Nagapaluya Bala sa Imo ang mga Pagdumili?
MGA pagdumili! Wala gid sing nahamuot sa sini; apang tanan kita dapat magbaton sini sa pila ka kasangkaron. Ginaluyahan ka bala kon kaisa, bangod ang imo kabuhi daw tuman ka limitado? Ayhan magaayo ang imo pamatyag kon bag-uhon mo ang imo pagtamod. Sa baylo nga mabalaka sa kon ano ang indi mo mahimo, nga-a indi paghimuslan sing lubos ang bisan anong mga kahilwayan nga yara sa imo?
Halimbawa, madamong mga imol ang nagahandum nga kuntani manggaranon sila. Apang, samtang ginalimitihan sang kaimulon ang sarang naton nga mahimo sa sining sistema sang mga butang, ang importante nga mga butang sa kabuhi matigayon sang tanan. Ang imol kag manggaranon nga mga tawo nagahigugma, nagaminyo, nagapadaku sang mga kabataan, nagakalipay sa maayong pag-abyanay, kag iban pa. Kapin ka importante, ang imol kag manggaranon nga mga tawo nagakilala kay Jehova kag nagapaabot sang ginsaad nga bag-ong kalibutan. Ang imol kag manggaranon nga mga tawo nagauswag sa Cristianong kaalam kag ihibalo, nga maayo pa sangsa manggad. (Hulubaton 2:1-9; Manugwali 7:12) Ang tanan—manggaranon kag imol—sarang makahimo sang ekselente nga ngalan para sa ila kaugalingon kay Jehova. (Manugwali 7:1) Sang panahon ni Pablo ang Cristianong kongregasyon ginatapuan sa kalabanan sang kubos nga mga tawo—ang iban sa ila mga ulipon—nga nagagamit sing maalamon sang kon ano nga kahilwayan ang ginatugot sang ila mga kahimtangan.—1 Corinto 1:26-29.
Makasulatanhon nga Pagkaulo
Sa Cristianong pag-asawahay, ang asawa napasakop sa iya bana—isa ka kahimusan nga gindesinyo sa kaayuhan sang bug-os nga pamilya. (Efeso 5:22-24) Dapat bala magbatyag ang asawa nga ginapakanubo bangod sini? Indi gid. Ang bana kag asawa isa ka team. Ang pagkaulo sang lalaki, kon ginagamit sa tulad-Cristo nga paagi, nagabutang sing pila ka mga pagdumili sa iya asawa kag nagabilin sa iya sing madamo nga kahigayunan nga mapalambo sing bug-os ang iya mga ikasarang kag abilidad. (Efeso 5:25,31) Ang “sangkol nga asawa” sang Hulubaton kapitulo 31 masako sa madamo nga makawiwili kag makahalangkat nga mga buluhaton. Sing maathag, ang pagpasakop sa iya bana indi makaulugot sa iya.—Hulubaton 31:10-29.
Sing kaanggid, wala sing kahimusan para sa babayi nga magpanguna sa kalipikado nga mga lalaki sa Cristianong kongregasyon. (1 Corinto 14:34; 1 Timoteo 2:11, 12) Dapat bala magreklamo ang Cristianong mga babayi sa idalom sina nga pagdumili? Indi. Ang kalabanan mapinasalamaton nga makita ina nga bahin sang Cristianong pag-alagad nga ginaatipan sa teokratiko nga paagi. Malipayon sila nga nagabenepisyo sa pagbantay kag pagpanudlo sang gintangdo nga mga gulang kag ginahugod ang ila kaugalingon sa pagbantala kag paghimo sing mga disipulo nga hilikuton. (Mateo 24:14; 28:19, 20) Daku ang ginahimu sang Cristianong mga babayi sa sini nga latagon, kag nagadala ini sa ila sing kadungganan sa panulok ni Jehova nga Dios.—Salmo 68:11; Hulubaton 3:35.
Mga Pagdumili sa mga Pamatan-on
Ang mga pamatan-on kon kaisa nagareklamo man nga ang ila kabuhi ginadumilian sing labi, sa masami bangod yara sila sa idalom sang awtoridad sang ila mga ginikanan. Apang ini Makasulatanhon man. (Efeso 6:1) Sa baylo nga maugot sa mga pagdumili nga ginapatuman sa ila sang ila mga ginikanan, ginagamit sang maalamon nga Cristianong mga pamatan-on ang mga kahilwayan nga yara sa ila—nga nagalakip, sa masami, sang kahilwayan gikan sa mabug-at nga mga reponsibilidad. Sa amo ila mapanginpuslan ang ila lamharon nga kusog kag mga kahimtangan agod ihanda ang ila kaugalingon para sa hamtong nga kabuhi.
Ang anay manugtatap sa sirkito sa Brazil makadumdom sing maayo sa isa ka 12-anyos nga bata nga lalaki sa isa ka naligwin nga grupo sang mga manugbantala nga limitado sa iya mahimo. Ang isa nga ginasaligan sang mga rekord sang kongregasyon masako sa sekular nga trabaho kag indi makahatag sing bastante nga igtalupangod sa grupo, apang nagpabulig sia sa sining pamatan-on nga lalaki. Natun-an niya kon diin napamutang ang tanan nga mga pormas sang kongregasyon kag yara sia pirme agod magbulig. Ang iya interes makapalig-on, kag matutom sia nga kaupod sa pag-alagad sa latagon. Ining pamatan-on karon isa na ka gintangdo nga gulang.
May madamo iban pa nga mga kahimtangan nga mahimo magalimite sang kahilwayan sang isa ka persona. Ang iban ginasablagan sang balatian. Ang iban nagapuyo sa nabahinbanin nga panimalay kag ang ila kahilwayan limitado bangod sang mga ginapangayo sang ditumuluo nga tiayon. Samtang yadtong nagakabuhi nga may mga pagdumili nagahandum nga kuntani tuhay ang kahimtangan, sarang gihapon sila magkabuhi sing makaalayaw. Ini nga magasin nakasugid na sing madamo nga panaysayon sinang mga indibiduwal nga nangin labi ka makapalig-on sa iban bangod nagsalig sila kay Jehova kag naghimulos sang ila mga kahimtangan.
Nagahambal tuhoy sa isa ka kinaandan nga kahimtangan sa iya adlaw, ang apostol nga si Pablo nagsiling: “Ulipon ka bala sang pagtawag sa imo? Dili ka sina magsapak; apang kon nangin hilway ka, gamita ang kahilwayan.” (1 Corinto 7:21) Daw ano ka timbang nga pagtamod! Ang pila ka mga kahimtangan nagabalhin. Ang mga pamatan-on nagadalagku. Ang nagapamatok nga mga tiayon kon kaisa nagabaton sang kamatuoran. Ang mga kahimtangan sa ekonomiya nahibaluan nga nagauswag. Ang nagabalatian nga mga tawo mahimo mag-ayo. Sa iban nga mga kaso, ang mga kahimtangan mahimo indi magbalhin tubtob nga mag-abot ang bag-ong kalibutan ni Jehova. Walay sapayan, ano ang makuha gikan sa pagkabalaka bangod ang isa indi sarang makahimo sang mahimo sang iban?
Nakakita ka na bala sang mga pispis nga nagalupadlupad sa kahawaan kag nagdayaw sang katahom kag kahilwayan sang ila mga hulag? Ayhan ginhandum mo nga makalupad ka kaangay sina. Ti, indi mo mahimo ina, kag indi gid ikaw makalupad kaangay sang mga pispis bisan san-o! Apang wala ka gid nagareklamo. Sa baylo, nagakasadya ikaw sa imo hinatag-Dios nga mga ikasarang. Nagakabuhi ikaw sing makaalayaw sa duta. Sing kaanggid, ano man ang aton kahimtangan sa kabuhi, kon ginahunahuna naton sing maayo kon ano ang aton mahimo sa baylo nga mabalaka sa kon ano ang aton indi mahimo, ang kabuhi mangin makaalayaw, kag makasapo kita sing kalipay sa pag-alagad kay Jehova.—Salmo 126:5, 6.
[Piktyur sa pahina 28]
Nagabatyag ka bala nga ginapit-an ka sang imo mga ginikanan?