Makabenepisyo Ka Bala sa Dibagay nga Kaluoy?

“SA AKON labi nga pagtuon sa mga talaksan sang Dios sa Biblia, labi ako nga nagabatyag nga ditakus sa iya kahamuot kag pagpakamaayo,” siling ni Frank. Napukaw ang iya interes sa Biblia samtang didto sia sa bilanggoan bangod sang paglapas sa kasuguan sa droga. Nabasa niya ang isa ka kopya sang libro nga Ang Kamatuoran nga Nagadul-ong sa Kabuhi nga Dayon,⁠a nakasiguro nga kamatuoran ang ginasiling sini, kag, sang ginpaguwa sa bilanggoan, nakig-angot sa mga Saksi ni Jehova agod makatuon sing dugang pa nahanungod sa Biblia.

Ngaa ang pagtuon sa Biblia nagpabatyag sa iya nga ditakus? Bangod ginlapas sang iya nagligad nga estilo sang kabuhi ang madamong mga prinsipio sang Dios. Ang sayop nga paggamit sang droga, pag-abuso sa alkohol, kag madamo iban pa malaw-ay nga mga batasan nagpasubo gid sing daku sa iya nga sang isa ka bes ginsilingan sia sang polis: “Mahimo bala nga isugid mo sa akon ang imo direksion? Luyag ko lang mahibaluan kon diin ipadala ang imo bangkay!”

Apang, ang nagpabatyag sa iya nga indi gid takus sang ulihi amo nga bisan ano man ang himuon niya, nabudlayan gid sia sa paglandas sining nagdulot na nga dimatinlo nga mga batasan. Ang makahuluya nga pagkagiyan sa alkohol, halimbawa, naglupig halos sa iya. “Pirme ako napaslawan kag nasuboan sing daku,” siling niya. “Halos nag-ampo na ako, nagabatyag nga walay paglaum nga kaso ang akon.”

Mahimo nga ang iban wala sing nagligad nga kasubong kay Frank. Apang, mahimo nga nagbatyag sila sing pagkaditakus. Ayhan bangod ini sang pagpahamtang nila sing dimakatarunganon kataas nga mga talaksan para sa ila kaugalingon samtang nagapanikasog sila nga magkabuhi nahisuno sa ginabatyag nila nga mga kinahanglanon sang Dios. Sang napaslawan sila, nagbatyag sila nga nakasala. “Ang pagkamakasasala isa ka malain nga damgo,” paathag ni Dr. Claire Weekes sa iya libro nga Self-Help for Your Nerves, “ilabi na sa mga nagapanikasog sa pagpahamtang sing mataas nga talaksan para sa ila kaugalingon.” Ano ang himuon sang isa ka Cristiano kon apektado sia sinang mga balatyagon sang pagkaditakus?

Apresyaha ang Dibagay nga Kaluoy

“Ang isa nga nakabulig gid sa akon sing daku,” siling ni Frank, “amo ang pag-apresyar sa ginasiling sang Biblia sa Hebreo 4:​15, 16.” Didto si apostol Pablo nagapahanumdom sa aton nga si Jesus isa ka mainulikdon nga kabulig nga “nagasimpatiya sa aton mga kaluyahon” kag nagapaposible para sa aton nga “mabaton ang kaluoy kag maagom ang dibagay nga kaluoy sa pagbulig sa aton sa tion sang mga kinahanglanon.”

Luyag mo bala ang sekreto sa paglandas sang mga balatyagon sang pagkaditakus? Amo ini: Dumduma nga nahibaluan ni Jehova nga Dios kag ni Jesucristo nga kita maluya bangod sang napanubli nga pagkadihimpit. Nahangpan nila nga indi naton matuman sing himpit ang matarong nga mga talaksan. (Salmo 51:​5; Roma 3:​23; 5:​12, 18; Santiago 3:2) Busa wala sila nagapaabot sa aton sing labi pa sang sa mahatag naton. Ginatan-aw nila ang aton maayong mga kinaiya, indi ang aton mga kaluyahon. Ang salmista namangkot: “Kon ikaw, O Jah, O Jehova, magtanda sang kalautan, sin-o bala ang makatindog?” (Salmo 130:3) Nahibaluan mo nga wala sing isa sa aton. Apang, paagi sa halad gawad ni Jesucristo, si Jehova maluluy-on nga nagahatag sa aton sing matinlo nga tindog walay sapayan sang aton mga pagkadihimpit. (1 Juan 2:​2; 4:​9, 10) Matigayon naton ang “kapatawaran sang aton mga paglapas”​—⁠kag busa mabuligan sa paglandas sa bisan anong balatyagon sang pagkaditakus​—⁠“suno sa kamanggaran sang iya dibagay nga kaluoy.”​—⁠Efeso 1:⁠7.

Tan-awa ini sa sining paagi. Ang mga tawo nga maluyagon sa mga taliambong magahimo sang tanan agod mapasag-uli ang napierde katama nga mga paintings ukon iban pa nga mga buhat sang taliambong. Halimbawa, didto sa National Gallery sang London, Inglaterra, sang ginpierde sang isa ka tawo nga may shotgun ang car­toon ni Leonardo da Vinci nga nagabili sing £20 milyones (mga $32 milyones, U.⁠S.) wala sing isa ang nagpanugda nga bangod napierde na ang drowing, ihaboy na lang ini. Ang panikasog nga mapasag-uli ang 487-anyos nga obra maestra ginsugdan sa gilayon. Ngaa? Bangod hamili ini sa mga mata sang mga nagahigugma sa taliambong.

Indi bala nga daku pa ang imo bili sang sa yeso kag uling nga drowing? Amo ka sina sa mata sang Dios​—⁠bisan kon daw ano ka daku ang imo diperensya bangod sang napanubli nga kasal-anan. (Salmo 72:​12-14; Mateo 20:28) Si Jehova nga Dios, ang lantip nga orihinal nga Manunuga sang tawhanon nga panimalay, magahimo sang kon ano ang kinahanglanon agod ipasag-uli sa kahimpitan ang mga katapo sinang panimalay nga handa sa pagpasakop sa iya mahigugmaon nga pag-atipan.​—⁠Ipaanggid ang Binuhatan 3:​21; Roma 8:​20-22.

Sabta ang Dibagay nga Kaluoy

Sunda ang halimbawa ni apostol Pablo. Gin-apresyar gid niya ang kaayo sang Dios bangod sang maluluy-on nga pagpatawad sa iya sa iya nagligad nga mga sala kag subong man sang pirme nga pagsakdag sa iya panikasog nga malandas ang nagabalikbalik nga mga kaluyahon. (Roma 7:​15-25; 1 Corinto 15:​9, 10) Gintadlong ni Pablo ang iya dalanon sang kabuhi kag ‘ginsakit (man niya) ang iya lawas kag gintuytuyan ini subong sang ulipon’ agod magpabilin sa dalanon nga kalahamut-an sang Dios. (1 Corinto 9:27) Wala niya gintugutan ang iya lawas, upod ang iya makasasala nga mga huyog sa pisikal kag emosyonal, nga magtuytoy sa iya subong ulipon.

Batuna ang dibagay nga kaluoy sang Dios, kag tuguti ini sa pagtuytoy sa imo sa paghinulsol. (Roma 2:​4; 2 Corinto 6:1) Kon ginatublag ka sang nagligad nga mga sala, tadlunga ini kag nian patihi ang pasalig ni Jehova nga ginpatawad ka na niya. (Isaias 1:​16-18; Binuhatan 2:38) Kon ang dalayon nga mga kaluyahon nagatublag sa imo, awaya ini sing padayon. Hanuot nga mangamuyo sing bulig kay Jehova nga malandas mo ini samtang sa amo man nga tion ginatugyan mo ang imo kaugalingon sa iya kaluoy. (Salmo 55:22) Nakatuon sa iya kaugalingon nga eksperiensia, si Frank nagalaygay: “Kon napaslawan kon kaisa ang isa sa iya pagpakig-away sa malain nga batasan, indi niya dapat tamdon subong kabilugan kag katapusan nga kapaslawan kundi, sa baylo, subong umalagi nga upang.” Kon ginadugangan sang iban ang imo problema paagi sa pagpangabay sa imo sing labi pa sang sa mahatag mo, dumduma nga ang Dios amo ang ginatinguhaan mo nga pahamut-an, indi ang mga tawo.​—⁠Galacia 1:⁠10.

Sa imo pagpakig-away sa kon ano ang matarong, magbantay batok sa “malimbungon nga mga buhat” ni Satanas, sa ginatawag nga “malaut nga mga padihot sang Yawa.” (Efeso 6:​11, Reference Bible, foot­note; Today’s English Version) Binagbinaga ang duha ka “malaut nga mga padihot” nga ginagamit niya sa panikasog nga dingotan ka sang mga benepisyo sang dibagay nga kaluoy.

“Malaut nga mga Padihot” ni Satanas

Ginahingalitan sang Yawa ang balatyagon sang pagkaditakus sa panikasog nga pahilayuon ka sa Dios. Si Satanas amo ang ginhalinan sang sala nga naghalit sa imo una sa tanan. Karon mahimo niya tinguhaan nga padakuon ang balatyagon nga wala ka sing pulos sa mata sang Dios, subong sang gintinguhaan nga himuon ni Bildad kay Job. (Job 25:​4-6; Juan 8:44) Daw ano kadamo nga inaway ang napierde bangod ang mga soldado nakig-away nga maluya na nga daan ang buot! Gani, indi pagtuguti nga paluyahon ni Satanas ang imo buot. (Efeso 6:​10-13) Ang paghibalo sa mga padugi ni Satanas dapat magpahulag sa imo nga makig-away sing labi pa agod himuon ang matarong.​—⁠2 Corinto 2:⁠11.

Kon nagakasubo ka kon kaisa bangod sang lainlain nga mga kapaslawan, siguraduha nga wala ka ‘nalumus sa lakas nga kasubo.’ (2 Corinto 2:7) Si Dr. Claire Weekes nagkomento nahanungod sa huyog sang iban nga magpadala sa nagligad nga mga kapaslawan: “Ang pagtugot sa nagligad nga sala nga magparalisar sa karon nga buhat malaglagon nga pagkabuhi.”​—⁠Tan-awa ang Binuhatan 3:⁠19.

Kon sarang naton matuman sing himpit ang tanan nga mga kinahanglanon sang Dios, nagakabagay nga kaluoy para sa iya nga hatagan kita sing mga pagpakamaayo nga ginsaad niya. Apang si Jehova nga Dios kag si Jesucristo nagapakita sa aton sing kaluoy nga “dibagay.” Ang A Greek-English Lexicon of the New Testament, ni J. H. Thayer, nagapaathag sang kahulugan sang tinaga nga gingamit ni apostol Pablo sa paglaragway sini nga kinaiya sang Dios: “Ang tinaga [khaʹris] nagalakip sang ideya sang kaayo nga nagahatag sa isa sang indi bagay sa iya.” Wala kita sing buhat nga nagakabagay sang pagpakamaayo sang Dios. Subong sang ginsiling ni Pablo, isa ini ka dibagay nga kaluoy. Kon ginahimo mo ang tanan nga masarangan mo sing hanuot sa sulod sang imo mga limitasyon sa pagtuman sang imo mga obligasyon sa Dios malipayon nga himua ina. Wala na sing iban pa nga ginapangabay si Jehova sa imo.

Apang, mangin alisto sa isa pa ka “malaut nga padihot” ni Satanas. Ginadaya niya ang iban sa panghunahuna nga mabentahaan nila ang dibagay nga kaluoy sang Dios, nga mahingalitan nila ang iya kaluoy. Si Jehova mahigugmaon nga nagapatawad sang aton mga kaluyahon, apang wala ini nagakahulugan nga mag-untat kita sa pagpanikasog nga malandas ini. Ginlaragway ni Pablo ang iban nga “nagsikway sang Anak sang Dios kag . . . nagpasipala sa espiritu sang dibagay nga kaluoy.” (Hebreo 10:29) Wala sila magpakita sing pagtahod sa matarong nga mga prinsipio kag mapasipalahon nga nagyaguta sa kasuguan sang Dios, naghimo sang ila kaugalingon nga indi na makapasag-uli. Si Judas nga utod sa iloy ni Jesus, nga nakakita sang katalagman nga mahimo sang mga ahente ni Satanas, nagsulat: “May pila ka tawo nga nagsulod [sa kongregasyon], . . . diosnon nga mga tawo, nga nagabaylo sang dibagay nga kaluoy sang aton Dios sa kaulag.”​—⁠Judas 4.

Mahimo nga buangon ni Satanas ang iban sa paghunahuna nga sa dimagkubos hungod sila nga makahimo sing sala kag nian makapangayo sing kapatawaran sa ila sala sa Dios. Apang indi pagpatawaron ni Jehova ang hungod nga nagalapas sang iya mga kasuguan. “Bugana [sia] sang mahigugmaon nga kalulo” sa mga nagapanikasog nga alagaron sia sa bug-os nila nga masarangan walay sapayan sang ila mga pagkadihimpit. “Apang indi nga mas-a magpasaylo sang malalison” kon nagakaigo.​—⁠Exodo 34:​6, 7.

Makabenepisyo Ka Gikan sa Dibagay nga Kaluoy

Makalilipay mahibaluan nga si Jehova wala nagatamod sa imo sa imo lamang dihimpit kag may depekto nga kahimtangan. Nahibaluan niya kon mangin ano ka kon bug-os nga iaplikar ang nagapasag-uli nga ikasarang sang halad gawad ni Jesus. Busa, mangamuyo sing masaligon kay Jehova, subong sang ginhimo ni salmista David. “Kaluoyi ako, O Dios,” siling ni David, “suno sa imo mahigugmaon nga kaluoy. Suno sa kadamuon sang imo bugana nga kaluoy panasa ang akon mga paglalis. Hugasi ako sing himpit gid sang akon kalautan, kag tinloi ako gikan sa akon sala. Kay ginakilala ko ang akon mga paglalis, kag ang akon sala yari gihapon sa atubangan nakon. Lipdi ang imo nawong gikan sa akon mga sala, kag panasa ang tanan ko nga kalautan. . . . Ang buong kag mahinulsulon nga tagipusuon, O Dios, dili mo pagtamayon.”​—⁠Salmo 51:​1-3, 9, 17.

Ang imo mga paglapas kag mga sala mahimo nga pirme yara sa atubangan mo. Kon kaisa nagabatyag ka nga kaangay sa buhaha nga anak nga ginlaragway ni Jesus. Sang nagpauli ining lamharon nga lalaki pagkatapos sang makahuluya nga pag-uyang sang iya palanublion sa dumuluong nga lugar, nagsiling sia sa iya amay: “Indi na ako takus pagtawgon nga anak mo”! (Lucas 15:21) Apang, ining lamharon nga tawo may nagakaigo nga panimuot. Wala niya ginsikway ang kaayo sang iya amay ni gintinguhaan nga hingalitan ini. Gani mahigugmaon sia nga ginbaton liwat sang iya amay sa panimalay. (Lucas 15:​20-24) Si Jehova malipay man sa paghimo sina para sa mga makasasala nga hanuot nga nagapanikasog sa paghimo sang iya kabubut-on.​—⁠Salmo 103:​8-14; Isaias 55:⁠7.

Wala pagtuguti ni Frank ang mga balatyagon sang pagkaditakus nga magpaluya sa iya. Naghulag sia sa dibagay nga kaluoy sang Dios, kag karon nagaalagad sia subong ministeryal nga alagad sa kongregasyon sang mga Saksi ni Jehova. “Nagalumpat ako sa kasadya sa karon,” siling niya, “kon mahunahuna ko ang ginhimo kag himuon pa ni Jehova nga Dios kag ni Jesucristo para sa aton!”

[Footnote]