Indi Mag-untat sa Paghimo sing Maayo

“Dili kita mag-untat sa paghimo sing maayo, kay sa nagakaigo nga dag-on magaani kita kon indi kita pagpunawon.”​—⁠GALACIA 6:⁠9.

1. Ano nga komisyon ang ginhatag ni Jesus sa iya mga sumulunod?

DAW ano katahom nga hilikuton ang ginahimo sang mga Cristiano subong bahin sang ila pagsimba! Nalakip ini sa maathag nga sugo: “Busa lakat kamo kag maghimo sing mga disipulo sa tanan nga pungsod, nagabawtismo sa ila . . . , nagatudlo sa ila sa pagtuman sang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa konklusion sang sistema sang mga butang.” (Mateo 28:​19, 20) Si Jesucristo mismo ang naghatag sa iya mga disipulo sing komisyon sa paghimo sinang bug-os kalibutan nga hilikuton sa pagpanudlo.

2. (a) Ngaa makasiling kita nga ang paghimo sing disipulo isa ka importante nga hilikuton kag isa nga maayo? (b) Ano ang mga katuyuan sang paghimo sing disipulo nga hilikuton?

² Bangod ang komisyon nga paghimo sing disipulo amo ang isa sa katapusan nga pinamulong nga ginhimo ni Jesus sa iya unang mga disipulo antes magkayab sa langit, indi bala ini isa ka labing importante nga asaynment? Huo, bangod ang pagtuman sa sini magaluwas sang kabuhi. (1 Timoteo 4:16) Nagahimo ina nga isa ka maayong hilikuton. Nagahatag ini sing maligdong nga edukasyon sa Biblia para sa nagapamati sa mensahe sang Ginharian, kag ang pagbantala nga hilikuton nagapahibalo sa mga wala nagapamati. (Lucas 10:​10, 11) Busa, ang paghimo nila sini nga hilikuton nagapakilala sa matuod nga mga Cristiano subong sang pagtuman nila sa iban pa nga panudlo ni Jesus.​—⁠Juan 8:⁠31.

3. (a) Paano naghulag ang mga disipulo ni Jesus sa iya personal nga halimbawa kag sugo? (b) Ano nga panimuot ang gintukod ni Jesus sa iya mga disipulo?

³ Subong Daku nga Manunudlo, si Jesus nagpahamtang sing matahom nga halimbawa para sa iya mga sumulunod. Nagpanudlo sia sing dayag kag naghimo sing mga disipulo paagi sa “pagbantala sang maayong balita sang ginharian.” (Mateo 9:35) Bilang pag-ilog sa iya, ang bag-ong mga disipulo mismo nangin mga manughimo sing disipulo, kay ang matuod nga disipulo amo ang “isa nga nagabaton kag nagabulig sa pagpalapnag sa mga doktrina sang isa.” Sa primero, ang ila paghimo sing disipulo nga hilikuton ginlatiran sa mga Judiyo kag mga proselita. Apang, walay sapayan sang dimaayo nga reaksion sa sina nga latagon, gintuman bala sang mga sumulunod ni Jesus ang sugo niya nga “kadto sing padayon” nga “walay untat”? Aba, huo, nagkadto sila “sa mga karnero nga nagkaladula sa panimalay sang Israel” tubtob ang unang mga Gentil nangin mga tumuluo sang 36 C.E. (Mateo 10:​5, 6; Binuhatan 5:42) Ginasiling nga ang mga disipulo ‘nagpuno sang Jerusalem sang [ila] panudlo.’ (Binuhatan 5:28) Wala sila mag-untat sa ila maayong buhat. Sa baylo, matutom nila ini nga gintuman.

“Ang Uma Amo ang Kalibutan”

4. Upod ang anong panimuot nga ginhimo sang mga sumulunod ni Jesus ang ila ginpasangkad nga asaynment?

⁴ Ginpakita ni Jesus nga ang uma magalakip sa “katawhan sang tanan nga pungsod.” (Mateo 28:19) Sa isa ka parabola nahanungod sa pagsab-ug sa binhi sang Ginharian, nagsiling sia: “Ang uma amo ang kalibutan.” (Mateo 13:38) Busa, ang mga Cristiano mangin “mga saksi” sang Ginharian niya bisan diin. Sila liwat “magakadto sing dalayon,” sa sini nga tion “tubtob sa ukbong sang duta.” (Binuhatan 1:⁠8) Si apostol Pablo “masako sa pagwali,” kag makapat-od kita nga ang iban nga mga Cristiano masako man.​—⁠Binuhatan 18:⁠5.

5. Paano ginpakita ni Jesus nga ginapaabot niya ang iya mga disipulo nga magmasako sa pagpanaksi nga hilikuton tubtob sa katapusan sang karon nga sistema?

⁵ Ginpaabot ni Jesus nga ang pagpanaksi nga hilikuton magasako sa mga Cristiano tubtob sa katapusan sang karon nga sistema sang mga butang. Ginpakita ini sa kon ano ang gintagna niya nahanungod sa Cristianong ministeryo kag sa teritoryo nga tuptupan sini. Si Jesus nagsiling: “Ining maayong balita sang ginharian pagaibantala sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.”​—⁠Mateo 24:⁠14.

6. Tubtob san-o himuon ang pagbantala sang Ginharian nga hilikuton, kag paano ini nagaapektar sang aton panimuot sa sini?

⁶ Sang ginhatag ni Jesus ang sugo nga makigbahin sa pagbantala sang Ginharian kag paghimo sing disipulo nga hilikuton sa bug-os nga duta, nahibal-an niya nga inang maayo nga hilikuton magalab-ot sa ulihi sa iya katapusan, subong sang sa Judiyong latagon. Apang matuman sini ang iya katuyuan. “Ugaling,” subong sang ginsiling niya, “magaabot ang katapusan.” Busa, tubtob sa katapusan, ang mga Saksi ni Jehova masinaligon kag malipayon nga nagapadayon sa hilikuton nga gintangdo. Nagabulig ina sa pagpadayon sa hilikuton sa aton adlaw tubtob matapos ini.

Kon Paano Himuon ang Hilikuton

7. Ano nga tema ang nagtanda sa ministeryo ni Jesus kag sa iya sang iya mga disipulo?

⁷ Gintudluan ni Jesus ang iya unang mga disipulo kon paano himuon ang ila dayag nga ministeryo. Makugi sila nga naghulag sa iya sugo nga “lakat kamo.” Sang ginhanas sila sa ila hilikuton sa pagpanaksi, si Jesus nagsiling: “Wali sa nagakadto kamo, nga nagasiling, ‘Ang ginharian sang langit malapit na.’ ” (Mateo 10:⁠7) Naghatag ina sa ila mensahe sing pareho nga tema sa Ginharian nga nagtanda sang iya ministeryo. Mangin maayong balita ini sa mga bunayag sing tagipusuon. Sang ginsugdan sang mga sumulunod ni Jesus ang ila hilikuton, nag-untat bala sia? Wala, sa pagkamatuod, kay “sang nakatapos si Jesus sa pagsugo sa iya napulog duha ka disipulo, nagtaliwan sia gikan didto sa pagpanudlo kag pagpangwali sa mga siudad nila.”​—⁠Mateo 11:⁠1.

8. (a) Diin kag paano magabantala ang mga manugbantala sang Ginharian? (b) Ngaa nagakaigo nga dalhon ang maayong balita sa balay sang isa ka tawo? (c) Ano ang mga bentaha sang nagakaigo nga pagtamyaw sa tagbalay?

⁸ Diin kag paano magabantala ining mga manugbantala sang Ginharian? Ginsilingan sila ni Jesus: “Sa nagasulod kamo sa balay, abiabiha ini.” (Mateo 10:12) Ang pagkadto sa balay sang tawo nga dala ang maayong balita nagapadungog sa tagbalay, nagahatag sa iya sing kahigayunan nga mahambalan ang mensahe sang Ginharian sa iya puluy-an. Indi lamang nga ang kinabatasan kag kalahamut-an nga dagway sang panamyaw ang matinahuron kag mapatugsilingon nga mga paagi sa pag-umpisa sa isa ka sugilanon kundi may bentaha man nga matigayon gikan sa mainabyanon kag masinadyahon nga panamyaw nga nagahimo sang wala ginapaabot nga pagduaw nga mangin isa nga ginaabiabi. (Ipaanggid ang Mateo 28:9; Lucas 1:28.) Ang tono sang tingog kag sabat sang tawo sa ganhaan nagasugid man sa imo sing daku nahanungod sa iya panimuot. Dapat mo ina tandaan sa wala pa magpadayon bangod ina nga ihibalo nagapahapos sing labi sa pagpasibu sang imo mga komento sa mga kinahanglanon sang tagbalay.​—⁠Ipaanggid ang Binuhatan 22:​1, 2; 23:⁠6.

9. Ano ang nagapakita nga indi tanan magapamati sa mensahe sang Ginharian nga may apresasyon, kag ano ang mangin reaksion sa mga wala nagapakita sing interes sa sini?

⁹ Ginsugiran ni Jesus ang iya mga disipulo nga indi tanan nga tawo sa teritoryo magabaton sing mainabyanon. Nagsiling sia: “Bisan diin nga siudad ukon minuro ang inyo sudlan, pangitaon ninyo kon sin-o didto ang takus.” Kon ang tanan magabaton sang mensahe sang Ginharian, wala sing rason ang paggamit sa ekspresyon nga “pangitaon.” Ano ang mangin reaksion sa mga wala magpakita sing interes sa mensahe? “Kon sin-o ang indi magbaton sa inyo ukon magpamati sang inyo mga pulong, sa pagguwa ninyo didto sadtong balay ukon siudad, itaktak ninyo ang yab-ok sa inyo mga tiil,” nagalakat sa paghidait kag nagatugyan sang mga resulta sa paghukom ni Jehova.​—⁠Mateo 10:​11, 14.

Ang Kahimtangan Karon

10. Ano ang ginsiling nahanungod sa hilikuton nga pagbantala sa Ginharian sang mga Saksi ni Jehova?

¹⁰ Bilang matutom nga pagtuman sa Cristianong komisyon, ang mga Saksi ni Jehova nagatuptop sang duta nga dala ang mensahe sang Ginharian. Busa, si A. P. Wisse, isa ka dyurnalista sa Netherlands nagkomento: “Tuhay sila gikan sa iban nga katawhan. Bahin sini nga kinatuhayan amo ang resulta sang ila makugi nga pag-ebanghelyo. Ginatamod nila ang matuod nga Cristianismo indi subong isa ka relihion nga may mga katedral, nga may mga parokyano nga ang tagsa may iya kaugalingon pat-od nga lugar kag nga ang iya relihion wala nagapangabay sa iya sing labi pa luwas sa pagpamati. Nagapamulong sila upod ang pagkaprangka ni Pablo kay bisan sin-o nga magpamati.” Ina nga kakugi sa ministeryo pat-od nga ginpakamaayo ni Jehova nga Dios.

11, 12. (a) Ano nga mga resulta ang ginpatubas sang ministeryo sa ulihi nga tinuig? (b) Samtang nagadugang kita sa kadamuon, ano ang nagakatabo sa teritoryo nga ginabantalaan naton? (c) Ano nga mga pamangkot ang ginpautwas?

¹¹ Kapin sa 3,000,000 ka manugbantala sang Ginharian ang nagapangabudlay karon nga may kakugi sa 210 ka kadutaan. Nakita naton ang matahom nga pag-uswag sa bag-ong mga disipulo​—⁠1,246,204 ang ginbawtismuhan sa sulod sang nagligad nga pito ka tuig. Ang pagpakamaayo ni Jehova sa makugi nga panikasog maathag. (Isaias 60:​8-10, 22) Ti, sa dili magkubos sa 40 ka pungsod kag kapuluan, may isa ka Saksi sa kada 300 ka pumuluyo ukon manubo pa, ukon isa sa mga 100 ka panimalay! Dugang pa, sa iban nga mga lugar sang mga pungsod kaangay sang Canada kag Guadeloupe, ang ratio amo ang isa ka Saksi sa 45 ukon 50 ka tawo sa teritoryo sang kongregasyon​—⁠mga 15 lamang ka puluy-an ukon wala pa para duawon sang tagsa ka manugbantala! Madamo sining mga teritoryo ang ginatuptupan kada bulan. Bisan sa mga kadutaan nga may mas mataas nga ratio, ang iban nga mga banwa masunson nga ginatuptupan sang aton pagpanaksi nga hilikuton. Sa Seoul, Republika sang Korea, ang iban nga mga teritoryo sa siudad ginahikot kada lima ka adlaw! Samtang nagadamo kita sa kadamuon, kag samtang dugang kag dugang pa nga mga Saksi ang nagasulod sa payunir kag auxiliary payunir nga hilikuton, magaduaw kita sa mga ganhaan sang aton mga isigkatawo sing labi kasunson. Nagahatag bala ina sing mga problema?

¹² Dapat batunon nga may mga problema sa iban nga mga lugar, para sa mga Saksi ni Jehova kag para sa ginaduaw naton. Dugang sa mga problema amo ang nagadugang nga dipagsapak sa tunga sang katawhan sa madamong kadutaan. Bueno, samtang nagadugang kita sa kadamuon, hinayhinay bala kita nga nagauntat sa aton maayo nga buhat? Nagahinakop bala kita nga ang hilikuton halos natapos na kag ‘napangita’ na naton ang tanan nga magasabat kag mangin mga disipulo? Ikaw bala personal nga ginakapoy kag ayhan nabang-awan sa pagduaw sa amo gihapon nga mga tawo nga wala nagasapak? Ano ang himuon agod huptan ang aton ekselente nga pagpaimportansia sa hilikuton?

Paghupot sing Husto nga Panimuot

13, 14. (a) Paano naton dapat tamdon ang nagakatabo nga kahimtangan sa masunson ginapangabudlayan nga teritoryo? (b) Ngaa wala kita ginaupangan sang mga “wala nagapamati”? (c) Paano naton masunod ang halimbawa sang mga apostoles sa pag-atubang sadtong akig sa aton mga pagduaw?

¹³ Ang solusyon una nga nagadalahig sa aton panimuot subong mga saksi ni Jehova. Una, tan-awon naton pirme ang masanag nga bahin. Ang mas masunson nga pagtuptop sa teritoryo bangod sang mataas nga ratio sang manugbantala sa populasyon pat-od nga mahanabo sa madamong lugar samtang ang aton hilikuton nagalab-ot sa iya putukputukan. Apang indi bala nga ginpangamuyo naton ini? (2 Tesalonica 3:⁠1) Ang nakita naton karon dapat nga magapahalipay sa aton kag magahaylo sa aton nga yari na kita sa katapusan nga hut-ong sang paghimo sing disipulo nga hilikuton! Ang Ginharian ginabantala, subong sang gintagna ni Jesus. Kag bisan sa mga lugar diin ang mga tawo ‘wala nagapamati sa aton mga pulong,’ ginahatagan sila sing pahibalo paagi sa aton pagbantala sang Ginharian nga hilikuton. Dumduma, luwas sa paghimo sing mga disipulo, ginabantala naton ang maayong balita “nga panaksi.”​—⁠Mateo 10:14; 24:⁠14.

¹⁴ Dugang pa, ginapaabot nga ang madamo magasikway sa mensahe sang Ginharian samtang nagapalapit ang katapusan. Maathag ang mga tagna, kag ang mga eksperiensia ni Jesus kag ni Pablo nagapasalig sa aton nga may yara nga mga “wala nagasapak” kag nga ang mga tagipusuon “dimabinatunon.” Gani, sa sini nga tion dapat kita maghalong nga kita indi wala nagasapak sa aton komisyon. Bisan sa mga wala nagasapak, magakadto kita “sa liwat kag liwat.” (Isaias 6:​9-11; Mateo 13:​14, 15; Hulubaton 10:21) Matuod, nagakinahanglan sing kaisog ang magkadto sing masunson sa mga tawo nga akig sa aton mga pagduaw. Apang, wala sing kahimtangan sa teritoryo bisan diin ang magasiling sa aton, ‘Mag-untat sa paghambal.’ Sa baylo, kaangay sang mga apostoles, dapat kita magpangabay sa pangamuyo sing kasidla sa “pagpadayon sa paghambal”​—⁠walay sapayan sang kaugot ukon pagpamatok​—⁠tubtob matapos ang hilikuton.​—⁠Binuhatan 4:​18-20, 24-31.

15. Ano nga pagpalig-on ang ginahatag sa Galacia 6:​9, kag paano ini dapat mag-apektar sa aton pagtamod nga pagduaw sa aton mga isigkatawo nga dala ang maayong balita?

¹⁵ Sa sadsaran, may yara lamang duha ka sahi sang tawo sa tanan naton nga teritoryo​—⁠yadtong sa karon interesado kag yadtong indi. Busa, dapat naton padayunon ang hilikuton sa ‘pagpangita sa mga takus.’ Ang paghimo sini amo ang isa sa madamong ekselente nga mga buhat nga ipatubas naton subong mga Cristiano sa pagpakita sang aton gugma kay Jehova kag sang aton katutom sa iya. Busa, “dili kita mag-untat sa paghimo sing maayo, kay sa nagakaigo nga dag-on magaani kita, kon indi kita pagpunawon.” (Galacia 6:⁠9) Bangod tuman na kita karon kalapit sa katapusan sining sistema, indi ini ang tion sa pag-untat ukon sa pagkataka sa pagduaw sa aton mga isigkatawo nga dala ang maayong balita sang Ginharian. Si Jehova wala pa magsiling nga tapos na ang hilikuton.

Kon Ngaa Kinahanglan Kita nga “Magpadayon sa Paghambal”

16. (a) Ano ang pila sa mga sirkumstansia nga magabalhin sang pagbaton sang katawhan sa isa ka teritoryo? (b) Anong lokal nga mga halimbawa sang pagbalhin sa pagbaton ang mahatag mo?

¹⁶ Mabuligan man kita sa paghupot sing maayo nga panimuot kon dumdumon naton nga ang katutom kay Jehova ginapasundayag paagi sa makugi nga mga hilikuton sa pagbantala sa Ginharian. Dugang pa, ang mga teritoryo padayon nga nagabalhin sa lainlain nga paagi. Ang mga tawo nagasaylo, ukon ang ila kahimtangan mahimo nga nagabag-o. Mahimo nga indi sila interesado sang magduaw kita sang nagligad nga tion, apang ang pagkawasi sing palamugnan, pagkapatay sang isa nga hinigugma, importante nga pagbalhin sa pagsumpunganay sang mga superpower, grabe nga balatian​—⁠ini kag ang iban nga mga pagbalhin mahimo magkahulugan nga magapamati sila sa masunod nga pagduaw naton. Ang iban, sang mahibal-an nga ang isa ka abyan ukon hinigugma nangin isa ka Saksi ni Jehova, mahimo nga maluyag karon sa pagpakigsugilanon sa aton agod mahibaluan kon ano ang aton ginapatihan nga nagpatubas sini nga pagbalhin.

17. Ano karon ang reaksion sang iban sa mensahe sang Ginharian? Maghatag sing bisan anong lokal nga mga halimbawa.

¹⁷ Dumduma man nga ang nagdalagku sining ulihi nga tinuig may mga pamilya na karon, nagabinagbinag sing serioso sa kabuhi, kag nagapamangkot sing mga pamangkot nga ang Pulong sang Dios lamang ang makasabat. Halimbawa, ang isa ka lamharon nga iloy nag-agda sa duha ka Saksi pasulod sa iya balay kag nagsiling: ‘Sang bata pa ako, indi ko mahangpan kon ngaa ginatabog sang akon iloy ang mga Saksi kag ginasilingan sila nga indi sia interesado, samtang ang luyag lang ninyo amo ang pagpakigsugilanon nahanungod sa Biblia. Namat-od na ako sadto pa nga kon magdaku ako, magminyo, kag may kaugalingon nga puluy-an, pasudlon ko ang mga Saksi ni Jehova kag pangabayon sila sa pagpaathag sang Biblia sa akon.’

18. Paano ang nagabalhin nga danyag sa relihion nagaapektar sa teritoryo diin kita nagabantala kag nagapanudlo?

¹⁸ Natalupangdan mo bala nga ang iban nga tawo nga indi makigsugilanon sa aton sa sulod sang tinuig kag naghunahuna nga “luwas” na sila nagapamangkot karon sa aton sing sinsero nga mga pamangkot? Ngaa? Natabo ang pagbalhin sa ila relihioso nga panghunahuna. Nagasiling sila nga nabang-awan sila kag natingala sa mga pagkanadayag sa imoral nga pagginawi, politikal nga mga aktibidad, kag pagpagusa sa pundo sang simbahan sang pila ka bantog nga mga ebanghelisador sa telebisyon nga ginsaligan anay nila. Ayhan, may dugang pa sa sini samtang ang kahimtangan sa sulod sang Babilonia nga Daku padayon nga magausmod tubtob sa tion sang paglaglag sa iya.​—⁠Bugna 18:​1-8.

19, 20. Ano ang nagapakita kon ngaa indi kita dapat maluyahan sing buot nahanungod sa pagbalik-balik sa mga tawo nga nagasikway sa mensahe?

¹⁹ Sa bisan ano nga hitabo, indi dapat magluya ang aton buot kon ang kalabanan nga mga tawo wala nagabaton. Sa tapos naton sila mabayaan, ayhan ginahunahuna gihapon nila kita. Sa Canada, gin-athag sang isa ka tagbalay nga ginduaw sang duha ka Saksi nga indi sia interesado. Sang ulihi, ginhunahuna niya ang nahanungod sa ginsiling nila kag luyag niya sila pangitaon agod masabat nila ang mga pamangkot nga nag-utwas sa iya hunahuna. Nagsakay sia sa iya salakyan kag ginpangita sila sa mga kalye sa iya kasilingan apang wala niya sila makita. Nag-untat bala sia? Wala, naghapit sia sa balay sang isa ka abyan agod mamangkot kon bala nagkadto sila diri. Wala sila makakadto, apang ang abyan nagsiling nga may isa ka Saksi sa ginaubrahan sang iya abyan kag ipaduaw niya sa Saksi ang interesado nga babayi. Ang resulta amo ang sunodsunod nga pagduaw sa puluy-an sang interesado, nga sa sini gin-agda niya ang mga abyan, mga kaingod, mga himata, kag mga kaupod sa trabaho. Tubtob sa 15 ka tawo ang nagtambong kon kaisa, kag mga 430 ka libro kag mga Biblia kag 2,015 ka magasin man ang napahamtang.

²⁰ Ginaapresyar sang madamo ang aton pagduaw. Sa isa ka sulat sa isa ka sanga talatapan sang Watch Tower Society, ang isa ka babayi nagsiling: “Salamat sa pagpatudok sang daku nga dedikasyon sa mga tagipusuon sadtong yara sa inyo relihion. Salamat sa pagduaw . . . kag sa pagpaambit sang gugma sang Ginuo sa iban. Inang simple nga buhat daku ang nahimo sa iban. . . . Bisan pa nga ang iban mahimo nga mapintas, ang iban wala nagasapak, kag ang iban nagabaton, . . . maayo gid nga may isa nga nagapahanumdom sa imo sang espirituwal nga mga butang. Nasapwan ko ini nga butang nga maayo, nga ihambal ang nahanungod sa Ginuo sa isa kag isa.” Sa isa pa ka sulat, ang tagbalay nangabay sa amon nga ‘indi mag-untat sa mga tawo,’ bisan ano man ang pagtratar nila sa aton. “Busa indi kita mag-untat sa paghimo sing maayo, kay sa nagakaigo nga tion magaani kita kon indi kita pagpunawon.” (Galacia 6:⁠9) Ini nga hilikuton may kahamuot kag pagpakamaayo ni Jehova, kag ang pagpakigbahin naton sa sini nagapamatuod sang aton gugma sa iya kag sa aton isigkatawo. (Mateo 22:​37-39) Gani himuon naton ang hilikuton tubtob matapos.​—⁠Ipaanggid ang Filipos 1:⁠6.

21. (a) Diin ayhan ang sa dili magkubos bahin sang hangkat sa pagkadto liwat sa masunson ginapangabudlayan sa mga teritoryo? (b) Ano ang hambalan naton sa masunod nga artikulo?

²¹ Dapat naton atubangon ang kamatuoran nga indi pirme mga tawo ang nagapabudlay sa pagpanghikot sing masunson sa teritoryo. Kon kaisa kita mismo ang nagapabudlay. Nagaumpisa bala kita nga may negatibo nga mga ideya, nagabatyag nga kilala naton ang tanan nga mga tawo kag kon ano ang mangin reaksion nila? Nagaapektar ina sa aton panimuot kag ayhan sa aton tono sang tingog kag pangguyahon. Amo bala gihapon nga mga paagi kag mga tinaga ang ginagamit naton sa sulod sang mga tinuig? Karon nga ang teritoryo nagabalhin, ang madinalag-on anay mahimo nga wala karon “nagalab-ot sa ‘mga takus.’ ” Ayhan kinahanglan naton ang bag-o nga pagpalapit kag ang bag-o nga pagtamod sa aton hilikuton. Sa masunod, tan-awon naton kon ano ang himuon naton agod ‘indi kita mag-untat kundi mahimo nga magaani sa nagakaigo nga tion.’

Mapaathag Mo Bala?

◻ Ngaa indi kita dapat “mag-untat” sa pagkadto sa aton mga isigkatawo nga dala ang maayong balita?

◻ Sin-o ang nagsugo sa aton sa paghimo sing mga disipulo sa paagi nga ginahimo naton, kag ano ang sadsaran nga bahin sina nga paagi?

◻ Ano nga kahimtangan ang natabo sa madamong teritoryo, kag ano ang magabulig sa aton sa paghupot sing husto nga panimuot nahanungod sina nga kahimtangan?

◻ Ngaa dapat kita ‘magpadayon sa paghambal’ sang maayong balita nga “walay untat”?

Hatagi Pirme sing Igtalupangod ang Imo Pagpanudlo

“Hatagi pirme sing igtalupangod ang imo kaugalingon kag ang imo pagpanudlo. Magpadayon sa sina, kay sa paghimo sini maluwas mo ang imo kaugalingon kag ang mga nagapamati sa imo.”​—⁠1 TIMOTEO 4:⁠16.

1. Ngaa indi ini ang tion para sa aton sa paghinay sa aton pagbantala sang Ginharian nga hilikuton?

GINAPADALI karon ni Jehova ang pagtipon sa mga katulad karnero. Sa pagkamatuod, nian, indi ini ang tion para sa iya katawhan sa paghinay sa ila pagbantala sang Ginharian kag paghimo sing disipulo nga hilikuton. (Isaias 60:​8, 22; Mateo 24:14; 28:​19, 20) Dapat kita maghulag nahisuno sa espiritu sa kon ano ang ginahimo sang Dios sa aton tion. Samtang nagahilapit ang katapusan, labi kasunson nga magabalik kita sa aton mga isigkatawo. Sa pagkamatuod, ang dugang nga pagpanaksi nga hilikuton sa tuman kadamo pa nga mga manugbantala kag mga payunir nagapapagsik sa latagon sang kalibutan. Kag ang puersa sining malipayon nga pagtipon magadugang pa.​—⁠Isaias 60:11; ipaanggid ang Salmo 126:​5, 6.

2. (a) Suno sa Isaias 40:​28-31, anong tuburan sang kusog ang matigayon naton para sa kinahanglanon nga kusog sa pagtapos sang pagbantala sang Ginharian nga hilikuton? (b) Ano ang maayong rason sa paghatag sing ekstra nga igtalupangod sa kalidad sang aton ministeryo sa sini nga tion?

² Sa baylo nga magpadala sa balatyagon nga ‘pagluya’ bangod ang iban nga teritoryo masunson nga ginatuptupan, dapat naton hangpon nga panahon ini para sa aton nga magpangabay kay Jehova sa pangamuyo sing kinahanglanon nga “dinamiko nga kusog” sa pagtapos sa hilikuton. (Isaias 40:​28-31; 1 Juan 5:14) Matuod, minilyon sang “dakung kadam-an” sang “iban nga mga karnero” ang natipon na. Apang kon ano anay ang nagmadinalag-on sa pagbulig sa pila ka tawo mahimo nga indi mangin epektibo sa pagbulig sa iban pa sa aton mga teritoryo. (Bugna 7:​9, 10; Juan 10:16) Busa, ang kalidad sang aton ministeryo nagakinahanglan sing ekstra nga igtalupangod.

3. Paano mahatag ang bag-o nga kapagsik sa aton pag-alagad sa latagon?

³ Upod ang bag-o nga determinasyon, sarang kita makakonsentrar sa pagpauswag sa pagkaepektibo naton sa ministeryo. Makahatag ini sa aton sing bag-o nga kapagsik sa aton pag-alagad sa latagon. Apang paano ini himuon? Paagi sa ‘paghatag pirme sing igtalupangod sa aton kaugalingon kag sa aton pagpanudlo,’ indi lamang paagi sa pagbuhat sang aton ministeryo sing ordinaryo. (1 Timoteo 4:16) Ang aton mga bibig dapat maghimo sing labi pa sang sa pasapayan nga “halad sang pagdayaw.” (Hebreo 13:15) Dapat kita mangin malantip sa aton hilikuton. (Hulubaton 22:29) Kon amo, ang kinahanglan naton amo ang malantip nga pagpangabudlay sa aton teritoryo. Yari ang pila ka bahin sang aton ministeryo nga dapat naton ‘hatagan pirme sing igtalupangod.’

Kon Paano Maghimo sing “Bag-o” nga Teritoryo

4. Sa anong paagi kita makahimo sing “bag-o” nga teritoryo sa asaynment sang aton kongregasyon?

⁴ Tan-awon naton ang kahimtangan sa praktikal nga paagi. Sa madamong lugar, wala sing bag-o ukon malaka lang ginapangabudlayan nga teritoryo. Ngaa indi maghimo sing “bag-o” nga teritoryo sa sulod sang asaynment sang kongregasyon? Paano? Ti, kon nagaduaw kita sing masunson, indi kita maghulag nga daw wala gid kita makaduaw sa sina nga puluy-an paagi sa pagsiling lamang sang masunson nga ginasiling naton sa mga ganhaan. Mahimo nga sa bisan paano nakilala kita sang tagbalay bangod sang pirme naton pagtuptop sa teritoryo. Ang libro nga Reasoning From the Scriptures nagahatag sing 40 ka introduksion nga sarang naton magamit sa aton ministeryo. Dapat naton ini ihanda sing maayo subong butang nga bag-o kag makagalanyat paagi sa pag-angot sini sa mga butang nga may lokal kag ulihi nga interes. Sa baylo nga magbatyag sa pagpangayo sing pasaylo tuhoy sa masunson nga pagduaw, dapat nga may yara kita positibo nga panimuot kag magahimo sang aton teritoryo nga “bag-o” paagi sa maayo sing kalidad nga mga presentasyon. Apang makabulig bala ini bisan pa nga ang mga tagbalay dimainabyanon?

5. (a) Paano naton himuon ang dimainabyanon anay nga panimuot nga mangin bentaha naton? (b) Ano ang nasapwan mo nga maayo sa lokal? (c) Ngaa ang pagpamati kag paghatag sing bunayag nga komendasyon mabuligon?

⁵ Ang paghibalo sa nagligad nga panimuot sang tagbalay magaresulta sa negatibo nga mga balatyagon nahanungod sa pagduaw liwat. Apang ngaa indi himuon ina nga ihibalo nga mangin sa bentaha mo? Paano? Ayhan paagi sa pagsambit sini primero kag nian sa pag-umpisa sa kon ano anay ang ginsiling sang nagligad nga pagduaw. Ayhan makasiling ka: “Maayong aga, G. Hernandez!” Kon nagakaigo, ayhan madugang pa: “Kamusta ka?” Nian makasiling ka: “Sang nagkari ako sang nagligad nga semana, ginsilingan mo ako nga ginatatap sang imo relihion ang tanan nga espirituwal nga kinahanglanon mo kag isa ikaw ka aktibo nga miembro. Subong isa ka kaingod nga nagakabig man sang relihion nga serioso, mahimo ko bala mahibal-an kon ano ang ginasiling sang imo relihion nahanungod sa paglaum nga makalampuwas sa nuklear nga dag-on?” Nian, pasabta sia. Hatagi sing komendasyon ang tagbalay sa kon diin bunayag nga makahatag ka. Ang pagpamati sa iya kag ang paghatag sa iya sing komendasyon mahimo nga magabalhin sang iya panimuot. Sing masunson, pasugtan sang mga tawo ang isa pa ka pagduaw kon sila mismo makatugda sa hambalanay. Sa pagkamatuod, luyag mo nga ibagay ang imo mensahe sa kon ano ang ginasiling sang tagbalay.

6. (a) Paano naton hanason ang mga tagbalay sa pagpaabot sa aton sa pagduaw sing tayuyon? (b) Anong yabi nga mga ekspresyon ang makabulig sa aton nga magmadinalag-on? (c) Ano ang epektibo sa lokal nga teritoryo?

⁶ Paagi sa ginasiling mo, sarang mo mahanas ang mga tagbalay sa pagpaabot nga magaduaw kita sing tayuyon. Tilawi ang magsiling: “Hello, Gng. Federico? Kamusta ka na? Sa sining pagduaw namon sa amon mga kaingod, ginahambalan namon ang . . . ” Ukon ayhan makasiling ka: “Maayong aga! Nagahimo kami sang amon regular semanal nga pagduaw. Nalipay kami sa pagbalik. Ang inyo mga kaingod nalipay sa bag-ong topiko nga ginahinun-anunan namon sa sini nga pagduaw.” Nian magpadayon. Nagahimo man ini sang teritoryo nga “bag-o” para sa imo. Ang aktuwal nga tinaga mahimo nga tuhay sa inyo pungsod, apang nagahatag ini sang panguna nga ideya. Ngaa indi ini tilawan, sa bentaha mo?

7. (a) Kon nagalakat, paano ginahanda sang iban nga mga Saksi ang tagbalay para sa isa pa ka pagduaw? (b) Sa sini nga bahin, ano ang epektibo sa lokal nga teritoryo?

⁷ Agod ihanda ang tagbalay sa masunod nga pagduaw, ang iban nga mga Saksi nagmadinalag-on sa konklusion kaangay sini: “Ginakalangkagan namon ang pagduaw sa imo sa liwat.” Para sa mga nagapangalag-ag diutay sa pagpakigsugilanon sa imo sa primero, ayhan makasiling ka: “Nalipay ako sa aton paghambalanay. Maayo ang imo mga punto. Nagkinahanglan ini sing pila ka minuto, apang sa dili magkubos wala kita maghambalanay nahanungod sa malain nga balita, nga sarang naton mabatian sa bisan ano nga tion. Makalilipay gid ini.” Sa walay duhaduha, mapalambo mo ang iban pa nga nagakaigo nga mga paagi sa pagpakigsugilanon sa mga tagbalay. Sa bisan paano, paagi sa positibo nga mga ekspresyon, ang maayo sing kalidad nga mga presentasyon, kag pagkamainabyanon, nagapanikasog sa pagbulig sa publiko nga indi maakig sa aton regular nga mga pagduaw.

Magpanaksi sing Maid-id

8, 9. Ano nga mga panugda ang ginahatag para sa maid-id nga pagpangita sa mga takus?

⁸ Ang isa pa ka butang nga mahatagan naton sing igtalupangod sa paghupot sa aton kapagsik amo ang maid-id nga pagpangita sa mga takus. (Binuhatan 8:25; 20:24) Halimbawa, ayhan pangitaon sang isa ka utod nga lalaki ang bana kon babayi ukon bata ang magaguwa sa ganhaan sa mga talipuspusan sang semana ukon sa gab-i. Ayhan, ang asawa amo pirme ang aton nasugilanon. Gani sarang kita makahimo sing bag-o nga umpisa upod sa panimalay paagi sa pagpakighambal sa ulo sang pamilya. Nian sarang naton mabagay ang mensahe sa iya, nagasiling sing subong sang, “Ano sa banta mo ang magapasalig sa imo pamilya sing isa ka malipayon nga palaabuton?” ukon, “Talupangda kon paano ginapadaku sang Biblia ang paghiusa sa pamilya.” Hatagi sing komendasyon ang bana bangod sang maayong mga ideya nga mahimo ipabutyag niya.

⁹ Ang isa pa ka paagi sa pagpangita sing “bag-o” nga teritoryo amo ang pagpangita sa iban pa nga katapo sang pamilya nga nagaistar sa idalom sang isa ka atop​—⁠lola, hinablos ukon pakaisa nga nagaeskwela, umagad nga babayi nga nagatrabaho sa bilog nga semana. Praktikal man nga tandaan kon pila ka bilog ang metro sa koryente ukon kahon sa sulat sa isa ka balay. Mahimo ini magapakita nga ginpaliwat nila ang ila dalom-balay, attic (kuarto sa tunga sang kisame kag alibungan), ukon iban pa nga lugar agod paarkilahan. Tinguhai nga masugilanon ang mga nagaarkila​—⁠mga estudyante, diminyo nga mga trabahador, mga balo, kag iban pa. Nagabulig man ini sa pagpasangkad sa teritoryo.

10. Ano ang isa pa ka paagi sa pagpasangkad sa aton pamalaybalay nga teritoryo, kag ano ang ginhimo sang iban agod mapakig-angotan ang mga nagaobra kon gab-i?

¹⁰ Ang isa pa ka paagi sa pagpasangkad sa pamalaybalay nga teritoryo amo ang paghatag sini sing pahuway samtang nagapakigbahin kita sa iban nga bahin sang aton ministeryo. Para tuhay naman, ayhan pangabudlayan naton ang teritoryo paagi sa direkta nga pagtanyag sing isa ka walay bayad nga pagtuon sang Biblia sa puluy-an. Ang iban nga mga tawo nga wala sa balay kon magduaw kita mahimo nga masapwan sa ila puesto sa tindahan ukon ginaubrahan. Kag ang pagpanaksi sa mga business area mahimo nga tuman ka mabungahon. Ang iban sa ila mahimo man nga masugilanon kon magapanaksi kita sa dalan sa nagakaigo kag masako nga inoras. Sa Canada ang mga payunir nakatigayon sing maayong mga resulta gikan sa pagduaw sa mga empleyado kon gab-i na katama sa bukas sa bug-os nga gasolinahan, mga balaligyaan, kag mga otel diin ang mga desk clerk masami nga indi masako sa sina nga tion kag masunson nga ginaapresyar nga may pila ka butang nga mabasa. Sa pagkamatuod, kinahanglan nga likawan labi na sang mga utod nga babayi ang iban nga mga lugar kon gab-i na katama.

11. (a) Ano ang ginahimo sang iban nga mga Saksi kon madamo ang wala sa balay sa una nga pagduaw? (b) Ano ang epekto sang pagkamakugi kon nagahimo sing wala sa balay nga pagduaw sa aton teritoryo, upod ang anong mga resulta sa ministeryo?

¹¹ Kamusta naman ang wala sa balay sang magduaw kita? Diri liwat, dapat kita magmaid-id. Ginagamit sang iban nga mga Saksi ang ila nahuptan sing maayo nga house-to-house record pagkatapos sang ila pamalaybalay nga hilikuton kag nagabalik sa mga lugar diin wala sing tawo ang balay sing mas temprano sina nga adlaw. Sing masami, ang mga tagbalay nakapauli na, ukon ang mga nagaobra kon gab-i nagabugtaw sa sina nga tion. Sa madamo nga lugar, 50 porsiento ukon kapin pa ang wala sa balay kon adlaw. Bangod sini, sarang naton maliwat ina nga teritoryo paagi sa pagduaw sa mga balay nga wala anay sing tawo sa lain nga oras tubtob may makita kita nga tawo sa balay. Ang mga payunir kag mga eksperiensiado nga manugbantala nagaugyon nga ang pagkamakugi sa pagpangabudlay sa mga wala sa balay masunson nga nagapatubas sing maayo nga resulta sang sa una naton nga pagtuptop sa teritoryo. Paagi sa paghatag sing igtalupangod sa sini nga bahin sang aton ministeryo, mahimo kita magaani sing madamong kabulahanan.​—⁠Hulubaton 10:⁠22.

Yadtong Nagareklamo

12. Ano ang dapat nga reaksion naton kon ang mga tawo nagareklamo nga nagaduaw kita sing labi kasunson? Ngaa?

¹² Ano ang masiling sa mga tawo nga nagareklamo nga masunson kita nga nagaduaw? Labaw sa tanan, dapat naton ipakita ang paghangop. (Mateo 7:12) Para sa ila, daw pirme kita nagabalikbalik. Apang, maayo nga dumdumon nga bisan mga tinuig na ang nagligad ang mga tawo nagasiling, ‘Yari man kamo diri sang nagligad nga semana,’ samtang nahibaluan gid naton nga anum ka bulan na ukon kapin pa kutob sang magduaw kita. Luwas pa, ang masunson nga pagduaw nagapukaw sang interes. Sa Guadeloupe ginlagas sang isa ka tawo ang Saksi agod magsiling: “Ginpanilagan ko ikaw sa sulod sang madamong semana. Sing masami, wala ako nagapamati sa mga Saksi, apang dapat ko mahibaluan kon ngaa ginaduaw mo ang mga tawo sing labi kasunson!” Isa ka bag-ong pagtuon sa Biblia ang resulta.

13, 14. Paano gin-atubang sang iban nga mga masigka tumuluo sang ang mga tagbalay nagareklamo?

¹³ Ang iban nga mga kauturan malulo nga nagasugid sa mga nagareklamo sang eksakto nga petsa sang katapusan nga pagduaw kag nagatanyag sing pinakaulihi nga magasin, nagapaathag nga ang mga artikulo tuhay sa dala naton nga balasahon sang nagligad nga pagduaw naton. Sa pagpangatarungan sa sina nga mga tagbalay, mahimo kita makasiling nga ayhan nakabaton sila sing madamong pamantalaan kag magasin kutob sang aton katapusan nga pagduaw, apang pirme ini wala nagaunod sing maayong balita. Mapaathag naton nga nagadala kita sing maayong balita kag nga ang pagduaw naton indi magdugay. Apang kon ang tagbalay tuman kasako, makasiling kita: “Kon indi ini ang labing maayo nga tion sa pagpakigsugilanon sa imo, maduaw kami liwat sa masunod nga semana ukon kapin pa.”

¹⁴ Ano pa ang mahimo nga isiling? Depende ini sa panimuot sang tagbalay kag sa kinaandan nga pagkamatinahuron nga ginapaabot sa kon diin kita nagapuyo. Ang isa ka utod nga babayi sa Japan nagapaathag sang aton masunson nga pagduaw sa sining paagi: ‘Ang mga balita sa telebisyon nagareport sa lakat sang bagyo sa liwat kag liwat, nagasulit sing masunson sang impormasyon sa kaayuhan sadtong mahimo nga wala makabati sang nauna nga pahibalo. Ginahimo ini bangod nadalahig ang kabuhi. Ang pagkasunson sang balita nagadugang samtang ang bagyo nagapalapit. Gani, samtang ang bagyo sang Armagedon nagapalapit, ang nagapaandam nga mensahe dapat nga ibantala sing labi kasunson kon mahimo pa sa pagluwas sa kabuhi.’ Sa pagkamatuod, isiling naton ina sing malulo kag upod ang kahanuot, nagalaum nga malab-ot ang tagipusuon sang tagpalamati.

Pag-atubang sa Hangkat sang Dipagsapak

15. (a) Ano ang dugang mga hangkat kon ginapangabudlay naton pirme ang aton teritoryo? (b) Ngaa ang iban nga mga tawo wala nagasapak?

¹⁵ Samtang nagadugang ang pagkasunson sang aton pagduaw, ang dugang nga hangkat amo ang dipagsapak nga masami naton masugata. Apang ang pag-usisa sa pila ka kabangdanan sang dipagsapak magapalig-on sa aton nga tandaan nga mahimo pa gihapon malab-ot ang tagipusuon sang iban sining mga tawo. Ang ila dipagsapak mahimo nga magapabanaag sang ila kapaslawan kag pagkawalay paglaum. Mahimo sila magabatyag nga wala na sing dalan paguwa gikan sa karon nga kahimtangan sang kalibutan, nagapangatarungan nga magkabuhi na lamang sila sa labing maayo nga masarangan nila. Ang iban naugot bangod ang iban nga mga lider sang relihion nagpasilabot sa politika, nakasala sing imoral nga buhat, ukon napaslawan sa pagtindog nga malig-on batok sa seksuwal nga imoralidad. Gani ining mga tagbalay nabang-awan kag nagakabuhi lamang para sa karon nga adlaw.

16. Paano mahimo nga malab-ot ang tagipusuon sang wala nagasapak nga tawo?

¹⁶ Nahibaluan naton nga ang unang Cristianong mga ministro nagmadinalag-on sa paglandas sina man nga panimuot, kay ang iban nga mga tawo sadto anay nagsiling: “Magkaon kita kag mag-inum, kay buwas mapatay kita.” (1 Corinto 15:32) Busa, nahibal-an naton nga dala naton ang kinahanglan nga mabatian sina nga mga tawo. Apang, paano naton malab-ot ang ila tagipusuon? Ang isa ka paagi amo ang pagpahigad anay sa aton literatura sa Biblia, nagapakita sa ila nga ginahimo naton ina. Nian mahimo naton sila pamangkuton sing nahunahuna sing maayo nga mga pamangkot subong sini: “Sa banta mo ayhan may solusyon sa karon nga mga problema? Mahimo bala nga wala lamang makita sang kalabanan nga tawo ang mga solusyon? Sa banta mo ayhan dapat bala kita magmangin positibo kag padayon nga magpangita?” Sa iban, ayhan makasiling kita: “Ayhan nagaugyon ka nga mas maayo ang magkabuhi nga may paglaum sang sa wala sing bisan ano nga pagpaabot sing mas maayo nga mga butang. Ano ang ginalauman mo nga makita?” Ayhan mamangkot kita: “Ano sa banta mo ang labing daku nga sablag sa bug-os kalibutan nga paghiusa kag paghidait?” Ayhan ang iban sarang mapamangkot: “Sa banta mo ayhan ang tanan nga relihion katulad sa ginlaragway mo?” Madamong beses nga inang mga pamangkot nagatiklod sa mga tagbalay sa pagpautwas sang ila pagtamod. Nian, kon magsabat sila, siguraduha nga magpamati. Huo, ipabubo sa ila ang ila tagipusuon sa imo. Madamo sa ila ang ‘nagabakho kag nagapanghayhay sa tanan nga kalangil-aran nga ginhimo sa tunga nila.’​—⁠Ezequiel 9:⁠4.

17. Paano mahimo magamit ang aton mga publikasyon sa paglab-ot bisan sa iban nga sang primero nag-insister sila nga indi sila interesado?

¹⁷ Ang isa pa ka paagi sa pag-atubang sa dipagsapak amo ang pagtanda sa punto ukon pagpamatok nga ginhimo sang tagbalay kag magbalik nga dala ang isa ka magasin ukon iban pa nga publikasyon sang Watch Tower nga nagahinun-anon sa sina. Sa primero, mahimo nga isa ka wala labot sa relihion nga topiko, subong sang isa ka artikulo nahanungod sa hinali nga kamatayon sang lapsag ukon sa pagkadula sang mga kagulangan. Ipaathag nga ginahunahuna mo kon ano ang nagwili sa tagbalay kag nadumduman mo ini nga artikulo. Nian ipakita ang panguna nga mga ideya sa materyal. Ang isa ka babayi nga bag-o lang magsikway sang aton literatura nagbaton sang isa ka magasin mga pila ka segundo lamang sang ulihi. Ngaa? Bangod ginpamangkot sang Saksi kon bala nahibaluan sang babayi nga may 55 ka milyon ka aborsion tuigtuig. Nakibot sa paghibalo sa sini, ginpangabay niya ang magasin nga nagaunod sina nga impormasyon.

Himua Ini Tubtob Matapos

18, 19. (a) Sa anong dugang nga mga punto dapat kita ‘maghatag sing igtalupangod’ samtang ginahimo naton ang aton ministeryo? (b) Ano ang sayop nga mga ideya sang iban nahanungod sa aton kag sa aton mga pagtuluohan, kag paano naton sila masabat?

¹⁸ Labaw sa tanan, dapat kita magpailob sa mga tawo. Maghambal sing mahinay kag upod ang pagkamainabyanon. Ipakita ang gugma kag kalulo. (Galacia 5:​22, 23) Sa wala pa makakadto sa masunod nga ganhaan, hunahunaa kon ano ang natabo sa una agod makita kon diin ang mahimo nga palauswagon. Mangin mahangpunon, kay madamo nga tawo ang may sayop nga ideya nahanungod sa mga Saksi ni Jehova. Mahimo sila magsiling: ‘Ginalikawan ninyo ang politika kag ang mga katungdanan sibiko,’ ‘Ginadumilian ninyo ang pagserbisyo militar,’ ukon, ‘Ginaguba ninyo ang mga pamilya.’ Apang ini nga panimuot kaangay anay sa panimuot sang kalibutan sa aton mga masigka tumuluo sang unang siglo. Ipakita ini sa mga tagbalay, ayhan nagagamit sang mga kinutlo gikan sa tig-ulo nga “Neutrality” sang Reasoning nga libro.

¹⁹ Nahanungod sa unang mga Cristiano, ang istoryador nga si Will Durant nagsulat: “Sa isa ka Cristiano ang iya relihion isa ka butang nga nahamulag sa kag labaw sa politikal nga katilingban; ang iya pinakamataas nga katutom wala kay Cesar kundi kay Cristo. . . . Ang pagpahilayo sang Cristiano gikan sa dutan-on nga mga buhat ginakabig sang pagano nga pagpahilayo sa katungdanan sibiko, nga pagpaluya sa pungsodnon nga nahot kag kabubut-on. Ginlaygayan ni Tertullian ang mga Cristiano nga magdumili sa pagserbisyo militar; . . . ginlaygayan ang mga Cristiano sang ila mga lider nga likawan ang mga di-Cristiano, nga likawan ang ila mga hampang sa kapiestahan subong mapintas, kag ang ila mga sinehan subong mga linaga sang kabastos. . . . Ang Cristianismo [sang nagapangkombertir] ginsumbong nga nagaguba sang puluy-an.”​—⁠Caesar and Christ, pahina 647.

20, 21. (a) Ano ang luyag naton nga pat-uron kon ang mga tawo wala nagabaton? (b) Ngaa “indi [kita dapat] mag-untat” kundi magpadayon sa aton maayong hilikuton nga pagbantala sang Ginharian?

²⁰ Ang iban nga mga tawo wala nagapamati, bisan ano ang isiling naton. Apang bangod ina sang pagsikway nila sa mensahe sang Ginharian, indi bangod sang kapaslawan naton sa paghimo sang maayo sing kalidad nga mga presentasyon sa aton ministeryo. (Lucas 10:​8-11; Binuhatan 17:32; Ezequiel 3:​17-19) Dapat naton himuon ang aton labing masarangan paagi sa bulig sang Dios, kag pat-uron ni Jehova nga ang hilikuton himuon tubtob matapos ini.​—⁠Ipaanggid ang Filipos 1:⁠6.

²¹ Upod ang bug-os nga pagsalig nian, magpadayon nga “nagabugana gihapon sa buluhaton sang Ginuo, sa nahibaluan ninyo nga ang inyo pagpangabudlay indi walay pulos.” (1 Corinto 15:58) “Hatagi pirme sing igtalupangod ang imo kaugalingon kag ang imo pagpanudlo. Magpadayon sa sina, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Labaw sa tanan, “dili kita mag-untat sa paghimo sing maayo, kay sa nagakaigo nga dag-on magaani kita kon indi kita pagpunawon.”​—⁠Galacia 6:⁠9.

Madumduman Mo Bala?

◻ Ano ang pila ka paagi sa paghupot sing positibo nga panimuot sa masunson ginapangabudlayan nga teritoryo?

◻ Paano naton mapangita sing labi kaid-id ang mga takus?

◻ Paano naton tinguhaan nga sugilanon ang mga nagareklamo nga pirme kuno kita nagaduaw?

◻ Sa anong mga paagi masugata naton ang hangkat sang dipagsapak?

◻ Ano ang magapauswag sang kalidad sang aton ministeryo?