Mga Pamangkot Gikan sa mga Bumalasa

Ang ginapatuhuyan bala sang Salmo 144:12-15 amo ang mga katawhan sang Dios ukon ang malauton nga mga dumuluong nga ginsambit sa bersikulo 11?

Sa orihinal nga Hebreo, puede nga duha ang ginapatuhuyan. Binagbinagon naton kon sin-o gid ang ginapatuhuyan sini.

1. Binagbinaga ang iban nga bersikulo sini nga salmo. Sa orihinal nga Hebreo, ang bersikulo 12 nagaumpisa sa tinaga nga “dayon.” Ginapakita sini nga ang mga pagpakamaayo nga ginsambit sa bersikulo 12 asta 14 mabaton sang mga matarong, nga amo ang nagpangabay nga ‘sagupon kag luwason’ sa mga malauton (bersikulo 11). Ini nga ideya ginasakdag man sang bersikulo 15, kay ang “malipayon” nga katawhan nga ginsambit diri sing duha ka beses, nagapatuhoy sa pareho nga katawhan nga “ang ila Dios amo si Jehova!”

2. Ini nga paghangop nahisanto sa iban nga teksto sa Biblia nga nagapromisa sang pagpakamaayo para sa mga matutom nga alagad sang Dios. Sa sini nga salmo, ginpabutyag ni David ang iya pagsalig nga pagkatapos maluwas sang Dios ang pungsod sang Israel batok sa ila mga kaaway, pakamaayuhon Niya ang katawhan para mangin malipayon sila kag bugana sa ila mga kinahanglanon. (Lev. 26:9, 10; Deut. 7:13; Sal. 128:1-6) Halimbawa, ang Deuteronomio 28:4 nagasiling: “Pakamaayuhon ang inyo mga anak kag ang patubas sang inyo duta kag ang mga tinday sang inyo kasapatan, ang inyo mga tinday nga baka kag karnero.” Matuod gid ini kay sa tion sang paggahom sang anak ni David nga si Solomon, natigayon sang pungsod ang paghidait kag bugana sila sa ila mga kinahanglanon. Dugang pa, ang paggahom ni Solomon nagahatag sa aton sing ideya sang mangin kahimtangan sa ulihi kon maggahom na ang Mesias.—1 Hari 4:20, 21; Sal. 72:1-20.

Ini nga paathag parte sa ginapatuhuyan sang Salmo 144 nagasakdag sa tema sang bilog nga salmo parte sa ginalauman sang mga alagad ni Jehova halin pa sang una, nga amo ang paglaglag sang Dios sa mga malauton nga pagasundan sang permanente nga paghidait kag kahamungayaan para sa mga matarong.—Sal. 37:10, 11.