Ang Pagtamod sang Biblia

Panghilahi—Magpatawad Bala ukon Indi?

“PATAWARA ninyo kon may butang kamo batok sa bisan kay sin-o; agod nga ang inyo Amay sa langit magapatawad man sa inyo sang inyo mga paglapas.” (Marcos 11:25) Inang mga pinamulong ni Jesus nagapautwas sing pila ka mabudlay nga mga pamangkot kon ang pag-asawahay ginatublag sang panghilahi: Patawaron bala sang inosente nga Cristiano ang iya tiayon kag huptan ang pag-asawahay?a Kon mamat-od sia nga makigdiborsio, ginaguba bala niya ang iya kaugalingon nga kaangtanan sa Dios? Tan-awon naton kon paano nagabulig ang Biblia sa pagsabat sining mga pamangkot.

Dapat Ka Bala Pirme Magpatawad?

Ang mga pinamulong bala ni Jesus nga “patawara ninyo kon may butang kamo batok sa bisan kay sin-o,” nagakahulugan nga sa tanan nga kahimtangan​—lakip na kon ang isa ka tiayon nagapanghilahi​—ang Cristiano obligado sa pagpatawad? Ang ginsiling ni Jesus dapat hangpon sa kapawa sang iban niya nga mga ginsiling tuhoy sa pagpatawad.

Halimbawa, matun-an naton ang isa ka importante nga prinsipio tuhoy sa pagpatawad gikan sa pinamulong ni Jesus nga narekord sa Lucas 17:​3, 4: “Kon ang imo utod makasala sabdunga sia, kag kon maghinulsol sia patawara sia. Bisan kon makasala sia sa imo sing makapito sa isa ka adlaw kag makapito magbalik sa imo, nga nagasiling, ‘Nagahinulsol ako,’ patawara sia.” Sing pat-od sa mga kaso sang serioso nga sala, ang isa nga ginhimuan sing sala ginapalig-on sa pagpatawad kon may sinsero nga paghinulsol. Amo man sini ang pagtamod ni Jehova sa mga butang; agod matigayon ang pagpatawad sang Dios, dapat kita maghinulsol sing hanuot.​—Lucas 3:​3; Binuhatan 2:​38; 8:22.

Apang, ginapakita man sini, nga kon ang makihilahion nga tiayon indi mahinulsulon, wala nagaako sang iya sala, halangpunon nga mahimo pilion sang inosente nga tiayon nga indi magpatawad.​—Ipaanggid ang 1 Juan 1:​8, 9.

Pagpatawad​—Kamusta ang mga Resulta sang Pagpakasala?

Ano, nian, kon nagahinulsol ang makihilahion? Kon may paghinulsol, may basihan para sa pagpatawad. Apang ang pagpatawad bala nagakahulugan nga ang nakasala indi balasulon sa tanan nga resulta sang iya sayop nga dalanon? Binagbinaga ang pila ka halimbawa sang pagpatawad ni Jehova.

Sang nagrebelde ang mga Israelinhon pagkatapos mamati sa napulo ka espiya nga naghatag sang indi maayo nga report tuhoy sa duta sang Canaan, si Moises nakitluoy kay Jehova: “Patawara, palihug, ang kalapasan sining katawhan.” Si Jehova nagsabat: “Napatawad ko suno sa imo pulong.” Nagakahulugan bala ini nga ang mga nakasala wala sing salabton sa bisan anong resulta sang ila mga ginhimo? Si Jehova nagpadayon: “Apang tanan nga . . . wala magpamati sa akon tingog, indi makakita sang duta nga ginsumpa ko sa ila mga ginikanan.” (Numeros 14:​19-23) Gintuman ni Jehova ang iya ginsiling; yadtong dumaan nga kaliwatan​—magluwas kay Josue kag kay Caleb​—wala makakita sa Ginsaad nga Duta.​—Numeros 26:​64, 65.

Sing kaanggid, sang ginsaway ni manalagna Natan si Hari David bangod sang iya sala upod kay Batseba, ang mahinulsulon nga si David nagsiling: “Nakasala ako batok kay Jehova.” Nian ginsilingan ni Natan si David: “Ginsikway ni Jehova ang imo sala.” (2 Samuel 12:13) Apang, walay sapayan nga ginpatawad ni Jehova si David, gin-antos ni David ang mga resulta sang iya sala sa nabilin nga bahin sang iya kabuhi.​—2 Samuel 12:​9-14; tan-awa man ang 2 Samuel, kapitulo 24.

Ginapadaku sining mga halimbawa sang pagpatawad sang Dios ang importante nga leksion: Indi kita mahimo makapakasala nga wala sing kabayaran. (Galacia 6:​7, 8) Ang isa ka mahinulsulon nga makasasala, walay sapayan nga matigayon niya ang kapatawaran, wala nagakahulugan nga hilway sia sa resulta sang iya sayop nga dalanon. Nagakahulugan bala ini nga ang inosente nga tiayon mahimo magpatawad sa makihilahion nga tiayon​—bisan sa kahulugan lamang sing pagpaiway sa mapait nga kaugot​—apang sa gihapon nagapamat-od sa pagdiborsio sa iya?

Pagpatawad kag Diborsio

Sang tion sang iya ministeryo, si Jesus nagpamulong tuhoy sa diborsio sa tatlo ka okasyon. (Mateo 5:​32; 19:​3-9; Lucas 16:18) Sing talalupangdon, indi lamang makaisa sa bisan diin sining mga paghambalanay nga si Jesus nagsambit sing pagpatawad. Halimbawa, subong masapwan sa Mateo 19:​9, sia nagsiling: “Ang bisan sin-o nga magbulag sa iya asawa, kon indi bangod sa pagpakighilawas, kag magpangasawa sing iban, nagapanglahi.” Paagi sa pagsiling “kon indi bangod sa pakighilawas,” ginkilala ni Jesus nga ang seksuwal nga imoralidad nagahatag sa inosente nga tiayon sing kinamatarong, ukon Makasulatanhon nga “basihan,” sa pagdiborsio. Apang, wala magsiling si Jesus nga dapat makigdiborsio ang inosente nga tiayon. Walay sapayan, ginpakita niya sing maathag nga sarang niya mahimo ini.

Ang pag-asawahay isa ka higot nga nagahiusa sa duha ka tawo. (Roma 7:2) Apang kon ang isa sa ila dimatutom, sarang mabugto ang higot. Sa amo nga mga kahimtangan ang inosente nga tiayon ginaatubang sang duha ka desisyon. Una, magapatawad bala sia? Subong sang nakita naton, ang isa ka importante nga bahin diri amo kon bala ang makihilahion sinsero nga mahinulsulon ukon indi. Kon may paghinulsol, ang inosente nga tiayon mahimo nga magpatawad kon kaisa​—bisan sa kahulugan lamang sing pagpaiway sa kaugot.

Ang ikaduha nga desisyon amo, makigdiborsio bala sia? Ngaa ipakiana pa ini nga pamangkot kon napatawad na niya sia?b Buweno, ano kon ginakabalak-an niya sing nagakaigo ang iya kaugalingon nga kahilwayan kag sang iya kabataan, ilabi na kon ang iya bana nangin abusado sang nagligad? Ukon ano kon may mga kahadlok sia nga malatnan sing balatian nga ginapaliton sang seksuwal nga paghulid? Ukon ano kon nagabatyag sia nga bangod sang iya pagluib, indi na niya sia masaligan sa bana-asawa nga kaangtanan? Sa amo nga mga kahimtangan mahangpan nga ang inosente nga tiayon makapatawad sang iya nakasala nga tiayon (sa kahulugan nga pagpaiway sang kaugot) apang sa gihapon magapamat-od sa pagdiborsio sa iya bangod indi niya luyag nga magpuyo sing dayon upod sa iya. Ang pagpaiway sing kaugot mahimo makabulig sa iya nga maatipan ang iya kaugalingon nga kabuhi. Mahimo man ini makabulig nga mahuptan ang bisan anong kinahanglanon nga mas maayo nga pagpakig-angot sa makihilahion sa ulihi.

Kon bala makigdiborsio sa isa ka dimatutom nga tiayon isa ka personal nga desisyon, isa nga dapat himuon sang inosente nga tiayon pagkatapos sing mahalungon kag mapangamuyuon nga pagbinagbinag sang tanan nga bahin nga nadalahig. (Salmo 55:22) Wala sing kinamatarong ang iban sa pagdikta ukon sa pagpilit sa inosente nga tiayon sa pagdesisyon kon bala makigdiborsio sia ukon indi. (Ipaanggid ang Galacia 6:5.) Dumduma, wala ginsiling ni Jesus kon ano ang himuon sang inosente nga tiyaon. Sing maathag, nian, wala nagakaugot si Jehova sa sadtong nagdesisyon nga makigdiborsio pasad sa nagakaigo Makasulatanhon nga mga basihan.

[Mga footnote]

[Picture Credit Line sa pahina 10]

Kabuhi