Mangin mga Manugtuman—Indi mga Manugpalamati Lamang
1 Ginadumdom kag ginatuman sang matuod nga mga Cristiano karon ang laygay sang Biblia nga mangin mga manugtuman sang pulong, indi mga manugpalamati lamang. (Sant. 1:22) Nagahimo ini sa ila nga tuhay sa mga tawo, nga bisan pa nagapangangkon nga Cristiano, nagaalagad sa Dios sa bibig lamang. (Isa. 29:13) Si Jesus nagsiling sing maathag nga yadto lamang ang nagahimo sang kabubut-on sang Dios ang maluwas.—Mat. 7:21.
2 Ang pagsimba nga wala sing diosnon nga mga binuhatan wala sing pulos. (Sant. 2:26) Gani dapat naton pamangkuton ang aton kaugalingon, ‘Paano ginapamatud-an sang akon mga binuhatan nga ang akon pagtuo tunay? Ano ang nagapakita nga nagakabuhi gid ako suno sa akon ginapatihan? Paano ko mailog sing labi pa si Jesus?’ Ang bunayag nga mga sabat sa sining mga pamangkot magabulig sa aton nga makita kon ano na nga pag-uswag ang aton nahimo ukon kinahanglan pa nga himuon sa paghimo sang kabubut-on sang Dios.
3 Subong mga sumulunod ni Jesus nga nagasunod sang iya tikang, ang aton pangunang tulumuron sa kabuhi dapat nga mangin pareho man sa ginpabutyag sang salmista: “Nagahatag kami sing pagdayaw sa Dios sa bug-os nga adlaw, kag tubtob sa tion nga dinapat-od ginapadunggan namon ang imo ngalan.” (Sal. 44:8) Daw ano nga kaayawan ang masapwan naton samtang ginapakita naton sa tanan naton nga mga binuhatan ang aton tinagipusuon nga handum nga dayawon si Jehova!—Filip. 1:11.
4 Labi Pa sa Matadlong nga Pagkabuhi ang Ginalakip sa Pagdayaw kay Jehova: Kon maayong pagginawi lamang ang ginakinahanglan sang Dios, mahimo lamang kita magakonsentrar sa pagputli sang aton personalidad. Apang, ang aton pagsimba nagalakip man sang pagpahayag sing lapnag sang pagkahalangdon ni Jehova kag sang pagpahayag sing dayag sang iya ngalan!—Heb. 13:15; 1 Ped. 2:9.
5 Lakip sa labing importante nga mga hilikuton nga mahimo naton amo ang pagbantala sing dayag sang maayong balita. Ginhugod ni Jesus ang iya kaugalingon sa sining hilikuton bangod nahibaluan niya nga nagakahulugan ini sing kabuhi nga walay katapusan sa mga magapamati. (Juan 17:3) Amo man sina karon ka importante ang “ministeryo sang pulong”; amo lamang ini ang paagi nga ang mga tawo maluwas. (Binu. 6:4; Roma 10:13) Nakahibalo sang daku nga epekto sini, maapresyar naton kon ngaa si Pablo naglaygay sa aton nga “iwali ang pulong,” kag “mangin masako sa sini.”—2 Tim. 4:2.
6 Tubtob sa anong kasangkaron dapat naton dayawon si Jehova sa aton kabuhi? Ang salmista nagsiling nga ginhunahuna niya ini sa bug-os nga adlaw. Amo man bala sina ang aton balatyagon sa sini? Huo, kag pagatamdon naton ang tagsa ka pagpakigsugilanon sa iban nga tawo subong isa ka kahigayunan nga makapamulong tuhoy sa ngalan ni Jehova. Magapangita kita sing nagakaigo nga mga kahigayunan agod mapatuhoy ang aton paghambalanay sa espirituwal nga mga butang. Ang pagpayunir mahimo mabinagbinag sing hanuot sadtong may maayo nga mga kahimtangan, kay nagabulig ini sa aton nga unahon ang pagbantala nga hilikuton sa aton kabuhi kada adlaw. Ang Pulong sang Dios nagapasalig sa aton nga paagi sa dalayon nga paghimo sang kabubut-on sang Dios, magamalipayon kita.—Sant. 1:25.