Mag-andam Batok sa Sayop nga Kalulo
1 Ang katawhan ni Jehova kilala bangod sang ila maalwan nga espiritu. Masami ini ginapakita sa materyal nga paagi kon ginailog naton ang Samaritano sa parabola ni Jesus. (Luc. 10:29-37) Apang, mahimo nga hingalitan sang iban nga indi takus buligan ang aton kalulo. Busa, ang aton gugma sa iban dapat timbangan sang “sibu nga ihibalo kag bug-os nga paghantop.”—Filip. 1:9.
2 Sa Sulod sang Kongregasyon: Halimbawa, ang isa mahimo magasiling nga wala sia sing obra ukon magahatag sing iban pa nga mga rason agod makapangayo sing bulig. Kon kaisa indi luyag mag-obra sining mga tawo kag luyag lamang nga amanan sila sang iban sang mga kinahanglanon sa kabuhi. Tuhoy sa ila si apostol Pablo nagsugo: “Kon sin-o ang indi luyag magpangabudlay, indi sia magkaon.”—2 Tes. 3:10.
3 “Ang tion kag dimapaktan nga mga hitabo” nagakatabo sa aton tanan, gani kon nagakinahanglan kita sing materyal nga bulig, nga nakulangan sang “aton tinapay para sa karon nga adlaw,” indi kita dapat magkabalaka sing tuman, kay ginaamanan ni Jehova ang mga nagahigugma sa iya. (Manugw. 9:11; Mat. 6:11, 31, 32) Sa baylo nga mangayo sing kuwarta sa aton mga kauturan sa kongregasyon, labing maayo nga sugilanunon ang isa sa mga gulang. Nian, sugilanunon niya sing tago ang hubon sang mga gulang. Ining mga gulang mahimo nga may nahibaluan nga mga programa sang gobierno nga nagahatag sing bulig kag mahimo nga makabulig sa isa nga nagakinahanglan nga makabenepisyo sa sinang mga programa. Sa bisan ano nga hitabo, sarang matimbangtimbang sang hubon sang mga gulang ang kahimtangan sang kada isa nga nagapangayo sing bulig kag mabinagbinag kon paano makabulig sing labing maayo ang kongregasyon.
4 Nagalakbay nga mga Impostor: Ang Sosiedad padayon nga nakabaton sing mga report nga ang iban sa mga kongregasyon natuntuhan sang kuwarta kag materyal nga mga butang sang nagalakbay nga mga impostor. Indi kita dapat makibot sa sini, kay ang Kasulatan nagapaandam nga “ang malaut nga mga tawo kag mga malimbong magalain kag magalain pa, nga nagadaya kag ginadayaan.” (2 Tim. 3:13) Sa masami ining mga impostor nagapangangkon nga nabutang sila sa alang-alang nga kahimtangan kag nagakinahanglan sing kuwarta para sa transportasyon kag pagkaon para makabiyahe pauli. Bisan pa daw sinsero sila, sa kalabanan nga mga kaso indi sila mga Saksi ni Jehova kundi nagapakunokuno lamang.
5 Kon ang isa ka estranghero mangayo sing bulig, maalamon nga mangayo sing laygay sa isa sa mga gulang, nga sarang makapat-od kon bala sia utod naton. Mahimo telepunuhan ang iya kongregasyon agod mapat-od ang iya tindog. Mahangpan sang matuod nga mga kauturan nga yara sa amo nga kahimtangan nga ina nga pag-usisa para sa pangamlig sang tanan nga natungdan. Sa pihak nga bahin, ang mga impostor mabuyagyag sa sining sahi sang pag-usisa. Indi kinahanglan nga suspetsuhan sing dinagakaigo ang tanan nga indi naton kilala, apang dapat kita mag-andam batok sa mga impostor.
6 Ang maalamon nga si Hari Solomon naglaygay: “Dili pagpunggi ang maayo gikan sa ila sa diin naigo ini, kon ini yara sa gahom sang imo mga kamot sa paghimo sini.” (Hulu. 3:27) Paagi sa aton maalamon nga paghantop, padayon kita nga mangin maluluy-on samtang nagabantay batok sa sayop nga kalulo.