Bantayi ang Inyo Pagbatyag sing Pagkahilingagawon
ANO bala ang isa ka pat-od, ginakahamut-an sang Dios nga paagi sang padayon nga pag-alagad kay Jehova sing bug-os kalag? Amo ang tunay nga pagbatyag sing pagkahilingagawon nga tudok sa aton tagipusuon. Ang pag-alagad sa Dios sing bug-os kalag nagakahulugan sing pag-alagad sa iya sa aton bug-os nga kabuhi, kag nagakinahanglan ini sing hanuot, tudok nga pagkamatinumanon sa tanan nga ginapahimo niya sa aton.
Ginpadaku ni propeta Moises ining kinahanglanon sang ginsugo niya ang pungsod sang Israel: “Dapat mo higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong kusog.” (Deuteronomio 6:5) Mga siniglo sang ulihi amo man nga sugo ang ginsulit ni Cristo Jesus: “Dapat mo higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna.” (Mateo 22:37) Ginpatuhuyan ni apostol Pablo ang amo man nga kinahanglanon sang ginsilingan niya ang mga taga-Efeso sa paghimo “sang kabubut-on sang Dios sing bug-os kalag,” kag sang ginsilingan niya ang mga taga-Colosas: “Bisan ano ang inyo ginahimo, himua ini sing bug-os kalag subong nga kay Jehova, kag indi sa mga tawo.”—Efeso 6:6; Colosas 3:23.
Apang, mabudlay ang pag-alagad sa Dios sing tinagipusuon kag bug-os kalag kon wala kita sing tudok nga pagbatyag sing pagkahilingagawon ukon kon ang pagbatyag naton anay sing pagkahilingagawon nangin maluya—ayhan nadula sing bug-os. Sa karon, nagakabuhi kita sa isa ka tion sang pagkahilingagawon nga indi matupungan sang bisan ano nga panag-on sa maragtas sang tawo.
Espesipiko nga mga Panag-on sang Pagkahilingagawon
Sang antes-Cristiano nga mga tion may madamo nga panag-on sang pagkahilingagawon. Ang adlaw ni Noe kag ang panag-on nga nagdul-ong sa kalaglagan sang Sodoma kag Gomorra pat-od gid nga mga tion sang matuod nga pagkahilingagawon. (2 Pedro 2:5, 6; Judas 7) Ang mga tinuig antes sang Anaw walay duhaduha nga napun-an sing hilingagawon nga hilikuton. Bisan pa nga wala mahibaluan ni Noe kag sang iya pamilya kon san-o gid magasugod ang Anaw, ang ila “diosnon nga kahadlok” nagpalig-on sa ila nga indi magpabuyanbuyan.—Hebreo 11:7.
Sing kaanggid, antes malaglag ang Sodoma kag Gomorra, ‘ginpahingagaw [sang mga anghel] si Lot’ kag ginsilingan sia: “Palagyo tungod sang inyo kabuhi!” (Genesis 19:15, 17) Huo, sa sadto man nga okasyon, ginluwas sang paghingagaw ang matarong nga mga kabuhi. Mga siniglo sang ulihi ginpalig-on ang mga Judiyong bihag sa Babilonia: “Halin kamo, halin kamo, guwa kamo gikan diri, dili kamo magtandog sang butang nga dimatinlo; guwa kamo gikan sa tunga niya.” (Isaias 52:11) Sang 537 B.C.E., mga 200,000 ka tinapok ang naghingagaw guwa sa Babilonia sa pagtuman sa sinang hilingagawon matagnaon nga sugo.
Ang pagbatyag sing pagkahilingagawon sa tagsa sadtong mga kahimtangan nagresulta sa bug-os-kalag nga pag-alagad sang mga nagbatyag kag naghupot sing buhi nga pagtuo nga nagakabuhi sila sa hilingagawon nga mga tion.
Pagkahilingagawon sa Cristianong Tion
Ang pagkahilingagawon sulit-sulit nga ginahinambitan sa bug-os nga Cristianong Griegong Kasulatan. “Magbantay,” “magmata,” “mag-andam,” “pamatud-i ang inyo kaugalingon nga handa”—ini tanan mga ekspresyon nga gingamit ni Cristo Jesus agod ipatudok ang nagakaigo nga pagbatyag sing pagkahilingagawon sa iya mga sumulunod. (Mateo 24:42-44; Marcos 13:32-37) Dugang pa, ang iya ilustrasyon nahanungod sa napulo ka ulay, sa malauton nga ulipon, sa mga talanton, kag sa pagpain sa mga karnero gikan sa mga kanding tanan nagapukaw sing pagpaabot kag nagapatubo sing pagbatyag sing pagkahilingagawon.—Mateo 25:1, 14, 15, 32, 33.
Wala lamang naghambal si Jesus tuhoy sa pagkahilingagawon kundi ginsakdag man niya ang kamatuoran sang iya mga pulong paagi sa pagpanghikot sing hilingagawon. Sa isa ka hitabo ginsilingan niya ang mga kadam-an sang gintinguhaan nila nga hawiran sia: “Kinahanglan man ako magwali sa iban nga mga banwa sing maayong balita sang ginharian sang Dios, bangod sa sining katuyuan ginpadala ako.” (Lucas 4:42, 43) Dugang pa, ginpalig-on niya ang iya mga disipulo nga magpangabay sa Agalon sang alanyon nga magpadala sing dugang nga mangangani sa Iya alanyon bangod “ang alanyon bugana, apang diutay lamang ang mangangani.” (Mateo 9:37, 38) Yadtong mapangamuyuon nga pangabay sa Dios nagapahayag gid sing espiritu sang pagkahilingagawon.
Sayop Bala Yadto nga Pagbatyag sing Pagkahilingagawon?
Ayhan ang iban mamangkot sing makatarunganon, Ngaa ang pagbatyag sing pagkahilingagawon kinahanglanon sadto kon ang gintagna “nga dakung kapipit-an” malayo pa sing mga siniglo?—Mateo 24:21.
Makapat-od kita nga indi lamang ini isa ka padugi nga gingamit ni Jesus agod magmasako ang iya mga sumulunod sa pagbantala kag pagpanudlo nga hilikuton. Indi, kundi ang gugma ni Cristo sa iya mga disipulo, subong man ang iya himpit nga paghangop sang pagtamod ni Jehova sa tion, amo ang sadsaran sang iya laygay sa pagkahilingagawon. Huo, nahibal-an ni Cristo Jesus nga ang espiritu sang pagkahilingagawon kinahanglanon sa pagtuman sa kabubut-on ni Jehova suno sa katuyuan sang Dios. Dugang pa, nahibal-an niya nga ang iya mga disipulo makabenepisyo mismo sa espirituwal paagi sa padayon nga pagbatyag sing pagkahilingagawon tubtob sa iya pagbalik.
Maathag nga ginpakita ni Jesucristo nga may isa ka bug-os kalibutan nga pagpanaksi nga himuon sa isa ka limitado nga tion. (Mateo 24:14; Marcos 13:10) Ang progresibo nga mga hugna sining hilikuton ginpahayag lamang samtang ginapadayag ang hilikuton. Apang ang paghingagaw kinahanglanon agod matuman ang tagsa ka tikang. Ginpakita ni Jesus ang progreso sining hilikuton sang nagsiling sia: “Mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Kag subong sina ang pagpadayag sing hilikuton tubtob sa karon. Nagakahulugan ini sing pila ka mga sorpresa para sa mga alagad sang Dios sa lakat sang panahon, nga nagakinahanglan sing mga pagpasibu sa paghangop kon kaisa.
Ang Cristianong pagbatyag sing pagkahilingagawon nagtuman sang katuyuan ni Jehova. Nakabulig ini sa mga disipulo ni Cristo agod himuon ang amat-amat nga hugna sang ila tulumanon suno sa sibu nga iskedyul ni Jehova. Busa karon, kapin sa halos 2,000 ka tuig na ang nagligad, mas lubos nga nahangpan naton yadtong diosnon nga iskedyul.
Ang Cristianong pagkahilingagawon nagbulig sa mga disipulo sa pagpanaksi sing maid-id sa Jerusalem, Judea, Samaria, kag sa naglinapta nga mga Judiyo antes sang 36 C.E. sang malapit na lang matapos ang pinasahi nga kahamuot sa Israel. (Daniel 9:27; Binuhatan 2:46, 47) Sing kaanggid, ang Cristianong pagkahilingagawon nagbulig sa mga kongregasyon sang una sa paghatag sing maathag nga paandam sa tanan nga Judiyo nga sa indi madugay matapos ang ila sistema. (Lucas 19:43, 44; Colosas 1:5, 6, 23) Kag sang natapos ini nga wala ginapaabot sang 70 C.E., ang pagkahilingagawon nagbulig sa unang-siglo nga mga saksi ni Cristo sa pagbantala sing langitnon nga paglaum sa madamo antes ang gintagna nga apostasya magapalapnag sang iya makamamatay espirituwal nga kadulom. (2 Tesalonica 2:3; 2 Timoteo 4:2) Nian, sa bug-os nga siniglo sang Madulom nga Dag-on, ang pila ka kaangay trigo nga mga Cristiano naghupot sang paglaum sa Ginharian nga buhi, subong sa gintagna ni Cristo Jesus. (Mateo 13:28-30) Sang ulihi, sa iya gintangdo nga tion, ginbayaw ni Jehova ang isa ka masidla, modernong-adlaw nga kongregasyon, nga ginapahulag sang iya hilingagawon nga mensahe sang paghukom sa sadtong nagakabuhi sa sining katapusan nga kaliwatan.—Mateo 24:34.
Kaangay ni Daniel sang dumaan nga tion, ang matutom modernong-adlaw nga mga Saksi sang Dios indi gid magpangisog sa pagduhaduha kay Jehova, sa pagpamangkot sa iya: “Ano bala ang ginahimo mo?” (Daniel 4:35) Nagasalig sila nga nahibaluan ni Jehova sing sibu kon ano ang kinahanglanon agod matuman ang iya hilikuton suno sa iskedyul. Gani sa baylo nga duhaduhaan ang pamaagi ni Jehova sa pagpatigayon sang mga butang, nalipay sila nga ginhatagan sila sang Dios sing kahigayunan sa pagpanghikot kaupod niya sa sining importante nga mga tion.—1 Corinto 3:9.
Dugang Pa nga Palig-on sa Pagkahilingagawon
Ang isa pa ka rason sa paghingagaw amo nga indi kita makatudlo sing eksakto nga adlaw kag takna sang gilayon nga pagdabdab sang dakung kapipit-an. Napat-od gid ni Cristo Jesus nga wala sing isa sa duta ang nakahibalo sa gintangdo nga adlaw kag takna sang pagsugod sinang importante nga hitabo. (Mateo 24:36) Sa isa pa ka okasyon ginsilingan niya ang nakunyag niya nga mga apostoles: “Indi inyo ang paghibalo sang mga tion ukon mga dag-on nga ginpat-od sang Amay sa iya kaugalingon nga pagbulut-an.” (Binuhatan 1:7) Huo, maathag ang resulta, apang indi aton ang paghibalo sang tanan nga detalye.
Si apostol Pablo may nagakaigo nga panimuot sa pagkahilingagawon. Ayhan nadumduman niya ang mga pinamulong ni Jesus sang nagsulat sia sa mga taga-Tesalonica tuhoy sa presensia ni Cristo: “Karon nahanungod sa mga tion kag mga panag-on, mga kauturan, wala kamo sing kinahanglan nga sulatan sing bisan ano.” (1 Tesalonica 5:1) Ginsulat niya ining sulat mga 17 ka tuig pagkatapos nga nagsiling si Jesus: “Mangin saksi ko kamo . . . tubtob sa ukbong sang duta.” (Binuhatan 1:8) Sa sadtong tion wala na sing masulat pa bangod wala na sing napahayag. Apang bisan pa, makasalig sila nga ang adlaw ni Jehova pat-od nga magaabot “subong sang isa ka makawat sa kagab-ihon” samtang ang mga Cristiano nagabantala pa gihapon sing hilingagawon.—1 Tesalonica 5:2.
Apang daw indi mahimo nga samtang ginadumdom ining mga pinamulong, ginhunahuna sang unang-siglo nga mga Cristiano nga ang adlaw ni Jehova siniglo pa ang kalayuon. Matuod, nahibal-an nila ang parabola ni Jesus tuhoy sa hari nga nagkadto sa malayo nga duta kag tuhoy sa tawo nga nagpanglakatan sa iban nga kadutaan. Nahibal-an man nila, nga ginpakita sa parabola nga magabalik ang hari “sa ulihi” kag ang nagpanglakatan “sa tapos sang malawig nga tion.” Apang walay duhaduha nga ginpaligban nila ang mga pamangkot subong sang, San-o ang “ulihi”? Kag ano ang buot silingon sang “sa tapos sang malawig nga tion”? Napulo bala ka tuig? Beinte ka tuig? Singkwenta ka tuig? Ukon mas malawig pa? (Lucas 19:12, 15; Mateo 25:14, 19) Ang mga pinamulong ni Jesus padayon nga magapahanumdom sa ila: “Kamo man, maghanda, bangod sa takna nga wala ninyo ginahunahuna magakari ang Anak sang tawo.”—Lucas 12:40.
Ang Positibo nga Epekto sang Pagkahilingagawon
Huo, ang ginpahulag sang Dios nga pagbatyag sing pagkahilingagawon may makapalig-on gid nga epekto sa unang-siglo nga mga Cristiano, nagabulig sa ila nga magmasako sa pinakaimportante nga hilikuton sang pagbantala kag pagpanudlo. Padayon ini nga nagapalig-on sa aton karon sa madamong paagi. Nagaamlig ini sa aton nga indi magpabaya ukon ‘lapyuon sa paghimo sing maayo.’ (Galacia 6:9, King James Version) Nagaamlig ini sa aton gikan sa tuman nga pagkanadalahig sa kalibutan kag sa makahalalit nga materyalismo sini. Ginahuptan sini ang aton hunahuna sa “matuod nga kabuhi.” (1 Timoteo 6:19) Ginsiling ni Ginuong Jesus nga ang iya mga disipulo mangin subong sang “mga karnero sa tunga sang mga lobo,” kag nahibal-an niya nga dapat kita mangin determinado, may pat-od nga pagtamod agod mapamatukan ang kalibutan. Huo, naamligan kita, naproteksionan sang aton Cristianong pagbatyag sing pagkahilingagawon.—Mateo 10:16.
Si Jehova nga Dios sa iya walay latid nga kaalam pirme nagahatag sa iya mga alagad sing bastante nga impormasyon agod mahuptan nila nga buhi ang ila pagbatyag sing pagkahilingagawon. Mahigugmaon nga ginpasalig niya kita nga yari kita sa “katapusan nga mga adlaw” sining malaut nga sistema sang mga butang. (2 Timoteo 3:1) Padayon kita nga ginapahanumdom nga dapat kita magsiga subong mga sulu tubtob magtaliwan ang kaliwatan diin nagakabuhi kita sa dakung kapipit-an, nga ang talipuspusan sini sa Armagedon.—Filipos 2:15; Bugna 7:14; 16:14, 16.
Huo, ang diosnon nga pagbatyag sing pagkahilingagawon isa ka importante nga bahin sang bug-os-kalag nga pag-alagad kay Jehova. Nagaamlig ini kag nagabulig nga mapamatukan ang mga pagtinguha ni Satanas nga ‘lapyuon kag punawon sa [ila] mga kalag’ ang mga alagad sang Dios. (Hebreo 12:3) Tubtob sa walay katapusan, ang bug-os-kalag nga debosyon magapahulag sa mga alagad ni Jehova sa pagtuman sa iya, apang karon, antes sang Armagedon, ang tudok, tunay nga pagbatyag sing pagkahilingagawon isa ka importante nga bahin sang bug-os-kalag nga debosyon.
Kabay nga si Jehova nga aton Dios magbulig sa aton nga maamligan ang aton pagbatyag sing pagkahilingagawon samtang padayon naton nga ginapalanog ang mga pulong ni apostol Juan: “Kabay pa! Kari, Ginuong Jesus.”—Bugna 22:20.