“Paglaum sa Isa ka Maayo Pa nga Kalibutan”

Samtang nagaduaw sa Montreal sang Hulyo 1985, nalipatan ni Gilles Le Sieur ang iya portpolyo sa subway nga tren. Pagligad sang isa ka adlaw nga nakapauli sia, mga 260 kilometros gikan sa Montreal, nakabaton sia sing tawag sa telepono gikan sa isa ka pamatan-on nga babayi nga nakakita sang portpolyo. Si Gilles kag ang iya asawa nagbalik sa Montreal agod kuhaon ini. Sang makuha nila ini, ginhatagan nila ang lin-ay sing libro nga Mahimu Ka Mabuhi sing Dayon sa Paraiso sa Duta. Mga duha ka semana sang ulihi, nakabaton sila sing mainapresyahon nga sulat gikan sa iya, nga sa bahin nagasiling:

“Indi ko mahibal-an kon sin-o sa aton ang nakahatag sing mas daku nga serbisyo sa isa kag isa sang nagligad nga semana. Bisan pa wala ako sing balos nga ginapaabot, nahamuot gid ako sa pasalamat nga ginpakita ninyo sa akon. Ginaapresyar ko gid labi na ang kamatuoran nga luyag ninyo ipaambit sa akon ang ginahalinan sang inyo kalipay. . . . Natapos ko na basa ang libro nga ginhatag ninyo sa akon, kag sa tion nga mabasa ninyo ining sulat, ginabasa ini sang isa sang akon mga abyan. Husto kamo nahanungod sa mga benepisyo nga ginahatag sining libro. Wala lamang ini maghatag sa akon sing paglaum sa maayo pa nga kalibutan kundi ginsabat sini ang madamo nga pamangkot nga wala masabat sang akon relihion. . . . Ginpadayon ko liwat ang akon pagbasa sing Biblia upod ang handum nga mag-ayo pa ang akon kabuhi.”

Ginpadayon sining lin-ay ang iya pagtuon sa Biblia kag, sa ulihi, nangin bug-os tion nga ministro sang maayong mga butang nga natun-an niya. Ang Mahimu Ka Mabuhi sing Dayon sa Paraiso sa Duta nangin instrumento sa pagbalhin sang kabuhi sang madamo nga tawo para sa maayo pa. Ginabinagbinag sang libro ang halos tanan nga panudlo sang Biblia kag nagaunod ini sing kapin sa 150 ka makatudlo nga mga ilustrasyon. Agod mabaton ining mapuslanon nga publikasyon, sulati lamang kag ipadala ang kaupod nga kupon.

Palihog ipadala, nga nabayaran na ang selyo, ang 256-pahina, matig-a sing hapin nga libro nga Mahimu Ka Mabuhi sing Dayon sa Paraiso sa Duta. Naglakip ako sing ₱21.00.