Ginabuligan Mo Bala ang Imo Anak sa Pagpili kay Jehova?

“NABATYAGAN ko nga makatalaka kag makakalapoy ang pagtuon sa Biblia. Sing likom, namat-od ako sa akon tagipusuon nga kon magdako ako indi ako mangin isa sa mga Saksi ni Jehova,” siling sang isa ka lamharon nga lalaki. Bisan pa ginalauman nga ang kalabanan sang mga anak sa Cristianong mga puluy-an sa ulihi magapili sa pag-alagad kay Jehova, ang mga pamatan-on katulad sa iya mahimo mabudlayan sa pagpili kay Jehova subong ila Dios.

Kon kaisa ang mga ginikanan indi makapat-od kon paano tuytuyan ang ila mga anak sing epektibo. Nagahunahuna sila sing madalom, subong sang isa ka nabalaka nga amay nga nagsiling sadto anay: “Sing bunayag, may mga tion nga ginatan-aw ko ang mga nawong sang akon nagakatulog nga mga anak, ang mga luha sang kapaslawan yara pa sa ila mga guya, kag naghunahuna nga kuntani indi ako nangin tuman ka pabaya.” Ang iya duha ka anak nga lalaki nagdaku kag nagpili nga mag-alagad kay Jehova.

Apang may mga pamatan-on nga nagasikway kay Jehova kag nagabiya sa Cristianong toril padulong sa kalibutan ni Satanas. Gani paano ang mga ginikanan mangin madinalag-on sa pagbulig sa ila mga anak nga pilion si Jehova? Sa pagsabat sina nga pamangkot, aton anay hibaluon kon ngaa ang iban nga mga pamatan-on nagabiya kay Jehova samtang ang ila mga ginikanan naluyag gid nga mag-unong sila sa iya.

Kon Ngaa Nagabiya ang Pila ka Pamatan-on kay Jehova

Ang masami nga kabangdanan amo nga ang pila ka mga pamatan-on wala gid makakilala kay Jehova kag sa iya mga dalanon. Bisan pa nagatambong man sa Cristianong mga miting sugod sa pagkalapsag, ginahimo lamang nila ini sing pakulahaw, kag wala sing matuodtuod nga pagpangita kay Jehova. (Isaias 55:6; Binuhatan 17:27) Ang bata nga lalaki nga ginhinambitan sa ibabaw natak-an sa Cristianong mga miting bangod wala niya mahangpi ang ginasiling sang mga humalambal sa plataporma.

Ang mga binhi sang kamatuoran gintanom sa pila ka mga anak, apang gintugutan nila ang ila mga tagipusuon nga maganyat sang daw pabaya, materyalistiko nga estilo sang pagkabuhi sang kalibutan ni Satanas. Ang iban indi ­makalandas sang makusog nga handum nga magpakig-upod kag ilugon ang ila mga katubutubo.​—⁠1 Cronica 28:9; Lucas 8:​12-14; 1 Corinto 15:⁠33.

Apang, sa bug-os nga kalibutan, madamo nga mga anak sa Cristianong mga puluy-an ang nagpili nga magtindog sa kiliran ni Jehova. May matun-an bala gikan sa positibo nga mga tikang nga ginhimo sang ila mga ginikanan?

Magsugod sing Maaga Pa

Ang importante nga paagi sa pagbulig sa inyo mga anak nga pilion si Jehova amo ang pagsugod sing maaga pa. Sa masami, ang mga pagtudlo kag mga leksion nga natun-an sang ang tagipusuon lanubo pa kag mabinatunon magapadayon sa bug-os nga kinabuhi. (Hulubaton 22:⁠6) Gani magsugod sing maaga pa sa pagsugid sa inyo mga anak tuhoy sa pagkaayo ni Jehova, sa iya gugma, kag pagkamakapulunaw, nga nagatinguha nga tukuron sa ila tagipusuon ang gugma para kay Jehova kag ang apresasyon sa mga nahimo ni Jehova para sa ila. Agod mahimo ini, madinalag-on nga gingamit sang madamo nga mga ginikanan ang bugana nga mga artikulo tuhoy sa pagpanuga ni Jehova nga masapwan sa mga publikasyon sang Watch­tower Society.

Ang pagkamatinumanon kag pagtahod kay Jehova kag sa iya pagsimba amo ang pila sang iban nga mga kinaiya nga dapat ipatudok sa maaga nga bahin sang kabuhi. Makalilipay nga makita sa Cristianong mga miting ang kabataan nga wala pa nagaeskwela nga nagatinguha sa pagkuha sing simple nga mga nota kag nagatan-aw sang mga teksto sa ila kaugalingon nga mga Biblia ukon nagaupod sa ila mga ginikanan sa banyo sa paghilam-os kon ginatuyo sila. Simple ini nga mga butang, apang daw ano ka kinahanglanon ini sa pagbuyok sa lamharon nga hunahuna nga ang pagtahod kag pagkamasinulundon dapat ipakita kay Jehova!

Dapat man sugdan sing maaga pa ang serioso personal nga instruksion sa Biblia. Sang duha na ka tuig ang ila mga anak nga lalaki, ginsugdan sang isa ka mag-asawa nga basahon sa ila ang libro nga Pagpamati sa Daku nga Manunudlo.⁠a Sang ulihi, sang ang mga anak nga lalaki nagaeskwela na, nagabangon sila sing maaga pa kada aga upod sa ila iloy kag ginatun-an ang mga libro nga Ang Akon Libro sang mga Sugilanon sa Biblia kag Mahimu Ka Mabuhi sing Dayon sa Paraiso sa Duta.* Pagasundan ini sang paghinun-anon sa teksto sa sina nga adlaw nga ginadumalahan sang amay antes sang pamahaw. Sang ulihi ang pagtinguha sang mga ginikanan ginpadyaan sing bugana sang ang ila mga anak nga lalaki nagpili sa pag-alagad kay Jehova, nagsimbulo sang ila dedikasyon paagi sa pagpabawtismo sa tubig sa edad nga 10 kag 11.

Ang isa ka maayo nga lamharon nga lalaki nga nagapangalagad sa sanga talatapan sang Watch­tower Society sa Japan naghinumdom nga sang sia lamharon pa, ginbuligan sia sang iya iloy nga mapasuod kay Jehova paagi sa pagpungko sa iya kiliran kon gab-i, kag ginabuligan sia sa pagpangamuyo. Wala gid niya malipatan ang gintudlo​—⁠bisan diin man sia magkadto ukon ano man ang iya ginahimo, si Jehova pirme suod kag handa sa pagbulig.

Ang madinalag-on nga mga ginikanan nakatuon nga makita ang sayop nga mga huyog bangod sang napanubli nga pagkadihimpit sang ila mga anak, kag ginasugdan sing maaga pa sang mga ginikanan nga buligan ang ila mga anak nga tadlungon ini. (Hulubaton 22:15) Ang huyog sa pagkamaiyaiyahon, pagkaritubado, bugal, mamulayon sa iban, dapat tadlungon sing maaga pa. Kon indi, sa ulihi ina nga mga binhi magatubo sa pagrebelde batok sa Dios kag sa iya mga dalanon. Halimbawa, ang may maayo sing katuyuan apang sobra ka matinuguton nga mga ginikanan masami nga nagatugot sang ila mga anak nga mapalambo ang maiyaiyahon nga mga panimuot. Ginabudlayan ining mga anak sa pagtahod sa ila mga ginikanan ukon kay Jehova, nangin katulad sang “mga dimapinasalamaton” nga ginhinambit sa Biblia. (Hulubaton 29:21) Sa pihak nga bahin, ang mga anak nga ginahatagan sing buluhaton sa balay kag nga gintudluan nga mangin mabinantayon sa kinahanglanon sang iban mas mapasalamaton sa ila mga ginikanan kag kay Jehova.

Ang isa pa ka kinahanglanon amo ang pagsugod sing maaga pa sa pagpahamtang sing teokratikong mga tulumuron nga masarangan lab-uton sang inyo anak. Kon indi ini paghimuon sing maaga pa kag sing dalayon, mahimo pun-on sang iban ang iya panghunahuna kag tagipusuon sing sarisari nga mga tulumuron. Ang pagbasa sang bug-os nga Biblia, personal nga pagtuon sa isa sang mga publikasyon sang Watchtower Society, pagpakigbahin sa Teokratikong Eskwelahan sa Pagministerio, mangin isa ka manugbantala sang maayong balita, kag pagpabawtismo sarang malakip sa sining mga tulumuron.

Si Takafumi naghinumdom nga ginhanas sia sang iya iloy nga himuon nga batasan ang pagbasa sang Watchtower kag Awake! nga mga magasin paagi sa paghimo sang simple nga mga pamangkot kag ginabilin ini sa ibabaw sang lamesa sa kusina agod iya makita kon mag-abot sia halin sa eskwelahan. Nadumduman ni Yuri nga ang pagpabilin upod sa mga payunir⁠b sing pila ka adlaw nga nagaalagad sa kon diin ang pagkinahanglan para sa Cristianong mga ministro daku, nagaguwa sa pagministerio upod sa ila, nagatan-aw sa ila nga nagaluto sing manamit nga pagkaon, kag nagapanilag sang ila kalipay kag katutom nakaimpluwensia sa iya sing daku nga alagaron si Jehova sa amo man nga paagi. Madamong mga pamatan-on ang nakadumdom nga masami sila ginadala sang ila mga ginikanan sa ­Bethel, subong amo ang pagtawag sa mga ulong talatapan kag mga sanga sang Watch Tower Society, nga ila mapanilagan ang iban nga mga pamatan-on nga mga lalaki kag mga babayi nga malipayon nga nagaalagad kay Jehova. Madamo sadtong mga kabataan nga nagduaw ang nagaalagad na karon sa mga ­Bethel sa palibot sang kalibutan.

Hatagi sang Inyo Tion ang Inyo mga Anak

Ang kadamuon kag kalidad sang tion nga inyo ginahinguyang upod sa inyo mga anak may daku nga kahilabtanan sa kon bala sila magapili sa pag-alagad kay Jehova ukon indi. Madali nila mahantop kon daw ano ka lawig nga tion kag paghanda ang imo ginahinguyang sa pagtuon sa Biblia nga imo ginadumalahan upod sa ila. Kon indi mo madumduman kon diin kamo nagdulog sang katapusan nga pagtuon ukon gin-untat mo ang pagtuon bangod sang walay pulos nga mga rason, ginapahangop mo nga ang pagtuon indi amo sina ka importante. Apang, kon ila makita nga ang mga ginikanan nagahimo sing mga sakripisyo para sa pagtuon, nagahanda sing maayo para sa sini kag ginadumalahan ang pagtuon walay sapayan sang ano man nga mga sablag nga mahimo mag-utwas, tuhay nga mensahe ang ginahatag. Bisan pa indi ini isa ka kinahanglanon, ang pila ka mga iloy nagapanapot sing maayo sa pagtuon sang ila mga anak, amo man kon nagatambong sa mga miting ukon nagadumala sing pagtuon sa Biblia upod sa isa ka kaingod. Ang impresyon amo nga ang pagsimba kay Jehova importante.

Madamong tion kag kabudlay ang kinahanglanon agod himuon nga makalilipay ang pagtuon sa Biblia sang inyo mga anak, ginalab-ot ang ila tagipusuon. Ang magagmay nga mga kabataan ilabi na nga nanamian nga makita ang mga butang nga ila ginatun-an nga ginailog sa ila atubang. Ang isa ka amay, halimbawa, nagbulig sa iya mga anak nga mapanan-aw ang pagkabanhaw paagi sa pag-ilog sang sugilanon sang Biblia sa pagkabanhaw ni Lazaro. Nagsulod sia sa diutay nga kuwarto kag nian nagguwa subong ang ginbanhaw nga si Lazaro​—⁠Juan 11:​17-44.

Samtang ang mga anak nagapadulong sa pagkahamtong, ang dugang nga tion kag ikasarang mas labi nga kinahanglanon agod atubangon ang tuman kadamo nga mga balatyagon, mga pangduhaduha, kag mga kabalaka nga ila ginaatubang. Ang tion nga ginapain sang mahigugmaon kag mahinantupon nga mga ginikanan sa sini nga tion tuman ka importante agod mapalambo sang kabataan ang ila pagsalig kay Jehova. Ang madinalag-on nga amay sang apat ka mga anak naghinumdom nga sang ang iya mga anak nag-atubang sing pila ka mga problema, nagapanalawsaw sia kag nagahinun-anon upod sa ila sang may kaangtanan nga mga materyal sa mga publikasyon sang Watch­tower adlaw-adlaw tubtob nga ang mga problema malubad sing bug-os.

Ang isa ka masako nga payunir nga iloy sang duha ka anak nakatalupangod nga ang iya anak nga babayi amat-amat nga nagapalayo kag wala na sing kalipay sa teokratiko nga mga hilikuton. Gani namat-od ang iloy nga magpauli sa balay kon ang bata mag-abot halin sa eskwelahan kada hapon, nagapakigsugilanon sa iya anak nga babayi samtang nagainom sila sing tag-isa ka tasa nga tsa. Paagi sa suod nga paghambalanay sa tunga sang iloy kag anak nga babayi, nabaton sang anak ang bulig nga ginakinahanglan. Karon, sa tapos makagradwar sa high ­school, nagbuylog sia sa iya iloy sa payunir nga pag-alagad.​—⁠Hulubaton 20:⁠5.

Maayo nga Pagpakig-upod kag Halimbawa

Dugang sa paghatag sang ila tion, dapat iaman sang mga ginikanan ang maayo nga pagpakig-upod. Ang Hulubaton 13:20 nagasiling: “Sia nga nagalakat upod sa maalam nga tawo mangin maalam, apang ang mga kaupdanan sang mga buangbuang magaantos.”

Madamo sang madinalag-on nga mga ginikanan ang nagapati sa kamatuoran sina nga hulubaton. Ang amay sang apat ka anak nagsiling: “Kon hunahunaon ko ang nagligad, sa banta ko ang madamo nga mga abyan sa kamatuoran sang akon mga anak amo ang nagbulig sa ila nga alagaron si Jehova. Ginpalig-on ko sila nga magpangita sing mga abyan sa iban nga mga kongregasyon subong man sa amon kag tipigan ina nga mga pag-abyanay.” Ang isa ka Cristianong gulang nga nakapangalagad sa ­Bethel sa madamo nga tinuig nagsiling: “Sang lamharon pa ako, nagapuyo kami sa gamay nga balay, apang ini pirme ang ginatanyag nga dalayunan para sa manugtatap sa sirkito. Dugang pa, ang mga espesyal nga mga payunir nagapanyapon upod sa amon sing regular. Nagapaligo sila sa amon balay kag nagapakig-upod sa amon. Ang pagpamati sa ila mga eksperiensia kag makita ang ila kalipay nakabulig sa akon nga mapalambo ang apresasyon para sa bug-os tion nga pag-alagad.”

Ang maayo nga pagpakig-upod makabulig sa sadtong may mga kabudlayan. Ang isa ka iloy nga ang iya anak nakaeksperiensia sing tuman kabudlay nga tion nagpakigsugilanon sang problema sa isa ka manugtatap sang sirkito sang mga Saksi ni Jehova. Iya ginrekomendar nga dal-on sang iloy ang iya anak nga lalaki sa pagministeryo sa latagon upod sa iya. “Kon himuon mo ina, ang iya espirituwalidad kag ang tanan iban pa nga mga palaligban magaayo,” siling sang manugtatap. Sia nagsiling: “Sa amon kongregasyon may kahimusan para sa pagpanaksi kon gab-i, kag madamo sang mga nagaeskwela nga mga kabataan, pila ka tigulang nga mga payunir, kag sa dimagkubos isa ka gulang ang nagbuylog sa sini. Sa umpisa mabudlay paupdon ang akon anak nga lalaki sing tayuyon, apang wala yadto magdugay kay pirme sia nagapauli sa balay nga mas malipayon kag napalig-on paagi sa maayo nga pagpakig-upod. Samtang estudyante pa sia sa high ­school, ginbawtismuhan sia kag nag-alagad subong auxil­iary payunir kada bulan, kag sang nakatapos na sa pag-eskwela, nangin isa sia ka regular nga payunir.” Ang maayo nga pagpakig-upod nga ginaupdan sang paghimo sang kabubut-on ni Jehova magadala sing maayo nga mga resulta.

Mahimo nga wala sing mga pamatan-on nga mangin maayo nga impluwensia sa inyo anak sa inyo duog, apang ang sulitsulit nga ginasugid sang madamo nga mga pamatan-on nga nagpili sa pag-alagad kay Jehova amo ang halimbawa sang ila mga ginikanan. Madamo nga mga pamatan-on ang nahamuot sa ila mga ginikanan kag naluyag nga ilugon sila. Nadumduman ni Yuri ang pagkamaabiabihon sang iya iloy kag kon paano sia nagaulikid sa iban, nagapanawag sa ila sa telepono kag nagaluto sing pagkaon para sa masakiton. Si Tatsuo, nga naghalin sa pamilya sang apat ka anak nga lalaki, karon dalagku na kag nagaalagad kay Jehova, nagsiling: “Indi makatuon si Mom upod sa amon sing tayuyon bangod si Dad indi tumuluo kag ginapamatukan sia sang iya mga himata. Apang ang pagtan-aw sa iya tindog sa kamatuoran kag sang iya kalipay sa pag-alagad kay Jehova nakaimpluwensia sa akon sing daku. Handa man sia sa pagpulaw tubtob sa kaagahon agod buligan kami sa amon mga palaligban.” Ang mga pulong sang kaalam sang mga ginikanan may gahom kon ginaupdan ini sang matutom nga mga buhat. Si Yoichiro nagsiling tuhoy sa iya mga ginikanan: “Indi ko gid madumduman nga nagpabutyag sila sing negatibo nga mga panghunahuna tuhoy sa iban sa kongregasyon; ukon gintugutan nila kami nga magkutsukutso tuhoy sa mga sayop sang iban.”​—⁠Lucas 6:​40-42.

Kalipay sa Pagtan-aw sa mga Anak nga Nagapili kay Jehova

Wala sing himpit nga paagi agod buligan ang inyo mga anak sa pagpili kay Jehova. Magaut-was ang madamo makahalangawa nga mga tion. Ang natublag nga amay nga ginhinambit sa umpisa nagsiling: “Subong mga ginikanan pirme namon gintinguhaan nga sundon sing matutom ang mga panugda sang kitaon nga organisasyon ni Jehova. Isa ini ka daku nga bulig sa paglandas sa mga palaligban.” Ang ila mga pagtinguha nagmadinalag-on.

Huo, paagi sa paghimo sang imo masarangan sa pagsunod sa mga panuytoy sang Biblia, nagatudlo sa imo mga anak sing maayo nga mga rason sa paghigugma kay Jehova, nga ginasakdag sang imo matutom nga halimbawa kag sinsero nga pagtinguha sa pagbulig, ikaw man mahimo makasapo nga ang imo mga pagtinguha napurungpurungan sing kadalag-an. Nadumduman mo bala ang bata nga lalaki nga ginhinambit sa panugod, nga sadto anay determinado nga indi mangin isa sa mga Saksi ni Jehova? Ti, sa tapos sia nabuligan sing madinalag-on sang iya iloy sa iya mabudlay nga mga tinuig, sia nagsiling: “Nalipay ako nga wala sia mag-untat!” Mahimo nga matigayon mo man ang pareho nga resulta sa imo mga kabataan.​—⁠Galacia 6:⁠9.

[Mga footnote]

[Piktyur sa pahina 30]

Madumduman mo bala ang pagpadaku sa anak nga may makalilipay nga mga handumanan?