nga mga eskwelahan sa pagtuon? Mataas bala ang iya tinon-an? Apang sang magbantala sia, ano ang reaksion sang iya kaugalingon nga katawhan? Ginasugiran kita ni Mateo: “Natingala sila kag nagpamangkot: ‘Diin bala nagkuha ining tawo sining kaalam kag sining mga buhat nga gamhanan?’ “Matuod, si Jesus himpit, ang Anak sang Dios. Apang ang iya mga paagi praktikal man para sa iya “wala matudloi” nga mga disipulo nga magailog sa iya. Ano nga reaksion ang ila ginpukaw, bisan sa tunga sang ila relihiosong mga kaaway? “Karon sang nakita nila ang kasidla ni Pedro kag ni Juan, kag nahantupan nga sila walay tinon-an, dimaalam nga mga tawo, natingala sila. Kag ginkilala nila nga nakapakig-upod sila kay Jesus.”—Mateo 13:54; Binuhatan 4:13.

⁹ Apang, diin ginkuha ni Jesus ang tanan nga iya gintudlo? Ngaa madinalag-on gid sia katama sa iya ministeryo? Sia bala, kaangay sang modernong manugwali sa TV, nagagamit sang sobra nga emosyon agod pukawon ang iya tagpalamati? Wala. Ang sadsaran ni Jesus amo ang pagkasimple mismo—ginhambal niya ang pamulong sa kinaandan nga mga tawo, alisto sia sa ila espirituwal nga mga kinahanglanon kag, mas importante sa tanan, nahibal-an ni Jesus nga ginasakdag sia sang iya Amay. Gin-athag niya ini sang ginpahibalo niya ang iya ministeryal nga komisyon sa sinagoga sa iya tumandok nga banwa, ang Nasaret sa Galilea. Nagbasa sia gikan sa linukot ni manalagna Isaias: “‘Ang espiritu ni Jehova yari sa akon, bangod nga ginhaplas niya ako sa pagwali sang maayong balita sa mga imol, ginpadala niya ako sa pagbantala sing pagbuhi sa mga bihag kag sa pagpasag-uli sang itololok sa mga bulag, sa paghilway sang mga ginpigus, sa pagbantala sang tuig nga nahamut-an ni Jehova.’ . . . Kag nagsugod sia sa pagsiling sa ila: ‘Karon natuman ining Kasulatan sa inyo mga igdulungog.’”—Lucas 4:16-21.

10, 11. (a) Paano naton dapat batyagon ang aton ministeryo? (b) Paano nagsabat si Pablo?

¹⁰ Karon ginasakdag man kita sa aton ministeryo—ni Jehova nga Dios, ang Soberanong Ginuo sang uniberso. Ginabantala naton ang iya mensahe, ang iya kaalam. Ginapasad naton ang aton kaugalingon sa iya Pulong kag hilway nga ginagamit naton ini sa aton mga paghambalanay. Busa, magamasibud bala kita tuhoy sa pagbantala bisan sa may tinon-an ukon mas manggaranon nga tawo?

¹¹ Si Pablo nagsabat: “Diin bala ang maalam? Diin bala ang escriba? Diin bala ang manugbais sining sistema sang mga butang? Wala bala pagpakabuanga sang Dios ang kaalam sang maalam? . . . Kay tan-awa ang pagtawag sa inyo, mga kautoran, indi madamu sa inyo ang maalam suno sa kalibutan nga mga talaksan, indi madamu ang mga gamhanan, indi madamu ang mga dungganon; kundi ginpili sang Dios ang buangbuang sang kalibutan sa pagpakahuya sang maalam; ginpili sang Dios ang kubos kag talamayon sa kalibutan, bisan ang mga butang nga indi amo, sa pagpakawalay pulos sang mga butang nga amo, agod nga walay tawo nga magpabugal sa atubangan sang Dios.”—1 Corinto 1:18-29.

12. Gikan sa ano naghalin ang kadalag-an sa aton ministeryo? (Santiago 4:8)

¹² Ang kadalag-an sa ministeryo wala maghalin sa aton edukasyon ukon katigulangan. Naghalin ini sa mensahe mismo sang Ginharian nga nagatandog sa mabinatunon nga kuwerdas sang tagipusuon sang tawo nga nabalaka sa espiritu nga kinahanglanon. Ang isa pa ka butang amo ang maayong kabubut-on ni Jehova sa sina nga tawo, kay subong sang ginsiling ni Jesus: “Wala sing tawo nga makakadto sa akon, luwas sa Amay, nga nagpadala sa akon, magapapalapit sa iya.”—Juan 6:44.

13. (a) Paano naghulag sanday Pablo kag Bernabe sa pagpamatok? (b) Paano kita pirme magkalipay sa ministeryo?

¹³ Busa, nagasalig sa pagsakdag ni Jehova, mahimu naton ang aton ministeryo upod ang pagtuo kaangay kanday Pablo kag Bernabe sang nahaunang siglo. Sang magbantala sila sa Iconio, ang ila ministeryo nagtuga sing daku nga pagbinahinbahin sa opinyon kag pila ka pagpamatok. Nagpaluya bala ina sa ila? Ang kasaysayan ni Lucas nagasugid sa aton: “Nagpabilin sila sing malawig nga tion didto nga nagapamulong sing masidla nga kay Jehova, nga nagsaksi sa pulong sang iya dibagay nga kaluoy nga nagatugot nga himuon sang ila mga kamut ang mga tanda kag kalatingalahan.” Kon may yara man kita positibo nga panimuot sa mga tawo sa aton teritoryo, kag nagatugyan sang mga resulta sa kamut ni Jehova, ang ministeryo pirme nga mangin kalipay, indi lulan.—Binuhatan 14:1-3; Santiago 1:2, 3.

Kon Ano ang Reaksion sang mga Tawo

14. Ano ang reaksion sang mga tawo sa pagbantala ni Pablo?

¹⁴ Sa ila pagbantala, wala pirme si Jesus ukon si Pablo nakatigayon sing kalahamut-an nga reaksion. Halimbawa, ano ang reaksion sang publiko sang magbantala si Pablo sa Atenas? Ang kasaysayan nagasugid sa aton: “Ang pila man sang Epicureo kag Estoico nga mga pilosopo nagpakigbais sa iya kag ang iban nagsiling: ‘Ano bala ang buot nga isiling sining boraan?’ Ang iban nagsiling: ‘Daw sa manugbantala sia sang dumuluong nga mga dios.’ Bangod nga ginwali niya si Jesus kag ang pagkabanhaw. Kag ginkaptan nila sia kag gindala sia sa Areopago nga nagasiling: ‘Mapakilala mo bala sa amon kon ano ining bag-o nga pagtulon-an nga ginapamulong mo? Kay nagadala ka sing kalamag-ohan nga mga butang sa amon mga igdulungog.’”—Binuhatan 17:18-20

15. Ano ang reaksion sang mga tawo sa inyo ministeryo? Apang ano ang dapat naton nga dumdumon?

¹⁵ Dapat naton hibaluon nga ang aton mensahe kag bersion sini nga ginsulat sang media kag mga manugpamatok daw kalamag-ohan man sa modernong publiko. Subong resulta, madamung tawo, nga nadala sang mga kinunokuno, nagahukom nga daan sang bagay kag nagasikway sa aton nga wala anay nagapamati. Ang iban, kaangay sang mga taga-Atenas, nagbaton sang dugang nga impormasyon antes sila mamat-od. Siempre pa, kon mamati sila mahimu yagutaon gihapon nila ang paglaum sang Ginharian nga daw indi mapatihan. Apang, dumduma, ginasikway nila si Cristo kag ang iya mensahe, indi ikaw.—Binuhatan 17:32-34; Mateo 12:30.

Gikan sa mga Dumuluong Pakadto sa mga Abyan

16. (a) Ano ang reaksion naton kon may magduaw nga mga dumuluong sa aton balay? (b) Ano ang mahimu sang aton introduksion?

¹⁶ Ano ang balatyagon mo kon may dumuluong nga magaduaw sa imo balay? Anong mga pamangkot ang mahimu hunahunaon mo? Ayhan, Sin-o sila? Ano ang kinahanglan nila? Gamuhon bala nila ako? Kon aton ginapakilala ang aton kaugalingon subong mga ministro sa balay sang isa ka tawo, dapat naton panumdumon ina. Busa ang aton introduksion dapat nga magapatawhay sang ila mga hunahuna sa sinang mga pamangkot. Apang paano? Bueno, ano ang ginapanugda ni Jesus subong introduksion? Nagsiling sia: “Sa nagasulod kamo sa balay, tamyawa sila; kag kon ang balay takus, ang inyo paghidait magdangat sa iya; apang kon indi takus, pabalika sa inyo ang inyo paghidait.”—Mateo 10:12, 13.

17. Paano naton mapatawhay ang isa ka tawo sa aton introduksion?

¹⁷ “Ang inyo paghidait magdangat sa iya.” Ano ang kahulugan sina? Nga sa aton ministeryo ginapangabay naton nga ang aton paghidait magdangat kuntani sa tagsa ka tawo kag panimalay. Busa ang aton nagabukas nga pinamulong dapat magapakita nga kita mahigugmaon sa paghidait nga mga ministro sang Dios. Bisan tubtob karon ginagamit sang mga Judiyo kag mga Muslim ang panamyaw “Ang paghidait mangin sa inyo” ukon “Paghidait” (“Shalom aleichem” ukon “Shalom” sa Hebreo, kag “Assalām ‘alaikum” ukon “Salām,” sa Arabiko). Siempre pa, ang aton panamyaw magakalainlain sa nanuhaytuhay nga pungsod suno sa lokal nga kustombre. Apang ang tulumuron pareho—agod patawhayon ang tawo para pamatian ang mensahe sang Ginharian. Ang paghatag anay sang imo ngalan, kag ang pagsambit kon diin ka nagaistar, mahimu nga makabulig. Nagapakita ini nga wala ikaw sing ginatago. Ang imo tuyo kag kabunayag makita sang tanan. Sa amo ginahimu mo ang ginlaygay ni Pablo: “Tan-awa nga ang imo dayag nga batasan indi pagmulayon. Kon tuhoy sa responsabilidad, magpakighidait sa tanantanan.”—Roma 12:17, 18, Phillips.

18. Anong talaksan ang dapat naton pirme himuon sa aton ministeryo?

¹⁸ Nagaministeryo man kita sa pamalybalay ukon sa kalye, ginatan-aw kita sang publiko. Ang aton paghambalanay kag pamatasan dapat pirme nga indi mapasipalahan ukon matamay. Walay sapayan, samtang ang aton presentasyon malum-ok kag mahidaiton, indi ini dapat daw nagapangayo sing pasaylo. Wala kita mahuya nga mangin publiko nga mga ministro sang Dios.—Marcos 8:38.

19, 20. (a) Paano mapalapitan sang isa ang mahuluy-on kaayo nga mga tawo sa dalan? (b) Ngaa epektibo si Jesus sa dipormal nga pagpalapit?

¹⁹ Sa iban nga pungsod ang mga tawo hipuson kag konserbatibo. Nahuya ang iban kon palapitan sila sa dalan sang isa ka tawo nga nagatanyag sang mga magasin. Kon amo sini, ngaa dili paggamiton ang labi ka mainandamon nga paagi sa pagpalapit? Ang isa mataktikanhon nga makasugod sa paghambalanay upod sa isa nga wala nagadalidali kag nian kuhaon ang literatura sa Biblia sa natural nga paagi.

²⁰ Si Jesus naanad gid sa amo man nga sahi sang pagbantala. Sanglit ang mga Samaritano kag mga babayi kinaandan nga ginayaguta sang mga Judiyo, si Jesus mainandamon sa pagpalapit sa imoral nga Samaritana sa tuboran ni Jacob. Ang iya pagpakigsugilanon isa ka modelo para sa dipormal kag pagpanaksi sa dalan. Maayo man ini nga halimbawa sang mainawaon kag maayo nga panudlo.—Juan 4:5-30.

21. Anong iban pa importante nga butang ang gin-ilustrar sang ministeryo ni Pablo?

²¹ Isa pa ka importante nga butang ang pagabinagbinagon samtang ginapakilala ang maayong balita sang Ginharian. Si Pablo maayo sa sini. Tan-awa kon mamutikan mo ini gikan sa pila sang iya mga introduksion nga masapwan sa Binuhatan 13:16-20; 17:22 kag 22:1-3. Talupangda nga sa kada okasyon gintinguhaan niya ang kinaandan sa iya tagpalamati. Ginkilala niya sila kag ang ila ginhalinan. Ang resulta amo nga namati sila bisan pa nga wala mag-ugyon sa iya. Sa amo man nga paagi ang aton introduksion makabihag sang balatyagon sang tawo, ang punto nga magapakilala sa aton kag sa tagbalay. Ayhan natalupangdan mo nga may kabataan sa balay, kag ikaw, man, isa ka ginikanan. Nian may butang kamo nga magkapareho, isa ka mainabyanon nga rason. May butang kamo nga mahambalan nga magadul-ong sa mensahe sang Ginharian!—Mateo 18:1-6.

22. Anong mga pamangkot ang nagakinahanglan karon sang sabat?

²² Apang ining mga panugda panugod lamang. Anong dugang nga tikang ang kinahanglan agod makapatubas, sa ulihi, sing isa pa ka disipulo? Huo, ano pa ang kinahanglan agod buligan ang isa nga makatigayon sing kaangtanan sa Dios paagi kay Cristo? Anong kinaiya ang magahimu sang imo ministeryo nga mas epektibo?

Paano Mo Sabton?

◻ Ano ang pila ka butang nga nadalahig sa pagbaton sang isa sing mensahe sang Ginharian?

◻ Paano ang pagkamahuluy-on kag pagkabalaka sa kaugalingon malandas sa ministeryo?

◻ Ano dapat ang tuyo sang aton introduksion sa pag-alagad sa latagon?

◻ Paano kita mabuligan sang halimbawa ni Jesus kag ni Pablo sa pagpalapit naton sa mga tawo?

Epektibo nga Ministeryo nga Nagadul-ong sa Dugang nga mga Disipulo

Amo ini ang iya mga dulot: ang iban mangin . . . ebanghelista, ang iban mga pastor kag mga manunudlo, agod sangkapan ang katawhan sang Dios nga magpangabudlay sa pag-alagad sa iya.”—EFESO 4:11, 12, The New English Bible.

1. Ano ang balatyagon ni Cristo sa mga tawo?

SI Cristo Jesus indi ermitanyo. Ang iya ministeryo ginbagay sing bug-os sa mga tawo. Sa apat ka kasaysayan sang Ebanghelyo si Jesus halos pirme nadalahig sa mga tawo. Sadtong nagalakbay sia nakita niya ang ila matuod nga kahimtangan kag naluoy gid sia sa ila. Kon isa ikaw ka Cristianong ministro, naluoy ka bala sa mga tawo nga imo nasugata?—Mateo 9:35, 36.

2. Paano ginailog sang mga Saksi ni Jehova ang halimbawa ni Jesus?

² Ang Cristianong ministeryo karon dapat man magdalahig sa mga tawo. Bangod nabalaka sa sinang katunayan, ang mga Saksi ni Jehova may mahisantuon nga pagpalapit sa pag-alagad nila sa Dios. Sa bug-os nga palibot sang kalibutan makit-an sila nga nagapakighambal sa mga tawo—sa mga dalan, sa mga ganhaan, sa masaku nga shopping centers, sa mga bus, sa mga estasyonan sang subway kag tren, sa pabrika, opisina kag mga distrito sang palatikangan. Bisan diin makita ang mga tawo, didto ang mga Saksi nga nagaalagad subong mga ebanghelista. Ngaa? Bangod ang tinaga nga “pag-ebanghelyo” naghalin sa Griegong tinga nga euaggelion, nga nagakahulugan “maayong balita.” Kaangay ni Cristo, ang kada Cristianong saksi ni Jehova dapat mangin ministro sang maayong balita, ebanghelista. Busa ang kada saksi dapat man madalahig sa mga tawo.—2 Timoteo 4:5; Efeso 4:11, 12.

3. Ano ang pinakaepektibo nga paagi sang Cristianong ministeryo?

³ Paano himuon ining hilikuton sa pag-ebanghelyo sing epektibo? Ang pagpalapit sa radyo kag TV nga ginagamit sang tuman kadamu nga mga relihion amo bala ang matuod nga sabat? Bueno, pamangkota ang imo kaugalingon, Masabat bala gilayon sang radyo kag TV ang imo pamangkot? Indi—ini, kon hambalon pa, dipersonal nga paagi sang komunikasyon. Ang pinakaepektibo nga ministeryo amo gihapon ang ginhimu anay ni Jesus kag sang iya mga disipulo, ang pagpakig-atubang sa mga nagapangita sa kamatuoran. Apang nagakinahanglan ini sing tion kag panikasog, nga ginpakita ni Pablo sa isa ka simple nga ilustrasyon: “Ako nagtanum, si Apolos nagbunyag, apang ang Dios nagpatubo; gani ang nagatanum ukon ang nagabunyag indi sia bisan ano, kundi ang Dios lamang nga nagapatubo.”—1 Corinto 3:5-7.

4. Anong tatlo ka halintang ang nadalahig sa epektibo nga ministeryo?

⁴ Ining mga pinamulong nagapakita sang tatlo ka halintang sang Cristianong ministeryo—pagtanum, pagpalambo kag pag-ani. Paano? Una amo ang pagtanum, ang nahauna nga pagkahibalo sang maayong balita sang Ginharian. Dayon amo ang pagpalambo, lakip ang pagbunyag sa kon ano ang gintanum. Paano ina ginahimu? Paagi sa dugang nga pagpakighambal agod masabat ang mga pamangkot kag malubad ang mga duhaduha. Masami ini nagadul-ong sa tayuyon nga pagtuon sang Biblia nga nagatanum sing tudok sang kamatuoran sang Biblia sa hunahuna kag tagipusuon sang tawo; paagi sa pagpakamaayo sang Dios, ang pagtubo nagakatabo. Ang katapusan nga resulta amo ang isa pa ka aktibo nga disipulo ni Cristo Jesus, isa pa ka ministro. Karon paano kita tanan subong mga ministro makatigayon sing malipayon nga pagpakamaayo nga makaani sing disipulo?

5. Ano ang makabulig sa aton agod mangin epektibo nga mga ministro?

⁵ Subong sang ginsambit sang nagligad nga artikulo, gintudloan ni Jesus ang iya mga disipulo sang praktikal nga paagi nga mahimu ang ila ministeryo. Kag si Pablo naghambal nahanungod sa iya “mga paagi sa kay Cristo.” (1 Corinto 4:17) Ang madamung kongregasyon nga nabuligan niya tukod sa palibot sang Asia Minor kag Gresya maathag nga pamatuod sang iya kadalag-an. Natuptupan na naton ang iban sang iya (kag ni Jesus) mga paagi, apang may dugang pa bala nga sarang magamit sing epektibo karon?

Ano ang Sadsaran? Kag ang Mensahe?

6. Ano dapat ang mangin sadsaran sang aton ministeryo?

⁶ Sa ano dapat ipasad ang Cristianong mensahe? Sa kaalam kag pilosopiya bala sang tawo? Ang sulat ni Pablo kay Timoteo nagahatag sing maathag nga sabat: “Apang, padayon ka sa naton-an mo kag nasaligan sing malig-on, nga nakahibalo . . . nga kutob sa imo pagkabata nahibaloan mo ang balaan nga kasulatan, nga makapaalam sa imo sa kaluwasan paagi sa pagtuo kay Cristo Jesus. Ang bug-os nga Kasulatan inspirado sang Dios kag mapuslanon sa pagpanudlo.” Sing maathag, ang Biblia, ang Pulong sang Dios, dapat nga amo ang mangin sadsaran sang aton ministeryo.—2 Timoteo 3:14-17.

7, 8. Paano sanday Jesus kag Pablo nagpahamtang sing halimbawa sa paggamit sang kasulatan?

⁷ Sa sini nga bahin si Cristo Jesus nagpahamtang sing pagpanguna—pirme niya ginkutlo ang mga Kasulatan; amo man si apostol Pablo. Halimbawa, nagkadto bala sia sa Tesalonica nga nagatudlo sang Griegong pilosopiya? Wala, kay ang kasaysayan nagasugid sa aton: “Kag si Pablo suno sa iya kinabatasan nagsulod, kag sa tatlo ka adlaw nga inugpahuway nagpakigbais sa ila gikan sa mga Kasulatan, nga nagasaysay kag nagapahayag nga kinahanglan ang Cristo mag-antus kag mabanhaw.”—Binuhatan 17:1-3.

⁸ Ano ang resulta? “Ang iban sa ila nangin mga tumuluo.” Busa, nagailog sang paagi ni Pablo, ang aton pagbantala karon dapat nga napasad sa Pulong sang Dios. Amo kon ngaa may yara kita ginapanugda nga tema sa Biblia para hambalan sa aton ministeryo. Sa sinang paagi ang kamatuoran sang Pulong sang Dios makatandog sa nagakaigo nga kuwerdas sa mga nabalaka sa ila espirituwal nga kinahanglanon.—Binuhatan 17:4.

9, 10. (a) Ano dapat ang mangin tema sang aton pagbantala karon? (b) Maghatag sing mga halimbawa sang ministeryo ni Pablo?

⁹ Karon ang masunod nga pamangkot amo: Ano nga mensahe ang aton ibantala? Bueno, ano ang tema sang ministeryo ni Cristo? Alisto gid si Jesus sa iya komisyon, kay nagsiling sia: “Kinahanglan ako magwali sang maayong balita sang ginharian sang Dios sa iban man nga mga siudad, kay sa sining katuyoan ginpadala ako.” Nagapatuhoy sa katapusan nga mga adlaw sang aton karon nga sistema, nagsiling sia: “Ining maayong balita sang ginharian, ibantala sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.”—Lucas 4:43; Mateo 24:14.

¹⁰ Ini man nga pagpadaku masapwan sa pagbantala ni Pablo. Halimbawa, sa mga Judiyo sa sinagoga ‘nagpamulong sia nga may kasidla sa sulod sang tatlo ka bulan, nga nagapakigbais kag nagapatalupangod nahanungod sa ginharian sang Dios.’ Busa “ang ginharian sang Dios” dapat nga amo ang sadsaran sang Cristianong ministeryo karon.—Binuhatan 19:8; 28:23, 31.

Ikaw bala Nagaatake ukon Nagaganyat?

11. Ano sing masami ang reaksion sang mga tawo kon atubang ang isa ka Saksi, kag paano naton ina malandas?

¹¹ Sang nahaunang siglo, ang mga tawo nabahinabahin bangod sang relihion, rasa kag nasyonalidad subong nga amo karon. (Binuhatan 2:7-11) Nagakahulugan ina nga kalabanan nga tawo may ila kaugalingon ginapatihan na nga mga ideya kon nahanungod sa relihion. Sing masami nagabatyag sila nga ginapahog kag mapangapinon kon makapakigsugilanon sa isa ka Saksi. Paano naton ina mabaylohan? Paagi sa paggamit sing kalulo, taktika kag pagkamasibuon.

12, 13. Paano naghambal si Pablo sa mga nagasimba sa diosdios sa Atenas? Ano ang ila reaksion?

¹² Talupangda kon paano gin-atubang ni Pablo ang kahimtangan subong sang nagasimba sa diosdios nga Atenas. Ang iya una nga reaksion sang makita ang tuman kadamu nga mga diosdios makapaakig. Sang magtindog sia agod maghambal sa Areopago, gilayon bala niya nga gin-atake ang ila pagsimba sa diosdios? Ang iya introduksion amo: “Mga tawo nga taga-Atenas, sa tanan nga butang ginahantup ko nga kamo masinimbahon gid. Kay sang pagligad ko, kag pagpanilag sang mga butang nga inyo ginasimba, nakita ko man ang halaran nga nasulatan sini ‘Sa Dios nga Wala Makilal-i.’ Busa ang ginasimba ninyo nga wala makilal-i, ini ginabantala ko sa inyo.”—Binuhatan 17:16-23.

¹³ Ginpahilayo bala ni Pablo ang iya tumalambong sa sinang nagabukas nga pinamulong? Wala gid. Ang iya pagpalapit mataktikanhon, indi dogmatiko. Wala sila pagpakamalauta, bisan pa nga sa pagtamod sang Dios ang ila pagsimba wala sing pulos. Yadto sia didto agod ibantala ang mensahe sang Ginharian, indi agod atakehon sila. Ginkilala niya ang ila makusog nga pagkarelihioso kag gingamit ini subong sadsaran agod pahulagon sila pakadto sa iya tema nahanungod sa matuod nga Dios kag sa Iya tiglawas, ang ginbanhaw nga si Jesus. Bueno, bisan ang iban sa ila nag-uligyat, ang “iban” nagsiling: ‘Mamati pa liwat kami sa imo nahanungod sini.’” Huo, gin-agda sia nga magbalik-duaw!—Binuhatan 17:22-32.

14. Paano naton maaplikar ang halimbawa ni Pablo sa aton ministeryo?

¹⁴ Paano naton maaplikar ini nga paagi sa aton ministeryo karon? Una, dapat kita mangin alisto sa pagpanilag sa naguwa nga tanda sang relihioso nga pagtamod sang isa ka tawo—ayhan paagi sa isa relihioso nga butang nga iya ginasuksuk ukon paagi sa makita sa ganhaan ukon pasilyo sang balay. Sa amo, subong sang ginhimu ni Pablo, masami kita nga may maayong ideya nahanungod sa relihioso nga pagtamod sang isa ka tawo. Nagahatag ini sa aton sing tuytuy para sa isa ka mainabyanon, nagapukaw-interes apang indi kontrobersial nga introduksion. Dumduma ginaduaw naton ang isa ka tawo una agod ipakighambal ang nahanungod sa Ginharian sang Dios—indi agod madalahig dayon sa pagdiskusyon sa doktrina. Luyag naton daugon ang mga tawo, indi baison.—Ipaanggid ang 2 Timoteo 2:23-26.

15. Anong iban pa maayong mga leksion ang maton-an naton gikan sa ministeryo ni Jesus? (Lucas 10:38-42)

¹⁵ Ano pa ang maton-an naton gikan sa halimbawa ni Cristo? Kon usisaon naton ang iya ministeryo makita naton ang iya kombiksion kag pagkasimple. Wala sia nahuya sa bisan anong kahimtangan kundi naghambal tungod sa Ginharian sang Dios sa tanan nga sahi sang sirkunstansia, maayo man ukon malain. Sarang sia makabantala sing suod sa isa ka balay ukon makatindog sa atubangan sang isa ka kadam-an kag mamulongpulong sing sermon—nga wala sing nota, Biblia ukon mikropono! Mainawaon man sia. Ang mga imol nakabatyag nga sarang sila makapalapit sa iya. Naghambal sia sa ila panghambal nahanungod sa ulumhan kag patubas, nahanungod sa lambat kag pagpangisda. Ang iya mga ilustrasyon praktikal bisan pa nga ang mga kahulugan sini madalom. Ginapadayag bala naton ina man nga matahom nga mga kinaiya sa aton ministeryo?—Mateo 4:18-25; 13:1-33; Lucas 5:1-3.

Kon Paano Lab-uton ang Tagipusuon

16. Ngaa dapat kita mangin kalipikado nga mga manunudlo?

¹⁶ Sing normal nagakinahanglan sing tion kag maayo nga pagtuon agod makombinse ang isa sang mensahe sang Biblia nahanungod sa Ginharian sang Dios. Amo ina kon ngaa may kahimusan kita tuhoy sa tayuyon nga pagtuon sang Biblia sa balay, nga walay bayad ukon obligasyon, upod kay bisan sin-o nga maluyag usisaon ang mga saad sang Dios paagi kay Cristo. Ina nga mga pagtuon nagadugay sing malawig kag nagatuptup sila sing madamung mga topiko kag mga pamangkot. Nagakahulugan gid ini nga dapat kita mangin kalipikado nga mga manunudlo. Apang ano gid ang importansia sang pagpanudlo?—1 Timoteo 4:16.

17. Ano ang isa ka metodo nga gingamit ni Jesus agod lab-uton ang tagipusuon?

¹⁷ Sa liwat makadto kita kay Jesus para sa sabat. Paano sia nagapanudlo? Usisaa, palihug, ang masunod nga mga teksto kag tan-awa kon makilala-an mo ang simple nga sistema ni Jesus sa pagtudlo sa iban: Lucas 6:9, 32-34, 39-42. Ano ina? Namangkot sia sing makahalantup nga mga pakiana. Ngaa? Agod buligan ang iya tagpalamati nga mangatarungan kag usisaon ang ila kaugalingon sa kapawa sang iya mga panudlo. Paagi sa iya mga pamangkot mataktikanhon nga ginlab-ot niya ang ila mga tagipusuon. Dapat nila ipakita kon bala luyag gid nila nga mangin iya mga sumulunod ukon kon bala ang ila motibo sa pagpamati salimpapaw lamang.—Mateo 13:10-17; Marcos 8:34-38.

18. (a) Ngaa masami ginagamit sang mga Saksi ni Jehova ang mga pamangkot sa ila mga publikasyon? (b) Anong talaksan ang indi naton dapat gamiton sing sobra sa pagtudlo sa iban?

¹⁸ Halos ang tanan nga mga bulig sa pagtuon sa Biblia nga ginagamit sang mga Saksi ni Jehova sa ila pagministeryo may mga pamangkot para sa kada parapo sang paathag sa teksto. Bulig ini sa pagpanudlo nga nagabulig sadtong nagatuon sa Biblia nga ipabutyag ang ila kaugalingon sa ila kaugalingon nga pamulong. Nian mangin maathag kon bala nahangpan ukon wala sang isa ang materyal. Apang, bisan namangkot si Jesus sing mga pakiana sa madamung okasyon, wala gid niya ginhimu ini nga daw paktakon nga hampang paagi sa paghatag sang nahaunang tinaga ukon dinalan sang sabat. Nasapwan mo bala ang imo kaugalingon nga kon kaisa amo sina ang talaksan sang pagtudlo sa iban nga mga estudyante sang Biblia? Ngaa indi ina maayong paagi agod gamiton pirme? Bangod ang ihibalo nahanungod sa Dios kag kay Cristo nga nagadul-ong sa kaluwasan dapat nga napasad sa pangatarungan kag lohiko, indi sa pakotpakot lamang.—Juan 17:3; 1 Juan 5:20.

Kay Sin-o mga Disipulo?

19, 20. Ano nga pag-andam ang kinahanglan diri? Ngaa?

¹⁹ Kinahanglan ang pag-andam sa sining punto. Kon kita nagabantala kag nagatudlo sing epektibo sa mabungahon nga teritoryo, sa ulihi makapatubas kita sing mga disipulo. Apang kay sin-o sila mga disipulo? Dapat bala naton sila hunahunaon nga “akon karnero”? Kag pahanugotan bala naton ang aton kaugalingon subong mga ministro nga ibutang sa pedestal sang sobra nga pagdayaw? Talupangda kon ano ang reaksion nanday Pablo kag Bernabe sang gintratar sila sang katawhan sang Listra nga daw mga dios. Nagsinggit sila sing mabaskog nga tingog sa kadam-an: “Mga tawo, ngaa bala nagahimu kamo sini? Mga tawo man kami, nga kaangay sing kinaugali sa inyo, kag nagadala sa inyo sang maayong balita, nga magliso kamo gikan sa sining walay pulos nga mga butang pa Dios nga buhi.”—Binuhatan 14:14, 15.

²⁰ Wala pagtinguhai nanday Pablo kag Bernabe nga hatagan sing igtalupangod ang ila kaugalingon. Ginlaygayan pa gani ni Pablo ang mga Cristiano nga ilugon sia, subong nga sia nag-ilog kay Cristo, indi niya sila luyag nga mangin iya mga sumulunod. Ang aton ginahimu nga ministeryo dapat pirme nga sa himaya sang Dios, indi sang mga tawo.—1 Corinto 3:6, 7; 11:1.

21. Ngaa ang mga disipulo nangin mga ministro man?

²¹ Sang ulihi, ang mga disipulo nangin mga ministro. Ngaa natabo ina? Bueno, ano ang nagakatabo kon may matuod gid kita nga maayong balita nga isugid? Matago bala naton ini sa aton kaugalingon? Sa kabaliskaran, nalangkag kita nga isugid ini sa iban. Subong sang ginsiling ni Jesus: “Ang maayong tawo sa maayong bahandi sang iya tagipusuon nagapaguwa sang maayo, . . . kay sa kabuganaan sang tagipusuon nagapamulong ang iya baba.” Amo sina sa maayong balita sang Ginharian. Ang disipulo nga ang tagipusuon natandog maluyag nga tudloan ang iban kag makigbuylog sa ministeryo sing regular kag sing boluntaryo. Magasunod ang dedikasyon sa Dios kag bautismo. Busa ang sulitsulit nga kadena sang mga ministro nagapadayon, nahisuno sa prinsipio sang laygay ni Pablo kay Timoteo: “Ining mga butang itugyan mo sa mga tawo nga matutom nga sarang makapanudlo sa iban man.”—Lucas 6:45; 2 Timoteo 2:2.

22. (a) Ngaa si Jehova nagpatubas sing organisasyon sang mga manunudlo kag mga ebanghelista? (b) Anong palaabuton nga hilikuton ang hilimuon pa?

²² Karon, sa palibot sang duta, si Jehova nga Dios may yara labing maayong nahanas nga organisasyon sang mga manunudlo, mga ebanghelista, mga ministro sang ika-20 ka siglo. Kapin sa 2,6000,000 sa ila ang nagapakigbahin sa katapusan nga panaksi nga ginahatag antes magaabot ang katapusan sa sining malaut nga sistema. Apang ining nagadamu nga grupo handa para sa mas daku pa nga hangkat—ang pagtudlo sa binilyon nga pagabanhawon. Handa ka bala nga makigbahin sa sinang makatilingala nga pribilehiyo? Mapatubason bala karon ang imo ministeryo? Ipangamuyo naton nga kabay ang aton kapawa magaiwag sa himaya sang Dios, samtang nagaalagad kita subong epektibo nga mga ministro.—Mateo 5:16; Juan 5:28, 29.

Mga Punto nga Natuptupan Ninyo

◻ Ano ang labing epektibong paagi sa pagbantala sang maayong balita?

◻ Sa ano dapat napasad ang aton panudlo? Ano ang mensahe?

◻ Anong mga kinaiya ang kinahanglan agod pamatian kita sang mga tawo?

◻ Paano ginlab-ot ni Jesus ang tagipusuon sang iya mga tagpalamati?

◻ Ano nga pag-andam ang kinahanglan sa aton pagtudlo sa iban?

[Piktyur sa pahina 20]

Ang mga Saksi ni Jehova nagabantala bisan diin man nga may tawo

[Piktyur sa pahina 22]

Kon nagapanaksi, dapat naton panilagan ang tanda nga mga butang sang relihion sang isa ka tawo

Kahulugan sang Balita

“Wala Gid sing Ebidensia”

Sa panikasog nga ipaathag kon paano nagtuhaw ang buhi nga mga butang, ang modernong-adlaw nga mga sosyobiologo nagasalig sa Neo-Darwinismo, nga amo ang naulihi nga bersion sang teoriya ni Darwin tuhoy sa mahinay, nagapaigoigo nga ebolusyon. Apang ang mas bag-o, karibal nga teoriya—ginatawag “punctuated equilibrium” ni Stephen Gould kag iban pa—nagapati nga ang produksion sang bag-o nga espesyi sang sapat natabo sa halos hinali nga paglukso, ukon “tay-ug.”

Ang mga punctuanista nagasiling nga ang ebidensia sa fossil ugyon sa ila. Ngaa? Bangod ang yara sa tunga nga dagway sang sapat “indi mamutikan sa rekord sang fossil,” siling ni Dr. John Turner sa ulihi nga guwa sang New Scientist. Apang ang panguna nga kinatuhayan sa ulot sining duha ka kampo amo ang siling sang mga punctuanista nga (1) ang “tay-ug” ginsugdan, indi sang pila ka sahi sang pagpaigoigo sang Neo-Darwinian, kundi sang pila ka proseso nga mahimu wala pa mahibal-i kag (2) ang “tay-ug,” suno kay Turner, “pirme nagaupod sa pagsanga sang ebolusyonaryo nga kahoy.”

“Wala sing maayo nga ebidensia para sa [sining mga ideya],” hinakop ni Dr. Turner. “Nasulay ako sa pagsiling nga wala gid sing ebidensia. Tuhoy sa kinahanglanon nga teoriya sa tay-ug ang isa makasiling subong sa ginsiling ni Gould sa sosyolobiolohiya, nga wala ini nagadala sing kahulugan, kag indi makasitar tungod sini sang bisan isa ka maathag nga katunayan.” Apang sanglit ang punctuated equilibrium tuman ka bantog sa tunga sang karibal nga mga ebolusyonista, katumbas man ini sa wala ginatuyo nga pag-ako kon ano ka diutay, kon may yara gid man, nga ebidensia para sa tradisyonal nga pagpati sa ebolusyon. Sanglit wala sa duha ka teoriya ang makapaathag sa mga kal-ang sa rekord sa fossil, ang duha wala sing kredibilidad.

Apang, may yara makaalayaw gid nga paathag sa mga kal-ang sa fossil, ang isa nga nagaugyon man sa modernong genetiko. Makita man ini sa ginasiling snag Biblia nga ang mga sapat nagapatubas “suno sa ila mga sahi” kag nga ang tawo hilway nga tinuga sang Dios.—Genesis 1:24; 2:7.

Isa bala ka Relihion ang Siensia

Sa ulihi nga artikulo sa New Scientist, si Michael Shallis nangapin kay pisista Fred Hoyle, nga ginmulay bangod sang pila niya ka pagtamod. “Ayhan ang labing daku nga pagkaerehes ni Hoyle,” siling ni Shallis, ‘amo nga ginapakilala niya ang ideya nga ang Uniberso nagakinahanglan sing komiko nga intelihensia agod makontrol ini.’ Gindugang niya nga si Hoyle nagapati nga kon wala ini nga intelihensia “ang Uniberso wala sing pulos.”

Bisan pa ginapatihan ni Shallis nga ang pagluntad sang Dios ukon katuyoan sang uniberso “metapisikal nga pamangkot” nga indi malubad sang siensia, napanilagan niya “nga ang mga sientipiko ginapahanugotan sang ila mismo kaupdanan nga magsiling sa metapisikal nga mga butang tuhoy sa pagkawala sing katuyoan kag indi ang baliskad. Nagapanugda ini . . . nga ang siensia, sa pagpahanugot sining ideya sa metapisikal, nagatamod sini nga relihion kag ayhan nga isa ka atiestiko nga relihion (kon may amo ka sina).”

Ang indi pagpati sa mas mataas nga gahom nagapakita sang panimuot nga kaangay sa ginasitar sang salmista, nga nagsiling: “Ang malauton sa bugal sang iya nawong wala nagapangita sa iya; ang tanan niya nga hunahuna amo: ‘wala sing Dios.’” (Salmo 10:4; 19:1) Dugang pa, ini nga panimuot may epekto sa paglatid sa teoriya sang ginhalinan sang uniberso nga nataboan lamang.

Sikosomatiko nga Pag-ayo

Ang madamung pagtuon sa sikosomatiko nga pag-ayo ginahiwat karon “nagapatimaan sang pagbalhin sa tradisyonal nga pagtamod [tuhoy sa medisina] nga ginlaragway anay nga ‘daw halos rebolusyonaryo,’” siling sang Medical World News. Halimbawa, ang epekto sang hunahuna sa sistema nga inugbato sang lawas amo ang topiko sang nagadugang nga interes. Ang ulihi nga pagtuon nagapakita sing nabuhinan gid nga pagbato sa balatian sa mga balo kag sa mga nabalo sa tapos sang paglalaw. Ang inugbato wala magbalik sa normal tubtob ang nagalalaw magapasibo sa pagkapatay nila.

Sa tatlo ka tuig nga pagtuon, ang pamatuod sang epekto sang hunahuna sa tagipusuon ginapasundayag sa pagbulong sa mga pasyente sa kardiak nga ginasiling nga may “masupog, mapagsik, mabinatuon nga paagi.” Ang pagtudlo sa sining mga lalaki sang pagpailob, pagliwat sang ila mga iskedyul agod may tion sa paghunahuna kag sa ila mga hinigugma, kag sa pagdula sa matag-adlaw nga kaakig amo ang pila ka butang nga nagabuhin ang pagkatabo sang myocardial infarction (pagkapatay sang tisyu) sing duha ukon tatlo ka beses sang sa mga lalaki nga nakabaton lamang sing laygay sa mediko kag regular nga konsulta.

Sa tunga sang iban nga butang, inang panalawsaw nagapalig-on sa ginasiling sang Kasulatan. Halimbawa ang Biblia nagasiling, “Ang tagipusuon nga malipayon maayo nga bulong” kag “ang malinong nga tagipusuon amo ang kabuhi sang undanon nga organismo.”—Hulubaton 17:22; 14:30.