Kapitulo 133

Gintapos ni Jesus ang Tanan nga Ginpangabay sang Dios

KON dulaon na sang Hangaway-Hari nga Jesucristo si Satanas kag ang iya dimatarong nga kalibutan, daw ano nga kabangdanan sa pagkalipay ang matabo! Ang mahidaiton nga Isa ka Libo ka Tuig nga Paggahom ni Jesus magasugod sa ulihi!

Sa idalom sang pagtuytoy ni Jesus kag sang iya kaupod nga mga hari, tinluan sang mga makalampuwas sa Armagedon ang mga kagulub-an nga ibilin sining matarong nga inaway. Mahimo nga, ang dutan-on nga mga makalampuwas magapanganak man sa sulod sang isa ka tion, kag ini sila magaambit sa makalilipay nga hilikuton sang pagkultibar sa duta nga mangin isa ka matahom nga tulad-parke nga hardin.

Sa ulihi banhawon ni Jesus ang dimasugid nga minilyon gikan sa ila mga lulubngan agod magpuyo sa sining matahom nga Paraiso. Himuon niya ini bilang katumanan sang iya kaugalingon nga garantiya: “Ang oras magaabot nga ang tanan nga yara sa mga lulubngan . . . magaguwa.”

Lakip sa mga banhawon ni Jesus amo ang manughimo sing kalautan anay nga napatay sa luyo niya sa usok sang pag-antos. Dumduma nga ginsaaran sia ni Jesus: “Sa pagkamatuod nagasiling ako sa imo karon nga adlaw, Mangin kaupod ko ikaw sa Paraiso.” Indi, yadto nga tawo indi pagdalhon sa langit agod maghari upod kay Jesus, ukon nga si Jesus mangin tawo liwat kag magpuyo sa Paraiso nga duta upod sa iya. Sa baylo, si Jesus makaupod sang manughimo sing kalautan anay sa kahulugan nga banhawon Niya sia sa Paraiso kag pat-uron niya nga ang iya mga kinahanglanon, sa pisikal kag espirituwal, atipanon, subong nailustrar sa masunod nga pahina.

Hunahunaa ini! Sa idalom sang mahigugmaon nga pag-atipan ni Jesus, ang bug-os nga pamilya sang tawo​—⁠ang mga makalampuwas sa Armagedon, ang ila mga anak, kag ang linibo ka milyon sang ginbanhaw nga mga patay nga magatuman sa iya​—⁠mangin himpit. Si Jehova, paagi sa iya harianon nga Anak, si Jesucristo, magapuyo sa espirituwal upod sa katawhan. “Kag,” subong sang ginasiling sang tingog nga nabatian ni Juan gikan sa langit, “pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit.” Wala sing tawo sa duta nga magaantos ukon magamasakit.

Sa katapusan sang Isa ka Libo ka Tuig nga Paggahom ni Jesus, ang kahimtangan mangin subong gid sang gintuyo sang Dios sa ginsuguran sang ginsugo niya ang unang mag-asawa, si Adan kag si Eva, nga magmuad kag pun-on ang duta. Huo, ang duta pun-on sing matarong nga kaliwatan sang himpit nga mga tawo. Amo sini bangod ang mga benepisyo sang halad nga gawad ni Jesus naaplikar na sa tanan. Ang kamatayon bangod sang sala ni Adan madula na!

Sa amo, natuman na ni Jesus ang tanan nga ginpangabay ni Jehova sa iya. Busa, sa katapusan sang isa ka libo ka tuig, itugyan niya ang Ginharian kag ang ginhimpit nga pamilya sang tawo sa iya Amay. Nian paguwaon sang Dios si Satanas kag ang iya mga demonyo gikan sa kadadalman sang tulad-kamatayon nga indi pagpanghikot. Para sa anong katuyuan?

Ti, sa katapusan sang isa ka libo ka tuig, ang kalabanan sang mga nagapuyo sa Paraiso amo ang mga binanhaw nga wala pa gid matilawan sa ila pagtuo. Antes mapatay, wala gid nila mahibal-an ang mga saad sang Dios kag gani wala sila magpakita sing pagtuo sa sini. Nian, sa tapos mabanhaw kag matudluan sang mga kamatuoran sang Biblia, mahapos para sa ila sa Paraiso, nga wala sing bisan anong pagpamatok, ang pag-alagad sa Dios. Apang kon si Satanas hatagan sing kahigayunan sa pagpugong sa ila sa pagpadayon sa pag-alagad sa Dios, magamatutom bala sila sa idalom sang pagtilaw? Agod malubad ining pamangkot, si Satanas paguwaon.

Ang bugna nga ginhatag kay Juan nagapahayag nga sa tapos sang Isa ka Libo ka Tuig nga Paggahom ni Jesus, si Satanas magamadinalag-on sa pagpaliso sa wala mapat-od nga kadamuon sang mga tawo gikan sa pag-alagad sa Dios. Apang, kon matapos na ang katapusan nga pagtilaw, si Satanas, ang iya mga demonyo, kag ang tanan nga mapatalang niya laglagon sing dayon. Sa pihak nga bahin, ang natilawan sing bug-os, matutom nga mga nakalampuwas magapadayon sa pagkabuhi agod mag-agom sang mga pagpakamaayo sang ila langitnon nga Amay tubtob sa walay katubtuban.

Maathag nga si Jesus nagdala, kag padayon nga magadala, sing importante nga papel sa pagtuman sang mahimayaon nga mga katuyuan sang Dios. Daw ano ka dungganon nga palaabuton ang maagom naton subong resulta sang tanan nga iya himuon subong dungganon nga langitnon nga Hari sang Dios. Apang, indi naton malipatan ang tanan nga ginhimo niya sang yari sia sa duta.

Si Jesus kinabubut-on nga nagkari sa duta kag gintudluan kita nahanungod sa iya Amay. Labaw sa sini ginpakita niya ang hamili nga mga kinaiya sang Dios. Ang aton tagipusuon matandog kon binagbinagon naton ang iya makapulunaw nga kaisog kag pagkalalaki, ang iya indi matupungan nga kaalam, ang iya daku nga ikasarang subong manunudlo, ang iya walay kahadlok nga pagkalider, kag ang iya mahigugmaon nga kaluoy kag empatiya. Kon dumdumon naton kon paano sia nag-antos sing daku samtang ginahatag niya ang gawad, nga amo lamang ang paagi agod makatigayon kita sing kabuhi, sa pagkamatuod ang aton tagipusuon mapahulag sa pag-apresyar sa iya!

Sa pagkamatuod, daw ano nga tawo ang nakita naton sa sining pagtuon sang kabuhi ni Jesus! Ang iya pagkabantog dayag kag daku gid. Mapahulag kita sa pagsulit sang ginsiling sang Romanong gobernador nga si Poncio Pilato: “Yari! Ang tawo!” Huo, sa pagkamatuod, “Ang tawo,” ang pinakabantog nga tawo nga nagkabuhi!

Paagi sa aton pagbaton sang halad nga gawad nga gin-aman niya, ang lulan sang sala kag kamatayon nga napanubli naton gikan kay Adan sarang makuha sa aton, kag si Jesus mangin aton “Dayon nga Amay.” Ang tanan nga makatigayon sing kabuhi nga walay katapusan dapat magkuha sing ihibalo indi lamang tuhoy sa Dios kundi tuhoy man sa iya Anak, si Jesucristo. Ginalauman namon nga ang inyo pagbasa kag pagtuon sining mga serye sang mga artikulo tuhoy sa kabuhi kag ministeryo ni Jesus nakabulig sa inyo sa pagkuha sinang nagahatag-kabuhi nga ihibalo! 1 Juan 2:​17; 1:7; Juan 5:​28, 29; 3:​16; 17:​3; 19:​5; Lucas 23:​43; Genesis 1:​28; 1 Corinto 15:​24-28; Bugna 20:​1-3, 6-10; 21:​3, 4; Isaias 9:⁠6.

▪ Ano ang mangin makalilipay nga pribilehiyo sang mga makalampuwas sa Armagedon kag sang ila mga anak?

▪ Sin-o pa wala labot sa mga makalampuwas sa Armagedon kag sa ila mga anak ang magapuyo sa Paraiso, kag sa anong kahulugan nga si Jesus mangin kaupod nila?

▪ Ano ang mangin kahimtangan sa katapusan sang isa ka libo ka tuig, kag ano nian ang himuon ni Jesus?

▪ Ngaa paguwaon si Satanas gikan sa kadadalman, kag ano sa ulihi ang matabo sa iya kag sa tanan nga nagasunod sa iya?

▪ Paano si Jesus mangin aton “Dayon nga Amay”?