaangtanan kay Jehova, dapat namon bag-uhon ang amon kabuhi. Kon indi, may peligro nga magabugnaw ang amon una nga gugma sa kamatuoran. Gani nagpayunir kami sang 1979, kag ginhugod namon ang amon kaugalingon sing kapin ka bug-os sa pagbantala.

Ngaa ginhimo ko ining desisyon? Ti, diin ayhan ako karon kon indi bangod sa kapawa sang kamatuoran? Ang mga kaupod ko anay sa dalanon sang kamatayon mga alkoholiko na karon ukon wala na sing pamilya ukon sa bilangguan na​—⁠ukon patay na. Apang, ginhilway ako sang mensahe sang Biblia. Ang bulong kag ang determinasyon kulang pa. Kinahanglan ang mabaskog nga motibo. Ang pagtinguha nga palambuon ang matuod nga pagpakig-abyan kay Jehova, nga Manunuga, nag-aman sina nga motibo. Karon, ginahandum ko gid sing sinsero nga himuon ko ang tanan nga masarangan ko sa pagbulig sa mga naulipon sang bisyo sa droga, subong man ang mga nagaantos ukon nagatinguha nga makaguwa sa ila mga problema. Paagi sa aktibo nga pagpakigbahin sa Cristianong ministeryo, nasugdan na namon sang akon asawa nga himuon ina gid. Nakatigayon kami sing pribilehiyo nga mabuligan ang madamo nga tawo sa dalanon sang kabuhi. Lakip sa sini amo ang tatlo ka tawo nga ginpakilala ko mismo sa mga droga. Sa karon nagaalagad ako subong manugtatap sang sirkito sa aminhan sang Italya.

Matuod ini: Ang pag-abuso sa droga kaangay sang dalan nga sa ulihi magadul-ong sa imo sa kamatayon ukon sa dimagkubos sa isa ka kabuhi nga wala sing palaabuton. Kulang ang mga tinaga sa pagpabutyag sang akon pasalamat kay Jehova nga Dios! Ginpakita niya sa akon ang dalan paguwa sa akon madulom anay nga pagkabuhi kag gintudlo sa akon ang dalanon sang kabuhi, nga puno sang kapawa, nga nagadul-ong sa dayon nga palaabuton.​—⁠Subong gin-asoy ni Ruggero Polotti.