Magpabilin “nga Walay Dagta sa sining Kalibutan”

“Ang putli nga pagsimba kag walay dagta sa atubang sang Dios kag Amay amo ang pag-atipan sa mga ilo kag balo nga mga babayi sa ila kapipit-an, kag sa pagtipig sang iya kaugalingon nga walay dagta sa sining kalibutan.”—SANTIAGO 1:27.

1, 2. Ano ang pila ka kinahanglanon sang matuod nga pagsimba?

SI Jehova nagapangayo sang putli nga pagsimba. (Juan 4:23, 24) Isa pa, ang walay dagta nga relihion nagapahulag sang aktibo, mahigugmaon nga kabalaka sa mga nagakinahanglan. (Galacia 2:10) Nagakinahanglan man ini para sa aton nga tipigan ang aton kaugalingon nga walay dagta sang kalibutan, nga amo, ang dimatarong nga katilingban sang tawo nga nahamulag sa Dios kag “yara sa gahom sang malauton,” si Satanas nga Yawa.—1 Juan 5:19.

² “Ang putli nga pagsimba kag walay dagta sa atubang sang Dios kag Amay amo ini,” sulat ni disipulo Santiago, “ang pag-atipan sa mga ilo kag balo nga mga babayi sa ila kapipit-an, kag sa pagtipig sang iya kaugalingon nga walay dagta sa sini nga kalibutan.” Ang isa pa ka pagbadbad amo: “Ang putli, walay dagta nga relihion sa itololok sang Dios nga aton amay amo ini: pagbulig sa mga ilo kag mga balo kon kinahanglan nila kag sa pagtipig sang ila kaugalingon nga wala malatni sang kalibutan.”—Santiago 1:27, The New Jerusalem.

3. Anong mga pamangkot ang pagabinagbinagon naton karon?

³ Apang paano naton subong mga alagad ni Jehova matipigan ang aton kaugalingon nga “wala malatni sang kalibutan”? Ano ang Makasulatanhon nga pagtamod sa mga butang subong sang sosyal nga mga hilikuton, edukasyonal nga mga kahimusan, pagpakig-angot sa negosyo kag mga kalingawan sang kalibutan?

‘Pagtipig nga Wala Malatni sang Kalibutan

4. Ano ang ginapakita sang Juan 17:14 kag Isaias 2:2-4 tuhoy sa aton kaangtanan sa sining kalibutan?

⁴ Sanglit kita subong mga saksi ni Jehova “indi bahin sang kalibutan,” dapat kita nga tuhay gikan sa dimatarong nga katilingban sang tawo. (Juan 17:14) Sing bahin, nagakinahanglan ini nga magpabilin kita nga neutral kon tuhoy sa politika sang kalibutan. Dapat man kita mag-untat sa pagpahilabot sa kasingki sini kag tinguhaan ang paghidait subong yadtong ‘nagsalsal sang ila mga espada nga punta sang arado.’—Isaias 2:2-4.

5. Agod magpabilin nga wala malatni sining kalibutan, ano nga aksion ang himuon naton subong ginapakita sang (a) 1 Corinto 6:9-11? (b) Efeso 5:3-5?

⁵ Subong mga tawo nga maluyag magpabilin nga wala malatni sining kalibutan, dapat naton likawan ang panghambal, pagginawi kag panimuot nga kinaandan katama sa kalibutanon nga mga tawo, apang wala nahisanto sa Pulong sang Dios. Halimbawa, ang dumot, kahamkon, makahuloya nga pagginawi kag binastos nga lahog wala sing nagakaigo nga lugar sa aton kabuhi. (1 Corinto 6:9-11; Efeso 5:3-5) Indi makakilibot nga ang aton mga buhat kag mga panimuot tuhay gikan sa iya sang kalibutanon nga mga tawo, kay wala sila nagapakig-ambit sang aton Cristianong paglaum.

Malip-ot ang Tion para sa Kahimusan Sining Kalibutan

6. Bangod sang 1 Corinto 7:29-31, paano tamdon sang mga Saksi ni Jehova ang pag-asawahay, pagkabutang ukon iban dutan-on nga mga butang?

⁶ Si apostol Pablo nagsulat: “Ang tion nagalip-ot. Kutob karon ang mga may asawa maggawi subong nga walay asawa, kag ang mga nagalalaw subong nga wala sila nagalalaw, kag ang mga nagakalipay subong nga wala sila nagakalipay; ang mga nagabakal subong nga wala sila nagaangkon sini, kag ang nagagamit sa kalibutan subong nga wala nagagamit sini, bangod ang karon nga kahimusan sang kalibutan nagataliwan.” (1 Corinto 7:29-31, Modern Language Bible) Ginapakita sini nga bisan ang Cristianong mga bana magatuman sang ila mga obligasyon sa pag-asawahay, indi nila dapat paghimuon ang pag-asawahay nga ila bug-os nga kabuhi. Kon mapatay, bayaan sang ginpanganak sang espiritu nga mga Cristiano ang tanan nila dutan-on nga mga kaangtanan, kalipay, kasubo kag pagkabutang. Ti, bisan karon, ang mga Cristiano, may langitnon man ukon dutan-on nga paglaum sila, mahimu nga madulaan sing asawa ukon materyal nga mga pagkabutang! Dugang pa, sa “dakung kapipit-an” kabuhi, indi materyal nga mga pagkabutang, ang pagaamligan. (Mateo 24:21; Manugwali 9:11) Gani wala sang mga Saksi ni Jehova karon ang magabutang sang pag-asawahay, pagkabutang ukon iban pa dutan-on nga mga butang nga una sa kabuhi. Sa baylo, ang tanan nga mga Cristiano dapat magahimu sang maayong kaangtanan kay Jehova nga Dios nga isa ka bagay nga importante katama. Labi na gid kay nagakabuhi kita sa “katapusan nga mga adlaw” kag “ang karon nga kahimusan sang kalibutan nagataliwan.”—2 Timoteo 3:1.

7. Suno sa isa ka ekonomista, ano ang nagdugang kadungan sang pag-uswag sang edukasyon, kinitaan, kag iban pa?

⁷ Madamu ang nabalaka nahanungod sa palaabuton sang “karon nga kahimusan sang kalibutan.” Halimbawa, ginsitar sang dyurnalista nga si Nancy Brown ang ekonomista nga si Ezra Misham subong nagasiling nahanungod sa pag-uswag sa edukasyon kag kinitaan: “Wala [ini] magdala sing sosyal nga ikaayo. Dungan sa pag-uswag sa siensya, edukasyon kag materyal nga mga butang, nakita sang katilingban ang pagdugang sa kasingki, delingkwensia, magagmay nga krimen, bandalismo, pagpatay kag paghikog, kalaw-ayan kag kabastosan.” Talalupangdon matuod ang nagabukas nga pinamulong sang artikulo sining pamantalaan: “Ang pagpasilabot lamang sang Dios ang makaluwas sa kalibutan gikan sa paglaglag sa iya kaugalingon.”—Times-Colonist, Victoria, British Columbia, Marso 25, 1982.

8. Ngaa indi pagtigayunon ang tanan nga masarangan naton sa sining kalibutan?

⁸ Siempre, gintuga ni Jehova ang duta agod puy-an, indi sang dimatarong nga katilingban sang tawo, kundi sang matarong, himpit nga tawo. (Isaias 45:18; Salmo 37:29, 38) Gani indi pagpahanugotan sang Dios nga laglagon sang tawo ang iya kaugalingon. Apang wala sing duhaduha nga ining daan nga kahimusan sang kalibutan magataliwan sing bug-os. Gani, indi dapat paggamiton sang dedikado nga mga alagad ni Jehova ang kalibutan “sing bug-os.” Ukon subong sang pagbadbad sini sang isa ka badbad: “Samtang ginagamit mo ang kalibutan, indi pagtinguhai nga tigayunon ang tanan sa sini sa bug-os mo nga masarangan, kay ining kalibutan sa iya karon dagway nagataliwan.”—1 Corinto 7:31, The New Testament in the Language of Today, ni William F. Beck.

Gamiton Gid Ining Kalibutan?

9. (a) Tubtob diin magamit sing nagakaigo sang katawhan ni Jehova ining kalibutan? (b) Bangod sang Mateo 6:31-33 kag 1 Timoteo 6:7, 8, ano ang panimuot naton sa materyal nga mga butang?

⁹ Subong dedikado nga mga Saksi ni Jehova, kon amo, maayo bala sa aton nga tigayunon ang bisan ano gikan sa sining kalibutan? Huo, ginpakita ni Pablo nga magamit naton ang kalibutan apang indi sing bug-os. Gani, sarang naton magamit ang matarong nga mga aman sang kalibutan sa pagtuman sang aton Makasulatanhon nga mga obligasyon kag sa pagbantala sang mensahe sang Ginharian. (1 Timoteo 5:8; 6:17-19) Apang, sanglit luyag naton nga magpabilin nga “walay dagta sa sining kalibutan,” indi kita sarang madalahig sa mga pagsinuay sini, mga martsa sa pagprotesta, mabugnaw kag mainit nga inaway ukon kaanggid nga mga buhat. Indi kita tago nga magapabor sa isa ka bahin sang sa isa. Indi kita mabalaka sing dinagakaigo tuhoy sa aton pagpangabuhi kag materyal nga kabuganaan, kay si Jesus nagsiling: “Dili kamo maghimud-os kag magsiling, ‘Ano bala ang aton kaunon?’ ukon, ‘Ano ang aton imnon?’ ukon, ‘Ano ang aton ipanaput?’ Kay ang mga pungsod nagapangita sini tanan nga butang. Kag ang inyo Amay nga langitnon nakahibalo nga kamo may kinahanglan sini tanan. Padayon, nian, nga pangitaa anay ang ginharian kag ang iya pagkamatarong, kag tanan ini nga butang idugang sa inyo.” Kag ginhimu ni Jesus kon ano ang iya ginbantala, kay bisan nga ang mga talonon nga ido may lungib kag ang mga pispis may mga haponan, wala sia sing ulonan sang iya ulo. Gani, kabay nga mangin kontento kita sa pagkaon kag panapton samtang ‘ginapangita anay naton ang ginharian.’—Mateo 6:31-33; Lucas 9:58; 1 Timoteo 6:7, 8.

10. Nahanungod sa edukasyon, anong mga pamangkot ang nagakabagay sang mapangamuyuon nga paghunahuna, kag paano nimo ini sabton?

¹⁰ Ano, nian, ang tuhoy sa kalibutanon nga karera? Bueno, sanglit ining kalibutan magataliwan sa aton adlaw, mangin rasonable bala nga magplano sing kabuhi nga debotado sa sekular nga pag-uswag? (Mateo 24:34) Indi gid! Kag sing pat-od ining pagtamod magaapektar sa aton panimuot sa kalibutanon nga edukasyon, sa mga eskwelahan nga makatuon sing mataas halos imposible nga makalikaw nga madala sang nagapangibabaw nga huyog sang kalibutanon nga panghunahuna. Siempre, dapat himuon ang personal nga mga desisyon nahanungod sa edukasyon. (Galacia 6:5) Apang ang mga pamangkot subong sang masunod nagakabagay nga hunahunaon sing mapangamuyuon: Sa mga tinuig nga ginhinguyang sa unibersidad, nakahimu man bala ang mga estudyante nga ‘pangitaon anay ang Ginharian kag ang pagkamatarong ni Jehova’? Wala gid bala sila maapektohi sang mga teoriya kag mga pilosopiya nga nagapaluya sang matuod nga pagtuo? (Colosas 2:8) May maayo bala nga impluensia ang kalibutanon nga mga kaupdanan sa ila, ukon makahalalit ini sa espirituwal? (1 Corinto 15:33) Kag nahuptan gid bala sang madamung edukado nga mga indibiduwal ang pagpaubos?—Filipos 2:2, 3.

11. Walay sapayan sang kinaugali sang edukasyon sang isa ka tawo, ano nga bulig ang ginaaman diri sa pagtilaw sang mga motibo?

¹¹ Bangod sina, ang iban nga nagaeskwela sa trade schools sarang mahuyog katama sa isa ka propesyon amo kon ngaa wala na sila sing daku nga tion nga ihinguyang sa pag-alagad kay Jehova. Gani, ano man ang kinaugali sang edukasyon, daku ang nasandig sa mga motibo sang isa ka tawo. Ang handum bala para sa kahilwayan kag manggad amo ang nahauna nga butang? Magaresulta bala ang edukasyon sa hinali nga pagbuhin sa pag-alagad kay Jehova ukon magabulig bala ini sa pagsakdag sa imo sa balaan nga pag-alagad? Bisan isa ka Cristiano nga magapabilin nga walay dagta sang kalibutan, nagahimu ka bala sa baylo sing nagakaigo nga lugar para sa imo kaugalingon sa sining sistema sang mga butang ukon maukod ka gid bala sa pag-una sang intereses sang Ginharian sa kabuhi?

12. Ano ang nagapahulag sa iban nga mataas sing tinon-an nga mga indibiduwal nga batunon ang kamatuoran sang Ginharian?

¹² Nalipay kami nga ang iban sang mataas sing edukasyon nga mga indibiduwal nagbaton sang kamatuoran sang Ginharian. Apang wala nila ina paghimua bangod sang ila mataas nga edukasyon. Sa baylo, narealisar nila nga walay sapayan sang ila mataas nga edukasyon, ang kabuhi wala sing kahulugan bangod wala sila sing Dios kag sigurado nga paglaum. Karon nahibal-an nila nga ‘indi madamu nga maalam, gamhanan kag dungganon’ ang may kahamuot sang Dios. (1 Corinto 1:26-31) Apang, sila mismo nalipay nga sa katapusan, nasapwan nila ang matuod nga katuyoan sa kabuhi subong mga saksi ni Jehova.

“Sa mga Palangitan-an sang Pagkabuhi”

13. Ano ang ginapanugda sang Ikaduhang Timoteo 2:3, 4 nahanungod sa negosyo kag dedikado nga Cristiano?

¹³ Sanglit luyag naton nga magpabilin nga wala malatni sining kalibutan, ano dapat ang aton panimuot tuhoy sa mga paghimulat sa negosyo sini? Bueno, ginsilingan ni apostol Pablo si Timoteo: “Subong maayong soldado ni Cristo Jesus mag-ambit ka sang imo bahin sang pag-antus. Walay soldado nga yara sa pag-alagad nga nagapasaw-id sa mga palangitan-an sang pagkabuhi, sanglit nga ang iya katuyoan amo ang pagpahamuot sa naglista sa iya subong soldado.” (2 Timoteo 2:3, 4) Ang mga Cristiano dapat magapangabudlay kag magahimu sing bunayag nga aman para sa ila kaugalingon kag sa ila mga pamilya. Apang indi bala kalatingalahan kon ang isa ka dedikado nga Cristiano pagapatuhoyan sing una subong ehekutibo sa negosyo sang sa isa ka ministro? Indi bala nga sia, una sa tanan, makilal-an subong manugbantala sang Ginharian kag “maayong soldado ni Cristo Jesus”?

14. Paano maaplikar ang Hebreo 13:18 sa aton mga transaksion sa negosyo?

¹⁴ Sa mga negosyo, nian, ang pag-usisa sa kaugalingon kinahanglan sa lainlain nga mga paagi. Una, ang kamatuoran nga mahimu kita makig-atubang sa makagud kalibutanon nga mga tawo wala nagahatag sing balibad agod adoptahon ang ila alisto, dibunayag nga mga buhat kag ang ila malaw-ay nga hambal. Sa baylo, dapat kita “magginawi sang aton kaugalingon sing bunayag sa tanan nga butang.” (Hebreo 13:18) Matuod, mahimu nga indi kita makabaton sing balus nga pagtrato gikan sa batinggilan nga mga negsoyante sining kalibutan. Apang mahimu kita makasiguro nga pakamaayuhon kita ni Jehova bangod sang aton bunayag nga dalanon, kag isa ini ka paagi nga aton “mapunihan ang panudlo sang aton Manluluwas, ang Dios.”—Tito 2:9, 10.

15. Anong Makasulatanhon nga laygay ang ginhatag nahanungod sa personal nga negosyo?

¹⁵ Subong yadtong nagahandum nga magpabilin nga wala malatni sining kalibutan, dapat kita “magbuhat sang maayo ayon sa tanan nga tawo, kag labi na gid sa mga taga-panimalay sang pagtuo.” (Galacia 6:10) Apang indi naton ini mahimu kon mahamkunon nga aton ginapadaku ang pila ka personal nga negosyo paagi sa paggamit sang aton kasuod sa katawhan sang Dios agod ganansiahan sila. Sa pagkamatuod, ang mga Cristiando dapat ‘maglakat subong nga mga maalam.’ (Efeso 5:15) Ang kamatuoran nga ang isa nga ginatawag nga utod magapalapit sa aton nga may magmanggaranon dayon nga plano indi dapat mangin rason para sa aton nga mahaylo gilayon agod ipaambit ang aton kuarta. Bangod sang maayong rason nga ang organisasyon sang Dios ginapaandaman kon kaisa batok sadtong nagaangkon nga aton espirituwal nga mga kautoran, apang nagapaninguha nga bentahaan sing dinagakaigo ang “karnero” ni Jehova.

Indi Kalibutanon sa Tagsa ka Paagi

16. Ano ang pila ka paagi nga mapasundayag naton nga nagapabilin kita nga “walay dagta sa kalibutan”?

¹⁶ Sing hayag, indi namon masambit ang tagsa ka paagi diin ipasundayag sang mga Saksi ni Jehva nga nagapabilin sila nga “walay dagta sang kalibutan.” Apang sa pagkamatuod, ang sobra nga pagpaduyog sa alkoholiko nga mga ilimnon, pagginansal sa mapaindis-indison katama ukon masingki nga hampang, paghinguyang sing inoras nga nagatan-aw sing sine ukon mga programa sa telebisyon nga nagapasalida sang mga buyong, manugpatay, kag iban pa imoral nga mga karakter, pagbasa sang naagsikan sang sekso nga mga libro kag paghampang sang masingki nga mga hampang sa video indi mga paagi agod magpabilin nga walay dagta sining kalibutan. (1 Corinto 6:9, 10; 15:33; Galacia 5:19-26; 1 Pedro 4:3) Ginapaabot ni Jehova sa iya mga saksi nga likawan ang pagpasobra, imoralidad kag kasingki sining kalibutan. Gani indi naton dapat pagtinguhaon ang paghibalo ukon pag-eksperiensia sa mga kalautan sang kalibutan kundi mangin walay hinalung-ong nga “mga lapsag kon tuhoy sa kalainan.”—1 Corinto 14:20; ipaanggid ang 1 Juan 3:2, 3.

17. Paano makaapekto sa aton kaangtanan sa iban ang aton pagkawalay dagta sang kalibutan?

¹⁷ Ang pagkawalay dagta sining kalibutan nagahilabot sa kada bahin sang aton kabuhi kag pat-od nga nagahilabot sa aton kaangtanan sa iban. Samtang ang mga batasan subong sang sobra nga pagkahisa, pagbinahinbahin, pagtinikal kag pagbutig kinaaandan katama sa sining kalibutan, wala ini sing duog sa tunga naton, kay si Santiago nagsulat: “Sin-o bala ang maalam kag mahangpunon sa inyo? Magpakita sia sa iya maayong kabuhi sang iya mga binuhatan sa pagkamapinaubuson sang kaalam. Apang kon kamo may mapait nga kahisa kag maiyaiyahon nga handum sa inyo tagipusuon, dili magpabugal kag dili magbutig batok sa kamatayon. Ining kaalam wala magikan sa hitaas, kundi dutan-on, sinapatsapaton, yawan-on. Kag kon diin ang kahisa kag maiyaiyahon nga handum, didto ang kagamo kag tagsa ka malaut nga buhat.” (Santiago 3:13-16) Daw ano ka importante nga ipadayag ang “pagkamapinaubuson sang kaalam” kag ‘tinguhaon ang pagpakighidait sa tanan nga tawo’! (Hebreo 12:14) Sa pagkamatuod, subong matutom nga mga saksi ni Jehova, indi naton mapahanugotan ang personal lamang nga diperensya nga magguba sang aton kaangtanan upod sa aton mga kautoran nga lalaki kag babayi sa pagtuo. Sa baylo, dapat kita ‘magpinaumuray kag magpinatawaray, subong nga si Jehova nagpatawad sa aton.’ (Colosas 3:13) Indi ina ang kinaandan nga paagi sang kalibutan sa pagpakig-angot sa iban, kundi amo ini ang diosnon nga paagi.

18. Labi na nga makita ang aton pagkanahamulag sa kalibutan kon himuon naton ang ano?

¹⁸ Ang pagtinguha nga makighidait upod sa mga tawo sa sulod kag sa guwa sang kongregasyon isa ka importante nga paagi agod ipakita nga wala kita madagtai sining kalibutan. Apang ang aton pagkanahamulag sa sini makit-an kon ginahuptan naton ang aton tindog subong maisog nga mga soldado ni Jesucristo, bug-os nga napanaptan sang espirituwal nga hinganib gikan sa Dios kag “nasukluban ang [aton] mga tiil sang pangaman sang maayong balita sang paghidait.” (Efeso 6:11-18) Madamu gihapon ang ginagutom kag ginauhaw sang nagahatag-kabuhi nga mensahe sang Ginharian. Gani, kabay nga gamiton naton sing dimahamkunon ang aton mga pagkabutang, mga ikasarang kag kusog sa dakung hilikuton nga pagbantala sang “maayong balita” sa malip-ot na lang nga tion nga nabilin tubtob ining sistema matapos.—Mateo 24:14.

19. Ano ang paabuton naton nga himuon ni Satanas sa sining madasig magligad nga katapusan nga mga adlaw, apang ano ang madinalag-on nga himuon naton paagi sa balaan nga bulig?

¹⁹ Sa sining madasig magligad nga katapusan nga mga adlaw, si Satanas, ang dios sining kalibutan, magahimu sing dugang nga pagsalakay sa aton subong matutom nga mga saksi ni Jehova. Ang Yawa, sa iya katapusan nga panikasog nga patalikdon kita gikan sa balaan nga pag-alagad sa aton Dios, magapailaila sang materyal nga manggad sang kalibutan, sang iya malaw-ay nga mga palaguwaon, sang iya mataas nga edukasyon kag madamu pa. Apang paagi sa padayon nga balaan nga bulig magamadinalag-on kita sa pagpabilin nga “walay dagta sa sining kalibutan” sa kadayawan sang aton balaan nga Dios, si Jehova.

Paano Mo Sabton?

◻ Suno sa Santiago 1:27, ano ang pila ka kinahanglanon sang matuod nga pagsimba?

◻ Ano ang pila ka paagi agod magpabilin nga wala malatni sining kalibutan?

◻ Ano ang epekto sang kamatuoran nga ining kalibutan magataliwan sa aton pagtamod tuhoy sa mataas nga edukasyon?

◻ Tuhoy sa negosyo, sa anong paagi kinahanglan ang pag-usisa sa kaugalingon?

◻ Paano mapakita sang mga Saksi ni Jehova nga sila “walay dagta sang kalibutan” kon tuhoy sa ila pagginawi kag kaangtanan sa iban?

[Piktyur sa pahina 15]

Subong neutral nga mga Cristiano, ginalikawan sang mga Saksi ni Jehova ang kasingki sang kalibutan

[Piktyur sa pahina 18]

Ginapaabot ni Jehova ang iya mga saksi nga magwalay dagta sa pagpatuyang, imoralidad kag kasingki