Wala Sila Mag-isol sa Pagpanaksi

¹ Ang aton ngalan nga mga Saksi ni Jehova, nagalaragway sang kon ano ang aton ginahimo. Nagapanaksi kita sa pagkahalangdon sang aton Dios, si Jehova. (Isa. 43:​10, 12) Agod mangin isa ka katapo sang kongregasyon ang kada isa dapat makigbahin sa paghatag sini nga panaksi. Ang pagpanaksi nagalakip sing pagduaw sa balay kag balay, pagpanaksi sa dalan, paghimo sing mga pagduaw liwat, kag pagdumala sing mga pagtuon sa Biblia. Tanan kita matarong nga ginapalig-on nga makigbahin sing bug-os.​—1 Cor. 15:58.

² Apang, ang pila ka katapo sang kongregasyon, limitado sa ila sarang mahimo. Ang serioso nga mga balatian ukon kasablagan mahimo nga magaupang sa ila. Ang nagapamatok nga mga himata mahimo mangin daku nga mga balagbag. Ang isa ka pamatan-on mahimo ginadumilian sang ditumuluo nga ginikanan. Mahimo batyagon sang mga nagapuyo sa nabaw-ing nga mga duog nga imposible gid ang magpanaksi. Ang kahuya mahimo magpaisol sa mga mahuluy-on. Ang pila ka manugbantala nga sa sining mga kahimtangan mahimo magbatyag nga ditakus subong mga Cristiano bangod kubos ang ila nahimuan sangsa iban. Wala sing rason nga pakadiutayon nila ang ila mga panikasog. (Gal. 6:4) Makahatag sa ila sing kalig-on ang pagkahibalo nga nahamuot si Jehova kon ginahimo nila ang ila labing maayo bisan ano man ang ila kahimtangan.​—Luc. 21:​1-4.

³ Pagpangita sing Paagi nga Makapakigbahin: Ginapakita sang linibo ka eksperiensia kon paano nga wala gintugutan sang mga indibiduwal ang mga balagbag nga mapunggan sila sa pagpanaksi. Ginagamit ang ila inisyatibo, naghanda sila sing nanuhaytuhay nga paagi sa pagpanaksi sing dipormal. Gingamit sadtong indi makahalin sa puluy-an ang telepono sa pagpanaksi. Ginakabig ang tagsa ka bisita subong isa ka potensial nga manugpamati. Bisan pa ang isa ka asawa nga may nagapamatok nga pamilya indi makapanaksi sa puluy-an, ginahimuslan niya ang mga kahigayunan nga makapakighambal sa mga kaingod ukon sa iban sa iya matag-adlaw nga rutina.

⁴ Ang isa ka pamatan-on mahimo pamatukan sang iya ditumuluo nga ginikanan nga makigbahin sa dayag nga pagpanaksi. Sa baylo nga tamdon ini subong dimalandas nga sablag, mahimo niya kabigon ang iya mga masigkabumulutho kag mga manunudlo subong personal niya nga “teritoryo” kag makahatag sing isa ka maayo nga panaksi kag ayhan makadumala pa gani sing mga pagtuon sa Biblia. Madamo sang nagapuyo sa nabaw-ing nga mga duog ang nakapakigbahin sa pagpanaksi paagi sa pagpadala sing mga sulat. Ang mga napahulag sang Cristianong kakugi masami nga makasapo sing pila ka paagi nga malikawan nga mangin “diaktibo ukon dimabungahon tuhoy sa sibu nga ihibalo sang aton Ginuong Jesucristo.”​—2 Ped. 1:8.

⁵ Si Jehova nagpahamtang sing pareho nga talaksan para sa tanan, nga amo ang, mangin “bug-os-kalag” kita sa aton pagpanaksi. (Col. 3:23) Bisan pa wala nagapalareho ang kadamuon sang tion nga aton ginahinguyang, pareho ang aton motibo​—putli nga gugma nga nagahalin sa “bug-os nga tagipusuon.” (1 Cron. 28:​9; 1 Cor. 16:​14) Kon ginahimo naton ang aton pinakamaayo, indi gid kita magabatyag nga wala kita sing pulos nga mga katapo sang kongregasyon bangod diutay lamang ang aton sarang nga mahimo. Kaangay ni Pablo, makasiling kita sing maminatud-on nga wala kita ‘mag-isol sa pag-asoy sang bisan ano nga mapuslanon ukon sa pagpanudlo sing dayag.’​—Binu. 20:20.