Mga Panugda Para sa Pangpamilya nga Pagsimba kag Personal nga Pagtuon

SUGOD sang 2009, may pagbag-o sa iskedyul sa mga miting sa kongregasyon sang mga Saksi ni Jehova sa bug-os nga kalibutan. Ang duha ka miting sa tungatunga sang semana gintingob, kag ginpalig-on ang tanan nga gamiton ang ila bakante nga gab-i para sa pangpamilya nga pagsimba ukon personal nga pagtuon. Ginapanginpuslan mo bala ining bag-o nga kahimusan? Nakabenepisyo ka bala sing bug-os sa sini?

Madamo ang nagapalibog kon ano ang tun-an sa ila pangpamilya nga pagsimba. Ang Nagadumala nga Hubon wala nagsiling nga dapat pareho ang tun-an sang tanan nga pamilya. Bangod lainlain ang kahimtangan, depende sa kada ulo sang pamilya ukon sa indibiduwal ang pagpili sang ila tun-an kada semana.

Ginagamit ini sang iban sa paghanda para sa mga miting, pero indi lang amo sini ang puede nila himuon sa pangpamilya nga pagsimba. Ginabasa sang iban ang Biblia, ginaistoryahan, ukon ginadramadrama ang mga hitabo sa sini para makapanginpulos ang mga bata. Indi kinahanglan nga pirme may pamangkot kag sabat halin sa mga parapo pareho sa mga miting. Tion ini para magtuon kag magbayluhanay sang mga ideya. Dapat hilway ang kada isa sa paghambal kag pagsugid sang ila natun-an. Sa sini nga paagi mangin relaks kag makalilipay ang pangpamilya nga pagsimba.

Ang isa ka amay nga may tatlo ka bata nagsulat: “Pirme ginagamit sang amon pamilya ang nakaiskedyul nga mga kapitulo sang Biblia sa sina nga semana. Ang kada isa sa amon nagabasa sini sing abanse, kag ginapili sang mga bata kon ano ang ila i-research kag ireport. Si Michael [siete anyos] nagadrowing sang piktyur ukon nagasulat sang iya mga natun-an. Kon kaisa naman ginasulat nanday David kag Kaitlyn [13 kag 15 anyos] ang mga istorya sa Biblia kag kuno abi nasaksihan nila mismo ini. Halimbawa sang ginbasa namon ang parte sa pagpatpat ni Jose sang damgo sang manugtinapay kag sang manugtagay sang Paraon, ginsulat ini ni Kaitlyn nga daw isa sia sa mga bilanggo didto nga nakakita sang mga nagakatabo.”—Gen., kap. 40.

Lainlain ang sitwasyon sang kada pamilya. Ang praktikal sa isa mahimo nga indi puede sa iban. Ang masunod nga kahon may mga panugda sang puede himuon sa pangpamilya nga pagsimba ukon personal nga pagtuon. Sigurado nga may iban ka pa nga ideya nga puede ninyo mahimo.

[Kahon/Retrato sa pahina 6, 7]

Para sa pamilya nga may mga tin-edyer:

• Basaha kag binagbinaga ang Questions Young People Ask—Answers That Work.

• I-praktis ang “Ano abi kon. . . ?” nga mga sitwasyon. (Tan-awa ang Mayo 15, 1996, nga Ang Lalantawan, pahina 14, parapo 17-18.)

• Hambali ang simple kag dalagku nga mga tulumuron.

• Kon kaisa, magtan-aw sing mga video nga base sa Biblia kag istoryahan ini.

• Binagbinaga ang artikulo nga “Para sa mga Pamatan-on” sa Ang Lalantawan.

Para sa mga wala sing bata:

• Binagbinaga ang mga kapitulo 1, 3, 11-16 sang libro nga Ang Sekreto Sang Kalipay sa Pamilya.

• Isugid ang imo na-research nga punto halin sa inyo pagbasa sang Biblia.

• Handai ang Pagtinuon sang Kongregasyon sa Biblia ukon ang Pagtinuon sa Ang Lalantawan.

• Hambali kon paano pa mapauswag ang inyo ministeryo.

Para sa mga di-minyo ukon sa mga panimalay nga indi Saksi ang iban nga miembro:

• Tun-i ang bag-o nga mga release nga publikasyon.

• Basaha ang bag-o kag daan nga mga Tuigan nga Libro.

• I-research ang mga pamangkot nga masami mo masugata sa teritoryo.

• Maghanda sang mga presentasyon para sa ministeryo.

Para sa pamilya nga may magagmay nga mga bata:

• Magdramadrama sang mga istorya sa Biblia.

• Maghampang sang memory game, pareho sang ara sa pahina 30 kag 31 sang Magmata!

• Iban pa nga paagi. (Tan-awa ang “Studying the Bible—In the Zoo!” sa Marso 8, 1996 nga Awake!, pahina 16-19.)

• Binagbinaga ang artikulo nga “Tudlui ang Inyo Kabataan” sa Ang Lalantawan.