Ano ang Mangin Panindugan Mo sa Atubangan sang Lingkoran sang Paghukom?

“Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono.”​—⁠MATEO 25:⁠31.

1-3. Ano ang aton rason sa pagpaabot sing maayo nahanungod sa katarungan?

‘NAKASALA UKON INOSENTE?’ Madamo ang nagapangusisa ukon nagaduhaduha samtang nagapamati sila sa mga report tuhoy sa pila ka kaso sa hukmanan. Ang mga hukom kag mga katapo sang hurado mahimo magatinguha nga mangin bunayag, apang masunson bala nga nagapangibabaw ang katarungan? Wala ka bala makabati sing inhustisya kag pagkadialalangay sa mga proseso sang hustisya? Ina nga inhustisya indi bag-o, subong sang makita naton sa ilustrasyon ni Jesus nga masapwan sa Lucas 18:​1-8.

² Bisan ano man ang imo inagihan sa tawhanon nga hustisya, talupangda ang konklusion ni Jesus: “Indi bala ang Dios mag-apin sa iya mga pinili nga nagatuaw sa iya sa adlaw kag gab-i . . . ? Nagasiling ako sa inyo, magaapin Sia sa ila sing madali. Walay sapayan, kon magkari ang Anak sang tawo, makakita bala sia sing pagtuo sa duta?”

³ Huo, pat-uron ni Jehova nga ang iya mga alagad magabaton sa ulihi sing katarungan. Nadalahig man si Jesus, ilabi na karon bangod nagakabuhi kita sa “katapusan nga mga adlaw” sang karon malauton nga sistema. Sa indi na lang madugay pagagamiton ni Jehova ang iya gamhanan nga Anak sa paghapay sing bug-os sang kalautan sa duta. (2 Timoteo 3:1; 2 Tesalonica 1:​7, 8; Bugna 19:​11-16) Mahangpan naton ang papel ni Jesus gikan sa isa sang katapusan nga mga ilustrasyon nga ginhatag niya, masunson ginatawag nga parabola sang mga karnero kag mga kanding.

4. Paano naton anay ginhangop ang tion sang katumanan sang parabola sang mga karnero kag mga kanding, apang ngaa hatagan naton sing igtalupangod ang parabola sa karon? (Hulubaton 4:⁠18)

⁴ Madugay na naton nahangpan nga ginalaragway sang parabola si Jesus nga nagalingkod subong Hari sang 1914 kag sugod sadto nagahimo sing mga paghukom​—⁠kabuhi nga walay katapusan sa mga tawo nga napamatud-an nga kaangay sang mga karnero, permanente nga kamatayon para sa mga kanding. Apang ang liwat nga pagbinagbinag sa parabola nagapakita sing isa ka tuhay nga paghangop sa tion sang katumanan sini kag sa kon ano ang ginailustrar sini. Ining pagputli nagapabakod sang pagkaimportante sang aton pagbantala nga hilikuton kag sang kahulugan sang pagbaton sang mga tawo. Agod mahangpan ang basihan sining mas madalom nga paghangop sa parabola, binagbinagon naton kon ano ang ginapakita sang Dios tuhoy kay Jehova kag kay Jesus, lunsay subong mga Hari kag subong mga Hukom.

Si Jehova Subong ang Supremo nga Hukom

5, 6. Ngaa nagakaigo tamdon si Jehova subong Hari kag Hukom?

⁵ Si Jehova nagagahom sa uniberso nga may kagamhanan sa ibabaw sang tanan nga tinuga. Bangod wala sia sing ginsuguran kag katapusan, sia ang “Hari nga dayon.” (1 Timoteo 1:17; Salmo 90:​2, 4; Bugna 15:⁠3) May awtoridad sia sa paghimo sing mga pagsulundan, ukon mga kasuguan, kag sa pagpatuman sini. Apang ang iya awtoridad nagalakip subong nga isa ka Hukom. Ang Isaias 33:22 nagasiling: “Si Jehova aton Hukom, si Jehova aton Manughatag-sing-kasuguan, si Jehova aton Hari; sia magaluwas sa aton.”

⁶ Madugay na nga ginakilala sang mga alagad sang Dios si Jehova subong Hukom sang mga kasaba kag mga isyu. Halimbawa, sa tapos matulutimbang sang “Hukom sang bug-os nga duta” ang ebidensia nahanungod sa kalautan sang Sodoma kag Gomorra, naghukom sia nga ang mga pumuluyo nagakabagay laglagon kag ginpatuman yadtong matarong nga paghukom. (Genesis 18:​20-33; Job 34:​10-12) Dapat gid ina magpasalig sa aton nga si Jehova isa ka matarong nga Hukom nga makapatuman pirme sang iya mga paghukom!

7. Paano si Jehova nagapanghikot subong Hukom sa pagpakig-angot sa Israel?

⁷ Sa dumaan nga Israel, si Jehova nagahatag kon kaisa sing direkta nga paghukom. Indi bala mahalipay ka sadto anay sa paghibalo nga isa ka himpit nga Hukom ang nagapamat-od sa mga butang? (Levitico 24:​10-16; Numeros 15:​32-36; 27:​1-11) Ang Dios naghatag man sing “hudisyal nga mga desisyon” nga kon tingubon maayo mangin talaksan para sa paghukom. (Levitico 25:​18, 19; Nehemias 9:13; Salmo 19:​9, 10; 119:​7, 75, 164; 147:​19, 20) Sia ang “Hukom sang bug-os nga duta,” gani kita tanan naapektuhan.​—⁠Hebreo 12:⁠23.

8. Anong may kaangtanan nga palanan-awon ang nakita ni Daniel?

⁸ May testimoniya kita sang “nakasaksi” may kaangtanan sini nga butang. Si manalagna Daniel ginhatagan sing palanan-awon tuhoy sa mapintas nga mga sapat nga nagarepresentar sa mga gobierno kag mga emperyo. (Daniel 7:​1-8, 17) Sia nagdugang: “Ginpahamtang ang mga trono kag ang Dumaan sang mga Adlaw naglingkod. Ang iya panapton maputi subong sang niebe.” (Daniel 7:⁠9) Talupangda nga nakita ni Daniel ang mga trono “kag ang Dumaan sang mga Adlaw [si Jehova] naglingkod.” Pamangkuta ang imo kaugalingon, ‘Ginsaksihan bala diri ni Daniel ang Paghari ni Jehova?’

9. Ano ang isa ka kahulugan sang ‘paglingkod’ sa trono? Maghatag sing mga halimbawa.

⁹ Ti, kon mabasa naton nga ang isa “naglingkod” sa trono, mahimo kita magahunahuna sang iya paghari, kay ang Biblia nagagamit kon kaisa sina nga pamulong. Halimbawa: “Sang nagsugod [si Zimri] sa paghari, sa gilayon nga nakalingkod sia sa iya trono, sia . . . ” (1 Hari 16:11; 2 Hari 10:30; 15:12; Jeremias 33:17) Ang Mesianikong tagna nagsiling: “Sia magalingkod kag magadumala sa iya trono.” Hanti, ang ‘paglingkod sa trono’ mahimo magkahulugan sang paghari. (Zacarias 6:​12, 13) Si Jehova ginalaragway subong ang Hari nga nagalingkod sa trono. (1 Hari 22:19; Isaias 6:1; Bugna 4:​1-3) Sia “Hari nga Dayon.” Apang, samtang ginpadaku niya ang bag-ong bahin sang pagkasoberano, masiling nga nangin Hari sia, subong nga daw nagalingkod liwat sa iya trono.​—⁠1 Cronica 16:​1, 31; Isaias 52:7; Bugna 11:​15-17; 15:3; 19:​1, 2, 6.

10. Ano ang pangunang hilikuton sang Israelinhon nga mga hari? Ilaragway.

¹⁰ Apang yari ang importante nga punto: Ang pangunang hilikuton sang dumaan nga mga hari amo ang pagpamati sa mga kasaba kag paghatag sing mga paghukom. (Hulubaton 29:14) Dumduma ang maalamon nga paghukom ni Solomon sa pag-angkon sang duha ka babayi sa isa ka lapsag. (1 Hari 3:​16-28; 2 Cronica 9:⁠8) Ang isa sang iya mga tinukod sang gobierno amo ang “Portico sang Trono diin sia magahukom,” nga gintawag man “ang portico sang paghukom.” (1 Hari 7:⁠7) Ang Jerusalem ginlaragway subong ang duog diin “napahamtang ang mga trono sa paghukom.” (Salmo 122:⁠5) Sing maathag, ‘ang paglingkod sa trono’ mahimo man magkahulugan sang paggamit sing hudisyal nga awtoridad.​—⁠Exodo 18:13; Hulubaton 20:⁠8.

11, 12. (a) Ano ang kahulugan sang paglingkod ni Jehova, nga ginsambit sa Daniel kapitulo 7? (b) Paano ginapamatud-an sang iban pa nga mga teksto nga si Jehova nagalingkod sa paghukom?

¹¹ Balikan naton karon ang danyag diin nakita ni Daniel ang ‘Dumaan sang mga Adlaw nga nagalingkod.’ Ang Daniel 7:10 nagadugang: “Ang Hukmanan ginpahamtang, kag may mga tulun-an nga ginhumlad.” Huo, ang Dumaan sang mga Adlaw naglingkod sa paghatag sing paghukom tuhoy sa paggahom sa kalibutan kag sa paghukom sa Anak sang tawo subong takus maggahom. (Daniel 7:​13, 14) Nian aton mabasa nga “nag-abot ang Dumaan sang mga Adlaw kag ginhatag ang paghukom sa mga balaan,” yadtong ginhukman nga nagakabagay sa paggahom upod sa Anak sang tawo. (Daniel 7:22) Sa katapusan “ang Hukmanan mismo nagpadayon sa paglingkod” kag sa paghatag sing dimaayo nga paghukom sa katapusan nga kagamhanan sa kalibutan.​—⁠Daniel 7:⁠26.a

¹² Gani, ang pagkakita ni Daniel sa Dios nga ‘nagalingkod sa trono’ nagkahulugan sang pagkari Niya sa paghatag sing paghukom. Sing mas maaga si David nag-amba: “Ginpatuman mo [Jehova] ang akon paghukom kag ang akon kausa; nagalingkod ka sa trono nga nagahukom sing matarong.” (Salmo 9:​4, 7) Kag si Joel nagsulat: “Maghulag ang mga pungsod sang ila kaugalingon kag magtaklad sa nalupyakan ni Josafat; kay didto magalingkod ako [si Jehova] sa paghukom sang tanan nga mga pungsod.” (Joel 3:12; ipaanggid ang Isaias 16:⁠5.) Si Jesus kag si Pablo lunsay yara sa hudisyal nga mga kahimtangan nga sa sini ang isa ka tawo naglingkod sa pagpamati sa kasaba kag sa paghatag sing paghukom.b​—⁠Juan 19:​12-16; Binuhatan 23:3; 25:⁠6.

Ang Posisyon ni Jesus

13, 14. (a) Ano ang pasalig sa katawhan sang Dios nga si Jesus mangin Hari? (b) San-o si Jesus naglingkod sa iya trono, kag sa anong kahulugan naggahom sia kutob sang 33 C.E.?

¹³ Si Jehova Hari kag Hukom. Kamusta si Jesus? Ang anghel nga nagpahibalo sang iya pagkatawo nagsiling: “Si Jehova nga Dios magahatag sa iya sang trono sang iya amay nga si David, . . . kag ang iya ginharian walay katapusan.” (Lucas 1:​32, 33) Si Jesus mangin permanente nga manunubli sang pagkahari ni David. (2 Samuel 7:​12-16) Magagahom sia halin sa langit, kay si David nagsiling: “Ang pinamulong ni Jehova sa akon Ginuo [si Jesus] amo: ‘Lingkod ka sa akon tuo nga kamot tubtob nga mahimo ko ang imo mga kaaway nga palatungan sang imo mga tiil.’ Si Jehova magapadala kutob sa Sion sang setro sang imo kusog, nga nagasiling: ‘Gahom ka sa tunga sang imo mga kaaway.’ ”​—⁠Salmo 110:​1-4.

¹⁴ San-o ina mahanabo? Si Jesus wala maggahom subong Hari samtang isa ka tawo. (Juan 18:​33-37) Sang 33 C.E., sia napatay, ginbanhaw, kag nagkayab sa langit. Ang Hebreo 10:12 nagasiling: “Ining tawo nagdulot sing isa ka halad para sa mga sala sing walay katapusan kag naglingkod sa tuo nga kamot sang Dios.” Ano ang awtoridad ni Jesus: “Ginpalingkod sia [sang Dios] sa iya tuo nga kamot sa langitnon nga mga duog, nga labaw pa gid sa tanan nga panguluhan kag awtoridad kag gahom kag pagkaginuo . . . kag ginhimo sia nga ulo sa tanan nga butang sa kongregasyon.” (Efeso 1:​20-22) Bangod si Jesus sadto may harianon nga awtoridad sa mga Cristiano, si Pablo makasulat nga si Jehova “nagluwas sa aton gikan sa awtoridad sang kadudulman kag nagliton sa aton sa ginharian sang Anak sang iya gugma.”​—⁠Colosas 1:13; 3:⁠1.

15, 16. (a) Ngaa masiling naton nga si Jesus wala mangin Hari sang Ginharian sang Dios sang 33 C.E.? (b) San-o nagsugod sa paggahom si Jesus sa Ginharian sang Dios?

¹⁵ Apang, sadto nga tion, si Jesus wala magpanghikot subong Hari kag Hukom sa mga pungsod. Naglingkod sia sunod sa Dios, naghulat sang tion sa pagpanghikot subong Hari sang Ginharian sang Dios. Si Pablo nagsulat sa iya: “May kaangtanan sa kon sin-o sang mga anghel sa bisan kon san-o nagsiling sia: ‘Lingkod ka sa akon tuo nga kamot, tubtob nga mahimo ko ang imo mga kaaway nga palatungan sang imo mga tiil?’ ”​—⁠Hebreo 1:⁠13.

¹⁶ Ang mga Saksi ni Jehova nagbalhag sing madamong ebidensia nga ang panag-on sang paghulat ni Jesus natapos sang 1914, sang nangin manuggahom sia sang Ginharian sang Dios sa dikitaon nga mga langit. Ang Bugna 11:​15, 18 nagasiling: “Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari sa walay katubtuban.” “Apang naakig ang kapungsuran, kag nag-abot ang imo kasingkal.” Huo, ginpabutyag sang mga pungsod ang kasingkal sa isa kag isa sadtong Inaway Kalibutanon I. (Lucas 21:24) Ang mga inaway, linog, kamatay, kakulang sing pagkaon, kag kaanggid nga mga butang, nga nakita naton kutob sang 1914 nagapamatuod nga si Jesus nagagahom na karon sa Ginharian sang Dios, kag ang katapusan sang kalibutan malapit na.​—⁠Mateo 24:​3-14.

17. Anong pangunang mga punto ang napatok na naton?

¹⁷ Ang masunod amo ang malip-ot nga repaso: Ang Dios masiling nga nagalingkod sa trono subong Hari, apang sa isa pa ka kahulugan mahimo sia maglingkod sa iya trono sa paghukom. Sang 33 C.E., si Jesus naglingkod sa tuo nga kamot sang Dios, kag sia karon Hari sang Ginharian. Apang si Jesus bala, nga nagagahom karon subong Hari, nagaalagad man subong Hukom? Kag ngaa dapat kita mabalaka sa sini, ilabi na sa sining tion?

18. Ano ang ebidensia nga si Jesus mangin Hukom man?

¹⁸ Si Jehova, nga may kinamatarong sa pagtangdo sing mga hukom, nagpili kay Jesus subong Hukom nga nagasunod sang Iya mga talaksan. Ginpakita ini ni Jesus sang nagpamulong sia nahanungod sa mga tawo nga mangin buhi sa espirituwal: “Ang Amay wala nagahukom kay bisan sin-o nga tawo, kundi natugyan niya sa Anak ang bug-os nga paghukom.” (Juan 5:22) Apang, ang hudisyal nga katungdanan ni Jesus nagalabaw sa sina nga sahi sang paghukom, kay hukom sia sang mga buhi kag mga patay. (Binuhatan 10:42; 2 Timoteo 4:⁠1) Si Pablo nagsiling anay: “Nagtangdo [ang Dios] sing isa ka adlaw kon san-o ginatuyo niya nga hukman ang napuy-an nga duta sa pagkamatarong paagi sa isa ka tawo [si Jesus] nga iya gintangduan, kag naghatag sia sing garantiya sa tanan nga tawo paagi sa pagbanhaw niya sa iya.”​—⁠Binuhatan 17:31; Salmo 72:​2-7.

19. Ngaa husto ang magsiling tuhoy kay Jesus subong nagalingkod subong Hukom?

¹⁹ Busa matarong bala nga ihinakop naton nga si Jesus nagalingkod sa mahimayaon nga trono sa espesipiko nga katungdanan sang Hukom? Huo. Si Jesus nagsiling sa mga apostoles: “Sa liwat nga pagpanuga, kon ang Anak sang tawo maglingkod sa iya trono nga mahimayaon, kamo nga nagasunod sa akon magalingkod man sa napulog duha ka trono, nga nagahukom sa napulog duha ka kabikahan sang Israel.” (Mateo 19:28) Bisan pa nga si Jesus Hari karon sang Ginharian, ang iya dugang pa nga hilikuton nga ginsambit sa Mateo 19:28 magalakip sang paglingkod sa trono sa paghukom sa tion sang Milenio. Sa sina nga tion hukman niya ang tanan nga katawhan, ang matarong kag dimatarong. (Binuhatan 24:15) Mabuligon nga huptan ini sa hunahuna samtang ginaliso naton ang aton igtalupangod sa isa sang mga parabola ni Jehova nga nagahilabot sa aton tion kag sa aton kabuhi.

Ano ang Ginasiling sang Parabola?

20, 21. Ano ang ginpamangkot sang mga apostoles ni Jesus nga nagahilabot sa aton tion, nagadul-ong sa anong pamangkot?

²⁰ Wala madugay antes napatay si Jesus, ang iya mga apostoles namangkot sa iya: “San-o bala mahanabo ini, kag ano bala ang tanda sang imo presensia kag sang katapusan sang sistema sang mga butang?” (Mateo 24:⁠3) Si Jesus nagtagna sing talalupangdon nga mga hitabo sa duta sa wala pa ‘mag-abot ang katapusan.’ Wala madugay antes sina nga katapusan “makita [sang mga pungsod] nga nagakari ang Anak sang tawo sa ibabaw sang mga panganod sang langit nga may gahom kag daku nga himaya.”​—⁠Mateo 24:​14, 29, 30.

²¹ Apang, kamusta ang mga tawo sa amo nga mga pungsod kon ang Anak sang tawo magakari sa iya himaya? Hibaluon naton ini gikan sa parabola sang mga karnero kag mga kanding, nga nagasugod sa mga pulong: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod.”​—⁠Mateo 25:​31, 32.

22, 23. Anong mga punto ang nagapakita nga ang parabola sang mga karnero kag mga kanding wala magsugod nga matuman sang 1914?

²² Naaplikar bala ini nga parabola sang si Jesus naglingkod nga may kagamhanan sang paghari sang 1914, subong sang madugay na naton nga nahangpan? Ti, ang Mateo 25:34 nagasiling sa iya subong Hari, gani ang parabola makatarunganon nga maaplikar sugod sang si Jesus nangin Hari sang 1914. Apang anong paghukom ang ginhimo niya pagkatapos sadto? Indi ini paghukom sa “tanan nga pungsod.” Sa baylo, ginliso niya ang iya igtalupangod sa mga nagapangangkon nga nagahuman sa “panimalay sang Dios.” (1 Pedro 4:17) Nahisuno sa Malaquias 3:​1-3, si Jesus, subong mensahero ni Jehova, nag-usisa sing hudisyal sang hinaplas nga mga Cristiano nga nabilin sa duta. Tion man sadto para sa hudisyal nga pagpamatbat sa Cristiandad, nga nagpangangkon sing butigon subong “ang panimalay sang Dios.”c (Bugna 17:​1, 2; 18:​4-8) Apang wala ginapakita nga sadto nga tion, ukon kutob sadto nga tion, si Jesus naglingkod sang ulihi sa paghukom sa katawhan sang tanan nga pungsod subong mga karnero ukon mga kanding.

²³ Kon usisaon naton ang hilikuton ni Jesus sa parabola, makita naton sia nga nagahukom sa ulihi sa tanan nga pungsod. Wala ginapakita sang parabola nga ina nga paghukom magapadayon tubtob sa ginpalawig nga panag-on sang madamong tinuig, subong nga daw ang tagsa ka tawo nga nagakapatay sa sining nagligad nga mga dekada ginhukman nga takus sang kamatayon nga walay katapusan ukon kabuhi nga walay katapusan. Mahimo nga ang kalabanan nga napatay sining ulihi nga mga dekada nagkadto sa kinaandan nga lulubngan sang katawhan. (Bugna 6:8; 20:13) Apang, ginalaragway sang parabola ang tion nga ginahukman ni Jesus ang katawhan sang “tanan nga pungsod” nga nagakabuhi sadto kag nagaatubang sing kalaglagan sa iya hudisyal nga pamatbat.

24. San-o matuman ang parabola sang mga karnero kag mga kanding?

²⁴ Sa iban nga hambal, ang parabola nagatudlo sa palaabuton kon magakari ang Anak sang tawo sa iya himaya. Magalingkod sia sa paghukom sa katawhan nga nagakabuhi sina nga tion. Ang iya paghukom igapasad sa kon ano ang ginpadayag nila nga amo sila. Sa sina nga tion “ang kinatuhayan sa tunga sang isa nga matarong kag isa nga malauton” nakita na sing maathag. (Malaquias 3:​18) Ang aktuwal nga pagpamatbat kag pagpatuman sang paghukom pagahimuon sa limitado nga tion. Si Jesus magahatag sing makatarunganon nga mga desisyon pasad sa kon ano ang makita sa mga indibiduwal.​—⁠Tan-awa man ang 2 Corinto 5:⁠10.

25. Ano ang ginalaragway sang Mateo 25:31 sa pagpatuhoy sa Anak sang tawo nga nagalingkod sa mahimayaon nga trono?

²⁵ Nagakahulugan ini, nian, nga ang ‘paglingkod ni Jesus sa iya mahimayaon nga trono’ sang paghukom, nga ginsambit sa Mateo 25:​31, naaplikar sa palaabuton nga tion kon ining gamhanan nga Hari magalingkod sa pagpamatbat kag sa pagpatuman sang paghukom sa mga pungsod. Huo, ang danyag sang paghukom nga nagadalahig kay Jesus sa Mateo 25:​31-33, 46 mapaanggid sa danyag sa Daniel kapitulo 7, diin ang nagagahom nga Hari, ang Dumaan sang mga Adlaw, nagalingkod sa pagtuman sang iya katungdanan subong Hukom.

26. Anong bag-ong paathag sa parabola ang nangin maathag?

²⁶ Ang paghangop sa parabola sang mga karnero kag mga kanding sa sining paagi nagapakita nga ang paghatag sing paghukom sa mga karnero kag mga kanding palaabuton pa. Mahanabo ini pagkatapos ang “kapipit-an” nga ginsambit sa Mateo 24:​29, 30 magasugod kag ang Anak sang tawo ‘magakari sa iya himaya.’ (Ipaanggid ang Marcos 13:​24-26.) Nian, sa katapusan sang bug-os malauton nga sistema, si Jesus magadumala sing hukmanan kag magahatag sing paghukom.​—⁠Juan 5:30; 2 Tesalonica 1:​7-10.

27. Sa ano kita dapat mangin interesado sa paghibalo nahanungod sa katapusan nga parabola ni Jesus?

²⁷ Nagaathag ini sang aton paghangop tuhoy sa tion sang katumanan sang parabola ni Jesus, nga nagapakita kon san-o pagahukman ang mga karnero kag mga kanding. Apang paano ini nagaapektar sa aton nga makugi nga nagabantala sang maayong balita sang Ginharian? (Mateo 24:14) Nagahimo bala ini sa aton hilikuton nga indi tanto ka importante, ukon nagahatag bala ini sing mas mabug-at pa nga responsabilidad? Tan-awon naton sa masunod nga artikulo kon paano kita naapektuhan.

Ano ang Palaabuton Para sa mga Karnero kag mga Kanding?

“Painpainon niya ang mga tawo gikan sa isa kag isa, subong sang pagpainpain sang manugbantay sa mga karnero gikan sa mga kanding.”​—⁠MATEO 25:⁠32.

1, 2. Ngaa dapat kita mangin interesado sa parabola sang mga karnero kag mga kanding?

SI Jesucristo amo gid ang labing bantog nga Manunudlo sa duta. (Juan 7:46) Ang isa sang iya mga paagi sa pagpanudlo amo ang paggamit sing mga parabola, ukon mga ilustrasyon. (Mateo 13:​34, 35) Simple ini apang epektibo sa pagpaalinton sing madalom nga espirituwal kag matagnaon nga mga kamatuoran.

² Sa parabola sang mga karnero kag mga kanding, ginpakita ni Jesus ang tion agod magpanghikot sia sa isa ka pinasahi nga ikasarang: “Kon magkari ang Anak sang tawo sa iya himaya, kag . . . ” (Mateo 25:31) Dapat kita mangin interesado sa sini bangod amo ini ang ilustrasyon nga gin­hinakpan ni Jesus ang iya sabat sa pamangkot: “Ano bala ang tanda sang imo presensia kag sang katapusan sang sistema sang mga butang?” (Mateo 24:⁠3) Apang ano ang kahulugan sini para sa aton?

3. Sa una nga bahin sang iya diskurso, ano ang ginsiling ni Jesus nga mahanabo sa gilayon kon magsugod na ang dakung kapipit-an?

³ Si Jesus nagtagna sing tumalagsahon nga mga hitabo nga mahanabo “sa gilayon pagkatapos” sang pagsugod sang dakung kapipit-an, mga hitabo nga ginahulat naton. Nagsiling sia nga nian “ang tanda sang Anak sang tawo” magaluntad. Magaapektar ini sing daku sa “tanan nga kabikahan sa duta” nga ‘makakita sang pagkari sang Anak sang tawo sa ibabaw sang mga panganod sa langit nga may gahom kag daku nga himaya.’ Ang Anak sang tawo pagaupdan sang “iya mga anghel.” (Mateo 24:​21, 29-31)a Ano naman ang tuhoy sa parabola sang mga karnero kag mga kanding? Ginabutang ini sang modernong mga Biblia sa kapitulo 25, apang bahin ini sang sabat ni Jesus, nagahatag sing dugang pa nga mga detalye nahanungod sa iya pagkari sa himaya kag paghugod sang iya paghukom sa “tanan nga pungsod.”​—⁠Mateo 25:⁠32.

Ang mga Karakter sa Parabola

4. Anong nagabukas nga paghinambit ang ginahatag sang parabola sang mga karnero kag mga kanding nahanungod kay Jesus, kag sin-o pa ang ginsambit?

⁴ Ginasugdan ni Jesus ang parabola paagi sa pagsiling: “Kon magkari ang Anak sang tawo.” Ayhan kilala mo kon sin-o “ang Anak sang tawo.” Masunson ginapadapat sang mga manunulat sang Ebanghelyo ina nga ekspresyon kay Jesus. Bisan si Jesus amo man, sa walay duhaduha ginahunahuna ang palanan-awon ni Daniel tuhoy sa “isa nga kaangay sang anak sang tawo” nga nagpalapit sa Dumaan sang mga Adlaw sa pagbaton sing “pagginahom kag dignidad kag ginharian.” (Daniel 7:​13, 14; Mateo 26:​63, 64; Marcos 14:​61, 62) Samtang si Jesus amo ang panguna sa sining parabola, wala sia nagaisahanon. Sa mas nauna nga bahin sining diskurso, subong sang ginbalikwat sa Mateo 24:​30, 31, nagsiling sia nga kon ang Anak sang tawo ‘magkari nga may gahom kag dakung himaya,’ ang iya mga anghel may yara importante nga papel. Sa kaanggid, ginapakita sang parabola sang mga karnero kag mga kanding ang mga anghel nga kaupod ni Jesus kon sia ‘magalingkod sa iya mahimayaon nga trono’ sa paghukom. (Ipaanggid ang Mateo 16:27.) Apang ang Hukom kag ang iya mga anghel didto sa langit, gani ginahambalan bala ang mga tawo sa parabola?

5. Paano naton makilala ang “mga utod” ni Jesus?

⁵ Ang pagpasiplat sa parabola nagapakita sing tatlo ka grupo nga kinahanglan naton makilala. Dugang sa mga karnero kag mga kanding, ang Anak sang tawo nagadugang sang ikatlo nga grupo nga ang pagkilala sa ila importante agod makilala ang mga karnero kag mga kanding. Ginatawag ni Jesus ining ikatlo nga grupo subong ang iya espirituwal nga mga utod. (Mateo 25:​40, 45) Dapat sila mangin matuod nga mga sumilimba, kay si Jesus nagsiling: “Ang bisan sin-o nga maghimo sang kabubut-on sang akon Amay . . . , amo ang akon utod nga lalaki, kag utod nga babayi, kag iloy.” (Mateo 12:50; Juan 20:17) May kaangtanan pa sa sini, si Pablo nagsulat tuhoy sa mga Cristiano nga bahin sang “binhi ni Abraham” kag nga mga anak sang Dios. Gintawag niya sila nga “mga utod” ni Jesus kag “mga umalambit sang langitnon nga pagtawag.”​—⁠Hebreo 2:9–3:1; Galacia 3:​26, 29.

6. Sin-o ang “labing kubos” sa mga utod ni Jesus?

⁶ Ngaa ginsambit ni Jesus ang “labing kubos” sang iya mga utod? Yadtong mga pinamulong nagapalanog sang kon ano ang nabatian sang mga apostoles sa iya sa nahaunang bahin. Sang ginpaanggid si Juan Bautista, nga napatay una kay Jesus kag busa may dutan-on nga paglaum, sa sadtong magaagom sing langitnon nga kabuhi, si Jesus nagsiling: “Wala sing naglutaw nga daku pa kay Juan Bautista; apang ang labing diutay sa ginharian sang langit daku pa sa iya.” (Mateo 11:11) Ang iban nga magakadto sa langit mahimo nga kilala sa kongregasyon, kaangay sang mga apostoles, kag ang iban indi, apang sila tanan espirituwal nga mga utod ni Jesus. (Lucas 16:10; 1 Corinto 15:⁠9; Efeso 3:8; Hebreo 8:11) Busa, bisan pa nga ang iban daw indi importante sa duta, mga utod niya sila kag dapat pakig-angutan sing nagakaigo.

Sin-o ang mga Karnero kag mga Kanding?

7, 8. Ano ang ginsiling ni Jesus nahanungod sa mga karnero, gani ano ang mahinakop naton nahanungod sa ila?

⁷ Aton mabasa ang nahanungod sa paghukom sa mga karnero: “[Si Jesus] magasiling sa mga natuo niya, ‘Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan. Kay gingutom ako kag ginpakaon ako ninyo; gin-uhaw ako kag ginpainom ako ninyo. Nagdumuluong ako kag ginbaton ako ninyo sing maabiabihon; hubo, kag ginpapanaptan ako ninyo. Nagmasakit ako kag gin-atipan ako ninyo. Nabilanggo ako kag nagkari kamo sa akon.’ Nian ang mga matarong magasabat sa iya, ‘Ginuo, san-o ka bala namon nakita nga gutom kag ginpakaon ka namon, ukon nauhaw, kag ginpainom ka namon? San-o ka bala namon nakita nga dumuluong kag ginbaton ka namon sing maabiabihon, ukon hubo, kag ginpapanaptan ka namon? San-o ka bala namon nakita nga nagmasakit ukon sa bilangguan kag nagkadto kami sa imo?’ Kag ang hari magasabat sa ila, ‘Sa pagkamatuod nagasiling ako sa inyo, Sa bagay nga ginhimo ninyo ini sa isa sang labing kubos sining akon mga utod, ginhimo ini ninyo sa akon.’ ”​—⁠Mateo 25:​34-40.

⁸ Sing maathag, ang mga karnero nga ginhukman nga takus mangin yara sa tuo nga bahin sang kadungganan kag kahamuot ni Jesus nagarepresentar sa isa ka klase sang mga tawo. (Efeso 1:20; Hebreo 1:⁠3) Ano ang ginhimo nila kag san-o? Si Jesus nagsiling nga malulo, matinahuron, kag maalwan nila nga ginhatagan sia sing pagkaon, ilimnon, kag panapton, nagbulig sa iya sang nagmasakit sia ukon nabilanggo. Sang nagsiling ang mga karnero nga wala nila ini ginhimo kay Jesus sing personal, ginpakita niya nga ginasakdag nila ang iya espirituwal nga mga utod, ang nagkalabilin nga hinaplas nga mga Cristiano, gani sa sinang kahulugan ginhimo nila ini sa iya.

9. Ngaa ang parabola indi maaplikar sa Milenio?

⁹ Ang parabola wala maaplikar sa Milenio, kay ang mga hinaplas indi mangin mga tawo nga nagaantos sing gutom, kauhaw, balatian, ukon pagkabilanggo sa sina nga tion. Apang, madamo sa ila ang nakaeksperiensia sini sa katapusan sining sistema sang mga butang. Sugod sang gintagbong si Satanas sa duta, ginhimo niya ang nagkalabilin nga isa ka pinasahi nga puntariya sang iya kaalipungot, nagayaguta, nagasakit, ukon nagapatay sa ila.​—⁠Bugna 12:⁠17.

10, 11. (a) Ngaa indi makatarunganon hunahunaon nga ang mga karnero nagalakip sang tanan nga nagabuhat sing maayo sa mga utod ni Jesus? (b) Kay sin-o nagakaigo nga nagarepresentar ang mga karnero?

¹⁰ Nagasiling bala si Jesus nga ang tanan nga nagahimo sing diutay nga kalulo sa isa sang iya mga utod, subong sang pagtan-ay sing isa ka kihad sang tinapay ukon isa ka baso sang tubig, kalipikado nga mangin isa sining mga karnero? Isiling naton, ang paghimo sinang mga kalulo mahimo magapabanaag sing tawhanon nga kalulo, apang sa pagkamatuod, mahimo nga labi pa ang nadalahig sa mga karnero sa sining parabola. Si Jesus wala gid nagapatuhoy, halimbawa, sa mga ateista ukon sa mga klerigo nga natabuan nga naghimo sing malulo nga buhat sa isa sang iya mga utod. Sa kabaliskaran, makaduha nga gintawag ni Jesus ang mga karnero nga “mga matarong.” (Mateo 25:​37, 46) Gani ang mga karnero amo sila nga sa sulod sang isa ka panag-on sang tion nagbulig​—⁠ukon aktibo nga nagsakdag⁠—​sa mga utod ni Cristo kag nagpakita sing pagtuo tubtob sa punto nga nakabaton sing matarong nga tindog sa atubangan sang Dios.

¹¹ Sa sulod sang mga siglo, madamo kaangay ni Abraham, ang nag-agom sing matarong nga tindog. (Santiago 2:​21-23) Si Noe, si Abraham, kag ang iban pa nga mga matutom ginalakip sa tunga sang “iban nga mga karnero” nga magapanubli sing kabuhi sa Paraiso sa idalom sang Ginharian sang Dios. Sining karon lang minilyon pa ang nagbaton sang matuod nga pagsimba subong iban nga mga karnero kag nangin “isa ka panong” kaupod sang mga hinaplas. (Juan 10:16; Bugna 7:⁠9) Sila nga may dutan-on nga paglaum nagakilala sa mga utod ni Jesus subong mga embahador sang Ginharian kag busa nagbulig sa ila​—⁠sa literal kag sa espirituwal. Ginakabig ni Jesus nga ginhimo sa iya kon ano ang ginahimo sang iban nga mga karnero sa iya mga utod sa duta. Sila nga mga buhi kon magakari sia sa paghukom sa mga pungsod pagahukman subong mga karnero.

12. Ngaa namangkot ang mga karnero kon paano sila nakahimo sing mga kalulo kay Jesus?

¹² Kon ang iban nga mga karnero nagabantala karon sang maayong balita kaupod sang mga hinaplas kag nagabulig sa ila, ngaa namangkot sila: “Ginuo, san-o ka bala namon nakita nga gutom kag ginpakaon ka namon, ukon nauhaw, kag ginpainom ka namon?” (Mateo 25:37) Mahimo may nanuhaytuhay nga mga rason. Isa ini ka parabola. Paagi sa sini, ginapakita ni Jesus ang iya daku nga kabalaka sa iya espirituwal nga mga utod; nagabatyag sia upod sa ila, nagaantos upod sa ila. Si Jesus nagsiling sing una: “Sia nga nagabaton sa inyo nagabaton man sa akon, kag sia nga nagabaton sa akon nagabaton man sadtong nagpadala sa akon.” (Mateo 10:40) Sa sining ilustrasyon, ginapasangkad ni Jesus ang prinsipio, ginapakita nga ano man ang ginhimo (maayo man ukon malain) sa iya mga utod nagalab-ot bisan sa langit; subong bala nga ginhimo ini sa iya sa langit. Subong man, ginapadaku diri ni Jesus ang talaksan ni Jehova sa paghukom, ginapaathag nga ang paghukom sang Dios, maayo man ukon nagatagudili, nagakaigo kag makatarunganon. Ang mga kanding indi makapamalibad, ‘Ti, kon nakita lang namon ikaw sing direkta.’

13. Ngaa mahimo gintawag sang mga katulad-kanding si Jesus subong “Ginuo”?

¹³ Sa tapos naton mahangpan kon san-o ihatag ang paghukom nga ginpakita sa sining parabola, natigayon naton ang mas maathag nga panghunahuna kon sin-o ang mga kanding. Ang katumanan amo nga kon “magapahayag ang tanda sang Anak sang tawo sa langit, kag nian bunalon sang tanan nga kabikahan sa duta ang ila kaugalingon sa panalabiton, kag makita nila nga nagakari ang Anak sang tawo . . . nga may gahom kag daku nga himaya.” (Mateo 24:​29, 30) Ang mga makalampuwas sa dakung kapipit-an sa Babilonia nga Daku nga matinamayon nga nakig-angot sa mga kauturan sang Hari hanuot nga magatawag sa Hukom subong “Ginuo,” nagalaum nga maluwas ang ila kabuhi.​—⁠Mateo 7:​22, 23; ipaanggid ang Bugna 6:​15-17.

14. Pasad sa ano si Jesus magahukom sang mga karnero kag mga kanding?

¹⁴ Ang paghukom ni Jesus indi igapasad sa hanuot nga mga pangangkon sang anay mga nagakadto sa simbahan, mga ateista, ukon iban pa. (2 Tesalonica 1:⁠8) Sa baylo, repasuhon sang hukom ang kahimtangan sang tagipusuon kag ang nagligad nga mga buhat sang mga tawo bisan sa “isa sang labing kubos [sang iya mga utod].” Matuod, ang kadamuon sang hinaplas nga mga Cristiano nga nabilin sa duta nagadiutay. Apang, tubtob ang hinaplas, nga ginahuman sang “matutom kag mainandamon nga ulipon,” padayon nga nagaaman sing espirituwal nga pagkaon kag panuytoy, ang palaabuton nga mga karnero may kahigayunan sa paghimo sing maayo sa ulipon nga klase, kaangay sang ginhimo sang ‘dakung kadam-an gikan sa tanan nga kapungsuran kag kabikahan kag katawhan.’​—⁠Bugna 7:​9, 14.

15. (a) Paano ginpakita sang madamo ang ila kaugalingon nga kaangay sang mga kanding? (b) Ngaa dapat naton likawan ang pagsiling kon bala ang isa karnero ukon kanding?

¹⁵ Paano ginpakig-angutan ang mga kauturan ni Cristo kag ang minilyon ka iban nga karnero nga nahiusa sa ila subong isa ka panong? Madamong tawo ang mahimo nga wala magsalakay sing personal sa mga tiglawas ni Cristo, apang wala man nila sila ginpakig-angutan sing mahigugmaon. Ginpasulabi nila ang malauton nga kalibutan, ginsikway sang mga katulad-kanding ang mensahe sang Ginharian, nabatian man ini sing direkta ukon indi direkta. (1 Juan 2:​15-17) Sa pagkamatuod, sa ulihi, si Jesus amo ang isa nga gintangdo sa paghatag sing paghukom. Indi kita ang magapat-od kon sin-o ang mga karnero kag kon sin-o ang mga kanding.​—⁠Marcos 2:8; Lucas 5:22; Juan 2:​24, 25; Roma 14:​10-12; 1 Corinto 4:5

Ano ang Palaabuton Para sa Tagsa ka Grupo?

16, 17. Ano ang palaabuton sang mga karnero?

¹⁶ Ginhatag ni Jesus ang iya paghukom sa mga karnero: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.” Daw ano ka makalilipay nga imbitasyon​—⁠“Kari kamo”! Sa ano? Sa kabuhi nga walay katapusan, subong sang ginpabutyag niya bilang pagsumaryo: “Ang mga matarong [magasulod] sa kabuhi nga walay katapusan.”​—⁠Mateo 25:​34, 46.

¹⁷ Sa parabola sang mga talanton, ginpakita ni Jesus kon ano ang ginakinahanglan sa sadtong magagahom kaupod niya sa langit, apang sa sining parabola ginapakita niya kon ano ang ginapaabot sa mga sakop sang Ginharian. (Mateo 25:​14-23) Sing talangkod, bangod sang ila bug-os nga pagsakdag sa mga utod ni Jesus, ang mga karnero magapanubli sing isa ka duog sa dutan-on nga sakop sang iya Ginharian. Magaagom sila sing kabuhi sa paraiso nga duta​—⁠isa ka paglaum nga ginhanda sang Dios para sa ila “kutob pa sang pagtukod sang kalibutan” sang galawaron nga katawhan.​—⁠Lucas 11:​50, 51.

18, 19. (a) Anong paghukom ang ihatag ni Jesus sa mga kanding? (b) Paano kita makapat-od nga ang mga kanding magaatubang sing dayon nga pag-antos?

¹⁸ Kabaliskaran gid ang paghukom nga ginhatag sa mga kanding! “Nian, magasiling sia sa mga nawala, ‘Palayo kamo sa akon mga ginpakamalaut, pa kalayo nga walay katapusan nga gin-aman sa Yawa kag sa iya mga anghel. Kay gingutom ako kag wala ninyo ako pagpakan-a, gin-uhaw ako kag wala ninyo ako pagpaimna. Nagdumuluong ako kag wala ninyo ako pagbatuna sing maabiabihon; hubo, apang wala ninyo ako pagpapanaputi; nagmasakit kag sa bilangguan, apang wala ninyo ako pag-alagari.’ Nian magasabat man sila paagi sa pinamulong, ‘Ginuo, san-o ka bala namon nakita nga gutom ukon nauhaw ukon dumuluong ukon hubo ukon nagmasakit ukon sa bilangguan kag wala kami mag-alagad sa imo?’ Nian magasabat sia sa ila sa mga pinamulong, ‘Sa pagkamatuod nagasiling ako sa inyo, Sa bagay nga wala ninyo paghimua ini sa isa sang labing kubos sini sa ila, wala man ninyo paghimua ini sa akon.’ ”​—⁠Mateo 25:​41-45.

¹⁹ Nahibaluan sang mga Estudyante sang Biblia nga indi ini mahimo magkahulugan nga ang dimamalatyon nga mga kalag sang mga katulad-kanding magaantos sing dayon nga kalayo. Indi, kay ang mga tawo amo ang kalag; wala sila nagapanag-iya sing dimamalatyon nga mga kalag. (Genesis 2:7; Manugwali 9:​5, 10; Ezequiel 18:⁠4) Paagi sa pagpamatbat sa mga kanding sa “kalayo nga walay katapusan,” ginapatuhuyan sang Hukom ang kalaglagan nga wala sing palaabuton nga paglaum, nga mangin permanente man nga katapusan para sa Yawa kag sa iya mga demonyo. (Bugna 20:​10, 14) Hanti, ang Hukom ni Jehova nagahatag sing magkatuhay nga mga paghukom. Ginasilingan niya ang mga karnero, “Kari kamo”; ang mga kanding, “Palayo kamo sa akon.” Ang mga karnero magapanubli sing “kabuhi nga walay katapusan.” Ang mga kanding magabaton sing “walay katapusan nga pag-utod.”​—⁠Mateo 25:46.b

Ano ang Kahulugan Sini Para sa Aton?

20, 21. (a) Anong importante nga hilikuton ang himuon sang mga Cristiano? (b) Anong pagpainpain ang ginahimo karon? (c) Ano ang mangin kahimtangan sang mga tawo kon ang parabola sang mga karnero kag mga kanding magasugod nga matuman?

²⁰ Ang apat ka apostoles nga nakabati sang sabat ni Jesus nahanungod sa tanda sang iya presensia kag sang katapusan sang sistema madamo gid sing dapat binagbinagon. Kinahanglan sila magpabilin nga nagamata kag nagabantay. (Mateo 24:42) Kinahanglan man sila maghimo sang pagpanaksi nga hilikuton nga ginsambit sa Marcos 13:10. Ang mga Saksi ni Jehova mapagsik nga nagapakigbahin sa sinang hilikuton karon.

²¹ Apang, ano ang kahulugan para sa aton sining bag-ong paghangop sa parabola sang mga karnero kag mga kanding? Ti, ang mga tawo nakapili na. Ang iban yara sa ‘malapad nga dalan padulong sa kalaglagan,’ samtang ang iban nagapanikasog sa pagpabilin sa ‘masipot nga dalan padulong sa kabuhi.’ (Mateo 7:​13, 14) Apang ang tion nga ipahayag ni Jesus ang katapusan nga paghukom sa mga karnero kag mga kanding nga ginlaragway sa parabola yara pa sa palaabuton. Kon ang Anak sang tawo magakari sa katungdanan sang Hukom, pat-uron niya nga madamong matuod nga mga Cristiano​—⁠sing aktuwal “dakung kadam-an” sang dedikadong mga karnero⁠—​ang makalipikar nga makalampuwas sa katapusan nga bahin sang “dakung kapipit-an” pasulod sa bag-ong kalibutan. Ina nga paglaum dapat mangin isa ka tuburan sang kalipay karon. (Bugna 7:​9, 14) Sa pihak nga bahin, madamo gikan sa “tanan nga pungsod” ang magapamatuod sang ila kaugalingon subong kaangay sang batinggilan nga mga kanding. Sila “magakadto sa walay katapusan nga pag-utod.” Daw ano nga paumpaw para sa duta!

22, 23. Sanglit ang katumanan sang parabola yara pa sa palaabuton, ngaa ang aton pagbantala nga hilikuton karon importante?

²² Samtang ang paghukom subong sang ginalaragway sa parabola yara pa sa malapit nga palaabuton, bisan sa karon may importante nga butang nga nagakahanabo. Kita nga mga Cristiano nagapakigbahin sa nagaluwas-kabuhi nga hilikuton sang pagwali sang mensahe nga nagatuga sing pagbinahinbahin sa tunga sang mga tawo. (Mateo 10:​32-39) Si Pablo nagsulat: “Kay ‘ang bisan sin-o nga magtawag sa ngalan ni Jehova maluwas.’ Apang, paano bala ang pagpanawag nila sa iya nga wala nila matuuhi? Kag paano bala ang pagtuo nila sa iya nga wala nila mabatii? Kag, paano bala ang pagkabati nila kon walay ma­nugwali?” (Roma 10:​13, 14) Paagi sa aton publiko nga pagministeryo, ang ngalan sang Dios kag ang iya mensahe sang kaluwasan nagalab-ot sa mga tawo sa kapin sa 230 ka kadutaan. Ang hinaplas nga mga utod ni Cristo nagapanguna gihapon sa sining hilikuton. Mga lima ka milyon ka iban nga mga karnero ang nagabuylog karon sa ila. Kag ang mga tawo sa bug-os nga globo nagabaton sang mensahe nga ginwali sang mga utod ni Jesus.

²³ Madamo ang nadayag sa aton mensahe samtang nagabantala kita sa pamalaybalay ukon sing dipormal. Ang iban mahimo makahibalo tuhoy sa mga Saksi ni Jehova kag kon ano ang ginatiglawas naton sa mga paagi nga wala naton mahibalui. Kon mag-abot ang tion sang paghukom, tubtob diin binagbinagon ni Jesus ang responsabilidad sa komunidad kag ang pagkanagakaigo sang pamilya? Indi naton masiling, kag walay pulos ang magbulubanta. (Ipaanggid ang 1 Corinto 7:14.) Madamo karon ang hungod nga wala nagapamati, nagayaguta, ukon nagapakigbahin sa direkta nga paghingabot sa katawhan sang Dios. Hanti, isa ini ka ital-ital nga tion; mahimo nila ginapalambo ang mga kinaiya sadtong pagahukman ni Jesus subong mga kanding.​—⁠Mateo 10:22; Juan 15:20; 16:​2, 3; Roma 2:​5, 6.

24. (a) Ngaa importante para sa mga indibiduwal nga maghulag sing maayo sa aton pagbantala? (b) Ining pagtuon nagbulig sa imo sing personal nga matigayon ang anong panimuot sa imo ministeryo?

²⁴ Apang, sing makalilipay, madamo ang nagapamati sing maayo, nagatuon sa Pulong sang Dios, kag nangin mga Saksi ni Jehova. Ang iban nga sa karon daw katulad-kanding mahimo magbag-o kag mangin kaangay sang karnero. Ang punto amo nga yadtong nagabaton kag aktibo nga ­nagasakdag sa nagkalabilin sang mga utod ni Cristo nagahatag karon sing ebidensia nga magaaman sing basihan para ipahamtang sila sa natuo nga kamot ni Jesus kon, sa malapit nga palaa­buton, magalingkod sia sa iya trono sa paghatag sing paghukom. Ginapakamaayo sila kag padayon nga pakamaayuhon. Busa, ining parabola magapahulag sa aton sa mas makugi pa nga pagpanghikot sa Cristianong ministeryo. Antes mangin ulihi katama, luyag naton himuon ang tanan nga masarangan naton sa pagwali sang maayong balita sang Ginharian kag sa sinang paagi hatagan ang iban sing kahigayunan sa pagpamati. Nian yara na kay Jesus ang paghatag sing paghukom, nagatagudili man ukon nagakahamuot.​—⁠Mateo 25:⁠46.