Mga Pamangkot Gikan sa mga Bumalasa

Nagakaigo bala ang pagbaton sing bakuna ukon iban pa nga indyeksion nga nagaunod sang albumin nga ginkuha gikan sa dugo sang tao?

Sing prangka, ang tagsa ka Cristiano dapat magdesisyon sa sini sing personal.

Ang mga alagad sang Dios nagakaigo nga luyag magtuman sa sugo nga masapwan sa Binuhatan 15:​28, 29, nga maglihi sa dugo. Sing nagakahisuno, ang mga Cristiano indi magakaon sing karne nga ang dugo sini wala mapatulo ukon iban pa nga mga produkto kaangay sang soriso nga dugo. Apang, ang kasuguan sang Dios naaplikar man sa mga bulong. Ang mga Saksi ni Jehova nagadala sing dokumento nga nagapaathag nga sila nagadumili sa ‘mga pagpatayhon sing dugo, bug-os nga dugo, pula nga selula (red ­cells), puti nga selula (­white ­cells), plate­lets ukon plasma sang dugo.’ Apang, ano naman, ang tuhoy sa serum nga mga indyeksion nga nagaunod sing diutay nga protina sang dugo?

Madugay na nahibaluan sang mga Saksi nga isa ini ka butang nga desisyunan sing personal nahisuno sa nahanas sa Biblia nga konsiensia. Ginpatalupangod ini sa “Mga Pamangkot Gikan sa mga Bumalasa” sang Ang Lalantawan sang Hunyo 1, 1990, nga nagabinagbinag sang serum nga indyeksion nga mahimo irekomendar sang doktor kon ang isa may balatian. Indi plasma sang dugo ang aktibo nga mga elemento sina nga mga indyeksion kundi mga anti­body gikan sa plasma sang mga tawo ukon sapat nga may resistensya sa balatian. Ang iban nga mga Cristiano nga nagabaton sinang mga indyeksion nga may maayo nga konsiensia nakahibalo nga ang mga anti­body gikan sa dugo sang nagabusong nga babayi nagasaylo sa dugo sang lapsag sa iya taguangkan. Ang “Mga Pamangkot Gikan sa mga Bumalasa” nagsambit sini, subong man sang kamatuoran nga ang iban nga albumin gikan sa nagabusong nga babayi nagasaylo sa iya bata.

Madamo ang nakasapo sini nga talalupangdon, bangod ang iban nga mga bakuna nga wala maghalin sa dugo mahimo nagaunod sing diutay nga albumin sang plasma nga ginagamit ukon ginadugang sa pagpalig-on sang mga ingrediente sang bulong. Sining karon lang ginagamitan man sing diutay nga albumin ang indyeksion nga sintetiko nga hor­mone EPO (eryth­ro­poi­etin). Ginbaton sang iban nga mga Saksi ang pagpaindyeksion sing EPO bangod nagapadasig ini sa pagmuad sang pula nga selula sang dugo kag nian magapahaganhagan sa pamatyag sang doktor nga ang pagtayhon sang dugo mahimo kinahanglanon.

Mahimo man gamiton sa palaabuton ang iban pa nga mga bulong nga nagalakip sing diutay nga albumin, bangod ang mga kompanya sang bulong nagahimo sing bag-o nga mga produkto ukon nagabag-o sang mga pormula sang nahimo na nga mga bulong. Mahimo luyag sang mga Cristiano binagbinagon kon bala ang albumin bahin sang bakuna ukon iban nga indyeksion nga ginarekomendar sang doktor. Kon may mga pangduhaduha sila ukon may rason sa pagpati nga basi may albumin ang bulong, makapamangkot sila sa ila doktor.

Subong nasambit na, madamo nga Saksi ang wala mamatok sa pagbaton sing indyeksion nga nagaunod sing diutay nga albumin. Sa gihapon, ang bisan sin-o nga luyag mag-usisa sini nga butang sing maid-id pa antes maghimo sing personal nga desisyon dapat magrepaso sang impormasyon nga ginhatag sa “Mga Pamangkot Gikan sa mga Bumalasa” sang Ang Lalantawan sang Hunyo 1, 1990.