Handa Ka Na Bala sa Pinakaimportante nga Adlaw sang Tuig?

PILA ka oras antes napatay si Jesus, naghimo sia sing sulundan kon paano saulugon ang iya kamatayon. Ini nga okasyon ginatawag nga “panihapon sang Ginuo.” (1 Corinto 11:20) Ginpakita ni Jesus nga importante ini nga okasyon sang magsugo sia: “Padayon ninyo nga himuon ini bilang pagdumdom sa akon.” (Lucas 22:19) Gusto mo bala tumanon si Jesus? Kon amo, kabiga ang anibersaryo sang iya kamatayon bilang pinakaimportante nga adlaw sang tuig.

Pero, san-o mo ini dapat saulugon? Ano ang himuon mo para mangin handa ka kag maintiendihan mo kon daw ano ka importante ini nga okasyon? Dapat binagbinagon sing maayo sang tagsa ka Cristiano ini nga mga pamangkot.

Daw Ano Kasunson?

Masami nga ginaselebrar naton ang importante nga mga hitabo sing makaisa kada tuig. Halimbawa, ang trahedya nga natabo sang Septiembre 11, 2001, pirme gid madumduman sang mga taga-New York City nga namatyan sang ila pinalangga sang ginbombahan ang World Trade Center. Pero kada tuig, ini nga petsa isa ka pinasahi nga adlaw.

Amo man sini sa panahon sang Biblia. (Ester 9:21, 27) Ginsugo ni Jehova nga Dios ang mga Israelinhon nga saulugon kada tuig ang paghilway sa ila sa pagkaulipon sa Egipto paagi sa milagro. Ini nga okasyon ginatawag sa Biblia nga Paskua, kag ginaselebrar ini sang mga Israelinhon sing makaisa kada tuig sa petsa mismo nga ginhilway sila.—Exodo 12:24-27; 13:10.

Bag-o lang ginselebrar ni Jesus ang Paskua upod sa iya mga apostoles sang ginsugdan niya ang pinasahi nga panihapon nga nangin sulundan sa pagdumdom sang iya kamatayon. (Lucas 22:7-20) Ang Paskua ginaselebrar sing makaisa kada tuig. Gani, makasiling kita nga ining bag-o nga okasyon nga ginbulos sa Paskua selebrahon man sing makaisa lang kada tuig. Pero san-o?

San-o?

Para masabat ini, dapat mahibaluan naton ang duha ka butang. Una, sang panahon sang Biblia, ang isa ka bag-o nga adlaw nagasugod sa pagtunod sang adlaw kag matapos ini sa masunod nga pagtunod sang adlaw. Buot silingon, ang isa ka adlaw ginaisip halin sa kahapunon asta sa kahapunon.—Levitico 23:32.

Ikaduha, lain ang kalendaryo sang Biblia sangsa kalendaryo subong. Sa Biblia, ang Marso kag Abril subong katumbas sang mga bulan nga Adar kag Nisan. (Ester 3:7) Ginaisip sang mga Judiyo ang ila mga binulan halin sa lati pakadto sa masunod nga lati. Ginaselebrar nila ang Paskua sa ika-14 nga adlaw sang Nisan, ang nahauna nga bulan sa ila kalendaryo. (Levitico 23:5; Numeros 28:16) Sina man nga adlaw, Nisan 14, ginlansang sang mga Romano si Ginuong Jesucristo. Napatay sia sang ika-1,545 nga tuig nga pagselebrar sang panihapon sang Paskua. Gani, pinasahi gid nga adlaw ang Nisan 14!

Ano ang katumbas sang Nisan 14 sa aton kalendaryo? Kalkulahon naton para mabal-an naton ang eksakto nga petsa. Ang Nisan 1 nagaumpisa kon ang lati nga pinakamalapit sa spring equinox (ang pagsugod sang tigpamulak sa Aminhan nga Hemisperio) kitaon na kon magtunod ang adlaw sa Jerusalem. Kon mag-isip kita sing 14 ka adlaw paabante, matupa ini sa Nisan 14. Masami nga ugsad ini nga petsa. Paagi sa sini nga kalkulasyon nga ginagamit sang Biblia, ang Nisan 14 subong nga tuig magasugod sa pagtunod sang adlaw sa Domingo, Abril 17, 2011.a

Gani, ang mga Saksi ni Jehova magatipon sini nga tuig upod ang tanan nga gusto magdumdom sang kamatayon ni Jesus. Ginaagda ka gid nila nga magbuylog sa ila. Palihug kontaka ang mga Saksi ni Jehova sa inyo lugar para mabal-an mo kon ano oras kag kon diin ini hiwaton. Selebrahon nila ini indi sa aga ukon sa hapon, kundi pagtunod sang adlaw. Ngaa? Kay suno sa Biblia, isa ini ka ‘panihapon.’ (1 Corinto 11:25) Sa gab-i sang Domingo, Abril 17, 2011, selebrahon ang anibersaryo sang pinasahi nga okasyon nga ginsugdan ni Jesus, 1,978 ka tuig na ang nagligad. Sadto man nga adlaw, Nisan 14, ginpatay si Jesus. Indi bala nga amo gid ini ang adlaw nga dapat dumdumon ang iya kamatayon?

Paghanda Para sa Sini

Ano ang himuon mo para mangin handa ka sa sini nga okasyon? Ang isa ka paagi amo ang pagpamalandong sa ginhimo ni Jesus para sa aton. Ang libro nga Ano Gid ang Ginatudlo Sang Biblia?b nakabulig sa minilyon nga apresyahon pa gid ang kahulugan sang kamatayon ni Jesus.—Mateo 20:28.

Ang isa pa ka paagi para mahandaan ining pinasahi nga okasyon amo ang pagbasa sang mga hitabo parte sa katapusan nga inadlaw ni Jesus diri sa duta. Sa masunod nga mga pahina, may tsart. Nalista sa tuo ang mga rekord sa Biblia parte sa mga hitabo antes napatay si Jesus. Nalista man ang mga kapitulo sang libro nga Ang Pinakabantog nga Tawo nga Nagkabuhic nga nagapaathag sang mga hitabo.

Makita naman sa wala kon sa ano nga mga adlaw sini nga tuig nagtupa ang mga hitabo. Mas maayo kon basahon mo ang pila sining mga bersikulo sa Biblia sa mga petsa antes sang Panihapon sang Ginuo. Makabulig ini sa imo nga mahandaan ang pinakaimportante nga adlaw sang tuig.

[Mga Nota]

[Blurb sa pahina 22]

Selebraha ang kamatayon ni Jesus,Domingo, Abril 17, 2011

[Tsart/Mga Retrato sa pahina 23, 24]

(Para sa aktual nga pormat, tan-awa ang publikasyon)

ANG KATAPUSAN NGA SEMANA

2011 Martes Abril 12

▪ Adlaw nga Inugpahuway

□ Juan 11:55–12:1

□ gt 101, par. 2-4d

NISAN 9 (masugod pagtunod sang adlaw)

Sa panahon sang Biblia, ang isa ka bag-o nga adlaw nagasugod sa pagtunod sang adlaw kag matapos ini sa masunod nga pagtunod sang adlaw

▪ Sinalusalo upod kay Simon nga aruon

▪ Naghaplas si Maria sang nardo

▪ Nagbisita ang mga Judiyo kay Jesus kag kay Lazaro

□ Mateo 26:6-13

□ Marcos 14:3-9

□ Juan 12:2-11

□ gt 101, par. 5-9

2011 Mierkoles Abril 13

▪ Madaugon nga pagsulod sa Jerusalem

▪ Nagpanudlo sa templo

□ Mateo 21:1-11, 14-17

□ Marcos 11:1-11

□ Lucas 19:29-44

□ Juan 12:12-19

□ gt 102

NISAN 10 (masugod pagtunod sang adlaw)

▪ Nagpaligad sang gab-i sa Betania

2011 Huebes Abril 14

▪ Kaagahon pa nagpa-Jerusalem

▪ Gintinluan ang templo

▪ Naghambal si Jehova halin sa langit

□ Mateo 21:12, 13, 18, 19

□ Marcos 11:12-19

□ Lucas 19:45-48

□ Juan 12:20-50

□ gt 103, 104

NISAN 11 (masugod pagtunod sang adlaw)

2011 Biernes Abril 15

▪ Nagpanudlo sa templo paagi sa mga ilustrasyon

▪ Ginkondenar ang mga Fariseo

▪ Gintalupangod ang amot sang balo

▪ Gintagna ang kalaglagan sang Jerusalem

▪ Naghatag sing tanda sang iya pagkari

□ Mateo 21:19–25:46

□ Marcos 11:20–13:37

□ Lucas 20:1–21:38

□ gt 105 asta 112, par. 1

NISAN 12 (masugod pagtunod sang adlaw)

2011 Sabado Abril 16

▪ Malinong nga adlaw upod sa mga disipulo sa Betania

▪ Nangita sing paagi si Judas nga makaluib

□ Mateo 26:1-5, 14-16

□ Marcos 14:1, 2, 10, 11

□ Lucas 22:1-6

□ gt 112, par. 2-4

NISAN 13 (masugod pagtunod sang adlaw)

2011 Domingo Abril 17

▪ Naghanda sanday Pedro kag Juan para sa Paskua

▪ Nagsunod si Jesus kag ang iya napulo ka apostoles sang hapon na

□ Mateo 26:17-19

□ Mark 14:12-16

□ Lucas 22:7-13

□ gt 112, par. 5 asta 113, par. 1

NISAN 14 (masugod pagtunod sang adlaw)

▪ Nagselebrar sing Paskua

▪ Ginhinawan ang tiil sang mga apostoles

▪ Ginpalakat si Judas

▪ Ginsugdan ang pagsaulog sang iya kamatayon

□ Mateo 26:20-35

□ Marcos 14:17-31

□ Lucas 22:14-38

□ Juan 13:1–17:26

□ gt 113, par. 2 asta sa katapusan sang 116

tungang-gab-i

2011 Lunes Abril 18

▪ Ginluiban kag gindakop sa hardin sang Getsemane

▪ Nalagyo ang mga apostoles

▪ Ginbista sang Sanhedrin

▪ Ginpanghiwala ni Pedro si Jesus

□ Mateo 26:36-75

□ Marcos 14:32-72

□ Lucas 22:39-62

□ Juan 18:1-27

□ gt 117 asta sa katapusan sang 120

▪ Nag-atubang liwat sa Sanhedrin

▪ Gindala kay Pilato, dayon kay Herodes, balik kay Pilato

▪ Ginsentensiahan sing kamatayon kag ginlansang

▪ Napatay sang mga alas tres sang hapon

▪ Ginkuha ang bangkay kag ginlubong

□ Mateo 27:1-61

□ Marcos 15:1-47

□ Lucas 22:63–23:56

□ Juan 18:28-40

□ gt 121 asta 127, par. 7

NISAN 15 (masugod pagtunod sang adlaw)

▪ Adlaw nga Inugpahuway

2011 Martes Abril 19

▪ Ginpabantayan ni Pilato ang lulubngan ni Jesus

□ Mateo 27:62-66

□ gt 127, par. 8-9

NISAN 16 (masugod pagtunod sang adlaw)

□ Mark 16:1

2011 Mierkoles Abril 20

▪ Ginbanhaw

▪ Nagpakita sa mga disipulo

□ Mateo 28:1-15

□ Marcos 16:1-8

□ Lucas 24:1-49

□ Juan 20:1-25

□ gt 127, par. 10 asta 129, par. 10

[Nota]