Kon Paano Mag-organisar sing Isa ka Teokratiko nga Librarya

SI She­re­za­de, isa ka maalam nga katsila nga bata nga babayi, nagaedad sing apat ka tuig sang ginpahibalo sang iya manunudlo ang klase nga koloran nila ang mga larawan ni “Santa Claus.” Sa gilayon, nangabay si She­re­za­de nga indi magpakigbahin. Ginpaathag niya nga indi mapasugtan sang iya konsiensia ang paghimo sini.

Nakibot sa sining pagpamatok, ginsilingan sia sang iya manunudlo nga kaangay lang ini sang pagkolor sang larawan sang isa ka monyika kag wala sing malain sa sini. Si She­re­za­de nagsabat: “Kon isa lang ini ka monyika, mas maayo pa nga magdrowing na lang ako sing isa ka monyika kon mapasugot ka.”

Sang isa pa ka okasyon ginsugo ang klase sa pagkolor sang pungsudnon nga bandera. Sa liwat nangabay si She­re­za­de kon puwede nga lain na lang ang iya himuon. Bilang pagpaathag, ginsugiran niya ang manunudlo sing sugilanon tuhoy kay Sadrac, Mesac, kag Abednego.​—⁠Daniel 3:​1-28.

Sang ulihi ginteleponohan sang maestra ang iloy ni She­re­za­de agod isugid ang iya katingala. “Pila na ka beses nga ginhambalan ako sang imo bata tuhoy sa iya konsiensia,” siling niya. “Mapatihan mo ayhan ina? Isa ka bata nga babayi sa amo sina niya nga edad nagapaathag sa akon kon ngaa ginatublag sia sang iya konsiensia! Ti, wala ako nagaugyon kon ano ang imo ginatudlo sa iya, apang ginapasalig ko ikaw nga nagamadinalag-on ka. Kag luyag ko mahibaluan mo nga ginadayaw ko kag ginatahod ang imo bata.”

Paano ang apat ka tuig nga bata nga babayi nakatigayon sing isa ka nahanas sa Biblia nga konsiensia? Ang iya iloy, si Ma­ri­na, nagapaathag nga si She­re­za­de may iya kaugalingon teokratiko nga librarya sa iya hulot-tululugan. Ang librarya nagaunod sang iya personal nga mga kopya sang Ang Lalantawan, nga iya ginkuritan, sang iya literatura sa pagbantala, kag sang tanan nga publikasyon sang Watchtower Society nga ginpaguwa kutob sang pagkatawo niya. Ang paborito gid niya nga butang sa iya librarya amo ang audio­tape sang Ang Akon mga Sugilanon sa Biblia, nga iya ginapamatian kada gab-i samtang ginasundan ini sing pagbasa sa iya nga libro. Amo ining mga sugilanon sa Biblia ang nakabulig sa iya sa paghimo sing mga desisyon nga ginsambit sa ibabaw.

Ang isa bala ka organisado sing maayo nga teokratiko nga librarya makabulig sa imo kag sa imo kabataan? Ngaa kinahanglanon ang isa ka librarya sa puluy-an?

“Ang Isa ka Librarya Indi Isa ka Luho”

“Ang isa ka librarya indi isa ka luho, kundi isa sang kinahanglanon nga mga butang sa kabuhi,” siling ni Hen­ry ­Ward Bee­cher. Sing pat-od, halos ang tanan sa aton may isa sining “kinahanglanon nga mga butang sa kabuhi,” sing lipod sa aton. Paano? Bangod bisan pa Biblia lamang ang yara sa aton, nagapanag-iya kita sing isa ka sahi sang librarya.

Ang Biblia isa ka labing maayo nga halimbawa sang isa ka teokratiko nga librarya. Sang ikap-at nga siglo, naimbento ni Je­rome ang Latin nga dinalan nga Bib­lio­the­ca Di­vi­na (Balaan nga Librarya) agod ilaragway ang kompleto nga koleksion sang inspirado nga mga tulun-an nga ginatawag naton nga Biblia. Gin-amanan kita ni Jehova sining balaan nga librarya agod hatagan kita sing praktikal nga bulig, instruksion, kag panuytoy. Butang ini nga indi naton dapat pasapayanan. Ang pagpanag-iya lamang sang kompleto nga Biblia nagakahulugan nga nagapanag-iya kita sing isa ka mas masangkad nga librarya sangsa kalabanan nga mga alagad sang Dios sang una nga mga tion.

Sang ang Biblia matigayon lamang sa malahalon nga mga manuskrito nga sinulat sang kamot, pila lamang, kon may yara gid man, ka pribado nga puluy-an ang makapabugal nga may isa ka kompleto nga Biblia. Sang luyag magtuon ni Pablo sa Kasulatan sa tion sang iya hingapusan nga pagkabilanggo sa Roma, ginpangabay niya si Timoteo nga dalhan sia sing pila ka linukot gikan sa Asia Minor​—⁠ayhan mga bahin sang Hebreong Kasulatan. (2 Timoteo 4:13) Apang, ang mga sinagoga, may koleksion sang mga linukot, kag gingamit ni Jesus kag ni apostol Pablo ini nga mga librarya sa ila pagbantala nga hilikuton. (Lucas 4:​15-17; Binuhatan 17:​1-3) Sing makalilipay, mas mahapos karon matigayon ang mga Kasulatan sangsa una nga siglo.

Bangod sa pagkaimbento sing makina sa pag-imprinta, halos tanan sang mga alagad sang Dios sa karon​—⁠ano man ang ila hambal mahimo​—⁠makatigayon sing kompleto nga Biblia sa hustuhan lamang nga bili. May pinasahi man kita nga kahigayunan nga madugangan ining balaan nga “librarya.” Sa kapin na sa isa ka siglo, ang “matutom kag mainandamon nga ulipon” masako sa pag-aman sing espirituwal nga pagkaon sa nagakaigo nga tion.​—⁠Mateo 24:​45-47.

Apang indi gid naton mapanginpuslan sing lubos ining mapuslanon nga impormasyon kon indi kita mag-organisar sing isa ka personal nga teokratiko nga librarya. Paano ina himuon? Ang una nga tikang, siempre, amo ang pagtipon sing mga libro nga ginakinahanglan sa isa ka librarya. Takus gid ini sa panikasog, kay makabulig ini sa aton nga matigayon sa gilayon ang eksakto nga impormasyon nga aton ginakinahanglan sa aton pag-atubang sa mga problema kag sa pagsabat sa mga pamangkot sa Biblia.

Ano nga mga Libro ang Akon Ginakinahanglan?

Nahunahuna mo na bala kon paano mo lubaron ang isa ka problema sa komunikasyon sa imo pag-asawahay ukon kon paano mo mabuligan ang inyo kabataan nga makasiling sing indi sa mga droga? Paano mo mabuligan ang isa ka abyan nga ginapung-awan? Mapaathag mo bala sing maayo ang pamatuod nga ang Dios nagaluntad kag kon ngaa ginapahanugutan niya ang kalautan? Ano ang ginalaragway sang mapula sing duag nga sapat sa Bugna kapitulo 17?

Ini kag ang madamo nga iban pa nga mga pamangkot sarang masabat kon may nagakaigo ikaw nga teokratiko nga librarya. Ang Watchtower Society nagbalhag sing mga libro, mga brosyur, kag mga artikulo sa magasin nga nagahinun-anon sang isa ka kompleto nga kasangkaron sang mga topiko sa Kasulatan. Dugang pa, ining mga literatura nagapaathag sang mga butang tuhoy sa pamilya, nagapalig-on sang aton pagtuo sa Dios kag sa Biblia, nagabulig sa aton nga pauswagon ang aton ikasarang sa pagbantala, kag nagabulig sa aton nga mahangpan ang mga tagna sa Biblia.

Ang kalabanan sang mga publikasyon nga ginbalhag sang Sosiedad sa nagligad nga 20 ka tuig matigayon sa gihapon. Kon bag-o lang kamo makasulod sa kamatuoran, mangin mapuslanon para sa inyo nga magtigayon sinang tanan nga literatura nga matigayon sa inyo hambal. Mahimo nga matigayon sa inyo hambal ang mga tomo sang Ang Lalantawan sang nagligad nga mga tinuig. Ang pinasahi nga reperensia nga mga publikasyon, kaangay sang In­sight on the Scrip­tures kag ang Com­pre­hen­sive Concordance, ginbalhag man sa madamo nga hambal. Apang, ang pagtigayon sining mga libro, amo lamang ang una nga tikang.

Organisaha ang Imo Librarya!

Ang pagkahibalo nga may libro ka sa isa ka lugar importante, apang ang pagkakita sa libro nga kinahanglanon mo mas importante. Kon madamo nga tion ang ginausik naton sa pagpangita sa reperensia nga publikasyon nga aton ginakinahanglan, mahimo nga madulaan kita sing interes sa amo nga butang. Sa pihak nga bahin, kon gin-areglar naton sing maayo ang aton mga libro, sa isa ka kombeniente nga lugar, mahimo nga maganahan kita nga magpanalawsaw sing personal.

Kon posible, mabuligon nga ibutang ang kalabanan sing teokratiko nga mga libro sa isa ka duog. Mahimo ikaw magbuhat sing mga estante, nga barato lang sa masami, kon indi ikaw makasarang sa pagbakal sing human, kag indi kinahanglan nga mag-okupar ini sing daku nga lugar. Ang duog nga ginahamtangan sang librarya importante man. Ang mga libro nga ginatago sa alibungan indi mapuslan sing maayo kag ginayab-ukan.

Ang masunod nga tikang amo ang pag-organisar sa mga libro. Ang diutay lamang nga tion nga ihinguyang sa pag-areglar sang mga libro sa pasunod nga paagi nagadala sing mga kaayuhan.

Ano kon ang kalabanan sang imo pamilya indi mga Saksi ni Jehova? Bisan pa kon indi ka makaorganisar sing isa ka librarya nga luyag mo, mahimo ka magbutang sing isa ka estante sa imo kaugalingon nga kuwarto nga nagaunod sa dimagkubos sing pila ka Makasulatanhon nga mga publikasyon.

Ang Isa ka Teokratiko nga Librarya Sarang Makapalig-on sang Espirituwalidad

Sa tion nga maareglar na naton ang aton mga libro, kinahanglan naton ang isa ka sistema nga makabulig sa aton nga makit-an ang impormasyon. Mahimo nga mapigaw ang aton memorya, kag mahimo nga indi kita pamilyar sa mga kaundan sang tagsa ka libro sa aton teokratiko nga librarya. Walay sapayan, ang tanan nga impormasyon sa librarya mahapos matigayon. Kon matigayon sa aton hambal, ang Watch Tower Publications Index sarang makabulig sa aton nga makita sing madali ang espisipiko nga impormasyon sa halos tanan nga topiko.

Si Julián, nga nag-alagad sa madamo nga tinuig subong isa ka espesyal nga payunir kag isa ka gulang, nagapaathag nga ang Index mabuligon sa pagtudlo sa iya kinagot nga anak nga lalaki sa paghimo sing personal nga pagtuon. “Si Jairo, nga nagaedad sing pito ka tuig, nagpauli halin sa eskwelahan sang nagligad nga adlaw kag namangkot sa akon, ‘Daddy, ano ang ginasiling sang Sosiedad tuhoy sa mga di­no­saur?’ Gintan-aw namon gilayon ang Index kag ginpangita ang tinaga nga ‘di­no­saur.’ Halos sa gilayon gid nakita namon ang isa ka Awake! nga nagapaathag sing isa ka serye tuhoy sa amo nga topiko. [Pebrero 8, 1990] Sadto mismo nga adlaw, ginbasa ini ni Jairo. Nahibaluan na niya nga ang amon teokratiko nga librarya nagaunod sing mabuligon nga impormasyon sa halos tanan nga topiko. Sing personal, nagapati gid ako nga kon matun-an sang aton mga kabataan ang paggamit sang isa ka teokratiko nga librarya, makabulig ini sa ila nga magtubo sa espirituwal. Makatuon sila sa pagpangatarungan, dugang pa, masapwan nila nga ang personal nga pagtuon mahimo mangin makalilipay.”

Si Fa­usto, ang amay ni She­re­za­de nga ginsambit sa panugod, nagapati nga dapat ikaw magsugod sing mas temprano kon posible sa paghanas sa kabataan sa paggamit sang isa ka teokratiko nga librarya. “Ginapakita na namon kay She­re­za­de, nga sa karon anom na ka tuig ang edad, kon paano gamiton ang Index,” paathag niya. “Sanglit nanamian gid sia sa paglaum sa dutan-on nga Paraiso, ginsugdan namon nga ipakita sa iya ang tinaga nga ‘paraiso’ sa Index kag gintan-aw dayon ang mga artikulo sang Lalantawan nga ginsambit. Sa masami ginapakita lamang namon sa iya ang mga larawan. Walay sapayan, paagi sa sini nga metodo natun-an niya nga ang Index amo ang yabi sa pagpangita sing impormasyon sa amon librarya sa puluy-an. Nahibaluan namon nga nahangpan niya ang punto sang magpauli sia halin sa eskwelahan isa ka adlaw upod ang pamangkot tuhoy sa pagsaulog sing ­Easter. ‘Ngaa indi naton pagtan-awon sa Index?’ pangabay niya sa iya iloy.”

Walay sapayan sang aton edad, ginapalig-on kita sang Biblia nga ‘pat-uron ang tanan nga butang; manguyapot sa kon ano ang maayo.’ (1 Tesalonica 5:21) Ginapatuman sini nga dapat naton usisaon kon ano ang ginasiling sang Kasulatan. (Binuhatan 17:11) Kon may isa kita ka organisado nga teokratiko nga librarya, mangin makalilipay ang amo nga pagpanalawsaw. Sa tagsa ka tion nga madinalag-on naton nga ginagamit ang aton librarya sa paghanda sing isa ka pamulongpulong, sa pagpangita sing praktikal nga laygay sa pag-atubang sa isa ka problema, ukon sa pagpangita sing makawiwili nga impormasyon, ipatudok sini sa aton ang praktikal nga kapuslanan sang aton librarya.

Ang mga ginikanan ni She­re­za­de maathag nga nagsiling: “Sa isa ka Cristianong puluy-an, ang isa ka teokratiko nga librarya sa pagkamatuod indi isa ka luho!”

[Kahon sa pahina 30]

PAANO MO ORGANISAHON ANG IMO MGA LIBRO?

Wala sing estrikto nga mga pagsulundan kon paano mo organisahon ang imo mga libro. Walay sapayan, ang masunod lohiko nga pagbahinbahin nagailustrar sang isa ka paagi nga maareglar mo ang imo mga libro suno sa mga kaundan.

1. Mga libro nga nagaunod sing bersikulo-por-bersikulo nga pagbinagbinag sa pila ka bahin sang Biblia

(Mga halimbawa: Ang Pinakabantog nga Tawo nga Nagkabuhi, Revelation​—⁠Its Grand Climax At Hand!, “Tha Nations Shall Know That I Am Jehovah”​—⁠How?, “Your Will Be Done on Earth”)

2. Mga libro nga may kaangtanan sa pagkabuhi sang pamilya

(Mga halimbawa: Making Your Family Life Happy, Questions Young People Ask​—⁠Answers That Work, Ang Akon Libro sang mga Sugilanon sa Biblia)

3. Ang mga Biblia kag reperensia nga mga libro

(Mga Halimbawa: New World Translation of the Holy Scriptures​—⁠With References, iban nga mga Biblia, mga Watch Tower Publications Index, Comprehensive Concordance, Insight on the Scriptures, The Kingdom Interlinear Translation of the Greek Scriptures, isa ka maayo nga diksionaryo)

4. Mga libro nga presente nga ginagamit sa Pagtinuon sang Kongregasyon sa Libro kag sa Teokratikong Eskwelahan sa Pagministro

5. Mga audiocassette kag video

6. Mga tomo sang Watchtower kag Awake!

7. Maragtas sang mga Saksi ni Jehova

(Mga halimbawa: Mga Yearbook of Jehovah’s Witnesses, Jehovah’s Witnesses​—⁠Proclaimers of God’s Kingdom)

8. Mga libro kag brosyur nga regular naton nga ginagamit sa ministeryo

(Mga halimbawa: Mahimu Ka Mabuhi sing Dayon sa Paraiso sa Duta, Reasoning From the Scriptures, Life​—⁠How Did It Get Here? By Evolution or by Creation?, Mankind’s Search for God, Nahiusa sa Pagsimba sa Lamang Matuod nga Dios)

[Piktyur sa pahina 31]

Si She­re­za­de isa na ka maayo nga estudyante sa Biblia

[Piktyur sa pahina 31]

Walay sapayan nga lamharon pa, ining bata nga lalaki nagagamit sing isa ka teokratiko nga librarya

Dugang sa Nagadumala nga Hubon

A GOD madugangan ang mga katapo sang Nagadumala nga Hubon sang mga Saksi ni Jehova, isa pa ka katapo ang gindugang sa 11 ka gulang nga nagaalagad karon, sugod sang Hulyo 1, 1994. Ang bag-o nga katapo amo si Ger­rit ­Lösch.

Si Utod Lösch nagsulod sa bug-os tion nga pag-alagad sang Nobiembre 1, 1961, kag naggradwar gikan sa ika-41 nga klase sang Watchtower Bible School of Gilead. Nakaalagad sia sa hilikuton sa sirkito kag distrito sa Aus­tria kutob sang 1963 tubtob sang 1976. Nagpangasawa sia sang 1967, kag sia kag ang iya asawa, nga si Merete, nag-alagad sang ulihi sing 14 ka tuig subong mga katapo sang pamilya Beth­el sa Vi­en­na, Aus­tria. Sang nagligad nga apat ka tuig ginsaylo sila sa ulong-talatapan sang Sosiedad sa Brook­lyn, New York, diin si Utod ­Lösch nag-alagad sa Talatapan sang Pagdumalahan kag subong kabulig sang Komite sa Serbisyo. Bangod sang iya nanuhaytuhay nga eksperiensia sa latagon sang Europa kag makahibalo sia maghambal sing Aleman, Ingles, Romanian, kag Italyano, makahatag sia sing bilidhon nga bulig sa hilikuton sang Nagadumala nga Hubon.