Pagpahamuot sa Isa ka Importante nga Kinahanglanon sang Tawo Paagi sa Pagkilala

ANG sinsero nga “Maayo gid ang nahimo mo!” “Nalipay ako sa nahimo mo!” ukon “Ginhimo mo ang imo pinakamaayo; ginapabugal ka namon” makabulig sing daku sa pagpadaku sang pagtahod sa kaugalingon, ilabi na kon naghalin ini sa isa nga imo ginatahod. Ang mga tawo malipayon kag matinguhaon kon ginakilala ang ila nahimuan. Bangod sini, nagauswag sila kag labi nga malipayon. Sa pagkamatuod, ang takus nga pagkilala importante gid sa hunahuna kag tagipusuon subong nga ang masustansia nga pagkaon importante sa lawas.

Ang isa ka diksionaryo nagahatag sing kahulugan sa pagkilala subong “pagbaton sa isa ka indibiduwal subong takus sa konsiderasyon kag igtalupangod” kag “pinasahi nga pagtalupangod ukon atension.” May malapit ini nga kaangtanan sa pagtahod, ang pagbatyag sing pagkahalangdon, nga kon ginapakita nagapahangop sing makatarunganon nga pagkatakus ukon importansia sang isa ka tawo kag sing kadakuon sang pagkilala nga nagakaigo para sa iya.

Ang Pagkilala​—⁠Isa ka Importante nga Kinahanglanon

Ang paghatag sing pagdayaw sa takus nga dayawon makatarunganon kag bunayag. Si Jesus naghatag sing sulundan sa iya ilustrasyon tuhoy sa mga ulipon nga ginsaligan sang agalon sa iya mga pagkabutang. Subong pagkilala sa nagakaigo nga pagpatikang sang iya pagkabutang, sia nagsiling: “Maayo gid, maayo nga ulipon kag matutom!” (Mateo 25:​19-23) Apang, sing masunson gid, ining takus nga pagtahod ginapasapayanan. Ang kapaslawan sa paghatag sing pagkilala nagasablag sa entusiasmo kag inisyatibo. Amo sini ang siling ni Iona: “Ang pagkilala nagapabatyag sa imo nga ginakinahanglan ikaw, naluyagan, kag ginaapresyar . . . Nagahatag ini sa imo sing inisyatibo. Kon ikaw ginapasapayanan, ginasubuan ka kag wala sing kaisog sang buot.” Si Patrick nagdugang: “Nian mabudlay ang maghupot sing mataas nga kalidad kag hinimuan.” Busa, daw ano ka importante, nga matun-an naton kon paano kag san-o maghatag sing pagkilala. Luyag naton tanan mapat-od nga ginabaton kita sang mga tawo sa palibot naton. Isa ini ka importante nga kinahanglanon.

Ang isa ka tinaga sang pagdayaw, dugang nga responsabilidad, ukon materyal nga dulot makapahulag sa imo nga padayon nga himuon ang imo pinakamaayo. Matuod ini walay sapayan kon ikaw isa ka ginikanan, bana, asawa, bata, katapo sang kongregasyon, ukon manugtatap. “Kon ginahatagan sing pagkilala,” siling ni Margaret, “malipayon ako kag nagabatyag nga kinahanglanon ako, kag ginahandum ko nga himuon pa gid ang mas maayo.” Si Andrew nagaugyon, nga nagasiling: “Nagapagsik ako, nagatinguha sa pagpanghikot sing dugang pa.” Apang, ang pagkilala kag pagtahod sa isa nagakinahanglan sing mahalungon nga pagbinagbinag kag maayo nga paghukom.

Iluga ang Huwaran ni Jehova sa Pagpakita sing Pagkilala

Ang panguna nga huwaran sa pagkilala sa importansia sang iban amo si Jehova nga Dios. Ginakilala niya yadtong takus kilalahon. Gintalupangod niya ang mga tawo kaangay nanday Abel, Enoc, kag Noe. (Genesis 4:​4; 6:​8; Judas 14) Ginkilala ni Jehova si David bangod sang iya pinasahi nga katutom. (2 Samuel 7:16) Si Samuel, nga subong isa ka manalagna nagpadungog kay Jehova sa madamo nga tinuig, ginpadunggan man sang Dios, nga gilayon nga nagsabat sa pangamuyo ni Samuel nga nagapangayo sing bulig nga lutuson ang mga Filistinhon. (1 Samuel 7:​7-13) Indi ka bala magbatyag nga napadunggan nga kilalahon ka sang Dios sa sinang paagi?

Ang pagpasalamat kag pag-apresyar may malapit nga kaangtanan sa pagkilala. Ginasugo kita sang Biblia nga ‘magpakita sing pagkamapinasalamaton’ kag mangin mapinasalamaton sa kon ano ang ginhimo para sa aton kaayuhan. (Colosas 3:​15; 1 Tesalonica 5:18) Walay sapayan nga naaplikar ini sing pinasahi sa pagkamapinasalamaton kay Jehova, naaplikar man ini sa matag-adlaw nga mga butang sa kabuhi. Gin-apresyar ini ni apostol Pablo. Ginkilala niya si Febe subong “isa ka manugpangapin sang madamo” kag sanday Prisca kag Aquila bangod sang ‘pagpakatalagman sang ila kabuhi’ para sa iya kag para man sa iban. (Roma 16:​1-4) Handurawa kon ano ang ila ginbatyag sang ginpasalamatan sila sing dayag. Nakabulig man kay Pablo ang kalipay sa paghatag sing pagkilala, dungog, kag pagpalig-on. Mailog man naton si Jehova kag ang iya mainapresyahon nga mga sumilimba paagi sa pagpakita sing nagakaigo nga pagkilala sa sadtong takus nga hatagan sini.​—⁠Binuhatan 20:⁠35.

Pagkilala sa Sulod sang Pamilya

“Ang diutay nga pagkilala makabulig sing daku sa paghimo sa kabuhi nga makalilipay,” siling ni Mitchell, isa ka bana kag Cristianong gulang. “Makabulig ini sa imo nga palanggaon ang isa nga nagahatag sa imo sing pagkilala.” Halimbawa, ang isa ka Cristianong bana nagaabaga sing isa ka mabug-at nga responsabilidad kag nagahimo sing importante nga mga desisyon nga nagadalahig sa kaayuhan sang pamilya. Dapat sia mag-aman para sa espirituwal, materyal, kag emosyonal nga mga kinahanglanon sang iya pamilya. (1 Timoteo 5:8) Mapinasalamaton gid sia kon ginapakitaan sing pagkilala ang iya hatag-Dios nga katungdanan subong ulo sang pamilya kag ginapakitaan sia sang iya asawa sing “hanuot nga pagtahod”!​—⁠Efeso 5:⁠33.

Ang indi dapat pasapayanan amo ang hilikuton sang isa ka ginang sang puluy-an, nga indi makita sang kalabanan nga tawo. Mahimo nga ginapakadiutay sang moderno nga mga kaisipan ina nga sahi sang hilikuton kag ginakuha ang dignidad kag kabilihanan sini. Walay sapayan, kalahamut-an ini sa Dios. (Tito 2:​4, 5) Daw ano ka makapaumpaw kon ginadayaw sang isa ka maalamon nga bana ang iya asawa, ilabi na sa tanan nga bahin sang kabuhi diin maayo ang iya nahimuan, nagahatag sa iya sing amo nga pagkilala sa idalom sang iya pagkaulo! (Hulubaton 31:28) Si Rowena nagsiling tuhoy sa iya bana: “Kon ginakilala niya ang akon ginahimo, mahapos para sa akon ang magpasakop kag ang magpadungog kag magtahod sa iya.”

Ang Amerikanong edukador nga si Christian Bovee nagsiling anay: “Subong nga ang adlaw kinahanglanon sa pagtubo sang kabulakan amo man ang nagakaigo nga pagdayaw sa mapagsik nga pagtubo sang kabataan.” Huo, bisan ang lamharon kaayo nga bata nagakinahanglan sing dayon nga pagpasalig nga isa sia ka hamili nga katapo sang pamilya. Sa tion sang pagkatin-edyer, nga puno sing emosyonal kag pisikal nga mga pagbalhin, yara ang nagadugang nga pagkabalaka sa kaugalingon tuhoy sa personal nga panagway, nga ginaupdan sing handum para sa kahilwayan kag pagkilala. Sa sini nga tion ilabi na, ang isa ka tin-edyer nagakinahanglan sing balatyagon nga ginahigugma sia sang iya mga ginikanan kag ginatratar nga may paghangop kag tawhanon nga kaluoy. Ang nagatigulang nga mga ginikanan kag mga katigulangan nagakinahanglan man sing pasalig nga mapuslanon gihapon sila kag ginahigugma, nga wala sila ‘ginsikway sa ila katigulangon.’ (Salmo 71:​9; Levitico 19:​32; Hulubaton 23:22) Ang nagakaigo nga pagpahamuot sa kinahanglanon sang isa nga kilalahon sia nagadala sing dugang nga kalipay kag kadalag-an sa pamilya.

Pagkilala sa Sulod sang Cristianong Kongregasyon

Daku gid ang kaayuhan sing pagpalambo sang isa ka sinsero nga interes sa iban sa Cristianong kongregasyon kag sang maalwan nga pagpabutyag sing apresasyon sa ila mga hinimuan kag mga panikasog. Ang Cristianong mga gulang dapat manguna paagi sa pagkilala sa mga hinimuan kag mga panikasog sang iban sa kongregasyon. “Pagkatapos lamang sang pila ka pagduaw nga narealisar ko kon daw ano ka mabuligon ang mga tinaga sang pagkilala kon tuhoy sa pagpalig-on, kaayawan, kag kalipay,” siling ni Margaret. “Nakit-an ko kon ano ang ginadingot sa isa kon wala sia ginakilala.” Isa ini ka maayo nga rason sa pagpakita sing tunay, mahigugmaon personal nga interes sa tanan sa kongregasyon! Kilalaha ang ila maayong binuhatan. Mangin maabtik sa paghatag sing komendasyon kag pagpalig-on. Sa madamo nga kongregasyon may yara nagaisahanon nga mga ginikanan nga nagapangabudlay sing lakas agod ipatudok ang espirituwal nga mga prinsipio sa ila kabataan. Takus sila sing pinasahi nga pagdayaw. Ipadaku ang positibo nga mga butang sa baylo sang mga negatibo. Ipakita sa iban ang imo utudnon nga pagpalangga sa ila. Ipakita sa ila nga nagaulikid ikaw. Sa sini nga paagi, ang mahigugmaon nga mga manugtatap makapanghikot agod palig-unon ang kongregasyon. (2 Corinto 10:8) Ang indibiduwal nga mga katapo nagabalos paagi sa paghatag sing takus nga pagkilala kag pagtahod sa sining mga matutom nga nagapangabudlay sing lakas para sa ila kaayuhan.​—⁠1 Timoteo 5:​17; Hebreo 13:⁠17.

Apang may isa pa ka bahin, ukon anggulo sa sini nga butang. Ang handum nga kilalahon, sa pagkamatuod, tuman gid kabaskog. Amo ini ang tuman nga ginkabalak-an sang relihioso nga mga lider sang mga adlaw ni Jesus. Gintadlong ni Jesus ang sayop nga pagtamod sang iya mga disipulo tuhoy sa sini nga butang. (Marcos 9:​33-37; Lucas 20:46) Ang mga Cristiano nagakinahanglan sing pagkamakatarunganon kag pagkabalanse. Kon indi mabantayan, ang handum nga kilalahon mangin makahalalit sa espirituwal. (Santiago 3:​14-16) Daw ano ka makapasubo, halimbawa, kon ang isa ka gulang mangin matinaastaason kag luyag nga batunon sang iban ang iya matinaastaason nga pagkilala sa iya kaugalingon!​—⁠Roma 12:⁠3.

Maalamon nga ginlaygayan ni apostol Pablo ang iya masigka-Cristiano sa Roma: “Sa utudnon nga pagpalangga mangin mahigugmaon sa isa kag isa. Sa pagpakita sing dungog sa isa kag isa manguna.” (Roma 12:10) Ini nga mga pinamulong naaplikar una sa tanan sa Cristianong mga gulang, nga sa tanan nga tion dapat magkilala kay Cristo subong ang Ulo sang kongregasyon. Ang pagpasakop sa iya awtoritatibo nga panuytoy ginapadayag paagi sa pagtigayon sing panuytoy ni Cristo paagi sa balaan nga espiritu, mga prinsipio sa Biblia, kag sa pagpanguna nga ginahatag sang Nagadumala nga Hubon sang “matutom kag mainandamon nga ulipon.”​—⁠Mateo 24:​45-47; tan-awa ang Bugna 1:​16, 20; 2:⁠1.

Busa, kon nagatipon ang mga gulang, kag nagapangamuyo sila para sa panuytoy ni Jehova sa pagbantay sa panong sang Dios, dapat sila manikasog nga makahimo sing mga desisyon nga nahisuno sa Kasulatan. Ang Cristianong kaugdang, kahagop, kag pagkamapainubuson magapugong sa bisan kay sin-o nga gulang sa pagtinguha nga pakataason ang iya kaugalingon, maggahom sa iya mga kauturan, kag magpilit sang iya opinyon sa sini nga mga miting. (Mateo 20:​25-27; Colosas 3:12) Tubtob posible, maayo kon pangabayon sing abanse sang tsirman sang hubon sang mga gulang ang mga pagtamod gikan sa mga masigkagulang kag maghanda sing abanse nga agenda agod may nagakaigo sila nga tion para sa mahalungon kag mapangamuyuon nga pagbinagbinag sang tagsa ka nalista nga punto. Sa tion sang miting sang mga gulang, indi niya dapat pagtinguhaan nga bag-uhon ang opinyon sang mga gulang, kundi, sa baylo, palig-unon sila nga “maghambal sing hilway” tuhoy sa mga butang nga ginahambalan. (1 Timoteo 3:13) Subong man, dapat pamatian sing mahalungon sang masigkagulang ang mga ginahambal sang kada isa kag malipayon nga himuslan ang ihibalo sang mga gulang nga may malawig nga eksperiensia subong Cristiano.​—⁠Exodo 18:​21, 22.

Apang, nahangpan sang mga manugtatap, nga sarang magamit ni Cristo ang bisan sin-o nga gulang sa amo nga hubon sa pag-aman sing kinahanglanon nga mga prinsipio sa Biblia sa paglandas sa isa ka kahimtangan ukon sa paghimo sing isa ka importante nga desisyon. Isa ka maayo nga disposisyon ang magaluntad sa tunga sang hubon kon nagakaigo nga ginakilala ang naamot sang tagsa ka gulang sa pagtatap sa espirituwal nga kaayuhan sang kongregasyon.​—⁠Binuhatan 15:​6-15; Filipos 2:​19, 20.

Panikasugi ang Paghatag kag Pagtigayon sing Takus nga Pagkilala

Ang pagkilala nagapalig-on. Nagapabakod ini kag hiligugmaon. “Bisan kon sa banta naton nga ordinaryo lamang kita,” siling ni Mary, “nagakinahanglan kita sing pagpalig-on para sa aton pagtahod sa aton kaugalingon.” Kilalaha sing sinsero ang matag-adlaw nga panikasog sang iban. Ang paghimo sini nagahimo sa kabuhi nga labi ka makalilipay kag kalahamut-an sa ila. Mga ginikanan, mga kabataan, mga manugtatap, kag mga katapo sang Cristianong kongregasyon, matigayon ninyo ang pagkilala paagi sa inyo panghambal kag panghulag. Ang Biblia nagahambal sing paborable tuhoy sa mapisan, maugdang, kag mapainubuson nga mga tawo. (Hulubaton 11:​2; 29:​23; Hebreo 6:​1-12) Tun-i ang pagkilala sing maayo sa importansia sang iban. Binagbinaga ang mga balatyagon sang iban samtang nagapangabudlay kamo upod sa ila. Si apostol Pedro nagahatag sini nga laygay: “Kamo tanan mag-isa sing espiritu, maluluy-on, mahigugmaon sa kauturan, malulo sa tagipusuon, kag mapainubuson sing hunahuna.” (1 Pedro 3:8) Nagakinahanglan ini sing pagkilala sa iban, busa nagapahamuot sa isa ka importante nga kinahanglanon sang tawo.