Ang Cristianong balatyagon amo ang ebanghelismo, ang pagsugid sa mensahe sang paggawad. . . . Apang, ang paglapnag sang impluensia kag panudlo ni Jesus, sang naunang panag-on, ginhimo sang mga lalaki nga ginatawag naton mga misyonero. Ginhimo ini sang mga lalaki sang tanan nga palamugnan kag okupasyon kag sang tanan nga klase sang katilingban. Ginhimo [nila] tubtob sa pinakamalayo nga dulunan sang [Romanong] emperyo inang sekreto sang nasulod nga kabuhi, inang bag-o nga panimuot sa kalibutan, nga sa ila eksperiensia nagkahulugan sang kaluwasan. . . . [Ang dumaan nga Cristianismo] kombinsido gid sa nagahilapit nga katapusan sang karon nga kahimusan sang kalibutan. Nagtuo ini sa hinali kag milagruso nga pagtukod sa bag-ong kahimtangan sang kalibutan.”

18. Anong daku nga paglaum ang nagalabaw sa mga damgo sang mga lider sa politika?

¹⁸ Sa pamalaybalay nga pagpanaksi kag sa iban nga dagway sang ila ministeryo, ang mga Saksi ni Jehova malipayon nga nagatudlo sa ila mga tagpamalati sa bag-ong kalibutan nga ginsaad sang Dios. Ang gintagna nga mga pagpakamaayo sang walay katapusan nga kabuhi nagalabaw gid sa pinakamatahom nga damgo sang karon nga mahimo nga mga manunukod sang bag-ong kahimusan sang kalibutan. (2 Pedro 3:​13; Bugna 21:​1-4) Bisan pa nga ang tanan maluyag sa pagkabuhi sa matahom nga bag-ong kalibutan sang Dios, indi amo sina ang matabo. Apang, binagbinagon naton sa masunod ang pila ka epektibo nga mga paagi nga matudluan sang mga alagad ni Jehova ang mga nagapangita sang kabuhi nga dayon.

Paano Mo Sabton?

◻ Ngaa makasiling kita nga ang Binuhatan 5:​42 kag Binuhatan 20:​20 nagakahulugan nga ang mga sumulunod ni Jesus dapat magbantala sa pamalaybalay?

◻ Paano naton nahibaluan nga nahamuot ang Dios sa pamalaybalay nga ministeryo sang mga Saksi ni Jehova?

◻ May kaangtanan sa ministeryo, ano ang ginakinahanglan sa mga gulang kag sa mga ministeryo nga alagad?

◻ Ano dapat ang lugar sang pagpanaksi sa kabuhi sang Cristiano?

Pangitaa ang mga May Huyog sa Pagkamatarong Para sa Kabuhi nga Walay Katapusan

“Ang tanan nga may huyog sa pagkamatarong para sa kabuhi nga walay katapusan nagtuo.”​—⁠BINUHATAN 13:48.

1. Nahanungod sa tawhanon nga tagipusuon, ano ang ikasarang ni Jehova?

ANG tagipusuon sarang mabasa ni Jehova nga Dios. Gin-athag ini sang naglakat si manalagna Samuel agod haplasan ang anak nga lalaki ni Jesse subong hari sang Israel. Sang nakita si Eliab, si Samuel “nagsiling: ‘Sa pagkamatuod ang hinaplas ni Jehova yari sa iya atubangan.’ Apang si Jehova nagsiling kay Samuel: ‘Dili ka magtulok sa iya nawong ukon sa iya kataason, bangod nga ginsikway ko sia. Kay ang Dios nagatan-aw indi subong sang pagtan-aw sang tawo; apang si Jehova nagatulok sa tagipusuon.’ ” Sing nahisuno, si Samuel ginsugo sa paghaplas kay David, nga napamatud-an nga ‘kalahamut-an sa tagipusuon sang Dios.’​—⁠1 Samuel 13:​13, 14; 16:​4-13.

2. Ano ang nagpanggamot sa malaragwayon nga tagipusuon sang tawo, kag busa ano ang aton mabasa nahanungod sini sa Kasulatan?

² Ang isa nagapakita sing nagapangibabaw nga panimuot. May yara sia isa ka partikular nga disposisyon nga nanggamot sa iya malaragwayon nga tagipusuon. (Mateo 12:​34, 35; 15:​18-20) Busa, aton mabasa ang tuhoy sa isa nga “ang tagipusuon nahuyog sa pagpakig-away.” (Salmo 55:21) Ginasugiran kita nga “ang bisan sin-o nga nahuyog sa pagsingkal may madamo nga paglalis.” Kag aton mabasa: “May mga kaupod nga nahuyog sa pagdugmok sa isa kag isa, apang may abyan nga suod pa sa utod.” (Hulubaton 18:​24; 29:22) Sing makalilipay, madamo ang napamatud-an nga kaangay sa iban nga mga Gentil sa dumaan nga Antioquia sa Pisidia. Sang pagkabati nahanungod sa aman ni Jehova para sa kaluwasan, “nagkasadya sila kag ginhimaya ang pulong ni Jehova, kag tanan nga may huyog sa pagkamatarong sang kabuhi nga walay katapusan nagtuo.”​—⁠Binuhatan 13:44-48.

Ang mga Tumuluo “Putli sing Tagipusuon”

3, 4. (a) Sin-o ang putli sing tagipusuon? (b) Paano nakita sang mga putli sing tagipusuon ang Dios?

³ Ang mga nagtuo sa Antioquia nangin bawtismado nga mga Cristiano, kag ang matutom sa tunga nila makaaplikar sa ila kaugalingon sang ginsiling ni Jesus: “Malipayon ang putli sing tagipusuon, kay sila makakita sa Dios.” (Mateo 5:8) Apang sin-o ang “putli sing tagipusuon”? Kag paano sila “makakita sa Dios”?

⁴ Ang putli sing tagipusuon matinlo sa sulod. May yara sila kaputli sa apresasyon, luyag, handum, kag motibo. (1 Timoteo 1:5) Sila karon makakita sa Dios sa bagay nga nakita nila ang pagpanghikot niya tungod sa mga nagahupot sing integridad. (Ipaanggid ang Exodo 33:20; Job 19:26; 42:⁠5.) Ang Griegong tinaga nga ginbadbad diri nga “makakita” nagakahulugan man sang “pagtan-aw upod sa hunahuna, paghangop, paghibalo.” Bangod himpit nga ginbanaag ni Jesus ang personalidad sang Dios, ang paghangop sa sina nga personalidad ginaagom sang mga “putli sing tagipusuon,” nga nagatuo kay Cristo kag sa iya nagatumbas sang sala nga halad, nagatigayon sing kapatawaran sang mga sala nila, kag nagahimo sing kalahamut-an nga pagsimba sa Dios. (Juan 14:​7-9; Efeso 1:​7) Para sa mga hinaplas, ang pagkakita sa Dios naglab-ot sa putukputukan sang ginbanhaw sila pakadto sa langit, diin aktuwal nila nga nakita ang Dios kag si Cristo. (2 Corinto 1:​21, 22; 1 Juan 3:2) Apang ang makita ang Dios paagi sa sibu nga ihibalo kag matuod nga pagsimba posible lamang para sa tanan nga putli sing tagipusuon. (Salmo 24:​3, 4; 1 Juan 3:​6; 3 Juan 11) Sila may huyog sa pagkamatarong sa kabuhi nga walay katapusan sa langit ukon sa paraiso nga duta.​—⁠Lucas 23:​43; 1 Corinto 15:​50-57; 1 Pedro 1:​3-5.

5. Paano lamang ang isa mangin tumuluo kag matuod nga sumulunod ni Jesucristo?

⁵ Ang wala sing huyog sa pagkamatarong sa kabuhi nga walay katapusan indi mangin tumuluo. Indi posible para sa ila ang magtuo. (2 Tesalonica 3:2) Dugang pa, wala sing isa ang mangin matuod nga sumulunod ni Jesucristo kon indi sia magpatudlo kag si Jehova, nga nakakita kon ano ang yara sa tagipusuon, magpasuod sina nga tawo. (Juan 6:​41-47) Sa pagkamatuod, sa pagbantala sa pamalaybalay, ang mga Saksi ni Jehova wala nagahukom sing una kay bisan sin-o. Indi nila mabasa ang tagipusuon kundi ginatugyan ang resulta sa mahigugmaon nga mga kamot sang Dios.

6. (a) Ano ang ginsiling nahanungod sa personal nga pagpakigsugilanon sa pamalaybalay nga ministeryo? (b) Anong mga aman ang ginhimo agod buligan ang mga Saksi ni Jehova nga makita ang mga may huyog sa pagkamatarong sa kabuhi nga walay katapusan?

⁶ Ang isa ka iskolar nagakaigo nga nagsiling: “[Si Pablo] nagtudlo sang kamatuoran sing dayag kag sa pamalaybalay. Indi lamang sa plataporma, kundi sa personal nga pagpakigsugilanon sa mga indibiduwal nga ginbantala niya si Cristo. Sing masami ang personal nga pagpakigsugilanon labi pa ka epektibo sa iban pa nga sahi ukon metodo sa paglab-ot sa kalag.” (August Van Ryn) Ang mga publikasyon kaangay sang Theo­cratic Minis­try ­School Guide­book, Rea­son­ing From the Scrip­tures, kag Ang Aton Ministeryo sang Ginharian nagabulig sa mga Saksi ni Jehova sa paghatag sing mga pamulongpulong kag sa paghimo sing labi sa personal nga pagpakigsugilanon sa ila pag-alagad sa latagon. Mapuslanon man ang mga demonstrasyon sa Miting sa Serbisyo kag ang laygay sa Teokratikong Eskwelahan sa Ministeryo. Ang nagatambong sa eskwelahan nagabaton sing hamili nga paghanas sa mga kinaiya sa paghambal subong sang maayo nga mga introduksion, nagakaigo nga paggamit sang Kasulatan, lohiko nga paghimo sa bahin, makakombinse nga argumento, paggamit sang mga ilustrasyon, kag epektibo nga konklusion. Tan-awon naton kon paano ginapakita sang Biblia ini nga instruksion nga nagahimo sa katawhan sang Dios nga labi ka epektibo samtang ginapangita nila ang mga may huyog sa pagkamatarong sa kabuhi nga walay katapusan.

Nagapahunahuna nga mga Introduksion

7. Ano ang ginatudlo sang nagabukas nga mga pinamulong sang Wali sa Bukid ni Jesus nahanungod sa mga introduksion?

⁷ Gikan sa halimbawa ni Jesus, ang mga nagahanda para sa pamalaybalay nga pagpanaksi makatuon sang pila ka butang nahanungod sa mga introduksion nga nagapukaw sang interes. Sa pagbukas sang iya Wali sa Bukid, gingamit niya ang tinaga nga “malipayon” sing siam ka beses. Halimbawa, sia nagsiling: “Malipayon ang mga nabalaka sa ila espirituwal nga kinahanglanon, kay ila ang ginharian sang langit. . . . Malipayon ang mga malulo, kay sila magapanubli sang duta.” (Mateo 5:​3-12) Ang mga dinalan direkta kag maathag. Kag yadto nga introduksion nagpukaw gid sang interes kag nagdalahig sa iya mga tagpalamati, kay sin-o bala ang indi luyag nga mangin malipayon?

8. Sa pamalaybalay nga ministeryo, paano dapat ipakilala ang topiko nga mahambalan?

⁸ Ang bisan anong topiko nga mahambalan nga ginagamit sa pamalaybalay nga ministeryo dapat ipakilala sa positibo kag maayo nga paagi. Apang indi dapat maggamit ang isa sang makakilibang nga introduksion, subong sang, “May mensahe ako para sa imo gikan sa naguwa nga espasyo.” Matuod, ang maayong balita may langitnon nga tuburan, apang ina nga introduksion mahimo nga magapatingala sa tagbalay kon bala ang Saksi dapat sapakon sing serioso ukon palakton sa gilayon.

Paggamit sing Matadlong sang Pulong sang Dios

9. (a) Paano dapat ipakilala, basahon, kag iaplikar ang mga kasulatan sa ministeryo? (b) Anong halimbawa ang ginsitar sa pagpakita kon paano si Jesus naggamit sang mga pamangkot?

⁹ Sa pag-alagad sa latagon, subong sa plataporma, ang mga kasulatan dapat ipakilala sing maayo, basahon nga may nagakaigo nga pagpadaku, kag iaplikar sa maathag kag sibu nga paagi. Ang mga pamangkot nga nagapahunahuna sa tagbalay nahanungod sa Makasulatanhon nga mga punto mapuslanon man. Sa liwat, ang mga metodo ni Jesus nagatudlo. Sang isa ka okasyon, ang isa ka tawo nga lantip sa Mosaikong Kasuguan nagpamangkot sa iya: “Manunudlo, ano bala ang himuon ko sa pagpanubli sang kabuhi nga walay katapusan?” Sa pagsabat si Jesus namangkot: “Ano bala ang nasulat sa Kasuguan? Paano bala ang pagbasa mo?” Sa walay duhaduha, nahibaluan ni Jesus nga isa ini ka pamangkot nga sarang masabat sang tawo. Husto ang iya sabat, nga nagasiling: “ ‘Dapat mo higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong kusog kag sa bug-os mong hunahuna,’ kag, ‘ang imo isigkatawo subong sang imo kaugalingon.’ ” Nagdul-ong ini kay Jesus sa paghatag sing komendasyon, kag nagsunod ang dugang nga paghambalanay.​—⁠Lucas 10:​25-37.

10. Ano ang dapat dumdumon tuhoy sa topiko nga mahambalan sang isa, kag ano dapat ang likawan kon nagapamangkot sa mga tagbalay?

¹⁰ Dapat ipadaku sang mga nagapanaksi sa pamalaybalay ang tema sang topiko nga mahambalan kag ipaathag ang rason para sa pagbasa sa mga teksto sa Biblia nga nagahinun-anon sina nga tema. Bangod ginatinguhaan sang Saksi nga malab-ot ang tagipusuon sang tagbalay, dapat niya likawan ang mga pamangkot nga nagahimo sa tagbalay nga indi komportable. Sa paggamit sang Pulong sang Dios, ‘kabay nga ang aton pinamulong pirme nga malulo, nga naunawan sang asin.’​—⁠Colosas 4:⁠6.

11. Sa paggamit sang Kasulatan sa pagtadlong sa sayop nga mga pagpati, ano nga halimbawa ang matigayon naton gikan sa pagsulay ni Satanas kay Jesus?

¹¹ Labi na sa mga pagduaw liwat ayhan kinahanglan nga tadlungon ang sayop nga mga pagpati paagi sa pagpakita sang kon ano gid ang ginasiling ukon kahulugan sang mga Kasulatan. Ginhimo man ina ni Jesus sang ginprangka niya si Satanas, nga nagsiling: “Kon ikaw anak sang Dios, lukso ka paidalom [gikan sa atop sang templo, kaangay sang paghikog]; kay nasulat na, ‘Magsugo sia sa iya mga anghel sa pagtatap sa imo, kag bayawon ka nila sa ila mga kamot, basi nga makasandad ang imo tiil sa bato.’ ” Ang Salmo 91:​11, 12, nga ginbalikwat ni Satanas, wala nagapanugda sang pagbutang sang kabuhi sa katalagman, nga isa ka dulot halin sa Dios. Nakahibalo nga sayop ang tilawan si Jehova paagi sa paghuluhampang sa iya kabuhi, ginsilingan ni Jesus si Satanas: “Nasulat na man, ‘Dili mo pagsulayon si Jehova nga imo Dios.’ ” (Mateo 4:​5-7) Sa pagkamatuod, si Satanas wala nagapangita sang kamatuoran. Apang kon ang rasonable nga mga tawo nagapabutyag sing sayop nga mga pagpati nga mahimo mag-upang sa ila espirituwal nga pag-uswag, dapat ipakita sing mataktikahon sang ministro sang Pulong sang Dios kon ano gid ang ginasiling kag kahulugan sang Kasulatan. Bahin ini tanan sang “paggamit sing matadlong sang pulong sang kamatuoran”​—⁠isa sa importante nga mga leksion nga ginatudlo sa Teokratikong Eskwelahan sa Ministeryo.​—⁠2 Timoteo 2:⁠15.

May Bahin ang Pagbuyok

12, 13. Ngaa nagakaigo ang paggamit sang pagbuyok sa ministeryo?

¹² Ang pagbuyok may yara nagakaigo nga bahin sa Cristianong ministeryo. Halimbawa, ginlaygayan ni Pablo ang kaupod niya nga manugpangabudlay nga si Timoteo nga magpadayon sa mga butang nga natun-an niya kag “nabuyok sa pagpati.” (2 Timoteo 3:14) Sa Corinto, si Pablo “nagpakigbais sa sinagoga sa tagsa ka adlaw nga inugpahuway kag nagbuyok sang mga Judiyo kag mga Griego.” (Binuhatan 18:​1-4) Sa Efeso, madinalag-on sia nga ‘nagpamulong kag naggamit sang pagbuyok nahanungod sa ginharian sang Dios.’ (Binuhatan 19:8) Kag sang nabilanggo sa balay sa Roma, gintawag sang apostol ang mga tawo sa iya kag nagpanaksi sa ila, “nagabuyok sa ila,” kag ang iban nangin mga tumuluo.​—⁠Binuhatan 28:​23, 24.

¹³ Sa pagkamatuod, walay sapayan kon daw ano ka daku ang pagtinguha sang Saksi sa pagbuyok, yadto lamang ang mga may huyog sa pagkamatarong sa kabuhi nga walay katapusan ang nangin mga tumuluo. Ang makakombinse nga mga argumento kag matin-aw nga mga paathag, nga ginpresentar sing mataktikahon, mahimo nga magabuyok sa ila nga magtuo. Apang ano pa ang makabulig sa pagbuyok sa ila?

Mangin Lohiko kag Makakombinse

14. (a) Ano ang ginalakip sang lohiko kag nagahilisanto nga paghuman sang pamulongpulong? (b) Ano ang ginakinahanglan sang makakombinse nga argumento?

¹⁴ Ang isa sa mga kinaiya sa paghambal nga ginpadaku sa Teokratikong Eskwelahan sa Ministeryo amo ang lohiko kag nagahilisanto nga paghuman sang pamulongpulong. Nagalakip ini sang pagbutang sa tanan nga pangunang mga ideya kag importante nga materyal sing pasunod. Kinahanglan man ang makakombinse nga argumento, nga nagakinahanglan sang pagpasad sing maayo nga sadsaran kag paghatag sing maayo nga pamatuod. Lakip sa sini amo ang pagbulig sa mga tagpalamati nga mangatarungan paagi sa paghupot sing ginaugyunan nga punto, pagpaguwa sing nagakaigo sang mga punto, kag pag-aplikar sini sing epektibo. Sa liwat, ang Kasulatan nagahatag sing mga pagsulundan.

15. (a) Paano ginkuha ni Pablo ang igtalupangod kag gintukod ang butang nga maugyunan sang nagpamulongpulong sia sa Bungyod sang Mars? (b) Sa pamulongpulong ni Pablo, ano ang pamatuod naton nahanungod sa lohiko kag nagahilisanto nga paghuman sang pamulongpulong?

¹⁵ Ining mga kinaiya sa paghambal makita sa bantog nga pamulongpulong ni apostol Pablo sa Bungyod sang Mars sa dumaan nga Atenas. (Binuhatan 17:​22-31) Ang iya introduksion nagganyat sang igtalupangod kag nagpasad sing punto nga maugyunan, kay nagsiling sia: “Mga tawo nga taga-Atenas, sa tanan nga butang ginahantop ko nga kamo masinimbahon gid.” Para sa ila, walay duhaduha nga isa ini ka pagdayaw. Sa tapos nasambit ang altar nga gindedikar sa “Sa Dios nga Wala Makilal-i,” ginpadayon ni Pablo ang iya lohiko kag nagahilisantu nga paghuman sang pamulongpulong kag makakombinse nga argumento. Ginpakita niya nga ining Dios nga wala nila makilal-i amo ang ‘naghimo sang kalibutan kag sang tanan nga butang nga yara sa sini.’ Indi kaangay kay Athena kag sa iban pa nga mga Griegong dios, ‘wala sia nagapuyo sa mga templo nga ginhimo sang tawo, ukon ginaalagad sia sang mga kamot sang tawo.’ Masunod nga ginpakita sang apostol nga ini nga Dios naghatag sa aton sang kabuhi kag wala naghimo sa aton nga magpangita sa iya sing binulag. Nian nangatarungan si Pablo nga ang aton Manunuga, nga naglaktaw sang mga tion sang idolatroso nga pagkaignorante, ‘nagatugon sa mga tawo bisan diin nga maghinulsol.’ Lohiko ini nga nagdul-ong sa punto nga ang ‘magahukom sang kalibutan sa pagkamatarong paagi sa tawo nga iya gintangdo nga ginbanhaw niya.’ Bangod kay si Pablo ‘nagwali sang maayong balita nahanungod kay Jesus kag sa pagkabanhaw,’ nahibaluan sang mga taga-Atenas nga ining Hukom amo si Jesucristo.​—⁠Binuhatan 17:18.

16. Paano ang ministeryo sang isa maapektuhan sang pamulongpulong ni Pablo sa Bungyod sang Mars kag sang paghanas sa Teokratikong Eskwelahan sa Ministeryo?

¹⁶ Matuod, si Pablo wala nagapanaksi sa pamalaybalay sa Bungyod sang Mars. Apang gikan sa iya pamulongpulong kag sa paghanas nga ginahatag sa Teokratikong Eskwelahan sa Ministeryo, daku ang matun-an sang mga Saksi ni Jehova nga sarang makapasangkad sang ila pag-alagad sa latagon. Huo, ini tanan nagabulig sa ila nga mangin labi ka epektibo nga mga ministro, subong nga ang lohiko nga paghimo ni Pablo sang iya pamulongpulong kag sang iya makakombinse nga pag-argumento nagbuyok sa iban nga mga taga-Atenas nga magtuo.​—⁠Binuhatan 17:​32-34.

Maggamit sing Makatudlo nga mga Ilustrasyon

17. Ano nga sahi sang mga ilustrasyon ang dapat gamiton sa ministeryo?

¹⁷ Ang Teokratikong Eskwelahan sa Ministeryo nagabulig man sa mga ministro sang Dios sa paggamit sing maayong mga ilustrasyon sa pamalaybalay nga pagpanaksi kag sa iban pa nga bahin sang ila ministeryo. Agod ipadaku ang importante nga mga punto, ang simple nga mga ilustrasyon nga maayo dapat gamiton. Dapat ini kuhaon sang Saksi gikan sa pamilyar nga mga sitwasyon kag maghalong nga athagon ang aplikasyon sini. Nasugata sang mga ilustrasyon ni Jesus ining tanan nga mga kinahanglanon.

18. Paano napamatud-an nga mapuslanon ang Mateo 13:​45, 46 sa ministeryo?

¹⁸ Halimbawa, binagbinaga ang mga pinamulong ni Jesus: “Ang ginharian sang langit kaangay sang isa ka manugpatikang nga nagapangita sing maayong mga mutya. Sang pagkakita niya sang isa ka mutya nga bilidhon, naglakat kag ginbaligya niya ang tanan niya kag ginbakal ang mutya.” (Mateo 13:​45, 46) Ang mga mutya bilidhon nga mga hiyas nga makita sa sulod sang alukaba sang sisi kag iban pa nga mga mol­lusk. Apang pila lamang ka mutya ang “maayo.” Ang manugpatikang may paghantop nga kinahanglanon sa pag-apresyar sa nagalabaw nga balor sining isa ka mutya kag handa sa paghatag sang tanan agod matigayon ini. Ayhan sa tion sang pagduaw liwat ukon pagtuon sa Biblia, ining ilustrasyon sarang magamit sa pagpakita nga ang indibiduwal nga nagaapresyar gid sa Ginharian sang Dios magapanghikot kaangay sinang manugpatikang. Hatagan niya sing prioridad sa kabuhi ang Ginharian, nakahibalo nga takus ini sa bisan ano nga sakripisyo.

Maghinakop Upod ang Motibasyon

19. Sa pamalaybalay nga ministeryo, ano dapat ang ipakita sang mga konklusion sa tagbalay?

¹⁹ Sa Teokratikong Eskwelahan sa Ministeryo, natun-an man sang katawhan sang Dios nga ang konklusion sang isa ka pamulongpulong ukon paghinun-anon dapat nga may direkta nga kaangtanan sa tema kag dapat magpakita sa mga nagapamati kon ano ang himuon kag palig-unon sila nga himuon ini. Sa pamalaybalay nga ministeryo, dapat ipakita sing pat-od sa tagbalay kon ano nga dalanon ang ginapaabot sa iya, subong sang pagbaton sa publikasyon sa Biblia ukon pagpasugot sa isa ka pagduaw liwat.

20. Anong maayo nga halimbawa sang nagapahulag nga konklusion ang matigayon naton sa Mateo 7:​24-27?

²⁰ Ang konklusion sang Wali sa Bukid ni Jesus nagahatag sing maayo nga halimbawa. Paagi sa madali mahangpan nga ilustrasyon, ginpakita ni Jesus nga maalamon nga dalanon ang pagpamati sa iya mga pulong. Sia naghinakop: “Busa ang tagsatagsa nga nagapamati sining mga pulong ko kag nagatuman sa ila ipaangay sa tawong mainandamon nga nagtukod sang iya balay sa ibabaw sang igang. Kag nag-ulan kag nagbaha kag naghuyup ang kahanginan kag nagsampi sadtong balay kag wala ini mapukan, kay natukod ini sa ibabaw sang igang. Kag ang tagsatagsa nga nagapamati sining mga pulong ko kag wala nagatuman sa ila ipaanggid sa tawong buangbuang nga nagtukod sang iya balay sa ibabaw sang balas. Kag nag-ulan kag nagbaha kag naghuyup ang kahanginan kag nagsampi sadtong balay, kag napukan ini kag daku ang iya pagkapukan.” (Mateo 7:​24-27) Nagapakita gid ini nga ang mga ministro sang Dios dapat manikasog sa pagpahulag sa mga tagbalay!

21. Ano ang gin-ilustrar sang aton ginhambalan, apang ano ang dapat naton kilalahon?

²¹ Ang nasambit na nga mga punto nagailustrar sa kon paano ang Teokratikong Eskwelahan sa Ministeryo makabulig sa madamo nga mangin kalipikado nga mga manugbantala sang Ginharian. Sa pagkamatuod, ang mangin kalipikado sing nagakaigo naghalin sa Dios. (2 Corinto 3:​4-6) Kag kon daw ano man ka kalipikado ang ministro, wala sing isa ang makabuyok sa mga tawo nga mangin tumuluo kon indi sila pag-ipasuod sang Dios paagi kay Cristo. (Juan 14:6) Apang, dapat gid himuslan sang katawhan sang Dios ang tanan nga espirituwal nga mga aman ni Jehova samtang ginapangita nila ang mga may huyog sa pagkamatarong sa kabuhi nga walay katapusan.

Ano ang Imo Sabat?

◻ Sin-o ang “putli sing tagipusuon,” kag paano sila ‘nakakita sa Dios’?

◻ Anong mga butang ang dapat binagbinagon kon nagapakilala sang mensahe sang Ginharian sa pamalaybalay nga hilikuton?

◻ Paano magamit sing matadlong ang Pulong sang Dios sa ministeryo?

◻ Ano ang makabulig sa paghimo sing lohiko kag makakombinse nga mga presentasyon sa pag-alagad sa latagon?

◻ Ano ang dapat dumdumon nahanungod sa mga ilustrasyon nga gingamit sa ministeryo?

◻ Ano dapat ang mahimo sang mga konklusion nga gingamit sa pagpanaksi nga hilikuton?

[Laragway sa pahina 16]

Si Jesus nagsiling nga ang “putli sing tagipusuon” “makakita sa Dios.” Ano ang kahulugan sini?

[Laragway sa pahina 18]

Ang mga Kasulatan dapat ipakilala sing maayo, basahon nga may nagakaigo nga pagpadaku, kag iaplikar sa maathag kag sibu nga paagi