Bag-ong Programa sang Pinasahi nga Adlaw nga Asambleya

¹ Ngaa dapat naton ibantala ang maayong balita sa walay langan? Ano ang mga kinahanglanon agod mangin isa ka manugwali sang maayong balita? Paano makamatumato bisan ang mga mahuluy-on ukon mga hipuson nga ipaambit ang maayong balita sa iban? Ini kag ang iban pa nagapahunahuna nga mga pamangkot pagasabton sa programa sang pinasahi nga adlaw nga asambleya sugod sa Marso, sa tema nga “Kalipikado Subong mga Ministro sang Maayong Balita.”—2 Cor. 3:5.

² Ang mga pamatan-on magahatag sing makapalig-on nga mga eksperiensia kon paano nila ginpamatukan ang pag-ipit sang mga katubotubo. Ang mga ginikanan pagahatagan sing mahigugmaon nga pagpalig-on sa kinahanglanon nga hanason ang ila mga kabataan subong mga ministro sang Dios. Kita tanan pagabuligan sa pag-apresyar sang kinahanglanon nga magwali, upod ang pagpakamaayo sa aton kaugalingon kag sa sadtong nagapamati sa aton.—1 Tim. 4:16.

³ Pat-od gid nga ang bawtismo mangin isa ka talalupangdon nga bahin sang adlaw. Ang bisan sin-o nga maluyag magpabawtismo sa pinasahi nga adlaw nga asambleya dapat magasugid sini sa nagadumala nga manugtatap sing abanse agod may bastante sia nga tion sa paghimos nga marepaso sang mga gulang ang gintangdo nga mga pamangkot upod sa mga kandidato sa bawtismo.

⁴ Ang isa pa ka talalupangdon nga bahin amo ang pangunang pamulongpulong nga pagaihatag sang gindapit nga humalambal. Ginatig-uluhan ini “Kalipikado kag Nasangkapan Subong mga Ministro sang Dios.” Ang apat ka pangunang mga aman nga nagasangkap sa aton subong mga ministro pagahambalan, kag ang pamulongpulong magalakip sang nagapabakod sing pagtuo nga mga eksperiensia.

⁵ Magplano na karon nga tambungan ang bug-os nga programa. Pat-ura nga agdahon ang mga interesado kag mga estudyante sang Biblia agod makabenepisyo man sila gikan sa sining adlaw sang teokratikong edukasyon. Sa sining paagi makapat-od kita nga “nasangkapan [kita] sing nagakaigo” subong mga ministro sang maayong balita.